བེེ་རོ་ཕུག
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

བེེ་རོ་ཕུག
རས་ཆུང་ཕུག་ནས་འཁོར་ལམ་སྤྱིར་བཏང་བ་བརྒྱུད་སྤྱི་ལེ་གཉིས་ཙམ་ཕྱིན་ན་པད་རོང་གྲོང་གི་ཤར་རིའི་ལྡེབས་སུ་སྒྲུབ་ཕུག་དེ་མཇལ་རྒྱུ་ཡོད། སྒྲུབ་ཕུག་དེ་ནི་ཡར་ཀླུང་ཕུག་གསུམ་གྱི་ཡ་གྱལ་ཞིག་ཀྱང་ཡིན། པད་གྲོང་ཞེས་པ་ནི་སྔོན་ཤེལ་བྲག་གི་འོག་ཏུ་པད་སྒང་ཞེས་པའི་གྲོང་ཞིག་ཡོད་པ་དང་། དེའི་འོག་ཏུ་ཆགས་པའི་གྲོང་ལ་པད་གྲོང་ཞེས་པའི་མིང་དེ་ཐོགས་ཟེར། སྒྲུབ་ཕུག་དེར་བེེ་རོ་ཙ་ན་ལོ་དགུར་བཞུགས། བེེ་རོ་སྙེ་མོར་འཁྲུངས་ནས་རྒྱ་གར་དུ་ཕེབས། དེ་རྗེས་སྒྲུབ་ཕུག་དེར་བཞུགས་ནས་ལོ་དྲུག་ཙམ་སོང་སྐབས། ཚེ་ཆུ་འབུམ་པར་བཞུགས་པའི་གུ་རུ་རིན་པོ་ཆེས་མཁྱེན་ནས་དེར་ཕེབས་ཏེ་སྒྲུབ་རྟགས་འགྲན་གནང་མཛད། ཐོག་མར་གུ་རུས་བྲག་ཕུག་ནང་གི་བྲག་ཐམས་ཅད་མར་འབེབས་གནང་བས། བེེ་རོས་ཕྱག་གཡས་པ་དང་ཞབས་གཡོན་མས་ཕར་ཕུད། དབུས་ཡར་སྐྱོར་གནང་བ་བཅས་ཀྱི་རང་བྱོན་ཡང་ཡོད་པས། གུ་རུས་བེེ་རོ་ཙ་ན་ཨོ་རྒྱན་དངོས་དང་མཉམ་ཞེས་གསུངས་པའང་དེ་ནས་བྱུང་གསུངས། ད་དུང་སྒྲུབ་ཕུག་ནང་ཆོས་བཀའ་འགྱུར་གྱི་རྩིག་པའི་རང་བྱོན་དང་། དམ་ཅན་ཞལ་འབག་གི་རང་བྱོན་ཡང་མཇལ་རྒྱུ་ཡོད། བྲག་ཕུག་གི་འོག་ཏུ་གྲོང་ཞིག་ཡོད་པ་ལ་རོགས་པ་རྩེ་ཞེས་ཟེར། དེ་ལྟར་ཟེར་དགོས་དོན་ནི་བེེ་རོས་ང་ལོ་དགུ་འདིར་སྒྲུབ་པ་རྒྱགས་སྐབས་རོགས་པ་རྩེ་དྲ་བྱས་བྱུང་ཞེས་གསུངས་པས་རོགས་པ་རྩེ་པ་ཞེས་པ་དེ་ལྟར་བྱུང་། སྔོན་བྲག་ཕུག་དེ་ཤིན་ཏུ་བཙན་པོ་ཡོད། རྗེས་སུ་ཉམས་ཆགས་བྱུང་རྗེས་ད་ལྟ་མཇལ་བདེ་པོ་ཡོད།
གཞི་རྩའི་གནས་ཚུལ།

རིགས་དབྱེ།
སྒྲུབ་ཕུག
ཁོངས་གཏོགས།
ཡར་ཀླུང་ཕུག་གསུམ་གྱི་ཡ་གྱལ།
གནས་ཡུལ།
བོད་རང་སྐྱོང་ལྗོངས་ཀྱི་ལྷོ་ཁ་ས་ཁུལ་སྣེ་གདོང་རྫོང་།
1 ངོ་སྤྲོད།

བེེ་རོ་ཕུག་ནི་བོད་རྒྱལ་ཁྲི་སྲོང་ལྡེ་བཙན་གྱི་དུས་སུ་བོད་ཀྱི་ལོ་ཙཱ་བ་ཆེན་པོ་བེེ་རོ་ཙ་ནས་རྣམ་པར་སྣང་མཛད་སྒོམ་སྒྲུབ་གནང་མྱོང་བའི་གནས་མཆོག་ཁྱད་པར་ཅན་ཞིག་ཡིན་པས་དེ་ནས་བཟུང་ཁོང་གི་མཚན་བྲག་ཕུག་ལ་ཐོགས་ནས་བེེ་རོ་ཕུག་ཅེས་བརྗོད།

