ཕྱོགས་གླང་།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

ཕྱོགས་གླང་།
སློབ་དཔོན་ཕྱོགས་ཀྱི་གླང་པོ་ཞེས་ཡོངས་སུ་གྲགས་པའི་བདག་ཉིད་ཆེན་པོ་དེ་ནི་རྒྱ་གར་ལྷོ་ཕྱོགས་ཀྱི་གྲོང་ཁྱེར་སིངྒ་བཀྟ་ཅེས་བྱ་བར་བྲམ་ཟེའི་རིགས་སུ་འཁྲུངས། སྐུ་འཁྲུངས་ནས་རིང་པོར་མ་ལོན་པར་བྲམ་ཟེའི་རིག་བྱེད་ཐམས་ཅད་དང་། གཞན་ཡང་རིག་གནས་ཐམས་ཅད་ལ་མཁས་པའི་ཕུལ་དུ་ཕྱིན་པར་གྱུར། དེ་ལྟར་འཕགས་ཡུལ་གྱི་ཕྱོགས་ཐམས་ཅད་དུ་སངས་རྒྱས་ཀྱི་བསྟན་པས་ཁྱབ་པར་མཛད་ནས་མཐར་ཨོ་ཌི་བི་ཤའི་ནགས་ཚལ་དབེན་པའི་སྒྲུབ་ཕུག་དེ་ཉིད་དུ་ངོ་མཚར་བའི་ལྟས་དུ་མ་དང་བཅས་ཏེ་ཞིང་གཞན་དུ་གཤེགས་སོ། །
གཞི་རྩའི་གནས་ཚུལ།

རྒྱ་ཡིག་གི་མིང་།
陈那
འཁྲུངས་ཡུལ།
རྒྱ་གར་ལྷོ་ཕྱོགས་ཀྱི་གྲོང་ཁྱེར་སིངྒ་བཀྟ།
རིགས།
བྲམ་ཟེའི་རིགས།
བླ་མ།
སློབ་དཔོན་དབྱིག་གཉེན།
འཐུས་ཚབ་བརྩམས་ཆོས།
《ཚད་མའི་མདོ་ཀུན་ལས་བཏུས་པ》
མཛད་རྗེས།
དགེ་འདུན་གྱི་སྡེ་མང་པོ་བཙུགས་པ་དང་མུ་སྟེགས་ཀྱི་རྩོད་པ་བྱེད་མཁན་ཚར་བཅད་པ་སོགས།
1 ངོ་སྤྲོད།

