འབྲོང་།
འབྲོང་ནི་མདོ་དབུས་མཐོ་སྒང་གི་ཁྱད་འཕགས་སྲོག་ཆགས་ཤིག་ཡིན་ཞིང་། མངོན་གསལ་ལྡན་པའི་མཐོ་སྒང་གྲང་ངར་ཆེ་སའི་སྲོག་ཆགས་ཡིན། གཟུགས་གཞི་ཆེ་ཞིང་སུག་བཞི་ཐུང་བ་དང་། ནོར་ནག་ལས་ལྡབ2ནས3གྱིས་ཆེ་བ་ཡིན། འབྲོང་མང་ཤོས་ཀྱི་སྤུ་ཁ་ནག་པོ་ཡིན་མོད། འོན་ཀྱང་སྤུ་ཁ་སེར་པོ་ཡིན་པའི་འབྲོང་ཡང་ཡོད།
སྟག
སྟག་ནི་འཛམ་གླིང་སྟེང་གི་གཅན་གཟན་ཡག་ཤོས་ཤིག་ཡིན་པར་མ་ཟད། སྐྱེ་ཁམས་ཟས་རིགས་ཕྲེང་ཐག་གི་ཐག་མགོར་གནས་པའི་གཅན་གཟན་ཞིག་ཀྱང་ཡིན། སྟག་ནི་བོད་ཀྱི་སྲོལ་རྒྱུན་རིག་གནས་ཁྲོད་ཀྱི་བརྗོད་བྱ་གཙོ་བོ་ཞིག་ཡིན་ཏེ། དཔེར་ན། དཔའ་བོར་བསྟོད་ན་སྟག་དང་སྡར་མར་སྨད་ན་ཝ་མོ་དཔེ་རུ་འཇོག་པ་ལྟ་བུ་དང་། རླུང་རྟ་རུ་སྟག་སེང་ཁྱུང་འབྲུག་རླུང་རྟ་ཡར་ལ་རྒྱས་ཞེས་པར་མཚོན་ན་སྟག་ནི་རླུང་རྟ་སྡེ་བཞིའི་མགོ་ན་བཞག་ཡོད།
ཁྲ།
ཁྲ་ནི་བློ་རིག་རྒོད་ཅིང་གཏུམ་སྤྱོད་ཆེ་བའི་སྒྲོ་སྤུ་སྨུག་སྐྱའམ་སྨུག་ནག་ཡིན་འདབ་ཆགས་རིགས་ཤིག་ཡིན་ལ། རི་མགོ་དང་བྲག་ཁ་རུ་མཐོང་ཐུབ།
ཁྲུང་ཁྲུང་སྐེ་ནག
ཁྲུང་ཁྲུང་སྐེ་ནག་ལ་བོད་བྱ་ཁྲུང་ཁྲུང་དང་ལྷ་བྱ་ཁྲུང་ཁྲུང་ཟེར་ཞིང་། དམངས་ཁྲོད་དུ་གེ་སར་རྟ་རྫི་ཞེས་ཀྱང་འབོད་པ་ཡིན། མདོ་དབུས་མཐོ་སྒང་དང་སི་ཁྲོན་བྱང་རྒྱུད་ན་མ་གཏོགས་མེད།
གནའ།
གནའ་ནི་རྫ་མགོ་ན་གནས་པའི་རི་སྐྱེས་སྲོག་ཆགས་ཀྱི་རིགས་ཤིག་ཡིན། ཕོ་གནའ་མོ་གནའ་གང་ཡིན་ཡང་རྭ་ཅོ་སྐྱེས་ཡོད་ལ་སྤུ་མདངས་ཁམ་སེར་རམ་སྔོ་སྐྱ་ཡིན་པ། དགུན་ཐོག་སྤུ་མདངས་ནག་སེར་རམ་ནག་སྐྱར་འགྱུར་བ། རི་མགོ་དང་རྫ་མགོར་འགོ་བར་ཤིན་ཏུ་མཁས་པའི་རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོབ་སྲོག་ཆགས་ཡིན།
གཙོད།
