ཤར་དུང་རི།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

ཤར་དུང་རི།
ཤར་དུང་རི་ནི་སི་ཁྲོན་ཞིང་ཆེན་རྔ་བ་བོད་རིགས་ཆའང་རིགས་རང་སྐྱོང་ཁུལ་ཟུང་ཆུ་རྫོང་གི་ཁོངས་སུ་ཡོད་པའི་གནས་རི་ཞིག་ཡིན། ཤར་དུང་རི་ནི་བོད་རིགས་ས་ཁུལ་གྱི་བན་བོན་གཉིས་ཀྱི་གནས་རི་གྲགས་ཅན་བདུན་གྱི་གྲས་ཤིག་ཡིན་ཞིང་། བོད་སྐད་དུ་ཤར་དུང་རི་ཞེས་འབོད། བོད་བརྒྱུད་ནང་བསྟན་ལྟར་ན་མ་རྒྱུད་བདེ་མཆོག་གི་གནས་རི་ཞིག་ཡིན་ལ། དུས་རབས་བརྒྱད་པའི་ནང་ལོ་ཆེན་བཻ་རོ་ཙ་ནས་གནས་སྒོ་ཕྱེས་པར་གྲགས། མི་ལ་རས་པ་དམ་ཚིག་རྡོ་རྗེ་རི་རྩེར་འགོས་ནས་དར་ལྕོག་བཙུགས་པའི་ལོ་རྒྱུས་ཡོད།
གཞི་རྩའི་གནས་ཚུལ།

བོད་ཡིག་གི་མིང་།
ཟུང་ཆུའི་ཤར་དུང་རི།
རྒྱ་ཡིག་གི་མིང་།
雪宝顶
རིགས་དབྱེ།
གནས་རི།
ས་ཁོངས་ཀྱི་ཁ་པར་ཨང་རྟགས།
0837
གནམ་གཤིས།
མཐོ་སྒང་གནམ་གཤིས།
གནས་ཡུལ།
སི་ཁྲོན་ཞིང་ཆེན་རྔ་བ་ཁུལ་ཟུང་ཆུ་རྫོང་གསེར་མཚོ་ཡུལ་ཚོ།
1 ​གཞི་རྩའི་གནས་ཚུལ།

ཤར་དུང་རིའི་རྒྱ་མཚོའི་ངོས་ལས་མཐོ་ཚད་སྨི5588ཡིན་པ་དང་། ཤར་གྱི་གཞུང་ཐིག103.8°དང་འཕྲེད་ཐིག32.7°དུ་གནས་ཡོད། དེ་ནི་ལྷོ་བྱང་གཉིས་སུ་བརྒྱུད་པའི་རྨིན་ཧྲན་རི་བོའི་ལྷོ་རྒྱུད་ཀྱི་ཆེས་མཐོ་བའི་གངས་རི་ཞིག་ཡིན། རྔ་བ་བོད་རིགས་རང་སྐྱོང་ཁུལ་ཟུང་ཆུ་རྫོང་གི་མངའ་ཁོངས་སུ་ཡོད། ཤར་དུང་རི་ནི་བོད་རིགས་ས་ཁུལ་གྱི་བན་བོན་གཉིས་ཀྱི་གནས་རི་གྲགས་ཅན་བདུན་གྱི་གྲས་ཤིག་ཡིན་ཞིང་། བོད་སྐད་དུ་ཤར་དུང་རི་ཞེས་འབོད། བོད་བརྒྱུད་ནང་བསྟན་ལྟར་ན་མ་རྒྱུད་བདེ་མཆོག་གི་གནས་རི་ཞིག་ཡིན་ལ། དུས་རབས་བརྒྱད་པའི་ནང་ལོ་ཆེན་བཻ་རོ་ཙ་ནས་གནས་སྒོ་ཕྱེས་པར་གྲགས། མི་ལ་རས་པ་དམ་ཚིག་རྡོ་རྗེ་རི་རྩེར་འགོས་ནས་དར་ལྕོག་བཙུགས་པའི་ལོ་རྒྱུས་ཡོད།