སློབ་དཔོན་ཕྱོགས་ཀྱི་གླང་པོ་ཞེས་ཡོངས་སུ་གྲགས་པའི་བདག་ཉིད་ཆེན་པོ་དེ་ནི་རྒྱ་གར་ལྷོ་ཕྱོགས་ཀྱི་གྲོང་ཁྱེར་སིངྒ་བཀྟ་ཅེས་བྱ་བར་བྲམ་ཟེའི་རིགས་སུ་འཁྲུངས།  སྐུ་འཁྲུངས་ནས་རིང་པོར་མ་ལོན་པར་བྲམ་ཟེའི་རིག་བྱེད་ཐམས་ཅད་དང་།  གཞན་ཡང་རིག་གནས་ཐམས་ཅད་ལ་མཁས་པའི་ཕུལ་དུ་ཕྱིན་པར་གྱུར།  སྔོན་ཡུན་རིང་པོ་ནས་གོམས་པའི་བག་ཆགས་བརྟས་པས་འཁོར་བ་མཐའ་དག་མེ་འབར་བའི་རླུབས་ལྟར་གཟིགས་ནས་ངེས་འབྱུང་ཤུགས་དྲག་པོས་བྲམ་ཟེའི་རིགས་དང་།  ལོངས་སྤྱོད་དང་སློབ་འཁོར་རྒྱ་ཆེན་པོ་ལ་མ་ཆགས་པར་གནས་མ་བུ་པའི་སྡེ་པའི་མཁན་པོ་གླང་བོ་བྱིན་ཞེས་བྱ་བ་ལས་རབ་ཏུ་བྱུང་།  མཚན་ཕྱོགས་ཀྱི་གླང་པོར་གསོལ།  མཁན་པོ་དེ་ཉིད་ལ་བསྟེན་ཏེ་གནས་མ་བུ་པའི་ལུགས་དང་མཐུན་པའི་སྡེ་སྣོད་གསུམ་ལ་མཁས་པར་བྱས་ཤིང་ཁྱད་པར་ལྷག་པར་རྟོགས།  རྗེ་བཙུན་འཇམ་པའི་དབྱངས་ཀྱི་ཞལ་མངོན་དུ་གཟིགས་ཤིང་གདམས་པ་དང་རྗེས་སུ་བསྟན་པ་ལེགས་པར་ཐོབ།  ཨོ་ཌི་བི་ཤའི་ཡུལ་གྱི་ནགས་ཚལ་བྲག་རིའི་ཕུག་ཅིག་ཏུ་སྒྲུབ་པ་ལ་རྩེ་གཅིག་ཏུ་བཞུགས།  དེ་ནས་ནཱ་ལེནྡྲར་མུ་སྟེགས་ཀྱི་རྩོད་པ་བྱེད་པ་བྱུང་བ་ན་སློབ་དཔོན་འདིས་ཚར་བཅད།  ཚད་མ་གཏན་ལ་འབེབ་པ་ལ་དམིགས་པ་བརྟག་པ་སོགས་ཚད་མའི་བསྟན་བཅོས་བརྒྱ་རྩ་མཛད་པར་གྲགས།  བྲམ་ཟེ་ཆེན་པོ་ཞིག་གིས་སྦྱིན་བདག་བྱས་ཏེ་དགེ་འདུན་གྱི་སྡེ་མང་དུ་བཙུགས།  ཡུལ་དེའི་སྐྱེ་བོ་རྣམས་སངས་རྒྱས་ཀྱི་བསྟན་པ་ལ་ཡིད་ཆེས་རྙེད་པའི་ཕྱིར་ཨ་རུ་རའི་སྡོང་པོ་ཆེན་པོ་སྐམ་པོ་ཞིག་བདེན་ཚིག་བརྗོད་ནས་སོར་ཆུད་པར་མཛད་དོ། །དེ་ལྟར་འཕགས་ཡུལ་གྱི་ཕྱོགས་ཐམས་ཅད་དུ་སངས་རྒྱས་ཀྱི་བསྟན་པས་ཁྱབ་པར་མཛད་ནས་མཐར་ཨོ་ཌི་བི་ཤའི་ནགས་ཚལ་དབེན་པའི་སྒྲུབ་ཕུག་དེ་ཉིད་དུ་ངོ་མཚར་བའི་ལྟས་དུ་མ་དང་བཅས་ཏེ་ཞིང་གཞན་དུ་གཤེགས་སོ། །

2 སློབ་གཉེར་མཛད་པ།

བདག་ཉིད་ཆེན་པོ་འདིས་མཁན་པོ་གླང་བོ་བྱིན་བསྟེན་ནས་ཉན་ཐོས་ཀྱི་ཐེག་པ་ལ་མཁས་པར་སྦྱངས།  དེ་ནས་སློབ་དཔོན་དབྱིག་གཉེན་བསམ་སྦྱོར་གཉིས་ཀྱིས་ཚུལ་བཞིན་བསྟེན་ནས།  སྤྱིར་ཐེག་པ་ཆེ་ཆུང་གི་སྡེ་སྣོད་མཐའ་དག་དང་།  ཁྱད་པར་ཐེག་པ་ཆེན་པོའི་མདོ་སྡེ་རྣམས་དང་།  རྗེ་བཙུན་བྱམས་པ་ནས་བརྒྱུད་པའི་ཐེག་པ་ཆེན་པོའི་མན་ངག་རྣམས་བུམ་པ་གང་བྱོའི་ཚུལ་དུ་ལེགས་པར་གསན། ཐེག་པ་ཆེན་པོའི་མདོ་སྡེ་ལྔ་བརྒྱ་ཙམ་ཁ་ཏོན་དུ་མཛད།  དེ་ནས་རྡོ་རྗེ་སློབ་དཔོན་ཞིག་ལས་རྗེ་བཙུན་འཇམ་དཔལ་དབྱངས་ཀྱི་དབང་དང་སྒྲུབ་ཐབས་ལེགས་པར་གསན་ནས་སྒྲུབ་པ་མཛད་པས།  རྗེ་བཙུན་འཇམ་པའི་དབྱངས་ཀྱི་ཞལ་མངོན་སུམ་དུ་གཟིགས་ཤིང་གདམས་པ་དང་རྗེས་སུ་བསྟན་པ་ལེགས་པར་ཐོབ།  དེ་ནས་བཟུང་ནམ་འདོད་དུ་རྗེ་བཙུན་འཇམ་པའི་དབྱངས་ཀྱི་ཞལ་གཟིགས་ཤིང་ཆོས་གསན་པར་མཛད་དོ། །

