དགེ་རྒན།
དགེ་རྒན་ཞེས་པའི་མིང་བརྡ་དེར་གོ་དོན་རིགས་གཉིས་མཆིས་ཤིང་། སྒྲ་ཡངས་འཇུག་གི་སྒོ་ནས་བཤད་ན། དགེ་རྒན་ནི་ཤེས་བྱ་དང་ཉམས་མྱོང་སློབ་ཁྲིད་ཀྱི་མི་སྣ་ཡོངས་ལ་གོ་བ་དང་། སྒྲ་དོག་འཇུག་གི་སྒོ་ནས་བཤད་ན། དགེ་རྒན་ནི་ཆེད་ལས་ཀྱི་སློབ་གསོ་དང་སྦྱོང་བརྡར་ཐོབ་པའི་མི་སྣ་ལ་གོ་བར་མ་ཟད། སློབ་གསོའི་གོ་རིམ་ཁྲོད་སློབ་གསོ་དང་སློབ་ཁྲིད་ཀྱི་བྱ་བའི་འགན་འཁུར་མཁན་གྱི་མི་སྣ་ལ་གོ་བ་ཡིན། སངས་རྒྱས་ཆོས་ལུགས་ཀྱི་གཞུང་ནས་བཤད་ཚུལ་ནི། རང་ཉིད་ཀྱི་སྒོ་གསུམ་ཉེ་སྤྱོད་ལས་ལྡོག་ཅིང་། ཡ་རབས་དགེ་བའི་ཕྱོགས་ལ་སྦྱོར་མཁས་པ་དང་། རང་ཉིད་ལས་ཡོན་ཏན་གྱི་སྒོ་ནས་རྒན་པ་ཡིན་པའི་དབང་གིས་དགེ་རྒན་ཞེས་ཐོགས་པར་གསུངས།
སློབ་མ།
སློབ་མ་ནི་སྤྱིར་བཏང་དུ་སློབ་གྲྭ་དང་སློབ་སྦྱོང་གི་ཁོར་ཡུག་གཞན་དུ་སློབ་གསོ་མྱོང་མཁན་གྱི་མི་ལ་གོ་བ་ཡིན་ཞིང་། ཞིབ་འཇུག་ལས་ཁུངས་སམ་བྱ་བའི་ལས་ཁུངས་སུ་སློབ་སྦྱོང་གི་མི་ཡིས་ཀྱང་རང་གིས་རང་ལ་སློབ་མ་ཞེས་འབོད་པ་ཡིན་ལ། སྔོན་ཆད་སློབ་མའི་ངོ་བོ་དང་གཅིག་འདྲ་ཡིན་པ་ནི་དགེ་ཕྲུག་སོགས་མང་བོ་ཡོད་པ་ཡིན། སློབ་ནི་སློབ་སྦྱོང་དང་མ་ནི་བདག་སྒྲ་ཡིན་པས། རིམ་པ་མི་འདྲ་བར་བསྟུན་ནས་སློབ་སྔོན་སློབ་མ་དང་སློབ་ཆུང་སློབ་མ། སློབ་འབྲིང་སློབ་མ། སློབ་ཆེན་སློབ་མ་སོགས་ཡོད། གཞན་སློབ་ཆེན་སློབ་མ་ལ་ཡང་ཆེད་སྦྱོང་སློབ་མ་དང་མཐོ་རིམ་ལས་རིགས་སློབ་གྲྭའི་སློབ་མ། དངོས་གཞིའི་སློབ་མ། རབ་འབྱམས་ཞིབ་འཇུག་སློབ་མ། འབུམ་རམས་ཞིབ་འཇུག་སློབ་མ་བཅས་ཡོད།
གཤིས་རྒྱུད།
གཤིས་རྒྱུད་ནི་མི་ཞིག་གིས་དོན་དངོས་ལ་འཆིང་བའི་བརྟན་བརླིང་གི་རྣམ་འགྱུར་དང་དེ་མཐུན་གྱི་གོམས་སྲོལ་ཅན་གྱི་སྤྱོད་ལམ་གྱི་རྣམ་པ་ཞིག་ཡིན་ཞིང་། དེ་ནི་མིའི་རང་གཤིས་ཀྱི་ནང་ནས་ཆེས་གལ་ཆེན་དང་ཆེས་མངོན་གསལ་གྱི་སེམས་ཁམས་ཁྱད་ཆོས་ཤིག་ཡིན་ལ། མིའི་རང་གཤིས་ཀྱི་ཁྲོད་དུ་གཙོ་གནས་ཀྱི་ནུས་པ་འདོན་གྱིན་ཡོད་པས། མི་དང་མིའི་ཁྱད་པར་འབྱེད་བྱེད་ཀྱི་གཅིག་བསྡུས་ཀྱི་མངོན་རྟགས་ཤིག་ཡིན།
དྲན་པ།
