གཙང་ཆེན་གཉིས་རྒྱུད་ཀྱི་གནའ་རབས་རིག་གནས།
ཡ་གླིང་ནུབ་མའི་ཡུ་ཧྥ་ལ་ཏི་གཙང་པོ་དང་ཏི་ཀི་ལེ་སི་གཙང་པོ་གཉིས་ནི་ནུབ་བྱང་ཕྱོགས་ནས་ལྷོ་ནུབ་ཕྱོགས་སུ་འབབ་ཅིང་། དེ་གཉིས་བཞུར་བའི་ས་ཁོངས་ཆེན་པོ་དེར་གཙང་ཆེན་གཉིས་རྒྱུད་ཅེས་ཀྱང་འབོད་པར་བྱེད། གནས་དེའི་ས་གཤིས་ལེགས་ཤིང་འགྲིམ་འགྲུལ་གྱི་གོ་བབ་གལ་ཆེན་བཟུང་ཡོད་ལ། མི་ལོ5000ལྷག་གི་གོང་རོལ་ནས་མིའི་རིགས་ཀྱི་ཞབས་རྗེས་འཁོད་ཅིང་། ཤེས་རིག་གི་མེ་ཏོག་བཞད། ས་ཁོངས་མི་གཅིག་པའི་མི་རིགས་སོ་སོས་གནས་དེ་རེས་མོས་སུ་བདག་གིར་བཟུང་སྟེ། ཕན་ཚུན་འདྲེས་ཤིང་འདྲེས་པའི་ཤུགས་རྐྱེན་འོག་ཏུ། རྣམ་པ་དུ་མར་སྣང་བའི་གཙང་ཆེན་གཉིས་རྒྱུད་ཀྱི་གནའ་རབས་ཤེས་རིག་བསྐྲུན།
ཆོས་ལུགས་བཅོས་བསྒྱུར།
དུས་རབས་བཅུ་དྲུག་པའི་དུས་མགོ་ནས་དུས་རབས་བཅུ་བདུན་པའི་དུས་དཀྱིལ་དུ། མ་རྩ་རིང་ལུགས་དང་རིག་རྩལ་བསྐྱར་དར་གྱི་ལས་འགུལ་བྱུང་བ་དང་བསྟུན། ཆོས་རྒྱལ་གྱི་དབང་ཆ་རིམ་བཞིན་ཉམས་རྒུད་དུ་གྱུར་པ་དང་། གསར་དར་གྱི་མ་རྩ་གྲལ་རིམ་གྱིས་སྣེ་དྲངས་ཤིང་། རྒྱ་ཆེའི་ཞིང་པ་དང་གྲོང་ཁྱེར་པ་དག་རྗེས་སུ་འབྲངས་ཐོག ས་སྐྱོང་རེ་གཉིས་རྒྱབ་རྩར་ལངས་པའི་ཆོས་ལུགས་བཅོས་བསྒྱུར་གྱི་ཚ་རླབས་ཤིག་ཡོ་རོབ་གླིང་གི་ཕྱོགས་མཚམས་ཀུན་ལ་ཁྱབ། སྔ་རྗེས་སུ། འཇར་མན་གྱི་མཱ་ཏེན་ལུའུ་ཏི་ལགས་ཀྱི་ཆོས་ལུགས་བཅོས་བསྒྱུར་དང་། ཅ་ཨར་ཝེན་གྱི་ཆོས་ལུགས་བཅོས་བསྒྱུར་སོགས་རིམ་པར་བྱུང་། ཆོས་ལུགས་བཅོས་བསྒྱུར་གྱི་ལས་འགུལ་དེ་ནི་དོན་དམ་དུ་བསམ་བློའི་གསར་བརྗེ་ཐེངས་ཤིག་རེད་ལ། དེས་ནི་ཆོས་ལུགས་དད་མོས་དང་རིག་གནས་བསམ་བློ་བཅས་པར་འགྱུར་བ་ཟབ་མོ་བཏང་། དེ་ནས་བཟུང་སྟེ། ཡེ་ཤུ་ཆོས་ལུགས་ལ་གནམ་བདག་ཆོས་ལུགས་དང་ཏུང་ཀྲིན་ཆོས་ལུགས་དང་ཆོས་ལུགས་གསར་མ་གསུམ་གྱི་གྲུབ་མཐའ་བྱུང་། ཆོས་ལུགས་བཅོས་བསྒྱུར་གྱི་ལས་འགུལ་ནི་རིག་རྩལ་བསྐྱར་དར་གྱི་བྱུང་འཕེལ་དང་འབྲེལ་བ་དམ་ཟབ་མཆིས། རིག་རྩལ་བསྐྱར་དར་གྱི་སྐབས་སུ། མི་ཆོས་རིང་ལུགས་སྨྲ་བ་དག་གིས་རྩོམ་རིག་སྒྱུ་རྩལ་ལམ་ཡང་ན་རྣམ་པ་གཞན་དག་ལ་བརྟེན་ནས་གནམ་བདག་ཆོས་ལུགས་ཀྱི་རུལ་སུངས་ལ་དགག་རྒྱག་གཏིང་ཐུབ་དུ་བྱས་པ་དང་། དེ་དང་འབྲེལ་ཏེ་མི་ཆོས་རིང་ལུགས་ཀྱི་བསམ་བློ་སྣ་ཚོགས་བྱུང་བར་བརྟེན། མཱ་ཏེན་ལུའུ་ཏི་ལགས་ཀྱིས་ཆོས་ལུགས་བཅོས་བསྒྱུར་ལ་ཤེས་རིག་གི་གསོ་བཅུད་མང་དུ་བསྩལ་ཏོ།།
བློ་འབྱེད་ལས་འགུལ།
