ལཱུ་ཡི་པ།
མཉམ་སྤྱོད། QQབར་སྟོང་། སིན་ནཱ་ཟིན་ཕྲན། ཐིན་ཞུན་ཟིན་ཕྲན། སྐད་འཕྲིན།

ལཱུ་ཡི་པ།
གྲུབ་ཐོབ་བརྒྱད་ཅུ་རྩ་བཞིའི་ཡ་གྱལ་ཡིན། ཡོངས་གྲགས་སུ་གྲུབ་ཐོབ་བརྒྱད་ཅུ་རྩ་བཞིའམ་བརྒྱད་ཅུ་ཞེས་གྲགས་པ་ནི་བླ་མ་རྡོ་རྗེ་གདན་པས་ཚོགས་འཁོར་མཛད་པའི་དུས་སྐབས་སུ་བྱོན་པའི་གྲུབ་ཐོབ་གྲངས་ལ་བརྒྱད་ཅུ་བྱུང་བར་བརྟེན་ནས་དེ་ལྟར་གྲགས་པ་ཡིན། གྲུབ་ཆེན་བརྒྱད་ཅུ་རྩ་བཞི་དེ་དག་ནི་སྤྱི་ལོའི་དུས་རབས་བདུན་པ་ནས་སྤྱི་ལོའི་དུས་རབས་བཅུ་གཉིས་པའི་མཇུག་བར་ལོ་ངོ་དྲུག་བརྒྱའི་རིང་བྱོན་པའི་སྙན་གྲགས་ཆེ་ཤོས་ཀྱི་གྲུབ་ཐོབ་ཤ་སྟག་ཡིན།
གཞི་རྩའི་གནས་ཚུལ།

ལེགས་སྦྱར་གྱི་སྐད།
ལཱུ་ཨི་པ། ལཱུ་ཡི་པ།
རྟེན།
རྣལ་འབྱོར་པ།
སྤྱོད་པ།
དམན་པའི་ཟས།
ཆ་བྱད།
ཅུང་ཟད་སྐུ་ཤ་སྐེམ་པ་སྔོ་སངས། མདུན་དུ་ཉ་ཡི་རྒྱུ་ལྟོ་སྤུངས་ནས་ཞལ་དུ་གསོལ་བ། རལ་པའི་ཐོར་ཚུག་ཅུང་ཟད་ཡོད་པ་བྲང་སྤུ་དང་བཅས་པ།
བོད་སྐད།
ཉ་ལྟོ་བ།
ཡུལ།
སིང་ག་ལ།
རིགས།
རྒྱལ་པོ།
བླ་མ།
ཆང་ཚོང་མཁའ་འགྲོ་མ།
དངོས་གྲུབ་ཀྱི་རྟེན།
ཉ་ཡི་རྒྱུ་ལྟོ།
གྲུབ་པ་གང་ཐོབ།
ཟུང་འཇུག
1 ​རྣམ་ཐར་མདོར་བསྡུས།