3 ཚད་མ་ཀུན་བཏུས་མཛད་པ།

སློབ་དཔོན་ཕྱོགས་ཀྱི་གླང་བོས་དུས་ནམ་ཞིག་ན་རིག་པའི་མིག་དང་བྲལ་བའི་གདུལ་བྱ་རྣམས་ལ་ཐུགས་བརྩེ་བ་ཆེན་པོས་གཟིགས་ཏེ་རིག་པའི་མིག་སྦྱིན་པར་མཛད་བཞེད་པ་ན།  གདུལ་བྱ་རྣམས་བློ་གྲོས་ཀྱི་མཐུ་ཤིན་ཏུ་ཆུང་པ་དང་།  སྔར་བརྩམ་པའི་ཚད་མའི་བསྟན་བཅོས་རྣམས་ཀྱང་རྣམ་གྲངས་མང་བས་ཁ་འཐོར་བ་ལྟ་བུར་གྱུར་པར་གཟིགས་ཏེ།  སྔར་མཛད་པ་དེ་དག་ཐམས་ཅད་ཀྱི་གནད་བསྡུས་ཏེ་གསུང་རབ་སྤྱིའི་དགོངས་འགྲེལ་ཚད་མ་ཀུན་ལས་བཏུས་པ་བརྩོམ་པར་བཞེད་ནས།  ཚད་མར་གྱུར་པ་འགྲོ་ལ་ཕན་བཞེད་པ། །སྟོན་པ་བདེ་གཤེགས་སྐྱོབ་ལ་ཕྱག་འཚལ་ཏེ། །ཞེས་པ་སྒྲུབ་ཕུག་གི་བྲག་ངོས་ལ་བྲིས་པ་ཙམ་གྱིས་འཇིག་རྟེན་གྱི་ཁམས་སུ་འོད་ཀྱི་སྣང་བ་ཆེན་པོ་བྱུང་།  ས་གཡོས་ཤིང་སྒྲ་ཆེན་པོ་གྲག  མུ་སྟེགས་ཀྱི་སྟོན་པ་རྣམས་ཀྱི་བྱིན་པ་རེངས་པར་གྱུར་དེ་གང་གི་ལྟས་ཡིན་སྙམ་དུ་མུ་སྟེགས་ཐུབ་རྒྱལ་ནག་པོས་མངོན་ཤེས་ཀྱིས་བརྟགས་པས་ཚད་མ་མདོའི་མཆོད་བརྗོད་བྲིས་པའི་བྱིན་རླབས་ཀྱི་མཐུར་མཐོང་ནས།   སློབ་དཔོན་བསོད་སྙོམས་ལ་གཤེགས་པའི་ཤུལ་དུ་རྫུ་འཕྲུལ་གྱིས་འོངས་ནས་མཆོད་བརྗོད་ཀྱི་ཚིག་དེ་བསུབས་ནས་བཞག  དེ་ལྟར་ལན་གསུམ་བྱས་པའི་ཐ་མ་ལ་སློབ་དཔོན་གྱིས་ཀྱལ་ཀས་བསུབས་པ་ཡིན་ན་འདི་ལ་དགོས་པ་ཆེན་པོ་ཡོད་པས་ཞོག་ཅིག རྩོད་པར་འདོད་ན་གཟུགས་སྟོན་དང་རྩོད་པར་བགྱིའོ། །ཞེས་བྲིས་པས་བསོད་སྙོམས་ལས་འཁོར་བའི་ཚེ་ཁོ་དངོས་སུ་བསྡད་འདུག་པ་རིགས་པ་དྲི་མ་མེད་པས་ལན་གསུམ་གྱི་བར་དུ་ཕམ་པར་བྱས་པའི་ཚེ། ད་རྫུ་འཕྲུལ་འགྲན་ཟེར་ནས་ཁ་ནས་མེ་སྦར་ཏེ་སློབ་དཔོན་གྱི་ཆོས་གོས་རྣམ་གསུམ་དང་ཡོ་བྱད་བསྲེགས་པས།  