མགོ་ལོག་བོད་རིགས་རང་སྐྱོང་ཁུལ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

མགོ་ལོག་བོད་རིགས་རང་སྐྱོང་ཁུལ།
མགོ་ལོག་བོད་རིགས་རང་སྐྱོང་ཁུལ་ནི་མཚོ་སྔོན་ཞིང་ཆེན་གྱི་ཤར་ལྷོའི་ཕྱོགས་སུ་ཡོད་ལ། ཤར་གྱི་གཞུང་ཐིག97°54′-101°50′དང་བྱང་གི་འཕྲེད་ཐིག32°31′-35°40 ཡི་བར་དུ་གནས་ཤིང་། ཁུལ་ཡོངས་ཀྱི་སྤྱིའི་རྒྱ་ཁྱོན་ལ་སྟོང་སྨི་གྲུ་བཞི་མ76312ཡོད། གཞན་ཁུལ་མི་དམངས་སྲིད་གཞུང་ནི་རྨ་ཆེན་རྫོང་ཐོག་ཏུ་ཡོད། མགོ་ལོག་ཁུལ་གྱི་ཐོན་ཁུངས་ཧ་ཅང་ཕུན་སུམ་ཚོགས་པ་ཡིན་ཏེ། གཙང་བོ་ཆེ་ཆུང36ཡོད་པ་དང་། ཆུ་བོའི་བཞུར་རྒྱུན་གྱི་རིང་ཚད་ལ་སྤྱི་ལེ3300ལྷག་ཡོད་ཅིང་། སོ་སོར་རྨ་ཆུ་དང་འབྲི་ཆུ་གཉིས་ཀྱི་ནང་དུ་འབབ་ཀྱིན་ཡོད།
གཞི་རྩའི་གནས་ཚུལ།

རྒྱ་ཡིག་གི་མིང་།
果洛藏族自治州
ཕྱི་ཡིག་གི་མིང་།
Tibetan Autonomous Prefecture of Golog
མིང་གཞན།
མགོ་ལོག་ཁུལ།
སྲིད་འཛིན་རིགས་དབྱེ།
རང་སྐྱོང་ཁུལ།
སྲིད་འཛིན་ཁོངས་གཏོགས།
ཀྲུང་གོའི་མཚོ་སྔོན་ཞིང་ཆེན་ནམ་ནུབ་བྱང་ས་ཁུལ།
མངའ་ཁོངས།
རྨ་ཆེན་རྫོང་། དགའ་བདེ་རྫོང་། དར་ལག་རྫོང་། པདྨ་རྫོང་། རྨ་སྟོད་རྫོང་། གཅིག་སྒྲིལ་རྫོང་བཅས་རྫོང་ཁག་དྲུག་ཡོད།
སྲིད་གཞུང་གནས་ཡུལ།
རྨ་ཆེན་རྫོང་།
ས་ཁོངས་ཀྱི་ཁ་པར་ཨང་རྟགས།
0975
སྦྲག་སྲིད་ཨང་རྟགས།
814000
ས་གནས།
མཚོ་སྔོན་ཞིང་ཆེན་གྱི་ཤར་ལྷོའི་རྒྱུད་དུ་ཡོད།
རྒྱ་ཁྱོན།
སྟོང་སྨི་གྲུ་བཞི་མ་བདུན་ཁྲི་དྲུག་སྟོང་ཡོད།
མི་གྲངས།
ཆིག་འབུམ་བརྒྱད་ཁྲི་ཡོད། (སྤྱི་ལོ2011ལོར)
སྐད་རིགས།
བོད་ཨ་མདོའི་སྐད།
གནམ་གཤིས།
མཐོ་སྒང་ནམ་ཟླ།
མཛེས་ལྗོངས་གྲགས་ཅན།
གཉན་པོ་གཡུ་རྩེའི་མཛེས་ལྗོངས། ཨ་མྱེས་རྨ་ཆེན།
རླངས་འཁོར་ཨང་རྟགས།
青F
1 མི་རྒྱུད་བྱུང་ཚུལ།

