སྐྱབས་རྗེ་སྨན་རིའི་ཁྲི་འཛིན་སོ་བཞི་པ་རིན་པོ་ཆེ་མཆོག
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

སྐྱབས་རྗེ་སྨན་རིའི་ཁྲི་འཛིན་སོ་བཞི་པ་རིན་པོ་ཆེ་མཆོག
ཞྭ་དཀར་བསྟན་པའི་གཙུག་རྒྱན་སྐྱབས་རྗེ་རྒྱལ་བ་སྨན་རིའི་ཁྲི་འཛིན34པ་མཆོག་ནི། གཤེན་གྱི་འབྱུང་ལྡན་སུམ་བརྒྱ་དང་གཅིག་གི་བོད་ཆུ་ཕོ་བྱི་བའི་ལོ་སྟེ། སྤྱི་ལོ1972ལོའི་ཟླ་བ11ཚེས19ཉིན་བོད་མདོ་སྨད་བསང་ཆུ་རྫོང་དགའ་མལ་གཡུང་དྲུང་དར་རྒྱས་གླིང་གི་ལྷ་སྡེ་མ་ཡོན་སྡེ་བའི་ཕྱུག་ཕྲུག་ཚང་ཞེས་པ་རུ་ཡབ་དཔལ་ཡོན་འབུམ་གསལ་དང་ཡུམ་ཀླུ་གཡང་ཕྱུག་མོ་གཉིས་ཀྱི་སྲས་སུ་འཁྲུངས་ཤིང་སྐུ་ན་གཞོན་དུས་ཀྱི་མཚན་ལ་ནོར་བུ་བསམ་འཕེལ་ཞེས་ཞུ།
གཞི་རྩའི་གནས་ཚུལ།

འཁྲུངས་ལོ།
སྤྱི་ལོ1972ལོའི་ཟླ11པའི་ཚེས19ཉིན།
འཁྲུངས་ཡུལ།
བསང་ཆུ་རྫོང་།
ཡབ།
དཔལ་ཡོན་འབུམ།
ཡུམ།
ཀླུ་གཡང་ཕྱུག་མོ།
སྐུ་ན་གཞོན་དུས་ཀྱི་མཚན།
ནོར་བུ་བསམ་འཕེལ།
རབ་ཏུ་བྱུང་བའི་མཚན།
བཟོད་པ་བརྩོན་འགྲུས།
1 ​ངོ་སྤྲོད། 

