ཕུའུ་ཅང་རྫོང་།སྔ་མའི་པར་གཞི་དེ བྱ་མདོ་པདྨ་རྒྱལ།2019 ནས 2020-03-27 15:35ལ་འགྲུབ།
ཕུའུ་ཅང་རྫོང་།
ཕུའུ་ཅང་རྫོང་།
ཕུའུ་ཅང་རྫོང་ནི་ཀྲེ་ཅང་ཞིང་ཆེན་ཅིན་ཧྭ་གྲོང་ཁྱེར་གྱི་ཁོངས་གཏོགས་ཡིན། ཀྲེ་ཅང་གི་དབུས་རྒྱུད་དང་ཅིན་ཧྭ་གྲོང་ཁྱེར་གྱི་བྱང་རྒྱུད་དུ་གནས་པ་དང་སྤྱི་ལོ2013ལོའི་བར་ཕུའུ་ཅང་རྫོང་གི་རྒྱ་ཁྱོན་སྤྱི་ལེ་གྲུ་བཞི་མ920ཡོད་པ་དང་དེའི་ཁོངས་སུ་གྲོང་རྡལ7དང་ཡུལ་ཚོ5དང་སྲང་ལམ3དང་། སྲིད་འཛིན་གྲོང་ཚོ409 སྡེ་ཁུལ20བཅས་ཡོད་པ་དང་ཐེམ་ཐོའི་མི་འབོར་ཁྲི38དང་ཕྱི་ནས་ཡོང་བའི་མི་འབོར་ཁྲི10ཡོད་པ་རེད།
ཕུའུ་ཅང་གཙང་པོར་ལོ་རྒྱུས་ཡུན་རིང་ལྡན་ཞིང་། ཧན་ཤར་མའི་ཞིན་ཕིན་ཁྲི་ལོ་གཉིས་(སྤྱི་ལོ195)པར་རྫོང་བཙུགས་པ་དང་། ཐང་ཐེན་པའོ་ཁྲི་ལོ་བཅུ་གསུམ་(སྤྱི་ལོ754)ལོར་ཕུའུ་དབྱང་རྫོང་བཙུགས། རྒྱལ་རབས་ལྔའི་ཝུའུ་ཡུའེ་ཁྲི་ལོ་ལོ་གསུམ་པར(སྤྱི་ལོ910)ཕུའུ་དབྱང་དེ་ཕུའུ་ཅང་དུ་བསྒྱུར་བ་དང་ལོ་ངོ1800ལྷག་གི་ལོ་རྒྱུས་ཡོད། ཀྲེ་ཅང་ནས་ཅང་ཞིའི་བར་གྱི་ལྕགས་ལམ་དང་། ཞིང་ཆེན་རིམ་པའི་གཞུང་ལམ་གཉིས། (ཧང་ཅིན་གཞུང་ལམ་དང་ཅང་དབྱི་ལྕགས་ལམ)དང་ཧྲང་ཧའེ་ནས་ཁུན་མིང་བར་གྱི་མྱུར་བགྲོད་གཞུང་ལམ་བཅས་ས་ཁོངས་བརྒྱུད་ཡོད་པ་དང་། དབྱི་ཝུའུ་དམངས་སྤྱོད་མཁའ་འགྲུལ་གནམ་གྲུ་ཐང་དེ་ཕུའུ་དབྱི་གཉིས་ཀྱི་ས་མཚམས་སུ་བཙུགས་ཡོད་ཅིང་། རྫོང་ནང་ཁུལ་གྱི་གཞུང་ལམ་ཕྱོགས་བཞི་མཚམས་བརྒྱད་ལ་ཤར་གཏོང་ཐུབ་པ་དང་། གློག་འདོན་དང་འཕྲིན་སྐྱེལ་གྱི་སྒྲིག་བཀོད་ཆ་ཚང་པོ་ཡོད་པས་དཔལ་འབྱོར་གོང་དུ་སྤེལ་བའི་མདུན་ལྗོངས་རྒྱ་ཆེན་པོ་ཡོད། ཕུའུ་ཅང་རྫོང་ནི་ཀྲེ་ཅང་གི་དབུས་རྒྱུད་དུ་གནས་པ་དང་། ཀྲེ་ཅང་གི་ཅིན་ཧྭ་ཡི་ཁོངས་གཏོགས་ཡིན། མི་རབས་རིམ་བྱུང་གི་གྲགས་ཅན་མི་སྣ་མང་པོ་ཐོན་ནས“རིག་གནས་ཀྱི་རྒྱལ་ཕྲན”དང་། “ཡིག་རིས་ཀྱི་ཕ་ཡུལ” “ཆུ་ཤེལ་གྱི་གྲོང་ཁྱེར” “སྒོ་ལྕགས་རྟེན་གཞི” “ཀྲུང་གོའི་འཚེམ་སྲུབས་ཁྱིམ་འཁེལ་གྲགས་ཅན་གྲོང་ཁྱེར”བཅས་ཀྱི་མཚན་སྙན་ཡོད། སྤྱི་ལོ2018ལོའི་ཟླ12པར་རྒྱལ་ཡོངས་ཀྱི་རྫོང་ཁོངས་དཔལ་འབྱོར་མ་འཇོག་གི་མི་མངོན་པའི་སྟོབས་ཤུགས་ཆེན་པོ100ཡི་ནང་ཚུད་ཡོད། སྤྱི་ལོ2019ལོའི་ཟླ་5པའི་ཚེས14ཉིན་སྐབས་བཅུ་པའི་ཀྲུང་ཧྭའི་ཁོར་ཡུག་ཕུལ་བྱུང་གི་བྱ་དགའ་ཐོབ་ཡོད།