བློ་འབྱེད་ལས་འགུལ་ནི་རིག་རྩལ་བསྐྱར་དར་གྱི་རྗེས་སུ་བྱུང་བའི་བསམ་བློ་བཅིངས་འགྲོལ་ཐེངས་གཉིས་པ་ཡིན་ལ། བློ་འབྱེད་ལས་འགུལ་བྱུང་བའི་དུས་རབས་བཅོ་བརྒྱད་པར་ཡང་མི་ཚོས་བློ་འབྱེད་ཀྱི་དུས་རབས་སམ་དཔྱོད་ཤེས་ཀྱི་དུས་རབས་སུ་འབོད་པ་རེད། བློ་འབྱེད་བསམ་བློ་སྨྲ་བ་དག་གིས་གསར་དར་གྱི་རང་བྱུང་ཚན་རིག་རང་ཉིད་ཀྱི་ལུང་གི་རྒྱབ་རྩ་དང་རིགས་པའི་གསོ་བཅུད་དུ་དྲངས་ཏེ། དཔྱོད་ཤེས་ཀྱི་ལག་ཆར་བརྟེན་ནས་རྨོངས་དད་ཀྱི་བྱ་བྱེད་ལ་དགག་པའི་ལྟ་བ་བཏོན་ཅིང་། སྒེར་གཅོད་ལམ་ལུགས་ཀྱི་སྲིད་དབང་མགོ་རྟིང་སློག་པའི་ཐད་དུ་རང་རང་གི་འཇོན་ནུས་ཅི་ཡོད་བཀོལ་བས་མ་ཚད། འགྲོ་མིའི་རང་དབང་དང་འདྲ་མཉམ། བདེ་འདོད་སོགས་ཀྱི་དབང་ཆ་བརྩོན་ལེན་བྱེད་པར་བྱས་རྗེས་རླབས་ཆེན་བཞག་འདུག
རིག་རྩལ་བསྐྱར་དར།
རིག་རྩལ་བསྐྱར་དར་གྱི་ལས་འགུལ་དེ་ཆེས་ཐོག་མར་དབྱི་ཐ་ལི་རྒྱལ་ཁབ་ཏུ་མྱུ་གུ་འབུས་ཤིང་རྩ་བ་ཚུགས། རྗེས་སོར་རིམ་གྱིས་དབྱིན་ཇི་དང་ཧྥ་རན་སེ་དང་འཇར་མན་དང་སི་ཕེན་སོགས་སུ་དར་ཁྱབ་བྱུང་། རིག་རྩལ་བསྐྱར་དར་ལས་འགུལ་གྱིས་མི་ཆོས་རིང་ལུགས་ཀྱི་དར་ཆ་མཐོན་པོར་བསྒྲེངས་ཏེ། རྩོམ་རིག་སྒྱུ་རྩལ་དང་ཆབ་སྲིད་བསམ་བློ། ལོ་རྒྱུས། སློབ་གསོ། སྤྱི་ཚོགས་འཚོ་བ། རང་བྱུང་ཚན་རིག་བཅས་དུས་རབས་དཀྱིལ་མའི་རྨོངས་འཐོམ་དང་མུན་ནག ལྐོག་གྱུར། འདོད་སྤོང་བཅས་ཀྱི་ལྷ་དབང་སྨྲ་བའི་འཆིང་སྒྲོག་ལས་ཐར་བར་བྱས་ཤིང་། མཁས་དབང་གནམ་གྱིས་ས་བཀབ་པ་ལྟ་བུ་མང་བོ་བྱོན་ཏེ་རིག་གནས་ཀྱི་འབྲས་བུ་གཡུར་དུ་ཟ་བ་བླངས། རིག་རྩལ་བསྐྱར་དར་ཞེས་པའི་ཐོག་མའི་བརྗོད་དོན་ནི། གནའ་བོའི་ཀེ་རེ་སི་དང་རོ་མའི་ཤེས་རིག་སླར་གསོན་དང་བསྐྱར་དར་དུ་གཏང་རྒྱུ་དེ་རེད། རིག་རྩལ་བསྐྱར་དར་སྐབས་སུ་བྱོན་པའི་རྩོམ་རིག་དང་སྒྱུ་རྩལ། བསམ་བློ། སློབ་གསོ་བཅས་ཕྱོགས་གང་ཐད་ནས་གནའ་བོའི་ཀེ་རེ་སི་དང་རོ་མ་ལས་བརྒལ་པར་གྱུར་ཅིང་། དུས་རབས་ཁྱད་རྟགས་མངོན་པར་གསལ། རིག་རྩལ་བསྐྱར་དར་གྱི་བསམ་བློའི་མཛུབ་སྟོན་ལྟ་བུར་གྱུར་པ་ནི་མི་ཆོས་རིང་ལུགས་རེད། མི་ཆོས་རིང་ལུགས་ཞེས་པ་དེ་མཐར་གཏུགས་ན་མི་རང་ཉིད་བརྗོད་དོན་ཀུན་གྱི་སྙིང་བོར་བཞག་སྟེ་དུས་རབས་དཀྱིལ་མའི་ལྷ་གཙོ་བོར་བྱས་པའི་བསམ་བློའི་ཁ་གཏད་གཅོག་པ་དང་རྩོད་སློང་བྱས་པ་སྟེ། ནང་དོན་གཙོ་བོར་གཤམ་གྱི་ཕྱོགས་འགའ་མཆིས། དང་བོ། མི་གཤིས་ཀྱི་མཛེས་པ་གོང་དུ་བསྟོད་ཅིང་ལྷ་དབང་གི་གཉའ་ནས་མར་ཕབ་པ་རེད། མི་ཆོས་རིང་ལུགས་ཀྱིས་མིའི་རིན་ཐང་དང་རྩིས་ཐང་། བསམ་བློ་བཅས་པར་གོང་བཀུར་དང་གཅེས་སྤྲས། གཙིགས་འཛིན་ཚད་མེད་བྱས་ཐོག