ཐོ་རྒྱ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

ཐོ་རྒྱ་ཞེས་པ་ནི་རྨ་ལྷོ་བོད་རིགས་རང་སྐྱོང་ཁུལ་རེབ་གོང་རྫོང་རོང་བོ་གྲོང་རྡལ་གྱི་བྱང་ཕྱོགས་སུ་སྤྱི་ལེ་བཅོ་ལྔ་ཕྱིན་པའི་མཚམས་ཏེ། བནྡེ་སྒང་ངམ་ལྷ་ཐོ་ཐོ་རི་ཞེས་པའི་རྩ་བར་གཞིས་ཆགས་ཤིང་། དེ་ནི་རྨ་ལྷོ་ཁུལ་རེབ་གོང་རྫོང་ཐོ་རྒྱ་གྲོང་རྡལ་ཁོངས་གཏོགས་ཀྱི་སྡེ་ཁུལ་ཞིག་ཡིན།
གཞི་རྩའི་གནས་ཚུལ།

རྒྱ་ཡིག་གི་མིང་།
保安村
ལ་ཏིང་གི་མིང་།
tho rgy sde ba
སྲིད་འཛིན་རིགས་དབྱེ།
སྡེ་ཁུལ།
སྲིད་འཛིན་ཁོངས་གཏོགས།
རྨ་ལྷོ་ཁུལ་རེབ་གོང་རྫོང་ཐོ་རྒྱ་གྲོང་རྡལ།
གནས་ཡུལ།
རོང་བོ་གྲོང་རྡལ་གྱི་བྱང་ཕྱོགས་སུ་ཡོད།
1 ངོ་སྤྲོད།

ཐོ་རྒྱ་ཞེས་པ་ནི་རྨ་ལྷོ་བོད་རིགས་རང་སྐྱོང་ཁུལ་རེབ་གོང་རྫོང་རོང་བོ་གྲོང་རྡལ་གྱི་བྱང་ཕྱོགས་སུ་སྤྱི་ལེ་བཅོ་ལྔ་ཕྱིན་པའི་མཚམས་ཏེ། བནྡེ་སྒང་ངམ་ལྷ་ཐོ་ཐོ་རི་ཞེས་པའི་རྩ་བར་གཞིས་ཆགས་ཤིང་། དེ་ནི་རྨ་ལྷོ་ཁུལ་རེབ་གོང་རྫོང་ཐོ་རྒྱ་གྲོང་རྡལ་ཁོངས་གཏོགས་ཀྱི་སྡེ་ཁུལ་ཞིག་ཡིན།

ཤར་ལྷོ་ནས་ཨ་མྱེས་སྨན་རི་དང་ནུབ་ཏུ་རོང་བོ་དགུ་ཆུ། ལྷོ་ན་སྡེ་བའི་ཁྱིམ་མཚེས་བྱ་དཀར་ལུང་དང་སྟག་ཡན། བྱང་དུ་སྨད་པ་ཡུལ་ཚོ་། ནུབ་ལྷོ་ན་གར་རྩེབ་གདོང་། ནུབ་བྱང་དུ་བོད་སྐོར་དང་འབྲེལ་ལ། མཐོ་ཚད་ལ་མཚོ་ངོས་ལས་ཆེས་མཐོ་བར་སྨི2432དང་མཚོ་ངོས་ལས་ཆེས་དམའ་བའི་ཚད་སྨི2350ཡོད། མངའ་ཁོངས་སུ་རེབ་གོང་ནས་ཞུང་ཧྭ་དང་རེབ་གོང་ནས་ལེན་ཞཱ། རེབ་གོང་ནས་ཟི་ལིང་སོགས་ལ་བགྲོད་པའི་གཞུང་ལམ་ཡོད་པ་མ་ཟད། དར་གྲོང་ལུང་བ་དང་རྒྱལ་བོ་ཡུལ་ཚོ་ཀླད་ཀི་ཁོག་ནས་བཞུར་བའི་ཆུ་ཕྲན་ཡང་ལྷ་མོ་མཚོའི་ལུང་བ་བརྒྱུད་ནས་དགུ་ཆུར་འབབ་པ་རེད།

སྤྱིར་རེབ་གོང་རྫོང་ལས་ཐོ་རྒྱ་ས་ཆའི་ནམ་ཟླ་དྲོ་ཞིང་ས་གཤིས་བཟང་བས། རྨོད་འདེབས་ཀྱི་ལས་ཀ་གཉེར་བར་མཐུན་རྐྱེན་ཤིན་ཏུ་ལེགས་ལ། འདེབས་རྒྱ་མུའུ་གྲངས3000ཡོད་དེ། གཙོ་ཆེར་གྲོ་ནས་སྲན་གསུམ་དང་སྐེ་ཚེ། ཉུང་མ་སོགས་འདེབས་པར་མ་ཟད། སིལ་ཏོག་ཀུ་ཤུ་དང་དགུན་སིལ། སིལ་ཁམ་བུ། གཡེར་མ་སོགས་དང་། ཚོད་དཀར་དང་ལ་ཕུག ཞི་ཀྭ ཆེ་ཙི། ཆིན་ཚེ། ཞི་ཧོང་ཧྲི། ལ་ཅོ་སོགས་སྔོ་ཚལ་དང་། སྨན་རྩྭ་འདེབས་པ་བཅས་དཔལ་འབྱོར་ལོ་ཏོག་གཉེར་བས་རིམ་གྱིས་སྟོབས་འབྱོར་རྒྱས་པར་གྱུར།