རྨ་གཡང་ཕྱུག་མོའི་སྟོད་ནས་ཨ་མདོར་བརྩི་ལ། དེ་ནས་བཟུང་བོད་མི་ཆགས་ཚུལ་ནི། ཐང་གིས་ནུབ་ཕྱོགས་སུ་རྒྱ་བསྐྱེད་པའི་སྐབས་རྨ་སྟོད་མགོ་ལོག་གི་ས་ཆ་སོགས་སུ་ཐང་དམག་གིས་མ་བཟུང་བར། དེ་གར་གཉུག་མར་གནས་པའི་བོད་ཀྱི་མི་སྡེ་ཡོད་པ་ནི། རྨར་རོལ་གྱི་ས་ཆའི་སྟོད་དུ་སྦྲ་རིགས་ཀྱི་དཔོན་གཉན་རྩེ་ཟེར་བ་ཡོད་ལ། བར་དུ་སྦྲ་རིགས་ཀྱི་དཔོན་མཁར་རེ་ཟེར་བ་ཡོད། སྨད་དུ་སྦྲ་རིགས་ཀྱི་དཔོན་བ་ལི་ཟེར་བ་འབངས་བཅས་ཡོད། 

དེ་རྗེས་མགོ་ལོག་གི་མི་རྒྱུད་བྱུང་ཚུལ་ནི། བོད་ཀྱི་རུས་ཆེན་བཞིའི་ནང་སྟོང་ཞེས་བྱ་བ་དེ་ཉིད་ཡིན་ལ། དེ་ལ་ཨ་ལྕགས་འབྲི་ཞེས་ཟེར། འབྲི་འདི་ལ་འབྲུ་ཞེས་འབྲི་བ་དང་འབྲི་ཚུལ་གཉིས་ཡོད་དེ། མདོ་སྨད་ཆོས་འབྱུང་སོགས་དག་རུས་མཛོད་སྔོན་མ་ཁ་ཤས་སུའང་འབྲུ་ཞེས་བྲིས་པ་ཡོད་མོད། རུས་མཛོད་དག་ཏུ་འབྲུ་རྗེ་རྭ་ཅོ་ཅན་བཅོ་བརྒྱད་ཀྱི་གདུང་རིགས་ཞེས་བྲིས་ཡོད་པ་དང་། འབྲི་གུང་གི་འབྲི་ཡང་གུག་གུ་ཅན་དུ་གཏན་དུ་འཁེལ་ཞིང་། དེ་ཡང་འབྲི་རིགས་ཀྱི་རུས་ཡིག་ཡིན་པར་གདའ་བས་འདིར་ཡང་དེ་ལྟར་དུ་གུག་གུ་ཅན་འབྲི་བར་བྱའོ།།

དེ་ཡང་གནའ་སྒྲུང་ལས། འབྲི་བྱས་པ་ཅན་ཞེས་དགྲ་ལ་རྒོད་ཅེས་དང་། རི་རྩ་བ་གསུམ་དེ་འབྲི་ལ་ཐོབ།། རྒྱལ་ས་ནོན་པ་དེ་ཡི་དོན།། ཞེས་སྒྲུང་གླུ་འདི་དག་ལ་དོན་ཐོབ་ཀྱི་གཉིས་དང་། དཔེ་ཐོབ་ཀྱི་གཉིས་ཏེ་བཞི་ཡོད་དེ།། དེ་བཞི་རུས་ཆེན་བཞི་ལ་ཡོད་པ་ལས། འབྲི་ལ་དཔེ་ཐོབ་ཀྱི་གླུ་ཡིན། རི་རྩ་བ་གསུམ་གྱི་དཔེ་ལྟར་བརྟན་ཏེ་རྒྱལ་ས་ནོན་པའི་དོན་ཡིན་ཟེར། གནའ་སྒྲུང་དུ། འབྲི་ཤིང་ཐུང་ཅན་དེས་འཐབ་ན་མཛེས།། ཞེས་འཐབ་འཛིང་ལ་བཟང་བའི་རིགས་ཡིན་ཞིང་། འབྲི་རྗེ་རྭ་ཅོ་ཅན་བཅོ་བརྒྱད་ཀྱི་གདུང་རིགས་དང་། འབྲི་མི་འགྱུར་ཐར་བའི་གནས་བརྒྱད་ཅེས། ས་སྐྱ་དང་འབྲི་གུང་སོགས་ཀྱི་གདུང་རིགས་བརྒྱད་དབུས་གཙང་དང་བར་ཁམས་སུ་ཡོད་པ་དང་། ཁམས་ཀྱི་གྲེ་རོང་ལྕགས་གསུམ་ཁོག་དང་། གསེར་རོང་སོགས་ལ་ལྕགས་གདུང་རིགས་མང་དུ་ཡོད་ཅིང་། བར་ཁམས་སུ་ལྷོ་རོང་བཅོ་བརྒྱད་ཀྱི་ནང་ཚན་མགོ་ལོག་ཟེར་བའི་སར་ཡང་འབྲི་རིགས་མང་དུ་ཡོད་ལ། བར་སྐབས་ཤིག་ཏུ་དེ་ནས་གླིང་གི་ཡུལ་དུ་མི་རྗེ་བྲན་ཁོལ་ཁྱིམ་བཅུ་དང་བཅས་ཏེ་འོངས་ནས། འབྲི་ཀླུང་གི་ཉིན་ཕྱོགས་འཛི་འགུ་ཁོ་ལུང་བ་ཞེས་བྱ་བར་གཞི་ཆགས་ནས་རིང་ཞིག་ལོན་པའི་ཚེ། འབྲི་ལྷ་རྒྱལ་ཞེས་པའི་ཁྱིམ་སྔགས་པ་ཞིག་བྱུང་། དེས་གཉན་བཟའ་ཞིག་བླངས་པའི་བུ་ཨ་འབུམ་རྒྱལ་ཟེར་བ་སྐྱེས། དེ་ཆེར་སྐྱེས་པའི་ཚེ་ཙམ་ནས། གླིང་རྗེ་དང་མ་མཐུན་པར། གླིང་རྗེས་བཀའ་བཀྱོན་དང་ཐུགས་གནག་པའི་ཚེ། བྲན་མི་ཁྱིམ་ལྔ་བཅུ་ཙམ་དང་བཅས་ཡུལ་བུད་ནས། རྡོ་རོལ་དགོངས་དང་པོ་དང་། མ་སྲིད་ལྟེ་ཐང་། སྐྱིད་ཡག་དང་། གོས་ཀྱི་མ་མོ་བཞི་མདོ་རྣམས་སུ་བསྡད།  དེ་རྗེས་མཁར་གོང་ལུག་སྣ་རིང་མོ་ཡན་ཆད་དང་། ཚ་ལུག་སྣ་མཁར་སུམ་མདོ་མན་ཆད་བཟུང་སྟེ། མཁར་གོང་རྒྱལ་ས་བྱས། ཚ་ལུག་སྣ་མཁར་སུམ་མདོར་ལྷ་ཁང་བཞེངས་པ་དང་། ལྷ་ཁང་ཁ་ཤས་བརྩིགས། ལྷ་རྒྱལ། ལྷ་རིར་མཚམས་ལ་བཞུགས། བུ་ཨ་འབུམ་རྒྱལ་དཔོན་སར་བསྐོས། གོང་དུ་བཤད་པའི་གཉུག་མར་གནས་པའི་གཉན་མཁར་བ་གསུམ་གྱི་མི་སྡེ་རྣམས་དང་ཚོང་འབྲེལ་ཉེ་ཤག་བསྡེབས་ནས་འདུག་སྐབས། འབྲི་ལྷ་རྒྱལ་ཕ་བུ་ཆོས་སྲིད་གཉིས་ཆར་མཐོ་བར་གྱུར་པས། གཉན་མཁར་བ་གསུམ་གྱི་དཔོན་རྣམས་ཕྲག་དོག་སྐྱེས་ཏེ། མགོ་ལོག་འབྲི་ལྷ་རྒྱལ་ཚང་ལ་དམག་བརྒྱབ་པས་གཉན་རྩེའི་དཔོན་བསད། གཉན་མཁར་བ་གསུམ་ཕམ་སྟེ་མགོ་བསྒུར། ལུས་ཕུལ། བྲན་དུ་ཁས་བླངས་སོ།།

