རྩོད་པ་ཟློག་པ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

རྩོད་པ་ཟློག་པ།
བསྟན་བཅོས་འདི་ནི་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིགས་ཚོགས་དྲུག་གི་གྲས་ཡིན་ཞིང་ཐེག་ཆེན་གྱི་བསྟན་བཅོས་ལས་ཆེས་ཕུལ་དུ་བྱུང་བ་ཞིག་ཡིན་པས་དབུ་མ་ཐམས་ཅད་ཀྱི་ཁུངས་གཏུག་སར་བྱེད། དབུ་མ་བའི་ཤིང་རྟའི་སྲོལ་འབྱེད་ཀྱི་བསྟན་བཅོས་དྲུག་གི་ཡ་གྱལ་ཡིན།
གཞི་རྩའི་གནས་ཚུལ།

རྒྱ་ཡིག་གི་མིང་།
《回诤论》
རྩོམ་པ་པོ།
སློབ་དཔོན་འཕགས་པ་ཀླུ་སྒྲུབ།
སྒྱུར་མཁན།
རྒྱ་གར་གྱི་མཁན་པོ་ཛྙ་ན་གརྦྷ་དང་བོད་ཀྱི་ལོ་ཙྪ་བ་ཀ་བ་དཔལ་བརྩེགས་ཀྱིས་བསྒྱུར་བ་ལ། སླད་ཀྱིས་ཁ་ཆེའི་པཎྜི་ཏ་ཛ་ཡ་ཨ་ནནྟ་དང་ལོ་ཙྪ་བ་ཁུ་མདོ་སྡེ་དཔལ་གྱིས་བསྒྱུར།
གཞུང་ཚད།
ཤོ་ལོ་ཀ་བདུན་ཅུ་དོན་གཉིས།
1 མིང་ཁ་ཚང་།

རྒྱ་གར་སྐད་དུ། ལྱེ་ཀྲ་ཧ་བྱ་བརྟ་ནི་ཀཱ་རི་ཀཱ་ན་མ།

བོད་སྐད་དུ། རྩོད་པ་ཟློག་པའི་ཚིག་ལེའུར་བྱས་པ་ཞེས་བྱ་བ།

སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིགས་ཚོགས་དྲུག་གི་གྲས་ཡིན་ཞིང་ཐེག་ཆེན་གྱི་བསྟན་བཅོས་ལས་ཆེས་ཕུལ་དུ་བྱུང་བ་ཞིག་ཡིན་པས་དབུ་མ་ཐམས་ཅད་ཀྱི་ཁུངས་གཏུག་སར་བྱེད། དབུ་མ་བའི་ཤིང་རྟའི་སྲོལ་འབྱེད་ཀྱི་བསྟན་བཅོས་དྲུག་གི་ཡ་གྱལ་ཡིན།

2 རྩོམ་པ་པོ།

སློབ་དཔོན་འཕགས་པ་ཀླུ་སྒྲུབ་ནི་དབུ་མ་བའི་ཤིང་རྟའི་སྲོལ་འབྱེད་ཆེན་པོ་ཡིན་ཏེ་སྟོན་པ་མྱ་ངན་ལས་འདས་ནས་ལོ་བཞི་བརྒྱ་ལོན་པ་ན་ལྷོ་ཕྱོགས་བེ་དརྦྷའི་ཡུལ་དུ་འཁྲུངས། ནཱ་ལེནྡྲར་རབ་ཏུ་བྱུང་། མཁས་པ་ཆེན་པོར་གྱུར་ནས་ཐེག་ཆེན་གྱི་ཤིང་རྟའི་སྲོལ་འབྱེད། ཆོས་སྒྲ་ཆེན་པོ་གསུམ་སྒྲོགས་པར་མཛད། དེ་མཛད་ཚུལ་ཡང་དགུང་ལོ་ལྔ་བཅུ་ཚུན་ཆད་དུ་དགེ་སློང་བདེ་བྱེད་ལ་སོགས་པ་བསླབ་པ་ལ་གཡེལ་བ་རྣམས་ལུང་རིགས་ཀྱིས་ཚར་བཅད་ནས་བསྟན་པ་ལ་དག་ཐར་མཛད་དེ་ཆོས་སྒྲ་དང་བོ་བསྒྲགས་པ་དང་། དེ་ནས་ལྔ་བཅུ་ཡན་ཆད་བརྒྱ་ཚུན་ཆད་ཅིག་ལ་ཀླུ་ཡུལ་དུ་ཕེབས་ཏེ་ཤེར་ཕྱིར་འབུམ་པ་སྤྱན་དྲངས་པ་དང་། དབུ་མ་རིགས་ཚོགས་དྲུག་ལ་སོགས་པ་བརྩམས་ནས་ལོ་ལྔ་བརྒྱའི་བར་དུ་ཆོས་སྒྲ་གཉིས་པ་བསྒྲགས། དེ་ནས་དགུང་ལོ་ལྔ་བརྒྱའི་ཡན་ལ་མདོ་སྡེ་རྔ་བོ་ཆེ་དང་། སྤྲིན་ཆེན་ལ་སོགས་པར་བཤད་པ་རྒྱ་ཆེར་མཛད་དེ་ཆོས་སྒྲ་གསུམ་པ་བསྒྲགས་ཏེ་དགུང་ལོ་དྲུག་བརྒྱ་ཙམ་བཞུགས་སོ།།

3 སྒྱུར་མཁན།

བསྟན་བཅོས་འདི་ནི་རྒྱ་གར་གྱི་མཁན་པོ་ཛྙ་ན་གརྦྷ་དང་བོད་ཀྱི་ལོ་ཙྪ་བ་ཀ་བ་དཔལ་བརྩེགས་ཀྱིས་བསྒྱུར་བ་ལ། སླད་ཀྱིས་ཁ་ཆེའི་པཎྜི་ཏ་ཛ་ཡ་ཨ་ནནྟ་དང་ལོ་ཙྪ་བ་ཁུ་མདོ་སྡེ་དཔལ་གྱིས་བསྒྱུར།

