རི་དྭགས་རྒྱལ་པོ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

རི་དྭགས་རྒྱལ་པོ།
《རི་དྭགས་རྒྱལ་པོ》ཞེས་པའི་འགུལ་རིས་གློག་བརྙན་འདི་ནི་འཁྲབ་ཁྲིད་པ་ལུའོ་ཅེ•ཨའེ་ལུ་སི་དང་ལོའུ་པོ•མིང་ཁུ་ཧྥུའུ་གཉིས་ཀྱིས་མཉམ་འབྲེལ་སྒོས་འཁྲབ་ཁྲིད་བྱས་ཤིང་། མཱ་ཞིའུ•པུའུ་ལུའོ་ཏུ་ལི་ཁུ་དང་ཀྲན་མུའུ་སུ•ཨུ་ཨར•ཆུང་སི། ཅེ་རུའེ་སྨི•ཨའེ་ཨུན་སི། ནེ་སེན•ལེན་ཨུན་སོགས་ཀྱིས་གཙོ་འཁྲབ་དང་སྐད་སྦྱོར་བྱས་པ་ཞིག་ཡིན། གློག་བརྙན་འདིའི་ནང་དུ་རྒྱལ་སྲས་ཆུང་ཆུང་ཞིན་པཱ་ཞེས་པར་གྲོགས་པོའི་རོགས་རམ་གྱི་འོག་ཏུ། དཀའ་བ་བརྒྱ་ཕྲག་དང་དུ་བླངས་ནས་མཐའ་མཇུག་རི་དྭགས་རྒྱལ་པོར་གྱུར་བའི་གཏམ་རྒྱུད་བརྗོད་ཡོད།
གཞི་རྩའི་གནས་ཚུལ།

བོད་འགྱུར་མིང་།
རི་དྭགས་རྒྱལ་པོ།
མ་བརྙན་མིང་།
The Lion King
རྒྱ་འགྱུར་མིང་།
狮子王
རྒྱལ་ཁབ།
ཨ་རི།
སྐད་རིགས།
དབྱིན་སྐད།
འཁྲབ་ཁྲིད་པ།
ལུའོ་ཅེ•ཨའེ་ལུ་སི། ལོའུ་པོ•མིང་ཁུ་ཧྥུའུ།
གཙོ་འཁྲབ་པ།
མཱ་ཞིའུ•པུའུ་ལུའོ་ཏུ་ལི་ཁུ། ཀྲན་མུའུ་སུ•ཨུ་ཨར•ཆུང་སི། ཅེ་རུའེ་སྨི•ཨའེ་ཨུན་སི། ནེ་སེན•ལེན་ཨུན།
འགྲེམ་དུས།
1994-06-24
བརྙན་རིགས།
གཏམ་རྒྱུད། སྤྲོ་གར། འགུལ་རིས། ཁྱིམ་ཚང་། གླུ་གར།
ཡུན་ཚད།
སྐར་མ89
1 ནང་དོན་མདོར་བསྡུས།

ཞིན་པཱ་ནི་རི་དྭགས་རྒྱལ་ཁབ་ཀྱི་རྒྱལ་སྲས་ཡིན་ཞིང་། ཁོའི་ཡབ་རྒྱལ་ཁབ་དེའི་རྒྱལ་པོ་རེད། འོན་ཏེ་ཨ་ཁུས་རྟག་ཏུ་རང་ཉིད་ཀྱིས་རྒྱལ་སྲིད་འཛིན་པར་རེ་ཞིང་ལྟོས། གལ་ཏེ་རྒྱལ་སྲིད་ལག་ཏུ་ཐེབས་དགོས་ན། ངེས་པར་དུ་རྒྱལ་སྲས་མེད་པ་བཟོ་དགོས། དེར་བརྟེན་ཨ་ཁུས་རྒྱུན་པར་དོན་དག་ག་གེ་མོ་ཞིག་ལ་ཁ་གཡར་ནས་རྒྱལ་སྲས་ཐག་རིང་པོར་འགྲོ་རུ་བཅུག་པ་དང་། དེ་ནས་གོ་སྐབས་བཙལ་ཏེ་གསོད་རྩིས་བྱེད་ཀྱི་ཡོད། སྟབས་མ་ལེགས་པ་ཞིག་ལ། ཡབ་རྒྱལ་པོ་དུས་ཐོག་དུ་སླེབས་ནས་རྒྱལ་སྲས་སྲོག་ཉེན་ལས་ཐར་བར་བྱས།

ཇུས་ངན་མང་པོའི་འོག མཐར་ཡབ་རྒྱལ་པོ་ཨ་ཁུས་བསད་པ་མ་ཟད། ད་དུང་མ་ཡིན་ཡིན་ཁུལ་གྱིས་རྒྱལ་སྲས་ཕྱིར་ཐོན་དགོས་པའི་ཁ་ཏ་བྱས་པ་དང་ཆབས་ཅིག་དམར་གསོད་མཁན་བཏང་ནས་བཀྲོང་རྩིས་བྱས། རྒྱལ་སྲས་ཕྱིར་བྲོས་བྱེད་པའི་བརྒྱུད་རིམ་ནང་། སྤྱང་གྲུང་འཛོམས་ལ་སེམས་བཟང་ཅན་གྱི་རོགས་ཟླ་ཏེང་མན་དང་ཕེང་ཕེང་གཉིས་ལ་ཕྲད། ཁོ་གཉིས་ཀྱིས་རྒྱལ་སྲས་ཆུང་ཆུང་འདི་བརྗིད་ཉམས་ཆེ་བའི་སེང་གེ་སྟོབས་ཆེན་ཞིག་ཏུ་བསྒྱུར་རོགས་བྱས་པ་མ་ཟད། རང་ཉིད་ལ་དབང་བའི་རྒྱལ་སྲིད་དེ་ལེན་དགོས་པའི་ཁ་ཏ་ཡང་མང་དུ་བྱས། དེ་ནས་རྒྱས་སྲས་ཀྱིས་རང་གི་རྒྱལ་ཁབ་སླར་གསོ་བྱེད་པའི་འཐབ་རྩོད་ཁྲོད་ཆེས་ངོ་མའི་ཕོ་རབ་བློ་སྟོབས་དང་། འགན་འཁྲིའི་བསམ་པ་དེའང་རིམ་གྱིས་རྟོགས་པར་གྱུར།

2 དཔྱད་གཏམ།

འགུལ་རིས་གློག་བརྙན་གྱི་ལོ་རྒྱུས་ཁྲོད《རི་དྭགས་རྒྱལ་པོ》ཞེས་པ་དེ་ནི་ཧ་ཅང་རླབས་ཆེ་བའི་བརྩམས་ཆོས་ཤིག་རེད་ལ། དེས་ང་ཚོར་བྱིན་པའི་སེམས་ཚོར་དང་བློ་སྐྱེད་ནི་ནམ་ཡིན་ཡང་བརྗེད་པར་དཀའ། 《རི་དྭགས་རྒྱལ་པོ》ཞེས་པ་སྤྱི་ལོ1994ལོའི་ཟླ6པའི་ཚེས24ཉིན་ཨ་རིའི་ཁྲོམ་རྭའི་ནང་ཐོན་ཅིང་། གསོན་ཉམས་ལྡན་པའི་སྲོག་ཆགས་ཀྱི་གཟུགས་བརྙན་དང་། མི་སེམས་སྒུལ་བའི་མཛེས་ལྗོངས། རྣ་བར་འཇེབས་པའི་རོལ་དབྱངས། ད་དུང་ཡིད་སྐྱོམ་པར་བྱེད་པའི་བརྩེ་དུང་དང་འགན་འཁྲིའི་སྐོར་གྱི་སྒྲུང་གཏམ་ནང་དོན་བཅས་ཀྱིས་གཟིགས་མོ་བ་མང་པོའི་ཡིད་སེམས་འཕྲོག་པར་བྱས་ཡོད། གློག་བརྙན་དེས་རིན་ཐང་གི་གོང་ཚད་ཐད་ལེགས་འགྲུབ་ཧ་ཅང་ཆེན་པོ་བྱུང་བ་མ་ཟད། ད་དུང་ངེད་ཚོའི་འགུལ་རིས་ཀྱི་གློག་བརྙན་ལ་ཤུགས་རྐྱེན་ཆེན་པོ་ཐེབས་ཡོད།