བུ་ཨ་འབུམ་རྒྱལ་གྱིས་སྔར་གླིང་རྗེ་རིགས་ཀྱི་བུ་མོ་ཞིག་བླངས་པ་ལ་བུ་གསུམ་སྐྱེས། ཆེ་བ་འབུམ་སྐྱབས། འབྲིང་བ་འབུམ་དགེ། ཆུང་བ་འབུམ་ཡག་གསུམ་ཡིན། དེ་དུས་རྨར་ཤོད་དུ་མཁར་བརྩིགས་ནས་དེར་བསྡད། བུ་ཆུང་བ་འབུམ་ཡག་གིས་གཉན་མོ་ཞིག་བླངས་པ་ལ་བུ་ཕག་ཐར་ཟེར་བ་སྐྱེས། ཕག་ཐར་གྱི་རིང་ལ། རྡོ་ཁོག འཛི་སྐ། རྨར་ཁོག་གསུམ་གྱི་བདག་པོར་གྱུར། འདི་སྐབས་ཤིག་ལ་མགོ་ལོག་ཨ་འབུམ་ལོ་གོ་གསུམ་ལོན་དུས་སུ་འདས། ཕག་ཐར་གྱི་རང་ཞབས་ཀྱི་འཕེལ་འཛིས་བཟའ། ཐར་མོ་མཚོ་ཟེར་བ་ཁབ་ཏུ་བཞེས། དེ་ལ་བུ་བཞི་སྐྱེས། ཕག་ཐར་གྱི་རིང་ལ་རྨར་རོལ་མ་ལག་དྲུག་གི་ས་ཆ་དང་མི་སྡེ་ལ་དབང་། རྨར་རོལ་ཆེན་མོའི་མདའ་གསེར་གཞོངས་དང་། ཁོ་ལེ་སྒང་ཐོག་ཏུ་མཁར་རྫོང་གཉིས་བརྩིགས། དེའི་སྐབས་ཏཱ་མིང་རྒྱ་རྒྱལ་གྱིས་འཇམ་བྲིད་ཀྱི་སྲིད་ཇུས་བསྟར་ཏེ་གྲངས་ཉུང་མི་རིགས་ཀྱི་དཔོན་དག་ལ་དཔོན་ཐོབ་སྟེར་བའི་སྐབས་ཡིན་པས། ཏཱ་མིང་ཟོན་ཏིས་ཕག་ཐར་ལ་ཐང་ལོ་ཡེ་ཞེས་ཁྲི་དཔོན་གྱི་ལུང་བྱིན། ཁོ་རང་གི་བུ་བཞིའི་གཅིག་ཀ་ཐོག་བླ་མ་ཆོས་འབུམ་ཡིན། ཆེ་བ་རྡོ་རྗེ་འབུམ་ལ་རྡོ་རོལ་གྱི་ས་ཆ་དང་མི་སྡེ། འབྲིང་བ་པདྨ་འབུམ་ལ་འཛི་སྐའི་ཁོག ཆུང་བ་པདྨ་ཡག་ལ་རྨར་རོལ་གྱི་ས་ཆ་དང་མི་སྡེ་བྱིན། རྔ་ཁོག་གི་མི་སྡེ། གསེར་ཁོག་གི་ཁྲལ། གཡུ་དང་རྩང་ཁོག་གི་ས་ཆ་མི་སྡེ་རྣམས་ཐུན་མོང་དུ་བཞག་སྟེ་ཁོ་ལོ་གྱ་དགུ་ལ་འདས། རྡོ་རྗེ་འབུམ་གྱི་བུ་ཆེ་བ་འབུམ་ཕྱུག་རྒྱལ་དང་། ཆུང་བ་དབང་ཆེན་འབུམ་ཡིན། པདྨ་འབུམ་གྱི་བུ་ཆེ་བ་ཐར་བ་དང་། ཆུང་བ་མགོ་ལོག་དཔོན་པོ་བྱང