རྒྱལ་ཁྲིམས་བཅོ་ལྔ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

རྒྱལ་ཁྲིམས་བཅོ་ལྔ་ནི་མཛད་པ་གསུམ། མི་མཛད་པ་གསུམ། བསྟོད་པ་གསུམ། དམད་པ་གསུམ། མི་མནར་བ་གསུམ་བཅས་ཡིན་ནོ།།
གཞི་རྩའི་གནས་ཚུལ།

ཡོང་ཁུངས།
ཁོད་སོ་དྲུག
ཁོངས་གཏོགས།
རྒྱལ་ཁམས་དཔེར་བླངས་ཀྱི་ཁྲིམས།
1 མཛད་པ་གསུམ།

དགྲ་བཏུལ་རྒྱལ་ཁམས་བདེ་བར་མཛད།། ནང་གི་ཚིས་མཛད་འབངས་འཁོར་སྐྱོང་།། ཕྱི་མ་ཕན་ཕྱིར་དམ་ཆོས་བྱ།། ཞེས་འབྱུང་བ་ཕྱི་ཡི་དགྲ་བཏུལ་ནས་རྒྱལ་ཁམས་བདེ་འཇགས་སུ་བཀོད་པ་དང་གཅིག ནང་གི་ཆབ་སྲིད་ལེགས་པར་སྐྱོང་ཞིང་རང་གི་ཆབ་འོག་འཁོར་འབངས་དང་བཅས་པ་བདེ་བར་སྐྱོང་བ་དང་གཉིས། ཚེ་ཕྱི་མར་ཕན་པའི་ཆེད་དུ་ལྷ་ཆོས་དགེ་བ་བཅུ་ལག་བསྟར་མཛད་པ་དང་གསུམ་ནི་རྒྱལ་པོ་རང་གི་ཕྱག་ལེན་གནང་དགོས་པའི་ཁྲིམས་སམ་ཆབ་སྲིད་ཀྱི་སྲོལ་རྒྱུན་བཟང་པོ་གསུམ་ཡིན།

2 མི་མཛད་པ་གསུམ།

ཡ་རབས་རྒྱུ་རྐྱེན་ལྷ་ཆོས་ནི།། སྣོད་མིན་ཁེང་བོ་ལ་མི་བཤད།། གསང་སྔགས་རྫོགས་འཚང་རྒྱ་བའི་རྒྱུ།། ནོར་དུ་མི་བཙོང་སྙིང་ལ་འཆང་།། ངན་ལ་བསྟོན་ན་གཉིས་ཀ་ཕུང་།། དེ་བས་ཁེང་པོ་རྗེར་མི་དབྱུང་།། ཞེས་གསུངས་པ་ནི་དད་པ་མེད་པའི་མི་ཕལ་པ་ལ་དམ་པའི་ཆོས་མི་བཤད་པ་དང་གཅིག གསང་སྔགས་ནི་སངས་རྒྱས་ཐོབ་པའི་རྒྱུ་ཡིན་པས་དེ་ནོར་གྱི་ཕྱིར་དུ་མི་བཙོང་བ་སྟེ་འབུལ་རྟེན་ལ་བལྟས་ནས་དམ་ཚིག་དང་མི་ལྡན་པ་ལ་གསང་སྔགས་ཀྱི་ཆོས་མི་འཆད་པ་དང་གཉིས། ཁེང་པོ་སྟེ་བྲན་གཡོག་རྗེ་དཔོན་དུ་མི་བསྐོ་བ་དང་གསུམ་བཅས་རྒྱལ་པོས་ཕྱག་ལེན་མི་འོས་པ་གསུམ་ཡིན།