དེ་ཡང་ཁོང་འདི་གར་སྒོམ་སྒྲུབ་གནང་ནས་བཞུགས་པ་སློབ་དཔོན་པདྨ་འབྱུང་གནས་ཀྱིས་མཁྱེན་ནས་ཚོད་ལྟའི་ཚུལ་དུ་བྲག་ཕུག་ནང་གི་བྲག་ཐམས་ཅད་མར་འབེབས་གནང་བས། བེེ་རོས་ཕྱག་གཡས་པ་དང་ཞབས་གཡོན་མས་ཕར་ཕུད་ཅིང་། དབུས་ཡར་སྐྱོར་གནང་བ་བཅས་ཀྱི་རང་བྱོན་ཡོད་ཅིང་། སློབ་དཔོན་རིན་པོ་ཆེའང་བེེ་རོའི་མཐུ་རྩལ་ལ་ཡིད་འཕྲོག་ནས་བེེ་རོ་ཙ་ན་ཨོ་རྒྱན་དངོས་དང་མཉམ་ཞེས་གསུངས། ད་དུང་ཁོང་འདི་གར་སྒོམ་སྒྲུབ་གནང་སྐབས་རྗེ་བཙུན་འཇམ་དཔལ་དབྱངས་དངོས་སུ་ཞལ་གཟིགས་པས་ངག་དང་རིག་པའི་དངོས་གྲུབ་ཐོབ་ནས་བསམ་ཡས་སུ་ལོ་ཙཱ་བ་གནང་སྐབས་སུས་ཀྱང་འགྲན་མི་ཐུབ་པ་རིག་པའི་ཀློང་རྡོལ་ཞིག་ཏུ་གྱུར།

དེས་ན་དུས་ཕྱིས་བྲག་ཕུག་འདིའི་ནང་སྒོམ་སྒྲུབ་བྱེད་པའམ། ཡང་ན་མཆོད་མཇལ་དུ་རྟག་ཏུ་བསྐྱོད་ནང་ངག་དང་རིག་པའི་དངོས་གྲུབ་ཐོབ་ཀྱི་རེད་ཅེས་གྲགས། དེར་མ་ཟད་ཕུག་འདིའི་ནང་བེེ་རོ་ཙ་ནར་རྒྱུ་ཕ་རོལ་དུ་ཕྱིན་པའི་ཐེག་པ་དང་། འབྲས་བུ་གསང་སྔགས་རྡོ་རྗེ་ཐེག་པའི་ཉམས་ལེན་ལ་བརྟེན་ནས་གྲུབ་རྟགས་མངོན་སུམ་དུ་ཐོན་ཏེ་རྩ་རླུང་ཐིག་ལེ་རང་དབང་དུ་འདུས། ཕྱིས་བློན་ཆེན་ངན་པ་ཚོས་རྒྱལ་པོར་ཕྲ་མ་གསོལ་བས་རྒྱལ་པོ་དབུ་འཐོམས་ཏེ་བེེ་རོ་ཙ་ན་རྒྱལ་མོ་ཚ་བ་རོང་དུ་རྒྱང་འབུད་དུ་བཏང་བའི་སྐབས་ལོ་བརྒྱད་ཅུར་སླེབས་པའི་སྤང་རྒྱན་སངས་རྒྱས་མགོན་པོར་བེེ་རོ་ཙ་ནས་གདམས་ངག་བསྟན་གནང་མཛད་པ་བཞིན་ཉམས་སུ་བླངས་པས་དངོས་གྲུབ་བརྙེན་ནས་ལོ་བརྒྱ་དང་བདུན་ཅུ་རྩ་གཉིས་སོན་ཐུབ་པ་བྱུང་བ་མ་ཟད་དེ་ལོར་འཇའ་ལུས་སུའང་གཤེགས།

གཞན་ཡང་བེེ་རོ་ཕུག་ནང་བཀའ་འགྱུར་གྱི་ཆ་ཤས་རང་བྱོན་དང་། དམ་ཅན་གྱི་ཞལ་འབག་རང་བྱོན་སོགས་ཀྱང་མཇལ་རྒྱུ་ཡོད། དེ་ཡང་མ་གཞི་ཡར་ཀླུང་ཁུལ་དུ་བྲག་ཕུག་ཧ་ཅང་མང་པོ་ཡོད་ཀྱང་རས་ཆུང་ཕུག་དང་། བེེ་རོ་ཕུག ཤེལ་བྲག་ཕུག་བཅས་ལ་ཡར་ཀླུང་ཕུག་གསུམ་ཞེས་ཟེར་དོན་ནི། རས་ཆུང་ཕུག་ནང་རྣལ་འབྱོར་པ་རས་ཆུང་ལ་སྐུ་ཡི་དངོས་གྲུབ་ཐོབ་པ་དང་། བེེ་རོ་ཕུག་ནང་ལོ་ཆེན་བེེ་རོ་ཙ་ནར་ངག་གི་དངོས་གྲུབ་ཐོབ་པ། ཤེལ་བྲག་ཕུག་ནང་སློབ་དཔོན་པདྨ་འབྱུང་གནས་ལ་ཡིད་ཀྱི་དངོས་གྲུབ་ཐོབ་པ་བཅས་མདོར་ན་གོང་གསལ་ཕུག་གསུམ་ནང་སྐྱེས་ཆེན་དམ་པ་གསུམ་ལ་ལུས་ངག་ཡིད་གསུམ་གྱི་དངོས་གྲུབ་ཐོབ་པས་ཕུག་དེ་གསུམ་ལ་ཡར་ཀླུང་ཕུག་གསུམ་ཞེས་མཚན་གསོལ་ལོ།།

སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:2  སྔ་མའི་པར་གཞི།

ཉེ་ཆར་དག་བཅོས།:2017-10-22

གསར་སྤེལ་མཁན། :གངསསྨྱུག་སྲས།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།