ལྟ་འཁྲིད་སྦྱོང་གསུམ་གྱི་ལག་ལེན།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

སློབ་གསོ་པ་ཆེན་མོ་ཚའེ་ལེན་སིན་གྱིས་སྲོལ་འབྱེད་གནང་བའི་སློབ་ཁྲིད་བྱེད་ཐབས་ཏེ། ལྟ་འཁྲིད་སྦྱོང་གསུམ་གྱི་ལག་ལེན་བྱེད་ཐབས་ལས་གཙོ་བོ་ཁ་བྱང་འབྲི་བ་དང་དམིགས་ཚད་འཇོག་པ། རང་སྦྱོང་མཛུབ་སྟོན་སོགས་མཛུབ་མོ་རིས་སྟོན་གྱི་ཚུལ་དུ་བཀོད་ཡོད། རིག་པ་འདི་ཐོག་མར་སི་ཁྲོན་རྔ་བ་ཁུལ་སློབ་གསོ་དང་ཚན་རིག་ཞིབ་འཇུག་སུའོ་ཡི་དགེ་རྒན་ཆེན་མོ་འཇམ་དབྱངས་བཀྲ་ཤིས་དང་དཔལ་འབུམ་རྒྱལ་གཉིས་ཀྱིས་སྦྱངས་ཤིང་། སྐད་གཉིས་སློབ་གསོར་འཚམ་པའི་རིག་པ་རྨད་དུ་བྱུང་བ་ཞིག་རེད་སྙམ་ནས་གོང་རིམ་ལ་སྙན་ཞུ་གང་མང་བྱས་ཏེ་ཆོག་མཆན་བཀོད། སྲིད་གཞུང་གིས་རྒྱུ་དངོས་སྦྱོར་གསུམ་གྱི་མཐུན་རྐྱེན་གང་ལེགས་སྦྱར་ཏེ་རྔ་བ་ཁུལ་གྱི་སྐད་གཉིས་དགེ་རྒན་རྣམས་སྔ་གཞུག་ཏུ་ཧུ་ནན་གཡོང་ཝེ་རུ་སློབ་སྦྱོང་དུ་མངགས་པ་དང་། སློབ་གསོ་པ་ཆེན་མོ་ཚའེ་ལེན་སིན་གྱི་མདུན་ནས་རིག་པ་འདི་སྦྱངས་ཏེ་རྔ་བ་ཁུལ་དུ་ཁྱབ་བརྡལ་དུ་བཏང་ཤིང་འབྲས་བུ་བཟང་བོ་ཐོབ་ཡོད།
གཞི་རྩའི་གནས་ཚུལ།

བོད་ཡིག་གི་མིང་།
ལྟ་འཁྲིད་སྦྱོང་གསུམ།
སྲོལ་འབྱེད་མཁན།
ཚའེ་ལེན་སིན།
སྐྱེས་ཡུལ།
ཅང་སུའུ་ཞིང་ཆེན་གྱི་ཐའེ་ཀྲུའུ་ཐེ་ཞིན།
སྐྱེས་ལོ།
སྤྱི་ལོ1942ལོར།