2 གནས་འགངས་ཆེན། 

ཁྱད་པར་དུ་གནས་རི་འདི་ལ་སྡོང་པོ་དགུ་འདུས་ཀྱི་ཕ་རྒྱུད་སྐུ་དང་ཞིང་ཁམས་སུ་མཆོག་ལྔ་སྒྲུབ་པའི་གཞལ་ཡས་གསང་ཕུག་སོགས་ཡོད། ཕྱི་ན་ཁ་བའི་དུང་མཆོག་རི། ནང་ན་ཤེལ་གྱི་མཆོད་རྟེན་ལ་ཀུན་བཟང་མཁའ་འགྱིང་དཀར་པོའི་སྐུ། གསང་མཆོག་མཐར་ཐུག་རྒྱལ་པོའི་ལྷ་སུམ་བརྒྱ་དྲུག་ཅུའི་ལྷ་ཚོགས་གནས་ཤིང་། ཕྱོགས་བཞིར་ཤར་གསེར་མཚོ་སྒྲུབ་ཕུག བྱང་ལྗང་ལམ་སྒྲུབ་ཕུག ནུབ་མ་ཏྲིའི་སྒྲུབ་ཕུག ལྷོ་ནུབ་གདམས་ངག་སྒྲུབ་ཕུག་བཅས་དང་། ཤར་ལྷོར་ཇ་རི་རོང་སྟོང་སྐུའི་སྒྲུབ་ཕུག་མཚམས་བཞི་ན་དུར་ཁྲོད་ཆེན་པོ་བཞི་དང་སྒྲུབ་ཆུ་བཞི་སོགས་ཀྱིས་བསྐོར། ཤར་དུང་རིའི་བར་སྐེད་དུ་གནས་པའི་མཛེས་ལྗོངས་གསེར་མཚོ་ནི་འཛམ་གླིང་རང་བྱུང་མཛེས་ལྗོངས་གྲགས་ཅན་གྱི་སྲུང་སྐྱོབ་ཀྱི་གྲས་དང་། རང་རྒྱལ་གྱི་མིང་དུ་གྲགས་པའི་ཡུལ་སྐོར་གནས་མཆོག་ཁྱད་པར་ཅན་སྟེ་སྔོ་སེར་དམར་ལྗང་སོགས་ཐུན་མོང་མ་ཡིན་པའི་ཚོན་མདངས་བཀྲ་བའི་གསེར་མཚོ་དང་གཡུ་མཚོ། དངུལ་མཚོ་སོགས་དུ་མ་གནས་ཡོད། མཛེས་ལྗོངས་ཁུལ་འདི་རྒྱལ་ཁབ་ཀྱི་ཡུལ་སྐོར་གནས་མཇལ་སྒོ་ཕྱེས་ཡོད་ལ། དབྱར་དུས་སུ་ཉིན་རེ་ལ་རྒྱལ་ཕྱི་ནང་གི་ཡུལ་སྐོར་བ་ཁྲི་སྟོང་མང་པོ་ལ་སྣེ་ལེན་བྱེད་ཀྱིན་ཡོད།

3 ཐོན་ཁུངས། 

མཛེས་ལྗོངས་ཁུལ་འདི་ལ་གསེར་དངུལ་ཟངས་ལྕགས་སོགས་རིན་པོ་ཆེའི་རིགས་དང་། ཡུལ་ལུང་གཞན་ནས་དཀོན་པའི་རྩ་ཆེན་གྱི་སྨན་རིགས་སྣ་ཚོགས་འཛོམས་ཏེ། ཨ་ཀ་རུ་དང། སིང་ལྡིང་། སེར་འབྲུ། འོམ་བུ། གུར་གུམ། ཀུ་ཤ ཨུཏྤལ་སྔོན་པོ། དབྱར་རྩྭ་དགུན་འབུ། སྲོ་ལོ་དཀར་དམར་སོགས་དང་། གཞན་བྱ་རིགས་དང་རི་དྭགས་རིགས་རྒྱལ་ཁབ་ཀྱིས་སྲུང་སྐྱོང་རིམ་པའི་སྲོག་ཆགས་གྲངས་ལས་འདས་པ་ཡོད།