གཞི་རྩའི་གནས་ཚུལ།
རྒྱ་ཡིག་གི་མིང་།
浦江县
ཡུལ་སྐད།
ཝུའུ་སྐད།
ཕྱི་ཡིག་གི་མིང་།
Pujiang County
རྒྱ་ཁྱོན།
སྤྱི་ལེ་གྲུ་བཞི་མ920ཡོད།
སྲིད་འཛིན་ས་ཁོངས་ཀྱི་རིགས་དབྱེ།
རྫོང་།
ནམ་ཟླའི་ཆ་རྐྱེན།
ཚ་ཁུལ་ཕལ་བའི་དུས་རླུང་གི་ནམ་ཟླ།
ཁོངས་གཏོགས་ས་ཁུལ།
ཀྲེ་ཅང་ཞིང་ཆེན་ཅིན་ཧྭ་གྲོང་ཁྱེར།
མཚན་སྙན།
“རིག་གནས་ཀྱི་རྒྱལ་ཕྲན”དང་། “ཡིག་རིས་ཀྱི་ཕ་ཡུལ” “ཆུ་ཤེལ་གྱི་གྲོང་ཁྱེར”སོགས་སོ།།
མངའ་ཁོངས།
གྲོང་རྡལ7དང་ཡུལ་ཚོ5དང་སྲང་ལམ3ཡོད།
རླངས་འཁོར་ཚབ་ཨང་།
浙G
ས་ཁོངས་ཁ་པར་ཨང་རྟགས།
0579
སློབ་འབྲིང་མིང་གྲགས་ཅན།
ཕུའུ་ཅང་སློབ་འབྲིང་སོགས།
སྦྲག་སྲིད་ཨང་རྟགས།
322200
སྲིད་འཛིན་ཁོངས་བགོས་ཚབ་ཨང་།
330726
དཀར་ཆག
- 1 ལོ་རྒྱུས་ཀྱི་འཕེལ་རིམ།
- 2 སྲིད་འཛིན་ཁོངས་བགོས།
- 3 ས་ཁམས་ཁོར་ཡུག
-
3.1 གནས་ཡུལ།
3.2 ས་དབྱིབས།
3.3 ཆུ་དཔྱད།
3.4 གནམ་གཤིས།
- 4 མི་འབོར།
- 5 དཔལ་འབྱོར།
-
5.1 གཏན་འཇགས་རྒྱུ་ནོར།
5.2 ཉོ་ཚོང་།
5.3 ཡུལ་སྐོར།
- 6 རང་བྱུང་ཐོན་ཁུངས།
-
6.1 གཏེར་རྫས་ཐོན་ཁུངས།
6.2 ཆུའི་ཐོན་ཁུངས།
6.3 ནགས་ལས་ཐོན་ཁུངས།
- 7 སྤྱི་ཚོགས་ལས་དོན།
-
7.1 སློབ་གསོའི་ལས་དོན།
7.2 ཚན་རྩལ་ལས་དོན།
7.3 རིག་གནས་ལས་དོན།
- 8 གཟི་བརྗིད་མཚན་སྙན།
1
ལོ་རྒྱུས་ཀྱི་འཕེལ་རིམ།
མིང་གོའི་སྲིད་ལོ38ལ(སྤྱི་ལོ1949ལོར་)ཕུའུ་ཅང་བཅིངས་འགྲོལ་བཏང་བ་དང་ཀྲེ་ཅང་ཞིང་ཆེན་གྱི་ཅིན་ཧྭ་ཀྲོན་ཆུས(ཐོག་མར་ཀྲོན་ཆུས་བརྒྱད་པ་ཟེར)ཀྱིཁོངས་སུ་གཏོགས། སྤྱི་ལོ1960ལོའི་ཟླ1པོའི་ཚེས7ཉིན། རྒྱལ་སྲིད་སྤྱི་ཁྱབ་ཁང་གིས་ཕུའུ་ཅང་རྫོང་གི་སྒྲིག་གཞི་མེད་པ་བཟོ་རྒྱུའི་གཏན་འབེབས་བྱས་པ་དང་། མེ་ཅང་མི་དམངས་ཀུང་ཧྲེ(ཆུས་དང་མཚུངས་པ)གི་སྲིད་འཛིན་ས་ཁོངས་ལན་ཤིས་རྫོང་གི་ཁོངས་སུ་བཅུག་