བྱེ་བྲག་སྨྲ་བའི་གྲུབ་མཐའི་རྣམ་བཞག
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

བྱེ་བྲག་སྨྲ་བ་ནི་ནང་བའི་གྲུབ་མཐའ་བཞིའ་ཡ་གྱལ་ཞིག་སྟེ། 《བྱེ་བྲག་བཤད་མཚོ་ཆེན་མོ》འི་རྗེས་སུ་འབྲངས་ནས་སྨྲ་བས་སམ། དུས་གསུམ་རྫས་ཀྱི་བྱེ་བྲག་ཏུ་སྨྲ་བས་ན་དེ་ལྟར་གྲགས་སོ།།
གཞི་རྩའི་གནས་ཚུལ།

ཁོངས་གཏོགས།
ཆོས་ལུགས།
རིགས་དབྱེ།
གྲུབ་མཐའ།
1 བྱེ་བྲག་སྨྲ་བ་བྱུང་ཚུལ།

བྱེ་བྲག་སྨྲ་བ་ནི་སྟོན་པ་སངས་རྒྱས་ཀྱི་དུས་ནས་ཡོད་ཅིང་ཁོ་ཚོས་བདེན་བཞིའི་ཆོས་འཁོར་གྲུབ་མཐའི་ཁུངས་གཏུག་ས་ཡིན་ལ་ཁོ་ཚོའི་རང་གཞུང་ངོ་མ་ནི་མངོན་པ་སྡེ་བདུན་དང་བྱེ་བྲག་བཤད་མཚོ་ཆེན་པོ་གཉིས་ཡིན།མངོན་པ་སྡེ་བདུན་ནི་ཤཱ་རིའི་བུས་བརྩམས་པའི་ཆོས་ཀྱི་ཕུང་བོ། མོའུ་འགལ་བུས་བརྩམས་པའི་གདགས་པའི་བསྟན་བཅོས། དགྲ་བཅོམ་པ་ལྷ་སྐྱིད་ཀྱིས་མཛད་པའི་རྣམ་ཤེས་ཚོགས་དྲུག  འཕགས་པ་ཀ་ཏྱའི་བུས་མཛད་པའི་ཡེ་ཤེས་ལ་འཇུག་པ།དགྲ་བཅོམ་པ་གང་བོས་མཛད་པའི་ཁམས་ཀྱི་ཚོགས།དབྱིག་བཤེས་ཀྱི་རབ་ཏུ་བཤད་པ། གསུས་བོ་ཆེས་མཛད་པའི་ཡང་འགྲོ་བའི་རྣམ་གྲངས་བཅས་ཡིན་ལ་བྱེ་བྲག་སྨྲ་བ་ཁོ་ཚོས་འདི་དག་སངས་རྒྱས་ཀྱི་བཀའ་ཡིན་ལ་དགྲ་བཅོམ་པ་དེ་དག་གིས་བསྡུས་པ་ལས་རྩོམ་པ་བོ་སྟོན་པ་སངས་རྒྱས་ཡིན་པར་ཁས་ལེན་ནོ།། བྱེ་བྲག་བཤད་མཚོ་ཆེན་པོ་ནི་སྟོན་པ་མྱ་ངན་ལས་འདས་པའི་ཕྱི་ལོའི་དབྱར་ཁར་དགྲ་བཅོམ་པ་ལྔ་བརྒྱ་གསང་བའི་བྲག་ཕུག་ཅེས་བྱ་བར་ཆོས་བསྡུ་བ་ལ་འདུས་པའི་དུས་སུ་བརྩམས་པའི་བྱེ་བྲག་བཤད་པ་ཆེན་མོའི་མཛོད་ཞེས་བྱ་བ་ཤོ་ལོ་ཀ་འབུམ་ཡོད་པ།  བྱེ་བྲག་སྨྲ་བའི་གཞུང་ཞིབ་རྒྱས་སུ་སྟོན་པ་ཞིག་ཡིན།  དེའི་རྗེས་སུ་འབྲངས་ནས་གྲུབ་མཐའ་སྨྲ་བས་ན་བྱེ་བྲག་སྨྲ་བ་ཟེར་སྲོལ་ཞིག་དང་དུས་གསུམ་རྫས་ཀྱི་བྱེ་བྲག་ཏུ་སྨྲས་པས་བྱེ་བྲག་སྨྲ་བ་ཟེར་བའི་སྲོལ་གཉིས་ཡོད།

