རིགས་པ་དྲུག་ཅུ་བ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

རིགས་པ་དྲུག་ཅུ་བ།
བསྟན་བཅོས་འདི་ནི་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིགས་ཚོགས་དྲུག་གི་གྲས་ཡིན་ཞིང་ཐེག་ཆེན་གྱི་བསྟན་བཅོས་ལས་ཆེས་ཕུལ་དུ་བྱུང་བ་ཞིག་ཡིན་པས་དབུ་མ་ཐམས་ཅད་ཀྱི་ཁུངས་གཏུག་སར་བྱེད། དབུ་མ་བའི་ཤིང་རྟའི་སྲོལ་འབྱེད་ཀྱི་བསྟན་བཅོས་དྲུག་གི་ཡ་གྱལ་ཡིན།
གཞི་རྩའི་གནས་ཚུལ།

རྒྱ་ཡིག་གི་མིང་།
《六十正理论》 《六十颂如理论》
རྩོམ་པ་པོ།
སློབ་དཔོན་འཕགས་པ་ཀླུ་སྒྲུབ།
སྒྱུར་མཁན།
རྒྱ་གར་གྱི་མཁན་པོ་མུ་ཏི་ཏ་ཤྲཱི་དང་བོད་ཀྱི་ལོཙྪ་བ་པ་ཚབ་ཉི་མ་གྲགས།
གཞུང་ཚད།
ཤོ་ལོ་ཀ་དྲུག་ཅུ་རེ་གཅིག
1 མིང་ཁ་ཚང་།

རྒྱ་གར་སྐད་དུ། ཡུ་ག་ཏི་ཥ་ཥྛ་ཀཱ་ཀཱ་རི་ཀཱ་ན་མ།

བོད་སྐད་དུ། རིགས་པ་དྲུག་ཅུ་བའི་ཚིག་ལེའུར་བྱས་པ་ཞེས་བྱ་བ།

སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིགས་ཚོགས་དྲུག་གི་གྲས་ཡིན་ཞིང་ཐེག་ཆེན་གྱི་བསྟན་བཅོས་ལས་ཆེས་ཕུལ་དུ་བྱུང་བ་ཞིག་ཡིན་པས་དབུ་མ་ཐམས་ཅད་ཀྱི་ཁུངས་གཏུག་སར་བྱེད། དབུ་མ་བའི་ཤིང་རྟའི་སྲོལ་འབྱེད་ཀྱི་བསྟན་བཅོས་དྲུག་གི་ཡ་གྱལ་ཡིན།

2 རྩོམ་པ་པོ།

སློབ་དཔོན་འཕགས་པ་ཀླུ་སྒྲུབ་ནི་དབུ་མ་བའི་ཤིང་རྟའི་སྲོལ་འབྱེད་ཆེན་པོ་ཡིན་ཏེ་སྟོན་པ་མྱ་ངན་ལས་འདས་ནས་ལོ་བཞི་བརྒྱ་ལོན་པ་ན་ལྷོ་ཕྱོགས་བེ་དརྦྷའི་ཡུལ་དུ་འཁྲུངས། ནཱ་ལེནྡྲར་རབ་ཏུ་བྱུང་། མཁས་པ་ཆེན་པོར་གྱུར་ནས་ཐེག་ཆེན་གྱི་ཤིང་རྟའི་སྲོལ་འབྱེད། ཆོས་སྒྲ་ཆེན་པོ་གསུམ་སྒྲོགས་པར་མཛད། དེ་མཛད་ཚུལ་ཡང་དགུང་ལོ་ལྔ་བཅུ་ཚུན་ཆད་དུ་དགེ་སློང་བདེ་བྱེད་ལ་སོགས་པ་བསླབ་པ་ལ་གཡེལ་བ་རྣམས་ལུང་རིགས་ཀྱིས་ཚར་བཅད་ནས་བསྟན་པ་ལ་དག་ཐར་མཛད་དེ་ཆོས་སྒྲ་དང་བོ་བསྒྲགས་པ་དང་། དེ་ནས་ལྔ་བཅུ་ཡན་ཆད་བརྒྱ་ཚུན་ཆད་ཅིག་ལ་ཀླུ་ཡུལ་དུ་ཕེབས་ཏེ་ཤེར་ཕྱིར་འབུམ་པ་སྤྱན་དྲངས་པ་དང་། དབུ་མ་རིགས་ཚོགས་དྲུག་ལ་སོགས་པ་བརྩམས་ནས་ལོ་ལྔ་བརྒྱའི་བར་དུ་ཆོས་སྒྲ་གཉིས་པ་བསྒྲགས། དེ་ནས་དགུང་ལོ་ལྔ་བརྒྱའི་ཡན་ལ་མདོ་སྡེ་རྔ་བོ་ཆེ་དང་། སྤྲིན་ཆེན་ལ་སོགས་པར་བཤད་པ་རྒྱ་ཆེར་མཛད་དེ་ཆོས་སྒྲ་གསུམ་པ་བསྒྲགས་ཏེ་དགུང་ལོ་དྲུག་བརྒྱ་ཙམ་བཞུགས་སོ།།