3 བསྟོད་པ་གསུམ།

དཔའ་ལ་སྟག་གིས་མ་བསྟོད་ན།། དཔའ་ངར་བྱས་པའི་རུ་མ་མེད།། མཛངས་ལ་ཡིག་ཚང་མ་བསྟོད་ན།། ཕྱིན་ཆད་མཛངས་ངན་ཤན་མི་ཕྱེད།། ལེགས་ལ་བྱ་དགས་མ་བསྟོད་ན།། སླད་ཆད་ལེགས་པར་སུ་ཡིས་བྱེད།། ཅེས་འབྱུང་བ་ནི། གཡུལ་ངོར་དགྲ་བོ་ལས་རྣམ་པར་རྒྱལ་བའི་དཔའ་བོ་བྱས་རྗེས་ཅན་ལ་སྟག་སློག་གི་གོས་སོགས་བྱ་དགར་བྱིན་ནས་བསྟོད་དགོས་པ་རྣམས་མ་བསྟོད་ན། ཕྱིན་ཆད་དཔའ་བོ་ཐོན་པའི་རུ་མ་སྟེ་གཞི་རྟེན་མེད་པར་འགྱུར་བས་ངེས་པར་དཔའ་རྟགས་ཀྱིས་བསྟོད་དགོས་པ་དང་གཅིག ནང་སྲིད་ལ་མཁས་ཤིང་མཛངས་པའི་བློན་པོ་དང་མི་སྣ་བྱས་རྗེས་ཅན་ལ་གཡུ་དང་། གསེར་སོགས་རིན་པོ་ཆེའི་ཡིག་ཚང་གིས་མ་བསྟོད་ན། ཕྱིན་ཆད་མཛངས་པའི་མི་དང་ངན་པའི་མི་ཤན་མི་ཕྱེད་པས་ངེས་པར་དུ་མཁས་ཤིང་མཛངས་པའི་མི་རྣམས་ཡིག་ཚང་གིས་བསྟོད་དགོས་པ་དང་གཉིས། རྗེ་འབངས་ཀྱི་དོན་དུ་ལྷག་བསམ་གྱིས་ལས་ཀ་ལེགས་པོ་བྱེད་མཁན་མི་ཕུལ་བྱུང་རྣམས་ལ་བྱ་དགས་ཚིམ་པར་བྱས་ནས་མ་བསྟོད་ན་སླད་ཆད་ཧུར་བརྩོན་ལྷག་བསམ་དང་ལྡན་པའི་མི་སྣ་ཐོན་མི་སྲིད་པས་ངེས་པར་དུ་དངོས་པོའི་བྱ་དགས་བསྟོད་དགོས་པ་དང་གསུམ་ནི་དམག་སྲིད་འབངས་གསུམ་གྱི་ནང་ནས་ཐོན་པའི་སྐྱེ་བོ་ཕུལ་དུ་བྱུང་བ་རྣམས་གཟེངས་སུ་བསྟོད་དགོས་པའི་སྐོར་ཡིན།

4 དམད་པ་གསུམ།

སྡར་མ་ཝ་ཞུས་མ་དམད་ན།། དཔའ་དང་སྡར་མ་ཤན་མི་ཕྱེད།། ངན་ལ་ནན་ཏུར་མ་བྱས་ན།། མ་ཡང་དྲན་ཤེས་རེམ་མི་འགྱུར།། ཉེས་ལ་ཆད་པ་མ་བཅད་ན།། ཕྱི་ནས་ཉེས་བྱེད་རྒྱུན་མི་ཆད།། ཅེས་འབྱུང་སྟེ། འགག་རྩར་ཐུག་སྐབས་དགྲ་བོར་མགོ་སྒུར་བའམ་ཕྱིར་བཤོལ་བ་ལ་སོགས་པ་མི་སྡར་མ་ཀླད་མེད་རྣམས་ལ་ཝ་མོའི་གཞུ་གུ་མགོ་ལ་བསྐོན་ནས་དམད་པ་སྟེ་དམའ་མ་ཕབ་ན།  དཔའ་བོ་དང་སྡར་མའི་དབྱེ་བ་མི་ཕྱེད་པས་ངེས་པར་དུ་ཝ་གཞུས་དམད་དགོས་པ་དང་གཅིག མི་ངན་ལ་ཁྲིམས་དང་བསྟུན་པའི་ནན་ཏུར་ཏེ་བཙན་མ་བཙུགས་ན། ངན་པ་ལང་ཤོར་གྱིས་ནམ་ཡང་དྲན་ཤེས་བསྟེན་མི་སྲིད་པས་ངེས་པར་དུ་གཉའ་ནས་གནོན་དགོས་པ་དང་གཉིས། ཁྲིམས་འགལ་གྱི་བྱ་བ་བྱེད་མཁན་ནག་ཉེས་ཅན་ལ་ཁྲིམས་ཆད་ནན་པོ་མ་བཅད་ན། སླད་ཕྱིན་ཉེས་གསོག་བྱེད་མཁན་རྒྱུན་མི་འཆད་པས་ངེས་པར་དུ་ཉེས་ཆད་ནན་པོ་གཅོད་དགོས་པ་དང་གསུམ་ནི་སྐྱེ་བོ་མ་རབས་རྣམས་ལ་འཛིན་དགོས་པའི་སྒྲིག་སྲོལ་ཡིན།

