དགེ་ལུགས་པ།
དགེ་ལུགས་པའི་གྲུབ་མཐའ་ནི་བོད་བརྒྱུད་ནང་བསྟན་གྱི་གྲུབ་མཐའ་ཞིག་ཡིན་ཞིང་། རྗེ་ཙོང་ཁ་པ་བློ་བཟང་གྲགས་པ་ཡབ་སྲས་ཀྱིས་དུས་རབས་བཅུ་བཞི་པའི་ནང་སྲོལ་བཏོད་དར་རྒྱས་མཛད་པའི་མདོ་སྔགས་བཤད་སྒྲུབ་ཟུང་འབྲེལ་གྱི་རིང་ལུགས་འཛིན་མཁན་རྗེས་འབྲང་དང་བཅས་པ། དགེ་ལུགས་པའི་གྲྭ་པ་རྣམས་ཀྱི་ཞྭ་མོ་སེར་པོ་ཡིན་པས་ཞྭ་སེར་པའང་ཟེར། དགེ་ལུགས་པ་ཞེས་པ་ནི་གདན་སའི་མིང་ལ་བརྟེན་ནས་བཏགས་པ་སྟེ། འཇམ་མགོན་བླ་མ་ཙོང་ཁ་པ་ཆེན་པོས་བོད་རབ་བྱུང་བདུན་པའི་ས་གླང་སྤྱི་ལོ1409ལོར་དགའ་ལྡན་དགོན་པ་བཏབ་སྟེ་སྐུ་ཚེའི་སྨད་དུ་དེར་བཞུགས་ནས་རྗེའི་རིང་ལུགས་ཆོས་རྗེ་དགའ་ལྡན་པའི་ལུགས་ཞེས་འབོད། དེའི་ཚིག་སྣ་བསྡུས་ནས་བརྗོད་པའི་ཚེ་དགའ་ལུགས་པ་ཞེས་ཟེར་མི་བདེ་བས་དགེ་ལུགས་པ་ཞེས་མིང་དུ་འབོད་པ་རྒྱུན་ཆགས། དེ་ནས་བཟུང་དགེ་ལུགས་པའི་གྲུབ་མཐའ་དར་ཞིང་རྒྱས་པར་གྱུར།
མཆོད་ཁ།
ཆོས་ཀྱི་འགོ་མ་སྐྱབས་འགྲོ་དང་ཟས་ཀྱི་འགོ་མ་མཆོད་ཁ་ཞེས་པ་ལྟར། རང་གི་སྐྱབས་གནས་སུ་གྱུར་བའི་བླ་མ་དམ་པ་དང་འཇིག་རྟེན་གྱི་བྱ་བཞག་ཐམས་ཅད་བགེགས་བར་ཆད་སེལ་བའི་ལྷ་ཐམས་ཅད་གྲོགས་སུ་འཛིན་པ་དེར་མཆོད་པ་འབུལ་བ་ཟེར།
རྡོ་རྗེ།
རྡོ་རྗེ་ཞེས་པ་ནང་བསྟན་གསང་སྔགས་ནས་བཤད་པའི་ལྷ་ཡི་ཕྱག་མཚན་གྱི་རིགས་ཤིག་ཡིན་ལ། དེར་དབྱེ་བ་དང་རིགས། རྒྱུ་དང་ཆ་ཚད། མཚོན་དོན་སོགས་གཞུང་ལས་གསལ་བོར་གསུངས་ཡོད།
ཀ་པཱ་ལ།
ཀ་པཱ་ལ་ཞེས་པ་ལེགས་སྦྱར་གྱི་སྐད་དེ། བོད་སྐད་དུ་ཐོད་པའི་མིང་ཡིན། དེ་ལ་མཁས་གྲུབ་རྗེའི་རྣལ་འབྱོར་རོལ་བའི་དགའ་སྟོན་དུ། དེ་ཡང་བླ་མ་དང་དཀྱིལ་འཁོར་གྱི་ལྷ་དང་དཔའ་བོ་དང་རྣལ་འབྱོར་མ་དག་ལ་ཚོགས་ཀྱི་འཁོར་ལོ་དང་། དཔའ་བོའི་སྟོན་མོ་དང་། དཀྱིལ་འཁོར་བསྒྲུབ་ཅིང་མཆོད་པའི་གནས་སྐབས་ལ་སོགས་པ་དུས་ཁྱད་པར་བ་དང་། དུས་ནར་མ་བའི་ཚེ་བདག་དང་ལྷ་ལ་སོགས་པ་བདུད་རྩིའི་མཆོད་པས་ཚིམ་པར་བྱེད་པའི་བཏུང་པའི་སྣོད་དང་། ལྷ་དང་མཁའ་འགྲོ་ཆོས་སྐྱོང་དང་འབྱུང་བོ་ལ་སོགས་པ་གཏོར་མས་ཚིམ་པར་བྱ་བའི་སྣོད་རྣལ་འབྱོར་བའི་ལྷུང་བཟེད་ཅེས་གསུངས་པ་ནི་ཐོད་པ་ཡིན་པས་འདིར་དེའི་རྣམ་གཞག་བཤད་པར་བྱ་སྟེ། རྗེས་དཀར་ཨོ་རྒྱན་བརྩོན་འགྲུས་ཀྱི་སྔགས་ཆས་རྣམ་པཤད་ལས། གསང་སྔགས་ཀྱི་དམ་རྫས་བདུད་རྩིའི་སྣོད་དང་རྣལ་འབྱོར་པའི་ཁམ་ཕོར་ལ་ནི་འཇིམ་པ་ལས་བྱས་པའི་སྣོད་དང་། རུས་སྦལ་གྱི་རུས་ཁོག་དང་། འཁར་བ་དང་། ཟངས་མ་དང་། ལྕགས་དང་། གསེར་དང་། དངུལ་དང་། དུང་དང་། ཉ་ཕྱིས་ཀྱི་ཁམ་ཕོར་དང་། བལ་བོ་སེའུའི་འབྲས་ཤུན་དང་། རྭ་ཅོ་དང་། ཤིང་ཕོར་དང་། རྡོ་སྣོད་དང་། ཐོད་ཕོར་བཅས་དུ་མ་ཞིག་ལ་བྱ་རུང་བ་ཡིན་ཏེ། བདེ་མཆོག་སྡོམ་འབྱུང་ལས། དེ་ནས་དེ་ཕྱིར་སྣོད་ཀྱི་ནི། །མཚན་ཉིད་མཆོག་ནི་ཡང་དག་བཤད། །འཇིམ་པའམ་དེ་བཞིན་རུས་སྦལ་སྣོད། །འཁར་བའམ་ཟངས་སམ་ལྕགས་ལས་བྱས། །གསེར་རམ་དངུལ་ལས་བྱས་པའམ། དུང་ངམ་དེ་བཞིན་ཉ་ཕྱིས་ཏེ། བལ་བོ་སེའུ་ཡི་འབྲས་བུ་མཚོག། དེ་བཞིན་གཞན་ཡང་གསར་བྱུང་བ། །རྭ་ལས་བྱུང་དང་ཤིང་སྣོད་སོགས། །གཞན་ཡང་རྡོ་སྣོད་ཁྱད་པར་རོ། །ཞེས་གསུངས་པའི་ཕྱིར་རོ། །
ཁ་ཊྭཱཾ་ག
ཁ་ཊྭཱཾ་གའི་མིང་གཞན་ལ་སྔགས་ཀྱི་འཁར་བསིལ་ཞེས་ཀྱང་བཤད་ལ། འདི་ལ་དུང་དཀར་ཚིག་མཛོད་ལས། དབྱུག་ཏོའི་རྩེར་ཐོད་སྐམ་གསུམ་བརྩེགས་སྟེང་ལྕགས་ཀྱི་རྩེ་གསུམ་ཅན་གྱི་ཕྱག་མཚན་ཞིག་ཞེས་གསུངས་པའི་ཕྱིར།
གཡང་གཞི།
མི་ལྤགས་མ་ཉམས་པ་མགོ་པགས་སྐྲ་དང་བཅས་པ་འབྱར་བ། རྐང་ལག་བཞིའི་སོར་མོ་སེན་མོ་དང་བཅས་པ་མ་ཉམས་པར་ཡོད་པ་ལེགས་པར་བཤུས་ནས་ཚྭ་དང་ག་བུར་སོགས་མི་རུལ་བའི་རྫས་ཀྱིས་བྱུག དེ་ནས་ཐལ་འཇིམ་བྱུགས་ཏེ་བྱེ་མ་རློན་པར་སྦངས། ཚིལ་ཞག་དང་ཁྲག་ཆུ་སེར་རྣམས་ཕྱུངས་ནས་བསྐམས་པ་དེའི་ནང་དུ་མཚལ་དང་སིན་ངྷུ་ར་སོགས་བྱུགས་ནས་དམར་པོ་བྱ་ཞིང་བསང་གཏོར་དང་བགེགས་བསྐྲད་དེ་གདན་གོས་དང་གཡབ་དར་སོགས་སུ་བཀོལ་དགོས་པ་ཡིན།
གཡེར་ཁ།
དྲིལ་བུ་ཆུང་ཆུང་གཡེར་མའི་ཁ་ལྟ་བུ་ཞིག་ཡིན་པར་ཚིག་མཛོད་ཆེན་མོ་ལས་གསུངས་པ་དང་། དུང་དཀར་ཚིག་མཛོད་ལས། རྟ་དྲེལ་སོགས་ཀྱི་སྐེ་ལ་འདོགས་རྒྱུའི་གཡེར་ཁ། གསེར་དངུལ་ལྕགས་མཉམ་བསྲེས་ལྕགས་རིགས་སོགས་ལས་བཟོས་པའི་གཡེར་ཁ། ཞེས་གསུངས་ཡོད་ལ་དམངས་ཁྲོད་དུ་འདི་ལ་ཁྲོལ་རིལ་ཞེས་ཀྱང་འབོད།
ཆ་ལང་།
