རྩ་བའི་རྒྱུད།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

རྩ་བའི་རྒྱུད་ཀྱི་འཕྲོས་གཞི་དང་རྒྱས་པར་ཕྱེ་བ་བཤད་པའི་རྒྱུད་ཐུན་མོང་དུ་གནས་བཅུ་གཅིག་ཡོད་པ་ལས་དང་པོ་རྩ་བའི་རྒྱུད་མདོ་ཡི་གནས་ལེའུ་བཞིའི་བདག་ཉིད་ཅན་བསྟན་པ་ལའང་གནས་ལུགས་ནད་གཞི་དང་། ངོས་འཛིན་རྟགས། གསོ་བྱེད་ཐབས་བཅས་རྩ་བ་འདི་གསུམ་ལ་སྙིང་པོར་དྲིལ་བ་འདི་ལས་འཕྲོས་པའི་སྡོང་བོ་ནི། གནས་ལུགས་ནད་གཞིའི་རྩ་བ་ལ། རྟེན་ལུས་དང་། རྟེན་པ་ནད་གཉིས། ངོས་འཛིན་རྟགས་ཀྱི་རྩ་བ་ལ། ལྟ། རེག དྲི་བ་གསུམ། གསོ་བྱེད་ཐབས་ཀྱི་རྩ་བ་ལ་ཟས་དང་སྤྱོད་ལམ། སྨན་དཔྱད་བཞི་སྟེ་དགུ་ཡོད་དོ།།
1 གནས་ལུགས་ནད་གཞི།

གནས་ལུགས་ནད་གཞི་ཞེས་པ་ནི་ནད་དང་། ལུས་ཟུངས། དྲི་མ་གསུམ་འཕེལ་ཟད་འཁྲུགས་པས་རྣམ་པར་མ་གྱུར་པར་ནད་མེད་ཐ་མལ་དུ་གནས་པ་རྣམས་ཀྱི་བྱ་བའི་རིགས་དང་། དེ་དག་འཕེལ་ཟད་འཁྲུགས་པས་རྣམ་པར་གྱུར་པ་ནད་ཅན་གྱི་རྣམ་པར་བཞག་པ་དེ་ཉིད་ལ་བྱའོ།།

1_1 རྣམ་པར་མ་གྱུར་པ།

ལུས་ལ་ཟུག་རྔུ་མེད་ཅིང་ལུས་སྤྱི་དང་བྱེ་བྲག་གི་ལས་བྱེད་པ་ནི་རྣམ་པར་མ་གྱུར་པའི་ལུས་ཞེས་བྱ་ལ། རྣམ་པར་མ་གྱུར་པའི་རླུང་མཁྲིས་བད་ཀན་གསུམ་ལ་དབྱེ་ན་བཅོ་ལྔ་ཡོད་ཅིང་། དེ་ཡང་རླུང་སྲོག་འཛིན་སྤྱི་བོ་བདེ་ཆེན་ཀྱི་འཁོར་ལོར་གནས་པ་དང་།  གྱེན་རྒྱུ་བྲང་ལ་གནས་པ།  ཁྱབ་བྱེད་སྙིང་ལ་གནས་པ།   མེ་མཉམ་ཕོ་བའི་ཟས་ཞུ་བའི་ཆར་གནས་པ།  ཐུར་སེལ་གཞང་ལ་གནས་པ་སྟེ་རླུང་ལྔ། མཁྲིས་པ་འཇུ་བྱེད་ཕོ་བའི་ཟས་ཞུ་མ་ཞུའི་བར་ན་གནས་པ་དང་།   མདངས་སྒྱུར་མཆིན་པར་གནས་པ། སྒྲུབ་བྱེད་སྙིང་ལ་གནས་པ།  མཐོང་བྱེད་མིག་ལ་གནས་པ།  མདོག་གསལ་པགས་པར་གནས་པ་སྟེ་མཁྲིས་པར་ལྔ། བད་ཀན་རྟེན་བྱེད་བྲང་ལ་གནས་པ་དང་། མྱག་བྱེད་ཕོ་བའི་ཟས་མ་ཞུ་བར་གནས་པ། མྱོང་བྱེད་ལྕེར་གནས་པ། ཚིམ་བྱེད་མགོ་བོར་གནས་པ།   འབྱོར་བྱེད་ཚིགས་མིག་ཀུན་ལ་གནས་པ་སྟེ་བད་ཀན་ལ་ལྔ་བཅས་བཅོ་ལྔའོ།།

