རྫ་ཤུལ་བློ་བཟང་རྒྱ་མཚོ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

རྫ་ཤུལ་བློ་བཟང་རྒྱ་མཚོ།
རྫ་ཤུལ་བློ་བཟང་རྒྱ་མཚོ་ནི། མདོ་སྨད་རྟ་ཡི་ཆོལ་ཁའི་འབྲོག་སྡེ་ཆེན་པོ་ཁྲོ་ཁོ་སྨད་མའི་མཐའ་གཉིས་སུ་མ་ལྷུང་བའི་ཁྱིམ་རྒྱུད་ཅིག་ཏུ། སྤྱི་ལོ1971ལོའི་ས་ཟླའི་དཀར་ཕྱོགས་རྫོགས་པ་གསུམ་པའི་ཉིན་ཕྱེད་རྟ་དུས་ཤིག་ལ་ངུ་ངག་གི་དབྱངས་རྟ་ཐོག་མ་བསྒྲགས། ལྷ་ལྡན་སྨོན་ལམ་ཆེན་མོའི་གྲྭ་སྐོར་བ་རྫ་ཤུལ་དགེ་བཤེས་འཇམ་དཔལ་མཐུ་སྟོབས་རིན་པོ་ཆེས་འཇིགས་བྱེད་སྐྱབས་ཞེས་པའི་མིང་བསྩལ།
གཞི་རྩའི་གནས་ཚུལ།

བོད་ཡིག་གི་མིང་།
རྫ་ཤུལ་བློ་བཟང་རྒྱ་མཚོ།
འཁྲུངས་ལོ།
སྤྱི་ལོ1971ལོ།
འཁྲུངས་ཡུལ།
ཁྲོ་ཁོ་སྨད་མ།
གྲུབ་མཐའ།
དགེ་ལུགས་པ།
1 ངོ་སྤྲོད། 

རྫ་ཤུལ་བློ་བཟང་རྒྱ་མཚོ་ནི། མདོ་སྨད་རྟ་ཡི་ཆོལ་ཁའི་འབྲོག་སྡེ་ཆེན་པོ་ཁྲོ་ཁོ་སྨད་མའི་མཐའ་གཉིས་སུ་མ་ལྷུང་བའི་ཁྱིམ་རྒྱུད་ཅིག་ཏུ། སྤྱི་ལོ1971ལོའི་ས་ཟླའི་དཀར་ཕྱོགས་རྫོགས་པ་གསུམ་པའི་ཉིན་ཕྱེད་རྟ་དུས་ཤིག་ལ་ངུ་ངག་གི་དབྱངས་རྟ་ཐོག་མ་བསྒྲགས། ལྷ་ལྡན་སྨོན་ལམ་ཆེན་མོའི་གྲྭ་སྐོར་བ་རྫ་ཤུལ་དགེ་བཤེས་འཇམ་དཔལ་མཐུ་སྟོབས་རིན་པོ་ཆེས་འཇིགས་བྱེད་སྐྱབས་ཞེས་པའི་མིང་བསྩལ། 

2 མི་ཚེ་བརྒྱུད་རིམ།

རང་ལོ་དགུ་བ་ནས་བཅུ་བའི་བར་སྦྲ་གུར་སློབ་གྲྭར་ཞུགས།

རང་ལོ་བཅུ་བའི་དགུན་ཁར་ཞལ་ཤུལ་དགོན་པའི་གནས་བརྟན་འདུལ་འཛིན་ཆེན་མོ་སྐལ་བཟང་ཚོགས་འཕེལ་ཞུ་བ་ལས་སྐྱབས་འགྲོ། དགའ་ལྡན་ལྷ་བརྒྱ་མ། ཡོན་ཏན་གཞི་གྱུར་མ། སྒྲོལ་མ་ཕན་ཡོན་དང་བཅས་པ་བློ་འཛིན་མཛད།

རང་ལོ་བཅུ་གཅིག་སྟེང་སྨད་མ་ཡུལ་ཚོའི་སློབ་ཆུང་ལ་ཞུགས་ནས་གསུམ་བཟང་སློབ་མའི་མཚན་སྙན་ཐེངས་མང་པོར་ཐོབ་མྱོང་།

