མཆོད་སྡོང་འཛམ་གླིང་རྒྱན་གཅིག་གི་དཀར་ཆག
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

མཆོད་སྡོང་འཛམ་གླིང་རྒྱན་གཅིག་གི་དཀར་ཆག
མཆོད་སྡོང་འཛམ་གླིང་རྒྱན་གཅིག་རྟེན་གཙུག་ལག་ཁང་དང་བཅས་པའི་དཀར་ཆག་ཐར་གླིང་རྒྱ་མཚོར་བགྲོད་པའི་གྲུ་རྫིངས་བྱིན་རླབས་ཀྱི་བང་མཛོད་ཅེས་བྱ་བ་འདི་ནི་སྡེ་སྲིད་སངས་རྒྱས་རྒྱ་མཚོས་བརྩམས་པ་ཞིག་ཡིན།
གཞི་རྩའི་གནས་ཚུལ།

རྒྱ་ཡིག་གི་མིང་།
《南瞻部州唯一庄严目录》
མཚན་རྒྱས་པ།
མཆོད་སྡོང་འཛམ་གླིང་རྒྱན་གཅིག་རྟེན་གཙུག་ལག་ཁང་དང་བཅས་པའི་དཀར་ཆག་ཐར་གླིང་རྒྱ་མཚོར་བགྲོད་པའི་གྲུ་རྫིངས་བྱིན་རླབས་ཀྱི་བང་མཛོད།
རྩོམ་པ་པོ།
སྡེ་སྲིད་སངས་རྒྱས་རྒྱ་མཚོ།
དཔེ་སྐྲུན་ཁང་།
བོད་ལྗོངས་མི་དམངས་དཔེ་སྐྲུན་ཁང་།
པར་སྐྲུན་གྱི་ལོ།
སྤྱི་ལོ1990ལོའི་ཟླ4པ།
1 རྩོམ་པ་པོ།

སྡེ་སྲིད་སངས་རྒྱས་རྒྱ་མཚོ་ནི་ཉང་བྲན་གྲོང་སྨད་གཞིས་ཀར་ཡབ་ཨ་སུག་དང་ཡུམ་བུ་ཁྲིད་རྒྱལ་མོ་གཉིས་ཀྱི་སྲས་སུ་སྤྱི་ལོ1653ལོར་འཁྲུངས། རྒྱལ་དབང་ལྔ་བ་སོགས་ལས་ནང་བསྟན་དང་ཆབ་སྲིད་སྐྱོང་ལུགས་སོགས་ལ་སྦྱངས། སྤྱི་ལོ1679ལོར་རྒྱལ་དབང་ལྔ་བ་ཆེན་པོའི་བཀའ་བཞིན་སྡེ་སྲིད་དུ་བསྐོས་ཏེ་གང་མཛད་རྒྱལ་དབང་གི་མཛད་པ་དང་ཁྱད་པར་མེད་ཚུལ་བསྒྲགས། ལོ་ཉེར་དྲུག་གི་རིང་སྡེ་སྲིད་བྱས། སྲིད་འཛིན་གྱི་ལས་ཁང་གང་མང་བཙུགས་ཏེ་ཁྲིམས་ཡིག་དྭངས་ཤེལ་མེ་ལོང་གསར་དུ་བརྩམས། སྤྱི་ལོ1690ལོར་རྩེ་ཕོ་བྲང་དམར་པོ་བཞེངས་འགོ་བཙུགས། ལྕགས་པོ་རི་བཻཌཱུརྱ་འགྲོ་ཕན་རིག་བྱེད་གླིང་སོགས་དགོན་གནས་ཆེ་ཆུང་ཁག་གང་མང་ཕྱག་བཏབ། རྒྱུད་བཞིར་ཞུ་དག་མཛད་དེ་དཔར་སྐྲན་མཛད། གསུང་རྩོམ་སྐོར་ལ་པོད་བཅུ་གཅིག་ཙམ་བཞུགས། སྤྱི་ལོ1682ལོར་རྒྱལ་དབང་ལྔ་བ་ཆེན་པོ་ཞི་བར་གཤེགས་པ་ནས་གསང་རྒྱ་ཡུན་རིང་བྱས། སྤྱི་ལོ1697ལོར་གསང་རྒྱ་གྲོལ་ནས་ཚངས་དབྱངས་རྒྱ་མཚོ་སྲིད་ཁྲིར་མངའ་གསོལ་བ་སོགས་སྐུ་ཚེ་ཧྲིལ་བོར་བསྟན་འགྲོའི་དོན་ཁོ་ན་མཛད། དགུང་ལོ་ང་གསུམ་པ་སྤྱི་ལོ1705ལོར་ལྷ་བཟང་ཁཱང་གིས་བཀྲོངས། སྲས་གསུམ་དང་སྲས་མོ་གཅིག་ཡོད།