པ་ཕུད། དེ་བྱིངས་ཀྱི་སྲིད་འཛིན་ས་ཁོངས་དབྱི་ཝུའུ་རྫོང་ཁོངས་སུ་ཟླ་སྒྲིལ་བཏང་བ་རེད། སྤྱི་ལོ1966ལོའི་ཟླ12པའི་ཚེས22ཉིན། རྒྱལ་སྲིད་སྤྱི་ཁྱབ་ཁང་གིས་ཕུའུ་ཅང་རྫོང་སླར་གསོ་བྱེད་པར་ཆོག་མཆན་བཀོད་པ་དང་། དབྱི་ཝུའུ་རྫོང་གི་དེ་སྔའི་སྲིད་འཛིན་ས་ཁོངས་ཕུའུ་ཅང་ལ་བགོས་པ་རེད། རྫོང་མཁར་ནི་ཕུའུ་དབྱང་གྲོང་རྡལ་དུ་ཡོད་ཅིང་། ཅིན་ཧྭ་ས་ཁུལ་དུ་གཏོགས། སྤྱི་ལོ1985ལོའི་ཟླ་6པར་ས་ཁུལ་ནས་གྲོང་ཁྱེར་དུ་བསྒྱུར་བ་དང་། ཅིན་ཧྭ་གྲོང་ཁྱེར་དུ་གཏོགས།
2
སྲིད་འཛིན་ཁོངས་བགོས།
སྤྱི་ལོ2013ལོའི་བར་ཕུའུ་ཅང་རྫོང་གི་རྒྱ་ཁྱོན་སྤྱི་ལེ་གྲུ་བཞི་མ920ཟིན་པ་དང་དེའི་ཁོངས་སུ་གྲོང་རྡལ7དང་། ཡུལ་ཚོ5 སྲང་ལམ3སྟེ། ཕུའུ་དབྱང་སྲང་ལམ་དང་། ཕུའུ་ནན་སྲང་ལམ། ཞན་ཧྭ་སྲང་ལམ། ཧོང་ཀྲའེ་གྲོང་རྡལ། ཡན་ཐུའོ་གྲོང་རྡལ། ཀྲེང་ཀྲའེ་གྲོང་རྡལ། ཐན་ཤིས་གྲོང་རྡལ། ཧང་ཕིང་གྲོང་རྡལ། པའེ་མ་གྲོང་རྡལ། ཀྲེང་ཅ་ཝུའུ་གྲོང་རྡལ་བཅས་ཡོད་པ་དང་། ཡུས་ཀྲའེ་ཡུལ་ཚོ་དང་། ཏ་ཡུས་ཡུལ་ཚོ། ཀྲུང་ཡུས་ཡུལ་ཚོ། ཆན་ཝུའུ་ཡུལ་ཚོ། ཧྭ་ཆའོ་ཡུལ་ཚོ་བཅས་ཡོད་ཅིང་། རྫོང་མི་དམངས་སྲིད་གཞུང་ནི་ཕུའུ་དབྱང་སྲང་ལམ་མི་དམངས་ཤར་ལམ་ཨང38པར་གནས་ཡོད།
3
ས་ཁམས་ཁོར་ཡུག
3_1
གནས་ཡུལ།
ཕུའུ་ཅང་རྫོང་ནི་ཅིན་ཧྭ་གྲོང་ཁྱེར་གྱི་བྱང་ཕྱོགས་སུ་ཆགས་ཡོད་པ་དང་། གཞུང་ཐིག་ཤར་མའི 119°42′～ 120° 07′དང་། འཕྲེད་ཐིག་བྱང་མའི 29° 21′～ 29°41′བར་གནས་ཡོད། བྱང་ཤར་ཁུལ་ནས་ཀྲུའུ་ཅི་གྲོང་ཁྱེར་དང་འབྲེལ་ཞིང་། ཤར་ལྷོར་དབྱི་ཝུའུ་གྲོང་ཁྱེར་དང་འབྲེལ་བ། ལྷོ་ནུབ་ནས་ལན་ཞི་གྲོང་ཁྱེར་འབྲེལ་ཡོད། ནུབ་བྱང་ནས་ཅན་ཏེ་དང་ཐུང་ལུའུ་གྲོང་ཁྱེར་ས་མཚམས་འབྲེལ་ཞིང་། ཅིན་ཧྭ་གྲོང་ཁུལ་དང་བར་ཐག་སྟོང་སྨི46ཡོད།
3_2
ས་དབྱིབས།