གཙོད་ནི་མདོ་དབུ་མཐོ་སྒང་ནས་ཡོད་པའི་རི་སྐྱེས་སྲོག་ཆགས་ཀྱི་རིགས་ཤིག་ཡིན། ཕོ་གཙོད་ལ་རྭ་ཅོ་ཡོད་པ་དང་མོ་གཙོད་ལ་རྭ་ཅོ་མེད། རྒྱབ་གཞུང་ནག་སེར་དང་གསུས་ངོས་དཀར་བོ་ཡིན་པ། བརྒྱུགས་ན་ཧ་ཅང་མགྱོགས་པའི་རི་དྭགས་ཤིག་ཡིན། གཙོ་བོ་ཨ་ཆེན་གངས་རྒྱབ་ན་ཡོད་པས་ཨ་ཆེན་གངས་རྒྱབ་ཀྱི་རྒྱན་དུ་གྱུར་ཡོད།
འུག་པ།
འུག་པ་ནི་འདབ་ཆགས་ཀྱི་རིགས་ཤིག་ཡིན། འུག་པའི་ཁ་ཟས་གཙོ་བོ་བྱི་བའི་རིགས་ཡིན་ལ། ཞིང་ལས་དང་ཕྱུགས་ལས། ནགས་ལས་བཅས་ལ་ཕན། མི་ཉུང་སའི་ནགས་ཁྲོད་དུ་གནས་ཡོད་ལ་མཚན་མོར་འགུལ་སྤྱོད་བྱེད་པའི་རིགས་ཡིན། འཕུར་ཚད་ཅུང་དམའ་ཞིང་དལ་བ། སྒྲ་མེད་པ་ཞིག་ཡིན།
ཧོར་བ་དཀར་པོ།
ཧོར་བ་དཀར་པོ་ནི་རི་ཁུལ་གྱི་རྩྭ་ས་དང་སྤང་རྩྭའི་རྩྭ་ཐང་ནས་འཚོ་སྡོད་བྱས་ཡོད་པའི་འདབ་ཆགས་ཤིག་སྟེ། བར་སྣང་དུ་འཕུར་སྐབས་གཤོག་རྡེབ་བྱེད་པ་ཧ་ཅང་མགྱོགས་ཤིང་རི་དྭགས་རྔོན་སྐབས་བར་སྣང་ནས་མར་བཅུམ་ཚད་ཀྱང་ཤིན་ཏུ་མགྱོགས།
རྒོ་དམར།
མདོ་དབུས་མཐོ་སྒང་ན་མ་གཏོགས་མེད་པའི་རི་སྐྱེས་སྲོག་ཆགས་ཤིག་སྟེ། སྤུ་མདངས་སྐྱ་སེར་ཡིན་ཞིང་། དབྱར་ཐོག་སེར་ཞད་ཆེ་བ་དང་དགུན་ཐོག་སྐྱ་ཞད་ཆེ་བ། ཨོང་དོ་དང་གསུས་ངོས་ཀྱི་སྤུ་མདངས་དཀར་བོ་ཡིན་པ། ཕོ་རྒོར་རྭ་ཅོ་ཐེམ་འབུར་ཅན་ཡོད་པའི་རི་དྭགས་གཙོད་དང་ཆ་འདྲ་བོ་ཡོད།
རྩེབ་གཉག
རྩེབ་གཉག་ལ་ཡུལ་སྐད་དུ་ར་རྒྱ་ཡང་ཟེར། བ་ལང་དང་ར་མའི་བར་ན་གནས། རང་རྒྱལ་ནས་ཁྱབ་རྒྱ་ཧ་ཅང་ཆེ། སུག་བཞི་སྦོམ་ཞིང་བཀན་ལ། སོག་མགོ་མཐོ་ཞིང་རྔ་མ་ཐུང་། སྣ་མདོ་བ་ལང་དང་མཚུངས་ཤིང་ཡ་ཐོད་འབུར་འདུག ཕོ་མོ་གང་ཡིན་རུང་ཡར་སྐྱེས་ཏེ་ལྟག་རྒྱབ་ལ་འཁྱིལ་འདུག་པའི་རྭ་ཅོ་ཡོད། ལུས་ཡོངས་ཀྱི་སྤུ་མདངས་ཁམ་སེར་རམ་ཁམ་སྐྱ་ཡིན།
ཤ་བ་མཆུ་སྐྱ།