4 དགོན་སྡེ་ཁག

མཛེས་ལྗོངས་ཁུལ་འདི་ལ་གོང་འོག་བར་གསུམ་གྱི་ལྷ་ཁང་གསུམ་ཡོད། དེ་སྔར་ལྷ་ཁང་གསུམ་ཀ་གཡུང་དྲུང་བོན་གྱི་དགོན་པ་ཡིན་མོད། ཕྱིས་སུ་དུས་འགྱུར་སོགས་ཀྱི་དབང་གིས་གོང་མ་དེ་རྒྱའི་ཏོ་ཆོའི་ལྷ་ཁང་དུ་བསྒྱུར། བར་མ་བོན་གྱི་ལྷ་ཁང་ངམ་དགོན་པ་དང་། འོག་མ་བསྐྱར་བཞེངས་མ་བྱུང་། ལྷ་ཁང་བར་མ་སྟེ་གསེར་མཚོ་གཡུང་དྲུང་ལྷ་ཁང་དགོན་འདི་སྔོན་ཆད་ནས་རིན་སྤུངས་དགོན་པའི་དགོན་ལག་གམ་བདག་སྐྱོང་བྱེད་བཞིན་ཡོད། མཚོའི་བར་སྐེད་ལ་བོན་གྱི་བླ་ཆེན་སྟག་ལ་མེ་འབར་གྱི་སྒྲུབ་ཕུག་དང་། བོན་ཆོས་དབྱེར་མེད་ཀྱི་མཁས་དབང་ལོ་ཙཱ་བ་ཆེན་མོ་བཻ་རོ་ཙ་ནའི་སྒྲུབ་ཕུག་སོགས་ཡོད་དེ་སྤྱི་ལོ2006ལོར་སི་ཁྲོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི《གནས་ཆེན་ཤར་ཕྱོགས་དུང་རི་དང་དགོན་སྡེ་དུ་མའི་དཀར་ཆག་མཐོང་བ་དོན་ལྡན》ཞེས་པ་ལས་དེ་ནས་མཛེས་ལྗོངས་གསེར་མཚོའི་ཚོན་ལྔའི་མཚོ་འགྲམ་གྱི་འཁྲིས་སུ་གསེར་མཚོའི་གནས་ཁང་ཞེས་པའི་ནང་དུ་དུས་གསུམ་སངས་རྒྱས་ཀྱི་རྡོ་སྐུ་རང་བྱོན་བཞུགས་པར་མ་ཟད། དབུ་གདུགས། རྒྱལ་མཚན། འབྲུག སེང་གེ་སོགས་འབུར་དུ་དོད་པ་ཡ་མཚན་པའི་གཟུགས་བརྙན་སྣ་ཚོགས་ཡོད། ཕུགས་སུ་ཉི་མ་གསུམ་བཞིའི་འགྲོ་ལམ་ཡོད་ཟེར་སྲོལ་འདུག ནང་ལ་གངས་ཆུ་སོགས་ཡོད་ལ་ཆུ་གཞན་དང་མི་འདྲ་བ་དྭངས་ཤིང་བསིལ་བ་སོགས་ཀྱི་ཡོན་ཏན་ལྡན། གཞན་ཡང་ཤར་དུང་རིའི་ནུབ་ཕྱོགས་སུ་གོང་མ་ཁིས། ཁིས་ཞེས་པ་ནི་ལ་འགོའམ་ལ་བཙས་ལྟ་བུ་ལ་གོ། ཞེས་རྒྱ་ནག་གོང་མའི་བླ་སྟེ། དེ་ཡིན་པའི་རྟགས་སུ། རྡོ་རིང་དང་། ཉི་ཟླའི་འཁོར་ལོ། མི་འགྱུར་དྲན་གསོའི་རྟེན་སོགས་སྤྱི་ལོ2002ལོའི་ཟླ་བརྒྱད་པའི་ནང་ལ་གསར་དུ་ས་འོག་ནས་ཐོན། རྡོ་རིང་སོགས་ལ་དེང་དུས་ཞིབ་འཇུག་པ་མང་པོས་ཞིབ་འཇུག་བྱས་མཐར་དེ་དག་ནི་གནའ་བོའི་རྒྱ་ནག་གོང་མ་ཆན་ལུང་དགུང་ལོ་སུམ་ཅུ་རྩ་གྲངས་ཐོན་དུས་བཞག་པར་བདེན་དཔང་བྱས། ཁིས་འདི་ཧ་ཅང་མཐོ་བ་དང་ཆུ་བོ་ཕུག་ཅང་ཞེས་པའི་འབྱུང་ས་སོགས་ཡིན། གཡས་གཡོན་ལ་རྡོ་རིང་གཉིས་ཡོད། དེའི་ངོས་སུ་རྒྱ་ཡིག་གི་ནན་ཝུའུ་ཝོ་མིའི་ཐོ་ཧྥུ་ཞེས་པའི་ཡིག་འབྲུ་བརྐོས་འདུག སྨད་ཟུར་ན་ཕ་བོང་ཆེན་པོ་ཞིག་གི་ངོས་སུའང་གོང་དང་འདྲ་བའི་ཡིག་འབྲུ་དང་། ཡང་ཧོར་ཐུང་ཁུག་ཅེས་པའི་ས་མིང་དེར་མཁར་ཤུལ་རྡོ་ཆག་སོགས་ཡོད། མདུན་ངོས་སུ་མཁར་ཤུལ་ཞིག་ཡོད་པ་དེ་ཧ་ལམ་སྤྱི་ལོ553ལོ་ཡས་མས་སུ་བསྐྲུན་པའི་གནའ་མཁར་ཞིག་ཡིན། སྟེང་དུང་རིའི་ཕྱོགས་ནས་རྫ་རི་ཞྭ་འདྲ་བ་ཞིག་ཡོད་པ་དེ་ནི་གོང་མའི་དབུ་ཞྭ་ཡིན་ཟེར་སྲོལ་ཡོད། རི་རྒྱུད་ལ་གོང་མ་མདའ་ཁ་ཟེར་བ་དེ་གོང་མས་མདའ་འཕངས་རྗེས་ཡིན་ཟེར་སྲོལ་སོགས་འདུག དེ་བཞིན་ཤར་དུང་རི་དང་མཛེས་ལྗོངས་གསེར་མཚོ་ལ། རྩེ་སྐོར་དང་། བར་སྐོར། ཕྱི་སྐོར་བཅས་ཡོད་ལ། སྐོར་ལམ་དེ་དག་ཏུ་སྔོན་བྱོན་རིག་འཛིན་རྣམས་ཀྱི་སྒྲུབ་གནས་དང་བཀའ་རྟགས་སོགས་མང་པོ་ཡོད། ཤར་དུང་རིའི་འཁོར་ལ། བཀའ་བློན་བདུད་གཞོམ་དང་། བཀའ་བློན་སྟག་པོ། བཀའ་བློན་རྒོད་པོ་སྤུན་གསུམ། བཀའ་བློན་ཨ་གླིང་བྲག་དཀར་སོགས་ཡོད་དོ། །


སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:2  སྔ་མའི་པར་གཞི།

ཉེ་ཆར་དག་བཅོས།:2018-08-13

གསར་སྤེལ་མཁན། :གདུགས་དཀར་རྒྱལ།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།