གཏོར་བཤིག་རང་བཞིན་གྱི་ས་ཡོམ་འཕྲལ་བསྟུན་སྲོལ་ཡིགསྔ་མའི་པར་གཞི་དེ བསེ་ཆང་རྡོ་རིན། ནས 2023-12-26 10:28ལ་འགྲུབ།
གཏོར་བཤིག་རང་བཞིན་གྱི་ས་ཡོམ་འཕྲལ་བསྟུན་སྲོལ་ཡིག
གཏོར་བཤིག་རང་བཞིན་གྱི་ས་ཡོམ་འཕྲལ་བསྟུན་སྲོལ་ཡིག
《གཏོར་བཤིག་རང་བཞིན་གྱི་ས་ཡོམ་འཕྲལ་བསྟུན་སྲོལ་ཡིག》ནི་གཏོར་བཤིག་རང་བཞིན་གྱི་ས་ཡོམ་འཕྲལ་བསྟུན་བྱེད་སྒོར་དོ་དམ་བྱེད་ཤུགས་ཆེ་རུ་བཏང་ནས་ས་ཡོམ་གནོད་འཚེའི་གྱོང་གུན་ཆུང་དུ་གཏོང་བ་དང་། རྒྱལ་ཁབ་ཀྱི་རྒྱུ་ནོར་དང་སྤྱི་དམངས་ཀྱི་མི་ལུས་དང་རྒྱུ་ནོར་བདེ་འཇགས་འགན་ལེན་བྱེད་པ། སྤྱི་ཚོགས་ཀྱི་སྒྲིག་ལམ་སྲུང་སྐྱོང་བྱེད་པ་བཅས་ཀྱི་ཆེད་དུ་གཏན་འབེབས་བྱས་པའི་སྲོལ་ཡིག་ཅིག་ཡིན། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་སྲིད་སྤྱི་ཁྱབ་ཁང་གི་བཀའ་རྒྱ་ཨང172པའི་ཐོག་སྤྱི་བསྒྲགས་བྱས་ཤིང་། སྤྱི་ལོ1995ལོའི་ཟླ4པའི་ཚེས1ཉིན་ནས་ལག་བསྟར་བྱེད་དགོས།
གཞི་རྩའི་གནས་ཚུལ།
རྒྱ་ཡིག་གི་མིང་།
破坏性地震应急条例
འགྲེམ་གཏོང་ཡིག་ཨང་།
ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་སྲིད་སྤྱི་ཁྱབ་ཁང་གི་བཀའ་རྒྱ་ཨང172པ།
ལག་བསྟར་དུས་ཚོད།
སྤྱི་ལོ1995ལོའི་ཟླ4པའི་ཚེས1ཉིན།
བཟོ་བཅོས་དུས་ཚོད།
སྤྱི་ལོ2011ལོའི་ཟླ1པོའི་ཚེས8ཉིན།
1
བཟོ་བཅོས་ཆ་འཕྲིན།
སྤྱི་ལོ2011ལོའི་ཟླ1པོའི་ཚེས8ཉིན《སྲིད་འཛིན་ཁྲིམས་སྲོལ་ཁག་གཅིག་མེད་པར་བཟོ་བ་དང་བཟོ་བཅོས་རྒྱག་རྒྱུའི་སྐོར་གྱི་རྒྱལ་སྲིད་སྤྱི་ཁྱབ་ཁང་གི་གཏན་འབེབས》（ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་སྲིད་སྤྱི་ཁྱབ་ཁང་གི་བཀའ་རྒྱ་ཨང588པ）གཞིར་བཟུང་བཟོ་བཅོས་བརྒྱབ་ནས《གཏོར་བཤིག་རང་བཞིན་གྱི་ས་ཡོམ་འཕྲལ་བསྟུན་སྲོལ་ཡིག》གི་དོན་ཚན་སོ་བདུན་པའི་ནང་དྲངས་པའི“བདེ་འཇགས་དོ་དམ་གྱི་ཆད་པ་གཅོད་ཕྱོགས་སྐོར་གྱི་སྲོལ་ཡིག”དེ“བདེ་འཇགས་དོ་དམ་གྱི་ཆད་པ་གཅོད་ཕྱོགས་སྐོར་གྱི་བཅའ་ཁྲིམས”ཞེས་པར་བཟོ་བཅོས་བརྒྱབ་ཡོད། སྤྱི་བསྒྲགས་བྱས་ཉིན་ནས་ལག་བསྟར་བྱེད་དགོས།
