ཐོས་བསམ་སྒོམ་གསུམ་ཡ་མ་བྲལ་བའི་སློབ་གསོ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

སྤྱིར་ཐོས་བསམ་སྒོམ་གསུམ་གྱི་སློབ་གསོ་བྱེད་ཐབས་ལ་བརྟེན་ནས་རིམ་བཞིན་ཐོས་བྱུང་གི་ཤེས་རབ་དང་བསམ་བྱུང་གི་ཤེས་རབ། སྒོམ་བྱུང་གི་ཤེས་རབ་གསུམ་སྐྱེད་སྲིང་བྱེད་ཐུབ་པར་མ་ཟད། ཤེས་རབ་དེ་དག་ཐོབ་པའི་གོ་རིམ་གྱི་ཁྲོད་ནས་མིའི་ཤེས་བྱའི་སྤུས་ཚད་དང་། རྩལ་ནུས་ཀྱི་སྤུས་ཚད། བསམ་བློ་ཀུན་སྤྱོད་ཀྱི་སྤུས་ཚད་སོགས་སྐྱེད་སྲིང་བྱེད་ཐུབ་པ་ལ། སློབ་གསོ་བྱེད་ཐབས་དེ་དག་ཀྱང་ཐོག་མར་ཐོས་པ་དང་། དེ་ལ་བརྟེན་ནས་བསམ་པ། བསམ་པ་ལ་བརྟེན་ནས་སྒོམ་པའི་སློབ་གསོ་བྱེད་ཐབས་བེད་སྤྱོད་བྱེད་དགོས་ཏེ། དཔེར་ན། བསམ་བློ་ཀུན་སྤྱོད་ཀྱི་སློབ་གསོ་ལྟ་བུར་མཚོན་ན། ཐོག་མར་ཐོས་པ་ལ་བརྟེན་ནས་བསམ་བློ་ཀུན་སྤྱོད་ཕྱོགས་ཀྱི་ཤེས་བྱ་བློ་ལ་ངེས་དགོས།
གཞི་རྩའི་གནས་ཚུལ།

རིགས།
སློབ་གསོ་རིག་པ།
ངོ་བོ།
ཐོས་བསམ་སྒོམ་གསུམ།
1 རྨང་གཞིའི་ཀུན་སྤྱོད།

ཀུན་སྤྱོད་ཀྱི་རྨང་གཞིའི་སྟེང་དེ་དག་གི་ངོ་བོ་དང་། དབྱེ་བ། ཀུན་སྤྱོད་ལེགས་ཉེས་ཀྱི་ས་མཚམས། ཀུན་སྤྱོད་ཀྱི་ཚད་གཞི། ཀུན་སྤྱོད་ཀྱི་ཕན་ནུས་སོགས་ཐག་ཆོད་པའི་གོ་རྟོགས་རྙེད་པ་དང་། ཐག་ཆོད་པའི་གོ་རྟོགས་རྙེད་པའི་ཀུན་སྤྱོད་བསམ་བློ་གོམས་པར་བྱས་པ་ལ་བརྟེན་ནས་རང་གི་བསམ་བློ་ཞིག་དང་རང་གི་ཀུན་སྤྱོད་ཅིག་ཏུ་གྱུར་ཚེ་ཀུན་སྤྱོད་སློབ་གསོ་དེའི་དམིགས་ཚད་ལ་ཐོན་པ་ཡིན་པས། མིག་སྔར་ཐོས་པའི་སློབ་ཁྲིད་བྱེད་ཐབས་གཙོ་བོ་སྣང་མེད་དུ་འཇོག་པ་དང་། བསམ་པའི་སློབ་ཁྲིད་བྱེད་ཐབས་གཙོ་བོ་ལ་ཐོས་པའི་སློབ་ཁྲིད་བྱེད་ཐབས་སྣང་མེད་དུ་འཇོག་པ། ཐོས་པའི་སློབ་ཁྲིད་བྱེད་ཐབས་གཙོ་བོ་ལ་སྒོམ་པའི་སློབ་ཁྲིད་བྱེད་ཐབས་སྣང་མེད་དུ་འཇོག་པ། སྒོམ་པའི་སློབ་ཁྲིད་བྱེད་ཐབས་གཙོ་བོ་ལ་བསམ་པའི་སློབ་ཁྲིད་བྱེད་ཐབས་སྣང་མེད་དུ་འཇོག་པ་སོགས་ཀྱི་དབང་གིས་དཔེ་ངོས་ཤེས་བྱ་ཡོད་ཚད་ལ་བློ་ཐག་ཆོད་པའི་གོ་རྟོགས་མེད་པ་དང་། ཐག་ཆོད་པའི་གོ་རྟོགས་ཙམ་ཡོད་ཀྱང་དོན་རང་གི་བློ་ངོར་གོམས་འདྲིས་མེད་པའི་དབང་གིས་ཤེས་བྱ་ཡོད་ལ་ནུས་པ་མེད་པ་དང་། ཤེས་བྱ་ཡོད་ལ་ཀུན་སྤྱོད་མི་ལེགས་པ། ཀུན་སྤྱོད་ལེགས་ཀྱང་ཤེས་བྱ་མེད་པ། ཀུན་སྤྱོད་ལེགས་ཀྱང་ནུས་པ་མེད་པ། ནུས་པ་ཡོད་ཀྱང་ཤེས་བྱ་མེད་པ། ནུས་པ་ཡོད་ཀྱང་ཀུན་སྤྱོད་མི་ལེགས་པ་སོགས་ཀྱི་མཇུག་འབྲས་ངན་པ་འདི་དག་བྱུང་དང་འབྱུང་བཞིན་ཡོད།

