རྒྱུད་སྨད་གྲྭ་ཚང་།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

རྒྱུད་སྨད་གྲྭ་ཚང་།
རྒྱུད་སྨད་གྲྭ་ཚང་དང་རྒྱུད་སྟོད་གྲྭ་ཚང་གཉིས་སུ་དབྱེ་བའི་རྒྱུད་སྨད་གྲྭ་ཚང་དེ་ལྷ་ས་གཙུག་ལག་ཁང་གི་བྱང་ངོས་སུ་གནས་ཡོད། རྒྱུད་གྲྭ་བྱ་བའི་གོ་དོན་ནི་མདོ་སྔགས་ཟུང་དུ་འབྲེལ་བའི་རྒྱལ་བསྟན་འཛིན་པའི་གོ་དོན་ནོ།། རྒྱུད་སྨད་གྲྭ་ཚང་དེ་ཐོག་མར་རབ་བྱུང་བདུན་པའི་ཆུ་གླང(སྤྱི་ལོ1433ལོར)རྒྱལ་བ་ཙོང་ཁ་པ་ཆེན་པོའི་དངོས་སློབ་རྗེ་ཤེས་རབ་སེང་གེས་བཞེངས།
གཞི་རྩའི་གནས་ཚུལ།

རྒྱ་ཡིག་གི་མིང་།
下密院
ཆགས་ཡུལ།
བོད་རང་སྐྱོང་ལྗོངས་ལྷ་ས་གྲོང་ཁྱེར་གཙུག་ལག་ཁང་གི་བྱང་ངོས།
མཚན་རྒྱས་པའམ་མཚན་གཞན།
དཔལ་ཆེན་གསང་ཆེན་རྒྱུད་སྨད་གྲྭ་ཚང་། དཔལ་ལྡན་སྨད་རྒྱུད་གྲྭ་ཚང་། རྒྱུད་སྨད་ལྕང་ལོ་ཅན།
གྲུབ་མཐའ།
དགེ་ལུགས།
ཕྱག་འདེབས་ལོ།
སྤྱི་ལོ1433ལོའི་ཡས་མས།
ཕྱག་འདེབས་པོ།
རྗེ་བཙུན་ཤེས་རབ་སེང་གེ
ཡི་དམ།
འཇིགས་བྱེད་ལྷ་བཅུ་གསུམ། མགོན་པོ་ཕྱག་དྲུག གསང་བ་འདུས་པ། དམ་ཅན་ཆོས་རྒྱལ། བདེ་མཆོག
བཀའ་སྲུང་།
ཐོག་མ་དཔལ་ལྡན་ལྷ་མོ་ལས་ཕྱིས་སུ་དམ་ཅན་ཆོས་རྒྱལ།
1 ལོ་རྒྱུས་འཕེལ་རིམ།

དཔལ་ལྡན་རྒྱུད་སྨད་གྲྭ་ཚང་ནི་རྗེ་ཙོང་ཁ་པའི་དངོས་སློབ་འཕྲིན་ལས་ནང་མཁའ་དང་མཉམ་པའི་བུ་ཆེན་བཞིའི་ཡ་གྱལ་རྗེ་བཙུན་ཤེས་རབ་སེང་གེས་དངོས་སུ་འཆད་ཉན་གྱི་རྒྱུན་འཛུགས་པར་མཛད་པ་སྟེ།    རབ་བྱུང་བདུན་པའི་ས་ཕག(སྤྱི་ལོ1419)ལོར་རྗེ་ཙོང་ཁ་པས་འགྲེལ་པ་བཞི་སྦྲགས་ཀྱི་གླེགས་བམ་ཕྱག་ཏུ་བསྣམས་ནས་ཁྱེད་ཅག་མཁས་པ་རྣམས་ཀྱི་ཁྲོད་ན་དཔལ་གསང་བ་འདུས་པའི་རྒྱུད་ཀྱི་བཤད་སྲོལ་འཛིན་ནུས་པ་སུ་ཡོད་ཅེས་བཀའ་ལེན་འགའ་ཞིག་སྩལ་བ་ན།    