ཚད་མ་རྣམ་འགྲེལ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

ཚད་མ་རྣམ་འགྲེལ།
དཔལ་ལྡན་ཆོས་ཀྱི་གྲགས་པས་ཚད་མ་ཀུན་བཏུས་ཀྱི་དགོངས་འགྲེལ་དུ་དབང་པོ་རྟུལ་འབྲིང་རྣོན་པོའི་དབང་དུ་བྱས་ནས་ཚད་མ་སྡེ་བདུན་མཛད་པ་དེའི་ཡ་གྱལ་དང་བྱེ་བྲག་གཙོ་བོ་ལུས་ལྟ་བུའི་བསྟན་བཅོས་གསུམ་དུ་གྲགས་པ་དེའི་གྲས་ཤིག་སྟེ། རང་དོན་རྗེས་དཔག་གི་ལེའུ་དང་། ཚད་མ་གྲུབ་པའི་ལེའུ། མངོན་སུམ་གྱི་ལེའུ། གཞན་དོན་རྗེས་དཔག་གི་ལེའུ་བཅས་ཁྱོན་ལེའུ་བརྒྱད་ཀྱིས་གྲུབ་པའི་རྒྱས་པའི་བསྟན་བཅོས་ཚད་མ་རྣམ་འགྲེལ་ཞེས་བྱ་བ་དེའོ།།
གཞི་རྩའི་གནས་ཚུལ།

རྒྱ་ཡིག་གི་མིང་།
释量论
མཛད་པ་པོ།
དཔལ་ཆོས་ཀྱི་གྲགས་པ།
སྒྱུར་མཁན།
རྒྱ་གར་གྱི་པཎྜི་ཏ་སུ་བྷཱུ་ཏི་ཤྲཱི་ཤཱནྟི་དང་། བོད་ཀྱི་ལོ་ཙཱ་བ་དགེ་བའི་བློ་གྲོས་ཀྱིས་བོད་ཡིག་ཏུ་བསྒྱུར་ལ། པཎྜི་ཏ་སྐལ་ལྡན་རྒྱལ་པོ་དང་། རྔོག་བློ་ལྡན་ཤེས་རབ་ཀྱིས་བཅོས་ཤིང་། སླད་ཀྱི་པཎྜི་ཏ་ཤཱཀྱ་ཤྲཱི་བྷ་དྲ་དང་། ལོ་ཙཱ་བ་ཀུན་དགའ་རྒྱལ་མཚན་དཔལ་བཟང་པོས་བཅོས་ཤིང་གཏན་ལ་ཕབ་པའོ།།
གཞུང་ཚད།
ལེའུ་བཞི་ཡོད།
1 ​མིང་ཁ་ཚང།

རྒྱ་གར་སྐད་དུ། པྲ་མཱ་ཎ་བཱར་ཏི་ཀཱ་ཀཱ་རི་ཀཱ་དང་།

བོད་སྐད་དུ། ཚད་མ་རྣམ་འགྲེལ་གྱི་ཚིག་ལེའུར་བྱས་པ་ཞེས་ཟེར།

གཙོ་བོ་ལུས་ལྟ་བུའི་བསྟན་བཅོས་གསུམ་དང་། འཕྲོས་པ་ཡན་ལག་ལྟ་བུའི་བསྟན་བཅོས་བཞི་སྟེ་ཚད་མ་སྡེ་བདུན་དུ་གྲགས་པ་ལས་ལུས་ལྟ་བུའི་བསྟན་བཅོས་གསུམ་གྱི་ཤིན་ཏུ་རྒྱས་པའི་བསྟན་བཅོས་ཡིན།

