བསམ་གཏན་རྣམ་རྒྱལ།སྔ་མའི་པར་གཞི་དེ སྦྱིན་པ། ནས 2019-03-14 14:44ལ་འགྲུབ།
བསམ་གཏན་རྣམ་རྒྱལ།
བསམ་གཏན་རྣམ་རྒྱལ།
སྐྱུ་རའི་བསམ་གཏན་རྣམ་རྒྱལ་ལམ། ཀུན་བཤད་ཀྱི་མིང་མཚོ་བྱུང་བཞད་པའི་གེ་སར་ལགས་ནི་འཇའ་ཐང་པད་མ་གཡས་འཁྱིལ་གྱི་གོང་བ་ཤར་ཟླ་དཀར་པོའི་ཀླུང་འགྲམ། འབྲོང་རྫོང་ཐུལ་བ་ཞེས་པའི་ས་གནས་སུ་སྐུ་འཁྲུངས། རང་ལོ་བཅུ་གསུམ་ཐོག་སྒྲུབ་བརྒྱུད་དགོན་དུ་ཚོགས་ཞུགས་གནང་། མཁན་རིན་པོ་ཆེ་བསྟན་པ་རྣམ་རྒྱལ་དང་དགེ་སློང་བསྟན་འཕེལ་རིན་པོ་ཆེ་སོགས་སློབ་དཔོན་དུ་བསྟེན་ཏེ་སྙན་གཞུང་དང་བྱམས་ཆོས་སྡེ་ལྔ་སོགས་ཐུན་མོང་དང་ཐུན་མིན་རིག་གནས་དག་ལ་སྦྱངས་པ་གནང་། སྤྱི་ལོ1958ལོར་དུས་ཟིང་གི་དབང་གིས་དགོན་པ་དང་བྲལ་ཏེ་ངལ་རྩོལ་ལ་ཞུགས། སྤྱི་ལོ1980ལོར་ཡུལ་ཤུལ་ཁུལ་མི་རིགས་དགེ་འོས་སློབ་གྲྭས་ཆེད་མངགས་གདན་ཞུས་ལྟར་དགེ་རྒན་གནང་སྟེ་མི་རིགས་རང་ཉིད་ཀྱི་རིག་གནས་ཉམས་གསོའི་ཐུགས་ཁུར་ཆེ་བཞེས་མཛད། སྤྱི་ལོ1983ལོར་འཆད་ཁྲིད་དགེ་རྒན་གྱི་གོ་མིང་ཐོབ་པ་མ་ཟད། སྤྱི་ལོ1986ལོར་མཐོ་རིམ་འཆད་ཁྲིད་དགེ་རྒན་གྱི་གོ་མིང་ཐོབ་པ་དང་། རྒྱལ་ཡོངས་སློབ་གསོའི་འཐབ་ཕྱོགས་ཀྱི་ངལ་རྩོལ་དཔེ་ལེགས་ཅན་དང་། མི་དམངས་ཀྱི་དགེ་རྒན་ཞེས་པའི་གཟིག་ལྡན་དཔང་རྟགས་ཐོབ། མཚོ་སྔོན་ཞིང་ཆེན་སྲིད་གྲོས་ཨུ་ཡོན་ལྷན་ཁང་སྐབས་བདུན་པ་བརྒྱད་པ་དགུ་པ་བཅས་ཀྱི་ཨུ་ཡོན་བདམས་ཐོན་བྱུང་། གསུང་རྩོམ་གཅེས་བཏུས་པོད་ལྔ་བཞུགས།
གཞི་རྩའི་གནས་ཚུལ།
རྒྱ་ཡིག་གི་མིང་།
居日 桑德昂江
དབྱིན་ཡིག་གི་མིང་།
Samten Namgyal
འཁྲུངས་ལོ།
1934
འཁྲུངས་ཡུལ།
འབྲོང་རྫོང་ཐུལ་བ།
ཡབ་མིང་།
སྐྱུ་རའི་འཇིགས་བྱེད་སྐྱབས།
ཡུམ་མིང་།
གེད་ཆུང་རིག་སྐྱིད།
དཀར་ཆག
1
ངོ་སྤྲོད།