མཁས་པ་གཞན་སུས་ཀྱང་ཞལ་གྱིས་བཞེས་མ་ནུས་པའི་ཚེ་རྗེ་ཤེས་རབ་སེང་གེས་ཞལ་གྱིས་བཞེས་པར་མཛད་པས་རྗེ་ཙོང་ཁ་པ་ཤིན་ཏུ་དགྱེས་ཏེ་གསང་བ་འདུས་པའི་གསེར་སྐུ་དང་།    འགྲེལ་པ་བཞི་སྦྲགས་ཀྱི་གླེགས་བམ།    ཆོས་རྒྱལ་གྱི་ཞལ་འབག     འཆམ་གོས།    དབྱུག་ཏོ།    ཞགས་པ་སོགས་གནང་ནས་སྔགས་ཀྱི་བསྟན་པའི་བདག་པོར་མངའ་གསོལ།    དེ་ནས་ལོ་ཤས་རྗེས་གསང་ཕུ་མཐོང་སྨོན་གྲྭ་ཚང་གི་བླ་མའི་མཛད་འཁུར་དེ་རྗེ་དགེ་འདུན་གྲུབ་ལ་གཏད་དེ་རྗེ་ཤེས་རབ་སེང་གེ་ཉིད་གཙང་ཤབ་སྟོད་ལྷུན་པོ་རྩེར་བྱོན་པས་སི་ཏུ་བསོད་ནམས་དཔལ་དང་བདག་མོ་ ཤཱཀྱ་དཔལ་གྱིས་སྦྱིན་བདག་མཛད་དེ་རྗེ་ཙོང་ཁ་པའི་ཕྱག་ལེན་བཞིན་སྒྲུབ་དཀྱིལ་བཞེངས་མཆོད་དང་གསང་བ་འདུས་པའི་རྒྱུད་ཀྱི་བཤད་རྒྱུན་བཙུགས།    སྲད་རིན་ཆེན་རྩེ་པས་སྦྱིན་བདག་མཛད་དེ་སྲད་གཞུང་དུ་དགའ་ལྡན་ཕོ་བྲང་ཞེས་པའི་གྲྭ་ཚང་བཏབ་པས་གཙང་གི་སྲད་རྒྱུད་ཅེས་རྒྱུད་སྟོད་རྙིང་པར་གྲགས་པ་བྱུང་།    ལྷུན་པོ་རྩེའི་བླ་རབས་བཞི་པ་འཕགས་འོད་ཡོན་ཏན་རྒྱ་མཚོ་སོགས་ཀྱིས་ཆོས་ཞུས་ཤིང་ཞབས་ལ་གཏུགས་པར་ཆོས་རྒྱལ་གྱི་ཞལ་འབག་དང་།    འཆམ་གོས་སོགས་ཀྱང་རྟེན་དུ་བསྩལ།    སྲད་དགའ་ལྡན་ཕོ་བྲང་དུ་རྒྱུད་ཀྱི་རྒྱལ་པོ་གསང་བ་འདུས་པའི་འཆད་ཉན་འཛུགས་པར་མཛད་ནས་འདུལ་ནག་དཔལ་ལྡན་བཟང་པོ་འཆད་ཉན་པར་བསྐོ་བཞག་མཛད་དེ་རྗེ་ཙོང་ཁ་པས་གནང་བའི་འགྲེལ་པ་བཞི་སྦྲགས་ཀྱི་གླེགས་བམ་བསྩལ།    དེ་ནས་དབུས་ཕྱོགས་སུ་ཕེབས་ཏེ་ཆུ་གླང(སྤྱི་ལོ1433)ལོར་དགའ་ལྡན་དུ་རྒྱུད་ཀྱི་འཆད་ཉན་བཙུགས་པར་དབུས་ཀྱི་རྒྱུད་སྨད་ཅེས་སུ་གྲགས།    