2
སྲོལ་ཡིག་ཆ་ཚང་།
གཏོར་བཤིག་རང་བཞིན་གྱི་ས་ཡོམ་འཕྲལ་བསྟུན་སྲོལ་ཡིག
སྤྱི་ལོ1995ལོའི་ཟླ2པའི་ཚེ11ཉིན་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་སྲིད་སྤྱི་ཁྱབ་ཁང་གི་བཀའ་རྒྱ་ཨང172པའི་ཐོག་ཁྱབ་བསྒྲགས་བྱས་པ་དང་། སྤྱི་ལོ2011ལོའི་ཟླ1པོའི་ཚེས8ཉིན《རྒྱལ་སྲིད་སྤྱི་ཁྱབ་ཁང་གི་སྲིད་འཛིན་ཁྲིམས་སྲོལ་ཁག་གཅིག་མེད་པར་བཟོ་བ་དང་བཟོ་བཅོས་རྒྱག་རྒྱུའི་སྐོར་གྱི་གཏན་འབེབས》གཞིར་བཟུང་བཟོ་བཅོས་བྱས།
ལེའུ་དང་པོ། སྤྱིའི་དོན་ཚན།
དོན་ཚན་དང་པོ། གཏོར་བཤིག་རང་བཞིན་གྱི་ས་ཡོམ་བྱུང་དུས་ཀྱི་འཕྲལ་བསྟུན་བྱེད་སྒོ་དོ་དམ་བྱེད་ཤུགས་ཆེ་རུ་གཏོང་བ་དང་། ས་ཡོམ་གྱི་གནོད་འཚེའི་གྱོང་གུན་ཆུང་དུ་གཏོང་བ། རྒྱལ་ཁབ་ཀྱི་རྒྱུ་ནོར་དང་སྤྱི་དམངས་ཀྱི་ལུས་ཁམས་དང་རྒྱུ་ནོར་བདེ་འཇགས་ཡོང་བར་འགན་སྲུང་། སྤྱི་ཚོགས་ཀྱི་སྒྲིག་ལམ་སྲུང་སྐྱོང་བཅས་བྱེད་ཆེད་སྲོལ་ཡིག་འདི་བཟོས་པ་ཡིན།
དོན་ཚན་གཉིས་པ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མངའ་ཁོངས་སུ་གཏོར་བཤིག་རང་བཞིན་གྱི་ས་ཡོམ་བྱུང་དུས་ཀྱི་དགོས་མཁོ་མྱུར་སྒྲུབ་བྱེད་པའི་བྱེད་སྒོ་སྤེལ་ན། ངེས་པར་དུ་སྲོལ་ཡིག་འདིར་བརྩི་སྲུང་ཞུ་དགོས།
དོན་ཚན་གསུམ་པ། ས་ཡོམ་འབྱུང་སྐབས་ཀྱི་འཕྲལ་བསྟུན་ལས་ཀར་སྲིད་གཞུང་གིས་མགོ་ཁྲིད་དང་། གཅིག་གྱུར་དོ་དམ། རིམ་པ་དང་སྡེ་ཁག་སོ་སོས་འགན་འཁུར་བ་བཅས་ཀྱི་རྩ་དོན་ལག་བསྟར་བྱེད་དགོས།
དོན་ཚན་བཞི་པ། མི་དམངས་སྲིད་གཞུང་རིམ་པ་སོ་སོས་ས་ཡོམ་འབྱུང་སྐབས་ཀྱི་འཕྲལ་བསྟུན་སྐོར་གྱི་དྲིལ་བསྒྲགས་དང་སློབ་གསོའི་ལས་ཀར་ཤུགས་སྣོན་བརྒྱབ་ནས་སྤྱི་ཚོགས་ཀྱི་ས་ཡོམ་གྱི་གནོད་འཚེ་སྔོན་འགོག་དང་ཆུང་དུ་གཏོང་བའི་འདུ་ཤེས་འཛིན་ཤུགས་ཆེ་རུ་གཏོང་དགོས།