ཐོ་རྒྱ་ནི་ལོ་རྒྱུས་ཀྱི་ཡུན་རིང་ཞིང་དམག་མིའི་སྡོད་གནས་ཀྱི་ས་ཚིགས་ཞིག་སྟེ། ཆེས་སྔ་བ་ཡོན་རྒྱལ་རབས་སྐབས་སྤྱི་ལོ1279ནས1363ལོའི་བར་དམག་བསྡད་ནས་ས་སྲུང་བྱེད་ཅིང་། རིམ་གྱིས་དམག་སྡོད་སའི་ས་ཚིགས་ཀྱང་ཇེ་རྒྱས་སུ་སོང་། སྤྱི་ལོ1774ལོར་ཕལ་ཆེར་ཐོ་རྒྱའི་གནའ་མཁར་བསྐྱར་དུ་བཟོ་སྐྲུན་བྱས།

དེ་ཡང་ནན་ཅིན་དང་ཧོའུ་ནན། ཧྲན་ཞི།(山西) ཧྲན་ཞི། ཀན་སུའུ། མེན་ཧུ། ལོ་ཏོའུ་སོགས་ནས་མཆེད་པས། ད་ལྟའང་རུས་མིང་མི་གཅིག་པ་ཉི་ཤུ་ལྷག་ཡོད་ཅིང་། དེ་དག་ཀྱང་ཕྱོགས་བཞི་མཚམས་བརྒྱད་ནས་གནས་འདིར་འཛོམས་ཏེ། ས་གནས་སོ་སོའི་སྔོན་ཐོན་གྱི་ལག་རྩལ་དང་རིག་གནས། སྒྱུ་རྩལ། འཚོ་བའི་གོམས་སྲོལ་སོགས་ཁྱེར་ཡོང་བ་ལ་བརྟེན་ནས་ཐོ་རྒྱ་ས་གནས་ཀྱི་དཔལ་འབྱོར་གོང་དུ་འཕེལ་བ་རེད། 

ཐོ་རྒྱ་ཞེས་པའི་མིང་དེ་ཇི་ལྟར་ཐོགས་པ་ཡིན་ཞེ་ན། སྔོན་དགོན་རྙིང་ཞིག་གི་ཤུལ་དུ་དུང་དཀར་ཐང་ཟེར་བ་དེ་ན། དུང་དཀར་ཆུ་མིག་ཟེར་བ་ཞིག་ཡོད་པ་དེར་བྱམས་ཁང་རྟེན་བརྟེན་པ་བཞེངས་ཡོད་ལ། བྱམས་ཁང་མདུན་དུ་རྡོ་རིང་ཞིག་བཙུགས་ཡོད་པར། གོང་མས་བཀས། ས་ཆ་ནི་བོད་སྐོར་དགོན་པར་གཏོགས་པ་ཡིན། སྲིད་གཞུང་ལ་འདུག་སའི་མཁར་དང་། འཐུང་སའི་ཆུ། འགྲོ་སའི་གོང་ཁའི་ལམ་བཅས་ལས་གཡོར་མི་དགོས་ཞེས་བྲིས་འདུག དེ་ནས་རིམ་བཞིན་དམག་ཁང་ལས། ཤིང་མཁར་བརྩིགས་པའི་ཤུལ་ཡོད་ལ། དེ་ནི་ད་ལྟ་ཐོ་རྒྱའི་དབྱིན་ཧྥང་ཟེར་བའི་ས་དེ་ཡིན། དགོན་པའི་རྒྱབ་རི་ལ་རྒྱ་བོད་འདྲེས་མའི་སྐད་དུ་བླ་མ་ཧྲན་ཟེར་བ་དང་། བོད་རང་སྐད་དུ་བན་དེ་སྒང་ངམ་ལྷ་ཐོ་ཐོ་རི་ཟེར་བས། ཐོ་རྒྱ་ཞེས་པའི་རྒྱབ་རིའི་མིང་དེ་ཡུལ་སྡེར་ཐོགས་པར་གྲགས། རྗེས་སུ་རྐྱེན་དབང་གིས་དགོན་པ་སྤོར་དགོས་བྱུང་བས། དགོན་གཞིས་སྤོར་བའི་རྗེས་སུ་ཡང་། ལས་སྣ་བསྐྱངས་ཟིན་པའི་རྒན་པ་རྣམས་ལོ་རེ་རེར་བཞི་བའི་ཚེས་གཅིག་ནས་བཟུང་ཉིན་ལྔའི་རིང་ལ་བྱམས་ཁང་དུ་མཆོད་པ་འབུལ་བར་འགྲོ་བའི་སྲོལ་ཡོད། 

སྤྱི་ལོ1950ལོར་ཐོ་རྒྱ་ཡུལ་ཚོ་སྲིད་གཞུང་བཙུགས། དེའི་ཁོངས་སུ་མཁར་ནང་དང་མཁར་ཕྱི། མཁར་སོ་མ་བཅས་སྡེ་བ་གསུམ་འདུས་པ་རེད།


སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2016-07-19

གསར་སྤེལ་མཁན། :འཕགས་མོ་སྐྱིད།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།