ཆ་ལང་ངམ་སྦུབ་ཆལ་དུ་གྲགས་པ་འདི་སྤྱིར་རྒྱ་དཀར་ནག་བོད་སོགས་ཀུན་ལ་དར་ཅིང་རྒྱ་བལ་སོགས་ཀྱི་མདོ་དར་གྱི་རྩེད་མོ་སོགས་ལའང་རྔ་ཟླུམ་དང་ཆ་ལང་སོགས་ཡོད་ཅིང་། བོད་ཡུལ་དུ་ནི་སིལ་སྙན་དང་ཆ་ལང་གཉིས་ཞི་དྲག་གི་ཁྱད་ལྟ་བུ་མཛད་ཅིང་གང་ལྟར་ཡང་རྒྱ་ནག་ནས་བྱུང་རྒྱུ་གཙང་རྣམས་ལ་ལྷ་སྔགས་སོགས་བྲིས་པའང་ཡོད་འདུག་ལ། འདིའི་བརྡུང་སྟངས་སོགས་ནི་སྤྱིར་གྲྭ་ས་རང་རང་གིས་ཕྱག་སྲོལ་མི་འདྲ་མང་བས་མཐའ་གཅིག་ཏུ་བཟུང་བ་མེད་མོད། འོན་ཀྱང་དང་པོ་བསིལ་བར་དུ་བརྡུང་སྐབས་སུ་འཇོག་དང་མཐིང་ལ་སོགས་ཐ་མ་སིལ་འབེབས་པ་སོགས་ཏེ་འདི་བརྡུང་བའི་དགོས་པ་ནི་གསང་སྤྱོད་ལྟ་བར་མི་དབང་བའི་བགེགས་ཚོགས་བསྐྲོད་པ་དང་རྒྱལ་བ་རྣམས་མཆོད་པ། དམ་ཅན་མཁའ་འགྲོའི་ཐུགས་དམ་བསྐུལ་བ་ལ་སོགས་པའི་དགོས་པའོ། །
ཏིང་ཤགས།
སྔགས་འཆང་རྒྱན་གྱི་མེ་ཏོག་ལས། ཏིང་ཤགས་ནི། སྤྱིར་རྒྱ་གར་དུ་ནི་གསང་སྔགས་ཀྱི་རོལ་ཆ་མཚན་ཉིད་པ་རྣམས་གང་ཐད་ཐད་དུ་ཁྱེར་བའི་སྲོལ་མེད་ལ་སློང་མོ་སོགས་བྱ་དུས་དགེ་སློང་ཡིན་ན་འཁར་བསིལ་གྱིས་སྒོ་བརྡུང་བ་ཡིན་ལ། རྣལ་འབྱོར་བ་ཡིན་ན་གཡེར་ཁ་ཟེར་བའི་དཀྲོལ་རྒྱུ་ཞིག་ཡོད་པ་དེ་ལ་དཔག་ནས་ཆུ་གཏོར་སོགས་ལ། སྔགས་ཀྱི་རོལ་ཆ་ནི་མི་འོས་ཕྱིར་བརྡུང་བ་འདི་བོད་དུ་འབྲོག་མི་ལོ་ཙཱ་བ་ནས་དར་ཞེས་ཁ་ཅིག་གླེང་ངོ་། །ཞེས་གསུངས་པའི་ཕྱིར།
ཐུན་རྭ།
ཐུན་རྭ་ཞེས་པ་ནི་ཐུན་རྫས་བླུགས་པའི་རྭ་ཅོའི་སྣོད་ཞིག་སྟེ། མ་ཧེའི་རྭའམ་བ་མེན་རྭ་ཡིས་ནང་དུ་ཕག་མོ་ཞེས་བྱ་བའི་སྨན་དང་ཕག་གི་ལུས་ལས་བྱུང་བའི་འདམ་བླུགས་ནས་ལོ་གཅིག་ལ་བཞག་ན་ནུས་པ་ཁྱད་པར་ཅན་འབྱུང་བར་བཤད།
ཌ་མ་རུ།
ཌ་མ་རུ། མིང་བསྡུས་ན་ཌ་རུ། ཟླུམ་གོར་ཟུང་ལྟག་སྤྲོད་བྱས་པ་སྐེད་ལ་ཉག་ཡོད་པའི་ངོས་གཉིས་པགས་པས་གཡོགས་པ། སྐེད་པ་གཡས་གཡོན་དུ་སྲད་བུ་དམར་པོ་ལ་རྡུང་བྱེད་ཀྱི་རིལ་བུ་ཆུང་ངུ་མིག་འབྲས་འདྲ་བ་ཟུང་བཏགས་པའི་བླ་མེད་ཀྱི་ཆོ་ག་ལས་དཀྲོལ་རྒྱུའི་ཡོ་བྱེད་ཅིག སྔགས་བླ་མེད་ཀྱི་རྒྱུད་སྡེ་ཁོ་ན་ལས་གསུངས་ཤིང་རྒྱུད་སྡེ་འོག་མ་རྣམས་སུ་མ་བསྟན་པར་གསུངས་པས་ན་བླ་མེད་ཀྱི་ཆོ་ག་དག་ཏུ་བརྡུང་བར་བྱ་བ་ལས་བྱ་རྒྱུད་སོགས་དང་མདོ་རྐྱང་བའི་ཆོ་ག་རྣམས་ལ་དཀྲོལ་རྒྱུ་མིན་པ་ཤེས་གལ་ཤིན་ཏུ་ཆེ། ཁ་ཅིག་ཅང་ཏེའུ་དང་ཌ་མ་རུ་ཐ་དད་དུ་ཕྱེས་ནས་འཇོང་དབྱིབས་དབྱིག་དུམ་ཐུང་ངུ་སྐེད་ཉག་ཅན་འདྲ་བ་དེ་ཅང་ཏེའུ་དང་། ད་ལྟ་ཡོངས་ཁྱབ་ཏུ་སྤྱོད་པ་འདི་ལ་ཌ་མ་རུར་བྱེད་འདུག་མོད་རྒྱུད་ལས་དེ་འདྲ་སོ་སོར་བཤད་པ་མེད་པས་ལུགས་དེ་ལ་ཁུངས་མེད་ཅིང་མི་དག་པ་འདྲའོ། །ཞེས་རྗེས་དཀར་ཨོ་རྒྱན་བརྩོན་འགྲུས་སྔགས་ཆས་རྣམ་བཤད་ལས་གསུངས།
