ཞ་ལུ་ལོ་ཙཱ་བ་ཆོས་སྐྱོང་བཟང་བོ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

ཞ་ལུ་ལོ་ཙཱ་བ་ཆོས་སྐྱོང་བཟང་བོ་ནི་བོད་ལ་ལོ་ཙཱ་བ་མང་དུ་འཁྲུངས་པའི་ཁྲོད་ནས་མཚན་སྙན་ཡོད་པ་ཞིག་ཡིན་ལ། དགུང་ལོ་ཆུང་ངུའི་དུས་ནས་ལོ་ཆེན་གྲགས་པ་རྒྱ་མཚོ་དང་། སྟག་ཚང་ལོ་ཙཱ་བ་ཤེས་རབ་རིན་ཆེན་སོགས་ཀྱི་མཁས་དབང་དུ་མའི་ཞབས་ལ་གཏུགས་ནས་ཡིག་རིགས་མི་འདྲ་བ་སྣ་ཚོགས་སྦྱངས་ཏེ་ལོ་ཙཱ་བ་ཆེན་མོའི་མཚན་གནས་ཐོབ། ཕྱིས་སུ་རྒྱ་གཞུང་དུ་མ་བོད་སྐད་དུ་བསྒྱུར་བའི་བཀའ་བསྟན་པོད་བཅུ་ཕྲག་ལང་བ་ཡོད་དོ། །
གཞི་རྩའི་གནས་ཚུལ།

མིང་གཞན།
ཆོས་སྐྱོང་འབུམ།
འཁྲུངས་འདས་ལོ་ཚིགས།
སྤྱི་ལོ(1441—1527)
འཁྲུངས་ཡུལ།
གཙང་ཞ་ལུ་གསེར་ཁང་གི་ཁང་གསར་གོང་མ།
ཡབ།
བསམ་གྲུབ་དཔལ་བཟང་།
ཡུམ།
རིན་ཆེན་ཆོས་འཛོམས།
འཐུས་ཚབ་བརྩམས་ཆོས།
《དག་ཡིག་ཟ་མ་ཏོག》
1 ངོ་སྤྲོད།

ཞ་ལུ་ལོ་ཙཱ་བ་ཆོས་སྐྱོང་བཟང་པོ་ནི་གཙང་ཞ་ལུ་གསེར་ཁང་གི་ཁང་གསར་གོང་མ་ཞེས་བྱ་བའི་རུས་རྒྱུད་དུ་ཡབ་བསམ་གྲུབ་དཔལ་བཟང་དང་། ཡུམ་རིན་ཆེན་ཆོས་འཛོམས་གཉིས་ཀྱི་སྲས་སུ་རབ་བྱུང་བདུན་པའི་ལྕགས་བྱ་སྤྱི་ལོ1441ལོར་སྐུ་བལྟམས། མཚན་ཆོས་སྐྱོང་འབུམ་ཞེས་གསོལ། དགུང་ལོ་བརྒྱད་ལ་ཕེབས་སྐབས་རྒྱལ་རྩེ་སྡེ་བ་དང་རིན་སྤུངས་པ་གཉིས་དམག་འཁྲུག་བྱུང་སྟེ་ཡབ་ཀྱང་དམག་འཁྲུག་གི་ཁྲོད་སྐུ་གཤེགས་སོང་། དེ་ནས་རྒྱལ་རྩེ་ཆོས་རྒྱལ་བཀྲ་ཤིས་འཕགས་པའི་ཞབས་འབྲིང་དུ་མངགས། དགུང་ལོ་བཅོ་བརྒྱད་བཞེས་པའི་ཚེ་མཁན་ཆེན་དཀོན་མཆོག་བཟང་པོའི་དྲུང་དུ་རབ་དུ་བྱུང་། མཚན་རིན་ཆེན་ཆོས་སྐྱོང་བཟང་པོ་ཞེས་གསོལ། དགུང་ལོ་ཉེར་དྲུག་པར་རྗེ་དོན་གྲུབ་གྲགས་པས་མཁན་པོ་དང་། དཀའ་བཅུ་བ་བསོད་ནམས་གྲགས་པས་ལས་སློབ། མཁར་གྲགས་པ་བསོད་ནམས་བློ་གྲོས་ཀྱིས་གསང་སྟོན་གནང་སྟེ་དཔལ་འཁོར་ཆོས་སྡེར་བསྙེན་པར་རྫོགས། དེ་ནས་ཁོང་གིས་མཁས་པའི་དབང་པོ་མང་པོའི་ཞབས་ལ་གཏུགས་ཏེ་མཁས་པའི་ཕ་རོལ་ཏུ་ཕྱིན། དགུང་ལོ་ང་གསུམ་པར་རྒྱ་སྟོན་ལྕགས་རི་བའི་གདན་སར་དབང་བསྐུར། དགུང་ལོ་ང་ལྔ་བར་གྲྭ་ཐང་གཙུག་ལག་ཁང་གི་གདན་སར་དབང་བསྐུར་བ་ནས་བཟུང་ཕྱིས་སུ་བཞུགས་ཡུལ་གཙོ་བོ་དེར་མཛད། དགུང་ལོ་དོན་བཞི་པར་བུ་སྟོན་ཐམས་ཅད་མཁྱེན་པའི་ཞལ་སྐུལ་བཞིན་ཞ་ལུར་ཕེབས་ཏེ་མདོ་སྔགས་སྤྱི་དང་། ལྷག་པར་ཐུན་མོང་གི་རིག་གནས་བཤད་རྒྱུན་རྒྱ་ཆེར་སྤེལ། དགུང་ལོ་དོན་དྲུག་པར་སྡེ་པ་ཡར་རྒྱབ་པས་གདན་ཞུས་ལྟར་སློབ་གྲྭ་ཐང་དུ་ཕེབས་ནས་སྐུ་ཚེའི་མཐའ་མ་བར་བཞུགས། མཐར་དགུང་གྲངས་གྱ་བདུན་ལ་ཕེབས་པ་རབ་བྱུང་དགུ་བའི་མེ་ཕག་སྤྱི་ལོ1527ལོར་སྐུ་གཤེགས།