4 གཞུང་ཚད།

བསྟན་བཅོས་འདི་ལ་ཤོ་ལོ་ཀ་བདུན་ཅུ་དོན་གཉིས་ཡོད་དོ།།

5 བརྗོད་བྱ།

ཤེས་རབ་ཀྱི་ཕ་རོལ་ཏུ་ཕྱིན་པའི་དངོས་བསྟན་གྱི་རིམ་པ་འགྲེལ་ཏེ། བརྗོད་བྱ་གཙོ་བོ་སྟོང་ཉིད་དེ་དབུ་མའི་ལྟ་བ་ཡིན། དེ་ཡང་ལམ་ཟབ་མོ་དབུ་མའི་ལམ་ངེས་པའི་དོན་ལུང་གིས་བསྟན་པ་ནི་མདོ་ཀུན་ལས་བཏུས་ལས་ཤེར་ཕྱིན་འབུམ་པ་དང་བྱང་སེམས་ཀྱི་སྡེ་སྣོད་ལ་སོགས་པའི་མདོ་མང་བོ་དྲངས་ནས་བཤད་ལ།

རིགས་པས་བསྟན་པ་ནི་རྩ་བ་ཤེས་རབ། སྟོང་ཉིད་བདུན་ཅུ་བ། རྩོད་ཟློག  རིགས་པ་དྲུག་ཅུ་བ། ཞིབ་མོ་རྣམ་འཐག  རིན་ཆེན་ཕྲེང་བ་སྟེ་དྲུག་ཏུ་རིགས་པ་མང་བོས་གཏན་ལ་ཕབ་བོ། །བསྟོད་པ་འགའ་ཞིག་ལས་ཀྱང་སྟོང་ཉིད་བསྟན་མོད་ཀྱང་རིགས་པས་བསྒྲུབས་པ་མི་མང་ངོ་། །གཞུང་དེ་དག་ཀྱང་ཡོད་མེད་ཀྱི་མཐའ་སྤངས་པའི་རྟེན་འབྱུང་གི་དེ་ཁོ་ན་ཉིད་གཙོ་བོར་སྟོན་པ་དང་ཡོད་མེད་ཀྱི་མཐར་མི་ལྟ་བའི་ལམ་གྱིས་འཁོར་བ་ལས་གྲོལ་བ་གཙོ་བོར་སྟོན་པ་གཉིས་སུ་འདུའོ།།

ཡོད་མེད་ཀྱི་མཐའ་སྤངས་པའི་རྟེན་འབྱུང་གི་དེ་ཁོ་ན་ཉིད་གཙོ་བོར་སྟོན་པ་ལ་གཉིས་ལས། དངོས་བོའི་ངོ་བོ་ཉིད་སྨྲ་བ་རྣམས་ཀྱིས་གང་ཟག་དང་ཆོས་ལ་སྒྲོ་བཏགས་པའི་རང་བཞིན་བསྒྲུབ་བྱ་འགོག་པ་ནི་རྩ་བ་ཤེས་རབ་ཡིན་ལ། དངོས་པོ་རྣམས་ཀྱི་རང་བཞིན་ནི། །རྐྱེན་ལ་སོགས་ལ་ཡོད་མ་ཡིན། །ཞེས་གསུངས་པ་ལ། གལ་ཏེ་དངོས་པོ་ཐམས་ཅད་ཀྱི། །རང་བཞིན་ཀུན་ལ་ཡོད་མིན་ན། །ཁྱོད་ཀྱི་ཚིག་ཀྱང་རང་བཞིན་མེད། །རང་བཞིན་བཟློག་པར་མི་ནུས་སོ། །ཞེས་བརྒལ་བའི་ལན་དུ་བྱུང་བའི་ཕྱིར་རྩོད་ཟློག་ནི་རབ་བྱེད་དང་པོའི་གཞུང་དེའི་ལྷག་མ་ཡིན་ལ། རྩ་ཤེས་དང་ཞིབ་མོ་རྣམ་འཐག་གིས་ཕས་རྒོལ་གྱི་བསྒྲུབ་བྱ་དང་སྒྲུབ་བྱེད་རྒྱས་པར་བཀག་ནས་རྟེན་འབྱུང་གི་དེ་ཁོ་ན་ཉིད་བསྟན་པ་ན། དེ་ལྟར་འགོག་པ་དེའི་ལུགས་ལ་ཡང་དགག་སྒྲུབ་ཀྱི་བྱ་བྱེད་མི་འཐད་པས་གཞན་ཕྱོགས་འགོག་པ་དང་རང་ཕྱོགས་སྒྲུབ་པ་མེད་པར་འགྱུར་རོ་སྙམ་པ་ལ་རང་ལ་དེ་དག་ལ་སོགས་པའི་བྱ་བྱེད་ཐམས་ཅད་འཐད་པར་རྩོད་ཟློག་གིས་བསྟན་ནོ། །འདི་དང་སྟོང་ཉིད་བདུན་ཅུ་བ་གཉིས་ནི་རྩ་ཤེས་ལས་འཕྲོས་པའི་ཡན་ལག་ཡིན་ནོ།།

6 འགྲེལ་བ།

རྩོད་པ་ཟློག་པའི་རང་འགྲེལ།

བསྟན་འགྱུར་ཁྲོད་ཀྱི་མདོ་ཙ་པོད་ན་བཞུགས། 

སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2016-04-28

གསར་སྤེལ་མཁན། :ལོ་མི་ཆུང་།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།