2 མཚན་ཉིད། 

རང་རིག་མི་འདོད་ཅིང་ཕྱི་དོན་བདེན་གྲུབ་ཏུ་འདོད་པའི་ཐེག་དམན་གྱི་གྲུབ་མཐའ་སྨྲ་བའི་གང་ཟག་དེ་བྱེ་བྲག་སྨྲ་བའི་མཚན་ཉིད། 

3 དབྱེ་བ། 

ཁ་ཆེ་བྱེ་བྲག་སྨྲ་བ། ཉི་འོག་པ། ཡུལ་དབུས་ཀྱི་བྱེ་བྲག་སྨྲ་བ། 

4 སྒྲ་བཤད། 

བྱེ་བྲག་བཤད་མཚོ་ཆེན་མོའི་རྗེས་སུ་འབྲངས་ནས་སྨྲ་བས་སམ། དུས་གསུམ་རྫས་ཀྱི་བྱེ་བྲག་ཏུ་སྨྲ་བས་བྱེ་བྲག་སྨྲ་བ་ཞེས་བརྗོད་པའི་ཕྱིར་རོ། 

5 འདོད་ཚུལ། 

འདོད་ཚུལ་ལ་གཞིའི་འདོད་ཚུལ་དང་ལམ་གྱི་འདོད་ཚུལ། འབྲས་བུའི་འདོད་ཚུལ་བཅས་སོ།།

དང་བོ་ཡུལ་གྱི་འདོད་ཚུལ་ནི། ཤེས་བྱ་ཐམས་ཅད་གཞི་ལྔར་འདུས་པར་འདོད་དེ། གཞི་ལྔ་ནི། སྣང་བ་གཟུགས་ཀྱི་གཞི་དང་། གཙོ་བོ་སེམས་ཀྱི་གཞི། འཁོར་སེམས་བྱུང་གི་གཞི། ལྡན་པ་མ་ཡིན་པའི་འདུ་བྱེད་ཀྱི་གཞི། འདུས་མ་བྱས་ཀྱི་གཞི་རྣམས་སོ། །

གཉིས་པ་ཡུལ་ཅན་གྱི་འདོད་ཚུལ་ལ། གང་ཟག་དང་། ཤེས་པ། རྗོད་བྱེད་ཀྱི་སྒྲ་གསུམ་ལས། དང་བོ་ནི། གདགས་གཞི་ཕུང་བོ་ལྔའི་ཚོགས་ཙམ་གང་ཟག་གི་མཚན་གཞི་ཡིན་ལ། མང་བོས་བཀུར་བ་ཁ་ཅིག་གིས། ཕུང་བོ་ལྔ་ཆར་གང་ཟག་གི་མཚན་གཞི་དང་། སྲུང་བ་བས། སེམས་གཅིག་པུ་གང་ཟག་གི་མཚན་གཞིར་འདོད་དོ། །གཉིས་པ་ཤེས་པ་ལ། ཚད་མ་དང་ཚད་མིན་གྱི་ཤེས་པ་གཉིས་ལས། དང་བོ་ལ། མངོན་སུམ་གྱི་ཚད་མ་དང་། རྗེས་སུ་དཔག་པའི་ཚད་མ་སྟེ་གཉིས་ཡོད། དང་བོ་ལ། དབང་བོའི་མངོན་སུམ་དང་། ཡིད་ཀྱི་མངོན་སུམ། རྣལ་འབྱོར་མངོན་སུམ་སྟེ་གསུམ་ཡོད་ཀྱང་། རང་རིག་མངོན་སུམ་ཁས་མི་ལེན་ནོ། །གསུམ་པ་རྗོད་བྱེད་ཀྱི་སྒྲ་ནི། སྤྱིར་སྒྲ་ཙམ་ལ་དབྱེ་ན། ཟིན་པའི་སྒྲ་དང་། མ་ཟིན་པའི་སྒྲ་སྟེ་གཉིས་ཡོད། དང་བོ་ནི། སྐྱེས་བུའི་ངག་ཏུ་གྱུར་པའི་སྒྲ་ལྟ་བུ་དང་། གཉིས་པ་ནི། ཆུ་སྒྲ་ལྟ་བུའོ། །ཟིན་མ་ཟིན་གྱི་སྒྲ་རེ་རེ་ལ་ཡང་སེམས་ཅན་དུ་དོན་སྟོན་མི་སྟོན་གཉིས་གཉིས་ཡོད་པ་ཡིན་ནོ། །