ཆོས་ཚོགས་དང་ལྷའི་དབང་ཤུགས་ཀྱིས་ཡོད་ཚད་བདག་ཏུ་བཟུང་བ་དང་། མི་ནི་དཀོན་མཆོག་གི་བྲན་དུ་འཁོལ་པར་ངོ་རྒོལ་བྱས་པ་རེད། གཉིས་པ། རང་གཤིས་འཆིང་འགྲོལ་གཏོང་བ་དང་། འདོད་སྤོང་རིང་ལུགས་ལ་ངོ་རྒོལ་བྱས། མི་ཆོས་རིང་ལུགས་སྨྲ་བ་དག་གིས་མིའི་འདོད་པ་ཁས་ལེན་ཅིང་། མི་ཞིག་ཡིན་ན་རང་ཉིད་ཀྱི་འདོད་པ་བསྐང་ཆེད་དུ་ཕྱི་ནང་གཉིས་ཀའི་ལོངས་སྤྱོད་སྒྲུབ་ཆོག་པ་དང་། འཇིག་རྟེན་པའི་བདེ་སྐྱིད་འཚོ་བ་ཉམས་སུ་མྱང་ཆོག་ལ། བྱ་བ་གང་དང་ཅིར་ཡང་འཇུག་འདོད་ཀྱི་བློ་དེ་མཆོག་ཏུ་འཛིན་པར་བྱས་ཏེ། ཆོས་ལུགས་ཀྱི་འདོད་སྤོང་དང་ཆོག་ཤེས་ངན་ངོན་གྱི་འཚོ་བར་རྒྱབ་ཏུ་ཕྱོགས་པ་རེད། གསུམ་པ། མི་ཆོས་རིང་ལུགས་ཀྱིས་དཔྱོད་ཤེས་དང་ཚན་རིག་གི་གོ་ཧྲག་བགོས་ཏེ། ལྐོག་གྱུར་རིང་ལུགས་དང་ཤེས་རྨོངས་རིང་ལུགས་ལ་དགག་པ་ཚ་ནན་དུ་བཏང་། ཁོང་པ་ཚོས་དཔྱོད་ཤེས་ཀྱི་རིག་སྟོབས་དང་སློབ་གསོའི་ཕན་ནུས། ཚན་རིག་གི་བདེན་དྲང་བཅས་གཙིགས་ཆེན་དུ་འཛིན་པ་དང་། མིའི་ཁྱད་འཕགས་ཀྱི་རིན་ཐང་ནི་རིགས་སྟོབས་བསམ་གྱིས་མི་ཁྱབ་པ་ཡོད་པས་དང་། མིས་རང་ཉིད་ཀྱི་འཇོན་ཐང་དང་བློ་གྲོས་ལ་བརྟེན་ནས་རང་བྱུང་དང་སྤྱི་ཚོགས་ཀྱི་གབ་པ་མངོན་དུ་དབྱུང་དགོས་ཤིང་། བསམ་བློ་དེ་སྲོག་ཤིང་དུ་བྱས་ཏེ་ཆོས་ལུགས་ཀྱི་སློབ་གསོ་སྒེར་སྡོམ་བདག་བཟུང་དང་། མི་སེར་རྨོངས་ལམ་དུ་ཁྲིད་པའི་སྲིད་ཇུས་ལ་ངོ་རྒོལ་མཐའ་གཅིག་ཏུ་བྱས་པ་བཅས་སོ།། རིག་རྩལ་བསྐྱར་དར་གྱི་ལས་འགུལ་བྱུང་བ་དེས། མི་རྣམས་ཆོས་ལུགས་དང་ལྷ་དབང་སྨྲ་བའི་མུན་དོང་ལས་དྲངས་ཤིང་། ཤེས་རྨོངས་དང་འདོད་སྤོང་། ལྐོག་གྱུར་གྱི་འཆིང་སྒྲོག་ལས་ཐར་བར་བྱས་ཏེ་འོད་ཟེར་སྟོང་ལྡན་གྱི་དཔྱོད་ཤེས་དང་ཚན་རིག་གི་ལམ་ཆེན་དུ་བཀྲི་བར་མཛད་དོ།། དུས་རབས་བཅོ་ལྔ་བའི་དུས་མཇུག་ཏུ། དབྱི་ཐ་ལི་ནས་དབུ་ཚུགས་པའི་རིག་རྩལ་བསྐྱར་དར་གྱི་ལས་འགུལ་དེ་ཡུལ་དུས་ཀྱིས་བར་མ་ཆོད་ཅིང་། དབང་ཤེད་ཀྱིས་མགོ་མ་ནོན་པར་དབྱིན་ཇི་དང་འཇར་མན་དང་ཧྥ་རན་སེ་དང་སི་ཕན་སོགས་སུ་དར་ཁྱབ་བྱུང་།
རིགས་རྒྱུད་དང་མི་རིགས།
ང་ཚོའི་མིའི་རིགས་ནི་ད་ལྟ་ཤུལ་ཆད་དུ་གྱུར་པའི་གནའ་བོའི་སྤྲ་མིའི་རིགས་ཤིག་ལས་མཆེད་པ་དང་། གོ་རིམ་དེའི་ཁྲོད་དུ་ངལ་རྩོལ་གྱི་བྱེད་ནུས་འགངས་ཆེན་ཐོན་པ་རེད། བློ་རིག་ཀྱང་རིམ་གྱིས་རྒྱས་ཏེ་སྲོག་ཆགས་དུད་འགྲོ་སོགས་ལས་འགོངས་པར་གྱུར། ལོ་ངོ10000སྔོན་གྱི་ཡས་མས་སུ། ཧྥེ་གླིང་དང་ཡོ་ཡོབ་གླིང་དང་ཡ་གླིང་དང་ཨོ་གླིང་དང་མེ་གླིང་ལྷོ་བྱང་བཅས་སུ་མིའི་རིགས་འཚོ་གཞེས་ཀྱི་རྗེས་ཤུལ་མངོན་པར་གསལ་བ་དང་། ས་བབ་མི་གཅིག་པ་དང་རང་བྱུང་ཆ་རྐྱེན་མི་འདྲ་བའི་དབང་གིས་གནའ་དུས་ཀྱི་མེས་པོ་དག་རང་རང་གི་འཚོ་སྟངས་བསྐྱངས་ཏེ་དུས་ངེས་ཅན་ཞིག་ཏུ་བསླེབས་པ་ན། རིགས་རྒྱུད་ཀྱི་ཁྱད་པར་ཤོར་པ་རེད། དེའི་འཕྲོར་གནས་ཡུལ་སྤོས་པ་དང་ཞིང་ལས་གསར་བརྗེ་བྱུང་བའི་དུས་མཚུངས་སུ། རིགས་རྒྱུད་འདྲ་མིན་སྣ་ཚོགས་ཡུལ་གྲུ་ཀུན་ཏུ་རིས་མེད་དུ་ཁྱབ་པའི་ལོ་ངོ་སྟོང་ཕྲག་གི་ལོ་རྒྱུས་མཇུག་རྫོགས་ཏེ། མི་སེར་དང་མི་དཀར་མི་ནག་གསུམ་གྱི་རིགས་རྒྱུད་དེ་གཞན་བྱིངས་དང་བསྡུར་ན་ཕྱོགས་གང་ཐད་ནས་དར་རྒྱས་སུ་ཕྱིན་པར་མངོན། རིགས་རྒྱུད་གཅིག་པའི་མི་དེ་དག་ཀྱང་ལོ་ཟླ་རིང་མོའི་འཁོར་འགྲོས་ཁྲོད་དུ། སྐད་དང་ས་ཁོངས་དང་དཔལ་འབྱོར་དང་སྤྱི་ཚོགས་ཀྱི་རྣམ་པ་དང་རིག་གནས་དང་སེམས་གཤིས་མི་གཅིག་ཐ་དད་དུ་སོང་བའི་རྐྱེན་བྱས་ཏེ་མི་རིགས་སྣ་ཚོགས་སུ་གྱེས་མགོ་བརྩམས།
མཚན་ཉིད་རིག་པ་དང་བསམ་བློའི་ཡོ་ལང་།
མཚན་ཉིད་རིག་པའི་ལྟ་བ་ནི་རྒྱ་ཆེ་ཞིང་གཏིང་ཟབ་པ་ཞིག་རེད་ལ། དེ་ནི་སྤྱི་ཚོགས་ཚན་རིག་དང་རང་བྱུང་ཚན་རིག་གི་ཉམས་མྱོང་ཕྱོགས་བསྡོམས་བྱས་པའི་རྨང་གཞིའི་སྟེང་གྲུབ་པར་བཤད། ཡོ་རོབ་གླིང་ལ་མཚོན་ནའང་། ཕེ་ཀིན་ལགས་ནས་ཏི་ཁ་ཨར་དང་། འཇར་མན་གྱི་གནའ་དཔེ་རིང་ལུགས་པ་ནས་དེང་རབས་ཀྱི་མཚན་ཉིད་རིག་པའི་བར། སྟོང་བསམ་སྤྱི་ཚོགས་རིང་ལུགས་ནས་ཚན་རིག་དང་མཐུན་པའི་སྤྱི་ཚོགས་རིང་ལུགས་ཀྱི་བར་བཅས་སྔ་གཞུག་མ་ལུས་པ་ཚན་རྩལ་དང་ཤེས་རིག་འཕེལ་རྒྱས་ཀྱི་འབྲས་བུར་མ་མཐོང་པ་མེད་ལ། མིའི་རིགས་ཀྱི་སྣོད་དང་བཅུད་ཀྱི་ངོས་ཟིན་མཐའ་དག་མེད་པ་ནས་ཡོད་པ་དང་། ཡོད་པ་ནས་འཕེལ་བ། ལྐོག་གྱུར་ནས་མངོན་སུམ་དང་། མངོན་སུམ་ནས་ཚད་མར་གྲུབ་པའི་གོ་རིམ་མ་བརྒྱུད་པ་མེད་དོ།།
བཟོ་ལས་གསར་བརྗེ་ཐེངས་གཉིས་པ།
བཟོ་ལས་གསར་བརྗེ་ཐེངས་གཉིས་པ་ནི་དུས་རབས19དཀྱིལ། ཡོ་རོབ་རྒྱལ་ཁབ་དང་ཨ་རི། འཇར་པན་སོགས་འབྱོར་ལྡན་གྲལ་རིམ་གྱིས་གསར་བརྗེའམ་བཅོས་བསྒྱུར་ལེགས་འགྲུབ་བྱུང་བ་དང་། དཔལ་འབྱོར་འཕེལ་རྒྱས་ལ་སྐུལ་འདེད་ཐོབ་པའི་ལས་འགུལ་ཞིག་ཡིན།
བཟོ་ལས་གསར་བརྗེ་ཐེངས་དང་པོ།
བཟོ་ལས་གསར་བརྗེ་ཐེངས་དང་པོ་ནི་དུས་རབས18ལ་དབྱིན་ཇི་ནས་མགོ་བརྩམས་པའི་ལག་རྩལ་གསར་བརྗེ་སྟེ། ལག་རྩལ་འཕེལ་རྒྱས་ཀྱི་ལོ་རྒྱུས་སྟེང་གི་གསར་བརྗེ་ཆེན་མོ་ཞིག་རེད། གསར་བརྗེ་འདི་ལས་འཕྲུལ་ཆས་ཀྱིས་ལག་ཤེས་ངལ་རྩོལ་གྱི་ཚབ་བྱས།
ཟླ་བཅུ་བའི་གསར་བརྗེ།
ཟླ་བཅུ་བའི་གསར་བརྗེ་ནི1917ལོའི་ཟླ11ཚེས7ཉིན་ལེ་ཉིང་གིས་འགོ་ཁྲིད་བྱས་པའི་དྲག་ཆས་འོས་ལངས་རེད། ཟླ་བཅུ་བའི་གསར་བརྗེ་ནི（དམར་པོ་ཟླ་བཅུ་བ། ཟླ་བཅུ་བའི་འོས་ལངས་སམ་པོར་ཧྲི་བེ་ཁུ་གསར་བརྗེ་ཡང་ཟེར）ཨུ་རུ་སུའི་ནང་འཁྲུག་ལས་རྒྱལ་ཁ་ཐོབ་པའི་དམར་དམག་གིས་དེ་ལ་རླབས་ཆེན་གྱི་ཟླ་བཅུ་བའི་སྤྱི་ཚོགས་རིང་ལུགས་གསར་བརྗེ་ལ་ཟེར།
ཡོ་རོབ་ཤར་མའི་འཕོ་འགྱུར་ཆེན་མོ།
ཡོ་རབ་འཕོ་འགྱུར་ཆེན་མོ་ལ་སུའུ་ཤར་མའི་འཕོ་འགྱུར། ཡོ་རོབ་ཤར་མའི་གསར་བརྗེ་ཆེན་མོ། ཡོ་རོབ་ཤར་མ་དམངས་གཙོ་ཅན་དུ་འགྱུར་བ་སོགས་འབོད། ནུབ་ཕྱོགས་སྤྱི་ཚོགས་ཀྱིས་སྤྱི་ལོ1989ལོའི་གསར་བརྗེ་ཟེར། དེ་ནི་དུས་རབས་ཉི་ཤུ་བའི་ལོ་རབས80བའི་མཇུག་ནས90འགོ་ཡིན། ཡོ་རོབ་ཤར་མའི་སྤྱི་ཚོགས་རིང་ལུགས་རྒྱལ་ཁབ་སོ་སོའི་ཆབ་སྲིད་དཔལ་འབྱོར་སྒྲིག་ཁྲིམས་རྩ་བ་ནས་འགྱུར་ལྡོག་ཆེན་པོ་བྱུང་། སྤྱི་ཚོགས་རིང་ལུགས་ཀྱི་ལམ་ལུགས་མཐར་མ་རྩ་རིང་ལུགས་ཀྱི་ལམ་ལུགས་སུ་འགྱུར་བ་དང་། དེ་ནི་ཡོ་རོབ་ཤར་མའི་སྤྱི་ཚོགས་ལམ་ལུགས་ཀྱི་ལས་དོན་ལ་ཕམ་ཉེས་ཐེབས། འཛམ་གླིང་སྤྱི་ཚོགས་རིང་ལུགས་དང་། གུང་ཁྲན་རིང་ལུགས་ཀྱི་ལས་འགུལ་འགྲིབ་རླབས་ལྟར་ཤུགས་ཇེ་ཆུང་དུ་གྱུར།