ཞྭ་དཀར་བསྟན་པའི་གཙུག་རྒྱན་སྐྱབས་རྗེ་རྒྱལ་བ་སྨན་རིའི་ཁྲི་འཛིན34པ་མཆོག་ནི། གཤེན་གྱི་འབྱུང་ལྡན་སུམ་བརྒྱ་དང་གཅིག་གི་བོད་ཆུ་ཕོ་བྱི་བའི་ལོ་སྟེ། སྤྱི་ལོ1972ཟླ་བ11ཚེས19ཉིན་བོད་མདོ་སྨད་བསང་ཆུ་རྫོང་དགའ་མལ་གཡུང་དྲུང་དར་རྒྱས་གླིང་གི་ལྷ་སྡེ་མ་ཡོན་སྡེ་བའི་ཕྱུག་ཕྲུག་ཚང་ཞེས་པ་རུ་ཡབ་དཔལ་ཡོན་འབུམ་གསལ་དང་ཡུམ་ཀླུ་གཡང་ཕྱུག་མོ་གཉིས་ཀྱི་སྲས་སུ་འཁྲུངས་ཤིང་སྐུ་ན་གཞོན་དུས་ཀྱི་མཚན་ལ་ནོར་བུ་བསམ་འཕེལ་ཞེས་ཞུ། དགུང་གྲངས་ལྔ་བཞེས་ཐོག་གནས་ཉིན་དུ་ཕེབས་ནས་ཡི་གེ་ཀ་ཁ་འབྲི་ཀློག་སོགས་ཐོག་མར་བསླབས། དགུང་གྲངས་བརྒྱད་ནས་གདན་ས་གཡུང་དྲུང་གླིང་གི་དགེ་བཤེས་སྒྲ་ཏོག་དཔལ་ཆེན་སྐྱབས་མཆོག་གི་མདུན་ནས་སྐྱབས་འགྲོ་འདོན་ཆོག་སོགས་ལ་སྦྱངས། དགུང་གྲངས་བཅུ་གཅིག་བཞེས་ཐོག་དགའ་མལ་དགོན་གཡུང་དྲུང་དར་རྒྱས་གླིང་གི་དབུ་བླ་ཚབ་ཚ་བསྟན་པ་གོང་འཕེལ་རིན་པོ་ཆེ་མཆོག་གི་སྐུ་མདུན་ནས་ཚེ་རིང་སྐྲ་ཕུད་ཞུས་ཏེ་དགོན་པའི་སྒྲིག་ཁོངས་སུ་ཕེབས། མཚན་ལ་བཟོད་པ་བརྩོན་འགྲུས་སུ་གསོལ་གནང་། དགུང་གྲངས་བཅུ་གཉིས་ཙམ་ནས་སློབ་དཔོན་སྐལ་བཟང་དར་རྒྱས་མཆོག་གི་སྐུ་མདུན་ནས་དགེ་བསྙེན་གཏན་ཁྲིམས་སྣ་ལྔ་ཞུས། དེ་ནས་རིམ་བཞིན་སློབ་གཉེར་གྱི་ཞོར་དུ་དགོན་པའི་དུང་པ་དང་། ཇ་འདྲེན། མཆོད་དཔོན། འཆམ་པོ་སོགས་གནང་། དགུང་གྲངས་བཅུ་བདུན་བཞེས་ཐོག་དགའ་མལ་དགོན་ཆེན་གྱི་མཁན་པོ་ཤེས་རབ་མཐར་ཕྱིན་དང་སློབ་དཔོན་བསྐལ་བཟང་དར་རྒྱས་རྣམ་གཉིས་ཀྱི་དྲུང་དུ་གཙང་མ་གཙུག་ཕུད་ཀྱི་སྡོམ་པ་ཞུས་ཤིང་མཚན་ལ་ཚུལ་ཁྲིམས་ཉི་མ་ཞེས་སུ་གསོལ། ལོ་དེར་སློབ་དཔོན་སྐལ་བཟང་དར་རྒྱས་མཆོག་གི་སྐུ་མདུན་ནས་བསྡུས་གྲྭའི་རིགས་ལམ་ཆེ་འབྲིང་ཆུང་གསུམ་ལ་སྦྱངས་པ་གནང་། དགུང་གྲངས་བཅོ་བརྒྱད་བཞེས་ཐོག་དགའ་མལ་དགོན་དུ་བཤད་གྲྭར་དངོས་སུ་ཞུགས་ཤིང་དཔོན་སློབ་ཡེ་ཤེས་རྒྱལ་མཚན་གྱི་མདུན་ནས་བློ་རྟགས་སྡུད་གསུམ་དང་། ཚད་མ་ཤེར་ཕྱིན་སོགས་ལ་སྦྱངས་པ་གནང་། དགུང་གྲངས་ཉེར་གཉིས་བཞེས་ཐོག་སྐྱབས་རྗེ་རྒྱལ་བ་སྨན་རིའི་ཁྲི་འཛིན33པ་རིན་པོ་ཆེ་མཆོག་འཁྲུངས་ཡུལ་དུ་ཆིབས་ཞལ་གནང་སྐབས་རིན་པོ་ཆེ་མཆོག་གི་སྐུ་མདུན་ནས་དག་པ་དྲང་སྲོང་གི་སྡོམ་པ་ཞུས། མཚན་ལ་ཟླ་བ་དར་རྒྱས་དབང་པོ་ཞེས་སུ་གསོལ། དགུང་གྲངས་ཉེར་བཞི་བཞེས་ཐོག་དགའ་མལ་དགོན་གཡུང་དྲུང་དར་རྒྱས་གླིང་དུ་ཡོངས་འཛིན་ཡེ་ཤེས་རྒྱལ་མཚན་གྱི་མདུན་ནས་རབ་འབྱམས་དགེ་བའི་བཤེས་གཉེན་གྱི་མཚན་བཏགས་བཞེས། སྔ་ཕྱིར་དགའ་མལ་དགོན་དུ་མཚན་ཉིད་དགེ་སྐོས་དང་། ཚོགས་ཆེན་དགེ་སྐོས་སོགས་ཀྱི་ཐུགས་འགན་གནང་། དགུང་གྲངས་ཉེར་ལྔ་བཞེས་ཐོག་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་ཐོག་མར་ཕེབས་ནས་གཡུང་དྲུང་བོན་གྱི་བཤད་སྒྲུབ་འདུས་སྡེའི་སྒྲིག་ཁོངས་སུ་ཞུགས་ཤིང་། རྒྱལ་བ་སྨན་རིའི་མཁན་སློབ་རྣམ་པའི་དྲུང་དུ་མཚན་ཉིད་བཀའ་པོད་དྲུག་ལ་སྦྱངས་པ་གནང་། སློབ་གཉེར་གྱི་ཞོར་དུ་བཤད་སྡེའི་གཉེར་པ་དང་། དགེ་སྐོས། ཚོགས་གཞོན། སྨན་རིའི་གྲྭ་ཚང་གཉེར་པ། གསང་སྔགས་སྒོམ་སྒྲུབ་གླིང་གི་གཉེར་པ། སྨན་རིའི་ཚང་གི་ལས་གཉེར་སོགས་གནང་། ཕྱི་ལོ2012ལོར་གཡུང་དྲུང་བོན་གྱི་བླ་ཆེན་སྐྱབས་རྗེ་རྒྱལ་བ་སྨན་རིའི་མཁན་ཆེན་ཁྲི་འཛིན་སོ་གསུམ་པ་རིན་པོ་ཆེ་མཆོག་དང་ཡོངས་ཀྱི་དགེ་བའི་བཤེས་གཉེན་ཆེན་མོ་སྨན་རིའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ་རྣམ་གཉིས་ཀྱི་དྲུང་དུ་བཀའ་རབ་འབྱམས་པ་དགེ་བའི་བཤེས་གཉེན་གྱི་མཚན་བཏགས་བཞེས། དེ་ནས་བཟུང་རྒྱལ་བ་སྨན་རི་བའི་བཀའ་དགོངས་ལྟར་དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་དངུལ་གཉེར་དང་། དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་དྲུང་ཡིག་ཆེན་མོ་སོགས་གནང་ཡོད།

