དགོ་མང་ལ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

དགོ་མང་ལ།
དགོ་མང་ལ་ཞེས་པ་ནི་མཚོ་ལྷོ་ཁུལ་ཁྲི་ཀ་རྫོང་ཀ་རིང་ཡུལ་ཚོའི་བྱང་མཐའ་ན་ཡོད་པ་སྟེ། ཁྲི་ཀ་དང་། སྟོང་སྐོར། ཧོང་ཀྲུང་བཅས་རྫོང་ཁག་གསུམ་གྱི་ས་མཚམས་སུ་ཡོད་ལ། རྨ་ཆུ་དང་ཙོང་ཆུ་གཉི་གའི་དབྱེ་མཚམས་འབྱེད་བྱེད་ཀྱི་ལ་མཐོན་པོ་ཞིག་ཀྱང་ཡིན། འདིའི་མཐོ་ཚད་ལ་མཚོ་ངོས་ལས་སྨི4524ཡོད།
གཞི་རྩའི་གནས་ཚུལ།

རྒྱ་ཡིག་གི་མིང་།
拉鸡山
ལ་ཏིང་གི་མིང་།
dgo mang la
སྲིད་འཛིན་ཁོངས་གཏོགས།
མཚོ་ལྷོ་ཁུལ་ཁྲི་ཀ་རྫོང་ཀ་རིང་ཡུལ་ཚོ།
མཚོ་འཕགས།
སྨི4524
གནས་ཡུལ།
ཀ་རིང་ཡུལ་ཚོའི་བྱང་མཐའ་ན་ཡོད།
1 ངོ་སྤྲོད།

དགོ་མང་ལ་ཞེས་པ་ནི་མཚོ་ལྷོ་ཁུལ་ཁྲི་ཀ་རྫོང་ཀ་རིང་ཡུལ་ཚོའི་བྱང་མཐའ་ན་ཡོད་པ་སྟེ། ཁྲི་ཀ་དང་། སྟོང་སྐོར། ཧོང་ཀྲུང་བཅས་རྫོང་ཁག་གསུམ་གྱི་ས་མཚམས་སུ་ཡོད་ལ། རྨ་ཆུ་དང་ཙོང་ཆུ་གཉི་གའི་དབྱེ་མཚམས་འབྱེད་བྱེད་ཀྱི་ལ་མཐོན་པོ་ཞིག་ཀྱང་ཡིན།  འདིའི་མཐོ་ཚད་ལ་མཚོ་ངོས་ལས་སྨི4524ཡོད། སའི་གོ་ལའི་བྱང་གི་འཕྲེད་ཚད36°05′ནས36°23′ཀྱི་མཚམས་དང་། ཤར་གྱི་གཞུང་ཚད101°27′ནས101°29′ཡི་མཚམས་ན་ཡོད།  ལ་འདིའི་རྩེ་མོ་རྫ་རི་དང་རྐེད་པ་སྤང་རི་ཡིན། རི་དྭགས་དང་གཅན་གཟན་གྱི་རིགས་ལ། གླ་བ་དང་ཁ་ཤྭ། རྒོ་དམར། སྤྱང་ཀི། ཝ། གཡི་དཀར། བྱི་བ། རི་བོང་། ཨ་བྲ། བྱི་ལོང་། སྲེ་མོང་སོགས་ཡོད། འདབ་ཆགས་ཀྱི་རིགས་ལ། རྒོད་ཐང་དཀར་དང་ཐང་ནག གླག བྱ་གོ་བོ། ནེ་ལེ། ཕོ་རོག སྲེག་པ། གོང་མོ། ཕུག་རོན། བྱེའུ་སྣ་ཚོགས་བཅས་ཡོད། སྐྱེ་དངོས་ཀྱི་རིགས་ལ། ཤུག་པ་དང་གླང་མ། སྤེན་མ། ཐང་ཕྲོམ། དབྱར་རྩྭ་དགུན་འབུ། གངས་ལྷ་མེ་ཏོག་ལ་སོགས་མེ་ཏོག་སྣ་ཚོགས། སྤང་རྩྭའི་རིགས་སྣ་ཚོགས་བཅས་ཡོད། 