ལུས་ཟུངས་ནི་ལུས་འཛིན་པའི་དོན་གྱིས་ལུས་ཟུངས་ཞེས་བྱ་བ་དང་། ཟས་སྐོམ་གང་ཡང་ཐོག་མར་ཕོ་བའི་མེ་དྲོད་ཀྱིས་ཕྱེ་བས་དྭངས་མ་དང་། དེའི་དྭངས་མ་ཁྲག  དེའི་དྭངས་མ་ཤ། དེའི་དྭངས་མ་ཚིལ།  དེའི་དྭངས་མ་རུས་པ།  དེའི་དྭངས་མ་རྐང་།  དེའི་དྭངས་མ་ཁམས་དཀར་དམར་བཅས་ལུས་ཟུངས་བདུན་ཡིན་ནོ།།

དྲི་མ་ཞེས་པ་ལུས་ཟུངས་བདུན་པོ་དེའི་སྙིགས་མར་གྱུར་པ་ལ་བྱ་སྟེ། དྲི་མ་བཤང་བ་དང་།  དྲི་མ་གཅིན། དྲི་མ་རྔུལ་བཅས་དྲི་མ་གསུམ་མོ། ། ནད་རླུང་མཁྲིས་བད་ཀན་གསུམ་སོ་སོར་ལྔ་རེ་སྟེ་གནོད་བྱེད་ཉེས་པ་བཅོ་ལྔ་དང་། ལུས་ཟུངས་བདུན་དང་དྲི་མ་གསུམ་བཅས་ལ་གནོད་བྱ་བཅུ་ཞེས་བྱ་ཞིང་། དེ་ལྟར་བཤད་མ་ཐག་པའི་རྣམ་གྲངས་ཉི་ཤུ་རྩ་ལྔ་པོ་དེ་ཀུན་ཀྱང་ཁ་ཟས་ཀྱི་རོ་དང་། ནུས་པ། སྤྱོད་ལམ་རྣམ་གསུམ་པོས་ཆ་མཉམ་པའི་དུས་ན་ནད་མེད་ཅིང་ཚེ་སྟོབས་སོགས་འཕེལ་བར་འགྱུར་ཞིང་། གལ་ཏེ་དེ་དག་རང་རང་གི་ཚད་ལས་ལྡོག་པ་སྟེ། ཟས་སྤྱོད་དམན་ལྷག་ལོག་པས་ཉེར་ལྔ་པོ་དེ་འགའ་ཞིག་འཕེལ་བ་དང་། འགའ་ཞིག་ཟད་པ་དང་ཕན་ཚུན་འཁྲུགས་པར་གྱུར་ན་ནད་ཅན་དུ་འགྱུར་ཏེ་ལུས་དང་ཚེ་ལ་གནོད་པར་འགྱུར་བ་ཡིན་ནོ།།

1_2 རྣམ་པར་གྱུར་པ།

ལུས་ལ་ཟུག་རྔུ་བསྐྱེད་ཅིང་སྤྱི་དང་བྱེ་བྲག་གི་ལས་མི་བྱེད་པའམ་ལོག་པ་ནི་རྣམ་པར་གྱུར་པའི་ལུས་ཏེ། དེ་ལས་རྒྱུ་གསུམ་དང་། རྐྱེན་བཞི། འཇུག་སྒོ་དྲུག གནས་གསུམ། རྒྱུ་ལམ་བཅོ་ལྔ། ལྡང་དུས་དགུ། སྲོག་གཅོད་ཀྱི་ནད་དགུ ལྡོག་རྒྱུ་བཅུ་གཉིས། མདོ་དོན་གཉིས་བཅས་དྲིལ་བས་དེ་ལྟར་དྲུག་ཅུ་རྩ་གསུམ་ནི་སྨན་པས་གང་གསོ་བར་བྱ་བའི་ནད་ཀྱི་གནས་ལུགས་བསྡུས་པའོ།།