《རི་དྭགས་རྒྱལ་པོ》ཞེས་པའི་ཐོག་མའི་མིང་ནི《ནགས་ཁྲོད་ཀྱི་རྒྱལ་པོ》ཡིན་ལ། དེའི་ནང་ཧྥེ་གླིང་རྩྭ་ཐང་སྟེང་གི་སྲོག་ཆགས་རྒྱལ་ཁབ་ཀྱི་འཚོ་བ་ཞིབ་འབྲི་བྱས་ཡོད། དོན་དངོས་ཐོག་གློག་བརྙན་དེའི་བརྗོད་གཞི་རྒྱལ་ཁབ་དང་རིག་གནས་གང་ཞིག་གི་ཁྱབ་རྒྱ་ལས་འགོངས་ཏེ་། ཆེས་གཏིང་ཟབ་པའི་གོ་དོན་ཡོད་པ་ནི། འགྲོ་དྲུག་སེམས་ཅན་གྱི་འཁོར་བ། སྐྱེས་དངོས་ཡོངས་ཀྱི་ཤི་གསོན། ཐམས་ཅད་ཀྱི་ཐམས་ཅད་རང་བྱུང་ཆོས་ཉིད་དང་མཐུན་དགོས་པ་དེ་ཡིན། དགའ་ཞེན་དང་འཚར་ལོངས། ཚེ་སྲོག་ལ་སོགས་དོན་སྙིང་ལྡན་པའི་དངོས་པོ་དེ་རྣམས་ཧྥེ་གླིང་གི་ཐང་ཆེན་སྟེང་ས་ལེ་སྦྲམ་དང་འདྲ་བར་ནམ་ཡང་འོད་ཆེམ་ཆེམ་བྱེད།

《རི་དྭགས་རྒྱལ་པོ》ཁྲོམ་རྭའི་ནང་ཐོན་པའི་སྐབས། གཟིགས་མོ་བ་ཁྲི་ཕྲག་དུ་མའི་དགའ་བསུ་ཤུགས་ཆེན་པོ་ཐོབ་ཡོད་ཅིང་། དེས་ཨ་རིའི་འགུལ་རིས་ཀྱི་གློག་བརྙན་ལ་ཤུགས་རྐྱེན་གཏིང་ཟབ་མོ་ཐེབས་ཡོད། གློག་བརྙན་དེར་གྲུབ་འབྲས་ཧང་སང་དགོས་པ་དེ་འདྲ་ཐོབ་དོན་ནི། སྔོན་དུ་བཤད་ཟིན་པའི་མཛེས་ལྗོངས་དང་རོལ་དབྱངས། སྒྲུང་གཏམ་གྱི་བརྗོད་བྱ་ལ་སོགས་ཕར་ཕུད། ཆེས་མང་བ་ནི་དེས་ཤུགས་སུ་བརྗོད་པའི་ཧ་ཅང་གཏིང་ཟབ་པའི་མི་ཆོས་སྐོར་གྱི་གནད་དོན་དང་ཚེ་སྲོག་གི་ཆོས་ཉིད་ལ་མནོ་བསམ་བྱས་ཡོད་པ་དེ་རང་རེད།

ཞིན་པཱ་འཁྲབ་སྟོན་པ་གཙོ་བོ་ཞིག་ཡིན་པའི་ཐད་ནས། ལྷན་སྐྱེས་ཀྱིས་སྤྱོད་པ་ཤིན་ཏུ་ནས་རྩུབ་པོ་ཡོད། འོན་ཏེ་ཁོ་འཚར་ལོངས་བྱུང་བའི་རྒྱུད་རིམ་ཁྲོད་ལུས་སེམས་གཉིས་ཀ་ལ་འགྱུར་ལྡོག་ཆེན་པོ་བྱུང་པ་རེད། བྱིས་པའི་དུས་ཁོས་གང་ཡང་མི་ཤེས་པའི་དབང་གིས་ཨ་ཁུའི་བསླུ་ཁྲིད་དང་དགྲ་འཛིན་གྱི་བསམ་པ་ལ་དོ་སྣང་གང་ཡང་བྱུང་མེད། དེ་ནས་རང་ཉིད་ཀྱི་ཕ་བསད་པའི་ཉེས་པ་ཁྱེར་ནས་གང་སར་འཁྱམས་པ་དང་། ལུས་སེམས་གཉིས་ཀ་ཧ་ཅང་གིས་ཐང་ཆད་པའི་སྐབས། གྲོགས་པོའི་བརྩེ་སེམས་ལས་ཁོ་པར་འཚོ་བའི་རེ་བ་དང་སྟོབས་ཤུགས་རྙེད།

