ཉག་རོང་སྐོར་བྲོ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

ཉག་རོང་སྐོར་བྲོ།
ཉག་རོང་སྐོར་བྲོ་ལ་རོལ་ཆའི་མཐུན་སྦྱོར་མེད་ལ་ས་ཕྱོགས་ཀྱི་གཟབ་འཕྱོར་སྤྲས་པའི་བྲོ་པ་རྣམས་ཕོ་མོ་འགྲིག་གཉིས་སུ་བསྒྲིགས་ནས། སྐོར་བྲོ་འཁྲབ་པ་ཡིན། དེ་ལས་བྲོ་འཁྲབ་སྐབས་ཀྱི་བྲོ་འགོ་ཁྲིད་མཁན་དེ་ལ་བྲོ་དཔོན་ཟེར་ཞིང་། དེ་ནས་བྲོ་དཔོན་གྱི་རྗེས་སུ་འབྲང་མཁན་དེ་ལ་བྲོ་གཡོག་ཟེར་ཞིང་། བྲོའི་མཇུག་མར་ཡོད་པའི་བྲོ་པ་དེ་ལ་བྲོ་རྔ་ཞེས་ཟེར་བ་རེད། དེ་མིན་གཞན་རྣམས་ལ་བྲོ་པ་ཞེས་ཟེར་བ་མ་གཏོགས་མིང་གཞན་འདོགས་སྲོལ་མེད།
གཞི་རྩའི་གནས་ཚུལ།

རྒྱ་ཡིག་གི་མིང་།
新龙锅庄
ཕྱི་ཡིག་གི་མིང་།
nyag rong skor bro
1 ངོ་སྤྲོད།

བོད་གངས་ཅན་གྱི་གདུང་རྒྱུད་བསྙོན་དུ་མེད་པའི་ཉག་ཨ་རྫི་རོང་ཞེས་མིང་དུ་གྲགས་པ་འདི་ནི། དབྱིབས་དང་ཁ་དོག་གྲངས་སོགས་སྒོ་མང་ལ་འཇུག་མོད། འདིར་སྒྲ་ཟུར་ཆགས་པ་སྟེ་ནགས་རོང་ཞེས་པ་ཉག་རོང་དུ་བརྗོད་པ་རེད་ཅེས་བཤད་ཅིང་། ཆོས་རྒྱལ་སྲོང་བཙན་སྒམ་པོའི་དུས་སུ་ནགས་རོང་གི་མི་རྣམས་རྟ་པ་རྣ་བ་ལ་གསེར་དང་དངུལ་ཟངས་རག་སོགས་ཀྱི་ཨ་ལོང་ཆེན་པོ་འདོགས་པ་བྱུང་བས་རོང་རྟ་རྣ་ཅན་ཞེས་ཟེར་བ་དང་། ཡང་ཉག་ཨ་ཛི་རོང་ཞེས་པའི་མིང་ཐོགས་དོན་ནི། ཆོས་རྒྱལ་ཁྲི་སྲོང་ལྡེ་བཙན་གྱི་དུས་སུ་རྒྱལ་པོའི་བཀའ་ལྟར་ནགས་རོང་གི་དམག་རྒྱ་གར་དུ་སོང་ནས་གང་གཱའི་འགྲམ་དུ་རྒྱལ་ཁ་ཐོབ་པས། རྣམ་པར་རྒྱལ་བ་ཞེས་པ་སྟེ་རྒྱ་གར་གྱི་སྐད་དུ་ཨ་ཛི་ཞེས་པའི་མིང་དེ་ཉིད་དུས་ སྐབས་དེ་ནས་ཐོགས་ཞེས་བོད་ཀྱི་ལོ་རྒྱུས་རྣམས་སུ་གསལ། ཡུལ་འདིར་ལོ་ཆེན་བེེ་རོ་ཙ་ན་དང་གཡུ་སྒྲ་སྙིང་པོ། ལྷ་ལུང་དཔལ་རྡོར་སོགས་སྐུ་དངོས་ཞབས་ཀྱིས་བཅགས་ཤིང་། གུ་རུ་པད་མ་དང་རྗེ་འབངས་ཉེར་ལྔ་སོགས་རྫུ་འཕྲུལ་གྱིས་བྱོན་ཏེ་བྱིན་གྱིས་རླབས་པར་མཛད་པའི་སྦས་ཡུལ་ཁྱད་པར་བ་ཞིག་ཡིན། ཡུལ་འདིར་གནམ་གཤིས་དྲོ་གྲང་སྙོམས་ཤིང་ཐོན་ཁུངས་ཕུན་སུམ་ཚོགས་པ་དང་། ས་གཤིས་འཇམ་ལ་ཡུལ་ཐོན་མང་བ། རོང་འབྲོག་གཉིས་ལས་གཙོ་བོ་རོང་པའི་སོ་ནམ་ལ་འབུར་དུ་ཐོན་པ། མི་རྣམས་ནི་ལས་ལ་བརྩོན་ཞིང་ཁྲེལ་གཞུང་ལྡན་པ། ཡ་རབས་གོང་དུ་བཀུར་ཞིང་བློ་རིག་རྣོ་ལ་དཔའ་ངར་ཆེ་བས་བོད་གངས་ཅན་གྱི་ལྗོངས་སུ་སྙན་པའི་གྲགས་པ་འབར། ཁོང་ཚོས་དུས་ཡུན་རིང་པོའི་ལོ་རྒྱུས་ཀྱི་འཕེལ་རིམ་ནང་དུ་མདོ་དབུས་ཁམས་གསུམ་དུ་གནས་པའི་ཤ་རུས་གདུང་རྒྱུད་གཅིག་པའི་མི་རྣམས་དང་ཆབས་ཅིག་ཏུ། འོད་སྟོང་འབར་བའི་བོད་ཀྱི་ཤེས་རིག་གསར་སྐྲུན་དང་འཕེལ་རྒྱས་ཀྱི་བརྒྱུད་རིམ་ཁྲོད་དུ་བྱས་རྗེས་བསུབ་ཏུ་མེད་པ་དུ་མ་བཞག་ཡོད་པ་མ་ཟད། ཐུན་མོང་མ་ཡིན་པའི་ས་ཁུལ་རང་བཞིན་གྱི་རིག་གནས་ཀྱང་བསྐྲུན་ཡོད་པ་རེད།

