ལི་ལ་པ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

ལི་ལ་པ།
གྲུབ་ཐོབ་བརྒྱད་ཅུ་རྩ་བཞིའི་ཡ་གྱལ་ཡིན། ཡོངས་གྲགས་སུ་གྲུབ་ཐོབ་བརྒྱད་ཅུ་རྩ་བཞིའམ་བརྒྱད་ཅུ་ཞེས་གྲགས་པ་ནི་བླ་མ་རྡོ་རྗེ་གདན་པས་ཚོགས་འཁོར་མཛད་པའི་དུས་སྐབས་སུ་བྱོན་པའི་གྲུབ་ཐོབ་གྲངས་ལ་བརྒྱད་ཅུ་བྱུང་བར་བརྟེན་ནས་དེ་ལྟར་གྲགས་པ་ཡིན། གྲུབ་ཆེན་བརྒྱད་ཅུ་རྩ་བཞི་དེ་དག་ནི་སྤྱི་ལོའི་དུས་རབས་བདུན་པ་ནས་སྤྱི་ལོའི་དུས་རབས་བཅུ་གཉིས་པའི་མཇུག་བར་ལོ་ངོ་དྲུག་བརྒྱའི་རིང་བྱོན་པའི་སྙན་གྲགས་ཆེ་ཤོས་ཀྱི་གྲུབ་ཐོབ་ཤ་སྟག་ཡིན།
གཞི་རྩའི་གནས་ཚུལ།

ལེགས་སྦྱར་སྐད།
སློབ་དཔོན་ལི་ལ་པ།
བོད་སྐད།
སྒེག་ཆོས་པ།
ཡུལ།
རྒྱ་གར་ལྷོ་ཕྱོགས།
རིགས།
རྒྱལ་པོ།
བླ་མ།
མཚན་ཆོད་པའི་རྣལ་འབྱོར་པ།
དངོས་གྲུབ་ཀྱི་རྟེན།
རྒྱས་སྤྲོས་ཀྱི་ཚུལ་ཕྱག་གཡས་ཀྱི་གདུ་བུ།
གྲུབ་པ་གང་ཐོབ།
མཆོག་གི་དངོས་གྲུབ།
རྟེན།
རྒྱལ་པོའི་ཚུལ།
ཆ་བྱད།
རྒྱལ་པོ་རྣམ་པ་ཅན་ཁྲི་ལ་བཞུགས་པ། འཁོར་བློན་པོ་དང་བཙུན་མོ་ལ་སོགས་པས་བསྐོར་བའི་རྣམ་པ་ཅན་ཅུང་ཟད་ཡོད་པ།
1 རྣམ་ཐར་མདོར་བསྡུས།

