སྨྱུག་བཟོའི་ལག་རྩལ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

སྨྱུག་བཟོའི་ལག་རྩལ།
འདིར་བོད་ཀྱི་ལུགས་ལྟར་སྨྱུ་གུའི་རྒྱུ་ཅི་ལྟར་འདེམས་པ་དང་བཟོ་ཐབས། སྨྱུག་གྲི་བཟོ་ཐབས་སོགས་སྨྱུ་གུ་བཟོ་བའི་ལག་རྩལ་ངོ་སྤྲོད་བྱས་ཡོད།
གཞི་རྩའི་གནས་ཚུལ།

བོད་ཡིག་གི་མིང་།
སྨྱུག་བཟོའི་ལག་རྩལ།
རྒྱུ་ཆ།
སྙུག་མ།
1 སྨྱུག་རྒྱུ་དང་བཟོ་ཐབས།

དེ་ལ་འབྲི་སྨྱུག་འོས་པའི་སྨྱུག་མ་ངོས་འཛིན་དང་སྨྱུག་རྒྱུ་ལེགས་བཅོས་བྱ་ཐབས་ནི་སྨྱུག་མ་ལ་རིགས་མང་པོ་ཡོད་པས་སྨྱུ་གུའི་རྒྱུར་འོས་པའི་སྨྱུག་མ་ནི།  ནང་དུ་སྦུ་གུ་ཕྲ་ཞིང་བཏེགས་ན་ལྕི་བ།  སྡོང་བོ་ཆེར་སྐྱེས་པའི་སྨྱུག་མ་ཤ་མཐུག་ཅིང་འཆུས་པ།  མདོག་སེར་ཞིང་ཕྱི་རྩི་འཇམ་ལ་འོད་དང་ལྡན་པ།  རྒྱུ་སྲ་བས་སོས་མནན་ན་འདྲེད་པར་འགྱུར་བ་དེ་ཡིག་རིགས་འདྲ་མིན་དང་གསེར་དངུལ་མཚལ་སྣག་ཐམས་ཅད་འབྲི་བ་ལ་མཆོག་ཏུ་བཤད་དོ།།

སྨྱུག་རྒྱུ་སྲ་བར་བཅོས་ཐབས་སུ།  ཡུན་རིང་དུད་ཁར་འཇོག་པ་དང་།  རྐང་མར་རྙིང་པས་བྱུགས་ནས་བརྔོས་མ་ཐག་གི་ཡོས་ཚན་ནང་དུ་བཅུག་སྟེ་ལེགས་པར་འཕྱིས་ན་སྲ་མཁྲེགས་རུས་པ་ལྟ་བུར་འགྱུར་རོ།།

གཞན་ཡང་འཇང་སྨྱུག་ཅེས་པའི་མདོག་ནག་པོ་སྦུ་གུ་ཅན་ནི་སུབ་ཅེས་ཏེ་དཀྱུས་ཡིག་འབྲི་བ་ལ་བདེ་བ་དང་།  ལྕགས་སྨྱུག་ནི་གསུང་རབ་གཏོས་ཆེ་རྣམས་ལ་བཟང་བ་དང་།  ལྷོ་སྨྱུག  རོང་སྨྱུག་སྤུས་ལེགས་དག་གིས་ཀྱང་སྨྱུག་གུར་འོས་པ་སོགས་བཤད་ཀྱང་།  སྔོན་བྱོན་མཁས་པས་མཛད་པའི་གསུང་བཟོའི་བསྟན་བཅོས་སུ་གསལ་བ་ཙམ་ལས་དེང་དུས་སུ་སྨྱུག་མའི་རིགས་འདི་དག་ངོས་ཟིན་མཁན་དང་།  དེ་མཚུངས་ཀྱི་ལས་ཀ་ཞིབ་ཚགས་ཐུབ་མཁན་གྱི་བཟོ་བོ་ཉུང་མོད།  མདོར་ན་སྨྱུ་གུའི་རྒྱུ་ནི་སྨྱུག་ཤ་མཐུག་ཅིང་སྲ་མཁྲེགས་ཅན་ཞིག་ངེས་པར་དགོས་སོ།།