ཁོང་དགུང་གྲངས་ཉེར་བདུན་དུ་སོན་པ་ས་ལུག་སྤྱི་ལོ1679ལོའི་ཟླ་བ་དྲུག་པའི་ཚེས་དྲུག་ཉིན་རྒྱལ་དབང་ལྔ་པ་ཆེན་པོས་ཁོང་སྡེ་སྲིད་དུ་བསྐོས་ཐོག་བཅའ་ཡིག་ཕྱག་རྗེས་ཀྱིས་བརྒྱན་པ་བསྩལ་ཏེ་བོད་སེར་སྐྱ་ཚང་མར་ཤེས་སུ་བཅུག བཅའ་ཡིག་འདི་ནི་ད་ལྟ་པོ་ཏ་ལའི་སུམ་སྐས་མགོར་བྲིས་པ་དེ་ཡིན། སྡེ་སྲིད་སྔོན་མ་ལྟར་སྲིད་ཁོ་ན་འཛིན་པ་མིན་པར་རྒྱལ་དབང་ལྔ་པ་ཆེན་པོའི་བཀའ་ལྟར་ཆོས་དང་འཇིག་རྟེན་ཀུན་ལ་བླ་མའི་རྗེས་འཛིན་ལེགས་པར་མཛད། ཁོང་སྡེ་སྲིད་ཀྱི་གོ་སར་བཞུགས་ནས་ལོ་ལྔའི་བར་རྒྱལ་དབང་ལྔ་པ་ཆེན་པོ་འཚོ་ཞིང་བཞུགས་ཡོད་སྟབས། ཆོས་སྲིད་གང་ཐད་རྒྱལ་དབང་ལྔ་པ་ཆེན་པོར་བསླབ་སྟོན་ཞུས། དགའ་ལྡན་ཕོ་བྲང་བཙུགས་ནས་རིང་པོར་མ་ལོན་པའི་དགའ་ལྡན་ཕོ་བྲང་གི་སྲིད་དབང་སྲ་བརྟན་དང་འཐུས་ཚང་བར་མཛད། གཙང་པ་སྡེ་སྲིད་སྐབས་ཀྱི་ཁྲིམས་ཡིག་ལ་གཞིར་བཟུང་ནས《ཁྲིམས་ཡིག་ཞལ་ལྕེ་བཅུ་གཉིས་པ》ཟུར་རྒྱན་དང་བཅས་གཏན་ལ་ཕབས། ས་སྐྱ་འགྲོ་མགོན་ཆོས་རྒྱལ་འཕགས་པའི་དུས་ཀྱི་ཆེན་པོར་འོས་པའི་ལས་ཚན་བཅུ་གསུམ་དུ་གྲགས་པ་དེ་ཉིད་འཕེལ་རྒྱས་སུ་བཏང་སྟེ་སྲིད་འཛིན་སྡེ་ཁག་གི་ལས་ཁུངས་ཁག་མང་དུ་བཙུགས། ལས་ཁུངས་དེ་དག་གི་བྱེད་སྒོའི་རྣམ་གྲངས་ཞིབ་གསལ་འཁོད་པའི་བཅའ་ཁྲིམས་སྒྲིག་ཡིག《བླང་དོར་གསལ་བར་སྟོན་པའི་དྭངས་ཤེལ་མེ་ལོང》ཞེས་པ་གསར་དུ་བརྩམས། བོད་ཁུལ་རྫོང་གཞིས་ཁག་གི་འབངས་མིའི་ཐེམ་ཐོ་ཞིབ་བཤེར་དང་། རྫོང་གཞིས་གནད་ཆེ་ཆུང་གི་རིམ་པའི་ཁྱད་པར། ཡུལ་ཐོན་ལ་དཔག་པའི་ཁྲལ་བསྡུའི་གཞུང་ཡིག་གསར་བཀོད་ཐོག་ཡོང་འབབ་སྡུད་མཁན་དང་། དཔྱ་ཁྲལ་སྡུད་པོ་བཀར་རྒྱ་བ་སོགས་གསར་པ་བསྐོས། ས་གནས་གལ་ཆེའི་རིགས་ལ་ཆོས་རྫོང་ཟུང་འབྲེལ་གྱི་སྲིད་དབང་ལམ་ལུགས་གསར་དུ་བཙུགས། ལས་ཁུངས་སོ་སོར་རྟག་པར་བསྐོར་གཡེང་ཞིབ་འཇུག་སྒོ་ནས་ཆོས་སྲིད་འཕེལ་ཐབས་ལ་ཐུགས་བརྩོན་མཛད། དབུས་གཙང་དྭགས་ཀོང་སོགས་སུ་མི་དཀྱུས་མའི་ཟོལ་གྱིས་ཆོས་སྲིད་བསྐྱངས་ཚུལ་ལ་འབངས་ཁྲོད་ཀྱི་གླེང་བརྗོད་ཇི་ཡོད་རྟོག་ཞིབ་ཏུ་ཕེབས་པ་སོགས་མཁས་མཛངས་ལྡན་པའི་བྱ་བ་རྒྱ་ཆེན་མཛད། ལ་དྭགས་རྒྱལ་པོ་སེང་གེ་རབ་བརྟན་གྱིས་ཚུར་རྒོལ་གྱི་དཔུང་ཚོགས་ལྷགས་པ་ཚར་གཅོད་པའི་ཆེད་དུ། དགའ་ལྡན་ཚེ་དབང་དཔུང་ཚོགས་བཅས་པ་མངགས་ཏེ་དགྲ་སྡེ་ཚང་མ་ཕམ་པར་བྱས་ཤིང་། མངའ་རིས་སྐོར་གསུམ་སླར་ཡང་ཆབ་འོག་ཏུ་བཅུག་པ་སོགས་མཛད་རྗེས་བླ་ན་མེད་པ་བཞག