ལུང་མོན་རི་རྒྱུད་ཁག་གསུམ་དུ་དབྱེ་ནས་ནུབ་ནས་ཤར་དུ་བསྲིངས་ཤིང་། བྱང་དུ་རྫོང་མངའ་ཁོངས་ཀྱི་ནུབ་བྱང་དང་ཅན་ཏེ་དང་ཐུང་ལུའུ་གྲོང་ཁྱེར་གཉིས་ཀྱི་བར་དུ་གནས་པ་དང་། མང་ཆེ་བ་རི་བོ་འབྲིང་བ་དམའ་བའི་རིགས་ཡིན་ལ། དེ་དག་ལས་ཐུང་ལུའུ་གྲོང་ཁོངས་ཀྱི་ཁྲའོ་ཐེན་མིན་ནི་ས་བབ་མཐོ་ཚད་སྨི1050ཡོད་ཅིང་། རྫོང་ཁོངས་ཀྱི་ཆེས་མཐོ་བའི་གནས་ཡིན། དབུས་ཀྱི་འཕྲེད་བཅད་དང་རྫོང་གི་དབུས་ཁུལ་ལ་ངག་རྒྱུན་དུ་བྱང་རི་ཟེར། དེ་ནི་ཕུའུ་ཅང་གཞོང་ས་དང་ནུབ་བྱང་རི་ཁུལ་གྱི་རང་བྱུང་མཚམས་ཐིག་ཡིན། རྫོང་ཁོངས་ཀྱི་ལྷོ་རྒྱུད་དང་། ལན་ཞི། དབྱི་ཝུའུ་བཅས་གྲོང་ཁྱེར་གཉིས་ཀྱི་བར་ལ་ལྷོ་རི་ཟེར། དེ་ནས་བྱང་ཤར་དུ་ཕྱོགས་ནས་ཀྲེང་ཅ་ཝུའུ་བྱང་དུ་བསྲིངས་ཤིང་། དེ་ལ་ཕུའུ་ཏུང་རི་རྒྱུད་ཟེར། དབུས་ལྷོ་དང་། ལྷོ་རྒྱུད། ཕུའུ་ཏུང་བཅས་རི་བོ་གསུམ་གྱི་བར་དུ་ཕུའུ་ཅང་གཞོང་ས་ཡོད།
3_3
ཆུ་དཔྱད།
ཕུའུ་ཅང་གཙང་པོ་ནི་ཆན་ཐང་གཙང་པོའི་ཆུ་རྒྱུད་ཡིན། རྫོང་ཁོངས་ནུབ་ཁུལ་གྱི་ཐན་ལིང་བྲག་རྡོ་ལྷོ་འདབས་ཀྱི་ཕུའུ་དབྱང་ཅང་གཙང་པོ་ནས་ནུབ་ནས་ཤར་དུ་རྒྱུག་ཅིང་། པེ་མ་གྲོང་རྡལ་ཐང་ལི་བྱང་ཤར་ནས་ཐོན་ཏེ་རྫོང་ཁོངས་ནས་ཀྲུའུ་ཅི་གྲོང་ཁྱེར་དུ་སླེབས་པ་དང་། ཧང་ཀྲོའུ་གྲོང་ཁྱེར་ཞའོ་ཧྲན་ཆུས་ཝུན་ཡན་གྲོང་རྡལ་ནས་ཆན་ཐང་ཅང་གཙང་པོར་འདྲེས། ལམ་རྒྱུད་དུ་ཧུང་ཀུང་དང་ཧྲིན་ཞི་སོགས་ཆུ་ཕྲན་ཆེ་ཆུང32བསྡུ་ལེན་བྱས་ཡོད། ཧུའུ་ཡོན་ཅང་ནི་ཐེན་ལིན་ཡན་གྱི་ནུབ་བྱང་འདབས་ནས་བྱུང་བ་དང་། ཤར་ངོས་ཧང་ཁོའུ་ཕིང་ནས་བྱང་ཕྱོགས་སུ་རྒྱུག་པ་རེད། ཐན་ཞི་གྲོང་རྡལ་ཏ་ཙི་བྱང་ཕྱོགས་སུ་བཞུར། ཐུང་ལུའུ་རྫོང་ནས་ཧྥུ་དབྱང་ཁྲོམ་རའི་ཁོའུ་གྲོང་རྡལ་ནས་བྱང་ཕྱོགས་སུ་ཧྥུ་ཚུན་ཅང་དུ་འབབ་པ་དང་། ལམ་བར་དུ་ཀུའུ་ཞའོ་ཡོན་ཞི་དང་ལུའོ་ཅ་ཡོན་སོགས་ཀྱི་ཆུ་འདྲེས་ཡོད། ཏ་ཁྲེན་ཅང་ལིའུ་རྫོང་ཁོངས་ཀྱི་ཤར་ལྷོའི་རྒྱུད་ནས་ཀྲུའུ་ཅི་གྲོང་ཁྱེར་ཨན་ཧྭ་གྲོང་བརྡལ་བརྒྱུད་དེ་ཕུའུ་དབྱང་ཅང་གཙང་པོར་འདུས་ཡོད། ཆུ་མཛོད་འབྲིང་གྲས་དང་ཆུང་གྲས་61བསྐྲུན་ཟིན་པ་དང་སྤྱིའི་ཆུ་མཛོད་ཀྱི་ཤོང་ཚད་སྨི་རྒྱ་དཔངས་གྲུ་བཞི་ཁྲི13776ཟིན་ཡོད། ད་དུང་ཐུང་ཅི་ཆའོ་ཆུ་མཛོད་ཀྱི་བྱང་དང་། དབུས་རྒྱུད། ལྷོ་བཅས་ཀྱི་ཡུར་བུ་རྣམས་འཕྲེད་དུ་བརྒལ་བཞིན་ཡོད། ཧུའུ་ཡོན་ཅང་ཞིའི་ཆུ་ཤར་དུ་འདྲེན་པའི་ལས་གྲྭ། ཧང་ཁོའུ་ཕིང་གི་ཤར་དུ་ཆུ་འདྲེན་ཕུག་ལམ་བརྒྱུད་དེ། ཧུའུ་ཡོན་ཅང་ཧྲུའེ་ཤར་དུ་ཅིན་ཁེང་ལིན་ཆུ་མཛོད་དུ་བཞུར་ནས། པེ་ཧྲན་ཅའོ་རྒྱུད་ཀྱི་ཞིང་ཁར་ཞིང་ཆུ་འདྲེན་པ་དང་གསར་སྤེལ་བྱེད་ཀྱིན་ཡོད།