3 སྒྱུར་མཁན།

བསྟན་བཅོས་འདི་ནི་རྒྱ་གར་གྱི་མཁན་པོ་མུ་ཏི་ཏ་ཤྲཱིའི་ཞལ་སྔ་ནས་དང་བོད་ཀྱི་ལོཙྪ་བ་པ་ཚབ་ཉི་མ་གྲགས་ཀྱིས་བཅོས་ཏེ་གཏན་ལ་ཕབ།

4 གཞུང་ཚད།

བསྟན་བཅོས་འདི་ལ་ཤོ་ལོ་ཀ་དྲུག་ཅུ་རེ་གཅིག་ཡོད་དོ།།

5 བརྗོད་བྱ།

ཤེས་རབ་ཀྱི་ཕ་རོལ་ཏུ་ཕྱིན་པའི་དངོས་བསྟན་གྱི་རིམ་པ་འགྲེལ་ཏེ། བརྗོད་བྱ་གཙོ་བོ་སྟོང་ཉིད་དེ་དབུ་མའི་ལྟ་བ་ཡིན། དེ་ཡང་ལམ་ཟབ་མོ་དབུ་མའི་ལམ་ངེས་པའི་དོན་ལུང་གིས་བསྟན་པ་ནི་མདོ་ཀུན་ལས་བཏུས་ལས་ཤེར་ཕྱིན་འབུམ་པ་དང་བྱང་སེམས་ཀྱི་སྡེ་སྣོད་ལ་སོགས་པའི་མདོ་མང་བོ་དྲངས་ནས་བཤད་ལ།

རིགས་པས་བསྟན་པ་ནི་རྩ་བ་ཤེས་རབ། སྟོང་ཉིད་བདུན་ཅུ་བ། རྩོད་ཟློག  རིགས་པ་དྲུག་ཅུ་བ། ཞིབ་མོ་རྣམ་འཐག  རིན་ཆེན་ཕྲེང་བ་སྟེ་དྲུག་ཏུ་རིགས་པ་མང་བོས་གཏན་ལ་ཕབ་བོ། །བསྟོད་པ་འགའ་ཞིག་ལས་ཀྱང་སྟོང་ཉིད་བསྟན་མོད་ཀྱང་རིགས་པས་བསྒྲུབས་པ་མི་མང་ངོ་། །གཞུང་དེ་དག་ཀྱང་ཡོད་མེད་ཀྱི་མཐའ་སྤངས་པའི་རྟེན་འབྱུང་གི་དེ་ཁོ་ན་ཉིད་གཙོ་བོར་སྟོན་པ་དང་ཡོད་མེད་ཀྱི་མཐར་མི་ལྟ་བའི་ལམ་གྱིས་འཁོར་བ་ལས་གྲོལ་བ་གཙོ་བོར་སྟོན་པ་གཉིས་སུ་འདུའོ།།

ཡོད་མེད་ཀྱི་མཐའ་སྤངས་པའི་རྟེན་འབྱུང་གི་དེ་ཁོ་ན་ཉིད་གཙོ་བོར་སྟོན་པ་ལ་གཉིས་ལས། དངོས་བོའི་ངོ་བོ་ཉིད་སྨྲ་བ་རྣམས་ཀྱིས་གང་ཟག་དང་ཆོས་ལ་སྒྲོ་བཏགས་པའི་རང་བཞིན་བསྒྲུབ་བྱ་འགོག་པ་ནི་རྩ་བ་ཤེས་རབ་ཡིན་ལ། རིགས་པ་དྲུག་ཅུ་བ་ལས། ཡོད་པས་རྣམ་པར་མི་གྲོལ་ཏེ། །མེད་པས་སྲིད་པ་འདི་ལས་མིན། །ཞེས་ཡོད་མེད་ཀྱི་མཐར་ལྷུང་བ་ལ་གྲོལ་བ་མེད་པར་བསྟན་ནས། དངོས་དང་དངོས་མེད་ཡོངས་ཤེས་པས། །བདག་ཉིད་ཆེན་པོ་རྣམ་པར་གྲོལ། །ཞེས་དངོས་པོ་ཡོད་མེད་ཀྱི་དེ་ཁོ་ན་ཉིད་ཕྱིན་ཅི་མ་ལོག་པར་ཤེས་པས་འཕགས་པ་རྣམས་སྲིད་པ་ལས་གྲོལ་བར་གསུངས་སོ།།