གཉིས་པ་ལམ་གྱི་འདོད་ཚུལ་ལ། ལམ་གྱི་དམིགས་པ་དང་། སྤང་བྱ། རང་བཞིན་གསུམ་ལས། དང་བོ་ནི། བདེན་བཞིའི་ཁྱད་ཆོས་མི་རྟག་སོགས་བཅུ་དྲུག་ཡིན་ལ། བདག་མེད་ཕྲ་མོ་དང་གང་ཟག་གི་བདག་མེད་ཕྲ་མོ་དོན་གཅིག་ཏུ་འདོད་ཅིང་། གང་ཟག་རང་རྐྱ་ཐུབ་པའི་རྫས་ཡོད་ཀྱིས་སྟོང་བ་གང་ཟག་གི་བདག་མེད་ཕྲ་མོ་དང་། གང་ཟག་རྟག་གཅིག་རང་དབང་ཅན་གྱིས་སྟོང་བ་གང་ཟག་གི་བདག་མེད་རགས་པར་འདོད་དོ། །ཆོས་ཀྱི་བདག་མེད་ཕྲ་རགས་ཀྱི་རྣམ་གཞག་ཁས་མི་ལེན་ནོ། །གཉིས་པ་ལམ་གྱི་སྤང་བྱ་ལ། ཉོན་མོངས་ཅན་དང་ཉོན་མོངས་ཅན་མ་ཡིན་པའི་མི་ཤེས་པ་གཉིས་ལས། དང་བོ་ནི། གཙོ་བོ་ཐར་པ་འཐོབ་པ་ལ་བར་དུ་གཅོད་པ་སྟེ། མཚན་གཞི་ནི། གང་ཟག་གི་བདག་འཛིན་དང་། དེའི་དབང་གིས་བྱུང་བའི་དུག་གསུམ་ས་བོན་དང་བཅས་པ་ལྟ་བུའོ། །གཉིས་པ་ནི། གཙོ་བོ་ཐམས་ཅད་མཁྱེན་པ་འཐོབ་པ་ལ་བར་དུ་གཅོད་པ་སྟེ། མཚན་གཞི་ནི། དེ་བཞིན་གཤེགས་པའི་ཆོས་ཟབ་ཅིང་ཕྲ་བ་མི་ཤེས་པའི་ཉོན་མོངས་ཅན་མ་ཡིན་པའི་སྒྲིབ་པ་སོགས་མི་ཤེས་པའི་རྒྱུ་བཞི་ལྟ་བུའོ། །གསུམ་པ་ལམ་གྱི་རང་བཞིན་ནི། ཐེག་པ་གསུམ་གྱི་ལམ་ལ། ཚོགས་ལམ་དང་། སྦྱོར་ལམ། མཐོང་ལམ། སྒོམ་ལམ། མི་སློབ་ལམ་སྟེ་ལམ་ལྔ་ལྔའི་རྣམ་གཞག་ཁས་ལེན་ཡང་ས་བཅུའི་ཡེ་ཤེས་མི་འདོད་དོ། །

