དབྱིན་ཇི་བཙན་རྒྱལ་ཆེན་མོ་ནི་དུས་རབས18པ་ནས་དུས་རབས19བར་གྱི་དབྱིན་ཇི་ལ་གོ་དགོས་ཏེ། དུས་རབས17པར་དབྱིན་ཇིས་ཐོག་མར་འབྱོར་ལྡན་གྲལ་རིམ་གྱི་གསར་བརྗེ་ལ་བརྟེན་ནས་འབྱོར་ལྡན་གྲལ་རིམ་རྩ་ཁྲིམས་ཀྱིས་བཅད་པའི་རྒྱལ་བོའི་ལམ་ལུགས་བཙུགས་པ་དང་། དེའི་རྗེས་སུ་དབྱིན་ཇིས་ནུས་ཤུགས་ཡོད་རྒུ་བཏོན་ཏེ་དཔལ་འབྱོར་འཕེལ་རྒྱས་བཏང་ཞིང་། ཕྱི་ཕྱོགས་སུ་ཉོ་ཚོང་གི་བྱེད་སྒོ་རྒྱ་ཆེར་སྤེལ་བ་དང་མི་སེར་སྤེལ་ཡུལ་འཕྲོག་རྩོད་བྱས། དབྱིན་ཇིས་སྔ་ཕྱིར་ཧོ་ལན་དང་ཧྥ་རན་སི་ལ་མི་སེར་སྤེལ་ཡུལ་དང་ཉོ་ཚོང་ཁྱད་དབང་འཕྲོག་རྩོད་ཀྱི་དམག་འཁྲུག་ཐེངས་མང་བསླངས་པ་དང་། དུས་རབས18པར་སླེབས་དུས། དབྱིན་ཇི་ནི་མཚོ་དམག་གི་སྟོབས་ལྡན་རྒྱལ་ཁབ་ཅིག་ཏུ་གྱུར་ཅིང་། འཛམ་གླིང་ཡོངས་ཀྱི་མཚོ་དབང་བདག་ཏུ་བཟུང་ཡོད། དུས་རབས18པའི་དུས་མཇུག་ཏུ། དབྱིན་ཇིས་ཐོག་མར་བཟོ་ལས་གསར་བརྗེ་སྤེལ་བ་དང་། དུས་རབས19བའི་དུས་དཀྱིལ་དུ་སླེབས་དུས། དབྱིན་ཇི་དེ་ཉིད་འཛམ་གླིང་གི་བཟོ་ལས་ཅན་གྱི་རྒྱལ་ཁབ་དང་བོར་གྱུར་ཡོད། དུས་རབས16པ་ནས་དུས་རབས19བར། དབྱིན་ཇིས་དུས་རབས་གསུམ་རིང་གི་མི་སེར་འཕྲོག་རྩོད་དང་རྒྱ་བསྐྱེད་ནས་འཛམ་གླིང་གི་མི་སེར་སྤེལ་ཡུལ་གྱི་སྟོབས་ལྡན་རྒྱལ་ཁབ་ཏུ་གྱུར་བ་དང་། དེའི་མི་སེར་སྤེལ་ཡུལ་ཡང་འཛམ་གླིང་གི་གྲུ་ཁ་སོ་སོར་ཁྱབ་ཡོད་པས། ཉི་མ་མི་ནུབ་པའི་བཙན་རྒྱལ་ཞེས་བརྗོད། འོན་ཀྱང་། དུས་རབས20བར་སླེབས་པའི་རྗེས་སུ། ཨ་རི་དང་འཇར་མན་སྟོབས་ལྡན་དུ་གྱུར་བ་དང་དབྱིན་ཇིའི་བཙན་བདག་གི་གོ་གནས་ལའང་ཉེན་ཚབས་ཆེན་པོ་བྱུང་ཞིང་། འཛམ་གླིང་འཁྲུག་ཆེན་ཐེངས་དང་པོའི་རྗེས་སུ། དབྱིན་ཇིའི་མི་སེར་སྤེལ་ཡུལ་རྣམས་སྔ་ཕྱིར་རང་བཙན་བྱས་ཏེ་འཛམ་གླིང་དཔལ་འབྱོར་གྱི་ལྟེ་བའང་ཨ་མེ་རི་ཁའི་ཕྱོགས་སུ་བསྒྱུར།