དེ་གཉིས་ཀྱང་ཕན་ཚུན་མ་བརྟེན་པར་མེད་པས་རང་གི་ངོ་བོས་གྲུབ་པའི་རང་བཞིན་མེད་པ་ནི་དེ་དག་གི་དེ་ཁོ་ནའོ། །དེ་ལ་དངོས་པོ་འཁོར་བ་དང་དངོས་མེད་མྱང་འདས་ཡོད་པར་གསུངས་པས་དེ་གཉིས་ལ་རང་བཞིན་མེད་པ་མི་འཐད་པར་བརྩད་པའི་ལན་དུ་དེ་ལྟར་ཡོད་པར་གསུངས་པ་བྱིས་པའི་ཐ་སྙད་པའི་ཤེས་པས་ཡོད་པར་བཟུང་བའི་འཛིན་སྟངས་དང་མཐུན་པར་གསུངས་ཀྱི། འཕགས་པའི་དེ་ཁོ་ན་ཉིད་གཟིགས་པའི་གཟིགས་ངོ་དང་བསྟུན་ནས་གསུངས་པ་མིན་ནོ།།

སྲིད་པ་འཁོར་བ་རང་བཞིན་གྱིས་སྐྱེ་བ་མེད་པར་ཡོངས་སུ་ཤེས་པའི་ཡེ་ཤེས་ཀྱིས་འབྲས་བུའི་ཚེ་འགོག་པ་མངོན་དུ་བྱས་པ་ལ་མྱང་འདས་ཐོབ་པ་ཞེས་བཞག་གོ། དེ་ལྟ་མིན་པར་རང་གི་མཚན་ཉིད་ཀྱིས་གྲུབ་པའི་ཉོན་མོངས་ཟད་པ་དང་ཕུང་བོ་ཕྱི་མ་མི་སྐྱེ་བས་འཇོག་ན་འགོག་པ་མྱང་འདས་དེ་མངོན་དུ་བྱེད་པ་དང་ཉོན་མོངས་དང་ཕུང་བོ་ཟད་པ་གང་ཡང་མི་འཐད་ཅེས་འགོག་ཅིང་དེ་ཉིད་ཐེག་དམན་གྱི་མྱང་འདས་སྟོན་པའི་ལུང་གི་དོན་དུ་ཡང་འཆད་ལ། དེ་སྒྲུབ་པའི་ཡན་ལག་ཏུ་གཞུང་ལྷག་མ་རྣམས་གསུངས་སོ།།

མདོར་ན་དགྲ་བཅོམ་པ་ཐོབ་པའི་ཚེ་མྱང་འདས་ཐོབ་པ་དང་མངོན་དུ་བྱས་ཞེས་པའི་དོན་དེ་ལ་དེ་ཁོ་ན་ཉིད་དོན་དམ་པའི་བདེན་པ་མངོན་དུ་བྱས་པ་ཞིག་མེད་ན་མྱང་འདས་ཐོབ་པ་གཏན་མི་རུང་བར་ཐེག་དམན་གྱི་མདོ་ཉིད་ཀྱིས་སྒྲུབ་པ་གཙོ་བོའི་དོན་ནོ།།

6 འགྲེལ་བ།

རིགས་པ་དྲུག་ཅུ་བའི་ཟིན་བྲིས་རྗེའི་གསུངས་བཞིན་རྒྱལ་ཚབ་ཆོས་རྗེས་བཀོད་པ། རྒྱ་ཚབ་ཆོས་རྗེའི་རིགས་པ་དྲུག་ཅུ་བའི་ཊཱིཀྐ་སོགས་ཡོད།

བསྟན་འགྱུར་ཁྲོད་ཀྱི་མདོ་ཙ་པོད་ན་བཞུགས། 


སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2016-04-28

གསར་སྤེལ་མཁན། :ལོ་མི་ཆུང་།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།