1_2_1 རྒྱུ་གསུམ།

རྒྱུ་འདོད་ཆགས་ཞེ་སྡང་གཏི་མུག་གསུམ་དང་།  འབྲས་བུ་རླུང་མཁྲིས་བད་ཀན་རིམ་པས་བསྐྱེད་པའི་རྒྱུ་ཡིན་ཏེ། འདོད་ཆགས་ལ་བརྟེན་ནས་རླུང་སྐྱེད་པར་བྱེད་པ་དང་། ཞེ་སྡང་ལ་བརྟེན་ནས་མཁྲིས་པ་སྐྱེད་པར་བྱེད་པ། གཏི་མུག་ལ་བརྟེན་ནས་བད་ཀན་སྐྱེད་པར་བྱེད་པ་ཡིན་ནོ།།

1_2_2 རྐྱེན་བཞི།

དེ་ལ་ཞེས་པ་རྒྱུ་དུག་གསུམ་སྟེ། རྐྱེན་མེད་ན་འབྲས་བུ་མི་འབྱིན་ལ། དཔེར་ན་ཆུ་ལུད་དྲོད་གཤེར་དང་མ་འཕྲད་པའི་ས་བོན་ལྟ་བུ་ཡིན། རྐྱེན་དང་འཕྲད་ན་འབྲས་བུ་འབྱིན་ནོ།། དེའང་དུས་དམན་ལྷག་ལོག་པ་དགུན་གཅེར་བུར་བསྡད་པ་དང་། འཕྲལ་རྐྱེན་གློ་བུར་བས་གཙེས་པ། ཟས་མི་མཁས་པ་ཉི་མར་ཤ་ཆང་ཟ་བ། སྤྱོད་ལམ་མི་མཁས་པ་སོས་ཀ་ལྤགས་གོས་གྱོན་ནས་ཉི་མར་སྡོད་པ་བཅས་ཀྱིས་བསྐྱེད་པའི་རྐྱེན་བྱས་པའི་རྒྱུ་གསུམ་པོ་དེ་དག་རང་རང་གི་རང་བཞིན་ལས་འཕེལ་བ་དང་། ཟད་པ། ཐ་མ་འཁྲུགས་པ་རྣམས་སུ་གྱུར་པའོ།།

1_2_3 འཇུག་སྒོ་དྲུག

དམན་ལྷག་ལོག་པའི་རྐྱེན་བཞི་པོ་གང་རུང་གིས་བསླངས་པའི་ནད་དེ་རིམ་བཞིན་ཐོག་མར་པགས་ལ་གྲམས་ཤིང་ཤ་ལ་རྒྱས་པ་དང་། བར་དུ་རྩ་རྣམས་སུ་རྒྱུ་ཞིང་རུས་ལ་ཞེན་པ། ཐ་མར་དོན་ལྔ་ལ་འབབ་ཅིང་སྣོད་དྲུག་ཏུ་ལྷུང་བར་འགྱུར་རོ།།

1_2_4 གནས་གསུམ།

གནས་ས་ལུས་ཀུན་ཏུ་ཁྱབ་པར་གྱུར་ཀྱང་གཙོ་ཆེ་བའི་དབང་གིས་བད་ཀན་ནི་རྒྱུ་གཏི་མུག་དང་རྗེས་སུ་མཐུན་པར་ཀླད་པ་ལ་བརྟེན་ནས་སྟོད་ན་གནས་པ་དང་། མཁྲིས་པ་ནི་རྒྱུ་ཞེ་སྡང་དང་རྗེས་སུ་མཐུན་པར་སྲོག་པ་རྩ་དང་མཆིན་དྲི་ལ་བརྟེན་ནས་བར་ན་གནས་པ། རླུང་ནི་འདོད་ཆགས་དང་རྗེས་སུ་མཐུན་པར་གསང་བའམ་དཔྱི་དང་རྐེད་པར་བརྟེན་ནས་སྨད་ན་གནས་པའོ།། 