1  ཚའེ་ལེན་སིན་ངོ་སྤྲོད་མདོར་བསྡུས།

ཚའེ་ལེན་སིན་ཁོང་ཉིད་སྤྱི་ལོ1942ལོར་ཅང་སུའུ་ཞིང་ཆེན་གྱི་ཐའེ་ཀྲུའུ་ཐེ་ཞིན་དུ་འཁྲུངས་ཤིང་། སྤྱི་ལོ1960ལོར་སློབ་གསོའི་ལས་ཀར་ཞུགས། སྤྱི་ལོ1982ལོར་ཅང་སུའུ་དབྱང་སི་སློབ་གྲྭའི་སློབ་གཙོའི་འགན་བཞེས། ཁོང་གིས“ཁྲིད་ན་མི་ཤེས་པའི་སློབ་མ་མེད”པར་འདོད་ཅིང“ལྟ་འཁྲིད་སྦྱོང་གསུམ”གྱི་སློབ་ཁྲིད་ཐབས་ལམ་གྱི་སྲོལ་བཏོད། ལྟ་འཁྲིད་སྦྱོང་གསུམ་ལག་ལེན་བྱས་ནས་ཞིང་གྲོང་གི་སློབ་གྲྭ་ཕལ་བ་ཞིག་རྒྱལ་ཡོངས་སུ་གྲགས་པའི་སློབ་གྲྭར་བསྒྱུར། སྤྱི་ལོ2006ལོར་ཁོང་དགུང་ལོ་རེ་བཞིར་སླེབས་ནའང་། གཡོང་ཝེ་སློབ་གྲྭར་ཕེབས་ཏེ་སློབ་གྲྭའི་གནས་ཚུལ་དངོས་ལ་ཞིབ་འཇུག་བྱས་ནས། སློབ་གསོའི་རྒྱུ་སྤུས་གོང་མཐོར་གཏོང་རྒྱུ་ནི་སློབ་གྲྭའི་ལས་ཀའི་སྙིང་བོར་བཟུང་སྟེ། དབྱང་སིའི་ཉམས་མྱོང་ཟབ་ཅིང་རྒྱས་པར་སྤེལ།        སྔ་གཞུག་ཏུ《ཀྲུང་གོའི་སློབ་གསོའི་ཚགས་པར》དང《མི་དམངས་ཉིན་རེའི་ཚགས་པར》སོགས་སུ་དཔྱད་རྩོམ་བཅུ་ལྷག་སྤེལ་ཅིང་། རྒྱལ་ཡོངས་ཀྱི་ས་ཆ་སོ་སོར་ཕེབས་ནས་གསུང་བཤད་གང་མང་གནང་བར་ཀུན་གྱིས་མགྲིན་གཅིག་ཏུ་གཟེངས་སུ་བསྟོད། སྤྱི་ལོ2014ལོར་རྒྱལ་ཁབ་རིམ་པའི་སློབ་གསོའི་གྲུབ་འབྲས་ཀྱི་བྱ་དགའ་ཨང་དང་པོ་ཐོབ། ཁོང་གིས་སྡུག་མྱངས་པ་ནི་བསོད་ནམས་བསགས་པ་དང་སྡུག་མྱང་ཐུབ་ན་སློབ་སྦྱོང་བྱེད་ཤེས་ཤིང་དགེ་རྒན་བཅའ་ཤེས་ལ། སྡུག་མྱང་ཐུབ་ན་སློབ་གྲྭ་མིང་ཅན་སྐྱོང་ཐུབ་པ་དང་ཚེ་གང་བོར་བདེ་སྐྱིད་ཡོང་བར་འདོད། ཁོང་གིས་སྔ་ལངས་འཕྱི་ཉལ་གྱིས་འབད་པར་བརྟེན། རང་ཉིད་རྒྱལ་ཡོངས་སུ་གྲགས་པའི་དགེ་རྒན་མིང་གྲགས་ཅན་དང་སློབ་གཙོ་སྐད་གྲགས་ཅན་ཞིག་ཏུ་གྱུར་པ་མ་ཟད། ཁོང་གིས་རྩེ་གཅིག་ཏུ་བསྐྱངས་པའི་གཞུང་སྒྲུབ་སློབ་གྲྭ་དབྱང་སི་དང་དམངས་སྒྲུབ་སློབ་གྲྭ་གཡོང་ཝེ་གཉིས་ཀྱང་རྒྱལ་ཡོངས་སུ་གྲགས་པའི་སློབ་གྲྭ་གྲགས་ཅན་གཉིས་སུ་གྱུར།

2 ལྟ་འཁྲིད་སྦྱོང་གསུམ་གྱི་ལག་ལེན་ངོ་སྤྲོད།
2_1  ལག་ལེན་གྱི་སྤྱི་འགྲོས་དང་དེའི་བྱེད་ཐབས་གཙོ་བོ།