སྤྱི་ལོ2018ཟླ་བ་དང་པོའི་ཚེས་དང་པོ་གཟའ་སྐར་འཕྲོད་སྦྱོར་ཕུན་སུམ་ཚོགས་པའི་ཉིན་གསང་གསུམ་བོན་གྱི་མཛོད་འཛིན་སྐྱབས་རྗེ་སྨན་རིའི་ཡོངས་འཛིན་སྨྲ་བའི་དབང་པོ་དཔོན་སློབ་བསྟན་འཛིན་རྣམ་དག་རིན་པོ་ཆེ་མཆོག་དང་། ཡོངས་ཀྱི་དགེ་བའི་བཤེས་གཉེན་ཆེན་མོ་སྐྱབས་རྗེ་སྨན་རིའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ་མཆོག དཔལ་ལྡན་ཁྲི་བརྟན་ནོར་བུ་རྩེའི་མཁན་རིན་པོ་ཆེ་ལུང་རྟོགས་བསྟན་པ་གཡུང་དྲུང་མཆོག་སོགས་བོད་ཕྱི་ནང་གི་བོན་གྱི་བླ་སྤྲུལ་དགེ་བའི་བཤེས་གཉེན་དང་། གནད་ཡོད་མི་སྣ་མང་པོས་བཀའ་བགྲོས་ཡུན་རིང་གནང་མཐར་སྔར་སྲོལ་བཞིན་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་ཡི་དམ་དབལ་གསས་རྔམ་པའི་གཞུང་དང་བསྟན་སྲུང་སྡེ་བཞིའི་གཞུང་སྟེ། དམ་ཅན་བོན་སྐྱོང་སྲུང་མར་གནང་བའི་འབྲས་རྟགས་སུ་སྨན་རིའི་བཀའ་རབ་འབྱམས་པ་དགེ་བའི་བཤེས་གཉེན་ཆེན་མོ་ཨ་མདོ་ཤར་པ་དྲང་སྲོང་ཟླ་བ་དར་རྒྱས་རིན་པོ་ཆེ་ཁོང་སྐྱབས་རྗེ་སྨན་རིའི་ཁྲི་འཛིན34པའི་རྟགས་སྒྲིལ་དུ་གནང་ཡོད་པ་བཅས་ཀྱི་མཛད་འཕྲིན་མདོར་བསྡུས་ཙམ་དུ་བཀོད་དོ། ། 


དཔྱད་གཞིའི་ཡིག་ཆ།

བརྡ་འགྲེལ་གདོང་འཛར།

བོན། གཡུང་དྲུང་། ཁྲི་འཛིན།
སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2018-10-22

གསར་སྤེལ་མཁན། :དཔལ་ཚེ་རྡོར

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།