དོན་ཚན་ལྔ་པ། རྩ་འཛུགས་གང་དང་མི་སུ་ཞིག་ཡིན་རུང་ཚང་མར་ས་ཡོམ་འབྱུང་སྐབས་ཀྱི་འཕྲལ་བསྟུན་བྱེད་སྒོ་སྤེལ་བར་ཞུགས་རྒྱུའི་འོས་འགན་ཡོད།
ཀྲུང་གོའི་མི་དམངས་བཅིངས་འགྲོལ་དམག་དང་ཀྲུང་གོའི་མི་དམངས་དྲག་ཆས་ཉེན་རྟོག་དམག་དཔུང་ནི་ས་ཡོམ་འཕྲལ་བསྟུན་ལས་ཀའི་སྟོབས་ཤུགས་གལ་ཆེན་ཞིག་ཡིན།
ལེའུ་གཉིས་པ། འཕྲལ་བསྟུན་ལས་ཁུངས།
དོན་ཚན་དྲུག་པ། རྒྱལ་སྲིད་སྤྱི་ཁྱབ་ཁང་གི་ས་ཡོམ་གྱི་གནོད་འཚེ་སྔོན་འགོག་དང་ཆུང་དུ་གཏོང་བའི་ལས་དོན་གཙོ་སྐྱོང་སྡེ་ཁག་གིས་རྒྱལ་ཡོངས་ཀྱི་ས་ཡོམ་འབྱུང་སྐབས་ཀྱི་འཕྲལ་བསྟུན་ལས་ཀར་ཁྲིད་སྟོན་དང་ལྟ་སྐུལ་བྱེད་དགོས། རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་སྡེ་ཁག་གིས་སོ་སོའི་འགན་འཁྲི་ལྟར་སྡེ་ཁག་དེའི་ས་ཡོམ་འབྱུང་སྐབས་ཀྱི་འཕྲལ་བསྟུན་བྱ་བའི་འགན་དངོས་སུ་འཁུར་དགོས།
དོན་ཚན་བདུན་པ། གྱོང་གུན་ཚབས་ཆེན་བཟོས་ཤིང་གཏོར་སྐྱོན་ཚབས་ཆེན་བཏང་བའི་ས་ཡོམ་བྱུང་བའི་རྗེས་སུ། རྒྱལ་སྲིད་སྤྱི་ཁྱབ་ཁང་གིས་ས་ཡོམ་གྱི་གནོད་སྐྱོན་སེལ་བའི་བཀོད་འདོམས་པུའུ་བཙུགས་ནས་རྒྱལ་སྲིད་སྤྱི་ཁྱབ་ཁང་གི་ས་ཡོམ་གྱི་གནོད་འཚེ་སྔོན་འགོག་དང་ཆུང་དུ་གཏོང་བའི་ལས་དོན་གཙོ་སྐྱོང་སྡེ་ཁག་གིས་དེའི་དོན་གཅོད་ལས་ཁུངས་བྱེད་དགོས་དང་། རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་སྡེ་ཁག་གིས་སྡེ་ཁག་དེའི་ས་ཡོམ་འབྱུང་སྐབས་ཀྱི་འཕྲལ་བསྟུན་ལས་ཁུངས་འཛུགས་དགོས།
དོན་ཚན་བརྒྱད་པ། རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གི་ས་ཡོམ་གྱི་གནོད་འཚེ་སྔོན་འགོག་དང་ཆུང་དུ་གཏོང་བའི་ལས་དོན་གཙོ་སྐྱོང་སྡེ་ཁག་གིས་སྲིད་འཛིན་ས་ཁོངས་དེའི་ས་ཡོམ་འབྱུང་སྐབས་ཀྱི་འཕྲལ་བསྟུན་ལས་ཀར་ཁྲིད་སྟོན་དང་ལྟ་སྐུལ་བྱེད་དགོས།
གཏོར་བཤིག་རང་བཞིན་གྱི་ས་ཡོམ་བྱུང་བའི་རྗེས་སུ། འབྲེལ་ཡོད་ཀྱི་རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གིས་ཡོམ་འགོག་གནོད་སེལ་བཀོད་འདོམས་པུའུ་བཙུགས་ནས་སྲིད་འཛིན་ས་ཁོངས་དེའི་ནང་གི་ས་ཡོམ་འབྱུང་སྐབས་ཀྱི་འཕྲལ་བསྟུན་ལས་དོན་ལ་གཅིག་སྡུད་ཀྱིས་མགོ་ཁྲིད་བྱེད་དགོས་དང་། དེའི་ལས་སྒྲུབ་ལས་ཁུངས་ནི་རིམ་པ་དེའི་མི་དམངས་སྲིད་གཞུང་གི་ས་ཡོམ་གྱི་གནོད་འཚེ་སྔོན་འགོག་དང་ཆུང་དུ་གཏོང་བའི་ལས་དོན་གཙོ་སྐྱོང་སྡེ་ཁག་གམ་རིམ་པ་དེའི་མི་དམངས་སྲིད་གཞུང་གིས་དམིགས་འཛུགས་བྱས་པའི་སྡེ་ཁག་གཞན་དག་ཏུ་འཛུགས་པ་དང་། རྒྱལ་སྲིད་སྤྱི་ཁྱབ་ཁང་གིས་ལོགས་སུ་གཏན་འབེབས་བྱས་ཡོད་ན། གཏན་འབེབས་དེ་གཞིར་འཛིན་དགོས།
ལེའུ་གསུམ་པ། འཕྲལ་བསྟུན་སྔོན་ཇུས་སྐོར།
དོན་ཚན་དགུ་པ། གཏོར་བཤིག་རང་བཞིན་གྱི་ས་ཡོམ་བྱུང་དུས་ཀྱི་དགོས་མཁོ་མྱུར་སྒྲུབ་བྱེད་པའི་སྐོར་གྱི་རྒྱལ་ཁབ་ཀྱི་གྲ་སྒྲིག་འཆར་གཞི་དེ་རྒྱལ་སྲིད་སྤྱི་ཁྱབ་ཁང་གི་ས་ཡོམ་གྱི་གནོད་འཚེ་སྔོན་འགོག་དང་ཆུང་དུ་གཏོང་བའི་ལས་དོན་གཙོ་སྐྱོང་སྡེ་ཁག་གིས་རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་སྡེ་ཁག་དང་མཉམ་དུ་གཏན་འབེབས་བྱས་ཏེ་རྒྱལ་སྲིད་སྤྱི་ཁྱབ་ཁང་ལ་ཆོག་མཆན་ཞུ་དགོས།
དོན་ཚན་བཅུ་པ། རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་སྡེ་ཁག་གིས་གཏོར་བཤིག་རང་བཞིན་གྱི་ས་ཡོམ་བྱུང་དུས་ཀྱི་དགོས་མཁོ་མྱུར་སྒྲུབ་བྱེད་པའི་སྐོར་གྱི་རྒྱལ་ཁབ་ཀྱི་གྲ་སྒྲིག་འཆར་གཞི་གཞིར་བཟུང་སྟེ་གཏོར་བཤིག་གཏོང་བའི་ས་ཡོམ་བྱུང་དུས་ཀྱི་དགོས་མཁོ་མྱུར་སྒྲུབ་བྱེད་པའི་སྡེ་ཁག་དེའི་གྲ་སྒྲིག་འཆར་གཞི་བཟོས་པ་དང་འབྲེལ་རྒྱལ་སྲིད་སྤྱི་ཁྱབ་ཁང་གི་ས་ཡོམ་གྱི་གནོད་འཚེ་སྔོན་འགོག་དང་ཆུང་དུ་གཏོང་བའི་ལས་དོན་གཙོ་སྐྱོང་སྡེ་ཁག་ལ་ཐོ་འགོད་སྙན་སེང་ཡང་ཞུ་དགོས།