་ཆུབ་རྒྱལ་མཚན་ཡིན། པདྨ་ཡག་གི་བུ་ཆེ་བ་ཁྲུ་འུ་དང་། ཆུང་བ་གཉན་ཐར་རེད། རྡོ་རྗེ་འབུམ་གྱི་བུ་ཆེ་བ་འབུམ་རྒྱལ་གྱིས་སྨུག་ཆེན་གད་མགོར་ཁང་བ་ཞིག་བརྩིགས་ནས་བསྡད། བུ་ཆུང་བ་དབང་ཆེན་འབུམ་ཕ་མཁར་དུ་བསྡད། པདྨ་འབུམ་གྱི་བུ་ཆེ་བ་ཐར་བ་ཆེན་མོ་གདོང་དུ་ཕ་ཁྱིམ་དེར་བསྡད། ཆུང་བ་བྱང་ཆུབ་རྒྱལ་མཚན་ཀ་ཐོག་ཏུ་བྱོན། པདྨ་ཡག་གི་བུ་ཆེ་བ་ཁྲུ་འུ་གཉན་གྲོང་གོང་མར་བསྡད་པས་ས་དེར་ཁྲུ་འུ་ནང་ཟེར། ཆུང་བ་གཉན་ཐར་དེ་ཕ་ཁྱིམ་དུ་བསྡད་པར་ས་དེར་གཉན་ནང་ཟེར། པདྨ་ཡག་གི་བུ་ཆུང་བ་རྟག་ཕན་རྒྱུད་པ་ལ། བར་སྐབས་སུ་མགོ་ལོག་སྙིང་བུ་མཚོ་ཞེས་པ་བྱུང་། དེའི་རྒྱུད་པ་ད་ལྟ་མགོ་ལོག་དཔལ་ཡུལ་ཚང་ཡིན་ཟེར། འདི་སྐབས་དབལ་ཤུལ་བན་ཞར་གྱིས་མགོ་ལོག་གི་དཔོན་རྣམས་ལ་ས་ཞིག་བསླངས་པར་རྡོ་རྗེ་འབུམ་ཕ་བུ་ནས་རྡོ་རོལ་རྗེ་མདའ་བྱིན། རྡོ་རྗེ་འབུམ་གྱི་བུ་ཆེ་བ་འབུམ་ཕྱུག་རྒྱལ་ལ་བུ་གཉིས་ཡོད་པའི་ཆེ་བ་མགོ་ལོག་ཨ་སྐྱོང་དང་། དཔོན་མགོ་ལོག་རྒྱལ་མཚན་ནམ་རིན་ཆེན་འབུམ་གཉིས་ཡིན། པདྨ་འབུམ་གྱིས་འཛི་སྐའི་སྟོད་སྨད་ཐམས་ཅད་ལ་དབང་བསྒྱུར་བས་པདྨ་འབུམ་ཚང་ཟེར་བ་བྱུང་། པདྨ་ཡག་གི་ཤ་མདོག་ནག་སྨུག་ཡིན་སྟབས་བན་ནག་ཟེར་ལ། དེའི་རྒྱུ་མཚན་གྱིས་དེའི་བུ་ཁྲུ་འུ་དང་གཉན་ཐར་གཉིས་ཀྱི་ནང་སྡེ་ཐམས་ཅད་ལ་བན་ནག་ཚང་ཟེར། འབུམ་སྐྱབས་ཀྱི་བུ་ཆེ་བ་ཨ་སྐྱོང་ནི་ཡར་ཐང་དུ་མཁར་བརྩིགས་ནས་བསྡད་པས་ཨ་སྐྱོང་ཟེར། དེ་སྐབས་དབང་ཆེན་འབུམ་ཚང་། ཨ་སྐྱོང་ཚང་། པདྨ་འབུམ་ཚང་། པདྨ་ཡག་ཚང་རྣམས་ཀྱིས་ས་བགོས་ནས། ས་མཚམས་སུ་རྡོ་བརྩིགས། དབང་ཆེན་འབུམ་གྱི་བུ་ཆེ་བ་ཚེ་བརྟན་ཡག་འདིའི་རྒྱུད་པ་དབང་ཆེན་སྨད་པ་རེད་ཟེར། བུ་ཆུང་བ་ཚེ་མགོན་ཡག་གི་རྒྱུད་པ་དབང་ཆེན་སྟོད་པ་རེད་ཟེར།  