ཨ་མེ་རི་ཁ།
རྒྱལ་ཁབ་ཀྱི་མིང་ལ་ཨ་མེ་རི་ཁ་རྒྱལ་ཕྲན་མཉམ་འབྲེལ་རྒྱལ་ཁབ་ཟེར། རྒྱལ་ཁབ་འདི་ནི་ཨ་མེ་རི་ཁ་གླིང་ཆེན་གྱི་བྱང་ཕྱོགས་ན་ཆགས་ཡོད། རྒྱལ་ཁབ་འདིར་ཨ་རི་མངའ་སྡེ་གཅིག་སྡུད་ཡང་ཟེར་སྲོལ་ཡོད་པ་རེད། སྤྱི་ལོ1776ལོར་དབྱིན་ཇིའི་འོག་ནས་རང་བཙན་ཐོབ་ནས་རྒྱལ་ཁབ་གསར་དུ་དབུ་བརྙེས་པ་རེད། དེའི་སྐབས་སུ་འཇོར་ཇེའུ་ཧྭ་ཧྲིན་ཏུང་ནི་དམག་དཔོན་ཡིན། འོན་ཀྱང་རྒྱལ་ཁབ་དབུ་བརྙེས་པའི་རྗེས་སུ་ཁོང་རྒྱལ་ཁབ་ཀྱི་སྲིད་འཛིན་ཐོག་མ་དེར་འདེམས་ཐོན་བྱུང་། དེའི་སྐབས་སུ་རྒྱལ་ས་མེད་པས་ཁོང་གི་ཡུལ་དང་ཐག་ཉེ་སར་རྒྱལ་ས་འདེམས་ནས་དེང་སང་གི་རྒྱལ་ས་དེ་འདེམས་པ་རེད། དེ་ནས་བཟུང་རྒྱལ་ས་ལ་ཁོང་གི་མིང་ཐོག་ནས་ཧྭ་ཧྲིན་ཏུང་ཞེས་འབོད་ཀྱི་ཡོད་པ་རེད།
གནའ་རབས་ཀེ་རུ་སུ།
གནའ་རབས་ཀེ་རུ་སུའི་དཔལ་ཡོན་ནི་ནུབ་ཕྱོགས་དཔལ་ཡོན་གྱི་འབྱུང་ཁུངས་ཡིན། གནའ་རབས་ཀེ་རུ་སུ་དཔལ་ཡོན་ལོ650རིང་ལ་རྒྱུན་བསྐྱངས་པ་རེད(སྤྱི་ལོ་སྔོན་གྱི800ལོ་ནས་སྤྱི་ལོ་སྔོན་གྱི146ལོ་ཡིན)དེ་ནི་ནུབ་ཕྱོགས་དཔལ་ཡོན་གྱི་ཆེས་གཙོ་བོ་དང་ཐད་ཀར་འབྱུང་ཡུལ་ཡིན།
གནའ་རབས་པ་པེ་ལོན།
འཛམ་གླིང་ཤར་ཕྱོགས་ཏེ་སྤྱི་ལོ་སྔོན་གྱི3500ལོ་ཡས་མས་སུ་མིའི་རིགས་ཀྱི་བྲན་གཡོག་ལམ་ལུགས་ཀྱི་རྒྱལ་ཁབ་ཐོག་མ་བྱུང་བ་མ་ཟད། སྔོན་ཐོན་གྱི་ལུགས་རྒྱག་པའི་ལག་རྩལ་དར་ཡོད། ཕལ་ཆེར་སྤྱི་ལོ་སྔོན་གྱི2250ལོ་ཡས་མས་སུ་འདི་རུ་གནས་སྡོད་བྱས་ཡོད་པའི་སོ་མེ་ཨེར་མི་ཡིས་སྔོན་ཐོན་ཤེས་རིག་གསར་གཏོད་བྱས་པ་དང་རྒྱལ་ཁབ་བཙུགས་པ་རེད།
ཐའེ་ཅི་བང་སོ།
ཐའེ་ཅི་བང་སོ་ནི་རྒྱ་གར་གྱི་རྒྱལ་ས་ཏི་ལི་གསར་པའི་ཤར་ལྷོ་ན་ཡོད་ཅིང་། སྤྱི་ལོ1631ལོར་བཞེང་མགོ་བརྩམས། དེ་ནི་རྒྱ་གར་ལོ་རྒྱུས་ཐོག་གི་རྒྱལ་པོ་རཱ་ཛ་ཧན་གྱིས་བརྩེ་འདང་ཟབ་པའི་ལྕམ་མོ་ཐའེ་ལ་ཆེད་དུ་བཞེངས་པ་ཡིན།
འཛམ་གླིང་འཁྲུག་ཆེན་དང་པོ།
སྤྱི་ལོ1914-1918ལོའི་བར་དུ། འཛམ་གླིང་སྟེང་དུ་དེང་རབས་ཀྱི་རྒྱལ་སྤྱིའི་གཡུལ་འཁྲུག་ཆེན་པོ་ཞིག་བྱུང་ལ། དེ་ནི་འགྲོ་བ་མིའི་ལོ་རྒྱུས་སྟེང་དུ་བྱུང་བའི་འཛམ་གླིང་ཡོངས་སུ་ཁྱབ་པའི་དམག་འཁྲུག་ཆེན་པོ་ཞིག་རེད། འཁྲུག་ཆེན་ལ་ཞུགས་པའི་རྒྱལ་ཁབ་ནི་འཇར་མན་དང་ཨོ་ཧང་བཙན་རྒྱལ་གཙོ་བྱས་པའི་མནའ་མཐུན་རྒྱལ་ཁབ་དང་། ཧྥ་རན་སི་དང་དབྱིན་ཇི་དང་ཨུ་རུ་སུ་གཙོ་བྱས