1_2_5 རྒྱུ་ལམ་བཅོ་ལྔ།

རླུང་ལ་ལུས་ཟུངས་བདུན་གྱི་ནང་ནས་རུས་པར་རྒྱུ་བ་དང་། དབང་པོ་ལྔའི་ནང་ནས་རྣ་བར་རྒྱུ་བ། དྲི་མའམ་སྙིགས་མ་རྣམས་ཀྱི་ནང་ནས་བ་སྤུའམ་རེག་བྱར་རྒྱུ་བ། དོན་ལྔའི་ནང་ནས་སྙིང་དང་སྲོག་རྩར་རྒྱུ་བ། སྣོད་དྲུག་གི་ནང་ནས་ལོང་ལ་རྒྱུ་བ་སྟེ་རྣམ་པ་ལྔ།  མཁྲིས་པར་ལུས་ཟུངས་བདུན་གྱི་ནང་ནས་ཁྲག་ཏུ་རྒྱུ་བ་དང་། དྲི་མ་གསུམ་གྱི་ནང་ནས་རྔུལ་དུ་རྒྱུ་བ། དབང་པོ་ལྔའི་ནང་ནས་མིག་ཏུ་རྒྱུ་བ། དོན་ལྔའི་ནང་ནས་མཆིན་པར་རྒྱུ་བ། སྣོད་དྲུག་གི་ནང་ནས་མཁྲིས་པ་རྒྱུ་མར་རྒྱུ་བ་སྟེ་རྣམ་པ་ལྔ། བད་ཀན་ལ་ལུས་ཟུངས་བདུན་གྱི་ནང་ནས་དྭངས་མ་ཤ་ཚིལ་རྐང་ཁུ་བར་རྒྱུ་བ་དང་། དྲི་མ་གསུམ་གྱི་ནང་ནས་བཤང་གཅི་རུ་རྒྱུ་བ། དབང་པོ་ལྔའི་ནང་ནས་སྣ་ལྕེར་རྒྱུ་བ། དོན་ལྔའི་ནང་ནས་གློ་མཆེར་མཁལ་མར་རྒྱུ་བ། སྣོད་དྲུག་གི་ནང་ནས་ཕོ་བ་ལྒང་པར་རྒྱུ་བ་སྟེ་རྣམ་པ་ལྔ་བཅས་དེ་ལྟར་ལུས་ཟུངས་བདུན་དང་། དྲི་མ་གསུམ། དབང་པོ་ལྔ། དོན་ལྔ། སྣོད་དྲུག་རྣམས་སོ་སོར་ཕྱེ་བའི་ལྔ་ཚན་གསུམ་པོ་རླུང་དང་མཁྲིས་པ་བད་ཀན་རྒྱུ་བའི་ལམ་སྟེ་ལྔ་གསུམ་བཅོ་ལྔའོ།།

1_2_6 ལྡང་དུས་དགུ

ལུས་སྟོབས་ཉམས་པས་རྒས་པར་གྱུར་པ་ན་རླུང་གི་ངོ་བོ་ཉིད་འཕེལ་བས་རླུང་གི་མི་ཡིན་པ་དང་། དར་མ་ནི་འབྱུང་བའི་སྟོབས་ཐམས་ཅད་འཕེལ་བས་དེ་གཞན་ལ་ཁེངས་ཤིང་ཁྲོ་བ་ཤས་ཆེར་འབྱུང་བས་མཁྲིས་པ་འཕེལ་བའི་དུས་སུ་མཁྲིས་པའི་མི་ཡིན་པ། བྱིས་པ་ནི་མའི་ནུ་ཞོ་སོགས་ཀྱི་ཁ་ཟས་དང་ཀུན་ཏུ་ཉལ་བ་སོགས་ཀྱིས་བད་ཀན་འཕེལ་བས་བྱིས་པ་བད་ཀན་གྱི་མི་ཡིན་པ་བཅས་ལ་ན་སོ་དེ་དག་དང་མཐུན་པའི་ནད་བྱུང་ན་ན་སོས་གཉན་ཞེས་གསོ་དཀའ་བའི་དོན་ཏེ་ན་སོའི་གསུམ་དང་། ངད་ཅན་ཏེ་བསེར་བུའི་ངད་ལྡང་བ་ལ་རེག་བྱ་གྲང་བ་བསྐྱེད་པའི་གནས་ནི་རླུང་འཕེལ་ཡུལ་ཡིན་པ་དང་། སྐམ་ས་སྟེ་རླན་གཤེར་མེད་ཅིང་རེག་བྱ་ཚ་གདུང་ཆེ་བའི་གནས་ནི་མཁྲིས་པ་འཕེལ་ཡུལ་ཡིན་པ། རླན་ཅན་དང་སྣུམ་བག་ལྡན་པའི་གནས་ནི་བད་ཀན་འཕེལ་ཡུལ་དུ་བཤད་པ་ཡིན་ཏེ་ཡུལ་གྱི་གསུམ། རླུང་ནད་ཕལ་ཆེར་དབྱར་གྱི་དུས་དང་ཉིན་ཞག་གི་དབང་དུ་བྱས་ན་དགོང་དང་ཐོ་རངས་ཀྱི་དུས་སུ་འཕེལ་ཞིང་ལྡང་བ། མཁྲིས་པ་ནི་སྟོན་དུས་དང་ཉིན་གུང་མཚན་གུང་དུ་ལྡང་བ། བད་ཀན་ནི་དཔྱིད་ཀྱི་དུས་དང་སྲོད་དང་སྔ་དྲོའི་དུས་སུ་འཕེལ་ཞིང་ལྡང་བ་སྟེ་དུས་ཀྱི་གསུམ་བཅས་དགུའོ།།