དྲན་པའི་ནུས་ཤུགས་ལེགས་པོ་ཞིག་ཡོད་ན་དེང་རབས་ཚན་རིག་དང་རིག་གནས་ཤེས་ཡོན་ཁོང་དུ་ཆུད་པ་དང་ཉམས་མྱོང་ཕུན་སུམ་ཚོགས་པ་ཞིག་གསོག་ཐུབ་པ་དེ་ཀུན་གྱིས་ཤེས། གལ་ཏེ་མིས་བརྒྱུད་མྱོང་བའི་སྔར་བྱས་ལས་དོན་ཚང་མ་བརྗེད་ན་འཚོ་ཐབས་མེད་ལ། ཤེས་རིག་འཕེལ་བ་དང་ཡར་ཐོན་ཡོང་བ་ལྷག་པར་མེད། དྲན་པ་དེ་ལྟར་གལ་ཆེ་ན། དྲན་པ་ནི་ཡང་སྙིང་ཇི་ལྟ་བུ་ཞིག་ཡིན་ནམ། ཇི་ལྟར་བྱས་ན་ད་གཟོད་དྲན་པའི་ཆུ་ཚད་མཐོར་འདེགས་ཐུབ་བམ།
ནུས་པ།
བྱ་འགུལ་ཞིག་བདེ་བླག་ངང་སྒྲུབ་པར་ངེས་པར་དུ་མཁོ་ཞིང་ཐད་ཀར་བྱ་འགུལ་ལས་ཆོད་ལ་ཤུགས་རྐྱེན་ཐེབས་པའི་རང་གཤིས་ཀྱི་ཁྱད་རྟགས་དང་ཤེས་བྱའི་འཇོན་ཐང་དང་སྐྱེས་སྟོབས་ཀྱི་ཤེས་རབ་ཀྱི་རྨང་གཞི་ཡིན། ནུས་པ་དང་ཤེས་བྱའི་འཇོན་ཐང་། སྐྱེས་ཐོབ་ཀྱི་ཤེས་རབ། ནུས་པ་དེ་རྟག་པར་བྱ་འགུལ་ཞིག་དང་སྦྲེལ་ཡོད་ཅིང་ཐད་ཀར་བྱ་འགུལ་བདེ་བླག་ངང་འགྲུབ་པར་ཤུགས་རྐྱེན་ཐེབས་ཡོད།
བསམ་གཞིགས།
བྱ་དངོས་ཀྱི་གཤིས་ལུགས་དང་ནང་ཁུལ་གྱི་ཆོས་ཉིད་རང་བཞིན་དེ་མིའི་ཀླད་པར་ཤར་བ་དང་ཡང་ན་མིའི་ཀླད་པས་ཡིད་ཤེས་དང་དབང་ཤེས་ཀྱིས་འདོན་སྤྲོད་བྱེད་པའི་དཔྱད་གཞིར་སྙིགས་དོར་བཅུད་ལེན་དང་རྫུན་སྤང་བདེན་རྫུན། འདི་ནས་དེ་ཤེས། ཕྱི་ནས་ནང་ཤེས་ཀྱི་ལས་སྣོན་བྱེད་པ་ལ་ཟེར། མིའི་ཀླད་པར་ཕྱི་ཡུལ་གྱི་བྱ་དངོས་ཀྱི་ངོ་བོ་དང་ཆོས་ཉིད་དེ་གཞན་བརྒྱུད་དང་མདོར་བསྡུས་ནས་ཚུར་སྣང་བ་ཡིན། བསམ་གཞིགས་དང་རྟོག་འཆར། ཚོར་བ། ཚོར་ཤེས་སོགས་སེམས་ཁམས་སྣང་ཚུལ་ཚང་མ་ནི་མིའི་ཀླད་པར་ཕྱི་རོལ་བྱ་དངོས་ཚུར་སྣང་བྱུང་བ་ཞིག་ཡིན། ཚང་མ་མིའི་སེམས་ཁམས་བརྒྱུད་རིམ་གྱི་ཤེས་རྟོགས་བརྒྱུད་རིམ་དུ་གཏོགས། དེའི་ཕྱིར། ཚོར་བ་དང་ཚོར་ཤེས་ནི་མིའི་ཀླད་པར་ཚོར་དབང་གིས་ཐད་ཀར་ནུས་པ་ཐོན་ནས་ཕྱི་ཡུལ་ཚུར་སྣང་བ་ཡིན། བསམ་གཞིགས་དང་རྟོག་འཆར་ནི་ཚོར་བ་དང་ཚོར་ཤེས་གྱི་རྨང་གཞིའི་ཐོག་ཕྱི་ཡུལ་སྔོན་ལ་ཚུར་སྣང་བ་ཡིན། འདི་ནི་མི་དང་སྲོག་ཆགས་ཀྱི་ཁྱད་པར་འབྱེད་པའི་རྩ་བའི་ཁྱད་ཆོས་ཤིག་ཡིན་ལ་མིས་ཕྱི་ཡུལ་མངོན་པའི་ཚུར་སྣང་གི་ཆེས་མཐོའི་རྣམ་པ་ཡིན།
བྱིས་གཉོར་ཁང་།