རབ་བྱུང་བཅུ་གཉིས་པའི་ལྕགས་སྦྲུལ་སྤྱི་ལོ1701ལོ་ལ་བསྟན་འཛིན་དབང་རྒྱལ་འདས་པར་བརྟེན་ལྷ་བཟང་ཁང་དབུས་སུ་བོས་ཏེ་བོད་སྡོད་སོག་རྒྱལ་གྱི་གོ་སར་བཞག ལྷ་བཟང་གིས་སོག་རྒྱལ་གྱི་གོ་མིང་བཟུང་ནས་སྡེ་སྲིད་སངས་རྒྱས་རྒྱ་མཚོར་རྒོལ་བའི་འཁྲུག་རྩོད་ཁོ་ན་བསླངས། ཁོས་སྡེ་སྲིད་འདིས་རྙིང་མ་གཙོ་བོར་བྱས་པ་ལས་དགེ་ལྡན་པར་དགའ་ཞེན་མི་འདུག་ཅེས་དང་། བསྟན་འཛིན་དབང་རྒྱལ་དུག་གིས་བསད་པ་རེད་ཟེར་བ་སོགས་འཆལ་གཏམ་སྣ་ཚོགས་ལ་བརྟེན་ནས་སེ་འབྲས་དགེ་གསུམ་དང་སྡེ་སྲིད་བར་དབྱེན་དཀྲུགས་བྱས། ཐ་ན་ལྷ་བཟང་གིས་ལྐོག་གསོད་པ་འགའ་ཞིག་བཏང་ནས་སྡེ་སྲིད་ཀྱི་དྲུང་འཁོར་དམར་བསད་བཏང་བ་སོགས་གདུག་རྩུབ་ཀྱི་བྱ་ངན་མང་པོ་བརྩམས་ཏེ་དབུས་ལྷ་ལྡན་གྱི་གནས་ཚུལ་ཧ་ཅང་མི་བདེ་བར་གྱུར། རབ་བྱུང་བཅུ་གཉིས་པའི་ཤིང་བྱ་ལོའི་སྨོན་ལམ་ཆེན་མོའི་སྐབས་སུ་བདེ་འཇགས་དང་། ལྷ་བཟང་མི་ངན་འདི་དབུས་ནས་བསྐྲད་པའི་ཆེད་དུ། ཏཱ་ལའི་ཚངས་དབྱངས་རྒྱ་མཚོས་གཙོ་བོར་མཛད་པའི་བླ་མ་ལས་སྣེ། མཆོད་ཡོན། སྦྱིན་བདག་ཆེ་དགུ་འཛོམ་པའི་དབུས་སུ། སྡེ་སྲིད་ནས་སྲིད་ཀྱི་འགན་དབང་དགོངས་ཞུ་མཛད། ཁོང་གི་རིགས་སྲས་ངག་དབང་རིན་ཆེན་སྡེ་སྲིད་དུ་བསྐོས། ལྷ་བཟང་ཁང་སོག་རྒྱལ་གྱི་གོ་གནས་རང་འཇགས་ཐོག་མཚོ་སྔོན་དུ་བཏེག་ནས་སྡོད་རྒྱུར་ཐག་བཅད། ལྷ་བཟང་ཁང་ལ་སྡེ་སྲིད་བཀྲོངས་ནས་བོད་ཀྱི་རྒྱལ་པོར་འདུག་རྒྱུའི་ཧམ་སེམས་མ་འགྲུབ་པའི་ཐོག་མུ་མཐུད་ནས་དབུས་ལྷ་ལྡན་དུ་བཙན་སྡོད་བྱ་རྒྱུའི་གོ་སྐབས་ཀྱང་ཤོར་བར་བརྟེན། ཁོང་ཁྲོ་གཏིང་ནས་ལངས་ཏེ་མཚོ་ཁར་བཏེག་ཁུལ་གྱི་གཡོ་འཕྲུལ་ལ་བརྟེན་ནས། བྱང་ནག་ཆུར་སླེབས་མ་ཐག་དེ་གར་སོག་དམག་ཡོད་ཚད་ངན་བསྡུ་བྱས། ལྷ་བཟང་གི་སྐྱེ་སྨན་ཚེ་རིང་བཀྲ་ཤིས་ཀྱིས་སྣེ་ཁྲིད་པའི་སོག་དམག་འབོར་ཆེན་སྟོད་ལུང་སྣང་རྩེར་འཛུལ། སྐབས་དེར་སྡེ་སྲིད་སངས་རྒྱས་རྒྱ་མཚོས་དབུས་ལྷ་ལྡན་གྱི་གཙུག་ལག་ཁང་དང་སེ་འབྲས་སོགས་ཀྱི་རྟེན་དང་བརྟེན་པར་བཅས་པ་ལ་བར་ཆད་མི་འབྱུང་བ་དང་། ལྷ་སར་འཁྲུག་ཟིང་མི་ཡོང་བའི་ཆེད་དུ། སྡེ་སྲིད་སྐུ་འཁོར་ཉུང་ཟད་བཅས་གོང་དཀར་རྫོང་དུ་ཕེབས། སོག་དམག་གིས་གནས་ཚུལ་དེ་ཐོས་འཕྲལ་དམག་མང་པོ་གོང་དཀར་དུ་བཏང་། བོད་དམག་གིས་དཔལ་ངར་ཆེན་པོས་འཐབ་ཀྱང་མང་སྣེ་ཉུང་བས་ནོན་མ་ཐུབ་པར་བོད་དམག་བཞི་བརྒྱ་ཙམ་རང་སྲོག་བློས་བཏང་བྱས་ཀྱང་ཕན་པ་མ་བྱུང་བར། རབ་བྱུང་བཅུ་གཉིས་པའི་ཤིང་བྱ་སྤྱི་ལོ1705ལོའི་ཟླ་བ་ལྔ་པའི་ཚེས་བཅུ་བདུན་ཉིན་སོག་པོ་བཙན་འཛུལ་དམག་གི་སྡུག་རྩུབ་འོག་སྡེ་སྲིད་སངས་རྒྱས་རྒྱ་མཚོའི་སྐུའི་མེ་ཏོག་འཐོར་བར་བྱས་སོ། །