དེ་ནས་བཟུང་རྗེ་ཤེས་རབ་སེང་གེ་དཔོན་སློབ་རྣམས་ཕྱོགས་ཕྱོགས་སུ་ཆོས་བར་གཏེགས་ནས་དབྱར་སོས་གཉིས་རྒྱུད་འགྲེལ་གྱི་བཤད་པ་དང་།    སྟོན་དུས་གསང་བ་འདུས་པའི་རྫོགས་རིམ་རིམ་ལྔ་གདན་རྫོགས་ཀྱི་དམར་ཁྲིད་དང་།       སྦྱོར་བ་ཡན་ལག་དྲུག་གི་ཁྲིད།    ནཱ་རོ་ཆོས་དྲུག    འཁོར་ལོ་སྡོམ་པའི་རྫོགས་རིམ་རྣལ་འབྱོར་ཆེན་པོའི་ཁྲིད།    དེའི་རྫོགས་རིམ་རིམ་པ་ལྔའི་ཁྲིད།    རྡོ་རྗེ་འཇིགས་བྱེད་ཀྱི་རྫོགས་རིམ་རྣལ་འབྱོར་བཞིའི་ཁྲིད་རྣམས་འདེབས་པར་མཛད་པ་འདི་རྣམས་ལ་ཁྲིད་ཆེན་དྲུག་ཏུ་གྲགས་པ་དང་།    དེའི་སྟེང་འཁོར་ལོ་ཆེན་པོའི་རྫོགས་རིམ་གྱི་ཁྲིད་དང་།    གསང་འདུས་ཡེ་ཤེས་ཞབས་ལུགས་ཏེ་འཇམ་དཔལ་རྡོ་རྗེའི་རིམ་གཉིས་ཀྱི་ཁྲིད་བསྣན་ནས་ཁྲིད་ཆེན་བརྒྱད་དུ་ཡང་གྲགས་པ་དེའི་སྟེང་བྱང་ཆུབ་ལམ་གྱི་རིམ་པའི་ཁྲིད་དང་།    དབུ་མ་ཐལ་འགྱུར་བའི་ལྟ་ཁྲིད་ཀྱང་འདེབས་པར་མཛད།    དེ་ལྟར་ལོ་བཅུ་གསུམ་བསྐྱངས་ནས་རྒྱུད་ཀྱི་འཆད་ཉན་སྦྱིན་པ་དཔལ་ལ་གཏད་དེ་རྗེ་ཙོང་ཁ་པས་གནང་བའི་གསང་འདུས་ཀྱི་གསེར་སྐུ་དེ་རྒྱུད་སྨད་གྲྭ་ཚང་གི་རྟེན་དུ་གནང་།     རྗེ་ཤེས་རབ་སེང་གེ་འདས་རྗེས་དེའི་ཕྱག་སྲོལ་ཉམས་པ་མེད་པར་རྒྱུད་ཆེན་སྦྱིན་པ་དཔལ་དང་གྲགས་བཟང་སོགས་ཀྱིས་བསྐྱངས་ཏེ་ལོ་ལྟར་ཆོས་བར་གཏེགས་སྲོལ་ཡང་རབ་བྱུང་བཅུ་དྲུག་པའི་ས་ཕག(སྤྱི་ལོ1959)ལོའི་བར་ཡོད།   

2 བཟོ་བཀོད།

སྔོན་དུས་གནས་གཞི་གཙོ་བོ་དགའ་ལྡན་དུ་ཡིན་འདུག་ཀྱང་།     སྤྱི་ལོའི་དུས་རབས་བཅུ་དྲག་པའི་སྨད་ནས་གནས་གཞི་ལྷ་སར་ཆགས་པ་ཡིན་སྐད།    