3_4
གནམ་གཤིས།
ཕུའུ་ཅང་གཙང་པོ་ནི་ཚ་ཁུལ་ཕལ་བའི་དུས་རླུང་གི་ནམ་ཟླའི་ཁོངས་སུ་གཏོགས། ལོ་རེའི་ཆ་སྙོམས་དྲོད་ཚད16.6℃ཡིན་པ་དང་། ཟླ་དང་པོའི་ཆ་སྙོམས་དྲོད་ཚད4.2℃ཡིན་པ། ཟླ་བརྒྱད་པའི་ཆ་སྙོམས་དྲོད་ཚད33.7℃ཡིན། ལོ་རེར་ཆ་སྙོམས་སུ་ཆར་ཆུ་འབབ་ཚད་ཧའོ་སྨི1412.2ཟིན་ཡོད། ལོ་རེའི་ཉི་འོད་ཆུ་ཚོད1996.2ཟིན་གྱི་ཡོད། སད་མེད་དུས་ནི་ཉིན238ཡས་མས་ཡིན། རླུང་ཆེན་དང་སེར་བ། རྔུལ་ཆུ་སོགས་ཀྱི་རང་བྱུང་གནོད་འཚེ་ཐོན་གྱི་ཡོད།
4
མི་འབོར།
སྤྱི་ལོ2013ལོའི་ལོ་མཇུག་ཏུ་ཕུའུ་ཅང་རྫོང་གི་མི་འབོར་བསྡོམས་ཁྲི39.44ཟིན་པའི་ནང་སྐྱེས་པ་ཁྲི20.54དང་བུད་མེད་ཁྲི18.90ཡོད་པ་རེད། ཞིང་ལས་མིན་པའི་མི་འབོར་ཁྲི7.09ཟིན་པ་དང་། མི་འབོར་རང་ཤུགས་སུ་འཕར་ཚད 2.45‰ཟིན་ཡོད།
5
དཔལ་འབྱོར།
སྤྱི་ལོ2013ལོར་ཕུའུ་ཅང་རྫོང་གི་ཐོན་སྐྱེད་རིན་ཐང་བསྡོམས་འབོར(GDP)སྒོར་དུང་ཕྱུར175.41མངོན་འགྱུར་བྱུང་བ་དེ་བསྡུར་གཞི་ཡོད་པའི་རིན་གོང་ལྟར་བརྩིས་ན་སྤྱི་ལོ2012ལོ་ལས8.9%འཕར་ཡོད། དེའི་ནང་ཐོན་ལས་དང་པོའི་འཕར་ཐང་སྒོར་དུང་ཕྱུར9.39ཟིན་ནས1.5%འཕར་བ་དང་། ཐོན་ལས་གཉིས་པའི་འཕར་ཐང་སྒོར་དུང་ཕྱུར103.16ཟིན་ནས10.9%འཕར་བ་རེད། ཐོན་ལས་གསུམ་པའི་འཕར་ཐང་སྒོར་དུང་ཕྱུར62.87ཟིན་ནས6.4%འཕར་ཡོད། རྫོང་ཡོངས་ཀྱི་མི་རེའི་ཆ་སྙོམས་ཀྱི་ཐོན་སྐྱེད་རིན་ཐང་བསྡོམས་འབོར་སྒོར44647(སྤྱི་ལོ2013ལོའི་ལོ་རེའི་ཆ་སྙོམས་ཀྱི་དངུལ་བརྗེས་འཛའ་ཐང་ཨ་སྒོར7210ལ་ཕབ་རྩིས་བརྒྱབ་པ)ཟིན་ནས8.6%འཕར་ཡོད། ཐོན་ལས་དང་པོ་དང་། གཉིས་པ། གསུམ་པ་བཅས་ཀྱི་འཕར་ཐང་གིས་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་ནང་བཟུང་བའི་བསྡུར་ཚད་དེ་སྤྱི་ལོ2012ལོའི5.2:59.8:35.0ནས5.4:58.8:35.8ཟིན་པ་དང་ཐོན་ལས་གསུམ་པས་བཟུང་བའི་བསྡུར་ཚད་ནི་སྤྱི་ལོ2012ལོ་ལས་བརྒྱ་ཆའི་གྲངས0.8མཐོ་རུ་ཕྱིན་ཡོད།