ལཱུ་ཡི་པ(ཉ་ལྟོ་བ)ཞེས་བྱ་བ།      ཉའི་རྒྱུ་མ་ཟོས་པས་རྣལ་འབྱོར་པ་ཉ་ལྟོ་བར་གྲགས་པ་ཡིན་ལ།      དེ་ཡང་སིངྒ་གླིང་གི་རྒྱལ་པོ་ཆེན་པོ་ཞིག་ལ་རྒྱལ་སྲིད་ཀྱི་ཚོགས་རྣམ་ཐོས་ཀྱི་བུ་དང་མཉམ་པ།      རྒྱལ་པོའི་ཁང་བཟང་ཐམས་ཅད་རིན་པོ་ཆེ་གསེར་དངུལ་མུ་ཏིག་ལ་སོགས་པ་དུ་མས་བརྒྱན་ཞིང་འབྲུ་ལ་སོགས་པས་གང་བ་སྲས་ཀྱང་གསུམ་མངའ་བ་ལ།      ཡབ་གཤེགས་ནས་སྲས་བར་པས་རྒྱལ་པོ་བྱས་ནས་རྒྱལ་སྲིད་བརྟན་ཞིང་།      བློན་འབངས་སྐྱིད་པ་ལ་སོགས་པའི་ཡོན་ཏན་མང་པོ་ཡོད་དོ་ཞེས་རྩིས་པ་རྣམས་ཀྱིས་སྨས་པ་དང་།      ཡབ་ཀྱིས་ཀྱང་དེ་ལ་དགོངས་ནས་རྒྱལ་སྲིད་བསྔོས་ཤིང་།     ཐམས་ཅད་ཀྱིས་རྒྱལ་ཚབ་ཏུ་དབང་བསྐུར་བས་གཅེན་དང་།       གཅུང་པོ།      འབངས་ཐམས་ཅད་ཀྱིས་ཀྱང་དབང་བསྐུར་ནས་རྒྱལ་ཚབ་ཏུ་གསོལ་བ་བཏབ་པས་རྒྱལ་བུ་དེ་མ་འདོད་ནས་འབྲོས་པར་བརྩམས་པ་དང་།      མཆེད་འབངས་ཀུན་གྱིས་གསེར་གྱི་སྒྲོག་ཏུ་བཅུག་པས་དེར་རྒྱལ་བུས་འཁོར་སྲུང་ཀུན་ལ་གསེར་དངུལ་གྱི་བརྔན་པ་བྱིན་ནས།       མཚན་མོ་གོས་ཚེམ་བུ་ཅན་གྱོན་ཏེ།      སྐྱེལ་མ་ལའང་གསེར་ལ་སོགས་པའི་བརྔན་པ་བྱིན་ནས་བྲོས།      རྒྱལ་པོ་ར་མ་ནའི་ཡུལ་ར་མེ་ཤྭ་རར་ཕྱིན།      སྟན་དར་ཟབ་ལས་བྱས་པ་བོར་ནས།       ཀྲྀཥྞ་ས་ར་དང་།     རོའི་གདན་བཏིང་།      སྐྲ་ཟིང་།      རྒྱལ་སྲིད་སྤངས་ནས་ཐལ་བའི་ནང་དུ་ཉལ་ལོ།  །     རྒྱལ་བུ་དེ་གཟུགས་བཟང་ཞིང་ལྟ་ན་སྡུག་པས་ཀུན་གྱིས་བཟའ་བ་དང་བཅའ་བ།     བཏུང་བ་ལ་སོགས་པ་མི་བཀྲེས་པར་བྱིན་ནོ།   །     དེ་ནས་རྡོ་རྗེ་གདན་དུ་བྱོན་ནས་ས་པ་ལིའི་པུ་ཊའི་དུར་ཁྲོད་དུ་མཚན་མོ་ཉལ་ཞིང་།      ཉིན་མོ་ཚོང་འདུས་སུ་འཚོ་བ་བསླངས་པས་ཆང་ཚོང་གླིང་གི་གཙོ་མོ་དེ་འཇིག་རྟེན་པའི་རྡོ་རྗེ་མཁའ་འགྲོ་མ་ཡིན་པས།      དེས་རྒྱལ་བུ་ལ་བརྟགས་པས།      འདིའི་འཁོར་ལོ་བཞི་ལ་སོགས་པའི་དྲི་མ་གཞན་ཐམས་ཅད་དག་ཀྱང་།      སྙིང་ག་ན་རིགས་ཀྱི་རྟོག་པ་སྲན་མ་ཙམ་ཞིག་མ་དག་པར་འདུག་ཟེར་རོ།   །དེ་ནས་དེ་སྦྱང་བའི་ཕྱིར་བུད་མེད་དེས་རྫ་མའི་སྣོད་དུ་ཟས་རུལ་པ་བླུགས་ནས་བྱིན་པ་ལ།     རྒྱལ་བུས་བསྐྱུར་བ་དང་མཁའ་འགྲོ་མ་དེ་ཁྲོས་ནས་ཁྱོད་ཀྱིས་ཟས་བཟང་ངན་གྱི་རྣམ་པར་རྟོག་པ་མ་སྤངས་ན་ཆོས་ག་ལ་ཡོང་ཞེས་སྨྲས་པས།      དེ་ལ་རྣམ་རྟོག་དང་མཚན་མ་ནི་བྱང་ཆུབ་ཀྱི་གེགས་སུ་འདུག་སྙམ་དུ་ཤེས་ནས།      རྒྱལ་བུས་རྣམ་རྟོག་དང་མཚན་མ་སྤངས་ཏེ་ཆུ་བོ་གངྒཱའི་འགྲམ་དུ་ཉ་བསད་པའི་རྒྱུ་ལྟོ་ས་ལ་བསྐྱུར་བ་རྣམས་བླངས་ནས་དེས་འཚོ་བ་བྱས་ཏེ་ལོ་བཅུ་གཉིས་བསྒོམས་པས་གྲུབ་པ་ཐོབ་བོ།   །མཚན་ཡང་ལཱུ་ཡི་པར་གྲགས་སོ།   ། ལཱུ་ཡི་པའི་རྟོགས་བརྗོད་ནི།      ཁྱི་རྒན་མི་བསྲུན་སྣ་ལ་སྦྲང་རྩི་བསྐུས་པས་ཕྱོགས་རྣམས་ཀུན་ཏུ་ཟ་བར་བྱེད།   །བློ་དམན་སྐལ་མེད་དག་ལ་བླ་མའི་གདམས་ངག་བྱིན་པས་རང་རྒྱུད་མ་ལུས་བསྲེགས།   །གླང་ཆེན་མྱོས་པའི་སྣ་ལ་རལ་གྲི་བཏགས་ནས་ཕྱོགས་ཀུན་ཉུལ་བས་དགྲ་དཔུང་འཇོམས།   །སྐལ་བཟང་སྐྱེ་མེད་རྟོགས་པ་བདག་ནི་སྣང་བ་ཐུག་ཕྲད་དག་གི་རྣམ་རྟོག་འཇོམས།    །ཞེས་གསུངས་སོ། །


བརྡ་འགྲེལ་གདོང་འཛར།

མི་སྣ། ལོ་རྒྱུས་མི་སྣ། ལཱུ་ཡི་པ།
སྡུད་པ། འགྲེམ་པ།
འབྲེལ་ཡོད་འོས་སྦྱོར།
བརྡ་འགྲེལ་སྡོམ་རྩིས།

ཀློག་གྲངས། : 0

རྩོམ་སྒྲིག་ཁ་གྲངས།:4  སྔ་མའི་པར་གཞི།

ཉེ་ཆར་དག་བཅོས།:2015-12-16

གསར་སྤེལ་མཁན། :གཡང་སྒྲོལ་མ།

བརྡ་འགྲེལ་འདིའི་རྩོམ་སྒྲིག་པ།
རིགས་འགྲེ་བརྡ་འགྲེལ།