སྟག་རྩེ་སྒྲུབ་མཆོད།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

སྟག་རྩེ་སྒྲུབ་མཆོད་ནི་རྗེ་ཙོང་ཁ་པ་ཆེན་པོའི་མཛད་ཆེན་བཞིའི་ཡ་གྱལ་དགའ་ལྡན་སྒྲུབ་མཆོད་ཀྱི་ཕྱག་ལེན་ལ་བརྟེན་ནས་གསང་སྔགས་རྒྱུད་སྡེ་བཞིའི་སྒྲུབ་ཐབས་བཞིན་གསང་བདེ་འཇིགས་གསུམ་དང་། དུས་འཁོར། ཕྱག་རྡོར་འཁོར་ཆེན་སོགས་ཀྱི་ཡང་དག་ཆོ་ག་ཉམས་བཞེས་ཀྱིས་རྒྱུན་འཁྱོངས་བྱེད་པའི་དུས་བཟང་སྒྲུབ་མཆོད་ཅིག་ཡིན།
གཞི་རྩའི་གནས་ཚུལ།

དུས་ཆེན་ཉིན།
བོད་ཟླ2པའི་ཚེས3-15ཉིན།
ཐོག་མའི་སྲོལ་བཏོད་མཁན།
རྗེ་ཙོང་ཁ་པ་བློ་བཟང་གྲགས་པ།
ས་ཆ།
བོད་རང་སྐྱོང་ལྗོངས་ལྷ་ས་གྲོང་ཁྱེར།
རྣམ་པ།
ཆོས་ལུགས་ཀྱི་བྱེད་སྒོ།
1  སྟག་རྩེ་སྒྲུབ་མཆོད་ཇི་ལྟར་བྱུང་ཚུལ།

སྟག་རྩེ་སྒྲུབ་མཆོད་ནི་བོད་ཟླ་གཉིས་པའི་ཚེས་གསུམ་ནས་བཅོ་ལྔ་བར་འཚོགས་བཞིན་ཡོད། ཕྱག་སྲོལ་དེ་ཐོག་མར་བོད་རབ་བྱུང་བདུན་པའི་མེ་མོ་བྱ་སྟེ་སྤྱི་ལོ1417ལོར་རྗེ་བདག་ཉིད་ཆེན་པོས་གསང་སྔགས་ཀྱི་སྒྲུབ་མཆོད་ཁང་ཡངས་པ་ཅན་གྱི་གཙུག་ལག་ཁང་གསར་བཞེངས་མཛད་ནས་དགའ་ལྡན་སྒྲུབ་མཆོད་ཆེན་མོ་གཟབ་རྒྱས་ངང་བོད་ཡུལ་ཡོངས་ལ་གྲགས་པ་ཞིག་སྤེལ། ཡིན་ཡང་བར་སྐབས་ཤིག་ནས་དེའི་རྒྱུན་བསྐྱང་མ་ཐུབ་པར་ཉམས་དམས་སུ་གྱུར་པས། སྟག་རྩེ་མི་དབང་ལྷ་རྒྱལ་རབ་བརྟན་གྱིས་མཐུན་རྐྱེན་གང་མཁོ་སྦྱར་ཏེ་ཡང་བསྐྱར་ཉམས་གསོ་བྱས་ཀྱང་ཡུན་རིང་མ་ལོན་པར་དེ་ཡང་རྒྱུ་རྐྱེན་དུ་མའི་དབང་གིས་ཉམས་རྒུད་དུ་སོང་།  དེ་ནས་ཝང་འགྱུར་མེད་རྣམ་རྒྱལ་གྱིས་སྲིད་དབང་བཟུང་བའི་སྐབས་སུ་གཞུང་ནས་མཐུན་རྐྱེན་སྦྱར་ཏེ་བསྐྱར་གསོ་གནང་བ་ད་ལྟ་ཡང་མ་ཉམས་པར་སྟག་རྩེ་སྒྲུབ་མཆོད་ཅེས་ཡུལ་ཕྱོགས་དེ་ན་ལོ་རེ་བཞིན་ཕྱག་ལེན་འཐུས་ཚང་དུ་སྤེལ་གྱིན་མཆིས།