5_1
གཏན་འཇགས་རྒྱུ་ནོར།
སྤྱི་ལོ2013ལོར་ཕུའུ་ཅང་རྫོང་གིས་གཏན་འཇགས་རྒྱུ་ནོར་ལ་མ་དངུལ་སྒོར་དུང་ཕྱུར78.75བཏང་བ་དེ་སྤྱི་ལོ2012ལོ་ལས20.7%འཕར་ཡོད། རྒྱལ་ཁབ་ལ་དབང་བའི་སྡེ་ཚན་གྱིས་མ་དངུལ་འཇོག་གྲངས་འཕར་ཚད་ཅུང་མགྱོགས་ཤིང་། ལོ་ཧྲིལ་པོར་རྒྱལ་ཁབ་ལ་དབང་བའི་སྡེ་ཚན་གྱིས་མ་དངུལ་སྒོར་དུང་ཕྱུར11.33བཏང་བ་དེ52.7%འཕར་བ་དེས་གཏན་འཇགས་རྒྱུ་ནོར་ལ་མ་དངུལ་འཇོག་གྲངས་ཀྱི14.4%ཟིན་ཡོད།
5_2
ཉོ་ཚོང་།
སྤྱི་ལོ2013ལོར་ཕུའུ་ཅང་རྫོང་དུ་སྤྱི་ཚོགས་ཀྱི་འཛད་རྫས་སིལ་ཚོང་བྱེད་ཚད་སྒོར་དུང་ཕྱུར77.77ཟིན་པ་དེ་སྤྱི་ལོ2012ལོ་ལས15.2%འཕར་བའི་ནང་གྲོང་ཁྱེར་དང་གྲོང་རྡལ་གྱི་འཛད་རྫས་སིལ་ཚོང་བྱེད་ཚད་སྒོར་དུང་ཕྱུར56.4ཟིན་ནས14.2%འཕར་བ་དང་། གྲོང་གསེབ་ཀྱི་འཛད་རྫས་སིལ་ཚོང་བྱེད་ཚད་སྒོར་དུང་ཕྱུར21.4ཟིན་ནས18.9%འཕར་ཡོད། ལས་རིགས་དབྱེ་ནས་བལྟས་ན། སྡེབ་ཚོང་སིལ་ཚོང་ལས་རིགས་ཀྱི་སིལ་ཚོང་དངུལ་འབོར་སྒོར་དུང་ཕྱུར65.02ཟིན་ནས15.2%འཕར་བ་རེད། སྤྱི་ལོ2013ལོར་ཕུའུ་ཅང་རྫོང་གིས་ཕྱིར་གཏོང་ནང་འདྲེན་བསྡོམས་འབོར་ཨ་སྒོར་ཁྲི103903ཟིན་པ་དེ་སྤྱི་ལོ2012ལོ་ལས16.1%འཕར་ཡོད། དེའི་ནང་ཕྱིར་གཏོང་བསྡོམས་འབོར་ཨ་སྒོར་ཁྲི96661ཟིན་ནས17.6%འཕར་ཡོད།
5_3
ཡུལ་སྐོར།
སྤྱི་ལོ2013ལོར་ཕུའུ་ཅང་རྫོང་གིས་ཁྱོན་ཡུལ་སྐོར་བ་མི་ཐེངས་ཁྲི266.8ལ་སྣེ་ལེན་ཞུས་ནས་ཡུལ་སྐོར་ཐོན་ལས་ཀྱི་ཡོང་འབབ་སྒོར་དུང་ཕྱུར16.99བྱུང་བ་དེ་ལོ་སྔོན་མ་ལས15.2%དང15.3%འཕར་ཡོད། དེའི་ནང་རྒྱལ་ནང་གི་ཡུལ་སྐོར་བ་མི་ཐེངས་ཁྲི266.39ལ་སྣེ་ལེན་ཞུས་པ་དེ15.2%འཕར་བ་དང་། རྒྱལ་ནང་གི་ཡུལ་སྐོར་ཡོང་འབབ་སྒོར་དུང་ཕྱུར16.92ཟིན་ནས15.4%འཕར་བ་རེད། རྒྱལ་ཁོངས་སུ་ཡོང་བའི་ཡུལ་སྐོར་བ་མི་ཐེངས4106ལ་སྣེ་ལེན་ཞུས་པ་དེ4.4%འཕར་བ་དང་། ཡུལ་སྐོར་ཡོང་འབབ་ཨ་སྒོར་ཁྲི100.81ཟིན་ནས0.83%ཆག་ཡོད།
6
རང་བྱུང་ཐོན་ཁུངས།
6_1
གཏེར་རྫས་ཐོན་ཁུངས།
གཏེར་རྫས་ཐོན་ཁུངས་ལ་རྡོ་ཐལ་རྡོ་ཡོད་པ་དང་། དེའི་ནང་དུ་རྡོ་ཐལ་རྡོ་དང་། ཅ་ཁྲང་རྡོ། རྡོ་སོལ། ལིན་གཏེར་རྡོ། རྡོ་དཀག་བྲག་རྡོ། ལྕགས་ཁབ་ལེན་དང་ཟངས་གཏེར་སོགས་གཏེར་གནས་ཡོད་ལ། དེའི་ནང་དུ་རྡོ་ཐལ་རྡོ་གསོག་ཚད་ཆེས་ཆེ་བ་ཡིན།
6_2
ཆུའི་ཐོན་ཁུངས།
ཆུ་བེད་འདུས་ཚད་སྟོང་ཝ3.25ཟིན་པ་དང་། ཆུ་ཤུགས་གློག་ཁང70བསྐྲུན་ཡོད། འཕྲུལ་འཁོར་སྒྲིག་སྦྱོར་བྱེད་ཚད་བསྡོམས་འབོར་སྟོང་ཝ7179ཟིན་ཡོད།
6_3
ནགས་ལས་ཐོན་ཁུངས།
ནགས་སའི་རྒྱ་ཁྱོན་སྤྱི་ཆིང9000ལྷག་ཙམ་ཟིན་ཡོད། གཙོ་བོ་ནུབ་རྒྱུད་དང་བྱང་རྒྱུད་དུ་ཁྱབ་ཡོད་པ་དང་། གསོམ་ཤིང་དང་། ཐང་ཤིང་། སྨྱུག་མ་སོགས་ཀྱི་རྒྱུ་ཆའི་ནགས་ཚལ་གཙོ་བོ་ཡིན་པ་མ་ཟད། སྣུམ་ཤིང་དང་། ཝུའུ་ཐུང་། ཡིའུ་ཇ། པན་ལི་སོགས་དཔལ་འབྱོར་ནགས་ཤིང་ཡང་ཡོད།
7
སྤྱི་ཚོགས་ལས་དོན།
7_1
སློབ་གསོའི་ལས་དོན།
སྤྱི་ལོ2013ལོར་ཕུའུ་ཅང་རྫོང་གི་སློབ་འབྲིང་བཞི་པ་དང་། ཤིན་ཧྭ་བུ་བཅོལ་ཁང་། ཧོང་ཀྲའེ་སློབ་འབྲིང་སོགས་གསར་དུ་བསྐྱར་སྐྲུན་རྒྱས་སྐྲུན་བྱས་པའི་སློབ་གྲྭ10བསྐྲུན་ཟིན་པ་དང་འབྲེལ་བེད་སྤྱོད་གཏོང་འགོ་ཚུགས་པ་དང་། ཞིང་ཆེན་རིམ་པའི་ཚད་ལྡན་ཅན་གྱི་སློབ་གྲྭ15དང་ཞིང་ཆེན་རིམ་པའི་བུ་བཅོལ་ཁང23བསྐྲུན་པ་རེད། དངོས་གཞིའི་རྒྱུགས་འཕྲོད་ཚད་མི་གྲངས2000ལས་ཐོག་མར་བརྒལ་ཡོད་པ་རེད། སྤྱི་ལོ2013ལོར་ཕུའུ་ཅང་རྫོང་དུ་མཐོ་རིམ་སློབ་འབྲིང་དཀྱུས་མ6(དེའི་ནང་ཕྱོགས་བསྡུས་མཐོ་རིམ་སློབ་འབྲིང3ཚུད་ཡོད་)ཡོད་པ་དང་སློབ་གྲྭར་ཡོད་མུས་ཀྱི་སློབ་མ6885ཡོད་པ་དང་། ལས་རིགས་མཐོ་འབྲིང2དང་སློབ་གྲྭར་ཡོད་པའི་སློབ་མ3942ཡོད། དམའ་འབྲིང13དང་སློབ་གྲྭར་ཡོད་པའི་སློབ་མ12234ཡོད། སློབ་ཆུང30(དེའི་ནང་ལས་མིའི་སློབ་ཆུང2ཚུད་ཡོད་)དང་སློབ་གྲྭར་ཡོད་མུས་ཀྱི་སློབ་མ33705ཡོད། བུ་བཅོལ་ཁང98དང་བུ་བཅོལ་ཁང་གི་བྱིས་པ17565ཡོད་པ་རེད།
7_2
ཚན་རྩལ་ལས་དོན།