འགའ་ཞིག་གི་གསུང་སྲོལ་ལ་ལྷ་ས་གཙུག་ལག་ཁང་གི་ནུབ་ངོས་སྡེ་དཔོན་དགའ་བཞི་བའི་ཁང་པ་རྡོ་རིང་ཞེས་པ་དེ་རྒྱུད་སྨད་འདུས་ཚོགས་བཞུགས་པ་རྗེས་སུ་ད་ལྟའི་རྒྱུད་ཁང་དུ་གཞི་ཕབ་སྐད་འདུག་ཀྱང་ཡིག་ཆ་མ་མཐོང་།    ཡང་རེ་འགས་ལྷ་སའི་ཀླུ་སྦུག་སེང་གེ་ཤག་ཅེས་པ་དེ་ཐོག་མར་རྒྱུད་སྨད་ཀྱི་འདུ་ཁང་ཡིན་པ་དེ་ནས་ད་ལྟའི་རྒྱུད་ཁང་དུ་སྤོས་ཟེར་ཡང་ངག་གྲོས་ཙམ་ཡིན།     ད་ལྟའི་རྒྱུད་ཁང་ལྕང་ལོ་ཅན་ནི་སྤྱི་ལོའི་དུས་རབས་བཅུ་བདུན་པའི་ནང་དགའ་ལྡན་ཁྲི་ཐོག་ལྔ་བཅུ་པ་བྱ་བྲལ་དགེ་འདུན་ཕུན་ཚོགས་རྒྱུད་སྨད་ཀྱི་མཁན་པོ་གནང་སྐབས་བདེ་ཆེན་གསང་སྔགས་མཁར་གྱི་རྒྱུད་སྨད་ཆོས་ཐོག་འདུ་ཁང་དང་།    ལྷ་སའི་རྒྱུད་སྨད་འདུ་ཁང་གསར་རྒྱག་མཛད་ཅེས་རྣམ་ཐར་དུ་གསལ་ཞིང་།    རྒྱུད་སྨད་ལྷ་སར་གཏན་བཞུགས་གནང་ཡུལ་རྒྱུད་ཁང་ལྕང་ལོ་ཅན་གྱི་འདུ་ཁང་ཀ་བ་བཞི་བཅུ་ཞེ་གཉིས(ཀ་རིང་བཞི་ཚུད)གཙང་ཁང་ཐོག་ས་གསུམ་ལོན་པའི་ཀ་རིང་བརྒྱད་དང་ཀ་ཐུང་བརྒྱད་ཅན་ཡོད་པའི་ཤར་ངོས་མགོན་ཁང་ཀ་བ་དགུ།    གཙང་ཁང་གི་ཐོག་ས་གཉིས་པའི་ཞལ་རས་ལྷ་ཁང་མདུན་སྒྲོལ་མ་ལྷ་ཁང་ཀ་ཐུང་དྲུག་ཅན།    གཙང་ཁང་ཐོག་ས་བཞི་པའི་སྟེང་ནུབ་ངོས་རྒྱལ་བའི་གཟིམ་ཆུང་དང་།   ཤར་ངོས་མཁན་པོའི་གཟིམ་ཆུང་ལེ་ལག་དང་བཅས་པ།    དབུས་སུ་བློས་བླངས་ཁང་ཀ་བ་བརྒྱད་ལྡན།   འདུ་ཁང་གི་མདུན་སྒོ་མཆོར་སྟེང་རབ་གསལ་ཀ་བ་གཉིས་ཡོད་པ་ནི་ཕྱག་མཛོད་ཁང་ཡིན།    གྲྭ་ཁང་སྟེང་མཆོད་པ་ཁང་དང་།    ཕྱག་མཛོད་ཁང་གི་རུང་ཁང(ཐབ་ཚང)  མཛོད་ཁང་སོགས་ཁང་མིག་བཅུ་གྲངས་སྐོར།    གྲྭ་ཁང་གི་ནུབ་ངོས་ཁྲི་ཐོག་ཁང་ཞེས་སྔོན་དུས་ལྕང་སྐྱ་བཞུགས་གནས་ཐོག་ཚད་བཞི་ལྡན།    གྲྭ་ཁང་གི་ཤར་ལྷོར་རུང་ཁང་།    གྲྭ་ཁང་གི་མདུན་དུ་རྡོ་བཅལ།    