དགང་གཟར་བླུགས།
དགང་གཟར་བླུགས་ཞེས་པ་ཚིག་མཛོད་ཆེན་མོ་ལས། སྦྱིན་སྲེག་གི་མཛད་སྒོའི་སྐབས་བེད་སྤྱོད་པའི་ཡོ་བྱད་དགང་གཟར་དང་བླུགས་གཟར་གཉིས་ཀྱི་བསྡུས་མིང་། དགང་གཟར་ཞེས་པ་སྦྱིན་སྲེག་གི་གཟར་བུ་མགོ་གྲུ་བཞི་མ། བླུགས་གཟར་ཞེས་པ་སྦྱིན་སྲེག་སྐབས་མར་ཁུ་བླུག་བྱེད་ཀྱི་གཟར་བུ། ཞེས་གསུངས་པའི་ཕྱིར།
ཕུར་པ།
ཕུར་པའམ་ཕུར་བུ་ཞེས་པ་སྤྱིར་ན་དུད་འགྲོ་འདོགས་བྱེད་སོགས་ས་ལ་གདབ་བྱ་ཞིག དཔེར་ན། ལྕགས་ཕུར། ཤིང་ཕུར། གུར་ཕུར། གདང་ཕུར་སོགས་ལ་བྱེད་ཀྱང་། འདིར་གདོན་བགེགས་འདུལ་བྱེད་ཀྱི་སྔགས་ཆས་ཤིག འདི་ལ་དུང་དཀར་ཚིག་མཛོད་ལས། སངས་རྒྱས་ཆོས་ལུགས་ཀྱི་གསང་སྔགས་རྙིང་མའི་གཞུང་ལས་བཤད་པའི་དཔལ་ཆེན་རྡོ་རྗེ་ཕུར་བ་ཞེས་སྐུ་སྟོད་ཁྲོ་བོ་ལ་སྐུ་སྨད་ཕུར་པའི་དབྱིབས་སུ་ཡོད་པའི་ལྷ་ཞིག་སྟེ། དེ་ལ་ཡང་ཕུར་པ་ལྷ་ནག་དང་། ལྷ་ཁྲ་སོགས་མི་འདྲ་བ་ཁ་ཤས་ཡོད་ཚོད་འདུག་ཀྱང་དཔྱད་གཞི་བདག་གིས་མ་མཐོང་། ཞེས་གསུངས།
དབུ་མ་རྩ་བ་ཤེས་རབ།
བསྟན་བཅོས་འདི་ནི་སློབ་དཔོན་ཀླུ་སྒྲུབ་ཀྱིས་མཛད་ཅིང་། བསྟན་པ་སྔ་དར་སྐབས་རྒྱ་གར་གྱི་པཎྜི་ཏ་ཛྙཱ་ན་གརྦྷ་དང༌། ཞུ་ཆེན་ལོ་ཙཱ་བ་ཅོག་རོ་ཀླུའི་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། བསྟན་པ་ཕྱི་དར་སྐབས་ཁ་ཆེའི་གྲོང་ཁྱེར་དཔེ་མེད་ཀྱི་དབུས། གཙུག་ལག་ཁང་རིན་ཆེན་སྦས་པའི་དབུས་སུ་ཁ་ཆེའི་མཁན་པོ་ཧ་སུ་མ་ཏི་དང༌། བོད་ཀྱི་སྒྲ་བསྒྱུར་ལོ་ཙཱ་བ་པ་ཚབ་ཉི་མ་གྲགས་ཀྱིས་མིའི་བདག་པོ་འཕགས་པ་ལྷའི་སྐུ་རིང་ལ་འགྲེལ་པ་ཚིག་གསལ་བ་དང་བསྟུན་ནས་བཅོས་པ་སླད་ཀྱིས་ར་ས་འཕྲུལ་སྣང་གི་གཙུག་ལག་ཁང་དུ། རྒྱ་གར་གྱི་མཁན་པོ་ཀ་ན་ཀ་དང༌། ལོ་ཙཱ་བ་དེ་ཉིད་ཀྱིས་ཞུ་ཆེན་བགྱིས་པའི་ཟབ་མོ་དབུ་མའི་ལྟ་བ་རྣམ་དཔྱོད་རིགས་ལམ་གྱིས་སྟོན་པའི་གཞུང་རབ་ཏུ་བྱེད་པ་ཉི་ཤུ་རྩ་བདུན། ཤློ་ཀ་བཞི་བརྒྱ་བཞི་བཅུ་རྩ་དགུ། བམ་པོ་ནི་ཕྱེད་དང་གཉིས་ཀྱི་བདག་ཉིད་ཅན་ཞིག་གོ