ཤ་བ་མཆུ་སྐྱ་ནི་མཚོ་ངོས་ལས་སྨི3000-5000ཡན་གྱི་མཐོ་སྒང་ཁབ་དབྱིབས་ནགས་ཚལ་ན་གནས་ཡོད། ཤ་བ་དེའི་རིགས་སྤུ་མདོག་སེར་སྐྱ་ཡིན་ལ་སྣ་མགོ་དང་མཆུ་སྒྲོས། མ་འགལ་བཅས་ཀྱི་སྤུ་མདོག་དཀར་བོ་ཡིན་པ་དང་། སྤུ་ཉག་རགས་མོ་ཡིན། ཤ་བའི་ཤ་རྭ་ལ་ཡལ་ག5ནས6ཡོད།
ཨ་བྲའི་གནོད་འཚེ།
ཨ་བྲའི་གནོད་འཚེ་ཡིས་དུག་གི་རིགས་དང་འབུ་ཕྲའི་རིགས་ཀྱི་ནད་ཡམས་སྣ་ཚོགས་འབྱུང་བར་བྱེད་པ་དང་། ད་དུང་ཚབས་ཆེན་ཡིན་པའི་ས་ཁུལ་དུ་དེ་ཡིས་མིའི་ལུས་ཕུང་གི་བདེ་འཇགས་ལ་ཐད་ཀར་གྱིས་གནོད་འཚེ་ཐེབས་སྲིད།
གླ་བ།
གླ་བ་ནི་གཙོར་མདོ་དབུས་མཐོ་སྒང་ན་ཡོད་པའི་རི་སྐྱེས་སྲོག་ཆགས་ཤིག་སྟེ། གླ་བའི་སྤུའི་ཁ་དོག་ནི་ཁམ་ནག་གམ་ཁམ་སེར་ཡིན་ལ་དེའི་སྟེང་ན་སེར་ཞད་འདྲེས་པའི་ཐིག་ལེ4ནས་ཐིག་ལེ6ཉིས་གཤར་བྱས་ནས་བསྟར་འདུག ཕོ་གླར་ཕྱིར་མངོན་པའི་མཆེ་བ་སྐྱེས་ཡོད་པ་དང་གསུས་ཁུགས་ན་གླ་རྩི་ཡོད།
འོལ་བ།
བྱ་སྐད་རྣ་ལམ་དུ་ཟུག་འོང་ཞིང་ལུས་སྟོད་ཁམ་མདོག་དང་མགོ་ཡི་སྒྲོ་སྤུའི་སྤུ་མདོག་ནག་པོ་ཡིན་ལ། དེའི་སྟེང་ན་ཐིག་རིས་འཐེན་པ། བྱ་རྐང་དཀར་བོ་ཡིན་པ་དང་སྡེར་མོ་ནག་པོ་ཡིན་པའི་འདབ་ཆགས་ཤིག་ཡིན།
འཕྱི་བ།
འཕྱི་བ་ནི་འོ་འཐུང་སྲོག་ཆགས་ཀྱི་སོ་མི་བརྗེ་བའི་སྡེའི་ནགས་བྱིའི་ཚན་ལས་གཟུགས་གཞི་ཆེས་ཆེ་བ་དེ་ཡིན། ས་སྐམ་སར་འཕྱི་ཁུང་སློག་པ་དང་ དགུན་ཉལ་སྟེག ལུས་རྒྱབ་དམར་སེར་ཡིན་ལ་གྲ་སྤུ་ནག་པོ་ཙམ་འདྲེས་འདུག གསུས་ངོས་སེར་སྐྱ་ཡིན་ལ། རྔ་མའི་སྣེ་མོ་ནག་སེར་ཡིན། མདོ་དབུ་མཐོ་སྒང་གི་རང་བྱུང་ལ་གཏོར་བརླག་བྱས་མེད་པའི་ས་ཆ་ནས་མཐོང་རྒྱུ་མང་།
གྲུམ་པ།
གྲུམ་པ་ནི་ཡ་གླིང་དང་ཨོའུ་གླིང་། རང་རྒྱལ་གྱི་ཏུང་པེ་དང་ནུབ་བྱང་། ཧྭ་ནན་ས་ཆ་སོགས་ན་ཡོད་པའི་སྲེ་མོང་ཚན་གྱི་སྲོག་ཆགས་ཤིག་སྟེ། གདོང་ན་རྟགས་ཤད་དཀར་བོའམ་རྟགས་ཤད་དཀར་སྐྱ3འཐེན་པ། ལུས་པོ་ཚོ་ཞིང་སྡེར་མོ་ཧ་ཅང་རྣོ་བ། སྤུ་མདངས་དཀར་ནག་འདྲེས་མ་སྟེ་ཁམ་སྐྱ་ཡིན།