ཁོང་གི་བརྩམས་ཆོས་ཀྱི་སྐོར་ལ། 《ཏཱ་ལའི་བླ་མ་སྐུ་ཕྲེང་ལྔ་བའི་གསེར་གདུང་འཛམ་གླིང་རྒྱན་གཅིག་གི་དཀར་ཆག་ཐར་གླིང་རྒྱ་མཚོར་བགྲོད་པའི་གྲུ་རྫིངས》《ཏཱ་ལའི་བླ་མ་སྐུ་ཕྲེང་དྲུག་པ་ཚངས་དབྱངས་རྒྱ་མཚོའི་རྣམ་ཐར》《གསོ་བ་རིག་པའི་ཁོག་དབུབ་དྲང་སྲོང་དགྱེས་པའི་དགའ་སྟོན》《སྨན་གྱི་རྒྱུད་བཞིའི་འགྲེལ་བ་བཻཌཱུརྱ་སྔོན་པོ》《ཕུག་ལུགས་རྩིས་ཀྱི་ལེགས་བཤད་བཻཌཱུརྱ་དཀར་པོ》《བསྟན་བཅོས་བཻཌཱུརྱ་དཀར་པོའི་དྲིས་ལན་འཁྲུལ་སྣང་གཡའ་སེལ》《བོད་ལུགས་གླུ་གར་གྱི་དེབ་ཐེར་མིག་ཡིད་རྣ་བའི་དགའ་སྟོན》《དགའ་ལྡན་ཆོས་འབྱུང་བཻཌཱུརྱ་སེར་པོ》《བླང་དོར་གསལ་བར་བྱེད་པའི་ཁྲིམས་ཡིག་དྭངས་ཤེལ་མེ་ལོང》《ཏཱ་ལའི་བླ་མ་སྐུ་ཕྲེང་ལྔ་བས་མཛད་པའི་སྙན་ངག་དབྱངས་ཅན་དགྱེས་པའི་གླུ་དབྱངས་ཀྱི་མཆན་འགྲེལ》སོགས་བརྩམས་ཆོས་མང་དུ་མཛད་ཡོད།