1_2_7 སྲོག་གཅོད་ཀྱི་ནད་དགུ

རང་གི་ཁམས་འཚོ་བའི་རྒྱུ་ཕྱིའི་ཟུངས་ཤ། ནང་གི་ཟུངས་ཟས། སྲོག་གི་ཟུངས་རྩ་དང་གསུམ་ག་ཤོར་ཞིང་ཟད་པ་དང་། ཚ་གྲང་གཉིས་ཀ་དུས་གཅིག་ཏུ་འདོམས་པས་གཉེན་པོ་མི་ལེན་པ་འདུ་བ་གཤེད་དུ་བབས་པ།  ནད་ཚ་གྲང་གང་ཡིན་ལ་དེ་གའི་གྲོགས་ཀྱི་ཟས་སྤྱོད་སྨན་དཔྱད་བསྟེན་པ་སྦྱོར་བ་མཚུངས་པ། མདའ་རྡོ་གྲི་སོགས་གཉན་པའི་གནད་རྣམས་སུ་བབས་པ། དུས་འདས་རླུང་ནད་སྲོག་རྟེན་དབུ་མའི་རླུང་རྒྱུན་ཆད་པ།  ཚ་བ་བཅོས་དུས་འདས་པས་ཚ་བ་ལ་འདས་པ། གྲང་བ་བཅོས་དུས་ཡོལ་བས་གྲང་བ་གཏིང་འཁར་བ། དེ་ལྟ་བུའི་ནད་དུས་ལས་འདས་པ་མ་ཡིན་ཡང་རང་གི་ལུས་ཟུངས་ཀྱིས་སྨན་དཔྱད་མི་ཐུབ་པ། གློ་བུར་གྱི་རྣམ་པར་འཚེ་བས་སྲོག་འཕྲོག་པ་རྣམས་ནི་རྣམ་གྱུར་ནད་ཀྱི་འབྲས་བུ་སྲོག་གཅོད་ནད་དགུའོ།།

1_2_8 ལྡོག་རྒྱུ་བཅུ་གཉིས།  

དེ་ཡང་རླུང་བཅོས་རླུང་ཞི་ནས་མཁྲིས་པར་ལྡོག་པ་དང་།  བད་ཀན་དུ་ལྡོག་པ། རླུང་བཅོས་ཀྱང་རླུང་མ་ཞི་བར་མཁྲིས་པར་ལྡོག་པ། བད་ཀན་དུ་ལྡོག་པ། མཁྲིས་པ་བཅོས་མཁྲིས་ནད་ཞི་ནས་རླུང་དུ་ལྡོག་པ། བད་ཀན་དུ་ལྡོག་པ། མཁྲིས་པ་བཅོས་མཁྲིས་པ་མ་ཞི་བར་རླུང་དུ་ལྡོག་པ།  བད་ཀན་དུ་ལྡོག་པ། བད་ཀན་བཅོས་བད་ཀན་ཞི་ནས་རླུང་དུ་ལྡོག་པ། མཁྲིས་པར་ལྡོག་པ། བད་ཀན་བཅོས་ཀྱང་བད་ཀན་མ་ཞི་བར་རླུང་དུ་ལྡོག་པ། མཁྲིས་པར་ལྡོག་པ་བཅས་བཅུ་གཉིས་སོ།།

