བཀྲ་ཤིས་དཔལ་ལྡན།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

བཀྲ་ཤིས་དཔལ་ལྡན།
བཀྲ་ཤིས་དཔལ་ལྡན་ནི་སྤྱི་ལོ1962ལོར་བོད་ལྗོངས་རིན་སྤུངས་རྫོང་རམ་པ་སྡེ་བའི་རོང་ཁྱིམ་ཕལ་བ་ཞིག་ཏུ་སྐྱེས་ཤིང་། སྤྱི་ལོ1974ལོ་སྟེ་རང་ལོ་བཅུ་གསུམ་ཐོག རིན་སྤུངས་རྫོང་གི་སློབ་འབྲིང་གསར་འཛུགས་ཀྱི་སྐབས་དང་བསྟུན་ནས་ཁོང་ཉིད་སློབ་འབྲིང་འགྲིམ་པའི་སྐལ་བ་ལྡན་མོད། སྤྱི་ལོ1976ལོའི་ཟླ9པར་སློབ་འབྲིང་གི་སློབ་གཉེར་བར་བཅད་དེ། གཞི་རིམ་དུ་དམངས་བཙུགས་སློབ་གྲྭའི་དགེ་རྒན་བྱེད་དུ་སོང་། སྤྱི་ལོ1986ལོའི་བར་སྟེ་ལོ་ངོ་བཅུ་ཡི་རིང་ལ་སློབ་བུ་མང་དུ་བསྐྱངས། ཕྱིས་སུ་ལས་གནས་སྤར་ཏེ་ད་ལྟའི་བར་དུ་གསར་འགོད་པ་དང་རྩོམ་སྒྲིག་པའི་ལས་ཀ་གཉེར། ཚབ་མཚོན་རང་བཞིན་གྱི་བརྩམས་ཆོས་ལ་《ཕལ་བའི་ཁྱིམ་ཚང་གི་སྐྱིད་སྡུག》དང་《རྒྱུད་སྐུད་སྟེང་གི་རྣམ་ཤེས》《དགུན་གཞུང་རིང་མོ》སོགས་ཡོད། ད་ལྟ་ཁོང་གིས་བོད་ལྗོངས་ཉིན་རེའི་ཚགས་པར་ཁང་གི་སྤྱི་ཁྱབ་རྩོམ་སྒྲིག་པ་གཞོན་པ་དང་། མཐོ་རིམ་རྩོམ་སྒྲིག་པ། བོད་ལྗོངས་རྩོམ་པ་པོའི་མཐུན་ཚོགས་ཀྱི་ཀྲུའུ་ཞི། བོད་ལྗོངས་ལོ་ཙཱ་བའི་མཐུན་ཚོགས་ཀྱི་ཚོགས་གཙོ་གཞོན་པ། རྒྱལ་ཡོངས་ཐ་སྙད་བཀས་བཅད་མཁས་དབང་ཚོགས་ཆུང་གི་ཁོངས་མི་སོགས་ཀྱི་འགན་གཅིག་ལྕོགས་སུ་བཞེས་ཡོད།
གཞི་རྩའི་གནས་ཚུལ།

བོད་ཡིག་གི་མིང་།
བཀྲ་ཤིས་དཔལ་ལྡན།
རྒྱ་ཡིག་གི་མིང་།
扎西班典
སྐྱེས་ཡུལ།
བོད་ལྗོངས་རིན་སྤུངས་རྫོང་རམ་པ་སྡེ་བ།
སྐྱེས་ལོ།
སྤྱི་ལོ1962ལོ།
ཚབ་མཚོན་བརྩམས་ཆོས།
《ཕལ་བའི་ཁྱིམ་ཚང་གི་སྐྱིད་སྡུག》
1 ངོ་སྤྲོད། 

བཀྲ་ཤིས་དཔལ་ལྡན་ནི་སྤྱི་ལོ1962ལོར་བོད་ལྗོངས་རིན་སྤུངས་རྫོང་རམ་པ་སྡེ་བའི་རོང་ཁྱིམ་ཕལ་བ་ཞིག་ཏུ་སྐྱེས་ཤིང་། སྤྱི་ལོ1974ལོ་སྟེ་རང་ལོ་བཅུ་གསུམ་ཐོག རིན་སྤུངས་རྫོང་གི་སློབ་འབྲིང་གསར་འཛུགས་ཀྱི་སྐབས་དང་བསྟུན་ནས་ཁོང་ཉིད་སློབ་འབྲིང་འགྲིམ་པའི་སྐལ་བ་ལྡན་མོད། སྤྱི་ལོ1976ལོའི་ཟླ9པར་སློབ་འབྲིང་གི་སློབ་གཉེར་བར་བཅད་དེ། གཞི་རིམ་དུ་དམངས་བཙུགས་སློབ་གྲྭའི་དགེ་རྒན་བྱེད་དུ་སོང་། སྤྱི་ལོ1986ལོའི་བར་སྟེ་ལོ་ངོ་བཅུ་ཡི་རིང་ལ་སློབ་བུ་མང་དུ་བསྐྱངས། ཕྱིས་སུ་ལས་གནས་སྤར་ཏེ་ད་ལྟའི་བར་དུ་གསར་འགོད་པ་དང་རྩོམ་སྒྲིག་པའི་ལས་ཀ་གཉེར། 