རིན་ཆེན་ཕྲེང་བ།
རྒྱལ་པོ་ལ་གཏམ་བྱ་བ་རིན་པོ་ཆེའི་ཕྲེང་བ་ནི་སློབ་དཔོན་ཆེན་པོ་འཕགས་པ་ཀླུ་སྒྲུབ་ཀྱིས་མཛད་ཅིང་། རྒྱ་གར་གྱི་མཁན་པོ་ཛྙཱ་ན་གརྦྷ་དང༌ལོ་ཙཱ་བ་དགེ་སློང་ཀླུའི་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ། སླད་ཀྱི་རྒྱ་གར་གྱི་མཁན་པོ་ཀ་ན་ཀ་ཝརྨ་དང༌། བོད་ཀྱི་ལོ་ཙཱ་བ་པ་ཚབ་ཉི་མ་གྲགས་ཀྱིས་རྒྱ་དཔེ་གསུམ་ལ་གཏུགས་ནས་ལེགས་པར་བཅོས། བསྟན་འགྱུར་སྐྱེས་རབས་ག་པར་བཞུགས།
ཨ་མྱེས་སྲིན་པོ།
ཨ་མྱེས་སྲིན་པོ་ནི་ལྷ་མཐུ་བོ་ཆེ་ཞིག་ཡིན་པ་མ་ཟད་དྲག་པོ་ཞིག་ཀྱང་ཡིན་ལ་སྔོན་ཆད་རྗེ་གསེར་ཁང་བ་ཚང་གིས་དཀར་ཕྱོགས་སུ་བསྒྱུར་བར་བཤད། ཨ་མྱེས་སྲིན་པོ་ནི་སྐུ་མདོག་དཀར་ཞིང་སྐུ་ལ་གསེར་གྱི་ཁྲབ་དང་གསེར་རྨོག་མནབས་ཡོད། གཡོན་པར་ལྕགས་ཀྱི་ཀྱོ་བ་དང་མདའ་གཞུ་རལ་གྲི་དང་བཅས་པ་གསོལ་ཞིང་རྟ་མཆོག་ངང་སེར་ལ་བཅིབས། རྟའི་སྐེ་ན་ཟློམ་གཉིས་དང་བཅས་ཡོད། ཟློམ་ནི་ཐོབ་དང་གོ་ས་མཚོན་པ་ཡིན། སྒོ་སྲུང་ལ་འཁོར་རྟ་ནག་ཅན་ཡོད་པ་ཡིན།
མཆོད་རྟེན་སྐུ་གདུང་ཆ་བརྒྱད།
བོད་དུ་བཞེངས་པའི་མཆོད་རྟེན་ནི། སྟོན་པ་ཤཱཀྱ་ཐུབ་པས་རྒྱ་གར་དུ་མཛད་པ་གཙོ་བོར་བསྟན་པའི་གནས་ཆེན་བརྒྱད་ཀྱི་མཆོད་རྟེན་བོད་ལུགས་སུ་བཞེངས་པ་དག་ཡིན།
ཐར་མདོ།
དཔེ་དེབ་འདི་ནི་སངས་རྒྱས་ཤཱཀྱ་ཐུབ་པས་ཉིད་ཀྱི་སྲས་ཀུན་དགའ་བ་དང་བྱང་ཆུབ་སེམས་དཔའ་རྣམས་ཀྱིས་དྲི་བ་བཏོན་པར་ལན་བཏབ་པའི་ཚུལ་གྱིས་བསྡུ་བའི་དངོས་པོ་བཞི་དང་། ཕ་རོལ་ཏུ་ཕྱིན་པ་དྲུག་སོགས་ཀྱི་དོན་ལེགས་པར་བཀྲལ་ནས་སེམས་ཅན་ཐམས་ཅད་ཉོན་མོངས་པ་དང་སྡུག་བསྔལ་བ་ལས་ཡོངས་སུ་ཐར་བར་བྱེད་པ་བརྗོད་ཡོད།
དྲིལ་བུ།
དྲིལ་བུ་ནི་སངས་རྒྱས་ཆོས་ལུགས་ཀྱི་གསང་སྔགས་གཞུང་ནས་བཤད་པའི་ལྷ་ཡི་ཕྱག་མཚན་གྱི་རིགས་ཤིག འདི་ལ་རྒྱལ་བ་རིགས་ལྔའི་ས་བོན་དང་ཕྱག་མཚན་རི་མོ་འབུར་དོད་དུ་ཡོད་པའི་དམ་ཚིག་གི་དྲིལ་བུ་དང་བཅས་མི་འདྲ་བ་ཡོད། རྡོར་དྲིལ་གཉིས་ལས་རྡོ་རྗེའི་ཐབས་དང་དྲིལ་བུའི་ཤེས་རབ་མཚོན་པ་ཡིན་ཏེ། རྣལ་འབྱོར་རོལ་བའི་དགའ་སྟོན་ལས། རྡོ་རྗེའི་ཐབས་དང་དྲིལ་བུ་ཤེས་རབ་ཏུ་བརྗོད་པའི་ཤེས་རབ་ནི་སྟོང་ཉིད་རྟོགས་པའི་ཤེས་རབ་ཏུ་བྱས་པ་དང་། ཕྱག་རྒྱ་ལ་ཤེས་རབ་ཏུ་བྱས་པ་གཉིས་ཀྱི་དབང་གིས་འཆད་ཚུལ་སོ་སོར་ཤེས་དགོས་སོ། །ཞེས་གསུངས་པའི་ཕྱིར།
དུང་དཀར།
དུང་དཀར་ནི་འབུད་པའི་རོལ་མོའི་བྱེ་བྲག་ཅིག་སྟེ། ཡོངས་གྲགས་སུ་ཆོས་དུང་དང་ཚོགས་དུང་ཞེས་འབོད་ཅིང་། དུང་དཀར་ནི་བོད་མདོ་དབུས་ཁམས་གསུམ་དུ་དར་ཁྱབ་ཆེ་ཞིང་། མེད་དུ་མི་རུང་བའི་རོལ་མོའི་བྱེ་བྲག་ཅིག་ཡིན།
ཟངས་དུང་།
ཟངས་དུང་ནི་འབུད་པའི་རོལ་མོའི་རྣམ་གྲངས་ཤིག་སྟེ། བོད་ཀྱི་ལོ་རྒྱུས་ཡིག་ཚང་ནང་འཁོད་པར་གཞིགས་ན་བགྲང་བྱ་སྟོང་ཕྲག་ལྷག་ཙམ་གྱི་ལོ་རྒྱུས་ཡོད་ཅིང་། གཞི་རྐང་དུང་ཆེན་གྱི་དབྱིབས་ནི་སྲིད་དུ་རིང་ཐུང་ཇི་ལྟར་བྱུང་ཡང་རྩ་མདའ་ཐེ་བའི་ལྷུ་བཞི་ལས་གྲུབ་ཅིང་། སྟོད་ནས་རིམ་བཞིན་ཇེ་སྦོམ་དུ་སོང་བའི་སྨད་མཐར་ཁ་བོ་ཆེ་རྒྱ་གླིང་གི་ཁ་ལྟར་གཡེར་བ་དང་། ལྷུ་སོ་སོའི་བར་ན་ཡང་ལྦ་ཚིགས་ཚགས་དཀྲོལ་གྱི་པ་ཏྲས་མཛེས་པ་གང་ཞིག མགྲིན་པའི་གྱེན་ལ་རིམ་བཞིན་ཕྲ་བའི་སྟེང་དུ་སྦུ་གུ་དང་སྤྲད་པའི་ཁ་ཡི་མེ་ཏོག་གམ་ཏིང་ཤགས་ཞེས་མཆུ་རྟེན་སྦུབས་ཅན་ཁ་ཕྱིར་ལོག་པའི་རྣམ་པ་ཅན། མགྲིན་པའི་སྦུ་གུའི་ཕྱོགས་གསུམ་སྒྲོ་འདབ་ཅེས་ཟངས་ཀྱི་ཐུར་མ་གསུམ་གྱི་པྲ་ཆོས་བྱས་པ་ཞིག་ཡིན།
ཕྲེང་བ།
ཕྲེང་བའམ་ཡང་ན་བགྲང་ཕྲེང་ལ་དག་ཡིག་གསར་བསྒྲིགས་ལས། རྡོག་པོ་མང་བོ་སྐུད་པ་དང་ཐག་པ་སོགས་ལ་བརྒྱུས་པའམ་གཅིག་རྗེས་གཅིག་བསྒྲིགས་པའི་དངོས་པོའི་མིང་། ཞེས་གྲངས་ཀ་འདྲེན་བྱེད་ཀྱི་ཕྲེང་བ་ལ་བཤད་པ་དང་། སྔགས་ཆས་རྣམ་བཤད་ལས་ཕྲེང་བའི་ངོ་བོ་ལ་དངོས་པོ་གང་ཞིག་ཟླུམ་པོ་ལ་སོགས་པར་བཅོས་ནས་དུ་མ་སྐུད་པ་ལ་བརྒྱུས་ཏེ་རྒྱན་དང་བསྙེན་པའི་གྲངས་ཚད་འཛིན་སླད་གྲངས་ངེས་ཅན་ཞིག་ཏུ་བྱས་པ་དེ་ཕྲེང་བའི་ངོ་བོར་འཇོག་ཆོག་སྟེ། སློབ་དཔོན་པདྨ་ཀཱ་རའི་དགོངས་འདུས་ཕྲེང་བཤད་སྔགས་འཆང་རྒྱན་གྱི་མེ་ཏོག་ཏུ་དྲངས་པ་ལས། རྩར་ལས་རྒྱུས་དང་གྲངས་ཅན་དང་། །རྒྱན་དུ་བྱས་དང་ཁྲིགས་ལ་འབེབས། །ཚོད་འཛིན་བསྙེན་པའི་སླད་དུ་སྟེ། །དེ་སོགས་ཕྲེང་པའི་ངོ་བོར་བཤད། །ཅེས་གསུངས་པའི་ཕྱིར།
བུམ་པ།