2 སྤུས་ཚད།

མི་ཞིག་གི་ཤེས་བྱའི་སྤུས་ཚད་དང་། ངལ་རྩོལ་ནུས་རྩལ་གྱི་སྤུས་ཚད། བསམ་བློ་ཀུན་སྤྱོད་ཀྱི་སྤུས་ཚད་སོགས་ཕྱོགས་ཡོངས་ནས་འཕེལ་རྒྱས་སུ་གཏོང་དགོས་ཚེ་ཐོས་བསམ་སྒོམ་གསུམ་ཡ་མ་བྲལ་བའི་སློབ་གསོ་ལ་གཙིགས་ཆེན་བྱེད་དགོས། གནའ་རབས་དགོན་པའི་སློབ་གསོ་ལ་མཚོན་ན་ཡང་ཐོས་བསམ་སྒོམ་གསུམ་ཡ་མ་བྲལ་བའི་སློབ་གསོ་ལ་གཙིགས་ཆེན་བྱས་མིན་གྱི་དབང་གིས་དགོན་པ་དེ་དག་ནས་ཐོན་པའི་འཇོན་ཐང་མི་སྣའི་ཁྱད་པར་མི་འདྲ་སྟེ། དཔེར་ན། ཐོས་བསམ་གྱི་སློབ་གསོ་གཙོ་བོར་བྱེད་པའི་རྩོད་གྲྭ་དང་། སྒོམ་བྱུང་ཤེས་རབ་ཀྱི་སློབ་གསོ་གཙོ་བོར་བྱེད་པའི་སྒོམ་གྲྭ། ཐོས་བསམ་སྒོམ་གསུམ་གྱི་སློབ་གསོ་བྱེད་ཐབས་གསུམ་ག་གཙོ་བོར་བྱེད་པའི་གྲྭ་ཚང་སོགས་ནས་ཐོན་པའི་འཇོན་ཐང་མི་སྣའི་ཁྱད་པར་མི་འདྲ་ལ། ཚད་མི་འདྲ་བའི་འཇོན་ཐང་མི་སྣ་དེ་དག་གིས་སྤྱི་ཚོགས་ལ་ཤན་ཤུགས་ཐེབས་ཚད་གཏན་ནས་མི་འདྲ་བ་དང་། སློབ་གསོ་དེ་དག་མྱངས་པའི་ཐུན་མོང་མ་ཡིན་པའི་འཇོན་ཐང་མི་སྣ་དེ་དག་གི་བསམ་བློ་དང་ལྟ་ཚུལ་ཡང་གཏན་ནས་མི་འདྲ་སྟེ། ཐོས་བསམ་སློབ་གསོ་གཙོ་བོར་བྱེད་པའི་འཇོན་མིས་བལྟས་ནས་སྒོམ་བྱུང་སློབ་གསོ་གཙོ་བོར་བྱེད་མཁན་གྱི་རྨང་གཞི་མེད་པ་ལྟ་བུ་ཞིག་དང་། སྒོམ་བྱུང་སློབ་གསོ་གཙོ་བོར་བྱེད་མཁན་གྱིས་བལྟས་ན་ཐོས་བསམ་སློབ་གསོ་ནི་ཁ་བཤད་རྐྱང་རྐྱང་གི་སློབ་གསོ་ལྟ་བུ་ཞིག་ཡིན་པར་བསྟན་ཡོད་དེ། སྔོན་གྱི་ཐོས་བསམ་པས། ཐོས་པ་མེད་པའི་སྒོམ་པ་ནི༎ ལག་རྡུམ་བྲག་ལ་འཛེགས་པ་འདྲ༎ ཞེས་སྒོམ་པ་བ་ལ་འཛེར་བ་དང་༎ སྒོམ་ཆེན་པས། ཁ་བཤད་སྟོང་བའི་འཕྱོར་འགྲོ་དེས༎ རྐྱེན་ཉོན་མོངས་ཐུབ་པ་དཀའ་མོར་གདའ༎ ཞེས་ཐོས་བསམ་པ་ལ་བཤད་ཡོད་མོད། སྤྱིར་ཐོས་བསམ་སྒོམ་གསུམ་གྱི་བྱེ་བྲག་གི་སློབ་གསོ་བྱེད་ཐབས་གང་ཞིག་ཡིན་ཡང་། གང་ཞིག་གཙོ་གཞི་དང་ཟུར་རྒྱན་ཡིན་མིན་གྱི་ཆ་ནས་མི་འདྲ་བ་ཙམ་ལས་ཐོས་པའི་སློབ་གསོ་ཡིན་ལ་བསམ་པའི་སློབ་གསོར་གཏན་ནས་མ་འདྲེས་པ་ཞིག་མེད་པས། བྱེ་བྲག་གི་ཤེས་བྱའི་གནས་མི་འདྲ་བ་དང་། སློབ་གསོ་བྱེད་ཡུལ་མི་འདྲ་བའི་དབང་གིས་སློབ་གསོ་བྱེད་ཐབས་མི་འདྲ་བ་བེད་སྤྱོད་དགོས་ལ། སློབ་གསོ་བྱེད་ཐབས་མི་འདྲ་བ་དེ་དག་ཇི་ལྟར་བེད་སྤྱོད་བྱེད་རྒྱུ་ནི་སློབ་གསོ་བྱ་ཡུལ་གྱི་སློབ་མའི་ཁྱད་ཆོས་དང་སྤྱི་ཚོགས་ལ་ཇི་ལྟ་བུའི་འཇོན་མི་ཞིག་སྐྱེད་སྲིང་བྱེད་རྒྱུ་དེ་དག་གིས་ཐག་གཅོད་དགོས་པ་རེད། འོན་ཀྱང་གནའ་རབས་ཀྱི་སློབ་གསོ་དེ་དག་མྱངས་པ་ལ་བརྟེན་ནས་མཁས་པ་ཆེ་འབྲིང་ཆུང་གསུམ་དང་གྲུབ་པ་བ་ཆེ་འབྲིང་ཆུང་གསུམ། སྤྱོད་པ་རྣམ་པ་སྣ་ཚོགས་ཀྱི་འཇོག་མི་བྱུང་ཡོད་ན་ཡང་། འདས་པའི་སྤྱི་ཚོགས་ལ་ཤན་ཤུགས་ཆེས་ཆེ་བ་ནི་མཁས་བཙུན་བཟང་གསུམ་དང་མཁས་གྲུབ་ཉིས་འཛོམས་ཀྱི་འཇོན་མི་དེ་དག་རེད། དོན་ངོ་མས་བཤད་ན་འཇོན་མི་དེ་དག་ལ་རིག་གནས་ཀྱི་སྤུས་ཚད་འཛོམས་པོ་ཡོད་པར་མ་ཟད། ད་དུང་རིག་གནས་དེ་དག་རང་གི་བསམ་བློ་ཞིག་དང་རང་གི་ནུས་པ་ཞིག རང་གི་ཀུན་སྤྱོད་ཅིག་རུ་གྱུར་པས་པཎ་ཆེན་ཆོས་ཀྱི་རྒྱལ་མཚན་ལྟ་བུའི་ཤེས་ནུས་རྩལ་གསུམ་དང་ཤེས་ནུས་སྤྱོད་གསུམ་འཛོམས་པའི་འཇོན་མི་ཕུན་སུམ་ཚོགས་པ་མང་པོ་ཆགས་ཡོད།

བརྡ་འགྲེལ་གདོང་འཛར།

ཀུན་སྤྱོད། སྤུས་ཚད། ཤེས་རབ།
སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2019-12-12

གསར་སྤེལ་མཁན། :ཡུན་དུང་སྐྱབས་རྒྱལ།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།