བྱིས་གཉོར་ཁང་ནི་སློབ་སྔོན་སློབ་གསོའི་སྡེ་ཁག་ཅིག་ཡིན་ཞིང་། བྱིས་པ་རྣམས་གཅིག་བསྡུས་ཀྱིས་གསོ་སྐྱོང་དང་སློབ་གསོ་གཏོང་བ་ཡིན་ལ། རྒྱུན་དུ་ལོ་གསུམ་ནས་དྲུག་བར་གྱི་བྱིས་པ་དག་བྱིས་གཉོར་ཁང་དུ་སྐྱེལ་བ་ཡིན། བྱིས་གཉོར་ཁང་ནི་བྱིས་པ་རྣམས་ཀྱི་དགའ་དགའ་སྐྱིད་སྐྱིད་བྱེད་སའི་གནས་ཤིག་ཡིན་ལ། དེས་བྱིས་པ་རྣམས་བདེ་ཐང་དགའ་སྤྲོའི་ངང་བྱིས་དུས་ཀྱི་འཚོ་བ་སྐྱིད་པོ་ཞིག་རོལ་བར་རོགས་བྱེད་པ་ཡིན།
མཐོ་རིམ་སློབ་གྲྭ།
མཐོ་རིམ་སློབ་གྲྭ་ནི་སློབ་གྲྭ་ཆེན་མོ་དང་ཆེད་ལས་སློབ་གླིང་། མཐོ་རིམ་ལས་རིགས་ལག་རྩལ་སློབ་གྲྭ། མཐོ་རིམ་ཆེད་སྦྱོང་སློབ་གྲྭ་སོགས་ཀྱི་སྤྱི་མིང་ཡིན། ཡོན་ཚད་དང་གསོ་སྐྱོང་གི་རིམ་པ་སྟེང་ནས་བཤད་ན། ཆེད་སྦྱོང་དང་དངོས་གཞི། རབ་འབྱམས་ཞིབ་འཇུག་སློབ་མ། འབུམ་རམས་ཞིབ་འཇུག་སློབ་མ་ཚང་མ་མཐོ་རིམ་སློབ་གྲྭའི་ཁོངས་སུ་གཏོགས་ཤིང་། སློབ་གྲྭ་ཆེན་མོ་ནི་མཐོ་རིམ་སློབ་གྲྭའི་ཆ་ཤས་ཤིག་ཡིན།
ལས་རིགས་ལག་རྩལ་སློབ་གྲྭ།
ལས་རིགས་ལག་རྩལ་སློབ་གྲྭ་ནི་འབྲིང་རིམ་ཆེད་ལས་སློབ་གྲྭའི་ཡན་ལག་ཅིག་ཡིན་ཞིང་། དེ་ནི་ལས་རིགས་ལག་རྩལ་གསོ་སྦྱོང་དང་ངལ་རྩོལ་ནུས་ཤུགས་ཀྱི་ལས་ཞུགས་ཆུ་ཚད་མཐོ་རུ་གཏོང་བ་གཙོ་བོར་འཛིན་པའི་སློབ་གྲྭ་དང་ཀྲུང་གོའི་ཁྱད་ཆོས་ལྡན་པའི་སློབ་གཉེར་བྱེད་སྟངས་ཀྱི་ཐོན་རྫས་ཡིན། ལག་རྩལ་གསོ་སྦྱོང་བྱས་པ་བརྒྱུད་ནས་ཚོང་རའི་ལས་ཞུགས་འགྲན་རྩོད་ཀྱི་ནུས་ཤུགས་མཐོ་རུ་གཏོང་བ་དང་། ལག་རྩལ་དཔྱད་ཞིབ་བྱས་པ་བརྒྱུད་དེ་ཚད་ལྡན་དུ་གྱུར་ཚེ་རྒྱལ་ཁབ་ཀྱིས་ཁས་ལེན་པའི་ལས་རིགས་ཐོབ་ཐང་དཔང་ཡིག་དང་འབྲིང་རིམ་གྱི་སློབ་གཉེར་བརྒྱུད་རིམ་གྱི་ཐོབ་ཐང་གནང་བ་ཡིན།
ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་སློབ་གསོ་པུའུ།
ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་སློབ་གསོ་པུའུ་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་རྒྱལ་སྲིད་སྤྱི་ཁྱབ་ཁང་གིས་སློབ་གསོའི་ལས་དོན་དང་སྐད་དང་ཡི་གེའི་བྱ་བ་གཙོ་བོ་གཉེར་བའི་རྒྱལ་སྲིད་སྤྱི་ཁྱབ་ཁང་གི་སྡེ་ཁག་ཅིག་ཡིན། སློབ་གསོ་པུའུ་ཡིས་ཐད་ཀར་དུ་སློབ་གསོའི་ཕྱོགས་ཀྱི་ཚོགས་པ་དང་རྩ་འཛུགས་བཅོ་ལྔ་ལྷག་ལ་དོ་དམ་བྱེད་པ་ཡིན། སྤྱི་ལོ1985ལོ་ནས་སྤྱི་ལོ1998ལོར་སློབ་གསོ་པུའུ་ལ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་སློབ་གསོ་ཨུ་ཡོན་ལྷན་ཁང་ཟེར། སློབ་གསོ་པུའུ་ནི་སྤྱིར་བཏང་གི་སྲིད་འཛིན་དོ་དམ་སྡེ་ཁག་དང་གཅིག་མཚུངས་མིན་ཏེ། དེ་ནི་སྲིད་འཛིན་དོ་དམ་སྡེ་ཁག་ཡིན་པར་མ་ཟད་རྒྱལ་ཁབ་ཀྱིས་གསར་འཛུགས་བྱས་པའི་སློབ་གླིང་བདག་གཉེར་བྱེད་པའི་སྡེ་ཁག་ཀྱང་ཡིན།
སློབ་གྲྭ།
སློབ་གྲྭ་ནི་འཆར་གཞི་ཡོད་པ་དང་རྩ་འཛུགས་ཡོད་པའི་སྒོ་ནས་བརྒྱུད་རིམ་ངེས་ཅན་གྱི་སློབ་གསོ་སྤེལ་བའི་རྩ་འཛུགས་སྡེ་ཁག་ཅིག་ཡིན་ལ། ཀྲུང་ཧྭ་རྒྱལ་དམངས་སྲིད་གཞུང་གི་སྐབས་སུ་བྱུང་བ་ཡིན། སློབ་གྲྭའི་སློབ་གསོ་ནི་ལས་འགན་ཆེད་གཉེར་གྱི་མི་སྣ་དང་ཆེད་གཉེར་ལས་ཁུངས་ཀྱིས་འགན་ཁུར་ནས་དམིགས་ཡུལ་ཡོད་པ་དང་གོ་རིམ་ལྡན་པ། རྩ་འཛུགས་ཡོད་པ་བཅས་ཀྱི་སྒོ་ནས། སློབ་གསོ་མྱོང་མཁན་གྱི་ལུས་སེམས་བདེ་ཐང་དམིགས་ཡུལ་གཙོ་བོར་བཟུང་བའི་སྤྱི་ཚོགས་ཀྱི་བྱེད་སྒོ་ཞིག་ཡིན། སྤྱིར་བཏང་དུ་སློབ་གྲྭའི་སློབ་གསོ་ལ་དམའ་རིམ་སློབ་གསོ་དང་འབྲིང་རིམ་སློབ་གསོ། མཐོ་རིམ་སློབ་གསོ་བཅས་གསུམ་འདུ་བ་དང་། སློབ་གྲྭ་ནི་གཙོ་བོ་རིགས་བཞི་རུ་དབྱེ་ཞིང་། དེ་དག་ནི་བྱིས་གཉོར་ཁང་དང་སློབ་ཆུང་། དམའ་འབྲིང་། སློབ་འབྲིང་། སློབ་ཆེན་བཅས་བཞི་ཡིན།
སྤྱི་ཚོགས་སློབ་གསོ།
སྤྱི་ཚོགས་སློབ་གསོ་དང་སློབ་གྲྭའི་སློབ་གསོ། ཁྱིམ་ཚང་སློབ་གསོ་གསུམ་ནི་སློབ་གསོའི་ལོ་རྒྱུས་ཐོག་གི་གྲུབ་ཆ་གསུམ་ཡིན་པ་དང་། དེ་དག་སོ་སོར་ཐུན་མོང་མ་ཡིན་པའི་རང་རང་གི་ཁྱད་ཆོས་རེ་ཡོད། སྤྱི་ཚོགས་སློབ་གསོ་ཟེར་བ་ནི་སྤྱི་ཚོགས་འཚོ་བས་མིའི་རིགས་ཀྱི་ལུས་སེམས་འཕེལ་བའི་ཆོས་ཉིད་ལ་བྱ་འགུལ་སྣ་ཚོགས་བརྒྱུད་ནས་སློབ་གསོའི་ཤུགས་རྐྱེན་འཇོག་པ་དེ་འདྲ་ཞིག་ཡིན། དེ་ལ་ནང་གསེས་གཉིས་ཡོད་དེ། གཅིག་ནི་སྒྲ་ཡངས་འཇུག་གི་སྤྱི་ཚོགས་སློབ་གསོ་ཡིན་པ་དང་། གཞན་ཞིག་ནི་སྒྲ་དོག་འཇུག་གི་སྤྱི་ཚོགས་སློབ་གསོ་ཡིན། སྒྲ་ཡངས་འཇུག་གི་སྤྱི་ཚོགས་སློབ་གསོ་ནི་སྤྱི་ཚོགས་འཚོ་བས་མིའི་རིགས་ཀྱི་ལུས་སེམས་འཕེལ་རྒྱས་ལ་ཤུགས་རྐྱེན་འཇོག་པའི་སློབ་གསོ་ལ་གོ་ཞིང་། སྒྲ་དོག་འཇུག་གི་སྤྱི་ཚོགས་སློབ་གསོ་ནི་སློབ་གྲྭའི་སློབ་གསོ་མ་གཏོགས་པའི་རིག་གནས་སློབ་གསོ་ཡིས་རྒན་དར་གཞོན་གསུམ་ལ་སློབ་གསོ་གཏོང་བའི་བྱ་འགུལ་རིགས་སྣ་ཚོགས་ལ་བརྗོད་པ་ཡིན། དེང་རབས་ཅན་གྱི་སྤྱི་ཚོགས་སློབ་གསོ་ནི་སློབ་གྲྭའི་སློབ་གསོར་ཁ་གསབ་བྱེད་པའི་སློབ་གསོ་གལ་ཆེན་ཞིག་ཡིན། སྤྱི་ཚོགས་ལམ་ལུགས་མི་གཅིག་པའི་རྒྱལ་ཁབ་དང་སྲིད་དབང་དེའི་སྤྱི་ཚོགས་སློབ་གསོའི་ངོ་བོ་ཡང་ཐ་དད་ཡིན།
སློབ་གསོ་རིག་པ།
སློབ་གསོ་རིག་པ་ནི་སློབ་གསོའི་སྣང་ཚུལ་དང་དེ་དག་གི་ཆོས་ཉིད་ལ་ཞིབ་འཇུག་བྱེད་པའི་ཚན་རིག་ཅིག་ཡིན་ཞིང། མིའི་རིགས་ཀྱི་འཚོ་བའི་ཁྲོད་རྒྱུན་འབྱམས་སུ་སོང་འདུག སློབ་གསོའི་སྣང་ཚུལ་དང་། སློབ་གསོའི་གནད་དོན་ལ་ཞིབ་འཇུག་བྱས་པར་བརྟེན་ནས་སློབ་གསོའི་སྤྱིར་བཏང་གི་ཆོས་ཉིད་གསེད་བཀྲོལ་བྱེད་པ་ཡིན། དུས་རབས19བའི་དུས་དཀྱིལ་གྱི་ཚུན་ལ། མར་ཁེ་སི་རིང་ལུགས་བྱུང་བ་དང་། ཉེ་རབས་ཀྱི་སེམས་ཁམས་རིག་པ་དང་ལུས་ཁམས་རིག་པའི་འཕེལ་རྒྱས་བཅས་ཀྱིས་ཚན་རིག་ཅན་གྱི་སློབ་གསོར་རྩོད་སྒྲུབ་དངོས་གཙོ་རིང་ལུགས་ཀྱི་མཚན་ཉིད་རིག་པ་དང་རང་བྱུང་ཚན་རིག་གི་རྨང་བཏིངས་པ་རེད། དེང་རབས་ཀྱི་ཐོན་སྐྱེད་དང་ཚན་རིག་ལག་རྩལ་གྱི་འཕེལ་རྒྱས་དང་། སློབ་གསོའི་ལག་ལེན་གྱི་རྒྱ་ཁྱབ་རང་བཞིན་དང་སྣ་འཛོམས་རང་བཞིན་གྱིས་སློབ་གསོ་རིག་པའི་འཕེལ་རྒྱས་ལ་སྐུལ་འདེད་བཏང་། སློབ་གསོ་རིག་པའི་ཞིབ་འཇུག་བྱ་ཡུལ་ནི་མིའི་རིགས་ཀྱི་སློབ་གསོའི་སྣང་ཚུལ་དང་གནད་དོན་གཉིས་ཡིན་པ་རེད།
རིག་གནས་སློབ་གསོ་རིག་པ།
རིག་གནས་སློབ་གསོ་རིག་པ་ལ་བསམ་པའི་ཚན་རིག་གི་སློབ་གསོ་རིག་པ་ཞེས་ཀྱང་ཟེར་ལ། དུས་རབས19པའི་དུས་མཇུག་ཏུ་འཇར་མན་དུ་བྱུང་བའི་སློབ་གསོ་རིག་པའི་གཞུང་ལུགས་ཤིག་ཡིན།
དངོས་སྤྱོད་རིང་ལུགས་ཀྱི་སློབ་གསོ་རིག་པ།
དུས་རབས19པའི་དུས་མཇུག་དང་དུས་རབས20པའི་དུས་འགོར་ཨ་རིར་དར་བའི་སློབ་གསོའི་བསམ་བློ་ཞིག་ཡིན་ཞིང་། དུས་རབས20པའི་འཛམ་བུ་གླིང་ཧྲིལ་བོའི་སློབ་གསོའི་གཞུང་ལུགས་ཞིབ་འཇུག་དང་སློབ་གསོའི་ལག་ལེན་གྱི་འཕེལ་རྒྱས་ལ་ཤུགས་རྐྱེན་ཆེན་པོ་ཐེབས་ཡོད།