2 རྩོམ་པ་པོ།

དཔལ་ཆོས་ཀྱི་གྲགས་པ་ནི་རྒྱ་གར་ལྷོ་ཕྱོགས་རྒྱལ་དབང་གཙུག་གི་ནོར་བུ་ཞེས་བྱ་བར། མུ་སྟེགས་ཀྱི་བྲམ་ཟེའི་རིགས་སུ་སྐྱེས་ཏེ། ཆུང་ངུ་ལ་སྒྲ་ལེགས་པར་འབྱོངས་ནས། ཞང་པོ་མུ་སྟེགས་ཀྱི་སྟོན་པ་གཞོན་ནུ་མ་ལེན་ལ། མུ་སྟེགས་ཀྱི་བྲམ་ཟེ་རབ་ཏུ་བྱུང་བའི་ཆས་བླངས་པས། ཞང་པོས་ངན་དུ་སྨྲས་ཏེ་བསྐྲད་དོ།། སློབ་དཔོན་གྱི་དགོངས་པས། མུ་སྟེགས་ཐམས་ཅད་ཕམ་པར་བྱེད་པ་ཞིག་བྱའོ་སྙམ་སྟེ། ནང་པའི་བསྟན་པ་ལ་རབ་ཏུ་བྱུང་ནས་སྦྱངས་པ་མཛད་ཅིང་། ཁྱད་པར་སློབ་དཔོན་དབང་ཕྱུག་སྡེ་ལ་ཚད་མ་ཀུན་ལས་བཏུས་ཚར་གསུམ་དུ་ཉན་པར་དམ་བཅས་ནས་མཉན་པས་དང་པོ་ལ་སློབ་དཔོན་དབང་ཕྱུག་སྡེས་ཇི་ལྟར་དགོངས་པ་ལྟར་གོ གཉིས་པ་ལ་ཕྱོགས་གླང་གིས་དགོངས་པ་བཞིན་གོ་སྟེ། དབང་ཕྱུག་སྡེའི་འདོད་པ་ནོར་བར་རྟོགས་ནས། གསུམ་པ་གསུང་བར་ཞུས་པས། ཕྱོགས་གླང་ལ་སློབ་མ་ང་ལྟ་བུ་ལས་མེད། ང་ལའང་ཁྱེད་ལྟ་བུ་ལས་མ་བྱུང་། ཚར་རེ་ལས་འཆད་པའི་སྲོལ་མེད་པ་ལ། གཉིས་སུའང་བཤད་པ་ཡིན། ང་འདི་གཅིག་པུ་འཆད་པས་མི་ཕན། པཎྜི་ཏའི་བྱ་བ་གཞན་ཡང་བྱ་དགོས་པས། རས་སྣུམ་སྟ་གོན་གྱིས་ཤིག་ནུབ་མོ་འཆད་དོ།། གསུངས་ནས་དེ་ལྟར་བྱས་པས། འབྲས་བུ་རྒྱུའི་ཁྱད་པར་གྱི་རྗེས་སུ་བྱེད་པ་ལྷག་པར་རྟོགས་ཏེ་སློབ་དཔོན་ལ་སྔར་གྱི་ཚུལ་བརྗོད་པས་ཤིན་ཏུ་མཉེས་ནས། ད་ཁྱོད་ཀྱིས་ངའི་གྲུབ་མཐའ་ནོར་པ་རྣམས། ཕྱོགས་སྔར་གྱིས་ལ། ཀུན་ལས་བཏུས་ལ། འགྲེལ་པ་རྩོམས་ཤིག། ཅེས་རྗེས་སུ་གནང་ངོ་།། དེ་ནས་སློབ་དཔོན་གྱིས་གྲངས་ཅན་གྱི་གྲུབ་མཐའི་གསང་ཚིག་རྣམས་རྟོགས་པའི་དོན་དུ་བྲན་དུ་རྫུས་ཏེ་ཞང་པོའི་ཆུང་མའི་གཡོག་བྱས་ནས་མགུ་བར་བྱས་ཏེ། གྲུབ་མཐའི་གནད་འདི་འདྲ་འདྲི་དགོས་བྱས་པས། འདོད་པ་སྤྱོད་པའི་ཚེ་དྲི་ཡིས། ཁྱེད་རང་ཡིད་ལ་ཟུངས་ཟེར་ནས། མོའི་རྐང་པ་ལ་ཐག་པ་བཏགས་ནས། གང་དཀའ་བ་དེ་ལ་ཐག་པ་འཐེན་ནས་ལེགས་པར་ཤེས་པ་དང་བྲིས་ཏེ་གྲུབ་མཐའི་གནད་ཤེས་པས། ཐམས་ཅད་ཐུབ་པར་ཤེས་ཏེ། དེའི་ཚེ་མཁས་པ་ཡོད་ན་རྩོད་པར་བྱེད་དོ་ཞེས་དྲིལ་བསྒྲགས་པས་ཕལ་ཆེར་ཡུལ་གཞན་དུ་བྲོས། རྩོད་པ་བྱས་པ་རྣམས་ཆོས་ཀྱིས་ཚར་བཅད་དེ། ཆོས་ཀྱི་ལམ་ལ་བཀོད་ནས། གལ་ཏེ་ཆོས་ཀྱི་གྲགས་པ་ཡི།། སྨྲ་བའི་ཉི་མ་ནུབ་པ་ན།། ཆོས་རྣམས་གཉིད་ལོག་ཡང་ན་ཤི།། ཆོས་མ་ཡིན་རྣམས་ད་གདོད་ལོངས།། ཞེས་ཆེད་དུ་བརྗོད་པ་མཛད་དོ།། བསྟོད་པ་བྱེད་པ་དག་གྱིས་ཀྱང་།། མུ་སྟེགས་རིགས་ལ་སྒྲ་ཚད་མཁས།། རྒོལ་བ་ཚར་གཅོད་མཁའ་ལ་གཤེགས།། དྷརྨ་ཀིརྟི་ཞེས་བྱ་བའི།། བླ་མ་དེ་ལ་ཕྱག་འཚལ་ལོ།། ཞེས་བསྟོད་དོ།། དེ་ནས་སློབ་དཔོན་རིམ་གྱིས་གྲོང་ཁྱེར་དང་ལྗོངས་རྒྱུ་ཞིང་། མཐར་རྒྱལ་པོ་མེ་ཏོག་རྒྱས་པའི་སྒོ་དྲུང་དུ་སླེབས་སྟེ་རྒྱལ་པོས་ད་ལྟ་སུ་མཁས་དྲིས་པས། ཤེས་རབ་ཅན་ནི་ཕྱོགས་ཀྱི་གླང་པོ་སྟེ།། ཙནྡྲ་གོ་མི་བརྗོད་པ་རྣམ་པར་དག། སྙན་ངག་དཔའ་བོ་ལས་བྱུང་སྡེབ་སྦྱོར་མཁས།། མེ་ཏོག་ཀུན་ཏུ་རྒྱས་པ་ལོངས་སྤྱོད་ལྡན།། ཕྱོགས་ལས་རྣམ་པར་རྒྱལ་བ་ང་མིན་སུ།། ཞེས་གསུངས་པས། རྒྱལ་པོ་ན་རེ། དྷརྨཱ་ཀིརྟི་ཡིན་ནམ། དེ་སྐད་དུའང་གྲགས་སོ།། གསུངས་པ་དང་། རྒྱལ་པོས་གདན་དྲངས་ཏེ་སྦྱིན་བདག་མཛད་ནས། རབ་ཏུ་བྱེད་པ་སྡེ་བདུན་བརྩམས་ཏེ། མཇུག་ཏུ་རྣམ་འགྲེལ་གྱི་ལེའུ་དང་པོའི་རང་འགྲེལ་མཛད་དོ།། བསྟན་བཅོས་རྣམས་མཁས་པའི་གྲ་སར་འགྲིམས་པས་ཕལ་ཆེར་གྱིས་མ་ཤེས་སོ།། ལ་ལས་ཤེས་ཀྱང་ཕྲག་དོག་བྱས་ནས་ཉེས་སོ།། ཞེས་བསྒྲགས་ཏེ་ཁྱི་མཇུག་ལ་བཏགས་པས། སློབ་དཔོན་ན་རེ། ཁྱི་གྲོང་དང་སྲང་ཀུན་ཏུ་རྒྱུ་བ་བཞིན་བསྟན་བཅོས་ཀྱང་དར་བར་འགྱུར་རོ།། ཞེས་གསུངས་ཤིང་། རྣམ་འགྲེལ་གྱི་མགོར། སྐྱེ་བོ་ཕལ་ཆེར་ཕལ་ལ་ཆགས་ཤིང་ཤེས་རབ་རྩལ་མེད་པས་ན་ལེགས་བཤད་རྣམས།། དོན་དུ་མི་གཉེར་ཁོ་ནར་མ་ཟད་ཕྲག་དོག་དྲི་མ་དག་གིས་སྡང་བར་ཡང་།། ཡོངས་གྱུར་དེས་ན་བདག་ལ་འདི་ནི་གཞན་ལ་ཕན་པ་ཡིན་ཞེས་བསམ་པའང་མེད།། སེམས་ནི་ཡུན་རིངས་ལེགས་བཤད་གོམས་པས་ལྷུར་ལེན་བསྐྱེད་ཕྱིར་འདི་ལ་དགའ་བ་སྐྱེས། ཞེས་པ་བཅུག་གོ་ཞེས་གྲག་གོ། དེ་ནས་པཎྜི་ཏ་ལྷ་དབང་བློ་ལ་འགྲེལ་པ་རྩོམ་པར་བསྐོས་པས་ལན་ཅིག་བརྩམས་ཏེ་གཟིགས་པ་ཕུལ་བས་ཆུས་བཀྲུས། ཡང་བརྩམས་པས་མེས་བསྲེགས་པས། ཕྱིས་བརྩམས་ནས། ཕལ་ཆེར་སྐལ་བ་མེད་ཉིད་དང་།། དུས་ལའང་སྡོད་པ་མེད་པའི་ཕྱིར།། གོམས་པའི་ཕྱིར་ནི་མདོར་བསྡུས་ནས།། དཀའ་འགྲེལ་འདི་ནི་འདིར་བྱས་སོ།། ཞེས་པ་ཕུལ་བས། འཕྲོས་དང་ཚིག་གི་ཟུར་གྱིས་མཚོན་པའི་དོན་རྣམས་མ་བྱུང་བར་འདུག་སྟེ། ཚིག་གིས་དངོས་སུ་བསྟན་པའི་དོན་བྱུང་འདུག་གསུང་། འོན་ཀྱང་ངའི་རིགས་པ་འདི་གཞན་གྱིས་མ་ནོར་བ་མི་ཤེས་པར་འདུག་དགོངས་ཏེ། རྣམ་འགྲེལ་གྱི་མཇུག་ཏུ། རྒྱ་མཚོ་ལ་ནི་ཆུ་བོ་བཞིན་དུ་རང་གི་ལུས་ལ་ཐིམ་ཞིང་ནུབ་པ་ཉིད་དུ་འགྱུར། ཞེས་པ་བཅུག་ཅེས་གྲག་གོ།