དོན་ཚན་བཅུ་གཅིག་པ། ས་ཡོམ་གྱི་གནོད་འཚེ་སྔོན་དཔག་བྱེད་པར་གཞིགས་ནས་གཏོར་བཤིག་རང་བཞིན་གྱི་ས་ཡོམ་འབྱུང་སྲིད་པའི་ས་ཁུལ་གྱི་རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གི་ས་ཡོམ་གྱི་གནོད་འཚེ་སྔོན་འགོག་དང་ཆུང་དུ་གཏོང་བའི་ལས་དོན་གཙོ་སྐྱོང་སྡེ་ཁག་གིས་རིམ་པ་གཅིག་མཚུངས་ཀྱི་འབྲེལ་ཡོད་སྡེ་ཁག་དང་། འབྲེལ་ཡོད་ལས་ཁུངས་དང་མཉམ་དུ་གཏོར་བཤིག་རང་བཞིན་གྱི་ས་ཡོམ་བྱུང་དུས་ཀྱི་དགོས་མཁོ་མྱུར་སྒྲུབ་བྱེད་པའི་སྐོར་གྱི་རྒྱལ་ཁབ་ཀྱི་གྲ་སྒྲིག་འཆར་གཞི་གཞིར་བཟུང་ནས། སྲིད་འཛིན་ས་ཁོངས་དེའི་ནང་གི་གཏོར་བཤིག་རང་བཞིན་གྱི་ས་ཡོམ་བྱུང་དུས་ཀྱི་དགོས་མཁོ་མྱུར་སྒྲུབ་བྱེད་པའི་གྲ་སྒྲིག་འཆར་གཞི་བཟོས་ཏེ་ཞིང་ཆེན་དང་། རང་སྐྱོང་ལྗོངས། མི་གྲངས་ཁྲི100ཡན་ཟིན་པའི་གྲོང་ཁྱེར་བཅས་ཀྱི་གཏོར་བཤིག་གཏོང་བའི་ས་ཡོམ་བྱུང་དུས་ཀྱི་དགོས་མཁོ་མྱུར་སྒྲུབ་བྱེད་པའི་གྲ་སྒྲིག་འཆར་གཞི་དེ་རྒྱལ་སྲིད་སྤྱི་ཁྱབ་ཁང་གི་ས་ཡོམ་གྱི་གནོད་འཚེ་སྔོན་འགོག་དང་ཆུང་དུ་གཏོང་བའི་ལས་དོན་གཙོ་སྐྱོང་སྡེ་ཁག་ལ་ཐོ་འགོད་སྙན་སེང་ཞུ་དགོས།
དོན་ཚན་བཅུ་གཉིས་པ། སྡེ་ཁག་དང་ས་གནས་ཀྱིས་གཏོར་བཤིག་རང་བཞིན་གྱི་ས་ཡོམ་འབྱུང་སྐབས་ཀྱི་འཕྲལ་བསྟུན་གྲ་སྒྲིག་འཆར་གཞི་བཟོ་སྐབས། སྡེ་ཁག་དེའམ་ས་ཁུལ་དེའི་གནས་ཚུལ་དངོས་དང་བསྟུན་ནས་ལག་ལེན་དུ་འཁྱོལ་ཐུབ་ངེས་ཡིན།
དོན་ཚན་བཅུ་གསུམ་པ། གཏོར་བཤིག་རང་བཞིན་གྱི་ས་ཡོམ་བྱུང་དུས་ཀྱི་དགོས་མཁོ་མྱུར་སྒྲུབ་བྱེད་པའི་གྲ་སྒྲིག་འཆར་གཞིའི་ནང་གཤམ་གསལ་ནང་དོན་གཙོ་བོ་ཚུད་དགོས་པ་སྟེ།
（གཅིག）འཕྲལ་བསྟུན་ལས་ཁུངས་གྲུབ་ཚུལ་དང་དེའི་འགན་འཁྲི།
（གཉིས）འཕྲལ་བསྟུན་འཕྲིན་གཏོང་འགན་སྲུང་།
（གསུམ）ཉེན་སེལ་རོགས་སྐྱོབ་ཀྱི་མི་སྣ་དང་། མ་དངུལ། དངོས་ཟོག་བཅས་ཀྱི་གྲ་སྒྲིག
（བཞི）གནོད་འཚེ་ཚོད་སྐོར་བྱེད་རྒྱུའི་གྲ་སྒྲིག
(ལྔ) འཕྲལ་བསྟུན་བྱ་སྤྱོད་ཀྱི་འཆར་གཞི།