ཉག་རོང་ལྟ་བུར་མཚོན་ན་དམངས་ཁྲོད་རིག་གནས་ལ་དམངས་གཞས་དང་། མགུར་མོ། ལ་དབྱངས། བྲོ་ཤགས་སོགས་མང་པོ་ཡོད་ཅིང་དེ་ལས་སྐོར་བྲོ་ལ་སྨོན་ལམ་གྱི་བྲོ་དང་། ཆོས་བྲོ། འཛོམ་བྲོ། བསྟོད་བྲོ། བག་བྲོ། རྟེན་འབྲེལ་བྲོ། གཡང་བྲོ། བཀྲ་ཤིས་བྲོ་བཅས་ས་བཅད་དགུ་ཡོད་ལ། དེ་དག་ནི་ཡུལ་འདིར་གདོད་མར་གནས་པའི་སྐྱེས་བོ་རྒན་གྲས་ཀྱི་ངག་ཐོག་ཏུ་ཉར་ཞིང་། མཁས་པའི་བློ་གྲོས་ཀྱིས་མ་བཅོས་པའི་ཡུལ་གྱི་ཐུན་མོང་མ་ཡིན་པའི་བྲོ་བས་ཕྱུག་པའི་རིག་གནས་ཤིག་སྟེ་དམངས་ཁྲོད་ལས་བྱུང་བ་ཤ་སྟག་ཡིན།