ཏེ་ལོ།
ཏེ་ལོ་ནི་སྲེ་མོང་ཚན་གྱི་མཚན་མོར་རྒྱུ་བའི་སྲོག་ཆགས་ཤིག་ཡིན། སྐེ་རིང་ཞིང་སྦོམ་པ་དང་སྐེ་རྒྱབ་དང་རྒྱབ་སྟོད་ལ་ཐར་ཐོར་ཡིན་པའི་གྲ་སྤུ་ནག་རིང་སྐྱེས་ཡོད། རྒྱབ་གཞུང་དུ་སྤུ་མདངས་དམར་སེར་གྱིས་ཁེབས་འདུག རྐང་ལག་དང་རྔ་མའི་སྤུ་མདོག་ནག་པོ་ཡིན། ཨ་བྲ་སོགས་ཀྱི་གཉན་པོ་ཡིན་པས། ཞིང་ཕྱུགས་ལས་དང་ནགས་ལས་ཐད་ཀྱི་བྱི་གནོད་འགོག་ཐུབ་པར་མ་ཟད། སྐྱེ་ཁམས་དོ་མཉམ་ཡོང་བར་ཡང་བྱེད་ནུས་གལ་ཆེན་འདོན་བཞིན་ཡོད།
བྱ་རྒོད།
བྱ་རྒོད་ནི་ས་བབ་མཐོ་ས་ན་གནས་པའི་གཏན་སྡོད་རང་བཞིན་གྱི་འདབ་ཆགས་ཆེ་གྲས་ཤིག་ཡིན། འཕུར་ཡུན་རིང་ཞིང་འཕུར་ཚད་མཐོ་བ། འཛམ་གླིང་སྟེང་གི་འཕུར་ཚད་ཆེས་མཐོ་བའི་བྱ་རིགས་ཤིག་ཡིན། བེམ་རོ་ཟ་རྒྱུར་དགའ།
སེ་གོ་དིང་།
སེ་གོ་དིང་ནི་མཐོང་རྒྱ་ཆེ་སའི་ཐང་ཡངས་ན་ཁེར་འཕུར་བྱེད་པའི་འདབ་ཆགས་ཆེ་གྲས་ཤིག་ཡིན། སེ་གོ་དིང་གིས་ཤི་ཤ་ཟོས་ནས་ཁོར་ཡུག་གཙང་སྦྲ་བྱེད་པར་བྱེད་ནུས་གལ་ཆེན་འདོན་བཞིན་ཡོད།
ཆུ་སྲམ།
ཆུ་སྲམ་ནི་ཆུ་དང་སྐམ་ས་གཉིས་ཀར་གནས་པའི་རི་སྐྱེས་སྲོག་ཆགས་ཀྱི་རིགས་ཡིན། དེའི་ལུས་གཟུགས་ལེབ་སྒོར་ནར་མོ་ཞིག་ཡིན་པ་དང་། མགོ་བོ་ལེབ་ཅིང་རྣ་འབྱོག་ཆུང་། སུག་བཞི་ཐུང་བ་དང་། སྡེར་མོ་དག་སྐྱི་མོས་སྦྲེལ་འདུག སྤུ་མདངས་ཁམ་ནག་གམ་ཁམ་སེར་ཡིན་ལ་སྤུའི་གྲ་ཁ་མཉམ་ཞིང་གྲ་རྟིང་མཐུག འཛམ་གླིང་གི་ས་ཆ་ཡོངས་ལ་ཁྱབ་ཡོད།
བྱིའུ་ཁྲ།
བྱིའུ་ཁྲ་ནི་གླག་ཚན་གྱི་འདབ་ཆགས་ཆུང་ཤས་ཤིག་ཡིན། ལུས་ཡོངས་སྤུ་མདངས་སྐྱ་བོའི་སྟེང་སེར་ཐིག་ཡོད་པ། འཕུར་ན་མགྱོགས་ཤིང་མྱུར་བ། ལྷག་པར་ནགས་གསེང་ནས་འཕུར་ན་མྱུར་བ་ཞིག་ཡིན།
བྱ་མ་བྱི།
བྱ་མ་བྱི་ནི་སྡེར་མོ་ལ་བརྟེན་ནས་སྡོང་མགོར་འགོ་མཁས་པ་དང་སྐྱི་མོ་ལ་བརྟེན་ནས་སྡོང་བོ་གཅིག་ནས་སྡོང་བོ་གཞན་ཞིག་གི་སྟེང་ལ་འཕུར་མཁས་པ་ཞིག་ཡིན། བྱི་བ་འདིའི་རིགས་ནི་རང་རྒྱལ་གྱི་ཧྲའན་ཞི་དང་ཀན་སུའུ། མཚོ་སྔོན་ན་མ་གཏོགས་མེད། ཤིང་འབྲས་སོགས་ཟ།
གསའ།
མཚོ་ངོས་ལས་མཐོ་ཚད་སྨི2500-5300བར་ན་འཚོ་སྡོད་བྱས་ཡོད་པའི་རི་སྐྱེས་སྲོག་ཆགས་ཤིག་ཡིན། གསའ་ལ་ཨ་མདོའི་ཡུལ་སྐད་དུ་གསའ་བན་དང་སྲོག་ཆགས་རིག་པ་རུ་གངས་གཟིག་ཟེར། གསའ་ཡི་ལུས་ཧྲིལ་བོ་དཀར་སྐྱ་ཡིན་པ་དང་། ཐིག་ལེ་ནག་པོ་ཁྱབ་ཡོད། གསའ་ཆུང་ངུ་དེ་ཞི་ལ་སྟག་ཁྲ་ཞིག་དང་འདྲ།
དོམ་ཁྲ།
དོམ་ཁྲ་ནི་མགོ་བོ་སྒོར་ཞིང་རྔ་མ་ཐུང་བ། ལྟིག་ལྟིག་མི་ལྟིག་དོམ་དང་མཚུངས་པ་ཞིག་ཡིན་ལ། རྣ་མདོ་དང་མིག་མཐའ། རྣ་གཤོག སུག་སྡེར་བཞི། སོག་མགོ་བཅས་ནི་ནག་པོ་ཡིན་པ་དང་། དེ་མིན་ཐམས་ཅད་དཀར་བོ་ཡིན། བརླན་བཤེར་ཆེ་བའི་སྨྱུག་མའི་ནགས་ཚལ་ན་གནས། འཛམ་གླིང་སྟེང་རང་རྒྱལ་ན་མ་གཏོགས་མེད་པས་རང་རྒྱལ་གྱི་རྒྱལ་ནོར་ཞེས་པའི་མིང་བཏགས་ཡོད།
དོམ།
དོམ་ནི་མཆུ་ཐུང་ཞིང་མགོ་ཟླུམ་སྒོར་ཡིན་ལ། སྣ་ནག་ཅིང་མིག་ཟུང་ཆུང་ནའང་རྣ་གཤོག་ཅུང་ཆེ། སྤུ་མདོག་ནག་པོ་ཡིན་ཞིང་། བྲང་ངོས་ན་ཟླ་དཀར་ཚེས་འདྲའི་དཀར་ཐིག་ཅིག་ཡོད་པའི་གཅན་གཟན་ཞིག་ཡིན། དོམ་གྱི་སྡེར་ཁྱིམ་ནི་རྒྱ་ཟས་མཆོག་ཏུ་གྱུར་བ་ཞིག་ཡིན་པར་མ་ཟད། དོམ་མཁྲིས་སྨན་དུ་འགྲོ ཨོའུ་གླིང་དང་ཡ་གླིང་གི་སྐམ་ས་ཆེན་མོའི་བྱང་ཁུལ་དང་ཐེ་ཝན། ལྗར་པན་སོགས་ཀྱི་ནགས་ཚལ་ན་གནས་ཡོད།
དྲེད་མོང་།
དྲེད་མོང་ནི་མགོ་ཆེ་ཞིང་མཆུ་རིང་བ། སོག་མགོ་མཐོ་ཞིང་རྒྱབ་ཞེང་ཆེ་བ། གདོང་ཞེང་ཆེ་ལ་རྔ་མ་ཐུང་། སུག་བཞི་སྦོམ་ཞིང་སྤར་ཁྱིམ་ཆེ་བ། སྤར་ཁྱིམ་རེར་སེན་མོ་ལྔ་རེ་ཡོད་པའི་དོམ་ཚན་གྱི་གཅན་གཟན་ཞིག་ཡིན། གཙོ་བོར་རི་ཁུལ་གྱི་ནགས་ཚལ་ཁྲོད་དང་ཁབ་དབྱིབས་ནགས་ཚལ་ནང་གནས་ཀྱང་མདོ་དབུས་མཐོ་སྒང་གི་མཚོ་ངོས་ལས་སྨི4500-5000ཡོད་པའི་རྩྭ་ཐང་ནས་ཡང་འཚོ་སྡོད་བྱེད་ཐུབ།