དོན་ཚན་བཅུ་བཞི་པ། གཏོར་བཤིག་རང་བཞིན་གྱི་ས་ཡོམ་འབྱུང་སྐབས་ཀྱི་འཕྲལ་བསྟུན་གྲ་སྒྲིག་འཆར་གཞི་བཟོ་མཁན་སྡེ་ཁག་དང་ས་གནས་ཀྱིས་ས་གཡོ་ཐེབས་ཚུལ་འགྱུར་ལྡོག་བྱུང་ཚུལ་དང་ལག་བསྟར་བྱེད་སྐབས་ཤེས་རྟོགས་བྱུང་བའི་གནད་དོན་ལ་གཞིགས་ཏེ། དེས་གཏོར་བཤིག་རང་བཞིན་གྱི་ས་ཡོམ་འབྱུང་སྐབས་ཀྱི་འཕྲལ་བསྟུན་གྲ་སྒྲིག་འཆར་གཞི་དུས་ཐོག་ཏུ་བཟོ་བཅོས་དང་ཁ་གསབ་བྱེད་དགོས་པ་དང་། དོན་དག་གལ་ཆེན་ལེགས་སྒྲིག་བྱེད་པ་འབྲེལ་བ་ཡོད་ན། དེ་སྔའི་ཆོག་མཆན་འགོད་མཁན་ལས་ཁུངས་ལ་ཞུས་ནས་མོས་མཐུན་འཐོབ་པ་བྱེད་དགོས།
ལེའུ་བཞི་པ། ས་ཡོམ་བྱུང་སྐབས་འཕྲལ་བསྟུན་བྱེད་ཐབས།
དོན་ཚན་བཅོ་ལྔ་པ། ས་ཡོམ་བྱུང་ཁའི་སྔོན་བརྡ་གཏོང་རྒྱུ་དེ་ཞིང་ཆེན་དང་། རང་སྐྱོང་ལྗོངས། ཐད་གཏོགས་གྲོང་ཁྱེར་བཅས་ཀྱི་མི་དམངས་སྲིད་གཞུང་གིས་ས་ཡོམ་སྔོན་བརྡ་གཏོང་རྒྱུའི་སྐོར་གྱི་རྒྱལ་སྲིད་སྤྱི་ཁྱབ་ཁང་གི་གཏན་འབེབས་ལྟར་གཅིག་གྱུར་གྱིས་ཁྱབ་བསྒྲགས་བྱེད་དགོས་ལས། རྩ་འཛུགས་གང་དང་མི་སུ་ཞིག་གིས་ཀྱང་ས་ཡོམ་གྱི་སྔོན་བརྡ་བཏང་མི་ཆོག
རྩ་འཛུགས་གང་དང་མི་སུ་ཞིག་གིས་ཀྱང་ས་ཡོམ་སྐོར་གྱི་དཀྲོག་གཏམ་སྒྲོག་སྤེལ་བྱས་མི་ཆོག ས་ཡོམ་གྱི་དཀྲོག་གཏམ་བྱུང་སྐབས་ས་ཡོམ་གྱི་གནོད་འཚེ་སྔོན་འགོག་དང་ཆུང་དུ་གཏོང་བའི་ལས་དོན་གཙོ་སྐྱོང་སྡེ་ཁག་གིས་མི་དམངས་སྲིད་གཞུང་ལ་གཞོགས་འདེགས་བྱས་ནས་མགྱོགས་མྱུར་དུ་ཞི་འཇགས་དང་དག་སེལ་བྱེད་དགོས།
དོན་ཚན་བཅུ་དྲུག་པ། གཏོར་བཤིག་རང་བཞིན་གྱི་ས་ཡོམ་བྱུང་ཁའི་སྔོན་བརྡ་བཏང་རྗེས་འབྲེལ་ཡོད་ཀྱི་ཞིང་ཆེན་དང་། རང་སྐྱོང་ལྗོངས། ཐད་གཏོགས་གྲོང་ཁྱེར་བཅས་ཀྱི་མི་དམངས་སྲིད་གཞུང་གིས་སྔོན་བརྡ་གཏོང་ཁུལ་དེ་མ་འཕྲལ་བསྟུན་གྱི་དུས་སུ་སླེབས་པའི་ཁྱབ་བསྒྲགས་བྱས་ཆོག་པ་མ་ཟད། ས་ཡོམ་བྱུང་ཁའི་འཕྲལ་བསྟུན་གྱི་དུས་སྐབས་ཀྱི་མགོ་ཚུགས་དང་མཇུག་སྒྲིལ་བའི་དུས་ཚོད་ཀྱང་གསལ་སྟོན་བྱས་ཆོག
ས་ཡོམ་བྱུང་སྐབས་ཀྱི་འཕྲལ་བསྟུན་དུས་ཚོད་སྤྱིར་བཏང་ཉིན10ཡིན་པ་དང་། དགོས་ངེས་ཀྱི་དུས་སུ་ཉིན་བཅུ་ཕྱིར་འགྱངས་བྱས་ཆོག