1_2_9 མདོ་དོན་གཉིས།

ནད་སོགས་ཐམས་ཅད་དོན་བསྒྲིལ་ན་ཚ་གྲང་གཉིས་སུ་མ་འདུས་པ་གཞན་མེད་དེ། རླུང་དང་བད་ཀན་ནི་རང་བཞིན་གྱི་གྲང་བས་དཔེར་ན་ཆུ་ལྟ་བུ་ཡིན་ཏེ་བསིལ་བར་མཚུངས་པ་དང་། ཁྲག་དང་མཁྲིས་པ་ནི་རང་བཞིན་གྱི་ཚ་བས་མེ་ལྟ་བུར་འདོད་དེ་ཚ་བར་མཚུངས་པ་གཉིས་སོ།།  དེ་གཉིས་ལ་མ་འདུས་པའི་སྲིན་དང་ཆུ་སེར་ནི་རང་གི་ངོ་བོ་ཚ་གྲང་གང་ཡིན་དང་རྐྱེན་ནམ་གྲོགས་གང་དང་བསྡོངས་པ་དེའི་རྗེས་སུ་འབྲངས་པས་ཚ་གྲང་ཐུན་མོང་བར་གནས་སོ།། དེ་ལྟར་རྣམ་པར་མ་གྱུར་པའི་ལུས་ལ་ཉེར་ལྔ། རྣམ་པར་གྱུར་པའི་ནད་ལ་དྲུག་ཅུ་རྩ་གསུམ་སྟེ་དྲིལ་བས་རྣམ་གྲངས་བརྒྱད་ཅུ་རྩ་བརྒྱད་པོ་འདི་རྣམས་ཀྱིས་གང་གི་དོན་དུ་གསོ་བ་ལུས་དང་།  གང་གསོ་བའི་ནད་གཞིའི་རྣམ་པ་མ་ལུས་པ་ཤེས་ཤིང་ཁོང་དུ་ཆུད་པར་འགྱུར་བ་ཡིན་ནོ།།

2 ངོས་འཛིན་རྟགས།

དེ་ཡང་གང་ལ་བརྟག་པར་བྱ་བ་ནད་དང་ལྡན་པ་ལ། རྟོགས་པར་བྱེད་པ་པོ་སྨན་པ་མཚན་ཉིད་དང་ལྡན་པ་དེས་བརྟག་པའི་ཐབས་མེ་འབྱུང་བའི་རྟགས་སུ་དུ་བ་བྱུང་བ་ངེས་པ་བཞིན་ངོས་འཛིན་རྟགས་ལ་སྟོང་དང་ཉིས་བརྒྱ་ལ་སོགས་པ་དུ་མ་ཡོད་ཀྱང་། བལྟ་རེག་དྲི་བར་མ་འདུས་པའི་བརྟག་ཐབས་མེད་པས་བལྟ་བ་དང་། རེག་པ། དྲི་བ་བཅས་ཀྱི་སྒོ་ནས་ནད་ཀྱི་རྒྱུ་རྐྱེན་མཚན་ཉིད་རྣམས་གསལ་བར་བརྟག་ཅིང་ངོས་བཟུང་དགོས་པས་ན་ངོས་འཛིན་རྟགས་ཞེས་བྱ་བའོ།།

3 གསོ་བྱེད་ཐབས།

ངོས་འཛིན་རྟགས་ཀྱིས་ནད་གཞིའི་བྱེ་བྲག་སོ་སོར་ངོས་འཛིན་ནས། ནད་དེ་ལ་གསོ་བར་བྱེད་པའི་ཟས་ཀྱི་གཉེན་པོ་དང་། སྤྱོད་ལམ་གྱི་གཉེན་པོ།  སྨན་གྱི་གཉེན་པོ། དཔྱད་ཀྱི་གཉེན་པོ་བཅས་བཞིའི་སྒོ་ནས་གསོ་བའི་ལག་ལེན་རྣམ་པར་སྤྱད་པ་ལ་གསོ་བྱེད་ཐབས་ཞེས་སོ།།