ཨ་སྐྱོང་། དབང་ཆེན་འབུམ། པདྨ་འབུམ་འདི་གསུམ་ལ་དེ་སྐབས་སུ་མགོ་ལོག་ཁག་གསུམ་ཟེར། 
  ཨ་སྐྱོང་ལ་བུ་སྙིང་བུ་རྒྱལ་དང་། ཁྲོ་བོ་རྒྱལ་གཉིས་བྱུང་བའི་སྙིང་བུ་རྒྱལ་ནི་མི་དྲག་རྩལ་ཅན་ཞིག་ཡིན་པས། ཨ་སྐྱོང་གི་དབང་དེས་བཟུང་ཞིང་། ཐང་མཁར་དུ་ད་ལྟའི་ཁང་རྒན་ཟེར་བ་དེ་བརྩིགས། དེ་དང་དེ་མཚུངས་སུ་པདྨ་ཡག་གི་བུ་རྒྱུད་མགོ་ལོག་ནག་ཐེར་བུ་བཞི་བྱུང་། སྙིང་བུ་རྒྱལ་གྱི་བུ་མགོ་ལོག་ཤཱཀྱ་འབུམ། དེས་མཁར་གོང་མ་བརྩིགས། དེའི་བུ་ཚེ་དབང་འབུམ་གྱིས་ཁང་བ་གསར་བ་བརྩིགས་བ་དེ་ལ་ཁང་གསར་ཟེར། དེ་ལྟར་མགོ་ལོག་ཁག་གསུམ་གྱི་དཔོན་རིགས་རྣམས་ནི་གཙོ་ཆེར་ཨ་ལྕགས་འབྲིའི་རིགས་ཡིན་མོད། ཨ་སྤོ་ལྡོང་གི་རིགས་ཀྱང་ཡོད་དེ། ལྡོང་ཤུལ་ཆེན་བཅོ་བརྒྱད་དང་། ཚ་ཆེན་བཅོ་བརྒྱད་ཀྱི་རིགས་ཀྱང་ཡོད་པ་དང་། སྦྲ་རིགས་ཀྱང་ཡོད། དེ་དག་ནི་རྗེ་རིགས་ཀྱི་རིགས་རྣམས་བཤད་པ་ཡིན་ལ། འབངས་མི་སེར་སྣ་ཚོགས་ཤིག་ཡོད་དེ། མགོ་ལོག་སྟོད་ལྟ་བུ་སྔར་ཐང་དམག་གིས་མ་བཟུང་བའི་སར་གཉུག་མའི་བོད་རིགས་ཡོད་དེ། སྔར་བཤད་པ་ལྟར་འབྲི་ལྷ་རྒྱལ་ཕ་བུས་བཅོམ་པའི་གཉན་རྩེ། མཁར་བ། བ་ལེ་གསུམ་གྱི་དཔོན་མི་སྡེ་དང་བཅས་པའི་རྒྱུད་པ་ཡོད་ཅིང་། ཧོར་གླིང་འཁྲུག་པའི་སྐབས་སུ་ཡོང་བའི་དཀར་པོ་ལྡོང་གི་རིགས་ཀྱང་གང་ས་གང་དུ་ཡོད་ལ། བོད་ཐང་དམག་འཁྲུག་གི་སྐབས་ཀྱི་དམག་མིའི་རྒྱུད་ཀྱང་མང་དུ་ཡོད་དོ།།