2 འཁྲབ་སྟངས།

སྐོར་བྲོ་ལ་རོལ་ཆའི་མཐུན་སྦྱོར་མེད་ལ་ས་ཕྱོགས་ཀྱི་གཟབ་འཕྱོར་སྤྲས་པའི་བྲོ་པ་རྣམས་ཕོ་མོ་འགྲིག་གཉིས་སུ་བསྒྲིགས་ནས། སྐོར་བྲོ་འཁྲབ་པའི་སྐབས་ཀྱི་བྲོ་འགོ་ཁྲིད་མཁན་དེ་ལ་བྲོ་དཔོན་ཟེར་ཞིང་། བྲོ་དཔོན་དེ་ནི་བྲོའི་མཁན་པོ་ལྟ་བུ་དང་བྲོའི་སྒྱུ་རྩལ་ལ་ཕྱོགས་ཡོངས་ནས་རྒྱུས་ལོན་ཡག་པོ་ཡོད་དགོས་པ་ཞིག་རེད། དཔེར་ན་ངག་སྙན་ལ་གཟུགས་བཟང་བ། བྲོ་འགྲོས་ལེགས་པ་སོགས་ཀྱི་ཁྱད་ཆོས་དགོས་པས་མ་ཚད། མི་གཤིས་བཟང་ལ་ཀུན་དང་མཐུན་པ་ཞིག་དགོས། བྲོ་དཔོན་གྱིས་གཙོ་ཆེ་བ་བྲོ་ར་སྤྱིའི་བཀོད་སྒྲིག་ལ་བསམ་བློ་གཏོང་དགོས་པ་དང་། དེ་ནས་བྲོ་དཔོན་གྱི་རྗེས་སུ་འབྲང་མཁན་དེ་ལ་བྲོ་གཡོག་ཟེར་ཞིང་། བྲོ་གཡོག་ལ་ཚང་དགོས་པའི་ཆ་རྐྱེན་ནི། བྲོ་དཔོན་གྱི་ངག་དང་མཐུན་ཅི་ཐུབ་བྱེད་དགོས་པ་མ་ཚད་བྲོ་ཡ་ཚོས་ཁྲིད་པའི་བྲོ་ལ་ངག་དང་ཚིག་འགྲོས་བཅས་ལ་རྒྱུས་ལོན་བྱེད་དགོས། བྲོའི་མཇུག་མར་ཡོད་པའི་བྲོ་པ་དེ་ལ་བྲོ་རྔ་ཞེས་ཟེར་བ་རེད། དེ་མིན་རྣམས་ལ་བྲོ་པ་ཞེས་ཟེར་བ་མ་གཏོགས་མིང་གཞན་འདོགས་སྲོལ་མེད། སྤྱིར་བཏང་གི་བྲོ་འགྲོས་ཀྱི་ཆ་ནས་དབྱེ་ན་འགྲོས་བྲོ་དང་ཁེར་བྲོ་རྣམ་པ་གཉིས་ཡོད་པ་དང་། འགྲོས་བྲོ་ནི་ཉག་བྲོའི་སྤྱི་འགྲོས་དེ་ལ་ཟེར། ཁེར་བྲོ་ནི་དེ་ལྟར་མ་ཡིན་པར་རང་ལ་ཐུན་མོང་མ་ཡིན་པའི་བྲོ་འགྲོས་ཅན་དེ་ལ་ཟེར་ཞིང་། དཔེར་ན་ཨ་ལ་ཐ་ལ་དང་ཨ་རོགས་ཁམས་པ་ལྟ་བུ་ལ་འདོད། བྲོ་ཚིག་ལ་སྤྱིར་དུམ་བུ་གསུམ་རེ་ཡོད་ལ། དཔེར་ན་དགུང་ཨ་སྔོན། མཐོ་བྲག་དཀར། སྡེ་རྒྱ་གྲོང་ལྟ་བུ། བྲོ་ཐོག་མ་དེ་སྐྱེས་པ་ཚོའི་ཁྲིད་སྲོལ་ཡོད་ལ། སྐྱེས་པ་ཚོས་བྲོ་ཚིག་གཏོང་རྗེས་བུད་མེད་ཚོའི་དེ་བསྐྱར་ཟློས་སུ་གཏོང་བ་དང་། དེ་ནས་བུད་མེད་ཚོའི་བྲོ་ཁྲིད་དུས་སྐྱེས་པ་ཚོས་བསྐྱར་ཟློས་སུ་གཏོང་བ་ཡིན། དེ་ལྟར་བརྗེ་རེས་བྱས་ནས་ཉིན་ཞག་མང་པོ་འཆམ་སྲོལ་ཡོད། སྤྱིར་བཏང་བྲོ་ཚིག་དུམ་བུ་གསུམ་ཡོད། དེ་ཡང་དུམ་བུ་དང་པོ་འཆམ་དུས་ངག་རྟ་ཉམས་འགྱུར་དལ་བ། དུམ་བུ་གཉིས་པ་འཆམ་དུས་ངག་རྟ་དང་ཉམས་འགྱུར་ཅུང་མགྱོགས་ལ། དུམ་བུ་གསུམ་པ་འཆམ་དུས་ཇེ་མགྱོོགས་སུ་གཏོང་བ་ཡིན། དེ་ནི་ཞི་རྒྱས་དབང་དྲག་གི་རྣམ་པ་ཡིན་ནོ།། སྐོར་བྲོ་འཁྲབ་དུས་ཕོ་མོ་གཉིས་ཀྱི་བྲོ་འགྲོས་ལ་ཁྱད་པར་ཆེར་མེད་མོད། ཉམས་འགྱུར་དང་གོམས་སྟབས། རྐང་པ་མཐོ་དམའ་དང་ཤུགས་ཆེ་ཆུང་། ལག་པ་གཡུག་མི་གཡུག་སོགས་ཀྱི་ཐད་ནས་ཁྱད་པར་ཆེན་པོ་ཡོད་པ་རེད། སྤྱིར་བཏང་བུད་མེད་ཀྱི་བྲོ་འགྲོས་དེ་བརྩེ་དུང་ལྡན་པ་དང་ཉམ་ཆུང་ལ་བག་ཕེབས་པའི་ཉམས་དེ་ནི་བྲོ་དེའི་ཐོག་མཐའ་བར་གསུམ་དུ་ཡོད་དགོས་པ་ཞིག་ཡིན། སྐྱེས་པ་རྣམས་ནི་དེ་ལྟར་མ་ཡིན་པར་ཁོག་སྟོད་བསྒྲད་བསྒྲད་དང་། རྐང་པ་སིལ་སིལ། སྐྱེས་ཕོ་རབ་ཀྱི་ཉམས་དགུ་དང་ལྡན་པ། ཁོག་ཡངས་ལ་བརྗིད་ཉམས་དང་ལྡན་པ་ཞིག་ཡིན། རྒྱུ་མཚན་དེའི་ཕྱིར་ན་ཉག་རོང་སྐོར་བྲོའི་ཁྱད་ཆོས་དངོས་ལ་ཞིབ་འཇུག་བྱས་ན། དེ་ནི་ཚ་འུར་གྱི་སྐོར་བྲོ་ཞིག་གཏན་ནས་མིན་པར་ཞི་དུལ་བག་ཕེབས་སམ་སོས་དལ་བག་ཡངས་ཀྱི་སྐོར་བྲོ་ཞིག་ཡིན། དེ་ཡང་གནའ་མི་ཚོའི་བསམ་བློ་དང་བརྩེ་དུང་བརྗེ་རེས་བྱེད་པའི་ལག་ཆ་གཙོ་བོ་ཞིག་ཡིན་པ་མཚོན་ཡོད། ཉག་རོང་སྐོར་བྲོ་ནི་གཙོ་ཆེ་བ་ལུས་ཀྱི་སྟེང་ནས་དལ་གྱིས་འགྱིང་བ་དང་། ཉམས་ཀྱི་སྟེང་ནས་བརྗིད་ཆགས་པ་ཞིག་ཡིན། སྐྱེས་པ་རྣམས་ནི་གཙོ་བོ་རྐང་ལག་གཉིས་འདྲ་མཉམ་གྱིས་ཐོན་དགོས་ལ། བུད་མེད་རྣམས་ནི་གཙོ་བོ་ལག་པ་ཡིན། ལུས་ཀྱི་སྒུར་ཚད་ལ་ཁྱད་པར་ཡོད་དེ། སྐྱེས་པ་རྣམས་ཀྱི་ལུས་དེ་ཕར་བལྟས་ན་ཅུང་ཙམ་སྒུར་བ་དང་འདྲ་བ་ཞིག་དང་། དེ་ནི་གཙོ་བོ་ཁོག་སྟོད་ཁོག་ཕུབ་པ་ཡིན་ལ། མགོ་བོ་སྒུར་སྲོལ་མེད། རྐང་པའི་རྡོག་བྲོ་དེ་མཐོ་ཙམ་བཀྱག་སྲོལ་ཡོད་པ་དང་། ལག་པ་མགོ་བོ་ཡན་ལ་འདེགས་སྲོལ་ཡོད། དེ་ལ་སེང་གེའི་འགྱིང་ལྟ་བུ་ཟེར། བུད་མེད་རྣམས་ཀྱི་ལུས་སྒུར་རྒྱུ་ཅུང་མང་ཙམ་ཡོད། དེ་ནི་ཉམ་ཆུང་ལ་ཁྲེལ་གཞུང་ལྡན་པའི་ཉམས་ཡིན། རྐང་པའི་རྡོག་བྲོ་དེ་ཧ་ཅང་དམའ་ལ་ཕལ་ཆེར་འགུལ་ཉམས་ལས་མི་མཐོང་བ་འདྲ། ལག་པ་དེའང་མགོ་བོའི་ཡན་ལ་བཀྱག་སྲོལ་མེད། དེ་ནི་རྨ་བྱའི་སྒྲོ་གུར་ཕུབ་པ་ལྟ་བུ་ཟེར། ཡིན་ནའང་བར་སྐབས་ཤིག་ལ་བོད་མིའི་ཟློས་གར་ཚོགས་པ་བྱུང་བས་ས་ཆ་སོ་སོའི་བྲོ་དང་གླུ་སོགས་འགོ་བཅད་མཇུག་སྡུད་བྱས་ནས་བསྒྲིགས་པ་དང་། ཡུལ་ཕྱོགས་གཉིས་ཀྱི་བྲོ་དེ་བྲོ་གཅིག་ཏུ་བསྒྲིགས་ནས་འཁྲབ་པ་སོགས་ཀྱིས་ཉག་རོང་སྐོར་བྲོའི་རང་ངོས་ཀྱི་སྒྱུ་རྩལ་ལ་གཏོར་བཤིག་མི་ཉུང་བ་ཞིག་ཐེབས་ཡོད་པ་ལ་ཚང་མས་བསམ་བློ་གཏོང་དགོས་པ་ཞིག་ལགས།།


སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2016-05-24

གསར་སྤེལ་མཁན། :ཨ་རྡོ

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།