དོན་ཚན་བཅུ་བདུན་པ། ས་ཡོམ་བྱུང་ཁའི་འཕྲལ་བསྟུན་གྱི་དུས་སུ་འབྲེལ་ཡོད་ས་གནས་མི་དམངས་སྲིད་གཞུང་གིས་ས་ཡོམ་བྱུང་ཚུལ་ལ་གཞིགས་ཏེ་གཏོར་བཤིག་གཏོང་བའི་ས་ཡོམ་བྱུང་དུས་ཀྱི་འཕྲལ་བསྟུན་གྲ་སྒྲིག་འཆར་གཞི་ལག་བསྟར་བྱེད་པའི་ལས་ཀ་གཅིག་གྱུར་གྱིས་བཀོད་སྒྲིག་བྱེད་དགོས་པ་མ་ཟད། ས་ཡོམ་བྱུང་ཁའི་འཕྲལ་བསྟུན་བྱེད་སྒོ་སྤེལ་སྐབས་བྱུང་བའི་རྩོད་གཞི་རྣམས་འཕྲལ་མར་ཐག་གཅོད་བྱེད་ཐབས་ཀྱང་སྤྱོད་དགོས།
དོན་ཚན་བཅོ་བརྒྱད་པ། ས་ཡོམ་བྱུང་ཁའི་འཕྲལ་བསྟུན་གྱི་དུས་སུ་ས་ཡོམ་གྱི་གནོད་འཚེ་སྔོན་འགོག་དང་ཆུང་དུ་གཏོང་བའི་ལས་དོན་གཙོ་སྐྱོང་སྡེ་ཁག་རིམ་པ་སོ་སོས་རིམ་པ་དེའི་མི་དམངས་སྲིད་གཞུང་གིས་གཏོར་བཤིག་གཏོང་བའི་ས་ཡོམ་བྱུང་དུས་ཀྱི་འཕྲལ་བསྟུན་གྲ་སྒྲིག་འཆར་གཞི་ལག་ལེན་བསྟར་བའི་ལས་ཀར་ཞིབ་བཤེར་བྱེད་པར་གཞོགས་འདེགས་བྱེད་དགོས།
དོན་ཚན་བཅུ་དགུ་པ། ས་ཡོམ་བྱུང་ཁའི་འཕྲལ་བསྟུན་གྱི་དུས་སུ་འབྲེལ་ཡོད་ས་གནས་མི་དམངས་སྲིད་གཞུང་གིས་གནས་ཚུལ་དངོས་ལ་གཞིགས་ནས་སྔོན་བརྡ་གཏོང་ཁུལ་གྱི་ཡུལ་མི་དང་མི་གཞན་དག་ལ་ས་ཡོམ་ལས་གཡོལ་ནས་ཕྱིར་འཐེན་བྱེད་དགོསའི་ཁ་ཏ་བསླབ་བྱ་བྱེད་དགོས་པ་དང་། གནས་ཚུལ་ཛ་དྲག་ཆེ་བའི་སྐབས་སུ་རྩ་འཛུགས་ཡོད་པའི་སྒོ་ནས་ས་ཡོམ་ལས་གཡོལ་ཏེ་ཁ་འགྲེམ་བྱེད་དགོས།
དོན་ཚན་ཉི་ཤུ་པ། ས་ཡོམ་བྱུང་ཁའི་འཕྲལ་བསྟུན་གྱི་དུས་སུ་འབྲེལ་ཡོད་ས་གནས་མི་དམངས་སྲིད་གཞུང་ལ་རང་རང་གི་སྲིད་འཛིན་ས་ཁོངས་སུ་དངོས་རྫས་དང་། སྒྲིག་ཆས། མི་སྣ། ས་ཆ་བཅས་འཕྲལ་མྱུར་འཐེན་སྤྱོད་དང་བཟུང་སྤྱོད་བྱེད་པའི་དབང་ཆ་ཡོད་པས། རྩ་འཛུགས་གང་དང་མི་སུས་ཀྱང་བཀག་འགོག་བྱས་མི་ཆོག དངོས་ཟོག་དང་སྒྲིག་ཆས་འཐེན་སྤྱོད་དམ་ཡང་ན་ས་ཆ་བཟུང་སྤྱོད་བྱས་རིགས་ཀྱིས་རྗེས་སུ་དུས་ཐོག་ཏུ་ཕྱིར་སྤྲོད་དགོས་པའམ་ཡང་ན་སྐྱིན་ཚབ་སྤྲོད་དགོས།