བུམ་པ་ནི་ལྟོ་ལྡིར་ཞབས་ཞུམ་ཆུ་སྐྱོར་དོན་བྱེད་ནུས་པ། ཆོས་ལུགས་ཀྱི་ཆོ་གའི་སྟེང་ཆུ་ལྡུག་བྱེད་ཀྱི་ཆུ་སྣོད་བྱེ་བྲག་པ་ཞིག་གི་མིང་། དམ་བེ་དང་དོན་གཅིག འདིའི་རྒྱུ་ལ་གསེར་དང་། དངུལ། ཟངས། ར་གན། ལི། ལྕགས། ཤེལ། བེེཌྰུར་ཡ། བྱི་རུ། ཨིནྡྲ་ནཱི་ལ། ཤིང་སོགས་གང་རུང་ལས་བྱས་པ་ཞིག་དང་། དབྱིབས། མགྲིན་པ་རིང་ཞིང་ཕྲ་བ་དང་། ལྟོ་བ་ལྡིར་བ་དང་། མཆུ་འཕྱང་བ་དང་། ཞབས་ཞུམ་པ་དང་། ཁ་ཁྱེར་གཡེར་བ་ཅན་དང་ཁྱད་པར་དྲུག་ཚང་བ་ཞིག
རལ་གྲི།
རལ་གྲི་ཞེས་པ་སྔ་དུས་ཀྱི་མཚོན་ཆ་ཞིག་སྟེ། མིང་གི་རྣམ་གྲངས་ལ་སྐེད་གྲི་དང་། གྲི་ཐུང་། གྲི་རིང་། གཅོད་བྱེད། རྗེས་སུ་གཅོད། འདེགས་བྱེད། རྡེག་ཆ། དཔལ་གྱི་སྙིང་པོ། ལག་སྐྱོང་། ལག་ཆ། ལག་སྲུང་། ཤང་ལང་བཅས་ཡིན་པར་ཚིག་མཛོད་ཆེན་པོ་ལས་གསུངས་པ་དང་དག་ཡིག་གསར་བསྒྲིགས་ལས། ཕྱོགས་གཉིས་ཀ་རྣོ་བའི་གྲིའི་མིང་། ཞེས་གསུངས།
རྐང་གླིང་།
རྐང་གླིང་ལ་དུང་དཀར་ཚིག་མཛོད་ལས། དཔའ་བོ་དམག་ཐོག་ཏུ་ཤི་བའམ། སྐྱེས་པའམ་བུད་མེད་གཙང་མ་རང་བཞིན་གྱིས་ཤི་བའི་རྐང་རུས་ལསབཟོས་པའི་གླིང་བུ་སྟེ། རྐང་གླིང་བཟོ་རྒྱུའི་ཆེད་དུ་མི་བསད་ནས་བཟོས་པའི་ལུགས་སྲོལ་དེ་འདྲ་ནང་བསྟན་ཆོས་ལུགས་ལ་གཏན་ནས་མེད། ཞེས་གསུངས་པ་དང་། ཚིག་མཛོད་ཆེན་མོ་ལས། སྔགས་ཀྱི་མཆོད་རྫས་བྱེ་བྲག་མིའི་བརླ་རྐང་རུས་ཀྱི་གླིང་བུ། ཞེས་གསུངས་པའི་ཕྱིར།
ལྷ་བསང་།
སྤྱིར་བསང་ཟེར་བ་ནི་ངོ་བོའམ་གོ་དོན་གྱི་ཆ་ནས་བཤད་ན། ཞུ་ཆེན་ཚུལ་ཁྲིམས་རིན་ཆེན་གྱིས། དག་བྱེད་དྲི་ཞིམ་གྱི་ཆོ་ག་གང་ཞིག ཉེས་སྐྱོན་གྱི་སྒྲུབ་བྱེད་ཐམས་ཅད་བྱང་ཞིང་། བདེ་ལེགས་སྟེར་བའི་ནུས་པ་དང་ལྡན་པ།ཞེས་གསུངས་པ་ལྟར།དག་བྱེད་དྲི་ཞིམ་རྫས་ཀྱི་ནུས་པས་ཉེས་སྐྱོན་འབག་གཙོག་བྱང་བར་བྱེད་ཅིང་།བདེ་ལེགས་སྟེར་བའི་ཆོ་ག་ཞིག་ལ་བསང་ཟེར། འགའ་ཞིག་གི་རྣམ་རྟོག་ལ་བསང་གཏོང་བའི་སྐབས་སུའང་སྐྱབས་གསུམ་གཙོ་བོ་དང་འཇིག་རྟེན་པའི་ལྷ་ཀླུ་ཞར་བྱུང་དུ་སྨྲ་བ་ནི།མཆོད་རྟེན་ནག་འཇམ་མེར་བཞག་ནས་བྲག་ལ་དཀར་རྩི་བྱུག་པའི་དཔེ་ལྟར་དེ་ཙམ་འགྲིག་པར་མི་སྣང་སྟེ།རྒྱལ་མཆོག་ལྔ་བ་ཆེན་པོས། དེང་དུས་ལྷ་ཀླུ་ཞར་བྱུང་ཙམ་བྱས་ནས། །བླ་མ་ཡི་དམ་གཙོར་བྱས་བསང་ཡིག་རྣམས།།དགོས་དོན་མ་རྟོགས་གྱ་ཚོམ་སྨྲ་བའི་ཚིག །མཆོད་རྟེན་ནག་འཇམ་བྲག་ལ་དཀར་རྩི་བཞིན། །ཞེས་གསུངས་པ་ལྟར་རོ། ། དེ་ལ་འདིར་ལྷ་བསང་གི་ཁུངས་དང་། ལྷ་བསང་གཏོང་ཡུལ།ལྷ་བསང་གི་རྫས། རྫས་མ་དག་པའི་ཉེས་སྐྱོན། ལྷ་བསང་གཏོང་བའི་གནས་དང་དུས། ལྷ་བསང་གི་ཕན་ཡོན་བཅས་ས་བཅད་དྲུག་གིས་བཤད་དོ།།