3 བོད་དུ་སྒྱུར་མཁན།

རྒྱ་གར་གྱི་པཎྜི་ཏ་སུ་བྷཱུ་ཏི་ཤྲཱི་ཤཱནྟི་དང་། བོད་ཀྱི་ལོ་ཙཱ་བ་དགེ་བའི་བློ་གྲོས་ཀྱིས་བོད་ཡིག་ཏུ་བསྒྱུར་ལ། པཎྜི་ཏ་སྐལ་ལྡན་རྒྱལ་པོ་དང་། རྔོག་བློ་ལྡན་ཤེས་རབ་ཀྱིས་བཅོས་ཤིང་། སླད་ཀྱི་པཎྜི་ཏ་ཤཱཀྱ་ཤྲཱི་བྷ་དྲ་དང་། ལོ་ཙཱ་བ་ཀུན་དགའ་རྒྱལ་མཚན་དཔལ་བཟང་པོས་བཅོས་ཤིང་གཏན་ལ་ཕབ་པའོ།།

4 གཞུང་ཚད།

ལེའུ་བཞི་ཡོད།

5 བརྗོད་བྱ།

སྤྱིར་ཚད་མ་སྡེ་བདུན་མདོ་དང་བཅས་པས་ཡང་དག་པའི་ཤེས་པ་འཁོར་དང་བཅས་པ་བརྗོད་བྱར་བྱེད་ལ། དེ་ཡང་། མངོན་སུམ་དང་ནི་རྗེས་སུ་དཔག། ལྟར་སྣང་བཅས་པ་བདག་རིག་ཕྱིར།། སྒྲུབ་པ་དང་ནི་སུན་འབྱིན་ངག། ལྟར་སྣང་བཅས་པ་གཞན་རྟོགས་ཕྱིར།། ཞེས་བཤད་པའི་རྟོགས་གེའི་ཚིག་དོན་བརྒྱད་དེ། མངོན་སུམ་ཡང་དག་དང་མངོན་སུམ་ལྟར་སྣང་། རྗེས་དཔག་ཡང་དག་དང་རྗེས་དཔག་ལྟར་སྣང་སྟེ་བདག་ཉིད་ཀྱིས་སྒྲུབ་བྱ་རྟོགས་པའི་ཕྱིར་དུ་བསྟན་པ་བཞི་དང་། སྒྲུབ་ངག་ཡང་དག་དང་སྒྲུབ་ངག་ལྟར་སྣང་། སུན་འབྱིན་ཡང་དག་དང་སུན་འབྱིན་ལྟར་སྣང་སྟེ་གཞན་གྱིས་སྒྲུབ་བྱ་རྟོགས་པའི་ཕྱིར་དུ་བསྟན་པ་བཞི་སྟེ་བརྒྱད་བསྟན་པ་དང་། ཁྱད་པར་དུ་རྣམ་འགྲེལ་འདིས་ནི། རང་ཉིད་ཀྱིས་གཞལ་བྱའི་གནས་ཕྱིན་ཅི་མ་ལོག་པར་རྟོགས་ནས། དེ་གཞན་ལ་འདོམས་པའི་ཐབས་རྟོག་གེའི་ཚིག་དོན་བརྒྱད་ཚད་མ་མདོའི་ཚིག་གི་ཆ་དང་སྦྱར་ནས་སྟོན་པ་ཡིན་ལ། དེའི་ནང་ནས་མངོན་སུམ་ལེའུའི་དོན་རྣལ་འབྱོར་མངོན་སུམ་གྱི་གཙོ་བོ་ཐམས་ཅད་མཁྱེན་པ་སྒྲུབ་པ་རྟོགས་དཀའ་བ་དང་། དེ་བསྟན་བྱའི་གཙོ་བོ་ཡིན་ཞིང་སློབ་དཔོན་ཕྱོགས་ཀྱི་གླང་བོས་ཐུབ་པ་ཚད་མར་བསྒྲུབ་པའི་སྒོ་ནས་གསུང་རབ་ཀྱི་དགོངས་པ་འགྲེལ་བའི་ཚུལ་ལ་ངོ་མཚར་བསྐྱེད་པའི་ཕྱིར་དུ། སྟོན་པ་དང་བསྟན་སྐྱོན་མེད་པར་སྒྲུབ་པ་ཚད་མ་གྲུབ་པའི་ལེའུ་ཟུར་བ་མཛད་པ་ཡིན་ལ། དེ་ཡང་ཐམས་ཅད་མཁྱེན་པ་ལ་སྐྱེད་བྱེད་ཀྱི་རྒྱུ་མེད་པར་འཛིན་པའི་ལོག་པར་རྟོག་པ་དང་ཤེས་བྱེད་ཀྱི་རྒྱུ་མེད་པར་འཛིན་པའི་ལོག་པར་རྟོགས་པ་གཉིས་ལས། ལོག་རྟོག་དང་བོ་བསལ་ནས་ཐམས་ཅད་མཁྱེན་པ་ལམ་གང་ནས་བྱོན་པ་རྟོགས་པའི་ཕྱིར་དུ་ལུགས་ལས་འབྱུང་བའི་བཤད་པ་མཛད་ཅིང་། ལོག་རྟོག་གཉིས་པ་བསལ་བའི་ཕྱིར་དུ་ལུགས་ལས་བཟློག་པའི་བཤད་པ་མཛད་པ་ཡིན་ནོ།།