2 སྒྲུབ་མཆོད་སྤེལ་བའི་ཕྱག་ལེན།

སྒྲུབ་མཆོད་སྤེལ་བའི་ཕྱག་ལེན་ནི་གསེར་གདུང་ཁང་གི་མདུན་དུ་བྱང་རྩེ་གྲྭ་ཚང་གི་འདོན་བཟང་བ་རྣམས་ཀྱིས་དཔལ་གསང་བ་འདུས་པ་མི་བསྐྱོད་པའི་རྡུལ་ཚོན་དང་ཤར་རྩེ་གྲྭ་ཚང་གི་འདོན་བཟང་བ་རྣམས་ཀྱིས་ཡངས་པ་ཅན་དུ་འཇིགས་བྱེད་ལྷ་བཅུ་གསུམ་མའི་རྡུལ་ཚོན། ལྷོ་པ་དང་ཐེ་བོ། མངའ་རིས་བཅས་ཀྱི་ཁང་ཚན་ནས་ཡངས་པ་ཅན་དུ་བདེ་མཆོག་ལུ་ཨི་བའི་རྡུལ་ཚོན།  ཤར་རྩེ་གྲྭ་ཚང་གི་དུས་འཁོར་བ་རྣམས་ནས་ཚོགས་ཆེན་སྟེང་དུ་དུས་འཁོར་གྱི་རྡུལ་ཚོན་སྒྲུབ་མཆོད་སྤེལ་བ་ཡིན། གཞན་ཡང་བསམ་བློ་དང་རྡོ་ར་བཅས་ཀྱི་ཁང་ཚན་ནས་ཀྱང་རྣམ་སྣང་མངོན་བྱང་དང་། ཧར་གདོང་ལ་ཕྱག་རྡོར་འཁོར་ཆེན། ཚ་བ་དང་ཀླུ་འབུམ་གཉིས་ལ་རྡོར་དབྱིངས། ཏྲེ་ཧོར་དང་རྒྱལ་རོང་། གོ་བོ་བཅས་ལ་མི་འཁྲུགས་པ། ཅོ་ནེ་དང་སོག་པོ་གཉིས་ལ་ཀུན་རིག ཟུང་ཆུར་ཚེ་དཔག་མེད་ལྷ་དགུ། ཕུ་ཁང་ལ་གནས་བརྟན་ཕྱག་མཆོད་བཅས་ཁང་ཚན་སོ་སོར་དཀྱིལ་འཁོར་ལ་བརྟེན་པའི་སྒྲུབ་མཆོད་ཕྱག་ལེན་མཛད་སྲོལ་རེ་ཡོད།

ས་དེའི་མང་ཚོགས་ཀྱི་སེམས་སུ། སྒྲུབ་མཆོད་ཀྱི་སྐབས་དེར་གནས་མཆོག་ཙ་རིའི་ལྷ་ཚོགས་ཐམས་ཅད་དགའ་ལྡན་དུ་བཞུགས་ཡོད་པར་འདོད་པས། སྒྲུབ་མཆོད་ཀྱི་རིང་ལ་དད་ལྡན་མང་ཚོགས་རྣམས་དགའ་ལྡན་གླིང་སྐོར་དུ་ཕེབས་ན་གནས་ཆེན་ཙ་རིར་དངོས་སུ་གནས་སྐོར་ལ་སོང་བ་ལྟ་བུའི་བྱིན་རླབས་དང་ཕན་ཡོན་མཆིས་པར་བཤད། དེ་བས་དབུས་ཀྱི་ལྷ་ས་དང་ལྷོ་ཁ། འབྲི་གུང་། འཕན་པོ། མལ་གྲོ་སོགས་ནས་མང་ཚོགས་བགྲང་གིས་མི་ལང་བ་དགའ་ལྡན་དུ་སྟག་རྩེ་སྒྲུབ་མཆོད་ལ་ཕེབས་ནས་དུས་ཆེན་ལ་རོལ་སྲོལ་ཡོད། 


བརྡ་འགྲེལ་གདོང་འཛར།

རིག་གནས། དམངས་སྲོལ། དུས་ཆེན།
སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2015-12-28

གསར་སྤེལ་མཁན། :འབྲུག་རྩེ།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།