2 གནས་ཡུལ།

མགོ་ལོག་ཁུལ་ནི་མདོ་དབུས་མཐོ་སྒང་གི་ལྟེ་བར་ཆགས་ཡོད་པ་དང་རྨ་ཆུའི་འགོ་ཁུངས་ཡིན་ལ། མཚོ་སྔོན་ཞིང་ཆེན་གྱི་ཤར་ལྷོའི་རྒྱུད་དུ་ཡོད་ཅིང་། ཤར་གྱི་གཞུང་ཐིག97°54′--101°50′དང་བྱང་གི་འཕྲེད་ཐིག32°31′--35°40′ཡི་བར་དུ་གནས་པ་ཡིན། དེ་ཡང་རྨ་ཆེན་རྫོང་དང་ཞིང་ཆེན་གྱི་ལྟེ་གནས་ཟི་ལིང་གྲོང་ཁྱེར་གཉིས་གྱི་བར་ལ་བར་ཐག་སྤྱི་ལེ440ཡོད།

ཤར་ཕྱོགས་ནི་ཀན་སུའུ་ཞིང་ཆེན་གྱི་ཀན་ལྷོ་ཁུལ་དང་ཐག་ཉེ་བ་དང་། ལྷོ་ཕྱོགས་སུ་སི་ཁྲོན་ཞིང་ཆེན་གྱི་རྔ་བ་དང་དཀར་མཛེས་ཁུལ་གཉིས་ལ་འབྲེལ་ནས་ཡོད་ཅིང་། ནུབ་ཕྱོགས་སུ་མཚོ་སྔོན་ཞིང་ཆེན་གྱི་ཡུལ་ཤུལ་ཁུལ་དང་འབྲེལ་ནས་ཡོད། ཡང་བྱང་ཕྱོགས་ནི་མཚོ་སྔོན་ཞིང་ཆེན་གྱི་མཚོ་ནུབ་དང་མཚོ་ལྷོ། རྨ་ལྷོ་བཅས་ཁུལ་གསུམ་དང་ཕན་ཚུན་འབྲེལ་ནས་ཡོད་ལ། ཁུལ་ཡོངས་ཀྱི་སྤྱིའི་རྒྱ་ཁྱོན་ལ་སྤྱི་ལེ་གྲུ་བཞི་མ78000ཡོད་པ་དང་། མཚོ་སྔོན་ཞིང་ཆེན་གྱི་སྤྱིའི་རྒྱ་ཁྱོན་གྱི10% ཟིན་ཡོད།

3 གནམ་གཤིས།

མགོ་ལོག་ཁུལ་གྱི་གནམ་གཤིས་ནི་གྲང་ངར་ཆེ་བ་དང་དབྱང་དབུགས་མི་འདང་བ། དྲོད་གྲང་དམའ་བ། ཉི་མའི་འགྱེད་འཕྲོ་དྲག་པོ་ཡིན་པ། ཉིན་མཚན་གྱི་དྲོད་གྲང་གི་བར་ཁྱད་ཆེ་བ་སོགས་དཔེ་མཚོན་གྱི་མཐོ་སྒང་སྐམ་ས་ཆེན་པོ་རང་བཞིན་གྱི་ནམ་ཟླའི་ཁྱད་ཆོས་མངའ་བ་ཡིན་ལ། དེ་ཡི་ས་བབ་ནི་མཐོ་གཟར་ཡིན་པས། བྱང་ཕྱོགས་དང་ནུབ་ཕྱོགས་ཀྱི་གྲང་རྒྱུན་གྱི་ཤུགས་རྐྱེན་ཐེབས་སླ་བ་ཡིན་པར་མ་ཟད། ཆར་ཆུ་མོད་པ་དང་རླངས་འགྱུར་གྱི་ཚད་མཐོ་བ་ཡིན་ཞིང་། རླུང་ཆེན་གཡུགས་པ་ཡིན། དེ་ཡང་ལོ་ཧྲིལ་བོའི་ཆ་སྙོམས་ཀྱི་དྲོད་གྲང་ནི-4℃ཡིན་པ་དང་། ལོ་ཧྲིལ་བོའི་ཆར་ཆུ་འབབ་ཚད་ནི་ཧོ་སྨི400--760 ཡིན།

