ཨེ་ལྷ་རྒྱ་རི་ཕོ་བྲང་།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

རྩེད་ཐང་ནས་ཤར་ལྷོའི་ཕྱོགས་སུ་སྤྱི་ལེ50ཙམ་ཕྱིན་ན་ཆུ་གསུམ་རྫོང་ཁོངས་ཀྱི་ཨེ་ལྷ་རྒྱ་རི་ཕོ་བྲང་དུ་སླེབས་ཤིང་། ཕོ་བྲང་དེ་ནི་ཐོག་མར་དུས་རབས་བཅུ་གཉིས་པར་ས་གནས་སྲིད་དབང་འཛིན་མཁན་གྱི་ཁྱིམ་རྒྱུད་ཆེན་པོ་སྡེ་པ་རྒྱ་རི་བའི་རྒྱུད་རབས་ཀྱིས་གསར་དུ་བསྐྲུན་པ་ཞིག་རེད། དེ་ཡང་ལྷ་ཞེས་པ་ནི་ལྷ་སྲས་བཙན་པོའི་གདུང་རྒྱུད་ལས་མཆེད་པ་ཡིན་པས་ལྷ་ཞེས་དང་། རྒྱ་བོ་ཞེས་པ་ནི་བོད་ཀྱི་བཙན་པོའི་གདུང་རྒྱུད་དྲི་མ་མེད་པ་ཡར་ཀླུང་ཇོ་བོའི་རྒྱུད་དུ་རྒྱ་རི་ཁྲི་ཆེན་ཁྲི་ཐོག་དང་པོ་ལྷ་དགྲ་ལས་རྣམ་རྒྱལ་གྱིས་ཨེ་སྟོད་སིའུ་ཆུ་ཚན་ཁར་སླེབས་ཏེ་དེ་གར་བཞུགས་གནས་ཆུང་ངུ་ཞིག་བརྩིགས་ནས་བཞུགས་དུས་ཉིན་ཞིག་ཉེ་འདབས་ཀྱི་རི་ལ་མེ་འབར་བ་གཟིགས་པས་ཡ་མཚན་དུ་དགོངས་ནས་དཔྱད་པ་མཛད་སྐབས་རྩྭ་རྒྱ་བོ་རང་བྱུང་གི་མེ་འབར་བ་དེ་ནི་བཀྲ་ཤིས་པའི་སྔ་ལྟས་ཤིག་ཡིན་པ་མཁྱེན་ནས་གནས་དེར་དགོན་པ་དང་གཞིས་ཀ་སོགས་བརྩིགས་པས་རྒྱ་རི་དགོན་ཞེས་མིང་དུ་ཆགས། དེ་ནས་རིམ་པར་རྒྱ་རི་སྐུ་ཐོག་རིམ་བྱུང་གིས་ཕོ་བྲང་རྒྱ་བསྐྱེད་ཉམས་གསོ་མཛད་པས་ཨེ་ལྷ་རྒྱ་རིའི་ཕོ་བྲང་ཞེས་གངས་ལྗོངས་ཡོངས་ལ་རླུང་ལྟར་གྲགས་པ་དེ་བྱུང་།
གཞི་རྩའི་གནས་ཚུལ།

བཞེངས་མཁན།
ལྷ་དགྲ་ལས་རྣམ་རྒྱལ།
བཞེངས་ལོ།
དུས་རབས་བཅུ་གཉིས་པ།
གནས་ཡུལ།
བོད་རང་སྐྱོང་ལྗོངས་ཀྱི་ལྷོ་ཁ་ས་ཁུལ་གྱི་ཆུ་གསུམ་རྫོང་གི་ཁོངས་སུ་ཡོད།
1 ངོ་སྤྲོད།

རྩེད་ཐང་ནས་ཤར་ལྷོའི་ཕྱོགས་སུ་སྤྱི་ལེ50ཙམ་ཕྱིན་ན་ཆུ་གསུམ་རྫོང་ཁོངས་ཀྱི་ཨེ་ལྷ་རྒྱ་རི་ཕོ་བྲང་དུ་སླེབས་ཤིང་། ཕོ་བྲང་དེ་ནི་ཐོག་མར་དུས་རབས་བཅུ་གཉིས་པར་ས་གནས་སྲིད་དབང་འཛིན་མཁན་གྱི་ཁྱིམ་རྒྱུད་ཆེན་པོ་སྡེ་པ་རྒྱ་རི་བའི་རྒྱུད་རབས་ཀྱིས་གསར་དུ་བསྐྲུན་པ་ཞིག་རེད། དེ་ཡང་ལྷ་ཞེས་པ་ནི་ལྷ་སྲས་བཙན་པོའི་གདུང་རྒྱུད་ལས་མཆེད་པ་ཡིན་པས་ལྷ་ཞེས་དང་། རྒྱ་བོ་ཞེས་པ་ནི་བོད་ཀྱི་བཙན་པོའི་གདུང་རྒྱུད་དྲི་མ་མེད་པ་ཡར་ཀླུང་ཇོ་བོའི་རྒྱུད་དུ་རྒྱ་རི་ཁྲི་ཆེན་ཁྲི་ཐོག་དང་པོ་ལྷ་དགྲ་ལས་རྣམ་རྒྱལ་གྱིས་ཨེ་སྟོད་སིའུ་ཆུ་ཚན་ཁར་སླེབས་ཏེ་དེ་གར་བཞུགས་གནས་ཆུང་ངུ་ཞིག་བརྩིགས་ནས་བཞུགས་དུས་ཉིན་ཞིག་ཉེ་འདབས་ཀྱི་རི་ལ་མེ་འབར་བ་གཟིགས་པས་ཡ་མཚན་དུ་དགོངས་ནས་དཔྱད་པ་མཛད་སྐབས་རྩྭ་རྒྱ་བོ་རང་བྱུང་གི་མེ་འབར་བ་དེ་ནི་བཀྲ་ཤིས་པའི་སྔ་ལྟས་ཤིག་ཡིན་པ་མཁྱེན་ནས་གནས་དེར་དགོན་པ་དང་གཞིས་ཀ་སོགས་བརྩིགས་པས་རྒྱ་རི་དགོན་ཞེས་མིང་དུ་ཆགས། དེ་ནས་རིམ་པར་རྒྱ་རི་སྐུ་ཐོག་རིམ་བྱུང་གིས་ཕོ་བྲང་རྒྱ་བསྐྱེད་ཉམས་གསོ་མཛད་པས་ཨེ་ལྷ་རྒྱ་རིའི་ཕོ་བྲང་ཞེས་གངས་ལྗོངས་ཡོངས་ལ་རླུང་ལྟར་གྲགས་པ་དེ་བྱུང་།