2 ངོ་སྤྲོད།

གསུང་རྩོམ་འདིའི་ནང་དུ་གཙོ་བོ་གནས་ཁྱད་དུ་འཕགས་པའི་སྐོར་དང་། ཇི་ལྟར་བཞེང་བའི་བཀོད་པས་ཁྱད་པར་དུ་འཕགས་ཚུལ། རྟེན་གྱི་ངོ་བོས་འཕགས་ཚུལ། གང་ལ་བཞེང་བའི་རྒྱུའི་འཕགས་ཚུལ་སོགས་ནང་དོན་ཕུན་སུམ་ཚོགས་ཤིང་བརྗོད་བྱ་ཟབ་ལ་རྗོད་བྱེད་ཚིག་སྦྱོར་ཤིན་ཏུ་ལེགས་པས་ལོ་རྒྱུས་ཀྱི་དཔྱད་གཞི་གལ་ཆེན་ཞིག་ཡིན།

3 དཀར་ཆག

སརྒ་དང་པོ། གནས་ཀྱི་སྐོར་བརྗོད་པ།

སརྒ་གཉིས་པ། ཆེད་དུ་བྱ་བའི་བསམ་པས་ཁྱད་པར་དུ་འཕགས་པ།

སརྒ་གསུམ་པ། དུས་ཀྱིས་ཁྱད་པར་འཕགས་པ།

སརྒ་བཞི་པ། གང་བཞེང་པའི་བཟོ་བོ་དང་དེ་དག་མཉེས་པ་ལ་སོགས་པ།

སརྒ་ལྔ་པ། ཇི་ལྟར་བཞེང་བའི་བཀོད་པས་ཁྱད་པར་དུ་འཕགས་པ།

སརྒ་དྲུག་པ། ཇི་ལྟར་བཞེང་བའི་རྟེན་གྱི་ངོ་བོས་འཕགས་པ།

སརྒ་བདུན་པ། རྒྱུས་ཁྱད་པར་འཕགས་པ།

སརྒ་བརྒྱད་པ། གཅེས་པའི་ཡན་ལག་ཆོ་ག་དང་བཅས་པ་དང་འབྱུང་པོ་མ་རུངས་པའི་མཐོ་འཚམས་པ་དགེ་ལེགས་ཀྱི་མཚན་མ་བྱུང་བ་དང་གཟུངས་ཀྱི་ཁྱད་པར་འཕགས་པ།

སརྒ་དགུ་པ། རབ་ཏུ་གནས་པའི་སྐོར་བརྗོད་པ།

སརྒ་བཅུ་པ། མཆོད་པས་ཁྱད་པར་དུ་འཕགས་པ།

སརྒ་བཅུ་གཅིག་པ། ཡོན་བདག་གི་ཁྱད་པར་དུ་འཕགས་པ།

སརྒ་བཅུ་གཉིས་པ། འཕྲིན་ལས་ཀྱི་ཁྱད་པར་འཕགས་པ།

སརྒ་བཅུ་གསུམ་པ། ཕན་ཡོན་གྱི་ཁྱད་པར་འཕགས་པ།

སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2017-01-05

གསར་སྤེལ་མཁན། :དཔལ་མགོན་ཚེ་རིང་།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།