རང་ལོ་བཅུ་བཞིའི་སྟེང་སློབ་མཐར་ཕྱིན། ལོ་གཅིག་ཙམ་ལ་རྟ་རྫི་བགྱིས།

རང་ལོ་བཅུ་དྲུག་སྟེང་ཞལ་ཤུལ་དགོན་པའི་ཚོགས་གྲལ་དུ་ཞུགས་ཏེ་དབུ་མཛད་དཀོན་མཆོག་ཞུ་བ་དགེ་རྒན་དུ་བསྟེན་ནས་ཆོ་ག་ཆོས་སྤྱོད་བློ་འཛིན་མཛད། མཁས་གྲུབ་ངང་མོ་བྱེ་བའི་བསྟི་གནས་དཔལ་ལྡན་བཀྲ་ཤིས་གཡས་སུ་འཁྱིལ་བའི་ཆོས་ཀྱི་སྡེ་ཆེན་པོ་དེ་ཉིད་ཀྱི་དགེ་བའི་བཤེས་གཉེན་ཆེན་མོ་རྔ་བ་སྦྱིན་པ་རྒྱ་མཚོ་ལས་དགེ་ཚུལ་གྱི་སྡོམ་པ་བླངས། བློ་བཟང་རྒྱ་མཚོ་ཞེས་པའི་མཚན་གསོལ། དགོན་དེ་གའི་རྨད་བྱུང་ཐོས་བསམ་གླིང་དང་དཔལ་ལྡན་སྨད་རྒྱུད་གྲྭ་ཚང་གཉིས་ཀྱི་ཆོ་ག་ཕྱག་ལེན་དང་བཅས་པ་རང་ལོ་བཅོ་བརྒྱད་སྟེང་ཕལ་ཆེར་བསླབ་ཚར།

རང་ལོ་བཅུ་དགུ་ནས་ཉེར་གཅིག་བར། ཐལ་ཕྲེང་ཟུར་བཀོད་དང་ཞོར་དུ་བསྡུས་གྲྭའི་རྩ་ཚིག གྲུབ་མཐའ་རྩ་བ། རྒྱན་འཇུག་གཉིས། སྤྱོད་འཇུག་ཆེན་མོ། རྣམ་འགྲེལ་རྩ་བའི་ལེའུ་གཉིས་སོགས་བློ་འཛིན་མཛད་ནས་གྲྭ་མང་ལ་ཚོགས་རྒྱུགས་ཕུལ། རང་དགོན་གྱི་དགེ་བཤེས་རྣམ་པའི་མདུན་དུ་སྐབས་གང་འོས་ཀྱི་དཔེ་ཁྲིད་དང་འཕྲོས་པ་དོགས་གཅོད། ཆོས་གྲྭ་ཆག་མེད་སྒོས་དཔེ་འཛིན་སྐྱོར་སྦྱང་བགྱིས།

རང་ལོ་ཉེར་གཅིག་པ་ལྕགས་ལུག་ལོ་སྟེ་སྤྱི་ལོ1991ལོའི་དགུ་བའི་ཚེས་མགོར་ལྡོང་མཆོག་སྤྲུལ་རིན་པོ་ཆེ་རྗེ་སྐལ་བཟང་འཕྲིན་ལས་དར་རྒྱས་ཚང་དང་གད་སྐྱའི་རི་ཁྲོད་པ་རྣམ་གཉིས་དབུ་མཛད་ནས་ལས་སྣེ་བཀའ་བགྲོས་གཅིག་མཐུན་གྱིས་གྲྭ་བ་བཞི་རྩིས་དཀར་ནག་ཁྲིད་པར་བདམས། རྭ་ཚང་དགེ་བཤེས་སྐལ་བཟང་ཚོགས་འཕེལ་ལས་དགུ་མཐའ་དང་ཚེས་ཞག་ལྔ་བསྡུས་ཁྲིད། ཞོར་དུ་ས་དཔྱད་ཕྱེ་མ་བརྡར་སྤུངས་ཀྱང་ཁྲིད། སྐར་རྩིས་དང་ནག་རྩིས་གཉིས་ཀྱི་སྔོན་འགྲོ་བློ་འཛིན་མཛད།

