འཁར་རྔ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

འཁར་རྔ།
འཁར་རྔ་ནི་རྒྱུ་འཁར་བ་དང་ལི་ལས་བརྡུངས་པའི་ཕྱེད་རྔ་ཟླུམ་པོ་ཁ་ར་ཅན་ཞིག་སྟེ། ཚད་ལ་ངེས་པ་ཆེན་པོ་མེད་པར་ཆེ་ཆུང་སྣ་ཚོགས་པའོ། །
གཞི་རྩའི་གནས་ཚུལ།

རྒྱ་ཡིག་གི་མིང་།
དབྱིབས།
རྒྱུ་འཁར་བ་དང་ལི་ལས་བརྡུངས་པའི་ཕྱེད་རྔ་ཟླུམ་པོ་ཁ་ར་ཅན།
1 ངོ་སྤྲོད།

འཁར་རྔ་ནི་རྒྱུ་འཁར་བ་དང་ལི་ལས་བརྡུངས་པའི་ཕྱེད་རྔ་ཟླུམ་པོ་ཁ་ར་ཅན་ཞིག་སྟེ། ཚད་ལ་ངེས་པ་ཆེན་པོ་མེད་པར་ཆེ་ཆུང་སྣ་ཚོགས་པའོ། །ཁ་ཅིག་བཀའ་ཐང་ཤེལ་བྲག་མར་བོན་པོ་དག་གི་མགོ་ལ་ཝ་ཞྭ་དང་ལག་ལ་ཕྱེད་རྔ་གཏད་ནས་མངའ་རིས་བྱེ་མ་གཡུང་དྲུང་སོགས་སུ་སྤྱུགས་པར་བཤད་པ་ལ་བརྟེན་ནས་བོན་པོའི་འཁར་རྔ་ཞེས་བོན་ཁོ་ནའི་ཡིན་རྒྱུར་བྱེད་པ་ནི། མངོན་བརྗོད་འཆི་མེད་མཛོད་ལས། བལ་རྔ་དང་ནི་འཁར་རྔའོ། །ཞེས་དང་། ས་ག་ལྷས། འཁར་རྔ་ཏིང་ཏིང་ཤག་སོགས་སྒྲ། །ཞེས་པ་ཙམ་ཡང་མ་མཐོང་བའི་ཐོས་པ་ཆུང་བའི་སྐྱོན་དུ་འདུག་སྟེ། འདི་ནི་རྒྱལ་བས་མདོ་རྒྱུད་གཉིས་ཀར་བསྟན་ཅིང་མཆོད་པའི་བྱེ་བྲག་རོལ་མོའི་རིགས་ཀྱི་གྲས་སུ་ཡང་ཡང་གསུངས། ད་ལྟ་གྲྭ་ས་ཆེ་ཕྲ་ཀུན་ལ་དགེ་འདུན་བསྡུ་བ་དང་། མཆོད་ཆོག་སྒྲུབ་མཆོད་ཀུན་ལ་བཀོལ་འདུག་མོད་གཞུང་ལས་སྔ་མ་ལ་བཀོལ་ཆོག་པའི་དམིགས་བསལ་བཤད་པ་ནི་མ་མཐོང་ངོ་། །

རྒྱུད་ནས་འཁར་རྔ་བསྟན་པའི་ཁུངས་ནི་ཡོད་དེ། མཁའ་འགྲོ་རྒྱ་མཚོ་ལས། གླིང་བུ་པིང་ཝང་འཁར་རྔ་དང་། །ཞེས་དང་། གསང་བ་རྒྱན་གྱི་བཀོད་པ་ལས། འཁར་རྔ་རྡུང་པའི་ལག་པ་ཅན། །རྡོ་རྗེ་འཁར་རྔ་མ་བྲི་བྱ། །ཞེས་གསུངས་པའི་ཕྱིར་རོ། །ཞེས་སྔགས་ཆས་རྣམ་བཤད་ལས་གསུངས་པ་དང་། སྔགས་འཆང་རྒྱན་གྱི་མེ་ཏོག་ལས་ཀྱང་། འཁར་རྔ་ནི་བོན་པོའི་ལག་ཆར་འདོད་ཀྱང་།  མ་ངེས་ཏེ།  མདོ་རྒྱ་ཆེར་རོལ་བ་ལས་རོལ་མོའི་རིག་བྱེད་བཅོ་བརྒྱད་ཀྱི་ནང་ཚན།  འཁར་བའི་སིལ་ཁྲོད་དུ་ངོས་བཟུང་ཡང་འགལ་བ་མེད་འདྲ་ལ།  བོན་བསྣུབས་པའི་དུས། མགོ་ལ་ཝ་ཞྭ་ལག་ཏུ་ཕྱེད་རྔ་གཏད། །ཅེས་བཀའ་ཐང་ལས་འབྱུང་ཞིང་།  གཞན་ཡང་རྫ་རྔ་དང་རྔ་ཟླུམ་ལ་སོགས་པ་ཡང་རྔའི་རྣམ་གྲངས་ཏེ་དགོས་པའང་རྔ་དང་ཆ་མཐུན་ཞིང་།  རྔ་དང་ཆ་ལང་འཁར་རྔ་དང་། །ཅང་ཏེའུ་དྲིལ་བུ་དུང་ཆེན་སོགས། །ཞེས་གསང་རྒྱུད་རྣམས་ནས་མང་དུ་འབྱུང་བ་དང་།  གྲྭ་ས་གོང་མ་དག་ནས་ཀྱང་བརྡ་སྤྲོད་པའི་རོལ་མོར་ཕྱག་ལེན་འདེབས་པ་ལྟར་བསྔགས་པར་བྱ་བའི་གནས་སོ། །ཞེས་གསུངས་པའི་ཕྱིར་རོ། །


སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2016-03-08

གསར་སྤེལ་མཁན། :ལོ་མི་ཆུང་།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།