སྐྱུ་རའི་བསམ་གཏན་རྣམ་རྒྱལ་ནི་རང་བྱུང་བཅུ་དྲུག་པའི་དངོས་པོ་ཞེས་པ་ཤིང་ཕོ་ཁྱིའི་ལོའི་ཟླ་བཅུ་གཅིག་པའི་ཚེས་བཅུ་བདུན་ཏེ་ཉི་མ་བྱང་བགྲོད་ཀྱི་དུས་ཚེས་བཟང་པོར་འཇའ་ཐང་པད་མ་གཡས་འཁྱིལ་གྱི་གོང་བ། ཤར་ཟླ་དཀར་པོའི་ཀླུང་འགྲམ། འབྲོང་རྫོང་ཐུལ་བ་ཞེས་པའི་ས་གནས་སུ། ཕ་སྐྱུ་རའི་འཇིགས་བྱེད་སྐྱབས་དང་། མ་གེད་ཆུང་རིག་སྐྱིད་ཟེར་བ་གཉིས་ཀྱི་བུ་རུ་སྐྱེས། རང་ལོ་ལྔ་ཡི་ཐོག་ནས་ཀ་ཁ་སློབ་པའི་དབུ་བཙུགས། རང་ལོ་བརྒྱད་ཀྱི་ཐོག་ཉིན་ཐག་ཆེས་ཐུང་བ་དགུན་ལོ་སར་ཟླ་བའི་ནང་། ཉི་མ་རེ་ལ་བཀའ་འགྱུར་དུམ་པ་རེ་སྒྲ་དག་སྒྲོས་གཙང་གི་སྒོ་ནས་ཀློག་ཐུབ་པར་བྱུང་། དེ་ནས་སྒྲུབ་བརྒྱུད་དགོན་གྱི་མཁན་རིན་པོ་ཆེ་བསྟན་པ་རྣམ་རྒྱལ་དང་། ངེས་པ་དོན་གྱི་རྣམ་འབྱོར་པ་ཆེན་པོ་ལས་རབ་རིན་པོ་ཆེ་དང་། མདོའི་མཁྱེན་བརྩེའི་ཡང་སྲིད་པད་མ་འོད་གསལ་བཅས་ཀྱི་མདུན་ནས་དབང་ལུང་མན་ངག་ཟབ་མོ་ཞུས་ནས་རང་ལོ་དགུ་ནས་བཅུ་གསུམ་གྱི་བར་དུ་བཅད་རྒྱར་བཞུགས་ཏེ། སྒྲོལ་དཀར་ཡིད་བཞིན་འཁོར་ལོའི་ཚེ་སྒྲུབ་དང་། འཇམ་དཔལ་སྨྲ་བའི་སེང་གེའི་སྒྲུབ་ཐབས། ཀློང་ཆེན་སྙིང་ཐིག་གི་སྔོན་འགྲོ་འབུམ་ལྔ་བཅས་བཞག དེ་ནས་རང་ལོ་བཅུ་གསུམ་ཐོག་སྒྲུབ་བརྒྱུད་དགོན་དུ་ཚོགས་ཞུགས་བྱས། དེའི་དུས་ནས་འཚོ་མཛད་ཆེན་པོ་རིག་འཛིན་ཚེ་དབང་དང་། དུས་ཞབས་པ་ཡོངས་འཛིན་བཀའ་དྲིན་ཅན་དགེ་སློང་བསྟན་འཕེལ་རིན་པོ་ཆེ། ཆོས་མཛད་སྐུ་ཆེན་འཇིགས་མེད་ཆོས་དབང་བློ་གྲོས། ལྷོ་སྐྱབས་མགོན་རིན་པོ་ཆེ་མཁའ་ཁྱབ་རྡོ་རྗེ་དང་། རིག་འཛིན་འོད་གསལ་རྡོ་རྗེ། སྒྲུབ་སྤྲུལ་བརྒྱད་པ་དཀོན་མཆོག་བསྟན་འཛིན་ཐུབ་བསྟན་རྒྱལ་མཚན་རིན་པོ་ཆེ་དང་། གནས་ལྔ་རིག་པའི་པཎ་ཌི་ཏ་མཁན་ཆེན་ཐུབ་བསྟན་འོད་ཟེར། ལྕང་མ་རི་ཁྲོད་ཀྱི་མཁན་ཆེན་རྒྱ་མཚོ་རིན་པོ་ཆེ་སོགས་ཀྱི་མདུན་ནས་སུམ་རྟགས་དག་གསུམ་དང་། རྩིས་དཀར་ནག་གསོ་རིག་རྒྱུད་བཞི། སྒྲ་དབྱངས་ཅན་མ། སྙན་ངག་དན་ཊིའི་དགོངས་རྒྱན་སོགས་ཐུན་མོང་རིག་པའི་གནས་རྣམས་སྦྱངས་པ་མཐིལ་རྟོགས་པར་བྱས། ཁྱད་པར་དུ་རྒྱལ་སྲས་ཞི་བ་ལྷའི་སྤྱོད་འཇུག་གཙོས་དབུ་མ་རྩ་འཇུག་བཞི་གསུམ་དང་། མངོན་པ་གོང་འོག