2 བརྩམས་ཆོས། 

དུས་རབས་གོང་མའི་ལོ་རབས་བརྒྱད་ཅུ་པ་ནས་འགོ་བཙུགས་ཏེ་རྩོམ་རིག་བརྩམས་ཆོས་སྤེལ་འགོ་ཚུགས་ཏེ་སྔ་རྗེས་སུ《བགྲེས་སོང་ཚེ་རིང་ལ་གོ་འཛོལ་བྱུང་བ》དང་། 《ཕྱི་ཉིན་གྱི་གནམ་གཤིས་དེ་རིང་ལས་ལེགས་པ་ཡོང་ངེས》《རྒྱུད་སྐུད་སྟེང་གི་རྣམ་ཤེས》(རྗེས་སུ་དེང་རབས་ལྷ་མོའི་འཁྲབ་གཞུང་རྡོ་གཞོང་ལའི་དཔྱིད་ཀ་ཞེས་པར་བསྒྱུར་བཟོ་བྱས་ནས་འཁྲབ་གཞུང《རི་མགོ་མཐོན་པོའི་ཉི་མ》 《བྲག་ཆ》)ལ་སོགས་པའི་སྒྲུང་གཏམ་ཐུང་འབྲིང་བཞི་བཅུ་ལྷག་ཙམ་བྲིས་ནས་བོད་རིགས་ཀློག་པ་པོའི་ཁྲོད་དུ་བག་ཆགས་གཏིང་ཟབ་བཞག སྤྱི་ལོ1992ལོར་བོད་ཀྱི་ཁྱིམ་ཚང་ཀུན་གྱིས་ཤེས་པའི་སྒྲུང་གཏམ་རིང་གྲས《ཕལ་པའི་ཁྱིམ་ཚང་གི་སྐྱིད་སྡུག》དཔེ་བསྐྲུན་བྱས་པ་དང་། སྔ་ཕྱིར་བོད་རང་སྐྱོང་ལྗོངས་ཀྱི“ཇོ་མོ་གླང་མའི་རྩོམ་རིག་སྒྱུ་རྩལ་བྱ་དགའ”དང་། ཀྲུང་གོའི་གྲངས་ཉུང་མི་རིགས་རྩོམ་རིག་བྱ་དགའ་སྟེ“རྟ་མཆོག་བྱ་དགའ”རྒྱལ་ཡོངས་རྩོམ་རིག་བྱ་དགའ་སྟེ“ཀྲོང་ཀྲུང་ཝུན་རྩོམ་རིག་བྱ་དགའ”ཞིང་ལྗོངས་ལྔའི་དུས་རབས་གསར་པའི་རྩོམ་རིག་གསར་རྩོམ་བྱ་དགའ་སྟེ་གངས་རྒྱན་བུམ་པའི་བྱ་དགའ་སོགས་ཐོབ།བརྩམས་ཆོས་ལ་ལ་རྒྱ་ཡིག་དང་། དབྱིན་ཡིག་ལ་བསྒྱུར་ཡོད་པ་དང་།  《རི་མགོ་མཐོན་པོའི་ཉི་མ》ཞིང་ལྗོངས་ལྔའི་མཐོ་འབྲིང་བོད་ཡིག་བསླབ་གཞིའི་ནང་བདམས་ཡོད། གཞན་ཡང་སྒྲུང་ཐུང་བདམས་སྒྲིག་《ཕྱི་ཉིན་གྱི་གནམ་གཤིས་དེ་རིང་ལས་ལེགས་པ་ཡོང་ངེས》(སྤྱི་ལོ1991ལོ)དང་། སྒྲུང་འབྲིང་བདམས་སྒྲིག《རྒྱུད་སྐུད་སྟེང་གི་རྣམ་ཤེས》(སྤྱི་ལོ1995ལོ།)ལྷུག་རྩོམ་ཕྱོགས་བསྒྲིགས《ས་སྲོས་ཀྱི་འཆར་སྒོ》(སྤྱི་ལོ2010ལོ།)དོན་བརྗོད་ལྷུག་རྩོམ་རིང་གྲས《དགུན་གཞུང་རིང་མོ》(སྤྱི་ལོ2014ལོ།)སོགས་དཔེ་བསྐྲུན་བྱས། བོད་ཀྱི་དུས་སྐབས་གསར་པའི་རྩོམ་རིག་དར་མ་ཐག་པའི་དུས་སྐབས་སུ་ཁོང་གིས་ད་དུང་རྩོམ་རིག་ཞིབ་འཇུག་ཐད་ལའང་དཔྱད་རྩོམ་ཁ་ཤས་བྲིས་པས་བག་ཆགས་ཟབ་མོ་བྱུང་ཞིང་།དོན་གྲུབ་རྒྱལ་གྱི་བརྩམས་ཆོས་ལ་བརྒྱུད་རིམ་ལྡན་པའི་ཞིབ་འཇུག་གི་དཔྱད་རྩོམ་ཐོག་མ་ཡིན་པའི《དོན་གྲུབ་རྒྱལ་གྱི་བརྩམས་འབྲས་དང་དེས་བོད་ཡིག་གི་དུས་སྐབས་གསར་པའི་རྩོམ་རིག་ལ་ཐེབས་པའི་ཤུགས་རྐྱེན་སྐོར》ཞེས་པ་དང་། 《དུས་སྐབས་གསར་པའི་བོད་ཡིག་བརྩམས་སྒྲུང་ལ་རགས་ཙམ་དཔྱད་པ》ལྟ་བུ་ནི་ད་ལྟའང་ཀློག་པ་པོའི་སེམས་ན་གསལ་པོར་གནས་ཡོད། ཉེ་ཆར་ད་དུང་ཞིབ་འཇུག་སློབ་མ་དང་མཉམ་དུ་ལེགས་འགྲུབ་བྱས་པའི་ཕྱི་རྒྱལ་གྱི་ལེགས་བཤད་གྲགས་ཅན་བསྒྱུར་རྩོམ་《འཇིག་རྟེན་ལུགས་ཀྱི་བསྟན་བཅོས》ཞེས་པ་མི་འགྱངས་པར་བོད་ལྗོངས་མི་དམངས་དཔེ་སྐྲུན་ཁང་ནས་དཔེ་སྐྲུན་བྱེད་གྲབས་ཡོད་པ་རེད། དུས་ད་ལྟའང་སྔར་བཞིན་རྩོམ་རིག་གསར་རྩོམ་གྱི་བྱ་བའི་རྒྱུན་སྐྱོང་བཞིན་ཡོད།