སྤྱི་ལོ2013ལོར་ཕུའུ་ཅང་རྫོང་གིས་རིམ་ཁག་ཚན་རྩལ་རྣམ་གྲངས207ལག་བསྟར་བྱ་རྒྱུའི་རེ་ཞུ་བྱས་པའི་ནང་རྒྱལ་ཁབ་རིམ་པའི་རྣམ་གྲངས17དང་། ཞིང་ཆེན་རིམ་པའི་རྣམ་གྲངས52 གྲོང་ཁྱེར་རིམ་པའི་རྣམ་གྲངས15 རྫོང་རིམ་པའི་རྣམ་གྲངས123བཅས་ཡོད་པ་རེད། རྒྱལ་ཁབ་ཀྱི་མཐོ་གསར་ལག་རྩལ་ཁེ་ལས6རེ་ཞུ་བྱས་པ་དང་ཞིང་ཆེན་གྱི་དམངས་གཉེར་ཚན་རྩལ་ཅན་གྱི་ཁེ་ལས་འབྲིང་ཆུང5རེ་ཞུ་བྱས་པ་རེད། དབང་ཆ་སྤྲད་པའི་ཁེ་བེད་བདག་ཐོབ624 གསར་དུ་ཐོབ་པའི་ནང་གསར་གཏོད་ཁེ་བེད་བདག་ཐོབ56དང་དངོས་སྤྱོད་དཔེ་གསར286ཡོད་པ་རེད། ཕུའུ་ཅང་རྫོང་ལ་ཞིང་ཆེན་ཚན་རྩལ་ཆེད་མངགས་པའི་ལས་དོན་གྱི་སྔོན་ཐོན་ཚན་པའི་མཚན་སྙན་ཐོབ་པ་རེད།
7_3
རིག་གནས་ལས་དོན།
སྤྱི་ལོ2013ལོར་ཕུའུ་ཅང་རྫོང་གི་ཤན་ཧྭ་རིག་གནས་མཛེས་ལྗོངས་གླིང་གི་འདུ་འགོད་དེ་རིག་གནས་བྱེད་སྒོའི་ལྟེ་གནས་དང་ཡིག་རིས་འགྲེམས་ཚོགས་ལྟེ་གནས་ཀྱི་བྱེད་པོ་བསྐྲུན་ཟིན་པ་དང་། རྫོང་ལུས་རྩལ་བྱེད་སྒོའི་ལྟེ་གནས་དང་། རླུང་འཕྲིན་བརྙན་འཕྲིན་ལྟེ་གནས། གཞོན་ནུ་ལོ་ཆུང་གི་བྱེད་སྒོའི་ལྟེ་གནས་བཅས་ཀྱི་འཛུགས་སྐྲུན་ལས་གྲྭར་བདེ་བླག་ངང་སྐུལ་འདེད་བཏང་བ་དང་། ཡུའེ་ཆོན་གནའ་ཤུལ་སྤྱི་གླིང་ལས་གྲྭ་དང་ལོ་རྒྱུས་བཟོ་བཀོད་སྲུང་སྐྱོང་བེད་སྤྱོད་ལས་གྲྭ་བརྒྱ་ལག་ལེན་བསྟར་བ། གྲོང་གསེབ་ཀྱི་རིག་གནས་ཚོགས་ཁང14གསར་སྐྲུན་བཅས་བྱས་ནས་ཕུའུ་ཅང་·ཀྲུང་གོའི་གནའ་གཞུང་གནའ་བོའི་སྒྱུ་རྩལ་ཐོན་རྫས་རིག་གནས་དུས་ཆེན་སྐབས་དང་པོ་བདེ་བླག་ངང་གཉེར་བ་རེད།
8
གཟི་བརྗིད་མཚན་སྙན།
མི་རབས་རིམ་བྱུང་གི་གྲགས་ཅན་མི་སྣ་མང་པོ་ཐོན་ནས“རིག་གནས་ཀྱི་རྒྱལ་ཕྲན”དང་། “ཡིག་རིས་ཀྱི་ཕ་ཡུལ” “ཆུ་ཤེལ་གྱི་གྲོང་ཁྱེར” “སྒོ་ལྕགས་རྟེན་གཞི” “ཀྲུང་གོའི་འཚེམ་སྲུབས་ཁྱིམ་འཁེལ་གྲགས་ཅན་གྲོང་ཁྱེར”བཅས་ཀྱི་མཚན་སྙན་ཡོད། སྤྱི་ལོ2018ལོའི་ཟླ12པར་རྒྱལ་ཡོངས་ཀྱི་རྫོང་ཁོངས་དཔལ་འབྱོར་མ་འཇོག་གི་མི་མངོན་པའི་སྟོབས་ཤུགས་ཆེན་པོ100ཡི་ནང་ཚུད་ཡོད། སྤྱི་ལོ2019ལོའི་ཟླ་5པའི་ཚེས14ཉིན་སྐབས་བཅུ་པའི་ཀྲུང་ཧྭའི་ཁོར་ཡུག་ཕུལ་བྱུང་གི་བྱ་དགའ་ཐོབ་ཡོད།
དཔྱད་གཞིའི་ཡིག་ཆ།