རང་ལོ་ཉེར་གཉིས་པ་ཆུ་སྤྲེལ་ཏེ་སྤྱི་ལོ1992ལོར། བླ་བྲང་བཀྲ་ཤིས་འཁྱིལ་དུ་སྐར་རྩིས་ཁྲིད་པར་ཆེད་བཏང་མཛད། 

རང་ལོ་ཉེར་གསུམ་པ་ཆུ་བྱ་སྟེ་སྤྱི་ལོ1993ལོར། མཚན་སྒྲོགས་དགོན་པའི་རྩིས་རམས་པ་ཨ་ཁུ་སྐལ་བཟང་དཀོན་མཆོག་ཚང་ལས་ནག་རྩིས་འགའ་ཞིག་གི་ཁྲིད་རྒྱུན་དང་རྡེའུ་དགྲམ་ཚུལ། སྨེ་བའི་ཤ་རྩིས། དར་གུད་གསེར་ཕྲེང་། དབྱངས་འཆར། དུས་རྩིས་ངོ་མཚར་ཉི་མ་སོགས་ཀྱི་རྡེལ་འཇོག དཔྱད་དོན། ལག་ལེན། ཉམས་མྱོང་མན་ངག་སོགས་བུམ་པ་གང་བྱོས་ཚུལ་དུ་གནང་བར་རང་ལའང་སྔར་མེད་བློ་བསྐྱེད་གསར་བ་མང་དུ་ཐོབ། 

རང་ལོ་ཉེར་བཞི་བ་ཤིང་ཁྱི་སྟེ་སྤྱི་ལོ1994ལོར། ལྔ་རིག་སྨྲ་བའི་དབང་པོ་ཨ་ཁུ་སངས་རྒྱས་དོན་འགྲུབ་ཚང་ལས་སྙན་ངག་སྤྱི་དོན། ཐོན་མིའི་ཞལ་ལུང་། སི་ཏུའི་སུམ་རྟགས་འགྲེལ་ཆེན། པྲ་ཏིའི་ཀུན་བཟང་དགོངས་རྒྱན། ཆབ་ཤོག་ཕོ་ཉ་གཞོན་ནུ་དོན་འགྲུབ་མ། བསེ་བསྡུས། གྲུབ་དོན་ས་གསུམ་སོགས་ཁྲིད། 

རང་ལོ་ཉེར་ལྔ་བ་ཤིང་ཕག་སྟེ1995ལོར། གྲོགས་ཞིག་དང་ལྷན་དུ་རྒྱ་རྩིས་ལོ་ཐོ་ཧུང་ལི་ཀུན་གསལ་མེ་ལོང་ཞེས་པ་གསར་དུ་བསྐྲུན། དགེ་རྒན་བཀའ་དྲིན་ཅན་རྗེ་བསམ་འགྲུབ་རྒྱ་མཚོ་ཚང་དང་། དངུལ་རྭའི་རྩིས་རམས་པ་ཨ་ཁུ་སྐལ་བཟང་ཚུལ་ཁྲིམས་རྣམ་གཉིས་ཀྱིས་རྨ་ཆུའི་ཁུགས་སོ་དང་པོར་མཚོན་ན་སྤྱི་ཚོགས་གསར་བ་དབུ་བརྙེས་པ་ནས་བཟུང་ཆེས་ཐོག་མའི་ལོ་ཐོ་ཡིན་ཞེས་བསྔགས་བརྗོད་རྒྱ་ཆེར་གནང་།

རང་ལོ་ཉེར་དྲུག་པ་མེ་བྱི་སྟེ་སྤྱི་ལོ1996ལོར། ལྷོ་ནུབ་མི་རིགས་སློབ་གྲྭ་ཆེན་མོའི་སྐར་རྩིས་གཟབ་སྦྱོང་འཛིན་གྲྭར་ཞུགས་ཏེ། མ་ཧཱ་པཎྜི་ཏ་སློབ་དཔོན་རིན་པོ་རྗེ་བཙུན་བསམ་འགྲུབ་རྒྱ་མཚོ་ཚང་ལས། དབུ་མ་དགོངས་པ་རབ་གསལ། ཁོང་གིས་མཛད་པའི་སྐར་རྩིས་ཀུན་འདུས་ནོར་བུ་གཞུང་ཁྲིད་ཆ་ཚང་ཐོབ། 