སློབ་གསོ།
དམིགས་ཡུལ་ངེས་ཅན་ཞིག་གི་དགོས་མཁོ་དང་མཐུན་པར་སློབ་གསོ་བྱ་ཡུལ་གྱི་མི་རྣམས་ཀུན་སྤྱོད་དང་ཤེས་རིག གཟུགས་པོ་བཅས་ཀྱི་ཐད་ཡར་རྒྱས་འགྲོ་ཐུབ་ངེས་ཀྱི་འཆར་གཞི་ཡོད་པའི་འགུལ་སྐྱོད་ཅིག་ཡིན།
གདོད་མའི་སློབ་གསོ།
གདོད་མའི་སྤྱི་ཚོགས་སྐབས་ཀྱི་སློབ་གསོ་ཡིན་ལ། གདོད་མའི་སྤྱི་ཚོགས་ནི་འགྲོ་བ་མིའི་རིགས་ཀྱི་སྤྱི་ཚོགས་ཀྱི་ཐོག་མ་ཡིན་ཞིང་། ཧ་ལམ་ལོ་ངོ་ས་ཡ་གཅིག་ལྷག་གི་དུས་ཡུན་རིང་བོ་བརྒྱུད་པ་ཡིན།
གནའ་རབས་སློབ་གསོ།
སློབ་གསོའི་བྱུང་འཕེལ་ཐད་དུ་གནའ་རབས་ཀྱི་སློབ་གསོ་དེ་བྲན་གཡོག་སྤྱི་ཚོགས་དང་བཀས་བཀོད་རྒྱུད་འཛིན་སྤྱི་ཚོགས་ཀྱི་སློབ་གསོ་ཡིན་པས་སྐབས་འདིའི་སློབ་གསོར་གྲལ་རིམ་གྱི་རང་བཞིན་ལྡན།
དེང་རབས་ཀྱི་སློབ་གསོ།
དེང་རབས་ཀྱི་སློབ་གསོར་སྤྱི་ཚོགས་ཀྱི་ངོ་བོ་གཏན་ནས་མི་འདྲ་བའི་མ་རྩ་རིང་ལུགས་ཀྱི་སློབ་གསོ་དང་སྤྱི་ཚོགས་རིང་ལུགས་ཀྱི་སློབ་གསོ་གཉིས་འདུ།
ལས་རིགས་ཀུན་སྤྱོད།
དགེ་རྒན་གྱི་ལས་རིགས་ཀུན་སྤྱོད་ནི་དགེ་རྒན་གྱི་ཀུན་སྤྱོད་གཤིས་རྒྱུད་ཀྱི་གྲུབ་ཆ་གཙོ་བོ་ཞིག་ཡིན་པ་དང་སློབ་གསོའི་བྱ་འགུལ་གྱིས་དགེ་རྒན་གྱི་བྱ་སྤྱོད་ལ་བཏོན་པའི་རེ་བའང་ཡིན་ཏེ། དགེ་རྒན་གྱི་ལས་ཀའི་འབྲས་བུའི་བཟང་ངན་དེ་དགེ་རྒན་རང་ཉིད་ཀྱི་ཤེས་ཡོན་དང་། ནུས་པ། ལས་རིགས་ཀུན་སྤྱོད་སོགས་ཀྱིས་ཐག་གཅོད་པ་ཡིན། གཙོ་བོ་སློབ་གསོའི་བྱ་གཞག་དང་། སློབ་མ། དགེ་རྒན་གྱི་ཚོགས་པ། རང་ཉིད་སོགས་ལ་འཛིན་པའི་ལྟ་སྟངས་དེ་སློབ་གསོའི་ལག་ལེན་ཁྲོད་དུ་མངོན་པ་ཡིན།
ལུས་ཉམས་བཟོ་ལྟ།
དགེ་རྒན་གྱིས་རང་གི་ཡོན་ཏན་དང་ཕུགས་བསམ། བློ་རིག ཀུན་སྤྱོད། བསམ་ཚུལ། འདུན་པ་བཅས་ཀྱིས་སློབ་མར་སློབ་གསོ་དང་བག་ཆགས་འཇོག་པ་ལས་གཞན། ཁོའི་བཟོ་ལྟ་དང་རྣམ་འགྱུར་ལའང་སློབ་གསོའི་རྒྱུ་རྐྱེན་གལ་ཆེན་ཞིག་ཡིན།
དགེ་སློབ་ཀྱི་འབྲེལ་བ།
དགེ་རྒན་དང་སློབ་མ་ནི་སློབ་གསོའི་བརྒྱུད་རིམ་ཁྲོད་ཀྱི་གྲུབ་ཆ་ཆེས་གཙོ་བོ་ཡིན་ཏེ། དེ་གཉིས་ཕན་ཚུན་ཤུགས་རྐྱེན་ཐེབས་པ་དང་གཅིག་ལ་གཅིག་རྟེན་གྱི་སྒོ་ནས་སློབ་གསོའི་འཕེལ་རྒྱས་ལ་སྐུལ་འདེད་བྱེད་པས། ང་ཚོས་སློབ་གསོའི་བརྒྱུད་རིམ་ཁྲོད་ཀྱི་དགེ་རྒན་དང་སློབ་མའི་གོ་གནས་དང་ནུས་པ་ཤེས་པར་མ་ཟད། ང་ཚོས་དགེ་སློབ་བར་གྱི་འབྲེལ་བ་ལེགས་པོ་འཛུགས་དགོས་པ་ནི་སློབ་གསོའི་བྱ་འགུལ་བདེ་བླག་ཏུ་སྤེལ་པ་དང་སློབ་གསོའི་འོས་འགན་ལེགས་པོར་འགྲུབ་པའི་གནད་འགག་ཡིན།
ཀུན་སྤྱོད་སློབ་གསོ།
རང་རྒྱལ་གྱི་སྤྱི་ཚོགས་རིང་ལུགས་ཀྱི་སློབ་གསོའི་གྲུབ་ཆ་གལ་ཆེན་ཞིག་ཡིན་ཞིང་། དེའི་འོས་འགན་ནི་སློབ་མར་དངོས་གཙོ་རྩོད་སྒྲུབ་རིང་ལུགས་ཀྱི་བསམ་པའི་ལྟ་བ་འཛུགས་པ་དང་གུང་ཁྲན་རིང་ལུགས་ཀྱི་ཀུན་སྤྱོད་གཤིས་རྒྱུད་ཆགས་པར་བྱ་རྒྱུ་དེ་ཡིན།
ཤེས་རིག་སློབ་གསོ།
སློབ་གསོ་མྱོང་མཁན་ལ་མིའི་རིགས་ཀྱི་ཤུལ་བཞག་གི་ཚན་རིག་རིག་གནས་ཀྱི་ཤེས་བྱ་དང་ནུས་རྩལ་སོགས་སྤེལ་བ་དང་། སློབ་གསོ་མྱོང་མཁན་གྱི་བློ་སྟོབས་འཕེལ་རྒྱས་སུ་གཏོང་བ། བློ་གྲོས་ཀྱི་ཚད་ཇེ་མཐོར་གཏོང་བ་སོགས་ཀྱི་སློབ་གསོ་ཞིག་ཡིན།
ལུས་རྩལ་སློབ་གསོ།
སློབ་མར་ལུས་རྩལ་དང་། འཕྲོད་བསྟེན། བདེ་ཐང་བཅས་ཀྱི་ཤེས་བྱ་དང་ནུས་རྩལ་འཁྲིད་པ་དང་། འགུལ་སྐྱོད་ནུས་ཤུགས་དང་གཙང་སྦྲ་བྱེད་པའི་གོམས་གཤིས་སོགས་སྐྱེད་སྲིང་བྱས་ནས། ལུས་ཕུང་བདེ་ཐང་ངང་འཚར་ལོངས་འོང་བར་བསྐུལ་བའི་སློབ་གསོ་ཞིག་ཡིན་ཞིང་། སློབ་མ་རྣམས་ཕྱོགས་ཡོངས་ནས་ཡར་སྐྱེད་འོང་བར་སློབ་གསོ་བྱེད་པའི་གྲུབ་ཆ་གཙོ་བོ་ཞིག་ཀྱང་ཡིན། དེར་སློབ་གྲྭའི་ལུས་རྩལ་སློབ་གསོ་དང་འཕྲོད་བསྟེན་བདེ་སྲུང་སྟེ་ཕྱོགས་གཉིས་འདུ། སློབ་གྲྭའི་ལུས་རྩལ་སློབ་གསོ་ནི་ལུང་ཕུང་འགུལ་སྐྱོད་ལ་བརྟེན་ནས་སློབ་མའི་ལུས་ཕུང་ཇེ་བཟང་དུ་གཏོང་བ་དང་། འཕྲོད་བསྟེན་དེ་བདེ་སྲུང་དང་སྨན་བཅོས་ལ་བརྟེན་ནས་སློབ་མའི་བདེ་ཐང་སྲུང་བ་དེ་ཡིན།
སློབ་གྲྭའི་ལུས་རྩལ་སློབ་གསོ།
སློབ་གྲྭའི་ལུས་རྩལ་སློབ་གསོ་ནི་སྤྱི་ཚོགས་རིང་ལུགས་ཀྱི་བསམ་པའི་དཔལ་ཡོན་འཛུགས་བསྐྲུན་གྱི་གྲུབ་ཆ་གཙོ་བོ་ཡིན་ལ། རྒྱལ་ཁབ་ཀྱི་ལུས་རྩལ་སློབ་གསོ་དར་བའི་རྨང་གཞིའང་ཡིན། སློབ་གྲྭའི་སློབ་གསོའི་དམིགས་ཡུལ་དང་འོས་འགན། སློབ་མའི་ན་ཚོད་སོགས་གཞི་རྩ་བྱས་ནས་ཐག་བཅད་པ་ཡིན།