་པའི་ཆིངས་བཞག་རྒྱལ་ཁབ་ཕྱོགས་གཉིས་ཀ་རེད། རྒྱལ་ཁབ33དང་མི་ཐེར་འབུམ1དང་དུང་ཕྱུར5གཡུལ་འཁྲུག་དེའི་ནང་དུ་ཞུགས་པ་དང་མི་བྱེ་བ2ལྷག་ཤི་རྨས་སུ་སོང་། མཐའ་མར་མནའ་མཐུན་རྒྱལ་ཁབ་ཕམ་པར་བརྒྱབ་ནས་མཇུག་རྫོགས། འཁྲུག་ཆེན་གྱིས་འཛམ་གླིང་གི་ཆབ་སྲིད་མངའ་ཁོངས་བསྒྱུར་བྱུང་བ་སྟེ། འཇར་མན་དང་ཨོ་ཧང་། ཨུ་རུ་སུ། ཐུར་ཁེ་བཅས་བཙན་རྒྱལ་ཆེན་པོ་བཞི་ཐོར་ནས་རང་བཙན་རྒྱལ་ཁབ་གསར་བ་སྐོར་ཞིག་འབྱུང་དུ་བཅུག
ཨ་རབ་བཙན་རྒྱལ།
ཨ་རབ་བཙན་རྒྱལ་ནི་དུས་རབས7པའི་དུས་ལོ་རབས30བ་ནས་དུས་རབས13པའི་དུས་དཀྱིལ་བར་ཨ་རབ་པས་བཙུགས་པའི་དབྱི་སི་ལན་གྱི་རྒྱལ་ཁབ་ཅིག་ཡིན་ཞིང་། གསར་དུ་འཛུགས་མཁན་ནི་མུའུ་ཧན་མོ་ཏུ་ཡིན་པ་དང་། གཙོ་འཛིན་ལ་ཧྭ་ལི་ཧྥ་ཞེས་བརྗོད། སྤྱི་ལོ610ལོར་མུའུ་ཧན་མོ་ཏུས་མའེ་ཅཱ་ནས་དབྱི་སི་ལན་ཆོས་ལུགས་གསར་དུ་བཏོད་པ་དང་། སྤྱི་ལོ632ལོར་དབྱི་སི་ལན་ཆོས་ལུགས་ལ་དད་མོས་བྱེད་པའི་རྒྱལ་ཁབ་བཙུགས།
ལི་ཧྲི་ཁྲའོ་ཞན།
ལི་ཧྲི་ཁྲའོ་ཞན་ནི་ཁོ་རེ་ཡ་བཀས་བཀོད་རྒྱུད་འཛིན་གྱི་རྒྱལ་རབས་ཤིག་ཡིན་ཞིང་། མིང་ལ་བྱང་ཁོ་རེ་ཡ་རྒྱལ་རབས་ཞེས་བརྗོད་ལ། བསྡུས་མིང་ལ་ལི་ཁྲའོ་ཟེར། གསར་འཛུགས་པ་ནི་ལི་ཁྲིན་ཀོས་ཡིན། སྤྱི་ལོ1392ལོར་ལི་ཁྲིན་ཀོས་ཀྱིས་རང་ཉིད་རྒྱལ་བོར་བསྐོས་ཤིང་རྒྱལ་མིང་ལ་ཁོ་རེ་ཡ་ཞེས་བཏགས་པ་དང་། སྤྱི་ལོ1394ལོར་རྒྱལ་ས་ཁའེ་ཅིང་ནས་ཧན་ཁྲིན་དུ་སྤོས། སྤྱི་ལོ1443ལོར་རང་ཉིད་ཀྱི་ཡི་གེ་ཞིག་ཀྱང་གཏན་འཁེལ་མཛད་པ་དང་། སྤྱི་ལོ1469ལོར《རྒྱལ་ཁབ་ཁྲིམས་གཞུང》ཟེར་བ་འདོན་སྤེལ་བྱས་ཏེ། ཁྲིམས་ལུགས་ཀྱི་ཐོག་ནས་དབང་སྒྱུར་གྱི་ལམ་ལུགས་སྲ་བརྟན་དུ་བཏང་།
གསུམ་གཅིག་ལས་འགུལ།
གསུམ་གཅིག་ལས་འགུལ་ནི་ཁོ་རེ་ཡ་མི་དམངས་ཀྱིས་ལྗར་པན་མི་སེར་སྤེལ་བའི་དབང་སྒྱུར་ལ་ངོ་རྒོལ་བྱས་ཏེ་མི་རིགས་རང་བཙན་བརྩོན་ལེན་བྱས་པའི་རྒྱལ་གཅེས་ལས་འགུལ་ཞིག་ཡིན། ལས་འགུལ་དེ་སྤྱི་ལོ1919ལོའི་ཟླ3པའི་ཚེས1ཉིན་ལངས་པས་གསུམ་གཅིག་ལས་འགུལ་ཞེས་ཟེར་བ་ཡིན།
ཤིང་རྟ་ལོའི་ཞིང་བའི་འོས་ལངས།
ཤིང་རྟ་ལོའི་ཞིང་བའི་འོས་ལངས་ནི་ཁོ་རེ་ཡའི་ཞིང་བ་མང་ཚོགས་ཀྱིས་བཀས་བཀོད་རྒྱུད་འཛིན་གྱི་དབང་སྒྱུར་དང་ཕྱི་རྒྱལ་བཙན་འཛུལ་བར་ངོ་རྒོལ་བྱས་པའི་འོས་ལངས་ལ་ཟེར་ཞིང་། འོས་ལངས་དེ་ལུགས་རྙིང་གི་ཤིང་རྟ་ལོར་བྱུང་བས་མིང་དེ་ལྟར་བཏགས་པ་དང་། མིང་གཞན་ལ་ཏུང་ཞུའེ་ཏང་འོས་ལངས་ཀྱང་ཟེར།
ཆུ་འབྲུག་ལོའི་རྒྱལ་སྲུང་དམག་འཁྲུག
ཆུ་འབྲུག་ལོའི་རྒྱལ་སྲུང་དམག་འཁྲུག་ནི་ལི་ཧྲི་ཁྲའོ་ཞན་དུས་སྐབས་སུ་ཁོ་རེ་ཡའི་དམག་དམངས་ཀྱིས་ལྗར་པན་གྱི་བཙན་འཛུལ་ལ་འགོག་རྒོལ་བྱས་པའི་རྒྱལ་སྲུང་དམག་འཁྲུག་དེར་གོ་དགོས་པ་དང་། ཐེངས་འདིའི་དམག་འཁྲུག་ཏུ་ཁོ་རེ་ཡ་སྲུང་སྐྱོབ་བྱས་པར་མ་ཟད། ལྗར་པན་གྱིས་ཀྲུང་གོར་བཙན་འཛུལ་བྱེད་རྒྱུའི་ཧམ་སེམས་ཀྱི་འཆར་གཞི་ཡང་གཏོར་བ་རེད།