2 ​བཟོ་ཐབས།   

མཐོ་གང་ལས་མི་རིང་ཞིང་། མཐེབ་མཛུབ་ལས་མི་ཐུང་བ།   རན་པ་འཛིན་བདེ་བ་དང་གཞོག་རྩེ་སོར་ཕྱེད་གཉིས་གཞལ་བའི་སར་གྲི་ཁམས་གཉིས་གཞོག་སྟེ་མཆུ་བཟོ་དགོས། མགྱོགས་བྲིས་འབྲི་བར་གས་ཆེན་དང་།  ལེགས་པར་འབྲི་བར་གས་ཆུང་བྱས་ཏེ་རྫིང་བུ་འདྲ་བ་དང་ཡུར་བ་འདྲ་བ་ཞེས་སྨྱུག་རྒྱབ་ནས་བལྟས་ན་གཡས་གཡོན་ཆ་སྙོམས་པ།  མཆུ་ཧ་ཅང་མི་སྲབ་ཅིང་བཅད་ཁ་སྟེ་མཆུ་ཅུང་ཟད་གསེག་པར་གཅད་དགོས།  ཚེག་བྲིས་འབྲི་ན་མཉམ་པར་བཅད།།   ཟླུམ་བྲིས་འབྲི་ན་ཉིས་ཆོད་བྱ།།   སྨྱུག་ཁ་ཆིག་ཆོད་བྱས་གྱུར་ན།།  ཡི་གེ་ལེགས་པའི་གནད་གཅིག་ཡོད།། སྨྱུག་ཁ་ཉིས་ཆོད་བྱས་གྱུར་ན།།  སྨྱུག་ཁ་སྲ་བའི་གནད་གཅིག་ཡོད།།  གསུམ་ལྡན་ལྔ་འཛོམས་ཞེས་པའི་དོན།།  སྨྱུག་གུ་མཆུ་ལ་མཁས་གྱུར་ན།། ཡི་གེའི་འབྲུ་ལ་མཁས་པར་བྱེད།།  ཅེས་པ་སོགས་ནི་སྨྱུག་མའི་སྨྱུ་གུ་བཟོ་ཐབས་ཁོ་ན་ཙམ་ཡིན་གྱི་དེང་དུས་ཀྱི་ལྕགས་སྨྱུག་སྣ་ཚོགས་དང་།  རང་འབབ་ཆུའི་སྨྱུ་གུ་དང་།  བོད་ཀྱི་ཡི་གེ་འབྲི་བ་ལའང་སྤྱོད་བདེ་བའི་མི་རིགས་ཀྱི་སྨྱུ་གུ་ལ་སོགས་སྨྱུག་གསར་རྣམ་གྲངས་མང་པོ་དག་ལ་མ་ཡིན་ཡང་།  བོད་ཀྱི་ཡིག་གཟུགས་ཚད་དང་ལྡན་པ་ཞིག་འབྲི་བར་འདོད་ན་སྨྱུག་མའི་སྨྱུ་གུ་ལས་ལྷག་པ་མེད་དོ།།

3 སྨྱུག་གྲི་བཟོ་བའི་ལག་ཤེས།

སྨྱུ་གུ་གཅོད་བྱེད་ཀྱི་སྨྱུག་གྲི་ནི།  ལྕགས་རྒྱུ་ཧ་ཅང་བཟང་ན་རྒོད་གས་འབྱུང་ཞིང་བརྡར་དཀའ།  ཧ་ཅང་ཞན་ན་ངར་མི་འཛིན་རྣོ་མི་བརྟན་པས།   ལྕགས་བཟང་ངན་རན་ཞིང་གྲི་ལྕགས་མཉེན་ལ་ངར་འཛིན་པའི་ལྕགས་ཀྱི་རིགས་སམ།   ཡང་ན་ཕོ་ལྕགས་མོ་ལྕགས་འདྲེས་མ་ལ་མར་དང་བུར་སྦྲང་བསྲེས་པའི་ལྕགས་ཞུན་བྱས་ནས།  གྲིའི་དབྱིབས་སོགས་ཁྱད་པར་ཅན་བཟོ་དགོས་ཚུལ་ལ།  གྲི་རྩེ་གཟོང་ལྟར་མཉམ་པ་ནི་སྨྱུ་གུ་བཟོ་བ་ལ་གཅེས།  རྩིབ་ལྟར་སྐྱོན་མེད་པ་ནི་ཤོག་བུ་འདྲ་བ་ལ་གཅེས།  བལ་ཚིལ་གཙོ་ཁྲག་དང་ཨ་རུ་ར་སྨྱུག་གྲིའི་ངར་ལ་གཅེས་པ་ཡིན།  ཞེས་སོགས་དང་།  རྡར་རྡོ་ནི།  འཛིང་ངམ་ལྕོག་རླབས་སོགས་ཀྱི་རྡོ་སྨྱུག་གྲིའི་རྡར་ལ་གཅེས་པ་ཡིན་ཞེས་བཤད་ཀྱང་དེང་གི་རྡར་རྡོ་བཟོས་མ་ལས་ལྷག་པར་དཀོན་པ་འདྲ།  

4 བརྡར་ཐབས།   

ངར་ཆུང་ཐད་ཀར་བརྡར་བས་རྣོ་ཁ་མྱུར་དུ་ལེན།  ངར་ཆེན་བསྐོར་ཞིང་བརྡར་བས་སོ་ཁ་འགྲིག་མི་འགྱུར་ཞེས་སོགས་གསུངས་པ་ལྟར་རོ།།


དཔྱད་གཞིའི་ཡིག་ཆ།

བརྡ་འགྲེལ་གདོང་འཛར།

སྨྱུ་གུ། བཟོ་རྩལ། ལག་རྩལ།
སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2019-03-25

གསར་སྤེལ་མཁན། :གདུགས་དཀར་རྒྱལ།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།