ནག་ཚོ་ལོ་ཙཱ་བ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

དགེ་བཤེས་ནག་ཚོ་ལོ་ཙཱ་བ་ནི་ལྕགས་མོ་ཕག་ལ་གུང་ཐང་ཞེས་གྲགས་པ་མངའ་རིས་རྫོང་དགའི་ལྷ་གདོང་དུ་སྐུ་འཁྲུངས། གདུང་ནག་ཚོ། རབ་ཏུ་བྱུང་བའི་མཚན་ཚུལ་ཁྲིམས་རྒྱལ་བ།
གཞི་རྩའི་གནས་ཚུལ།

འཁྲུངས་ཡུལ།
མངའ་རིས་རྫོང་དགའི་ལྷ་གདོང་།
འཁྲུངས་ལོ།
ལྕགས་མོ་ཕག
རིགས་དབྱེ།
ལོ་ཙཱ་བ།
1 ​ངོ་སྤྲོད།

དགེ་བཤེས་ནག་ཚོ་ལོ་ཙཱ་བ་ནི་ལྕགས་མོ་ཕག་ལ་གུང་ཐང་ཞེས་གྲགས་པ་མངའ་རིས་རྫོང་དགའི་ལྷ་གདོང་དུ་སྐུ་འཁྲུངས། གདུང་ནག་ཚོ། རབ་ཏུ་བྱུང་བའི་མཚན་ཚུལ་ཁྲིམས་རྒྱལ་བ། འདུལ་བ་མཁས་པར་མཁྱེན་པས་འདུལ་བ་འཛིན་པར་གྲགས། རྒྱ་བརྩོན་སེང་ལ་མངོན་པ་གསན། དགུང་ལོ་ཉེར་བདུན་པ་ལ་ཇོ་བོ་སྤྱན་འདྲེན་ལ་རྒྱ་གར་དུ་བྱོན། ཇོ་བོ་རྗེ་ལོ་བཅུ་དགུའི་བར་ཚུལ་བཞིན་བསྟེན། ཡོན་ཏན་ཐམས་ཅད་རྫོགས་པར་མཛད། ཇོ་བོ་རྗེ་བོད་དུ་སྤྱན་དྲངས་པས་བོད་ཁམས་སྤྱི་ལ་བཀའ་དྲིན་ཆེ་བ་ཡིན་པས། བོད་སྟོན་ཐམས་ཅད་ཀྱིས་ཀྱང་སློབ་དཔོན་ཞེས་བརྗོད་པ་ཡིན།