“ལྟ་འཁྲིད་སྦྱོང་གསུམ”གྱི་སློབ་ཁྲིད་བྱེད་ཐབས་ལ་ཁ་བྱང་འབྲི་བ་དང་དམིགས་ཚད་འཇོག་པ། རང་སྦྱོང་མཛུབ་སྟོན་སོགས་ཡོད། དེ་ལས་སྔོན་གྱི་རིམ་པ་གསུམ་ནི་སྦྱོར་བའམ་སྔོན་འགྲོའི་རིམ་པ(ཕལ་ཆེར་སྐར་མ1ཡས་མས)དང་། རྗེས་ཀྱི་རིམ་པ་གསུམ་ནི་དངོས་ཀྱི་རིམ་པའམ་རིམ་པ་གཙོ་བོ(ཕལ་ཆེར་སྐར་མ44ཡས་མས)ཡིན། གཤམ་དུ་དེའི་ལག་ལེན་བྱེད་ཐབས་ཀྱི་སྤྱི་འགྲོས་འཆད་པར་བྱ། 

2_1_1 འཁྲིད་བྱའི་ཁ་བྱང་འབྲི་བ།    

ཚིག་རེ་གཉིས་ཀྱིས་གླེང་སློང་བཞིན་ཁ་བྱང་འབྲི་བའམ། ཡང་ན་ཐད་ཀར་ཁ་བྱང་འབྲི་བ། ལག་ལེན་བྱེད་ཐབས་གཙོ་བོ།

① སྐད་གསལ་ཞིང་གདངས་མཐོ་ལ། འགྲོས་དལ་བ།  ②སྐབས་བབ་བརྗོད་བྱ་ལ་ཤར་གྱིས་འཇུག་ཅིང། བརྗོད་བྱ་དང་འབྲེལ་མེད་ཉོག་བཤད་མེད་པ།    ③སྤྱིར་བཏང་ཁ་བྱང་ནི་ནག་པང་གི་དབུས་གོང་དུ་འབྲི་དགོས་ལ། ཡི་གེའི་འབྲི་རིམ་མ་ནོར་ཞིང་ཆེ་ཆུང་ཚད་རན་ལ། མགོ་རྐང་འགྲིག་ཅིང་མཉམ་དགོས། ཡིག་འབྲུ་ཆེ་དྲགས་པའམ་ཆུང་དྲགས་མི་རུང་ལ། རྒྱུགས་བྲིས་བྱེད་ཀྱང་མི་རུང་།         ④བརྙན་ཡོལ་དུ་འཁྲིད་བྱའི་ཁ་བྱང་འཆར་བར་བྱེད་ཅིང་། དེར་རི་མོ་བཀྲག་མདངས་ཆེ་བ་སྦྱོར་མི་རུང་ལ་སྒྲ་དབྱངས་ཀྱང་བསྡེབ་མི་རུང་།