མཛེས་རྩལ་སློབ་གསོ།
སློབ་མ་ཚོར་མཛེས་དཔྱོད་ལྟ་བ་ཡང་དག་པ་ཆགས་པ་དང་། མཛེས་སྡུག་ཉམས་སུ་མྱོང་བ་དང་། མཛེས་སྡུག་གསར་སྐྲུན་བྱེད་པའི་སློབ་གསོ་ཞིག་ཡིན་ལ། དེ་གཙོ་བོ་རང་བྱུང་ཁམས་དང་། འཚོ་བ། སྒྱུ་རྩལ་སོགས་ཕྱོགས་མང་པོའི་མཛེས་དཔྱོད་བྱ་འགུལ་བརྒྱུད་ནས་སློབ་མར་སློབ་གསོ་གཏོང་བ་དེ་ཡིན།
སློབ་གསེང་བྱ་འགུལ།
སློབ་གྲྭས་སློབ་གསེང་གི་སྐབས་སུ་སློབ་མ་ཚོར་དམིགས་ཡུལ་ཡོད་པ་དང་རྩ་འཛུགས་ཡོད་པའི་སྒོ་ནས་སློབ་གསོའི་བྱ་འགུལ་དོན་སྙིང་ལྡན་པ་སྣ་ཚོགས་སྤེལ་བའི་སློབ་གསོའི་བྱེད་སྒོ་ཞིག་ཡིན་ཏེ། སྒྲ་ཡངས་འཇུག་ནི་སློབ་གྲྭ་དང་། སློབ་གྲྭའི་ཕྱི་རོལ་གྱི་སློབ་གསོའི་ལས་ཁུངས། ཁྱིམ་ཚང་བཅས་ཀྱིས་གུང་གསེང་གི་སྐབས་སུ་རྩ་འཛུགས་བྱེད་པའི་སློབ་གསོའི་བྱ་འགུལ་ཞིག་ཡིན། སྒྲ་དོག་འཇུག་ནི་སློབ་གྲྭས་སློབ་གསེང་གི་སྐབས་རྩ་འཛུགས་བྱས་པའི་སློབ་གསོའི་བྱ་འགུལ་ལ་ཟེར་ཤིང་། འདིར་གླེང་བཞིན་པ་ནི་སྒྲ་དོག་འཇུག་གི་སློབ་གསོའི་བྱ་འགུལ་ཡིན།
འཛིན་གྲྭའི་ཀྲུའུ་རིན།
འཛིན་གྲྭ་ཐུན་མོང་གི་རྩ་འཛུགས་པ་སློབ་གསོ་བ་ཡིན་ལ། སློབ་མ་རྣམས་ཕྱོགས་ཡོངས་ནས་ཡར་སྐྱེད་འོང་བར་བྱེད་པའི་མཛུབ་སྟོན་པ། འཛིན་གྲྭ་དེའི་བསླབ་ཚན་སོ་སོའི་དགེ་རྒན་ཕན་ཚུན་སྦྲེལ་བྱེད་ཀྱི་སྒྲོག་ཐག ཁྱིམ་ཚང་དང་སློབ་གྲྭ། སྤྱི་ཚོགས་གསུམ་བར་སྤྲེལ་བར་བྱེད་པའི་ཟམ་པ། སློབ་གྲྭའི་འགོ་ཁྲིད་ཀྱིས་སློབ་ཁྲིད་དང་སློབ་གསོའི་འཆར་གཞི་ལག་བསྟར་བྱེད་པའི་རོགས་རམ་པ་གལ་ཆེན་དང་ནུས་ཤུགས་འདོན་མཁན་གཙོ་བོ་ཡིན།
འོས་འགན་སློབ་གསོ།
བཅའ་ཁྲིམས་ཀྱིས་ཐག་བཅད་པ་ལྟར། སློབ་ལོ་རན་པའི་བྱིས་པ་དང་ན་ཆུང་ཚོས་ངེས་པར་དང་ལེན་བྱ་དགོས་ཤིང་། རྒྱལ་ཁབ་དང་སྤྱི་ཚོགས། སློབ་གྲྭ། ཁྱིམ་ཚང་བཅས་ཀྱིས་ངེས་པར་ཁག་ཐེག་བྱ་དགོས་པའི་རྒྱལ་དམངས་སློབ་གསོ་ཞིག་ཡིན། མིག་སྔར་རང་རྒྱལ་གྱིས་སློབ་ཆུང་དང་དམའ་འབྲིང་གི་སློབ་ལུགས“ལོ་དྲུག་དང་གསུམ”ཅན་དང“ལྔ་དང་བཞི”ཅན། “ལོ་ལྔ་དང་གསུམ”ཅན། “ལོ་དགུ་རྒྱུན་མཐུད”ཅན་བཅས་མཉམ་དུ་གནས་ཡོད་ལ། འདི་ནི་རྒྱལ་ཁབ་ཀྱི་རྩ་བའི་གནས་ཚུལ་དང་མཐུན་པས་འོས་འཚམ་ཡིན།