4 ཟས་ཀྱི་གཉེན་པོ།

རླུང་མཁྲིས་བད་ཀན་གསུམ་ལ་ཟས་སྐོམ་གཉིས་རེ་བྱས་པའི་རླུང་གི་ཟས་ལ་རྟ་བོང་འཕྱི་བ་བཅས་ཀྱི་ཤ་དང་། དེར་མ་བལྟོས་པའི་ལོ་ལོན་པའི་ཤ་སྐམ་པོ།  འབྲོང་ཁྲག  འབྲུ་མར།  ལོ་ལོན་པའི་རྩི་མར་རྙིང་པ།  བུ་རམ་སྨུག་པོ།  སྒོག་སྐྱ།  བཙོང་ནག་དང་བཅས་བཅུ། རླུང་གི་སྐོམ་ལ་འོ་མ་དྲོན་མོ་དང་། ལྕ་བ་ར་མཉེའི་ཟན་ཆང་། བུར་ཆང་། རུས་ཆང་བཅས་བཞི་སྟེ་ཁྱོན་རླུང་ནད་ཅན་གྱི་ཟས་སྐོམ་བཅུ་བཞི། མཁྲིས་པའི་ཟས་ལ་བ་རའི་ཞོ་དང་། བ་རའི་དར་བ། མར་གསར། རི་དྭགས་གི་ཤ། རའི་ཤ སྐོམ་པོ་སྟེ་རྟོལ་གྱི་ཤ་གསར་པ།  ནས་གསར་པའི་ཆག་ཚ། སྐྱབས་ཏེ་ཁུར་སྐྱའི་ཚོད་མ། ཁུར་ཚོད་དང་བཅས་དགུ། མཁྲིས་པའི་སྐོམ་ལ་ཆབ་ཚེ་སྟེ་ཇ་མར་འོ་ཚྭ་བཅས་མེད་པ་དང་། གངས་དང་རྫ་ལས་བྱུང་བའི་ཆུ་བསིལ། ཆུ་བསྐོལ་གྲང་དང་གསུམ་སྟེ་ཁྱོན་མཁྲིས་པའི་ནད་ཅན་གྱི་ཟས་སྐོམ་བཅུ་གཉིས། བད་ཀན་གྱི་ཟས་ལ་ལུག་གི་ཤ། གཡག་རྒོད་ཀྱི་ཤ། གཅན་གཟན་གྱི་ཤ། ཉ་ཡི་ཤ། སྦྲང་རྩི། སྐམ་སའི་འབྲུ་རྙིང་གི་ཟན་དྲོན་སྡོར་ལྡན་པ་དང་བཅས་དྲུག བད་ཀན་གྱི་སྐོམ་ལ་འབྲི་ཡི་ཞོ་དར་དང་།  གར་ཆང་ལོན་པ། ཆུ་སྐོལ་དང་གསུམ་སྟེ་ཁྱོན་བད་ཀན་ནད་གཞི་ཅན་གྱིས་རྟག་ཏུ་བསྟེན་པར་བྱ་བའི་ཟས་སྐོམ་དགུ་བཅས་བསྒྲིལ་བས་སོ་ལྔའོ།།

5 སྤྱོད་ལམ་གྱི་གཉེན་པོ།

རླུང་གི་ནད་ལ་གནས་མུན་ཁུང་དྲོ་སར་སྡོད་པ་དང་།  རང་གི་ཡིད་འོང་གྲོགས་བསྟེན་ཞིང་བག་ཕེབས་པར་གནས་པ། མཁྲིས་པའི་ནད་ལ་གནས་ཆུ་འགྲམ་བསིལ་སར་བསྡད་པ་དང་། སྤྱོད་ལམ་དལ་བར་བསྡད་པ། བད་ཀན་གྱི་ནད་ལ་སྤྱོད་ལམ་རྩོལ་བཅག་ཉི་མར་བསྲོ་བ་དང་། གནས་དྲོ་ས་བསྟེན་པ་བཅས་སྤྱོད་ལམ་ལ་དྲུག་གོ །