2_1_2 དམིགས་ཚད་འཇོག་པ།    

སློབ་སྦྱོང་གི་དམིགས་ཚད་ཅེས་པ་ནི་ཚོགས་ཐུན་གཅིག་གི་སློབ་ཁྲིད་དུ་སློབ་མར་འཐོབ་དགོས་པའི་འབྲས་བུའམ་སློབ་མར་སླེབ་དགོས་པའི་ཚད་གཞི་ལ་ཟེར་བ་ཡིན། དམིགས་ཚད་ནི་ཚོགས་ཐུན་དེའི་མཐར་ཐུག་གི་གཞོལ་བྱ་ཡིན་པས། ཚོགས་ཐུན་བྱེད་སྒོའི་ཐོག་མཐའ་བར་གསུམ་དུ་དམིགས་ཚད་ལ་གཟས་ནས་སློབ་ཁྲིད་བྱ་དགོས། གལ་སྲིད་ཚོགས་ཐུན་གཅིག་ལ་སློབ་སྦྱོང་གི་དམིགས་ཚད་གསལ་ཐག་ཆོད་ཅིག་མེད་ན། ཚོགས་ཐུན་དེར་ལས་ཆོད་ཆེ་ཆུང་དང་གྲུབ་འབྲས་བཟང་ངན་གྱི་དབྱེ་བ་འབྱེད་དཀའ་བར་འགྱུར།ལག་ལེན་བྱེད་ཐབས་གཙོ་བོ།       ①དམིགས་ཚད་བཞག་པ་དག་མོ་ཡིན་དགོས། གནས་ཚུལ་དངོས་ལ་གཞིགས་ཏེ་དམིགས་ཚད་ཀྱི་རྒྱས་ཚད་དང་ཟབ་ཚད་དེ་སློབ་དེབ་དང་བསླབ་ཚན་ཚད་གཞིའི་ཚད་དང་གཅིག་མཐུན་ཡོང་དགོས། ཚད་གཞི་གང་འདོད་ཀྱིས་མཐོ་བ་དང་དམའ་བར་གཏོང་མི་རུང་སྟེ། དཔེར་ན“སྤྱོད་ཤེས་དགོས”པའི(ཚོགས་ཐོག་ཏུ་བེད་སྤྱད་དེ་ནུས་པར་ཆགས་པ)ཤེས་བྱ་དེ་རང་འདོད་ཀྱིས“ཤེས་དགོས”པའི་ཚད་དུ་མར་འབེབས་པ་དང།“ཤེས་དགོས་པ”དང“རྒྱུས་ལོན”དགོས་པའི་ཤེས་བྱ་དེ་རང་འདོད་ཀྱིས“བེད་སྤྱོད”ཀྱི་ཚད་དུ་ཡར་སྤོར་བ་ལྟ་བུའོ། ། དམིགས་ཚད་དང་འཛོལ་མི་རུང་ལ་དམིགས་ཚད་ནོར་ཡང་མི་རུང་། སྐད་ཡིག་ནི་བསམ་བློ་ཀུན་སྤྱོད་དང་སྐྱེ་དངོས་ཀྱི་རྒྱུན་ཤེས་སུ་འཁྲིད་མི་རུང་ལ། བསམ་བློའི་ཆབ་སྲིད་ནི་སྐད་ཡིག་ཏུ་འཁྲིད་ཀྱང་མི་རུང་།    ②དམིགས་ཚད་བརྗོད་པ་གསལ་བོ་ཡིན་དགོས། དམིགས་ཚད་བརྗོད་པ་ཞིབ་ཆ་ལྡན་ཞིང་ཚིག་ཉུང་ལ་དོན་གསལ་བ་དང་། གོ་སླ་པོ། སློབ་མས་མཐོང་མ་ཐག་ཤེས་པར་འགྱུར་བ་ཞིག་ཡིན་དགོས། དམིགས་ཚད་བམ་བཤད་དམ་རགས་པ་ཆེ་ལོང་དུ་བརྗོད་མི་རུང་ལ། ནང་དོན་མང་ཐལ་ཡང་མི་རུང་།       ③དམིགས་ཚད་སྟོན་ཚུལ་འཚམ་པོ་ཡིན་དགོས། སྤྱིར་བཏང་དུ་གྲིབ་འཕྲོའམ་ནག་པང་ཆུང་ངུར་བྲིས་ནས་སྟོན་དགོས་ལ། ཡི་གེ་བྲིས་ལེགས་ཤིང་ཆེ་ཆུང་རན་པོར་བྲིས་ནས་གྲལ་མཇུག་གི་སློབ་མས་གསལ་བོར་མཐོང་བར་བྱ་དགོས། ཡིག་གཟུགས་ཆུང་དྲགས་མི་རུང་ལ་རི་མོའི་ཚོན་མདོག་གི་བཀྲག་མདངས་ཆེ་མི་རུང་།ལན་རེར་མ་བྲིས་པར་ངག་ལམ་ནས་བཤད་ཆོག་ཀྱང་། ཅིས་ཀྱང་སློབ་མ་སོ་སོས་གསལ་བོར་ཐོས་པ་དང་ཡིད་ལ་འཛིན་བདེ་བ་ཞིག་ཡིན་དགོས།        ④དམིགས་ཚད་སྟོན་པའི་དུས་ཚོད་རན་པོ་ཡིན་དགོས། སློབ་མས་བཀླགས་ཚར་རྗེས་ད་དུང་བསམ་བློ་གཏོང་ཁོམ་ཡོད་དགོས་པ་ལས། གྲིབ་འཕྲོའི་དམིགས་ཚད་ཀྱི་སྣང་བརྙན་མྱུར་དུ་གཞན་དུ་བརྗེ་མི་རུང་།        ⑤ དམིགས་ཚད་རྟོགས་བྱེད་ཐབས་མཁས་པོ་ཡིན་དགོས། དམིགས་ཚད་སྟོན་སྐབས། དགེ་རྒན་གྱིས་ཡིད་ཀྱི་འགྱུར་བར་བརྟེན་ནས་སློབ་མས་དམིགས་ཚད་ཀྱི་རེ་འདུན་རྟོགས་པར་ཐབས་ཀྱིས་འཁྲིད་ཅིང། དམིགས་ཚད་བསྟན་རྗེས་དགེ་རྒན་གྱིས་སློབ་མས་ཚོགས་ཐུན་འདིའི་དམིགས་ཚད་འགྲུབ་པར་སྐུལ་མ་གཏོང་དགོས། དགེ་རྒན་གྱིས་དགོས་མེད་ལས་ཀ་ལས་མི་རུང་ལ། སྤྲོས་བཤད་དམ་འབྲེལ་མེད་ཁ་བརྡ་བྱེད་ཀྱང་མི་རུང་།        ⑥དམིགས་ཚད་ཀྱི་བསྟན་བྱ་ཤེས་བྱ་དང་ནུས་པ་ཡིན་དགོས། རིག་གནས་ཚོགས་ཐུན་གྱི་དམིགས་ཚད་གཙོ་བོ་ནི་ཤེས་བྱ་རྟོགས་པ་དང་ནུས་པར་སྐྱེད་གདོན་རྒྱུ་དེ་ཡིན་ལ། དེ་མིན་ཡིད་འགྱུར་དང་རིན་ཐང་ལྟ་བ་སོགས་སློབ་སྦྱོང་གི་དམིགས་ཚད་ནི་དགེ་རྒན་རང་གིས་ཚོད་བཟུང་ནས། དགེ་རྒན་གྱི་ཕྱི་ཚུགས་དང་ཡིད་འགྱུར། ཉམས་འགྱུར། སློབ་ཁྲིད་སྒྱུ་རྩལ། ཐ་ན་དགེ་རྒན་རང་གི་བྱ་བྱེད་རེ་རེ་དང་བཅས་སློབ་ཁྲིད་ལ་སིམ་དགོས་པ་ལས། དེ་སློབ་མར་བསྟན་བྱའི་དམིགས་ཚད་དུ་འབྲི་མི་རུང་བ་ཤེས་པར་བྱའོ། །        ⑦དགེ་རྒན་ལ་དམིགས་ཚད་ཀྱི་འདུ་ཤེས་དྲག་པོ་ཡོད་དགོས། སློབ་སྦྱོང་གི་དམིགས་ཚད་གཞིར་བྱས་ཏེ། དམིགས་ཚད་དེ་རིམ་པ་སོ་སོའི་ཐོག་ལ་ཕབ་ནས། དུས་ནམ་ཡང་དམིགས་ཚད་ཀྱི་ཚད་གཞིས་སློབ་མའི་སློབ་སྦྱོང་གི་ལས་གྲུབ་ཡོད་མེད་ལ་བརྟག་དགོས།

2_1_3 རང་སྦྱོང་མཛུབ་སྟོན།  


སློབ་མའི་རང་སྦྱོང་ལ་དགེ་རྒན་གྱིས་མཛུབ་སྟོན་གནད་དུ་སྨིན་པ་བྱ་རྒྱུ་ནི་སྔོན་འགྲོའི་ཆ་རྐྱེན་ཡིན། དམིགས་ཚད་བཞག་རྗེས་དགེ་རྒན་གྱིས་སློབ་མས་རང་སྦྱོང་བྱེད་པར་མཛུབ་སྟོན་བྱ་དགོས་ལ། རང་སྦྱོང་མཛུབ་སྟོན་ནི་རྒྱུན་པར་བརྙན་ཡོལ་དུ་སྟོན་པ་རེད། རང་སྦྱོང་མཛུབ་སྟོན་ནི་ངེས་པར་དུ་གསལ་པོ་དང་ཞིབ་མོ་ཡིན་དགོས། དེ་ལྟར་ཡིན་ན་སློབ་མས་རང་སྦྱོང་བྱེད་པའི་སྐབས་སུ་སེམས་སུ་དམིགས་འབེན་གསལ་པོ་ཞིག་ཡོད་པས། སློབ་སྦྱོང་གི་ཆོད་ཇེ་ཆེར་འགྲོ་བ་རེད། དགེ་རྒན་གྱིས་སློབ་མའི་སེམས་སུ་རང་སྦྱོང་གི་སྦྱང་བྱ། སྦྱོང་ཐབས། སྦྱོང་ཡུན། སྦྱོང་ཚད(རང་སྦྱོང་བྱས་རྗེས་རྒྱུགས་ལེན་ཚུལ)བཞི་བོ་ངེས་སུ་འཇུག་དགོས། རང་སྦྱོང་ཡང་དམག་འཁྲུག་ལ་སྟ་གོན་བྱེད་པ་དང་འདྲ་བར། རྒྱུགས་སྤྲོད་དགོས་ཚེ། སློབ་མས་རིག་པ་བསྒྲིམས་ནས་བསམ་གཞིག་བྱེད་ཅིང་། རང་སྦྱོང་གི་ལས་ཆོད་ཆེ་རུ་འགྲོ་ཞིང་རང་སྦྱོང་བྱེད་ཐབས་ཤེས་པར་འགྱུར་བ་དང་། རང་སྦྱོང་གི་ནུས་པར་ཡང་ཡར་སྐྱེད་འོང་བ་རེད།ལག་ལེན་བྱེད་ཐབས་གཙོ་བོ།        ①སྦྱང་བྱ། སློབ་དེབ་ཏུ་སྦྱངས་ཟིན་པའི་ཤེས་བྱ་རྙིང་པ་མང་པོ་ཡོད་པ་དང་ཤེས་བྱ་གསར་པ་ཉུང་ཉུང་ཡིན་ཕྱིན། སློབ་མས་ཤེས་བྱ་གསར་པར་ལྟ་བར་མཛུབ་སྟོན་བྱེད་པ་དང་། ཤེས་བྱ་གསར་རྙིང་གཉིས་ཀྱི་འབྲེལ་མཚམས་གཙོ་གནད་དུ་བཟུང་ནས་བལྟ་དགོས། དཔེར་ན་མཉམ་བྱ་བསྒྲིགས་ནས་བེད་སྤྱོད་རྩིས་གཞི་བརྩི་བའི་ཚེ། བེད་སྤྱོད་རྩིས་གཞི་དེའི་མཉམ་བྱ་སྒྲིག་ཚུལ་ནི་གནད་དུ་བཟུང་ནས་བལྟ་རུ་འཇུག་པ་ལས། མཉམ་བྱ་འགྲོལ་ཐབས་སྔར་སྦྱངས་ཟིན་པས་དེར་བལྟ་རུ་འཇུག་པའི་དགོས་པ་མེད། གལ་ཏེ་སློབ་དེབ་ནང་དོན་སྣ་གཅིག་ཡིན་ན་རང་སྦྱོང་ཐེངས་གཅིག་གིས་ཚར་དགོས་པ་དང་། སློབ་དེབ་ཀྱི་ནང་དོན་མང་ན་ཐེངས་འགར་བགོས་ནས་རང་སྦྱོང་བྱེད་ཆོག་པ་མ་ཟད། སྦྱོང་ཐེངས་སོ་སོའི་སྔོན་ལ་སྦྱང་བྱའི་ནང་དོན་གསལ་བོར་བཤད་དགོས།        ②སྦྱོང་ཐབས། དཔེར་ན་དཔེ་ཆར་ལྟ་སྐབས། དཔེ་ཆར་ལྟ་ཞོར་དུ་ལག་ལེན་བྱའམ་ཡང་ན་དཔེ་ཆར་ལྟ་ཞོར་དུ་གྲལ་མཚེས་ལ་བགྲོ་གླེང་བྱ་བ་ལྟ་བུ་ལ། ཇི་ལྟར་བཟང་ན་དེ་ལྟར་བྱེད་ཆོག སྤྱིར་བཏང་དུ་སློབ་མར་རང་རྐྱ་འཕེར་བས་དཔེ་ཆ་ལྟ་བ་དང་བསམ་གཞིག་བྱེད་འཇུག་པའམ། ཡང་ན་ཀློག་ཞོར་དང་བསམ་ཞོར་ཡིད་ལ་འཛིན་ཞོར་བཅས་བྱས་ནས། རིག་པ་སྒྲིམ་བཞིན་སློབ་སྦྱོང་བྱེད་དུ་འཇུག་དགོས། དོགས་སློང་བྱེད་ཆོག་ཀྱང་སྐད་དམའ་མོས་གྲལ་མཚེས་ལ་འདྲི་བའམ་ལག་པ་བཀྱགས་ནས་དགེ་རྒན་ལ་འདྲི་བ་ལས། ལྟ་ཞོར་དང་བགྲོ་གླེང་བྱེད་ཞོར་བྱ་མི་རུང་།        ③སྦྱོང་ཡུན། དུས་ཡུན་རིང་ཐུང་ནི་ཚད་རན་ཞིང་གནས་ཚུལ་ལ་བསྟུན་དགོས། དེའི་རྒྱུ་མཚན་གང་ཡིན་ཞེ་ན། དཔེ་ཆར་བལྟ་བ་ནི་སྦྱོང་བརྡར་དང་། དག་བཅོས། བགྲོ་གླེང་། ཚོགས་ཐོག་ཏུ་ལས་བྱ་འགྲུབ་པའི་སྔོན་འགྲོ་ཡིན་པས། དཔེ་ཆར་བལྟས་པ་ངེས་པར་དུ་དོན་ཡོད་ཡིན་དགོས། སློབ་མར་རིག་པ་བསྒྲིམས་ནས་རང་སྦྱོང་གི་ལས་འགན་མྱུར་དུ་འགྲུབ་འཇུག་དགོས་པར་མ་ཟད། སློབ་མར་ནན་ཏན་གྱིས་དཔེར་ཆར་ལྟ་བཞིན་བསམ་གཞིག་ཀྱང་བྱེད་དུ་འཇུག་པའི་ཁོམ་པ་ཡོད་དགོས། སྦྱོང་ཡུན་རིང་དྲགས་ན་སློབ་མའི་སློབ་སྦྱོང་དེ་ནར་འགྱངས་སུ་འགྲོ་བ་དང་། དུས་ཡུན་ཐུང་དྲགས་ན་སློབ་མས་ནན་ཏན་གྱིས་དཔེ་ཆར་བལྟ་མི་ཐུབ་ཅིང། བལྟས་ཀྱང་བསམ་བློ་གཏོང་ཁོམ་མེད་པས་རང་སྦྱོང་ནི་ཕྱིའི་རྣམ་པ་ཙམ་དུ་འགྱུར་བས། ཚུལ་འདི་གཉིས་ཀ་སྤང་བྱའོ། །        ④སྦྱོང་ཚད། སློབ་མར་རྒྱུགས་ཇི་ལྟར་ལེན་ཚུལ་བཤད་པ་སྟེ། དཔེར་ན་སྐར་མ8ཀྱི་རྗེས་སུ། སློབ་དེབ་ཀྱི་ཁ་བསུམས་ནས་སུས་དྲི་བར་ལན་ཡང་དག་འདེབས་ཐུབ་པར་བལྟ་དགོས་ཞེས་པ་ལྟ་བུར། རང་སྦྱོང་ནི་རྒྱུགས་མ་བླངས་པའི་སྔོན་གྱི་རྒྱུགས་ཀྱི་སྟ་གོན་དུ་སོང་བས། སློབ་མས་དཔེ་ཆར་ལྟ་དུས་ངེས་པར་དུ་རིག་པ་བསྒྲིམས་ནས་བསམ་གཞིག་བྱེད་པ་རེད།        ⑤དགེ་རྒན་གྱིས་སློབ་མར་དོ་ཁུར་དང་ཡིད་ཆེས་བྱེད་པའི་ཉམས་འགྱུར་སྟོན་དགོས། རང་སྦྱོང་མཛུབ་སྟོན་བསྟན་རྗེས། དགེ་རྒན་གྱིས་སློབ་མ་ལ“ད་རང་སྦྱོང་འགྲན་སྡུར་གྱི་མགོ་འཛིན་རྒྱུ་ཡིན”ཟེར་ནས། སློབ་མ་རྣམས་དགའ་ཞིང་སྤྲོ་བས་རང་སྦྱོང་བྱེད་དུ་འཇུག་དགོས། འདིར་དགེ་རྒན་གྱི་སྐད་ཆ་ཚིག་ཉུང་ལ་འབྲེལ་མེད་ལས་ཀ་ལས་མི་རུང་ཞིང་ལབ་གླེང་བྱ་མི་རུང་བ་དང་། སློབ་མས་ཀྱང་འབྲེལ་མེད་རོལ་དབྱངས་ལ་ཉན་མི་རུང་བ་དང་གློག་བརྙན་ལ་བལྟ་མི་རུང་བ་ཤེས་པར་བྱའོ། །        ⑥རང་སྦྱོང་མཛུབ་སྟོན་གྱི་ཇུས་ཞིབ་མོ་འཐེན་དགོས། རིག་ཚན་མ་འདྲ་ན་དགེ་རྒན་གྱི་རང་སྦྱོང་མཛུབ་སྟོན་བྱེད་ཐབས་ཀྱང་མི་འདྲ་སྟེ། དཔེར་ན་བསམ་བློ་ཀུན་སྤྱོད། ལོ་རྒྱུས། ས་ཁམས། སྐྱེ་དངོས་སོགས་རྒྱུན་ཤེས་བསླབ་ཚན་གྱི་སློབ་ཁྲིད་ལ། དགེ་རྒན་གྱིས“བསམ་གཞིག་དྲི་གཞི”བཏོན་ནས་རང་སྦྱོང་ལ་མཛུབ་སྟོན་བྱ་དགོས།“བསམ་གཞིག་དྲི་གཞི”ནི་ཚོགས་ཐུན་གཅིག་གི་དགེ་སློབ་བར་གྱི་འཁྲིད་པ་དང་སྦྱོང་བའི“ལམ་རྟགས”ལྟ་བུ་ཡིན།“ལམ་རྟགས”དེ་ལ་བརྟེན་ནས་སློབ་མར་སློབ་སྦྱོང་དང་བགྲོ་གླེང་། དོགས་གནད་འགྲོལ་བར་མཛུབ་སྟོན་བྱས་ནས་སློབ་ཁྲིད་འགན་འཁུར་འགྲུབ་པར་བྱས་ན། སྦྱངས་པ་གོ་རིམ་གསལ་ཞིང་སྙིང་བོ་འབུར་དུ་ཐོན་པས་སློབ་ཁྲིད་གྲུབ་འབྲས་ཡག་པོ་ཡོང་བ་རེད།སྔོན་འགྲོའི་རིམ་པ་ལ། དངོས་སུ་ལག་ལེན་བྱེད་པའི་དུས་ཚོད་སྐར་མ་གཅིག་ལྷག་ལས་མེད་པས། དགེ་རྒན་གྱིས་གཙོ་བོར་ཚོགས་ཐུན་སྔོན་དུ་རྩལ་བཏོན་ནས་རང་སྦྱོང་མཛུབ་སྟོན་ཇུས་འགོད་བྱ་དགོས།


སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2018-08-01

གསར་སྤེལ་མཁན། :བསེ་ཆང་རྡོ་རིན།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།