6 འགྱུར་འགྲེལ་དང་ཞུ་དག

སྡེ་བདུན་ནང་ནས་གཞུང་ཚད་རྒྱས་ཤོས་ནི་ཚད་མ་རྣམ་འགྲེལ་ཡིན་པ་ཞུ་མི་དགོས་པ་རེད། བསྟན་བཅོས་འདི་ཀོ་རྒྱ་གར་ཙམ་དུ་མ་ཟད་བོད་ཀྱི་མཁས་པ་གོང་མ་དག་གིས་ཀྱང་གཅེས་ནོར་དམ་པར་བཟུང་བའི་རྟགས་མཚན་ལ་འགྱུར་གྱི་དབང་དུ་བཏང་ནའང་ལོ་ཙཱ་བ་དགེ་བློའི་འགྱུར་ལ་ལོ་ཙཱ་བ་ཆེན་པོ་རྔོག་བློ་ལྡན་ཤེས་རབ་ཀྱིས་ཞུས་ཆེན་མཛད་པ་དེ་ལའང་ས་པཎ་ཀུན་དགའ་རྒྱལ་མཚན་གྱིས་བསྐྱར་ཞུས་མཛད་ཡོད། ཚད་མའི་རིགས་ལམ་ཆགས་པར་གཞུང་འདི་ཉིད་ལ་དམིགས་ཕུག་པའི་སློབ་གཉེར་མ་བྱས་ན་མི་འགྲིག་པར་རྟེན་ཚད་མ་རྣམ་འགྲེལ་ལ་འཆད་རྩོད་ཀྱི་བརྒྱུད་པ་དུས་ད་ལྟའི་བར་མ་ཉམས་པར་བཞུགས་ཡོད། རྣམ་འགྲེལ་ལེའུ་བཞིའི་ནང་ཀྱང་ལེའུ་དང་པོ་རང་དོན་རྗེས་དཔག་གི་ལེའུ་འདི་དཀའ་གནད་ཆེ་ཞིང་འདི་ལེགས་པར་ཁོང་དུ་ཆུད་པ་སྔོན་དུ་མ་སོང་ན་ལེའུ་ཕྱི་མ་གཞན་གསུམ་པོའང་ཇི་བཞིན་འཆད་པར་མི་ནུས་པར་དགོངས་ཏེ་ལེའུ་འདི་ལ་སློབ་དཔོན་གྱི་རང་འགྲེལ་ཡང་མཛད། གནད་དོན་དེ་ལྟར་ཡོད་པར་མ་ཤེས་པའི་མཁས་པ་འགའ་ཤས་ཀྱིས་རང་དོན་རྗེས་དཔག་རྣམ་འགྲེལ་ལེའུ་དང་པོར་མི་འདོད་པ་ནི་དཔྱད་བཟོད་ཀྱི་གཏམ་མིན་པར་མངོན། སློབ་དཔོན་ཆོས་གྲགས་ཀྱི་དངོས་སློབ་སློབ་དཔོན་ལྷ་དབང་བློས་རང་འགྲེལ་གྱི་འཕྲོ་མཐུད་ནས་རྣམ་འགྲེལ་དཀའ་འགྲེལ་མཛད། འདི་རང་འགྲེལ་དང་བསྡོམས་པར་ཚད་མ་སྟོང་ཕྲག་བཅུ་གཉིས་ཟེར། དེའི་དངོས་སློབ་སློབ་དཔོན་ཤཱཀྱ་བློས་ཚད་མ་སྟོང་ཕྲག་བཅུ་གཉིས་པ་ཡོངས་རྫོགས་འགྲེལ་པ་རྣམ་འགྲེལ་འགྲེལ་བཤད་མཛད། མཛད་པ་པོ་གཅིག་གིས་རྣམ་འགྲེལ་ལ་རྣམ་བཤད་ཡོངས་རྫོགས་མཛད་པ་བོད་འགྱུར་ནི་འགྲེལ་བཤད་འདི་ཁོ་ན་ཡིན། རྒྱན་མཁན་པོ་ཤེར་འབྱུང་སྦས་པས་མཛད་པའི་རྣམ་འགྲེལ་རྒྱན་དང་། ཉི་མ་སྦས་པས་མཛད་པའི་རྣམ་འགྲེལ་འགྲེལ་པ་གཉིས་སུ་རྣམ་འགྲེལ་ལེའུ་གཉིས་པ་ཚད་མ་གྲུབ་པའི་ལེའུ་ནས་དབུ་བཙུགས་ནས་འགྲེལ་བ་མཛད་ཅིང་རང་དོན་རྗེས་དཔག་ལ་ཚིག་གི་དཀའ་འགྲེལ་སློབ་དཔོན་རང་ཉིད་ཀྱིས་རྒྱས་པར་མཛད་ཟིན་པ་ལ་དགོངས་ནས་འགྲེལ་བ་མཛད་མེད། རྣམ་འགྲེལ་རྒྱན་ལ་རྒྱལ་བ་ཅན་གྱི་རྣམ་འགྲེལ་རྒྱན་གྱི་འགྲེལ་བཤད་དང་སློབ་དཔོན་ཛ་མ་རི་ཡི་རྒྱན་གྱི་འགྲེལ་བཤད་ཤིན་ཏུ་ཡོངས་དག་བཅས་ཡོད། བྲམ་ཟེ་ཆེན་པོ་བདེ་བྱེད་དགའ་བས་མཛད་པའི་རྣམ་འགྲེལ་འགྲེལ་བཤད་ཅུང་ཟད་མ་ཚངས་སོགས་བོད་སྐད་དུ་བསྒྱུར་ཡོད། ཕྱོགས་མཚུངས་རང་རེ་གཞུང་འདིར་དད་མོས་ཅན་རྣམས་སྤྲོ་བ་སྐྱེ་འོས་པ་ཞིག་ལ་ལེགས་སྦྱར་སྐད་དུའང་དེ་ཡང་རྣམ་འགྲེལ་ལེགས་སྦྱར་ལ་ཞུ་ཆེན་ཐོག་མ་ནི་པཎྡི་ཏ་སྒྲ་གཅན་འཛིན་ཡིན་པར་མ་ཟད།  པཎྡི་ཏ་སྒྲ་གཅན་འཛིན་གྱིས་རྣམ་འགྲེལ་རང་འགྲེལ་ལེགས་སྦྱར་ལེའུ་དང་བོར་ཞུ་ཆེན་གནང་ཡོད། དེའི་ཚུལ་ཡང་ཁོང་གི་གཟིགས་དཔེ་བྲིས་མར་རང་འགྲེལ་ལེགས་སྦྱར་བཞི་ཆ་གཅིག་ཙམ་ལས་མ་བཞུགས་པར་བརྟེན་ཀར་ཎ་ཀ་གི་མིའི་རྣམ་འགྲེལ་འགྲེལ་བཤད་ཟུར་ལྟའི་དཔྱད་གཞི་གནང་ནས་བོད་འགྱུར་ནས་ལེགས་སྦྱར་དུ་བསྐྱར་གསོ་གནང་འདུག དེ་རྗེས་མཁས་པ་མ་ལྭ་ནི་ཨ་དང་ཉོ་ལི་གཉིས་ཀྱིས་ཀྱང་ལེའུ་དང་བོའི་རང་འགྲེལ་ལེགས་སྦྱར་ལ་ཞུ་ཆེན་གནང་ཡོད་པའི་ནང་ནས་ཕྱི་མ་ཉོ་ལིས་ཞུ་ཆེན་གནང་བ་འདི་བཞིན་དེང་རབས་མཁས་པ་རྣམ་ཀྱིས་ཚད་ལྡན་དུ་འཛིན། ཡང་པཎྡི་ཏ་སྒྲ་གཅན་འཛིན་གྱིས་རང་གིས་གདན་དྲངས་པའི་རྒྱན་མཁན་པོ་ཤེས་རབ་འབྱུང་གནས་སྦས་པའི་རྣམ་འགྲེལ་རྒྱན་ལ་ཞུ་ཆེན་མཛད་ཀྱང་། ཕྱི་འདིར་ཞུས་དག་ངེས་འདྲོངས་མ་ཐུབ་པའི་སྐྱོན་ཆ་ཡོད་པ་སྔ་ནས་བཤད་འདུག གཞན་ཡང་པཎྡི་ཏ་སྒྲ་གཅན་འཛིན་གྱིས་བོད་ནས་གདན་དྲངས་པའི་རྣམ་འགྲེལ་འགྲེལ་བའི་ནང་ན་དང་བོར་སློབ་དཔོན་ཡིད་ཀྱི་ཤིང་རྟ་དགའ་བོའི་རྣམ་འགྲེལ་འགྲེལ་བཤད་ལ་ཞུ་ཆེན་གནང་། འདིར་བརྗེད་བྱང་ཞིག་ཀྱང་མཉམ་དུ་ཡོད་པའི་ནང་ཕྱོགས་གླང་གི་གཞུང་གི་ལེགས་སྦྱར་གཞུང་ཚན་མང་བོ་བཀོད་ཡོད་པས་གལ་ཆེ། པཎྡི་ཏ་ཤ་སྟྲིས་ཀྱིས་སློབ་དཔོན་ཡིད་ཀྱི་དགའ་བོའི་རྣམ་འགྲེལ་འགྲེལ་བཤད་ལ་ཞུ་ཆེན་གནང་འདུག་ཀྱང་བྲིས་མ་གསར་བ་ཟུར་ལྟའི་དཔྱད་གཞི་བཀོད་མེད། དེ་བཞིན་མཁས་པ་པན་དེ་ཡིས་ཀྱང་ཡིད་ཀྱི་ཤིང་རྟ་དགའ་བོའི་རྣམ་འགྲེལ་འགྲེལ་བཤད་ལ་ཞུ་ཆེན་གནང་འདུག་ཀྱང་བྲིས་མ་གང་ལ་ཁུངས་བཅོལ་མིན་གསལ་བོ་མི་འདུག   པཎྡི་ཏ་སྒྲ་གཅན་འཛིན་དང་། མཁས་དབང་པ་ག་རི་ཡ་ཡིས་རྒྱན་མཁན་པོ་ཤེས་རབ་འབྱུང་གནས་སྦས་པའི་རྣམ་འགྲེལ་རྒྱན་ལ་ཚིག་བྱང་ཡང་བཟོས་འདུག དེ་རྗེས་སློབ་དཔོན་ཆེན་མོ་མི་ཡ་ས་ཁས་ལེགས་སྦྱར་དང་བོད་འགྱུར་གཉིས་ཀ་ལ་ཞུ་ཆེན་གནང་། ཞུས་ཆེན་པར་མ་འདི་བཞིན་རྒྱ་བོད་གཞུང་སྦྱར་ཏེ་སྟབས་བདེ་བོ་ཡོད་པས་ན་དེང་རབས་མཁས་པ་རྣམས་འདི་རང་ལ་སློབ་གཉེར་གནང་ལམ་ཆགས། 