དེའི་ནུབ་ངོས་ཆོས་རྭ་སོགས་དང་།    གྲྭ་ཁང་གི་ཕྱི་སྒོའི་ནུབ་ངོས་སུ་གྲྭ་ཤག་ཐོག་ས་གཉིས་ལྡན་ར་སྒོར་དང་བཅས་པ་གསུམ་བཅས་ཡོད་ལ་དེ་མིན་ཁྲོམ་གཟིགས་ཁང་གི་བྱང(དེང་སྐབས་པེ་ཅིན་ལམ་གྱི་ལྷོ་ངོས)དུ་རྒྱུད་སྨད་ཁང་གསར་ཞེས་ཁང་པ་གསུམ་ཐོག་སྒོ་ར་དང་བཅས་ཡོད།   

3 རྟེན་གཙོ།

རྒྱུད་སྨད་གྲྭ་ཚང་གི་རྟེན་གཙོ་རྗེ་ཙོང་ཁ་པས་གནང་བའི་གསང་འདུས་ཀྱི་གསེར་སྐུ་དེ་ཡིན་པ་དང་།   གཞན་ད་དུང་འདུ་ཁང་གི་དབུས་སུ་མཁན་པོའི་བཞུགས་ཁྲི་དང་།    དེའི་གཡས་ངོས་སུ་རྗེ་ཤེས་རབ་སེང་གེའི་འདྲ་སྐུ།    མཁན་ཁྲིའི་གཡས་ཀྱི་ཀ་བའི་ངོས་སུ་རྗེ་ཙོང་ཁ་པས་རྗེ་ཤེས་རབ་སེང་གེར་གནང་བའི་གསང་འདུས་ཀྱི་གསེར(ཟངས)སྐུ་ཐོ་གང་ཙམ་བྱིན་ཅན།    གདོང་གྲལ་གྱི་ནུབ་ངོས་གྲལ་འགོར་བླ་མ་དབུ་མཛད་ཀྱི་བཞུགས་ཁྲི།    གཙང་ཁང་གི་སྒོ་གཡས་གཡོན་དུ་དངུལ་གདུང་གཉིས།    འདུ་ཁང་གི་གྱང་ལྡེབས་ཤར་ནུབ་ཏུ་ཡི་དམ་གྱི་བྲིས་སྐུ་སྣ་ཚོགས་དང་།     གཞུང་སྒོའི་ཤར་ངོས་སུ་རྣམ་སྲས་ཀྱི་བྲིས་སྐུ་གསུམ་དང་ནུབ་ངོས་མགོན་པོ་དང་ཆོས་རྒྱལ་ཕྱི་ནང་གི་བྲིས་སྐུ།    དགེ་བསྐོས་ཀྱི་ཁྲི།    སེང་གཡབ་ཀྱི་ངོས་སུ་ཐུབ་དབང་།    རྗེ་ཙོང་ཁ་པ།    རྗེ་ཤེས་རབ་སེང་གེ་སོགས་ཀྱི་བྲིས་སྐུ།    གཙང་ཁང་ནང་རྗེ་ཡབ་སྲས་གསུམ་གྱི་སྐུ་བརྙན་ཐོག་ཚད་གསུམ་ཡོད་པ་དང་།    རྣམ་སྲས་ཀྱི་སྐུ་བརྙན།    དེ་མིན་སྐུ་བརྙན་ཆེ་ཆུང་དུ་མ།    བཀའ་འགྱུར་སོགས་གླེགས་བུམ་དུ་མ་ཀུན་དགའ་ར་བ་དང་བཅས་པ་མགོན་ཁང་ནང་འཇིགས་བྱེད་ཐོག་ཚད་ཉིས་ལྡན་གཙོ་བཞུགས་ཀྱི་གསང་བདེ་མགོན་ཆོས་ལྷ་མོ་སོགས་ཀྱི་སྐུ་བརྙན།   བར་ཐོག་སྒྲོལ་མ་ལྷ་ཁང་ནང་རྟེན་གཙོ་སྒྲོལ་ལྗང་གི་ལྡེབས་བྲིས་གསུམ་བྱིན་མར་གྲགས་པ་དང་།    ལྕང་སྐྱ་རོལ་པའི་རྡོ་རྗེའི་ཐུགས་དམ་རྟེན་བདེ་མཆོག་གི་ལི་སྐུ་སོགས་མང་པོ།   །    ཐོག་ས་གསུམ་པའི་ཞལ་རས་ལྷ་ཁང་ནང་གྲུབ་དབང་རྒྱ་མཚོའི་དངུལ་གདུང་དང་འདྲ་སྐུ་སོགས།     ཐོག་ས་བཞི་པའི་བློས་བླངས་ཁང་ནང་རྟེན་གཙོ་རྒྱལ་བ་བྱམས་པ་སྤྲུལ་སྐུའི་ཆ་ཆས་ཀྱི་བཞུགས་སྟངས་ཅན་ཐོག་ཚད་མ་དང་འཁོར་ཉེ་སྲས་བརྒྱད་བཅས་ཀྱི་འཇིམ་སྐུ་དང་།    རྟ་མགྲིན་ཁམས་གསུམ་ཟིལ་གནོན་དང་།    འཇམ་དཔལ་ན་ག་རའི་འཇིམ་སྐུ་ཁྲུ་གང་ལྷག་ཙམ་རེ་སོགས་སྐུ་བརྙན་མང་པོ།    ཀ་བའི་བར་དུ་གསེར་ཟངས་ལས་གྲུབ་པའི་གསང་འདུས་བློས་བླངས་དང་།    ཙནྡན་དམར་པོ་ལས་གྲུབ་པའི་འཇིགས་བྱེད་དང་བདེ་མཆོག་གི་བློས་བླངས་བཅས་ཡོད།   

4 སྒྲིག་གཞི།

རྒྱུད་སྨད་གྲྭ་ཚང་གི་སྒྲིག་གཞིའི་ཐད།    དབུ་འཛིན་གཙོ་བོ་མཁན་པོ་དང་།    དེ་བཞིན་བླ་མ་དབུ་མཛད།    བྱང་འདྲེན།    དགེ་སྐོས།    དཀོན་གཉེར།    དུང་མཁན་བཅས་ཏེ་ལས་སྣེ་དྲུག་ཅེས་ཟེར།    མཁན་པོས་ཆོས་ལུགས་ཀྱི་གཙོ་འགན་བཞེས་རྒྱུ་དང་།    བླ་མ་དབུ་མཛད་ཀྱིས་བཅའ་ཡིག་བཞིན་སྒྲིག་ལམ་གནོན་འདོམས་དང་།    གྲྭ་ཚང་ཚོགས་འདུའི་འགོ་འཛིན་སོགས་གནང་རྒྱུ།    བྱང་འདྲེན་ཆེ་མོས་ཚོགས་གཞུང་དུ་འདོན་པ་རྟ་འདུར་དབྱངས་གསུམ་དང་རོལ་མོ་དཀྲོལ་རྡུང་སོགས་རྒྱུན་གཏན་དང་དམིགས་བསལ་ཆོས་ཐོག་ཁག་ལ་ཚོགས་ཐེངས་སོ་སོར་ཇི་ལྟར་རྒྱས་བསྡུས་དགོས་པ་རྣམས་དབུ་བསྐུལ་མཛད་རྒྱུ་དང་།    བྱང་འདྲེན་གཞོན་པས་བྱང་འདྲེན་ཆེ་མོར་ཕྱག་རོགས་ཞུ་རྒྱུ།    