གསུམ་པ་འབྲས་བུའི་འདོད་ཚུལ་ལ། ཉན་ཐོས་ཀྱི་རིགས་ཅན་རྣམས་ཀྱིས་མི་རྟག་སོགས་བཅུ་དྲུག་ཚེ་གསུམ་ལ་སོགས་པའི་བར་དུ་གོམས་པར་བྱས་ནས་མཐར་ཉན་ཐོས་ཀྱི་སྒོམ་ལམ་རྡོ་རྗེ་ལྟ་བུའི་ཏིང་ངེ་འཛིན་ལ་བརྟེན་ནས། ཉོན་མོངས་ཅན་གྱི་སྒྲིབ་པ་ཐོབ་པ་ཆད་པའི་ཚུལ་གྱིས་སྤངས་ཏེ་དགྲ་བཅོམ་པའི་འབྲས་བུ་མངོན་དུ་བྱེད་དོ། །

6 བྱེ་བྲག་སྨྲ་བའི་སློབ་དཔོན། 

བྱེ་བྲག་སྨྲ་བའི་སློབ་དཔོན་གྲགས་ཆེ་བ་ནི་དབྱིག་བཤེས་དང་ཆོས་སྐྱོབ།སངས་རྒྱས་ལྷ།  འདུས་བཟང་སོགས་ཡིན་ལ་དེ་སྟོན་པ་མྱ་ངན་ལས་འདས་ནས་ལོ་བརྒྱ་དང་བཅུ་དྲུག་ལོན་པ་ན་མཁན་པོ་དགྲ་བཅོམ་པ་འོད་སྲུངས་ཆེན་པོ་ནས་བརྒྱུད་པར་ཕལ་ཆེན་སྡེ་བ་ཟེར་ཏེ་དགེ་འདུན་ཕལ་ཆེ་བ་འདུས་པས་ན་ཕལ་ཆེན།ཉེ་བར་འཁོར་ནས་བརྒྱུད་པ་ལ་མང་བཀུར་སྡེ་བ་ཟེར་ཏེ་སྐྱེ་བོ་མང་བོས་བཀུར་བའི་སློབ་དཔོན་གྱི་ལུགས་སྟོན་པས་མང་བོ་བཀུར་བ།དགྲ་གཅན་འཛིན་ལས་བརྒྱུད་པ་ལ་གཞི་ཐམས་ཅད་ཡོད་པར་སྨྲ་བ་ཟེར་ཏེ་ཡ་རབས་ལས་འཇིག་རྟེན་པའི་ཆོས་འབྱུང་བཞིན་དུ་སྡེ་བ་གཞན་གྱི་ཆོས་ལུགས་འབྱུང་བའི་གཞི་ཡིན་པས་སོ།། ཀཱ་ཏྱཱ་ཡ་ན་ནས་བརྒྱུད་པ་གནས་བརྟན་འཕགས་པའི་རིགས་ཡིན་པར་སྨྲ་བས་ན་གནས་བརྟན་སྡེ་བ་ཟེར།