རང་ལོ་ཉེར་བདུན་པ་མེ་གླང་སྟེ་སྤྱི་ལོ1997ལོར། ཨ་ཁུ་རས་ཆུང་ཤེས་རབ་རྒྱ་མཚོ་ལས་དག་ཡིག་མཁས་པ་དགའ་བསྐྱེད། བློ་གསལ་འཇུག་ངོགས། བློ་གསལ་དགའ་སྟོན། མཐའ་དཔྱད། སྙན་ངག་དབྱངས་ཅན་དགྱེས་གླུ་དང་ཡང་གསལ་སྣང་མཛོད་གཉིས། སྒྲ་ཆ་ཚང་སོགས་ཀྱི་ཁྲིད་ཐོབ། 

རང་ལོ་ཉེར་བརྒྱད་པ་ས་སྟག་སྟེ་སྤྱི་ལོ1998ལོར། མཁས་པའི་དབང་པོ་བསེ་ཚང་བློ་བཟང་དཔལ་ལྡན་ཆོས་ཀྱི་རྡོ་རྗེ་མཆོག་གིས་མཚན་འདོགས་གནང་བའི་རིག་གནས་ཡར་སྤེལ་ཞེས་པའི་སྣ་འཛོམས་ལོ་དེབ་རྩོམ་སྒྲིག་པའི་ལས་ཀ་འདི་ལ་འཇུས་ནས་སྤྱི་ལོ2018ལོའི་བར་མི་ལོ་ཉི་ཤུ་འགོར་སོང་། དེའི་རིང་ལ་གསར་སྐྱེས་རྩོམ་པ་པོ་མི་ཉུང་བ་ཞིག་སྐྱེད་སྲིང་བྱས་པ་ཙམ་དུ་མ་ཟད། ལོ་བཅུའི་རྩོམ་རིག་ཚོགས་འདུ་དང་། བགྲོ་གླེང་སོགས་ཀྱི་གྲུབ་འབྲས་ལ་སྒེར་གཞུང་གང་རུང་ནས་གཟེངས་བསྟོད་ཐོབ།

3 བྱ་བའི་གྲུབ་བྲས།

གོ་བརྒྱད་ལོའི་དགུན་ཁར་ཞལ་ཤུལ་དགོན་པའི་འཛིན་གྲྭ་གཅིག་པའི་ཆོས་གྲོགས་རྣམས་དང་ལྷན་དུ། སློབ་དཔོན་ཕྱོགས་ཀྱི་གླང་པོས་མཛད་པའི་ཚད་མ་ཀུན་ལས་བཏུས་པ་དང་། མངོན་རྟོགས་རྒྱན། དབུ་མ་འཇུག་གཉིས་སོགས་ཀྱི་གཞུང་རྒྱུགས་སྤྲད།

སྤྱི་ལོ2008ལོར་རིག་གནས་ཡར་སྤེལ་ལོ་དེབ་གཉེར་ནས་བགྲང་བྱ་བཅུ་འཁོར་བའི་རྩོམ་རིག་ཚོགས་འདུ་རྨ་ཆུ་རྫོང་ནས་ཚོགས། ཀན་ལྷོ་ཁུལ་རྩོམ་རིག་ལྷན་ཚོགས་དང་། ཀན་ལྷོ་ཁུལ་ཟླ་ཟེར་རྩོམ་སྒྲིག་ཁང་གཉིས་ཀྱི་གཙོ་འགན་པ། རྨ་ཆུ་རྫོང་གི་འགོ་ཁྲིད་པ། བོད་ཀྱི་སློབ་གསོ་བ། དགེ་རྒན་ཆེན་མོ། རྩོམ་པ་པོ་སོགས་ཞིང་ཆེན་གསུམ་ནས་ཕེབས་པའི་དཔྱད་བརྗོད་པ་མང་པོས་རིག་གནས་ཡར་སྤེལ་ལོ་དེབ་ཀྱི་བྱ་བའི་གྲུབ་འབྲས་ལ་གཟེངས་བསྟོད་མི་དམན་པ་གནང་། རིག་གནས་ཡར་སྤེལ་རྩོམ་སྒྲིག་ཁང་གིས་ཀྱང་ལོ་བཅུའི་རྩོམ་ཡིག་བདུན་བརྒྱ་ལྷག་གི་ཁྲོད་འདམས་ཐོན་བྱུང་བའི་རྩོམ་པ་པོ་རྣམས་ལའང་བྱ་དགའ་གྱ་ནོམ་པ་དང་གཟི་བརྗིད་དཔང་ཡིག་ཕུལ།