ཚོགས་གཉིས།
ཚོགས་གཉིས་ནི་ནང་བསྟན་ཆོས་གཞུང་ལས་བསོད་ནམས་ཀྱི་ཚོགས་དང་ཡེ་ཤེས་ཀྱི་ཚོགས་གཉིས་ལ་ཟེར་ཞིང་། བསོད་ནམས་ཀྱི་ཚོགས་ནི་སྦྱིན་པ་བཏང་བ་དང་ཚུལ་ཁྲིམས་སྲུང་བ་ལྟ་བུ་དང་། ཡེ་ཤེས་ཀྱི་ཚོགས་ནི་ཏིང་ངེ་འཛིན་སྒོམ་པ་དང་། སྟོང་ཉིད་ཀྱི་ལྟ་བ་རྟོགས་པ་ལྟ་བུ་སྟེ། ཚོགས་གཉིས་བསགས་པས་འབྲས་བུ་སྐུ་གཉིས་སུ་གྲངས་ངེས་པ་ཡིན་ལ། ཚོགས་གཉིས་མ་རྫོགས་ན། དག་པ་གཉིས་ལྡན་གྱི་སངས་རྒྱས་ཐོབ་པའི་ཐབས་མེད། དེ་བཞིན་དུ་ཚོགས་གཉིས་ཡོངས་སུ་མ་རྫོགས་པར། སྟོང་བ་ཉིད་ཀྱི་དོན་མ་ནོར་བ་དེ་ཡང་རྒྱུད་ལ་སྐྱེ་མི་ནུས་ཏེ། མདོ་ལས། ཇི་སྲིད་ཚོགས་གཉིས་དམ་པ་མ་རྫོགས་པར།། དེ་སྲིད་སྟོང་ཉིད་དམ་པ་དེ་ནི་རྟོགས་མི་བྱེད།། ཅེ་གསུངས་པ་ལྟར། ཚོགས་གཉིས་ཡོངས་སུ་རྫོགས་པ་གནད་ཆེའོ།།
ཉན་ཐོས་ཚོགས་ལམ།
སྤྱིར་ན་ཉན་ཐོས་ཚོགས་ལམ་དང་། དད་པའི་ས། ཐར་བ་ཆ་མཐུན། ཆོས་མངོན་རྟོགས་རྣམས་དོན་གཅིག་མིང་གི་རྣམ་གྲངས་ཡིན་ལ། དེ་དག་ཐེག་པ་རང་ལམ་གྱི་བྱང་ཆུབ་འཐོབ་ཕྱིར་དུ་ཚོགས་གསོག་པའི་ལམ་གྱི་དང་བོ་ཡིན་པས་ན་ཚོགས་ལམ་ཞེས་བརྗོད་པ་ཡིན།
ཉན་ཐོས་སྦྱོར་ལམ།
ཉན་ཐོས་སྦྱོར་ལམ་ནི་རང་འབྲས་ཉན་ཐོས་མཐོང་ལམ་མ་སྐྱེས་གོང་གི་ཉན་ཐོས་ཀྱི་དོན་མངོན་རྟོགས་དེ་ཡིན་ཏེ་ཚོགས་ལམ་པ་དེས་ཞི་གནས་ལ་མཉམ་པར་འཇོག་བཞིན་པའི་ངང་ནས། བདག་མེད་ཕྲ་མོ་ལ་དཔྱད་སྟོབས་ཀྱིས་ལུས་སེམས་ཤིན་སྦྱངས་ཀྱི་བདེ་བ་ཁྱད་པར་ཅན་དྲངས་ཏེ་སྒོམ་བྱུང་གི་ཤེས་རབ་ཐོབ་པ་ན་ཉན་ཐོས་སྦྱོར་ལམ་ཐོབ་པ་ཡིན་ནོ།།
དྲན་པ་ཉེར་གཞག་བཞི།
དྲན་པ་ཉེར་གཞག་ཅེས་པ་ནི་ཏིང་ངེ་འཛིན་གྱི་རིགས་ཤིག་ཡིན་ལ། རང་ཡུལ་ལུས་སོགས་དམིགས་ནས་དེར་ཡང་དང་ཡང་དུ་བརྟག་ཅིང་དཔྱད་དེ་རྙེད་པའི་གནས་ལུགས་རྣམས་མི་བརྗེད་པར་འཛིན་པའི་དྲན་ཤེས་ཀྱི་རྣམ་པ་ཅན་ཞིག་ལ་ཟེར་བ་དང་། དྲན་པ་ཉེར་བར་གཞག་པ་བཞིར་དབྱེ་བ་ནི་དམིགས་ཡུལ་གྱི་ཁྱད་པར་ལ་ལྟོས་ནས་བཞག་པ་ཡིན་ནོ།།
| སངས་རྒྱས་ཆོས་ལུགས། བརྡ་འགྲེལ 2657 ཡོད། |