2 ངག་རྒྱུན།

གནའ་ནས་བཟུང་ལ་འདི་ནི་འགྲུལ་ལམ་གཙོ་བོ་ཞིག་ཡིན་པར་གྲགས་ཤིང་། ལ་འདིའི་ལ་རྐེད་དུ་ཟི་ལིང་ནས་མགོ་ལོག་གཅིག་སྒྲིལ་རྫོང་བར་གྱི་གཞུང་ལམ་བརྒྱུད་སའི་ཕུག་ལམ་སྟེ་དགོ་མང་ལ་ཕུག་ལམ་ཞེས་པ་ཡོད། ཡུལ་འདི་གའི་རྒན་པོ་རྣམས་ཀྱི་ངག་སྒྲོས་སུ། ལ་འདི་ལ་དགོ་མང་ལ་དང་། ལ་ལྗིད་ཉག་ཁ། ལ་དགྱེ་ཉག་ཁ་བཅས་མིང་གི་འབོད་ཚུལ་གསུམ་ཡོད་པར་གྲགས་ཏེ། ཕལ་ཆེ་བས་དགོ་མང་ལ་ཞེས་འབོད་པ་ཡིན་ནོ་ཟེར། སྔོན་དུས་ལ་འདིའི་ལ་ངོས་ནི་ནམ་རྒྱུན་རི་དྭགས་དགོ་བ་མང་པོ་འཁོར་ས་ཞིག་ཡིན་པས་མིང་ཡང་དགོ་མང་ལ་རུ་ཐོགས་པར་བཤད། ཡང་ཁ་ཅིག་གིས། འདི་ལ་ལ་ལྗིད་ཉག་ཁའམ་ལ་དགྱེ་ཉག་ཁའང་ཟེར་རོ་ཞེས་ཀྱང་བཤད་དེ། དེ་ཡང་འདིར་ལ་ལྕིའམ་ལ་ལྗིད་ཉག་ཁ་རུ་ཐོགས་དོན་ནི། ལ་འདིའི་བྱང་ངོས་ཀྱི་ལ་རྟིང་ནས་ལ་མགོའི་ཉག་ཁའི་བར་གྱི་ལ་ངོས་ནི་ཧ་ཅང་ལྕི་བའམ་ལྗིད་པ་སྟེ། ལ་ཐག་ཤིན་ཏུ་རིང་བས་ན་ལ་འདིའི་ཉག་ཁའི་མིང་ལའང་དེ་སྐད་དུ་ཐོགས་པ་ཡིན་ཟེར། ཡང་ལ་འདིའི་ལྷོ་ངོས་ནས་ལ་མགོ་བར་དུ་བལྟས་ན་མི་བོ་ཆེ་ཞིག་ལྟག་པར་དགྱེ་ཡོད་པའི་དབྱིབས་དང་མཚུངས་པས་ན། ལ་འདིའི་ཉག་ཁ་དང་བཅས་པར་ལ་དགྱེ་ཉག་ཁ་ཟེར་བའང་ཡོད་ཅེས་ཀྱང་གྲགས་སོ། ། དེ་བས་དེང་སང་རྒྱ་སྐད་དུ་ལ་ཅི་ཧྲན(拉鸡山)དུ་འབོད་པའི་ལ་ཅི(拉鸡)ཞེས་པ་དེ་ནི། དོན་གྱིས་བོད་རང་སྐད་ཀྱི་གཉུག་མའི་ས་མིང་ལ་ལྕིའམ་ལ་ལྗིད་དམ་ལ་དགྱེ་ཞེས་པའི་སྒྲ་དེ་དག་གང་རུང་གི་སྒྲ་ཙམ་བསྒྱུར་བའམ་སྒྲ་ཚབ་ཏུ་འབོད་པ་ཙམ་ཡིན་ནོ། ། 


སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:2  སྔ་མའི་པར་གཞི།

ཉེ་ཆར་དག་བཅོས།:2016-09-13

གསར་སྤེལ་མཁན། :གཡུ་འབྲུག

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།