སློབ་དཔོན་ཐུགས་ཤིན་ཏུ་སྐྱོ་ནས་སེམས་ཅན་མ་རུངས་པ་འདི་འདྲ་བ་བསམ་གྱིས་མི་ཁྱབ་པས་སེམས་ཅན་ཐམས་ཅད་ཀྱི་དོན་བྱ་མི་ནུས་ཀྱི།  ཐོད་ལེ་ཀོར་ནམ་མཁར་འཕངས་ནས་འདི་ནམ་ས་ལ་བབས་པའི་ཚེ་རང་ཉིད་གཅིག་བུ་གྲོལ་བ་དོན་དུ་གཉེར་བར་བགྱིའོ་སྙམ་དུ་དགོངས་པས།  ཐོད་ལེ་ཀོར་འབབ་དུས་མ་བྱུང་བས་ནམ་མཁར་གཟིགས་པ་ན་རྗེ་བཙུན་འཇམ་པའི་དབྱངས་བལྟ་བས་ཆོག་མི་ཤེས་པ་ཞིག་གིས་ཐོད་ལེ་ཀོར་དེ་བསྣམས་ནས།  བུ།  མ་བྱེད་མ་བྱེད་ཐེག་པ་དམན་དང་ཕྲད་ལས་བློ་གྲོས་ངན་སྐྱེ་སྟེ།  ཁྱོད་ཀྱི་བསྟན་བཅོས་འདི་ལ་མུ་སྟེགས་ཚོགས་ཀྱིས་གནོད་མི་ནུས་པར་ཤེས།  ཁྱོད་ཀྱི་ས་མ་ཐོབ་ཀྱི་བར་དུ་དགེ་བའི་བཤེས་སུ་ང་འགྱུར་གྱི།  ཕྱི་མའི་དུས་ན་འགྲོ་བ་ཀུན་གྱི་མིག་གཅིག་ཏུ་ནི་འདི་འགྱུར་རོ། །ཞེས་ལུང་བསྟན་ཅིང་དབུགས་ཕྱུང་ནས་ཚད་མ་ཀུན་ལས་བཏུས་པ་བརྩོམ་པར་སྐུལ་མ་མཛད་པ་ན་སློབ་དཔོན་ཕྱོགས་ཀྱི་གླང་པོས་ཀྱང་ཐུགས་རྗེ་དང་སྙིང་སྟོབས་ཆེར་བཞེས་ནས་ཚད་མ་ཀུན་ལས་བཏུས་པ་མཛད་དེ།  འཛམ་བུ་གླིང་གི་འགྲོ་བ་ཐམས་ཅད་ལ་བློ་གྲོས་ཀྱི་མིག་སྦྱིན་པར་མཛད་དོ། །

4 བརྩམས་ཆོས།

སློབ་དཔོན་ཕྱོགས་ཀྱིས་གླང་བོས་བརྩམས་པའི་བསྟན་བཅོས་མང་མོད།  བོད་དུ་བསྒྱུར་ཞིང་གྲགས་ཆེ་བ་འགའ་ནི། 《ཚད་མ་ཀུས་ལས་བཏུས་པ》དང《དེའི་རང་འགྲེལ》《དམིགས་པ་བརྟག་པ》དང《དེའི་རང་འགྲེལ》《དུས་གསུམ་བརྟག་པ》《ཚད་མའི་བསྟན་བཅོས་རིགས་པ་ལ་འཇུག་པ》《ཕྱོགས་ཆོས་དགུའི་འཁོར་ལོ》《ཆོས་མངོན་པ་མཛོད་ཀྱི་འགྲེལ་བ་གནད་ཀྱི་སྒྲོན་མེ》《ཡོན་ཏན་མཐའ་ཡས་པར་བསྟོད་པའི་འགྲེལ་བ》རྣམས་སོ། །


སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2016-03-29

གསར་སྤེལ་མཁན། :ཨ་སངས།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།