དཔྱད་རྩོམ་ཚངས་པའི་ཐིག་ཤིང་སོགས་དཔྱད་རྩོམ་སྣ་ཚོགས་དང་། མ་ཧཱ་པཎྜི་ཏ་གྲུབ་དབང་ཞལ་ཤུལ་རིན་པོ་ཆེ་རྗེ་བཙུན་ངག་དབང་བསྟན་པའི་རྒྱ་མཚོའི་རྣམ་ཐར་སོགས་རྣམ་ཐར་ལོ་རྒྱུས་སྐོར།  དག་ཡིག་རིན་ཆེན་མྱུ་གུ་མའི་འབྲུ་འགྲེལ་ཚིག་དོན་ཀུན་གསལ་སོགས་འགྲེལ་རྩོམ་སྐོར། ངག་རིག་རྩེད་འཇོའི་ཟློས་གར་སོགས་བཅད་རྩོམ་དང་ལྷུག་རྩོམ་རང་མོས་གསུམ་གྱི་སྐོར། གཞན་རྩིས་དཀར་ནག་གི་སྐོར་སོགས་ཅུང་མང་པོ་ཞིག་མི་ཚེའི་ཟས་རིན་གྱི་ཚུལ་དུ་བརྩམས་ཡོད་དོ། །

སྤྱི་ལོ2004ལོར་ཀན་ལྷོའི་གསར་འགྱུར་ཁང་གི་ཕུལ་བྱུང་རྩོམ་པ་པོའི་བྱ་དགའ་གནང་། 

སྤྱི་ལོ2004ལོར་གུར་ཀུམ་ཆུན་པོ་རྩོམ་སྒྲིག་ཁང་གིས་རྟིང་སྐུལ་བྱ་དགའ་གནང་། 

སྤྱི་ལོ2004ལོར་རྨ་ཆུ་རྫོང་ཁྲོ་སྨད་ཡུལ་ཚོའི་རྩོམ་པ་པོ་བྱས་རྗེས་ཅན་གྱི་གཟེངས་བསྟོད་བྱ་དགའ་ཐོབ།

སྤྱི་ལོ2008ལོར་ཀན་ལྷོ་ཁུལ་རྩོམ་རིག་ལྷན་ཚོགས་དང་། ཀན་ལྷོ་ཁུལ་ཟླ་ཟེར་རྩོམ་སྒྲིག་ཁང་གཉིས་ཀྱིས་ཕུལ་བྱུང་རྩོམ་སྒྲིག་པའི་བྱ་དགའ་གནང་།

སྤྱི་ལོ2008ལོར་རྨ་ཆུ་རྫོང་རིག་གནས་ཡུལ་སྐོར་ཅུའུ་དང་། རྫོང་དྲིལ་བསྒྲགས་ཁང་གཉིས་ཀྱིས་ཕུལ་བྱུང་རྩོམ་སྒྲིག་པའི་བྱ་དགའ་གནང་།

སྤྱི་ལོ2012ལོར་ལྔ་རིག་ལང་ཚོའི་ལོ་དེབ་ལོ་འཁོར་བཅུའི་གཟེངས་ཐོན་རྩོམ་ཡིག་བྱ་དགའ་ཐོབ།

སྤྱི་ལོ2014ལོར་རྨ་ཡུལ་རྩོམ་སྒྲིག་མཐུན་ཚོགས་སྐབས་དང་པོས་ཕུལ་བྱུང་ལོ་དེབ་ཀྱི་བྱ་དགའ་གནང་། 

དཔྱད་གཞིའི་ཡིག་ཆ།
སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2019-03-21

གསར་སྤེལ་མཁན། :གདུགས་དཀར་རྒྱལ།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།