རྩོམ་པ་པོ་བཀྲ་ཤིས་དཔལ་ལྡན་གྱིས་ཆེས་ཐོག་མའི་བརྩམས་ཆོས་སམ་ཀློག་པ་པོ་དག་གི་སྤྱན་སྔར་ཐོག་མར་དྲངས་པའི《བགྲེས་སོང་ཚེ་རིང་ལ་གོ་འཛོལ་བྱུང་བ》ནས་འགོ་བརྩམས་ཏེ། རྩོམ་རིག་གསར་རྩོམ་གྱི་ལམ་ལ་ཆས་ཤིང་། ཁོ་ར་ཁོར་ཡུག་གི་འཚོ་བའི་རྒྱབ་ལྗོངས་དང་དུས་རབས་ཀྱི་རྒྱབ་ལྗོངས་གཞིར་བཟུང་ནས་སྔ་གཞུག་ཕུལ་ཏུ་བྱུང་བའི་བརྩམས་ཆོས་གང་མང་བཀྲམ་མྱོང་ལ། ད་ལྟ་ཀློག་པ་པོ་དག་ལ་ཆེས་ཆ་རྒྱུས་ཡོད་པ་ནི་ཁོའི་ཚབ་མཚོན་བརྩམས་ཆོས《ཕལ་བའི་ཁྱིམ་ཚང་གི་སྐྱིད་སྡུག》དང་《རྒྱུད་སྐུད་སྟེང་གི་རྣམ་ཤེས》 《དགུན་གཞུང་རིང་མོ》སོགས་ཡིན་ལ། རྗོད་བྱེད་ཚིག་གོ་བདེ་ཞིང་སྲོལ་རྒྱུན་གྱི་གཏམ་དཔེ་མང་དུ་བཀོལ་ནས་རྩམ་དྲི་དང་མར་དྲི་ཐུལ་ཞིང་། རྩོམ་པ་པོ་རང་ཉིད་ཆེས་ཆ་རྒྱུས་ཡོད་པའི་ཞིང་འབྲོག་གི་འཚོ་བ་དག་ཤར་མར་བྲིས་ཡོད་ལ། ཁོ་བོའི་བརྩམས་ཆོས་དག་བརྒྱུད་དེ་སྐབས་དེའི་སྤྱི་ཚོགས་འཚོ་བ་ཅི་འདྲ་ཡིན་པ་དང་སྐབས་དེའི་དབུས་གཙང་ཕྱོགས་ཀྱི་སྤྱི་ཚོགས་ཀྱི་རྣམ་པ་ཅི་འདྲ་ཡིན་པ་སོགས། རྩོམ་པ་པོས་བརྩམས་ཆོས་དུ་མ་ལས་ངང་ངམ་ཤུགས་ཀྱིས་མཚོན་ཡོད། ཁོང་གི་སྒྲུང་གཏམ་དང་ལྷུག་རྩོམ། འབོལ་རྩོམ་དག་ཀྱང་སྤྱི་ཚོགས་འཚོ་བའི་ས་ཞིང་གཤིན་པོར་རྐང་བཙུགས་ཏེ་བྱུང་བའི་སྒྱུ་རྩལ་གྱི་འབྲས་བཟང་ཁུར་དུ་དུད་པ་ཞིག་ཡིན་ལ། དབུས་གཙང་གི་ས་ཁུལ་བྱེ་བྲག་པའི་གནའ་དེང་གི་གཏམ་རྒྱུད་བརྗོད་པར་བརྟེན་ནས་བོད་ཀྱི་སྤྱི་ཚོགས་གསར་རྙིང་གི་འཚོ་བར་ཞིབ་བསྡུར་བྱས་ཤིང་། བསམ་བློ་དང་ལམ་ལུགས་གསར་རྙིང་གང་ལ་ཡང་ཕྱོགས་ཞེན་དུ་མ་སོང་བར། དངོས་གཙོ་སྨྲ་བའི་ལམ་ནས་མཚོན་ཡོད། ཁོང་གིས་རང་ལོ་བཅོ་ལྔའི་སྟེང་དམངས་བཙུགས་དགེ་རྒན་གྱི་འགན་བཞེས་པ་ནས་བཟུང་། གསར་རྩོམ་གྱི་ཆར་ཆུ་མི་འདོད་ཐན་པས་སྐམ་མ་མྱོང་། ད་ལྟའི་བར་བརྩམས་ཆོས་བདུན་ཅུ་ལྷག་ཀློག་པ་པོ་དག་གི་མིག་མཐོང་ལག་ཟིན་ཏུ་གྱུར་ཡོད་ལ། ད་སྔའི་བར་ཁོང་གི་བརྩམས་ཆོས་གང་མང་ལ་དཔྱད་པ་གཏོང་མཁན་ཆར་རྗེས་ཀྱི་ཤ་མོ་བཞིན་བརྡོལ་ཡོད་ལ། ད་ལྟའི་དུས་སུའང་ཁོང་གི་རྩོམ་པའི་འདེགས་འཇོག་བཞག་མེད་པར་མུ་མཐུད་དུ་གསར་རྩོམ་བྱེད་བཞིན་པའི་སྒང་ཡིན་པས། ང་ཚོས་མཉམ་དུ་ཁོང་ཉིད་ཀྱི་དེ་ལས་ལྷག་པའི་བརྩམས་ཆོས་དུ་མ་ལ་ཆར་འདོད་བྱེའུ་ཚུལ་དུ་སྒུག་པར་བྱའོ། ། 

མིག་སྔར་ཁོང་གིས་བོད་ལྗོངས་ཉིན་རེའི་ཚགས་པར་ཁང་གི་སྤྱི་ཁྱབ་རྩོམ་སྒྲིག་པ་གཞོན་པ་དང་། མཐོ་རིམ་རྩོམ་སྒྲིག་པ། བོད་ལྗོངས་རྩོམ་པ་པོའི་མཐུན་ཚོགས་ཀྱི་ཀྲུའུ་ཞི། བོད་ལྗོངས་ལོ་ཙཱ་བའི་མཐུན་ཚོགས་ཀྱི་ཚོགས་གཙོ་གཞོན་པ། རྒྱལ་ཡོངས་ཐ་སྙད་བཀས་བཅད་མཁས་དབང་ཚོགས་ཆུང་གི་ཁོངས་མི་སོགས་ཀྱི་འགན་གཅིག་ལྕོགས་སུ་བཞེས་ཡོད།

སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2018-04-03

གསར་སྤེལ་མཁན། :བསེ་ཆང་རྡོ་རིན།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།