གྲོགས་པོ་གཉིས་ཀྱི་རོགས་པའི་འོག་ཁོ་པས་ཚེ་སྲོག་གི་སྤྲོ་སྣང་དང་ལ་རྒྱའི་རིན་ཐང་དེ་རྟོགས་པ་མ་ཟད། དེ་ལས་ལྷག་པ་ཞིག་ལ། རང་ཉིད་ཀྱི་ཆུང་འདྲིས་བྱམས་པ་དང་སླར་ཡང་ངོ་འཕྲད་བྱུང་བ་ལས་ཁོ་པས་ཨ་ཁུའི་བྱ་ལུགས་ངན་པ་དེ་རྣམས་ཤེས་འཕྲལ། དཔའ་ངར་ལྡན་པ་དང་གནས་ལུགས་ཤེས་མཁན་ཞིག་ཏུ་གྱུར་ནས། མཐའ་མ་རང་གི་ཨ་ཁུ་དང་འཐབ་པ་ལས་རྒྱལ་བའི་ཉམས་འགྱུར་དེ་ཉིད་མངོན་པར་བྱས་ཡོད་ལ། དེ་ནི་ང་ཚོ་མི་སོ་སོ་མཚར་ལོངས་བྱུང་བའི་གོ་རིམ་དང་ཧ་ཅང་འདྲ་པོ་འདུག

གལ་ཏེ་ང་ཚོར་མགོ་སྐོར་ཐེབས་མྱོང་མེད་ཚེ། བསླུ་ཁྲིད་བྱས་པའི་མྱོང་བ་དེ་ཉིད་རྟོགས་མི་འགྱུར་ཅིང་། གལ་ཏེ་ཆར་རླུང་ཁྲོད་བརྒྱུད་མ་མྱོང་ན། ཡང་བརྩེ་སེམས་ཀྱི་དྲོ་སྐྱིད་དང་རིན་ཐང་ནི་ག་ལ་རྟོགས། གལ་ཏེ་ལས་དབང་དང་འཐབ་རྩོད་མ་བྱས་ཚེ། སུས་རང་ཉིད་ཀྱི་ནུས་པ་དེ་ཉིད་ཤེས་ཐུབ།

གཅིག་བྱས་ན། ང་ཚོའི་མི་ཚེར་འཚར་ལོངས་ཀྱི་དཀའ་ངལ་དང་ཕམ་ཁ་དེ་འདྲ་ཞིག་དགོས་ངེས། དེ་འདྲ་བྱས་ཚེ། ང་ཚོས་གཞི་ནས་འཚར་ལོངས་ཀྱི་གལ་ཆེན་རང་བཞིན་དང་ཚེ་སྲོག་གི་ཁྱད་དུ་འཕགས་པའི་རིན་ཐང་དེ་ཉིད་ཤེས་ཐུབ།

གློག་བརྙན་དེས་ང་ཚོར་བློ་སྐྱེད་བྱུང་བར་བྱས་པ་ནི་གོང་གི་དེ་ཚོ་ལས་དེ་བས་མང་བ་མཆིས། འོན་ཀྱང་གློག་བརྙན་རང་ངོས་སམ་ཡང་ན་རྙོག་འཛིང་གི་མི་ཚེ་གང་གི་ཐད་ནས་ཀྱང་ང་རང་ལ་སེམས་འགུལ་ཆེན་པོ་ཐེབས་བྱུང་། མ་འོངས་པའི་མདུན་ལམ་དུ། གློག་བརྙན་གྱིས་ང་ཚོར་སྦྱིན་པ་ནི་སེམས་འགུལ་དང་མྱོང་ཚོར་ཙམ་གྱིས་མ་ཁྱབ་པར། གལ་ཏེ་གོ་སྐབས་ལེགས་པོ་རེ་བྱུང་ན། དེའི་ཁྲོད་ཀྱི་ཐབས་ཤེས་དང་དོན་སྙིང་བེད་སྤྱོད་བྱས་ནས་འཚོ་བའི་ཁྲོད་ཀྱི་གནད་དོན་ཐག་གཅོད་བྱེད་པ་ནི་བསམ་བློ་ལེགས་པོ་ཞིག་རེད་སྙམ། 

སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2017-01-19

གསར་སྤེལ་མཁན། :དཔལ་མགོན་ཚེ་རིང་།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།