2 གཞི་བསྒྱུར་དང་བསྒྱུར་བཅོས་གནང་བའི་བཀའ་བསྟན།

བདག་ཉིད་ཆེན་པོ་འདིའི་འགྱུར་ཆེན་ལ་མཚོན་ན《རྡོ་རྗེ་འཆང་ཆེན་པོའི་བསྟོད་པ》དང《དེ་བཞིན་གཤེགས་པ་ཐམས་ཅད་ལ་བསྟོད་པ》《བཅོམ་ལྡན་འདས་ཤཱཀྱ་ཐུབ་པའི་བསྟོད་པ》《དཔལ་དུས་ཀྱི་འཁོར་ལོའི་སྒྲུབ་ཐབས་རྣལ་འབྱོར་རབ་གསལ》《ཤེར་ཕྱིན་བརྒྱ་བ》《ཤེར་སྙིང》《རྡོ་རྗེ་གཅོད་པའི་འགྲེལ་བ》《མངོན་རྟོགས་རྒྱན》《བྱམས་ཆོས་ཕྱི་མ》《རྒྱུད་བླ་འགྲེལ་ཆེན》《དཀོན་བརྩེགས》《བྱང་ཆུབ་སེམས་པའི་སྡེ་སྣོད》《འདུལ་བ་མདོ་རྩ》《སོ་ཐར་མདོ》《སུམ་བརྒྱ་བ》《མེ་ཏོག་ཕྲེང་རྒྱུད》《ལས་ཕྱོགས》《ཚད་མ་རྣམ་ངེས》《རྣམ་འགྲེལ》《གཏན་ཚིགས་ཐིགས་པ》《རྒྱུད་གཞན་གྲུབ་པ》《འབྲེལ་བ་བརྟག་པ》《བསྟོད་པ་བཞི》《བཤེས་སྤྲིངས》《སློབ་སྤྲིངས》《སྤྱོད་འཇུག》《མངོན་བརྗོད་འཆི་མེད་མཛོད》《མངོན་བརྗོད་ཀྱི་བསྟན་བཅོས་སྣ་ཚོགས་གསལ་བ》《སྒྲ་གཅིག་དོན་མང་ནོར་བུའི་ཕྲེང་བ》《རྒྱུད་སྡེ་ལས་མཚན་བརྗོད་འགྲེལ་བ་ཕན་ཡོན་དང་བཅས་པ》《བསྡུས་རྒྱུད་རྩ་འགྲེལ》《དོན་དམ་སྙེ་མ》《རྟ་འདོད་མདོར་བསྟན》《བརྟག་གཉིས》《སམྦུ་ཊཱི》《གསང་འདུས་རྩ་རྒྱུད》《འགྲེལ་བ་སྒྲོན་གསལ》《རྡོ་རྗེ་སྙིང་འགྲེལ》《ཙནྡྲ་པ》སོགས་གཞི་བསྒྱུར་དང་བསྒྱུར་བཅོས་གནང་བ་པོད་བཅུ་ཕྲག་མང་བོ་ཟིན་ནོ། །