མགོ་ལོག་ཁུལ་ལ་ས་དབྱིབས་ཀྱི་ཤུགས་རྐྱེན་གྱིས་ཆར་ཆུ་འབབ་སའི་ས་ཁུལ་གསུམ་ཡོད་དེ། ཤར་ལྷོའི་ཕྱོགས་ཀྱི་བཞའ་ཚན་ཅུང་ཆེ་བའི་ས་ཆའམ་པདྨ་དང་གཅིག་སྒྲིལ་རྫོང་གཉིས་ཀྱི་ལོ་ཧྲིལ་བོའི་ཆ་སྙོམས་ཀྱི་ཆར་ཆུ་འབབ་ཚད་ནི་ཧོ་སྨི655.8--759.8ཡིན་ལ། ལོ་ཧྲིལ་བོའི་ཆར་ཆུ་འབབ་པའི་ཉིན་གྲངས་ནི175ཡས་མས་ཡིན། ཡང་དེའི་ཁྲོད་ཀྱི་གཅིག་སྒྲིལ་རྫོང་ནི་མཚོ་སྔོན་ཞིང་ཆེན་གྱི་ཆར་ཆུ་ཆེས་མང་བའི་ས་ཆ་ཡིན་ཞིང་། དབྱར་དང་སྟོན་གྱི་དུས་སུ་ཉིན་རྒྱུན་གནམ་ངོ་གནག་ཅིང་ཆར་བ་རྒྱུན་མི་ཆད་པ་ཡིན་ལ། རྨ་སྟོད་རྫོང་གི་ལོ་ཧྲིལ་བོའི་ཆ་སྙོམས་ཀྱི་ཆར་ཆུ་འབབ་ཚད་ནི་ཧོ་སྨི306ཡིན་པ་དང་། ལོ་ཧྲིལ་བོའི་ཆར་ཆུ་འབབ་པའི་ཉིན་གྲངས་ནི120ཡས་མས་ཡིན། གཞན་རྨ་ཆེན་དང་དགའ་བདེ་རྫོང་གཉིས་ཀྱི་ལོ་ཧྲིལ་བོའི་ཆ་སྙོམ་གྱི་ཆར་ཆུ་འབབ་ཚད་ནི་ཧོ་སྨི474--540.9 ཡིན་པ་དང་། ལོ་ཧྲིལ་བོའི་ཆར་ཆུ་འབབ་པའི་ཉིན་གྲངས་ནི118--162ཡིན།

མཚོ་འཕགས་ཧ་ཅང་མཐོ་བའི་རྐྱེན་གྱིས་རླུང་ཁམས་ཆེན་པོའི་ཆགས་རིམ་གྱི་འདུས་ཚད་ནི་ནང་ལོགས་ཀྱི60% ཡས་མས་ཡིན་ལ། དུས་བཞིའི་འགྱུར་བ་དེ་འདྲའི་མངོན་གསལ་མིན་ཞིང་། དྲོ་འཁྱག་གི་ཁྱད་པར་ལས་ཡོད་པ་མ་ཡིན་པས། དྲོ་འཁྱག་གི་དུས་ཚིགས་གཉིས་ལ་དབྱར་ཁ་དང་དགུན་ཁར་འབོད་པ་ཡིན།


སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:4  སྔ་མའི་པར་གཞི།

ཉེ་ཆར་དག་བཅོས།:2016-07-22

གསར་སྤེལ་མཁན། :ཨ་རྡོ

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།