རྟ་ཐོག་ཕོ་ལོང་།
རྟ་ཐོག་ཕོ་ལོང་གི་མིང་ལ་དབྱིན་སྐད་དུPoloཞེས་བརྗོད། དེ་བོད་སྐད་ཀྱི་མིང་ཕོ་ལོང་ནས་སྒྲུ་སྒྱུར་བྱས་པ་ཡིན། དེ་ནི་རྟ་ལ་ཞོན་ཏེ་སྤོ་ལོ་རྩེད་པའི་ལུས་རྩལ་གྱི་བྱེད་སྒོ་ཞིག་ཡིན། དེའི་མིང་ལ་གྲུག་པ་ཞེས་བརྗོད་པ་ཡང་ཡོད།
དབྱུག་བཟུང་ལུས་རྩལ།
དབྱུག་བཟུང་ལུས་རྩལ་ནི་མཚོ་བོད་ས་མཐོའི་ཐོག་དར་ཁྱབ་ཆེ་བའི་བོད་རིགས་ཀྱི་དམངས་ཁྲོད་ཀྱི་ཁྱད་ཆོས་ལྡན་པའི་ལུས་རྩལ་རྣམ་གྲངས་ཤིག་ཡིན་ལ། འགྲན་བསྡུར་དེ་སྤྱིར་བཏང་མི་གཉིས་དབར་སྤེལ་གྱི་ཡོད། འགྲན་ཞུགས་པ་ཕྱོགས་གཉིས་པོ་རྩྭ་ཐང་ཐོག་བསྡད་དེ་རྐང་པ་བཞི་པོ་ཕན་ཚུན་ཐུག་པ་དང་ལག་གཉིས་པོས་དབྱུག་པ་གཅིག་འཐེན་རེས་བྱས་ནས་ཕ་རོལ་པོའི་རྐུབ་ས་ངོས་ནས་བྲལ་བའི་བར་འཐེན་ཐུབ་མཁན་དེ་རྒྱལ་ཁ་ཐོབ་མཁན་ལ་བརྩི་བ་ཡིན་ནོ།།
ཐེ་པེད།
ཐེ་པེད་ནི་བྱ་སྒྲོ་སོགས་ཀྱིས་བཟོས་པའི་ལོ་ཆུང་བྱིས་པའི་རྐང་རྩལ་གྱི་རྩེད་མོ་ཞིག་ཡིན། དེར་ལོ་ངོ་སྟོང་ཕྲག་དུ་མའི་ལོ་རྒྱུས་ལྡན་ཏེ་རྟ་ཐོག་སྤོ་ལོའི་ལུས་རྩལ་གྱི་རྨང་གཞིའི་སྦྱོང་བརྡར་ཡིན་སྙམ་ཞིང་། དེ་ལྟའི་རྩེད་མོའི་རྣམ་གྲངས་བོད་ཁུལ་གྱི་ས་ཆ་མང་པོ་ཞིག་ཏུ་དར་ཞིང་ཁྱབ་ཡོད་ལ། ས་ཁུལ་ཁག་སོ་སོར་ཡང་རབ་ལ་ཐང་དཀར་རྒོད་པོའི་སྒྲོ་ལས་བཟོས་པའི་ཐེ་པེད་དང་། འབྲིང་ལ་ཁྱིམ་བྱའི་སྒྲོ་ལས་བཟོས་པའི་ཐེ་པེད། ཐ་མར་རས་སམ་ར་རྩིད་སོགས་ཅི་འབྱོར་བ་ལས་བཟོས་པའི་ཐེ་པེད་སྣ་ཚོགས་ཡོད།
ཐག་མཆོང་།
ཐག་མཆོང་གི་རྩེད་མོའི་རྣམ་གྲངས་ལའང་རྐྱང་རྩེད་དང་། སྡེབ་རྩེད་གཉིས་སུ་དབྱེ་ཆོག་ལ། རྐྱང་རྩེད་ནི་ཐག་པའི་གཞོགས་གཉིས་ནས་བྱིས་པ་གཉིས་ཀྱིས་ཐག་སྣེ་བཟུང་ཞིང་གཡུགས་པ་དང་ཆབས་ཅིག་དབུས་སུ་གཅིག་གིས་རྩེ་བ་ལྟ་བུ་དང་། སྡེབ་རྩེད་ལའང་གཞོགས་གཡས་གཡོན་གཉིས་ནས་བྱིས་པ་གཉིས་ཀྱིས་ཐག་སྣེ་བཟུང་ཞིང་གཡུགས་པ་དང་ཆབས་ཅིག་བྱིས་པ་གཉིས་སམ་གསུམ། ཡང་ན་དེ་ལས་མང་བའམ་ཐ་ན་བཅུ་གྲངས་འགའ་ཞིག་གིས་སྡེབ་མཆོང་གི་རྡོག་སྒྲ་གཅིག་ལྟ་བུར་རྩེ་བ་དང་། ཡར་མཆོང་སྐབས་ཕྱག་འབུལ་ཞུ་བ་དང་། མར་བབས་སྐབས་ལག་ཟུང་སྐུམ་ནས་འོངས། ལག་གཉིས་སྐེད་གཟེར་བྱས་ཏེ་མཆོང་བའམ་གཡས་གཡོན་དུ་སྐོར་བ་རྒྱག་ཅིང་མཆོང་བ། ས་སྟེང་ནས་དངོས་པོ་སྒྲུག་པ་སོགས་རྐང་ལག་གི་སྟངས་སྟབས་སྣ་ཚོགས་ཡོད་དོ།།
| གཞན་དག བརྡ་འགྲེལ 4 ཡོད། |