མུའུ་ཧྥུ་ཆབ་སྲིད།
མུའུ་ཧྥུ་ཞེས་པའི་མིང་འདི་ནི་ཆེས་ཐོག་མར་ཀྲུང་གོའི་གནའ་རབས་རྒྱ་ཡིག་ཏུ་བྱུང་བ་རེད་ལ། གཙོ་བོ་དམག་ལ་སྐྱོད་སྐབས་དམག་དཔོན་གྱི་སྡོད་གནས་ལ་གོ་དགོས། རྗེས་སུ་དམག་དཔོན་གྱིས་མགོ་ཁྲིད་པའི་ཀྲུང་དབྱང་སྲིད་དབང་ལའང་མུའུ་ཧྥུ་ཞེས་ཟེར། གནའ་རབས་ལྗར་པན་དུ་མུའུ་ཧྥུ་ཆབ་སྲིད་ཀྱི་དུས་སྐབས་ཞེས་པ་ཞིག་བྱུང་མྱོང་།
མིང་ཀྲི་ཁྲི་ལོའི་གསར་བཅོས།
མིང་ཀྲི་ཁྲི་ལོའི་གསར་བཅོས་ནི་དུས་རབས19བའི་ལོ་རབས60བའི་དུས་མཇུག་ཏུ་ལྗར་པན་ལ་ནུབ་ཕྱོགས་མ་རྩ་རིང་ལུགས་ཀྱི་བཟོ་ལས་རིག་གནས་ཀྱི་ཤུགས་རྐྱེན་ཐེབས་ཏེ་གོང་རིམ་ནས་འོག་རིམ་དུ་སྤེལ་བའི་ལས་འགུལ་ཞིག་དང་། མ་རྩ་རིང་ལུགས་ཀྱི་ངོ་བོ་ལྡན་པའི་ཡོད་ཚད་ནུབ་ཕྱོགས་ཅན་དང་དེང་རབས་ཅན་དུ་བསྒྱུར་བའི་བཅོས་སྒྱུར་ལས་འགུལ་ཞིག་ཡིན།
གནའ་བོའི་ཀེ་རི་སི།
གནའ་རབས་ཀེ་རི་སི་ནི་ཡོ་རོབ་གླིང་ཤེས་རིག་གི་འབྱུང་ཁུངས་ཤིག་ཡིན་ཞིང་། སྤྱི་ལོ་སྔོན་གྱི་ལོ2000ཡས་མས་ནས་སྤྱི་ལོ་སྔོན་གྱི་ལོ30ཡས་མས་བར་དུ། ཀེ་རི་སིའི་མིས་ས་དབུས་རྒྱ་མཚོའི་ས་ཁུལ་ཡོངས་སུ་བྲན་གཡོག་ལམ་ལུགས་ཀྱི་རྒྱལ་ཁབ་རབ་དང་རིམ་པ་ཞིག་བཙུགས་ཤིང་། ཨ་ཐེན་སི་དང་སི་པཱ་ཏཱ་གཙོ་བྱས་པའི་མཁར་རྫོང་རྒྱལ་ཕྲན་མང་བོ་ཞིག་བྱུང་ཡང་། སྤྱི་ལོ་སྔོན་གྱི་ལོ338ཀེ་རི་སིའི་མཁར་རྫོང་རྒྱལ་ཕྲན་མང་ཆེ་བ་ནི་མ་ཆི་ཏུན་རྒྱལ་བོའི་རྒྱལ་ཁབ་ཀྱིས་དབང་དུ་བསྒྱུར།
ཧོ་མའི་དུས་རབས།
ཧོ་མའི་དུས་རབས་ནི་སྤྱི་ལོ་སྔོན་གྱི་དུས་རབས11པ་ནས་སྤྱི་ལོ་སྔོན་གྱི་དུས་རབས9བའི་བར་གྱི་གནའ་རབས་ཀེ་རི་སིའི་གདུང་རྒྱུད་ལམ་ལུགས་འཐོར་བཤིག་ཏུ་གྱུར་བའི་ལོ་རྒྱུས་ཀྱི་དུས་རིམ་དེར་གོ་དགོས་ལ། དུས་སྐབས་དེར་ལྷ་སྒྲུང་ཁྲོད་ཀྱི་དཔའ་རྒོད་ཧ་ཅང་མང་བོ་ཞིག་བྱུང་བས། དཔའ་བོའི་དུས་རབས་ཞེས་ཀྱང་བརྗོད།
པར་ཟིག་བཙན་རྒྱལ།
པར་ཟིག་བཙན་རྒྱལ་ནི་གནའ་རབས་དབྱི་རག་དུ་པར་ཟིག་པ་གཙོ་བོ་ཡིན་པའི་བཙན་རྒྱལ་ཞིག་བྱུང་བ་དེ་ཡིན་ཞིང་། ཨ་ཆི་མེའུ་ཉི་ཏེ་བཙན་རྒྱལ་ཞེས་ཀྱང་ཟེར། སྤྱི་ལོ་སྔོན་གྱི་ལོ550ཅིའུ་ལོ་ཧྲི་སྐུ་ཕྲེང་གཉིས་པས་པར་ཟིག་བཙན་རྒྱལ་གསར་དུ་བཙུགས་ཤིང་། དེར་མཐུད་ནས་ཨེ་ཤ་ཡ་ཆུང་བའི་ལིའུ་ཏུ་ཡ་རྒྱལ་བོའི་རྒྱལ་ཁབ་རྩ་མེད་དུ་བཏང་བ་དང་། མཚོ་རྒྱུད་ཀྱི་ཀེ་རི་སིའི་མཁར་རྫོང་རྒྱལ་ཕྲན་ཁག་ཀྱང་དབང་དུ་བསྒྱུར།
མགོ་གསུམ་ཆབ་སྲིད།
མགོ་གསུམ་ཆབ་སྲིད་ནི་རོ་མ་ལ་སྔ་གཞུག་ཏུ་ཐེངས་གཉིས་ལ་དབང་ཤུགས་མི་སྣ་གསུམ་གྱིས་མཉམ་འབྲེལ་སྒོས་རྒྱལ་ཁབ་ཀྱི་དབང་ཆ་བདག་འཛིན་བྱས་པའི་ཆབ་སྲིད་ལམ་ལུགས་ཤིག་བྱུང་བ་དེར་ཟེར་བ་དང་། མགོ་གསུམ་མནའ་འབྲེལ་ཞེས་ཀྱང་བརྗོད། ལོ་རྒྱུས་ཐོག་མགོ་གསུམ་ཆབ་སྲིད་གཉིས་བྱུང་ཡོད་པ་རེད།