6 སྨན་གྱི་གཉེན་པོ།

རླུང་གི་ནད་སེལ་བའི་སྨན་གྱི་རོ་ནི་མངར་བ་བུ་རམ་ལྟ་བུ་དང་།  སྐྱུར་བ་ཆང་རྒན་ལྟ་བུ།   ལན་ཚ་བ་རྒྱམ་ཚྭ་ལྟ་བུ་སྟེ་གསུམ། ནུས་པ་སྣུམ་པ་ཨར་ནག་ལྟ་བུ། ལྕི་བ་ཁ་རུ་ཚྭ་ལྟ་བུ།  འཇམ་པ་ཀཎྡ་ཀ་རི་ལྟ་བུ་སྟེ་གསུམ། མཁྲིས་པ་བསིལ་བའི་སྨན་གྱི་རོ་ནི་མངར་བ་རྒུན་འབྲུམ་ལྟ་བུ་དང་། ཁ་བ་གསེར་མེ་ལྟ་བུ། བསྐ་བ་ཙན་དན་དཀར་པོ་ལྟ་བུ་སྟེ་གསུམ། ནུས་པ་བསིལ་བ་ག་བུར་ལྟ་བུ་དང་། སླ་བ་དོང་ག་ལྟ་བུ། རྟུལ་བ་ཅུ་གང་ལྟ་བུ་སྟེ་གསུམ། བད་ཀན་སེལ་བའི་སྨན་གྱི་རོ་ནི་ཚ་བ་ན་ལེ་ཤམ་ལྟ་བུ་དང་། སྐྱུར་བ་སེ་འབྲུ་ལྟ་བུ། བསྐ་བ་རུ་རྟ་ལྟ་བུ་སྟེ་གསུམ། ནུས་པ་རྣོ་བ་རྒྱ་ཚྭ་ལྟ་བུ་དང་། རྩུབ་པ་སྟར་བུ་ལྟ་བུ།    ཡང་བ་ཙི་ཏྲ་ཀ་ལྟ་བུ་གསུམ་སྟེ་རོ་ནུས་བསྡོམས་པས་བཅོ་བརྒྱད་དོ།། གོང་དུ་བཤད་པའི་རོ་ནུས་དེ་ལ་སྦྱོར་བ་ཞི་བྱེད་དང་སྦྱོང་བྱེད་གཉིས་སུ་ཡོད་པ་ལས།   ཞི་བྱེད་ནི་རླུང་གི་ནད་ལ་ཁུ་བ་དང་སྨན་མར་གཉིས།    མཁྲིས་པའི་ནད་ལ་ཐང་དང་ཅུར་ནིས་བསྟེན་པ་གཉིས།   བད་ཀན་གྱི་ནད་ལ་རིལ་བུ་ཏྲིས་སམ་སྦྱར་བ་གཉིས་བཅས་ཀྱིས་བསྟན་པ་ཡིན།

7 དཔྱད་ཀྱི་གཉེན་པོ།

རླུང་གི་དཔྱད་ལ་ཏིལ་མར་ལ་སོགས་པའི་བསྐུ་མཉེ་དང་། གོ་སྙོད་སྣུམ་ལྡན་ཕྱིང་པས་དྲིལ་ཏེ་ཧོར་གྱི་མེ་བཙའ་གདབ་པ་སྟེ་གཉིས། མཁྲིས་པའི་དཔྱད་ལ་གོས་ཀྱིས་བྱིབས་ཏེ་རྔུལ་དབྱུང་བ་དང་། གཏར་ག་རྒྱག་པ། ཆུའི་འཕྲུལ་འཁོར་ཏེ་ཆུ་བསིལ་བཟེད་དམ་དུ་བླུགས་ནས་ལུས་གཟེད་པ་སྟེ་གསུམ། བད་ཀན་གྱི་དཔྱད་ལ་གྲང་དུགས་ཚྭ་མེར་བསྲོས་ཏེ་ཕོ་བར་དུགས་བྱེད་པ་དང་། ཚིགས་སུ་མེ་བཙའ་འཇོག་པ་གཉིས་ཏེ་དཔྱད་ལ་བདུན་ནོ།།  དེ་ལྟར་བསྡོམས་པས་ཟས་ལ་སོ་ལྔ་དང་།  སྤྱོད་ལམ་ལ་དྲུག   སྨན་ལ་ལྔ་བཅུ།    དཔྱད་ལ་བདུན་བཅས་བསྒྲིལ་བས་གསོ་ཐབས་དགུ་བཅུ་རྩ་བརྒྱད་པོ་འདི་ཉིད་བར་དུ་ཡེངས་པ་མེད་པར་སྨན་པས་སྦྱར་ཞིང་། ནད་པས་གུས་པ་དང་བཅས་ཏེ་ལེ་ལོ་མེད་པར་བརྩོན་པས་བསྟེན་ན་ནད་རིགས་མཐའ་དག་གི་འདམ་ལས་མྱུར་དུ་གྲོལ་བར་འགྱུར་རོ།། 


སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2016-01-28

གསར་སྤེལ་མཁན། :ཨ་རྡོ

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།