7 གྲུབ་མཐའ་གང་དུ་གཏོགས་ཚུལ།

རྣམ་འགྲེལ་གྲུབ་མཐའ་གང་གི་ལུགས་སུ་འགྲེལ་ཞེ་ན། དེ་ཡང་ཀུན་མཁྱེན་འཇམ་དབྱངས་བཞད་པའི་ལེའུ་དང་པོའི་མཐའ་དཔྱོད་ལས། རང་ལུགས་ལ་བསྟན་བཅོས་འདིའི་གཞུང་ཡོངས་རྫོགས་གྲུབ་མཐའ་གཅིག་ལ་བཀྲལ་དུ་མི་རུང་ཡང་དགོངས་པ་མཐར་ཐུག་བཀྲལ་ཚུལ་དུ་མ་ཡོད་དེ། རྒྱན་མཁན་པོ་ཤེར་འབྱུང་བློ་གྲོས་ཀྱིས་ངོ་བོ་ཉིད་མེད་པ་ཐལ་འགྱུར་བ་དང་། ཞི་བ་འཚོ་ཡབ་སྲས་དང་ཛེ་ཏཱ་རིས་ངོ་བོ་ཉིད་མེད་པའི་དབུ་མ་རང་རྒྱུད་པ་དང་། ལྷ་ཤཱཀྱ་གཉིས་ཆོས་མཆོག་དང་གསུམ་གྱིས་སེམས་ཙམ་དུ་བཀྲལ་པའི་ཕྱིར། ཕྱི་མ་གསུམ་གྱི་ལུགས་འཐད་ལ་རྣམ་བདེན་རྫུན་གཉིས་ལས་ཆོས་མཆོག་ལྟར་གྱི་རྣམ་རྫུན་དང་། རྣམ་བདེན་བྱེད་ཚེ་སྣ་ཚོགས་གཉིས་མེད་པ་ཛེ་ཏཱ་རེས་བཤད་པ་ལྟར་རིགས་ཏེ། བསྟན་བཅོས་འདིས་མདོ་སེམས་ཐུན་མོང་གི་ལུགས་བཤད་པ་མང་ཡང་སེམས་ཙམ་པའི་ལུགས་གཙོ་བོར་བཤད་པའི་ཕྱིར། ཞེས་དང་། ལྕང་སྐྱ་རོལ་པའི་རྡོ་རྗེས་མཛད་པའི་ལྕང་སྐྱ་གྲུབ་མཐའ་ལས་ཀྱང་། སློབ་དཔོན་བྱང་ཆུབ་བཟང་པོས་ཐོགས་མེད་ཡབ་སྲས་རྣམ་རྫུན་པ་དང་ཕྱོགས་གླང་ཡབ་སྲས་རྣམ་བདེན་དུ་བཤད་མོད། འོན་ཀྱང་སྡེ་བདུན་མདོ་དང་བཅས་པའི་དགོངས་པ་ནི་རྣམ་བདེན་པ་ཡིན་པར་མ་ངེས་ཏེ། ལྷ་དབང་བློ་དང་ཤཱཀྱ་བློས་རྣམ་བདེན་གྱི་དགོངས་པ་རྣམ་བདེན་དུ་བཀྲལ་ཞིང་། ཤེས་རབ་འབྱུང་གནས་སྦས་པས་རྣམ་རྫུན་དྲི་མེད། སློབ་དཔོན་ཆོས་མཆོག་གིས་རྣམ་རྫུན་དྲི་བཅས་སུ་བཀྲལ་བའི་ཕྱིར་རོ།། ཞེས་གསུངས། དོན་སྙིང་རྣམ་འགྲེལ་ལེའུ་དང་པོ་གཉིས་མདོ་སྡེ་བའི་ལུགས་དང་། ལེའུ་གསུམ་པའི་སྟོད་ཆ་མདོ་སེམས་ཐུན་མོང་བ་དང་ཐུན་མིན་ཅི་རིགས་པ་བསྟན། དེ་མན་ཆད་རྣམ་འགྲེལ་རང་ལུགས་རང་ཞིག་ཞལ་གྱིས་བཞེས་པའི་སེམས་ཙམ་པའི་ལུགས་ཁོ་ན་བསྟན་ཏོ།།

8 བརྒྱུད་པ།

དེ་ཡང་དེབ་སྔོན་ལས། ཐུབ་པ། དགྲ་བཅོམ་པ་ཆོས་སྐྱོབ། པཎ་ཆེན་མེ་ཏྲི་པ། དབྱིག་གཉེན། ཕྱོགས་གླང་། དབང་ཕྱུག་སྡེ། ཆོས་གྲགས། ལྷ་དབང་བློ། ཤཱཀྱ་བློ། དུལ་བ་ལྷ། ཆོས་གྲགས། ཤེར་འབྱུང་། ཉི་མ་སྦས་པ། ཛ་མ་རི། ཛྙི་ན་ཤྲཱི་མི་ཏྲ། ཆོས་ཀྱི་མཆོག ། ཨཱ་ནནྡ། ཝཾ་ཀུ་པཎྡི་ཏ། ཁ་ཆེ་པཎ་ཆེན་ཤཱཀྱ་ཤྲཱི། ས་པཎ། འུ་ཡུག་པ། ཞང་བཙུན་མདོ་སྡེ་དཔལ། འཇམ་དབྱངས་སྐྱ་བོ། དཔལ་ལྡན་པ། འཇམ་དབྱངས་སྟོན་གཞོན། ནོར་བཟང་དཔལ། གྲགས་རིན་པ། འཇམ་སྔོནན་པོ། ཆོས་སེང་བ། རྔོ་ཐོག་པ་ཆོས་ཀྱི་བཟང་པོ། མཁན་ཆེན་རིན་པོ་ཆེ་རྒྱལ་མཚན་བཟང་པོ། ཡང་། ཆོས་སེང་བ་ལ་རྒྱལ་ལྷ་ཁང་བ་བསམ་གྲུབ་ཡེ་ཤེས། དེ་ལ་སློབ་དཔོན་བསམ་གྲུབ་བཟང་པོ་བ་རྣམས་ཏེ། འདི་རྣམ་འགྲེལ་བ་གཞན་རྣམས་ལ་མི་སྣང་བས། མཁན་ཆེན་རིན་པོ་ཆེ་རྒྱལ་མཚན་བཟང་པོས་འབད་པ་ཆེན་པོས་བཙལ་བས་རྙེད་པ་ཡིན་གསུང་སྟེ། ཚད་མ་རྣམ་འགྲེལ་གྱི་བརྒྱུད་པའོ།། ཞེས་གསལ་ལོ།། 

དཔྱད་གཞིའི་ཡིག་ཆ།
སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:2  སྔ་མའི་པར་གཞི།

ཉེ་ཆར་དག་བཅོས།:2016-08-16

གསར་སྤེལ་མཁན། :ལོ་མི་ཆུང་།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།