དེ་ཡང་ལྷ་རྒྱ་རིའི་ཕོ་བྲང་ནི་གད་པ་ཐོག་བརྩེགས་ཉི་ཤུ་ཙམ་ཡོད་པའི་ས་བབ་ངོ་མཚར་ཅན་ཞིག་གི་སྟེང་དུ་ཆགས་ཤིང་། ཕོ་བྲང་ལྟེ་བའི་བཟོ་སྐྲུན་ཞེང་ཚད་སྨི31དང་རིང་ཚད་སྨི22མཐོ་ཚད་ཐོག་བརྩེགས་ལྔ་ཡོད་པའི་མདུན་ངོས་སུ་དཀར་གཞལ་ཞེས་པ་འཁྱམས་ཤིན་ཏུ་ཆེ་བ་ཞིག་ཡོད་པ་དེའི་མཐའ་སྐོར་དུ་རྡོ་ཚོས་གཞི་འདྲ་མིན་སྣ་ཚོགས་བསྒྲིགས་པའི་མཛེས་རིས་བཀྲ་ཤིས་རྟགས་བརྒྱད་དང་། རྒྱལ་སྲིད་སྣ་བདུན། འདོད་ཡོན་སྣ་ལྔ་སོགས་ཀྱིས་ཕྱུགས་པ་རྒྱ་ཁྱོན་ཡངས་ཤིང་མཛེས་སྡུག་ལྟ་བས་མི་ངོམས་པ་ཞིག་ཡོད། ད་དུང་རྫོང་ཟུར་ཞེས་པ་ཐོག་བརྩེགས་བཞི་ལྡན་གྱི་ཁང་པ་དམར་པོ་ཞིག་ཡོད་པ་དེ་ནི་རིང་ལྷ་རྒྱལ་མཚན་གྱི་མགོན་ཁང་ཡིན་པ་དང་། གཞན་ཡང་ཕོ་བྲང་གི་བྱང་ངོས་གྲོག་ཤུར་ནང་དུ་ལྷ་རྒྱ་རི་ཁྲི་ཐོག་མཇུག་མ་རྣམ་རྒྱལ་རྒྱ་མཚོས་སྤྱི་ལོ1948ལོར་བཞེངས་པའི་དབྱར་སྐྱིད་སྤྲོ་ཁང་རྒྱ་བཟོའི་ལུགས་བཟོ་དབྱིབས་ལེགས་ལ་སྒེའུ་ཁུང་དང་བཅད་ཁྲ་སོགས་ལ་ཤིང་བརྐོས་བྱ་འབྲུག་དང་། རྩི་ཤིང་མེ་ཏོག་གི་རི་མོ་མཛེས་པར་བརྒྱན་པའི་ཁང་བཟང་གི་ཁོར་མོ་ཡུག་སྤང་ལྗོངས་དང་། མེ་ཏོག་སྣ་ཚོགས། འབྲས་ལྡན་ལྗོན་ཤིང་སོགས་ཀྱིས་ཡོངས་སུ་བསྐོར་བ་དེ་ནི་ལྷ་སའི་ནོར་བུ་གླིང་ཁ་གཉིས་པ་ཡིན་ཞེས་ཡོངས་སུ་གྲགས་པ་དོན་དང་མཐུན།

དེས་ན་ལྷ་རྒྱ་རི་ཕོ་བྲང་གི་ལོ་རྒྱུས་རིན་ཐང་དང་། བཟོ་སྐྲུན་སྒྱུ་རྩལ། གནས་ཡུལ་ཁྱད་ཆོས་སོགས་བོད་ཡུལ་ན་མཐོང་བར་དཀོན་པ་ཞིག་ཡིན་པས་རྒྱ་རི་ཕོ་བྲང་འདི་ཉིད་ལྷོ་ཁའི་ཡུལ་སྐོར་གནས་ལྗོངས་ཁྱད་དུ་འཕགས་པ་ཞིག་ཡིན་པར་བསྙོན་དུ་མེད་དོ།།

སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2017-10-25

གསར་སྤེལ་མཁན། :ཚེ་རིང་འབུམ།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།