དུག་སྦྲུལ་གདེངས་ཀ་ཅན།
དུག་སྦྲུལ་གདེངས་ཀ་ཅན་ནི་ལུས་སྟོད་ཡར་ལང་ཐུབ་པ་དང་མགོ་སྐེའི་གཡས་གཡོན་ན་གདེངས་ཀ་ཡོད། དུག་སྦྲུལ་གདེངས་ཀ་ཅན་གཞན་དག་དང་སྡུར་ན་འབྱུང་འགྱུར་མྱུར་ལ་དུག་ཡང་ཤིན་ཏུ་ཆེ། འཛམ་གླིང་སྟེང་ཆེས་ཉེན་ཁ་ཆེ་བའི་དུག་སྦྲུལ་ཞིག་ཡིན།
སྦྲུལ་ཆེན།
སྦྲུལ་ཆེན་ནི་དེང་སྐབས་འཛམ་གླིང་ན་ཡོད་པའི་གདོད་མའི་དུས་ཀྱི་ཁྱད་ཆོས་ལྡན་པའི་སྦྲུལ་གྱི་རིགས་ཤིག་ཡིན། སུག་པ་ཕྱི་མ་ཞན་འགྱུར་བྱུང་སྟབས་འོག་སྒོའི་འགྲམ་གཉིས་ན་སྡེར་མོ་ཆུང་ཆུང་དབྱིབས་ཀྱི་ཤུལ་རེ་ཡོད། རྒྱབ་གཞུང་ན་སེར་ཐིག་རིང་བོ་ཞིག་ཡོད་ཅིང་། གསུས་ངོས་སེར་བོ་ཡིན། ལུས་ཀྱི་གཡས་གཡོན་ན་ཐིག་རིས་སེར་བོ་རེ་འཐེན་འདུག
གཉན།
གཉན་ནི་གཟུགས་གཞི་རྒྱགས་པ། རིང་ཚད་ལ་ལི་སྨི150-180ཡོད། སོག་མགོའི་མཐོ་ཚད་ལ་ལི་སྨི50-70 ལྗིད་ཚད་ལ་སྤྱི་རྒྱ110ཡོད་པ་རེད། ལུས་སྤུ་རགས་ཤིང་རྩུབ་ལ་ཐུང་ཐུང་ཞིག་ཡིན། སྐེ་མཇིང་གི་སྤུ་ཅུང་རིང་། སྤུ་མདངས་ཁམ་ནག་གམ་ཁམ་སྐྱ་ཡིན། གཙོ་བོ་ཡ་གླིང་གི་བར་རྒྱུད་ཀྱི་ས་ཁོད་ཡངས་སའི་གནས་ནས་འཚོ་སྡོད་བྱས་ཡོད་ལ་ཚར་ལ་ཉེ་བའི་རི་སྐྱེས་སྲོག་ཆགས་ཀྱི་ཁོངས་སུ་གཏོགས།
གཟིག
གཟིག་ནི་ཞི་ལའི་ཚན་གྱི་གཅན་གཟན་ཞིག་ཡིན་ལ། ལུས་ཀྱི་སྤུ་མདོག་སེར་སྐྱ་དང་དེའི་སྟེང་ཐིག་རིས་ནག་པོ་ཡོད། བྲང་གཞུང་དང་ལྟོ་བའི་ངོས་སུ་ཐིག་རིས་མེད་པས་སྤུ་མདོག་ཅུང་དཀར་ཙམ་ཡིན། གཅན་གཟན་རིགས་ཀྱི་ནང་ནས་ཆེས་མགྱོགས་ཤོས་ཡིན་པས་ཕལ་ཆེར་ཆུ་ཚོད་རེར་སྤྱི་ལེ60ལྷག་རྒྱུག་ཐུབ་ཀྱི་ཡོད། མཆོང་རྩལ་དང་ལྡེམ་མྱུར་ཡང་ཆེས་ཆེན་པོ་ཡོད། རི་དྭགས་རྔོན་རྒྱུར་མཁས་པའི་གཅན་གཟན་ཞིག་ཡིན།
| སྲོག་ཆགས། བརྡ་འགྲེལ 621 ཡོད། |