7 སྡེ་བ་བཅོ་བརྒྱད་དུ་གྱེས་ཚུལ། 

སྡེ་པ་བཅོ་བརྒྱད་ཀྱི་གྱེས་ཚུལ་ནི། རྟོག་གེ་འབར་བར་ལུགས་གསུམ་བཤད་པའི་དང་པོ་ནི། གོང་དུ་བཤད་པ་ལྟར་སྟོན་པ་མྱ་ངན་ལས་འདས་ནས་ལོ་བརྒྱ་དང་བཅུ་དྲུག་ན་གྲོང་ཁྱེར་མེ་ཏོག་གིས་རྒྱས་པ་ཞེས་བྱ་བ་ན་རྒྱལ་པོ་དྷརྨ་ཨ་ཤོ་ཀ་ཞེས་བྱ་བས་རྒྱལ་སྲིད་བྱེད་པའི་ཚེ་རྩོད་པའི་ཆོས་འགའ་ཞིག་བྱུང་བའི་དབང་གིས་དགེ་འདུན་གྱི་དབེན་ཆེན་པོར་གྱུར་ཏོ།། དེ་ནས་རེ་ཞིག་སྡེ་པ་གཉིས་སུ་ཆད་ནས་གནས་ཏེ། དགེ་འདུན་ཕལ་ཆེན་པ་དང་། གནས་བརྟན་པའོ།། དེ་ལ་དགེ་འདུན་ཕལ་ཆེན་པའི་སྡེ་པ་ཡང་རིམ་གྱིས་ཕྱེ་བར་གྱུར་པ་ན་རྣམ་པ་བརྒྱད་དུ་གནས་ཏེ། འདི་ལྟར། དགེ་འདུན་ཕལ་ཆེན་པའི་སྡེ་པ་དང་། ཐ་སྙད་གཅིག་པ་དང་། འཇིག་རྟེན་ལས་འདས་པར་སྨྲ་བ་དང་། མང་དུ་ཐོས་པ་དང་། བཏགས་པར་སྨྲ་བ་དང་། མཆོད་རྟེན་པ་དང་། ཤར་གྱི་རི་བོ་པ་དང་། ནུབ་ཀྱི་རི་བོ་པ་རྣམས་སོ།། གནས་བརྟན་པ་ཡང་རིམ་གྱིས་ཕྱེ་བར་གྱུར་ནས། རྣམ་པ་བཅུར་གནས་ཏེ། འདི་ལྟ་སྟེ། གནས་བརྟན་པ་དང་། ཐམས་ཅད་ཡོད་པར་སྨྲ་བ་དང་། གནས་མ་བུ་པ་དང་། ཆོས་མཆོག་པ་དང་། བཟང་པོའི་ལམ་པ་དང་། ཀུན་གྱིས་བཀུར་བ་དང་། མང་སྟོན་པ་དང་། ཆོས་སྦས་པ་དང་། ཆར་བཟང་འབེབས་པ་དང་། བླ་མ་པ་ཞེས་བྱ་བ་རྣམས་སོ།། དེ་ལ་གནས་བརྟན་པའི་མིང་གཉིས་པ་ནི། གངས་རི་པ་ཞེས་ཀྱང་བྱའོ།། ཡོད་སྨྲ་བའི་མིང་གཞན་ཡང་རྣམ་པར་ཕྱེ་སྟེ་སྨྲ་བ་དང་། རྒྱུར་སྨྲ་བ་དང་། ཁ་ཅིག་མུ་ཏུན་ཏ་ཀ་པ་ཞེས་ཀྱང་ཟེར་རོ།། ཀུན་གྱིས་བཀུར་བའི་མིང་གཞན་ནི། ཨབ་ན་ཏ་ཀ་པ་དང་། ཀུ་རུ་ཀུ་ལླ་པ་ཞེས་ཀྱང་ཟེར་རོ།། ཆར་བཟང་འབེབས་པའི་མིང་གཉིས་པ་འོད་སྲུངས་པ་ཞེས་ཀྱང་ཟེར། བླ་མ་པ་ལ་ཡང་ཁ་ཅིག་འཕོ་བར་སྨྲ་བ་ཞེས་ཟེར་རོ།། ལུགས་གཉིས་པ་ནི། ཕྱེ་བའི་དུས་དང་། གནས་དང་། རྒྱུ་མཚན་སྔ་མ་དང་། འདྲ་བ་ལ་རྩ་བའི་དབྱེ་བ་རྣམ་པ་གསུམ་སྟེ། འདི་ལྟར། གནས་བརྟན་པ་དང་། དགེ་འདུན་ཕལ་ཆེན་པ་དང་། རྣམ་པར་ཕྱེ་སྟེ་སྨྲ་བའོ།། གནས་བརྟན་པ་ཡང་གཉིས་ཏེ། ཐམས་ཅད་ཡོད་པར་སྨྲ་བ་དང་། གནས་མའི་བུའི་སྡེ་པའོ།། ཡོད་སྨྲ་བ་ཡང་གཉིས་ཏེ། དེ་ཉིད་དང་། མདོ་སྡེ་སྨྲ་བའོ།། གནས་མའི་བུ་པ་ཡང་བཞི་སྟེ། མང་པོས་བཀུར་བ་དང་། ཆོས་མཆོག་པ་དང་། བཟང་པོའི་ལམ་པ་དང་། གྲོང་ཁྱེར་དྲུག་པ་རྣམས་སོ།། དེ་ལྟར་ན་གནས་བརྟན་པ་ནི་དྲུག་ཏུ་གནས་སོ།། དགེ་འདུན་ཕལ་ཆེན་པོ་ཡང་རྣམ་པ་བརྒྱད་དེ། འདི་ལྟར། དེ་ཉིད་དང་། ཤར་གྱི་རི་བོ་པ་དང་། ནུབ་ཀྱི་རི་བོ་པ་དང་། རྒྱལ་པོའི་རི་བོ་པ་དང་། གངས་རི་པ་དང་། དོན་གྲུབ་པ་དང་། མཆོད་རྟེན་པ་དང་། བ་ལང་གནས་པ་ཞེས་བྱ་བ་རྣམས་སོ།། རྣམ་པར་ཕྱེ་སྟེ་སྨྲ་བ་ཡང་བཞི་སྟེ། ས་སྟོན་པ་དང་། འོད་སྲུངས་པ་དང་། ཆོས་སྦས་པ་དང་། གོས་དམར་བ་ཞེས་བྱ་བ་རྣམས་སོ།། ལུགས་གསུམ་པ་ནི། བཅོམ་ལྡན་འདས་མྱ་ངན་ལས་འདས་ནས་ལོ་བརྒྱ་དང་སུམ་ཅུ་རྩ་བདུན་ལོན་པ་ན། རྒྱལ་པོ་དགའ་བོ་དང་། པདྨ་ཆེན་པོ་ཞེས་བྱ་བས་གྲོང་ཁྱེར་པ་ཏ་ལ་པུ་ཏྲའི་ནང་དུ། སྡུད་པར་བྱེད་པ་ལ་སོགས་པའི་འཕགས་པ་ཕལ་ཆེ་བ་ནི། ཡང་ལེན་པ་མེད་པར་བསིལ་བའི་དངོས་པོ་ཐོབ་པར་གྱུར་པ་ན། འཕགས་པ་འོད་སྲུངས་ཆེན་པོ་དང་། འཕགས་པ་ཡུ་ཆེན་པོ་དང་། གཏོང་བ་ཆེན་པོ་དང་། བླ་མ་དང་། རེ་པ་ཏ་ལ་སོགས་པ་སོ་སོ་ཡང་དག་པར་རིག་པ་ཐོབ་པའི་དགྲ་བཅོམ་པའི་དགེ་འདུན་དེ་ལྟར་བཞུགས་པ་ན། བདུད་སྡིག་ཅན་བཟང་པོ་ཐམས་ཅད་ཀྱི་མི་མཐུན་པའི་ཕྱོགས་སུ་གྱུར་པ། དགེ་སློང་གི་ཆ་བྱད་འཛིན་པས། སྒྱུ་འཕྲུལ་སྣ་ཚོགས་བསྟན་ཏེ། གཞི་ལྔས་དགེ་འདུན་གྱི་དབེན་ཆེན་པོ་བསྐྱེད་དེ། གནས་བརྟན་ཀླུ་ཞེས་བྱ་བ་དང་། ཡིད་བརྟན་པ་ཞེས་བྱ་བ་མང་དུ་ཐོས་པ་དག་གིས་གཞི་ལྔ་བསྔགས་པར་བྱེད་དོ།། གཞི་ལྔ་ནི་རྗེས་སུ་སྟོན་པར་བྱེད་ཅིང་དེས་གཞན་ལ་ལན་གདབ་པ་དང་། མི་ཤེས་པ་དང་། ཡིད་གཉིས་དང་། ཡོངས་སུ་བརྟག་པ་དང་། བདག་ཉིད་གསོ་བར་བྱེད་པ་ནི་ལམ་ཡིན་ཏེ། འདི་ནི་སངས་རྒྱས་ཀྱི་བསྟན་པ་ཡིན་ནོ་ཞེས་ཟེར་རོ།། དེ་ནས་དགེ་འདུན་སྡེ་གཉིས་སུ་ཆད་ནས་གནས་ཏེ།གནས་བརྟན་པ་དང་།ཕལ་ཆེན་སྡེ་པའོ།།དེ་ལྟར་ལོ་དྲུག་ཅུ་རྩ་གསུམ་བར་དུ་དགེ་འདུན་ཕྱེ་ནས་འཁྲུག་ལོང་གིས་གནས་སོ།། དེ་ནས་སྟོན་པ་མྱ་ངན་ལས་འདས་ནས་ལོ་བརྒྱ་ཕྲག་གཉིས་འདས་པ་ན་གནས་བརྟན་གནས་མའི་བུས་བསྟན་པ་ཡང་དག་པར་བསྡུས་སོ།། དེས་ཡང་དག་པར་བསྡུས་པའི་རྗེས་ལ། དགེ་འདུན་ཕལ་ཆེན་པ་ནི་རྣམ་པ་དྲུག་ཏུ་གྱེས་ལ། གནས་བརྟན་པ་ནི་རྣམ་པ་བཅུ་གཉིས་སུ་གྱེས་ཏེ་གནས་པར་བཤད་དོ།། སློབ་དཔོན་དུལ་བ་ལྟས་ནི། ཤར་དང་ནུབ་དང་གངས་རི་དང་།། འཇིག་རྟེན་འདས་པར་སྨྲ་བ་དང་།། བརྟག་པར་སྨྲ་བའི་སྡེ་པ་རྣམས།། ལྔ་ཚན་དགེ་འདུན་ཕལ་ཆེན་པ།། གཞི་ཀུན་པ་དང་འོད་སྲུངས་སྟེ།། ས་སྲུང་སྡེ་དང་ཆོས་སྲུང་སྡེ།། མང་ཐོས་གོས་དམར་སློབ་མ་དང་། རྣམ་པར་ཕྱེ་སྟེ་སྨྲ་བའི་སྡེ། ཐམས་ཅད་ཡོད་པར་སྨྲ་བ་ཡིན།། རྒྱལ་བྱེད་ཚལ་གནས་འཇིགས་བྱེད་གནས།། གཙུག་ལག་ཁང་ཆེན་གནས་བརྟན་པ།། ས་སྒྲོགས་རིས་དང་སྲུང་བ་པ།། གནས་མའི་བུ་ཡི་སྡེ་རྣམས་ནི།། ཀུན་གྱིས་བཀུར་བ་རྣམ་པ་གསུམ།། ཡུལ་དོན་སློབ་དཔོན་བྱེ་བྲག་གིས།། ཐ་དད་རྣམ་པ་བཅོ་བརྒྱད་གྱུར།། ཞེས་བཤད་དོ།།

སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2017-11-14

གསར་སྤེལ་མཁན། :གདུགས་དཀར་རྒྱལ།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།