སློབ་དཔོན་ལི་ལ་པའི༼སྒེག་ཆོས་པ༽ལོ་རྒྱུས་ནི།     རྒྱ་གར༼ཤར་ཕྱོགས་ཟེར་བའང་སྣང༽ལྷོ་ཕྱོགས་ཀྱི་རྒྱལ་པོ་ཞིག་སེང་གེའི་ཁྲི་ལ་བཞུགས་པའི་ཚེ།     ཡུལ་གཞན་ཞིག་ནས་ལེགས་པར་སྦྱངས་པའི་རྣལ་འབྱོར་པ་ཞིག་དེའི་ཐད་དུ་བྱོན་པ་ལ།     རྒྱལ་པོ་ན་རེ།    ཁྱེད་རྒྱལ་ཁམས་ཀུན་ཏུ་འཁྱམས་པ་འདི་ཉོན་རེ་མོངས་གསུངས་པས།      རྣལ་འབྱོར་པ་ན་རེ།      རྒྱལ་པོ་ཉིད་རང་ཉོན་མོངས་ཏེ།     རྒྱལ་སྲིད་ཤོར་གྱིས་དོགས།     འགྲན་ཟླའི་རྒྱལ་པོ་རྒྱལ་གྱིས་དོགས།     འབངས་རྣམས་མ་མགུ་ཞིང་མ་ཐུལ་གྱིས་དོགས་པས་ཉིད་རང་སྡུག་བསྔལ་ལོ།   །     བདག་ནི་མེའི་ནང་དུ་མཆོངས་ཀྱང་མི་འཚིག       དུག་ཟོས་ཀྱང་མི་འཆི།    ན་རྒས་འཆི་བའི་སྡུག་བསྔལ་མེད།     བདག་ལ་གཅུང་གཅེན་གྱི་གདམས་ངག་ཡོད་ཅེས་གསུངས་པ་དང་།     རྒྱལ་པོ་དད་ནས་ཁྱེད་བཞིན་དུ་རྒྱལ་ཁམས་གཞན་དུ་འཁྱམས་པ་ནི་མི་ནུས།      འོན་ཀྱང་རང་གི་རྒྱལ་སར་བསྡད་ནས་བསྒོམ་ནུས་པས་གདམས་ངག་ཅིག་ཞུ་ཞེས་ཕྱག་བྱས་པས།      སློབ་དཔོན་གྱིས་ཀྱེ་རྡོ་རྗེའི་དབང་བསྐུར་ནས་དྲན་པ་རྩེ་གཅིག་པའི་གདམས་ངག་བྱིན་ནས་བསྒོམ་དུ་བཅུག་གོ   །     དེ་ནས་རྒྱལ་པོ་རང་གི་སེང་གེའི་ཁྲི་ཟ་འོག་གི་འབོལ་ལ་བཞུགས།     བཙུན་མོ་དང་བློན་པོའི་ཚོགས་ཀྱིས་རོལ་མོ་སྣ་ཚོགས་བྱེད་པས་མཐའ་བསྐོར་ཞིང་བསྒོམས་པས་མཚན་ཡང་ལོངས་སྤྱོད་པའམ།      སྒེག་པས་ལི་ལ་པ་ཞེས་གྲགས་སོ།   །     གདམས་ངག་དངོས་ནི།     ཕྱག་གཡས་པའི་གསེར་གྱི་གདུ་བུ་ལ་སེམས་མ་ཡེངས་པར་བསྒོམས་པའོ།  །     དེ་ཡང་མི་འགྱུར་བར་འདུག་བྱས་པས་དེའི་ནང་དུ་ཀྱེ་རྡོ་རྗེའི་ལྷ་ཚོགས་བསྒོམ་པའི་གདམས་ངག་བྱིན་པ་དང་།     དེ་ཡང་མི་འགྱུར་བར་འདུག་གོ་ཞེས་བརྟན་པར་གྱུར་ནས།     དེ་ནས་བསྐྱེད་རྫོགས་ཟུང་འཇུག་ཏུ་བསྒོམ་པའི་གདམས་ངག་བྱིན་ནས་བསྒོམས་པས་རྟོགས་པ་རང་ཤུགས་སུ་ཤར་ནས་ཕྱག་རྒྱ་ཆེན་པོའི་དངོས་གྲུབ་ཐོབ་སྟེ་མངོན་ཤེས་ལྔ་ལ་སོགས་པའི་ཡོན་ཏན་དུ་མ་ཐོབ་ནས་འགྲོ་བའི་དོན་དཔག་ཏུ་མེད་པ་མཛད།     ལི་ལ་པའི་རྟོགས་པ་བརྗོད་པ་ནི།      རྣལ་འབྱོར་རྒྱལ་པོ་སེང་གེ་བཞིན།   །མགོ་ལ་གཡུ་མདོག་རལ་པས་བརྒྱན།   །རྣལ་འབྱོར་དབང་ཕྱུག་རིག་སྔགས་འཆང་།    །སེང་གེའི་སྡེར་མོ་བཅུ་དག་གིས།   །གླང་ཆེན་ལ་སོགས་ཤ་རུས་འབྱེད།    ། རྣལ་འབྱོར་ཕ་རོལ་ཕྱིན་བཅུ་ཡིས།   །དེ་དག་མི་མཐུན་ཕྱོགས་ལས་འབྱེད།    །ལི་ལ་པ་ཡིས་རྟོགས་ནས་གྲོལ།   ། ཅེས་གསུངས་སོ།    །མཚན་ཡང་ལི་ལ་ཏ་པ་ཞེས་ཕྱོགས་ཐམས་ཅད་དུ་གྲགས་སོ།   །སློབ་དཔོན་ལི་ལ་པའི་ལོ་རྒྱུས་དང་རྣམ་ཐར་རྫོགས་སོ། །


བརྡ་འགྲེལ་གདོང་འཛར།

ཆོས་ལུགས། མི་སྣ།
སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:1  སྔ་མའི་པར་གཞི།

ཉེ་ཆར་དག་བཅོས།:2015-09-24

གསར་སྤེལ་མཁན། :ལོ་མི་ཆུང་།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།