བྱམས་ཆོས་སྡེ་ལྔ་སོགས་མདོ་ཕྱོགས་ཀྱི་གཞུང་ཆེན་མོ་རྣམས་དང་། ཁྱད་པར་དུའང་རིགས་་ཀྱི་བདག་པོ་རྩ་བའི་བླ་མ་རྫ་དཔལ་སྤྲུལ་རིན་པོ་ཆེ། ༧རིག་འཛིན་ནམ་མཁའ་འཇིགས་མེད་ཀྱིས་ཐུགས་རྗེས་རྗེས་སུ་བཟུང་སྟེ། རིམ་དགུའི་ཐེག་པའི་ཡང་རྩེ་མན་ངག་རྫོགས་པ་ཆེན་པོའི་ལམ་ཁྲིད། ཁྲེག་ཆོད་ཀ་དག་གི་དགོངས་པ་དང་། ལྷུན་གྲུབ་ཐོད་རྒལ་གྱི་མན་ངག་མུན་ཁྲིད་དང་བཅས་པ་ཡོངས་སུ་རྫོགས་པའི་བཀའ་དྲིན་བསམ་ལས་འདས་པ་བསྩལ། དེ་ནས་རང་ལོ་ཉེར་ལྔ་པ་རྣམ་འཕྱང་ཞེས་པ་ས་ཕོ་ཁྱི། སྤྱི་ལོ1958ལོར། དུས་ཟིང་གི་དབང་གིས་དགོན་པ་དང་བྲལ་ཏེ་ངལ་རྩོལ་ལ་ཞུགས།
2
མཛད་འཕྲིན།
སླར་ཡང་། དྲག་པོ་ལྕགས་སྤྲེལ་ལོ་སྟེ། སྤྱི་ལོ1980ལོར། ཡུལ་ཤུལ་ཁུལ་མི་རིགས་དགེ་འོས་སློབ་གྲྭས་ཆེད་མངགས་གདན་འདྲེན་བྱས། དེའི་སྐབས་ཁོང་ལ་སྙིང་བརྩེ་བའི་མཛའ་བཤེས་རྣམས་ཀྱིས། ཁྱོད་ན་ཚོད་གཞོན་པའི་དུས་སུ་དོན་ཅི་ཡང་མ་འགྲུབ་ན། ད་རྒས་པའི་གྲོང་སྒོར་སླེབས་པའི་དུས། རྒྱལ་ཁབ་ཀྱི་བྱ་བ་འགྲུབ་ཀྱི་མ་རེད། དེ་བས་རང་ཁྱིམ་དུ་སྡོད་ལ་ཁ་ཏོན་དགེ་སྦྱོར་རེ་ཨེ་འགྲུབ་བལྟས་ན་དགའ་ངེས་རེད། ཅེས་པའི་བསླབ་བྱ་ཡང་ཡང་བྱས། ཡིན་ནའང་ཁོང་གིས་རྒྱལ་ཁབ་གྱི་ལས་བྱེད་པ་བྱས་ཏེ་རྒྱུ་ནོར་མང་ཙམ་གསོག་པའམ་ཡང་ན་གོ་གནས་ངེས་ཅན་ཞིག་ཐོབ་ཐུབ་པའི་རེ་བ་གཏན་ནས་ཡིད་ལ་ཤར་མ་མྱོང་། དེ་བས་ཁོང་གིས་དགོངས་ཚུལ་ནི་ཤེས་ཡོན་ཅུང་ཟད་བསླབས་ཡོད་པ་དེ་མི་རིགས་རང་ཉིད་ཀྱི་རིག་གནས་ཉམས་གསོ་བྱ་བའི་ཆེད་དུ་ཕུལ་ཏེ། ཁོང་ཉིད་ལ་ཐུགས་བརྩེ་བ་ཕ་མས་བུ་བརྒྱུད་བཞིན་དུ་བསྐྱངས་པའི་མཁན་སློབ་དགེ་བའི་བཤེས་གཉེན་རྣམས་ཀྱི་དགོངས་པ་རྫོགས་པ་ཞིག་ཨེ་ཡོང་སྙམ་པའི་རེ་འདུན་ལྡོག་ཏུ་མེད་པ་དམ་པོར་བཅངས་ཏེ་དང་དུ་བླངས་ནས་བྱོན། དེ་ནས་བཟུང་འབྲིང་རིམ་ཆེད་ལས་སློབ་འབྲིང་གི་སློབ་མ་དང་། ཡུལ་ཤུལ་ཁུལ་རྫོང་ཁག་སོ་སོའི་སློབ་གྲྭ་ཆུང་འབྲིང་གི་དགེ་རྒན་ཟབ་སྦྱོང་འཛིན་གྲྭ་ཐེངས་དུ་མར་སློབ་ཁྲིད་གནང་པ་མ་ཟད། མཚོ་སྔོན་མི་རིགས་སློབ་གྲྭ་ཆེན་མོ་ཡུལ་ཤུལ་བོད་ཡིག་འཛིན་གྲྭ་དང་། ཡུལ་ཤུལ་དྭ་ཕྲུག་བོད་སྨན་སློབ་གྲྭ་བཅས་ལ། སུམ་རྟགས་དག་གསུམ་དང་། སྙན་ངག གནའ་རྩོམ་གཅེས་བཏུས། སྔགས་ཀྱི་ཀློག་ཐབས་དང་། སྒྲ་དང་ཚད་མ་སོགས་སློབ་ཁྲིད་བྱས་ཤིང་། དུས་མཚུངས་སུ་རང་སྐྱོང་ཁུལ་གྱིས་བསྡུས་པའི་དགོན་སྡེ་སོ་སོའི་བླ་སྤྲུལ་དང་གྲྭ་ཚང་མང་པོ་ལ་སློབ་ཁྲིད་བྱས་པ་དང་། དགོན་པ་ཁག་གི་བཤད་གྲྭས་གདན་འདྲེན་བྱས་པ་བཞིན་ཕྱིན་ཏེ་སློབ་ཁྲིད་ཐེངས་མང་པོ་བྱས། ད་ལྟ་ཡུལ་ཤུལ་ས་ཁུལ་གྱི་བླ་སྤྲུལ་གསར་གྲས་རྣམས་ཁོང་གི་སློབ་ཁྲིད་ལ་གསན་མ་མྱོང་པ་ཕལ་ཆེར་མེད།
3
གྲུབ་འབྲས།
དེ་ནས་སྤྱི་ལོ1983ལོར་འཆད་ཁྲིད་དགེ་རྒན་གྱི་གོ་མིང་ཐོབ་པ་མ་ཟད། སྤྱི་ལོ1986ལོར་མཐོ་རིམ་འཆད་ཁྲིད་དགེ་རྒན་གྱི་གོ་མིང་ཐོབ་པ་དང་། རྒྱལ་ཡོངས་སློབ་གསོའི་འཐབ་ཕྱོགས་ཀྱི་ངལ་རྩོལ་དཔེ་ལེགས་ཅན་དང་། མི་དམངས་ཀྱི་དགེ་རྒན་ཞེས་པའི་གཟིག་ལྡན་དཔང་རྟགས་ཐོབ། མཚོ་སྔོན་ཞིང་ཆེན་སྲིད་གྲོས་ཨུ་ཡོན་ལྷན་ཁང་སྐབས་བདུན་པ་བརྒྱད་པ་དགུ་པ་བཅས་ཀྱི་ཨུ་ཡོན་བདམས་ཐོན་བྱུང་། ཉེ་ལམ་ཁོང་གི་ཤེས་ཡོན་མཐོར་འདེགས་ཆེད་དུ་དམིགས་ཏེ། རྒྱལ་སྲས་ཕྲིན་ལས་ཀུན་ཁྱབ་དང་། ངག་དབང་མཐུ་སྟོབས། ཚུལ་ཁྲིམས་བསྟན་འཛིན་རིན་པོ་ཆེ་དང་། ཨ་རིག་མཁན་ཆེན་པད་མ་ཚེ་དབང་ལྷུན་འགྲུབ་དང་། ཁང་སར་བསྟན་པའི་དབང་ཕྱུག་རིན་པོ་ཆེ་སོགས་མཁས་གྲུབ་གཉིས་ལྡན་ཀྱི་སྐྱེས་ཆེན་དམ་པ་རྣམས་ཀྱི་གསུང་གི་བདུད་རྩི་མནོས། སྔ་རྗེས་སུ་མཚོ་སྔོན་དུས་དེབ་སྦྲང་ཆར་དང་ཡུལ་ཤུལ་གྱི་གཙང་གསུམ་དང་། སྐྱ་རེངས་དང་། གངས་རིའི་རང་མདངས་དང་། སྒྲུབ་བརྒྱུད་དང་། འཇའ་ཐང་སོགས་དུས་དེབ་དང་རྩོམ་དེབ་སྣ་ཚོགས་ཀྱི་ནང་དུ། རྫོགས་ལྡན་གསར་པ་མགྲོན་དུ་བསུ་ཞེས་པ་དང་། རང་ལ་དྲན་སྐུལ་གྱི་གསལ་འདེབས་དང་། སྙིང་རྩ་ལས་བྱུང་བའི་ཟུངས་ཁྲག་ཅེས་དང་། ཁོར་ཡུག་སློབ་གསོ་ཞེས་པ་དང་། ངུ་མ་དགོད་ཀྱི་གླུ་སྒྲ་ཞེས་པ་སོགས་བཀོད་ཡོད་ལ། གཞན་ཡང་རང་མཉམ་རྣམས་ལ་ཕན་པའི་ངག་དང་། མཇལ་བ་པོ་རྣམས་ལ་ཕན་པའི་ངག་དང་། སྙིང་གཏམ་ཉི་ཤུ་པ་དང་། སྒྲུབ་བརྒྱུད་ཆོས་ཀྱི་ཉི་མ་གསེར་ཁྲིར་མངའ་གསོལ་སྐབས་ཀྱི་གཏམ་བཤད་དང་། བླ་མ་མཆོད་པའི་ལས་ཚོགས་མཆོག་སྤྲུལ་མངའ་གསོལ་གྱི་ཆོ་ག་དང་། མངའ་གསོལ་སྐབས་ཀྱི་འབུལ་བཤད་དང་། རྒྱ་ནག་མ་ཎི་ཉམས་གསོ་གསར་བཞེངས་ཀྱི་མཚམས་སྦྱོར་དང་། གྲུབ་དབང་སྒྲུབ་བརྒྱུད་རིན་པོ་ཆེ་སྐུ་ཕྲེང་རིམ་བྱོན་གྱི་རྣམ་ཐར་རྫོགས་ལྡན་གསར་པའི་དགའ་སྟོན་ཞེས་པ་དང་། བླ་མའི་སྒྲུབ་ཐབས་བྱིན་རླབས་སྤྲིན་ཕུང་ཞེས་བྱ་བ་དང་། བརྡ་སྤྲོད་སྐོར་གྱི་དཀའ་གནད་རང་ལྟོས་སློབ་བུ་རྣམས་ལ་ཕན་པའི་ངག་ཅེས་པ་དང་། སྙན་ངག་གི་རྣམ་བཤད་བློ་གསལ་མགུལ་རྒྱན་ཞེས་པ་སོགས་དང་། ད་ལྟ་ལོ་རུ་སྒར་པ་དགོན་འབྲུག་རྒྱས་ཆོས་འཁོར་གླིང་གི་བྱུང་བ་བརྗོད་པ་གཡའ་བྲལ་དངུལ་དཀར་མེ་ལོང་ཞེས་པ་དང་། རྒྱལ་སྲས་ལག་ལེན་གྱི་འགྲེལ་པ་ལམ་སྟོན་སྒྲོན་མེ་སོགས་རྩོམ་ཡིག་རིང་ཐུང་མང་པོ་ཞིག་བཞུགས་ཡོད་ཅིང་། སྤྱི་ལོ2017ལོར་སི་ཁྲོན་མི་རིགས་དཔེ་སྐྲུན་ཁང་ནས་ཁོང་གི་གསུང་རྩོམ་གཅེས་བཏུས་འདོད་འཇོའི་བུམ་བཟང་ཞེས་བྱ་བའི་པོད་ལྔ་དཔར་དུ་བསྐྲུན་ཡོད། ལས་འཁྱུར་ངལ་གསོ་བྱས་པའི་རྗེས་སུའང་། རིན་མེད་ཀྱི་བླ་སྤྲུལ་དང་གྲྭ་བཙུན། ལས་བྱེད་པ་དང་སློབ་མ། སྤྱི་ཚོགས་སྟེང་གི་མི་སྣ་སོགས་མོས་པ་ཡོད་པ་སུ་དང་སུ་ཡིན་ཡང་ཁོང་གིས་འཇོན་ཚོད་ཀྱིས་སློབ་ཁྲིད་བྱེད་བཞིན་པ་ཡིན་པས། ཁོང་གི་ཁྱིམ་ནི་སློབ་ཁང་ཡིན་པ་མ་ཟད། གཞུང་ལས་ཁང་ཡང་ཡིན་ལ། ཡིན་ནའང་ཁོང་ལ་དཀའ་སྣང་དང་འཚེར་སྣང་སྤུ་ཙམ་མེད་པར་དགའ་བའི་ཉམས་དང་དགོད་པའི་འཛུམ་དང་ལྡན་པའི་ངང་ནས་བཞུགས་ཡོད་དོ། །