ལོ་ངོ་བདུན་གྱི་དམག་འཁྲུག
ལོ་ངོ་བདུན་གྱི་དམག་འཁྲུག་ནི་སྤྱི་ལོ1756ལོ་ནས་སྤྱི་ལོ1763ལོའི་བར་དུ། དབྱིན་ཇི་དང་ཕུའུ་ལུའུ་ཧྲི། ཧན་ནོ་ཝེ་སོགས་རྒྱལ་ཁབ་དང་ཧྥ་རན་སི། ཨོ་ཏེ་ལེ། ཨུ་རུ་སུ། སཱ་ཁུ་སེན། སི་ཝེ་ཟིར། སི་ཕན་བཅས་ཀྱི་བར་མངའ་ཁོངས་དང་ཕྱི་ཕྱོགས་མི་སེར་སྤེལ་ཡུལ་འཕྲོག་རྩོད་བྱེད་པའི་རྒྱལ་སྤྱིའི་དམག་འཁྲུག་བྱུང་བ་དེ་ལ་ཟེར། ཕྱོགས་གཉིས་ཀྱིས་འཛམ་གླིང་གི་ས་ཁུལ་སོ་སོ་ནས་འཕྲོག་རྩོད་བྱས།
རྒྱ་གར་གྱི་མི་རིགས་འོས་ལངས་ཆེན་མོ།
རྒྱ་གར་གྱི་མི་རིགས་འོས་ལངས་ཆེན་མོ་ནི་དུས་རབས19པའི་དུས་དཀྱིལ་དུ་རྒྱ་གར་གྱི་བཀས་བཀོད་རྒྱུད་འཛིན་མངའ་བདག་གིས་གཙོ་འཛིན་བྱས་ཤིང་། རྒྱ་གར་གླས་དམག་གིས་རྐང་འཛིན་བྱས་ཏེ་དབྱིན་ཇིའི་མི་སེར་སྤེལ་བའི་དབང་སྒྱུར་ལ་ངོ་རྒོལ་དང་མི་རིགས་རང་བཙན་བརྩོན་ལེན་བྱེད་པའི་འོས་ལངས་དེ་ལ་ཟེར་བ་ཡིན།
དབྱིན་ཏི་ཨན་པའི་གནའ་རབས་ཤེས་རིག
དབྱིན་ཏི་ཨན་པའི་གནའ་རབས་ཤེས་རིག་གི་ཁོངས་སུ་མཱ་ཡཱ་ཤེས་རིག་དང་ཨ་ཙི་ཐུ་ཁུ་ཤེས་རིག དབྱིན་ཅཱ་ཤེས་རིག་བཅས་ཤེས་རིག་ཆེན་པོ་གསུམ་འདུས་ཡོད་པ་དང་། དེ་ནི་དབྱིན་ཏི་ཨན་པས་ཁེར་ཚུགས་ཀྱི་གསར་གཏོད་བྱས་པའི་ཁྱད་ཆོས་ལྡན་པའི་ཤེས་རིག་ཡིན། ཁོ་ཚོས་ཞིང་ལས་སུ། ཐོག་མར་ལོ་ཏོག་དང་གཡེར་མ། སྲིང་བལ་དང་སྲན་མའི་རིགས་སོགས་འདེབས་འཛུགས་བྱས་ཤིང་། ད་ལྟ་འཛམ་གླིང་གི་བཟའ་འབྲུ་ཕལ་ཆེ་བའི་འབྱུང་ཁུངས་ཡིན།
མཱ་ཡཱའི་ཤེས་རིག
མཱ་ཡཱའི་རིག་གནས་ནི་མེ་གླིང་གི་དབྱིན་ཏི་ཨན་མཱ་ཡཱ་རིགས་ཀྱིས་དེང་གི་མོ་ཞི་ཁོའི་ལྷོ་ཕྱོགས་དང་ཀུའེ་ཐི་མ་ལ། ཧོང་ཏུ་ར་སི་བཅས་ཀྱི་ཁུལ་ནས་གསར་གཏོད་བྱས་པའི་གནའ་བོའི་ཤེས་རིག་ཅིག་ཡིན། མཱ་ཡཱའི་ཤེས་རིག་དེ་ཧ་ལམ་སྤྱི་ལོ་སྔོན་གྱི་ལོ2500ལ་གྲུབ་ཅིང་། སྤྱི་ལོ་སྔོན་གྱི་ལོ400ཡས་མས་སུ་བྲན་གཡོག་ལམ་ལུགས་ཀྱི་རྒྱལ་ཁབ་བཙུགས་པ་དང་སྤྱི་ལོའི་མགོ་ལ་འདྲ་གཟུགས་ཡི་གེའང་བྱུང་ཡོད།
| འཛམ་གླིང་ལོ་རྒྱུས། བརྡ་འགྲེལ 702 ཡོད། |
- རིག་རྩལ་བསྐྱར་དར།
- ཆོས་ལུགས་བཅོས་སྒྱུར།
- འབྱོར་ལྡན་གྲལ་རིམ་གྱི་གསར་བརྗེ།
- བློ་འབྱེད་ལས་འགུལ།
- ཧྥ་རན་སིའི་གསར་བརྗེ་ཆེན་མོ།
- མེ་གླིང་བྱང་མའི་རང་བཙན་དམག་འཁྲུག
- བཟོ་ལས་གསར་བརྗེ་ཐེངས་དང་པོ།
- སྤྱི་ཚོགས་རིང་ལུགས་ཀྱི་ལས་འགུལ།
- བཟོ་ལས་གསར་བརྗེ་ཐེངས་གཉིས་པ།
- འཛམ་གླིང་དམག་འཁྲུག་ཆེན་མོ་ཐེངས་དང་པོ།
- ཟླ་བཅུ་བའི་གསར་བརྗེ།
- འཛམ་གླིང་དམག་འཁྲུག་ཆེན་མོ་ཐེངས་གཉིས་པ།
- ཡོ་རོབ་ཤར་མའི་འཕོ་འགྱུར་ཆེན་མོ།
- འཛམ་གླིང་གསུམ་པ།
- གཞན་དག