5 མི་མནར་བ་གསུམ།

ལུས་སྐྱེད་ཕ་མ་མནར་བ་ན།། འཕྲལ་ཕུགས་གཉིས་ཀ་མ་ཡོགས་སྡིག། རང་གི་མཆན་གྱི་བུ་མནར་ན།། ཕྱི་རོལ་དགྲས་ཀྱང་ཞེ་ཁ་འབྱེད།། བཟའ་གྲོགས་མནར་ན་ཕྱི་ནང་གི། ཆུས་དང་སོ་ནམ་ཡལ་བར་འཆོར།། ཞེས་འབྱུང་སྟེ། རང་ལུས་སྐྱེད་པའི་ཕ་མར་དྲིན་ལན་མི་གཟོ་བར་སྡུག་གི་མནར་གཅོད་བཏང་བ་ན། འཕྲལ་དུ་རང་ལ་མི་ཀུན་གྱི་ངན་སྨྲས་ཕོག་པའི་རྒྱུ་དང་། ཕུགས་སུ་ལ་ཡོགས་འཁོར་བའི་སྡིག་པའི་རྒྱུར་འགྲོ་བས་ངེས་པར་དུ་ཕ་མ་ལ་བཀུར་བསྟི་བྱེད་པ་ལས་བརྙས་བཅོས་རྩ་བ་ནས་མི་བྱེད་པ་དང་གཅིག རང་གི་མཆན་འོག་གི་བུ་ཕྲུག་རྣམས་བྱམས་བརྩེས་མི་སྐྱོང་བར་མནར་གཅོད་བཏང་ན། བུ་ཕྲུག་ཕ་མར་ཞེན་པ་ལོག་པ་མ་ཟད། ཕྱི་རོལ་གྱི་དགྲ་བོས་ཀྱང་འཕྱ་སྨོད་དང་འབྱེད་པ་བྱེད་སྲིད་པས་ངེས་པར་དུ་བུ་ཕྲུག་བརྩེ་ཞེན་གྱིས་སྐྱོང་བ་ལས། སྡུག་གཅོད་ཀྱིས་མི་མནར་བ་དང་གཉིས། རང་གི་བཟའ་ཚང་ལ་སྐྱོང་མཁས་མ་བྱས་པར་ཞེ་ཁྲེལ་བའི་རྒྱུས་མནར་གཅོད་བཏང་ན་རང་ཁྱིམ་གྱི་བྱ་བ་དང་། སོ་ནམ་སོགས་འཐུས་ཤོར་དུ་འགྱུར་པས་ན་ངེས་པར་དུ་བཟའ་ཚང་ཕན་ཚུན་མཛའ་གཅུགས་འཆམ་མཐུན་ཡོང་བ་བྱེད་པ་ལས་མནར་གཅོད་མི་བྱེད་པ་དང་བཅས་གསུམ་ནི་ཚང་མས་བྱེད་དགོས་པའི་ཁྲིམས་སམ་སྤྱིའི་ཀུན་སྤྱོད་གསུམ་མོ།། གོང་གསལ་མཛད་པ་གསུམ། མི་མཛད་པ་གསུམ། བསྟོད་པ་གསུམ། དམད་པ་གསུམ། མི་མནར་བ་གསུམ་བཅས་ལ་རྒྱལ་ཁྲིམས་བཅོ་ལྔར་གྲགས་པ་ནི། རྒྱལ་པོས་རྒྱལ་ཁྲིམས་སྐྱོང་བའི་སྐབས་ངེས་པར་དོ་སྣང་བྱེད་དགོས་པའི་ཁྲིམས་ལུགས་དང་། སྤྱི་ཚོགས་ཀྱི་སྲོལ་བཟང་པོ་དར་སྤེལ་གཏོང་དགོས་པའི་དོན་ཆེན་རྣམས་ལགས་སོ།།



སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2016-06-21

གསར་སྤེལ་མཁན། :ཚེ་རིང་འབུམ།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།