2 མཛད་རྗེས།

ཇོ་བོའི་ཆོས་རྣམས་ཁོང་གིས་ཁུངས་ཕྱུང་ནས་ཞུར་བཅུག་པས་གཞན་རྣམས་ཀྱིས་ཀྱང་གདམས་པ་ཕལ་ཆེ་བ་ཐོབ་པས་ཁོང་བཀའ་དྲིན་ཤིན་ཏུ་ཆེ་བར་བྱེད། ནག་ཚོ་སྙེ་ཐང་ནས་མངའ་རིས་སུ་འབྱོན་ཁར་ཇོ་བོས་བསླབ་བྱ་མང་བར་མཛད་དེ། དམ་ཚིག་གསུམ་བཀོད་ཀྱི་སྐུ་ཕྱག་ཏུ་བཟུང་ནས་བྱིན་རླབས་མཛད། འདུལ་བ་མདོ་རྩ་དང༌། གསང་བ་འདུས་པའི་རྒྱུད་དཔེ་དང༌། འགྲོ་ཆོས་སུ་ཐུན་མོང་མ་ཡིན་པའི་སྤྱན་རས་གཟིགས་ཀྱི་སྒྲུབ་སྐོར་སོགས་སྦས། ཆོས་ཉི་ཤུ་གནང་ལུང་བསྟན་མང་དུ་མཛད་དེ་ཇོ་བོ་ཉིད་ཀྱི་སྐུ་མཐེ་བོང་ཙམ་སེང་ལྡིང་ལ་བྲིས་ཏེ་གའུར་བཅུག་ནས་དཔུང་པ་ལ་བཏགས། མཉེས་མཉེས་རྒྱ་ཆེན་མཛད། དེ་ནས་ཡར་བྱོན་ནས་རས་ཁྲུ་བཅུ་དྲུག་པ་གཅིག་ལ་རི་མོ་མཁན་མཁས་པ་ཀྲི་ཥྞ་བྱ་བ་རྒྱ་གར་བ་ཞིག་ཡོད་པ་འབྲིར་བཅུག་ནས། སྟོད་ལ་ཇོ་བོའི་ཡི་དམ་གྱི་ལྷ་རྣམས་བྲིས། དེའི་འོག་ན་ཕར་ལ་ཇོ་བོའི་བླ་མ་བཅུ་གཉིས་པོ་བྲིས། དེ་ནས་ཇོ་བོ་རྗེ་ཉིད་ཀྱི་སྐུ་ཚད་ཁྲུས་གཞལ་ཏེ་བྲིས། གཡས་གཡོན་གཉིས་ན་ཉེ་གནས་རེ་ལྡེམ་སྐུར་བྲིས། གཡས་གཡོན་གྱི་མཐའ་རས་ལ་ཇོ་བོའི་མཛད་པ་རྣམས་དང༌། འོག་ན་ཚུར་ཁུ་རྔོག་འབྲོམ་གསུམ་ལ་སོགས་པ་བོད་སྟོན་རྣམས་ཆོས་གྲྭའི་ཚུལ་དུ་བྲིས། དེའི་མདུན་དུ་ལོ་ཙཱ་བ་ཉིད་གསོལ་བ་འདེབས་པའི་ཚུལ་དུ་བྲིས། དེའི་རྒྱབ་ལ་ཇོ་བོའི་བསྟོད་པ་བརྒྱད་ཅུ་བ་བྲིས། རབ་གནས་མཛད་པའི་ཚེ། ཇོ་བོ་རྗེ་ཉིད་དགའ་ལྡན་ནས་འབྱོན་པར་ཞལ་གྱིས་བཞེས་པས་འདི་ཇོ་བོ་རྗེ་ཉིད་དང་ཁྱད་མེད་པ་ཡིན། མངའ་རིས་སྐོར་གསུམ་གྱི་རྟེན་ལ་བྱིན་རླབས་ཆེ་ཤོས་ཡིན་གསུངས། དེའི་རྗེས་སུ་ཛྙཱ་ན་ཨཱ་ཀ་ར་དང་བལ་པོ་ཤྲིནྟཾ་བྷ་དྲ། ནག་པོ་དམ་ཚིག་རྡོ་རྗེ་ལ་སོགས་པ་བསྟེན་ནས་འགྱུར་ཡང་མང་དུ་མཛད་དོ། ། དེ་ནས་ཇོ་བོས་ལུང་བསྟན་པ་བཞིན་བསྒྲུབ་པ་མཛད་པས་ཇོ་བོ་ཡི་གེ་དྲུག་པ། སྒྲོལ་མ། འཇམ་དཔལ་རྡོ་རྗེ་རྣམས་ཞལ་གཟིགས། ཁོང་རང་གི་ཡི་གེ་ལས་ཀྱང༌། ནག་ཚོ་བདག་ཉིད་གཅིག་པུ་མ་གཏོགས་པ། ། ཇོ་བོའི་སློབ་མ་གཞན་ལ་ཡོད་རེ་སྐན། ། ཞེས་ཇོ་བོའི་མན་ངག་ཐུན་མོང་མ་ཡིན་པ་རྣམས་ཁོང་རང་ལ་ཡོད་པར་ཞལ་གྱིས་བཞེས་ཤིང་ཇོ་བོ་རྗེ་བོད་དུ་གདན་འདྲེན་མཛད་པས་ལོ་ཙཱ་བ་འདི་ནི་བོད་ཁམས་ཡོངས་ལ་དཀའ་དྲིན་བླ་ལྷག་ཏུ་ཆེ་བ་ཞིག་གོ །


སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2018-10-29

གསར་སྤེལ་མཁན། :སེང་ལྡེང་མཚོ།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།