ས་བཅུའི་ཁྱད་པར་བཅུ།
ས་དང་པོ་ཆོས་ཀྱི་དབྱིངས་ཀྱིས་ཤེས་བྱ་ཐམས་ཅད་ལ་ཁྱད་པར་ཤེས་པས་ཆོས་ཉིད་ཀུན་འགྲོའི་དོན་དུ་རྟོགས། ས་གཉིས་པ་རང་བཞིན་གྱིས་འོད་གསལ་བར་མཐོང་བས་ཆོས་ཉིད་དེ་ཆོས་རྣམས་ཀྱི་ནང་ནས་མཆོག་གི་དོན། ས་གསུམ་པ་བསྟན་པའི་ཆོས་རྟོགས་པའི་རྒྱུ་མཐུན་པའི་དོན། ས་བཞི་པ་གང་ལའང་བདག་གི་བར་ཡོངས་སུ་འཛིན་པ་མེད་པའི་དོན། ས་ལྔ་པ་རྣམ་པར་དག་པའི་དབྱིངས་སུ་རང་གཞན་གྱི་རྒྱུད་ཐ་དད་པ་མེད་པའི་དོན། ས་དྲུག་པ་དྲི་མ་གློ་བུར་བ་ཡིན་པས་ཀུན་ནས་ཉོན་མོངས་པ། ས་བདུན་པ་མདོ་ལ་སོགས་པའི་ཆོས་ཀྱི་མཚན་མ་ཐ་དད་མེད་པའི་དོན། ས་བརྒྱད་པ་མི་སྐྱེ་བའི་ཆོས་ལ་བཟོད་པ་ཐོབ་པས་ཉོན་མོངས་པ་བྲི་བ། རྣམ་པར་བྱང་བ་འཕེལ་བ་མེད་པའི་དོན། ས་དགུ་པ་ཡེ་ཤེས་གནས་གྱུར་པས་སོ་སོ་ཡང་དག་པར་རིག་པའི་ཡེ་ཤེས་ལ་དབང་བའི་དོན། ས་བཅུ་པ་ཇི་ལྟར་བཞེད་པ་བཞིན་སྤྲུལ་ནས་སེམས་ཅན་གྱི་དོན་བྱེད་པས་འཕྲིན་ལས་ལ་དབང་བའི་གནས་ཀྱི་དོན། ཞེས་མདོ་རྒྱུད་དང་དབུས་མཐའ་ལས་གསུངས་སོ། །
ཀློག་གྲངས། ： 0
རྩོམ་སྒྲིག་ཁ་གྲངས།：1 སྔ་མའི་པར་གཞི།
ཉེ་ཆར་དག་བཅོས།：2018-04-27
གསར་སྤེལ་མཁན། ：འཕགས་མོ་རིན་ཆེན།