དགེ་སྐོས་ཀྱིས་རྒྱུན་གཏན་གྱི་སྒྲིག་ལམ་གནོན་འདོམས་ཐོག་རང་ཐག་མ་ཆོད་པ་རྣམས་བླ་མ་དབུ་མཛད་ལ་དགོངས་སྐོར་ཞུ་རྒྱུ།    ཚོགས་སུ་སྐབས་ཞུ་དང་སྙན་སེང་ཞུ་རྒྱུ་སོགས་གནང་དགོས།    དཀོན་གཉེར་དང་ཆབ་རིལ་གྱིས་དགེ་སྐོས་ཀྱི་ཕྱག་གཡོག་ཞུ་རྒྱུ།    ཞལ་ལྟ་བས་ལག་བདེའི་འགོ་དང་ཇ་ཐུག་གཏོང་ཚོད་སོགས་ཡིན།    གྲྭ་ཚང་གི་དཔལ་འབྱོར་འདུ་འགོད་བྱེད་རྒྱུ་སོགས་ཕྱག་མཛོད་ཁང་ནས་བྱེད་ཅིང་གཞིས་ཁག་སོ་སོར་གཞིས་ཀ་བླ་མ(གཞིས་སྡོད)གཏོང་རྒྱུ་དང་།    ལོ་འཁོར་གཏོང་ཡོང་རྩིས་རྒྱག     སྦྱིན་བདག་ཆེ་ཆུང་ལ་སྣེ་ལན་བྱེད་རྒྱུ།    གཞུང་གི་ལས་ཁུངས་ཁག་ནས་གཏོང་སྒོ་ཞུ་རྒྱུ་དང་རུང་ཁང་དུ་ཞལ་ལྟ་བར་རྩིས་སྤྲོད་རྒྱུ།    གཞུང་གི་ཡིག་ཆ་འབྱོར་ན་ཁུངས་སུ་སྐྱེལ་རྒྱུ།    ཆོས་ཐོག་སོ་སོའི་གཏོང་སྒོ་ཞལ་བལྟ་བར་རྩིས་སྤྲོད་རྒྱུ་སོགས་ཡིན།    ཕྱག་མཛོད་རྣམས་ནི་ཁང་ཚན་ལྔ་ནས་གྲ་པ་བསྐྱེད་རིམ་པ་ཕ་ཡུལ་དབུས་པ་ཡིན་པའི་མི་རེ་འཛུགས་དགོས་པ་དང་།    འགན་འཁུར་དུས་ཚོད་ལོ་ལྔ་རེ་ཡིན་འདུག    རྒྱུད་སྨད་གྲྭ་ཚང་ལ་ཁང་ཚན་ཚ་བ་དང་།    གསེར་ཀོང་།   ཨ་མདོ།    ཏྲེ་ཧོར།    རྒྱལ་རོང་བཅས་ལྔ་དང་།    ཚ་བ་ཁང་ཚན་ལ་འབྲོག་མི་དང་།     ལྡན་མ་སོགས་མི་ཚན་བཅུ་དྲུག་དང་།    ཨ་མདོ་ཁང་ཚན་ལ་བྱ་ཁྱུང་དང་།    གཙང་པ་སོགས་བཞི།    ཏྲེ་ཧོར་ལ་དཀར་མཛེས་དང་།    རྫ་པ་སོགས།    རྒྱལ་རོང་ལ་དར་མདོ་སོགས་མི་ཚན་ཡོད་ལ་ཁང་ཚན་སོ་སོར་ཁང་ཚན་སྤྱི་རྒན་ཞེས་གྲྭ་པ་རྒན་པ་རེ་ཡོད་པ་བཅས་སོ།  ། 


སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2015-12-29

གསར་སྤེལ་མཁན། :འབྲུག་རྩེ།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།