3 མཛད་རྗེས།

ལོ་ཆེན་གྱི་འགྱུར་གྱི་སྐོར་ལ་མདོ་སྔགས་རིག་གནས་ཀྱི་སྐོར་དང་། སུམ་རྟགས་སོགས་བརྡ་སྤྲོད་རིག་པའི་སྐོར་གྱི་བསྟན་བཅོས་སོགས་མང་དུ་མཛད་ལ། མདོར་ན་གཞུང་མང་པོ་ལ་འགྱུར་བཅོས་སམ་ཧོར་ཀོང་བསབས་པ་སོགས་ཀྱི་སྒོ་ནས་ལེགས་པར་མ་འགྱུར་བ་དང་། ལོག་པར་བསྒྱུར་བ། འགྱུར་ཆད་པ་སོགས་མཐའ་དག་གི་དྲི་མ་བཀྲུས་ནས་ཅི་ལྟ་བ་ཇི་སྙེད་པའི་རིག་གནས་ཀྱི་རྒྱུན་བཟང་པོ་ཤིན་ཏུ་གསལ་བར་མཛད་པར་མ་ཟད། བསྟན་བཅོས་ཀྱང་མང་པོ་གཞི་བསྒྱུར་དང་བརྩམས་གནང་བཅས་གངས་རིའི་ཁྲོད་ཀྱི་ལོ་ཙཱ་བ་ཆེན་མོ་དང་། ལྷག་པར་རིག་གནས་ལ་ཕྱག་རྗེས་ཤིན་ཏུ་ཆེ།

4 སློབ་མའི་སྡེ།

ལོ་ཆེན་འདི་ཡི་ཐུགས་སྲས་ལ་མཚོན་ན། ས་ལོ་ཀུན་དགའ་བསོད་ནམས་གྲགས་པ་རྒྱལ་མཚན་དང་། ལོ་ཙཱ་བ་རནྟ་བྷ་དྲ། མཐུ་སྟོབས་ཆོས་ཀྱི་ངག་དབང་བསོད་ནམས། ཉིད་ཀྱི་དབོན་པོ་ལོ་ཆེན་པད་མ་དཀར་པོ། སྐྱོགས་སྟོན་ལོ་ཙཱ་བ་ངག་དབང་རིན་ཆེན་བཀྲ་ཤིས། གཡའ་བཟང་མཁས་བཙུན་དབང་བོ་སོགས་ལོ་ཆེན་དགུ་དང་། སྔགས་ཀྱི་བཤད་རྒྱུན་འཛིན་པའི་སློབ་མ་མཁས་གྲུབ་ཨོ་རྒྱན་རྫོང་བ། རྩེད་ཐང་འབུམ་རམས་པ། མཁན་པོ་ཆོས་གྲུབ་སེང་གེ་སོགས་མང་དུ་བྱུང་ནས་གངས་ཅན་གྱི་ལྗོངས་ཐམས་ཅད་དུ་ཁྱབ་པར་གྱུར།

5 བརྩམས་ཆོས།

ལོ་ཆེན་འདིའི་གསུང་རྩོམ་ཐད་ལ། ཀ་ཙན་སྤྱི་དོན་དང་། འགྲེལ་བ་རྣམ་པ་གཉིས། བྱིངས་མདོའི་བསྡུས་དོན། ཀ་ལཱ་བའི་ས་བཅད། ཉེར་བསྒྱུར་གྱི་འགྲེལ་བ་རྒྱས་འབྲིང་བསྡུས་གསུམ། དག་ཡིག་ཟ་མ་ཏོག ཨཥྚའི་བྱིངས་སྒྲུབ་སོགས་སྔགས་ཀྱི་བྱིངས་སྒྲུབ་མང་པོ། མཚམས་སྦྱོར་གྱི་འགྲེལ་བ་གཉིས། སུམ་རྟགས་ཀྱི་འགྲེལ་བ་བརྡ་སྤྲོད་རིག་པའི་སྐོར་གྱི་བསྟན་བཅོས་ཀྱང་མང་དུ་གསར་མཛད་དོ། །


སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:2  སྔ་མའི་པར་གཞི།

ཉེ་ཆར་དག་བཅོས།:2017-10-19

གསར་སྤེལ་མཁན། :ཨ་སངས།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།