དོན་ཚན་ཉེར་གཅིག་པ། ས་ཡོམ་བྱུང་ཁའི་འཕྲལ་བསྟུན་གྱི་དུས་སུ་འབྲེལ་ཡོད་སྡེ་ཁག་གིས་སྲོག་རྩའི་ལས་གྲྭ་དང་ཞོར་ཐོན་གནོད་འཚེ་འབྱུང་གཞིར་ཛ་དྲག་གི་འགོག་སྲུང་བྱེད་ཐབས་སྤྱོད་དགོས།
ལེའུ་ལྔ་པ། ས་ཡོམ་བྱུང་རྗེས་ཀྱི་འཕྲལ་བསྟུན་བྱེད་ཐབས།
དོན་ཚན་ཉེར་གཉིས་པ། གཏོར་བཤིག་རང་བཞིན་གྱི་ས་ཡོམ་བྱུང་བའི་རྗེས་སུ། འབྲེལ་ཡོད་ཀྱི་ཞིང་ཆེན་དང་། རང་སྐྱོང་ལྗོངས། ཐད་གཏོགས་གྲོང་ཁྱེར་བཅས་ཀྱི་མི་དམངས་སྲིད་གཞུང་གིས་གནོད་སྐྱོན་བྱུང་ཁུལ་ས་ཡོམ་བྱུང་རྗེས་ཀྱི་འཕྲལ་བསྟུན་དུས་སྐབས་སུ་སླེབས་པའི་ཁྱབ་བསྒྲགས་བྱེད་དགོས་པ་མ་ཟད། ས་ཡོམ་བྱུང་རྗེས་ཀྱི་འཕྲལ་བསྟུན་དུས་ཡུན་གྱི་མགོ་ཚུགས་དང་མཇུག་སྒྲིལ་བའི་དུས་ཚོད་ཀྱང་གསལ་སྟོན་བྱེད་དགོས།
ས་ཡོམ་བྱུང་རྗེས་ཀྱི་འཕྲལ་བསྟུན་དུས་ཡུན་སྤྱིར་བཏང་ཉིན10ཡིན་པ་དང་། དགོས་ངེས་ཀྱི་དུས་སུ་ཉིན་སྤྱི་ལོ20ནར་འགྱངས་བྱས་ཆོག
དོན་ཚན་ཉེར་གསུམ་པ། གཏོར་བཤིག་རང་བཞིན་གྱི་ས་ཡོམ་བྱུང་བའི་རྗེས་སུ། ཡོམ་འགོག་གནོད་སེལ་བཀོད་འདོམས་པུའུ་ཡིས་གཏོར་བཤིག་རང་བཞིན་གྱི་ས་ཡོམ་བྱུང་དུས་ཀྱི་འཕྲལ་བསྟུན་གྲ་སྒྲིག་འཆར་གཞི་དུས་ཐོག་ཏུ་ལག་བསྟར་བྱེད་པར་རྩ་འཛུགས་བྱས་ཏེ། ས་ཡོམ་བྱུང་ཚུལ་དང་། གནོད་སྐྱོན་ཐེབས་ཚུལ། འཕེལ་ཚུལ་སོགས་ཀྱི་ཆ་འཕྲིན་དག་རང་ལས་རིམ་པ་གཅིག་གིས་མཐོ་བའི་མི་དམངས་སྲིད་གཞུང་ལ་དུས་ཐོག་ཏུ་སྙན་སེང་ཞུ་དགོས།
དོན་ཚན་ཉེར་བཞི་པ། ས་ཡོམ་གྱི་གནོད་འཚེ་སྔོན་འགོག་དང་ཆུང་དུ་གཏོང་བའི་ལས་དོན་གཙོ་སྐྱོང་སྡེ་ཁག་གིས་ས་ཡོམ་འབྱུང་ཡུལ་གྱི་ས་ཡོམ་ལྟ་ཞིབ་ཚད་ལེན་དང་སྔོན་བརྡ་གཏོང་བའི་ལས་ཀར་ཤུགས་སྣོན་རྒྱག་དགོས་པ་མ་ཟད། དུས་ཐོག་ཏུ་འབྲེལ་ཡོད་སྡེ་ཁག་དང་མཉམ་དུ་ས་ཡོམ་གྱི་གནོད་འཚེའི་གྱོང་གུན་ལ་དཔྱད་དཔོག་ཀྱང་བྱེད་དགོས། གནོད་སྐྱོན་བྱུང་ཚུལ་ལ་བརྟག་དཔྱད་བྱས་འབྲས་དེ་རིམ་པ་དེའི་མི་དམངས་སྲིད་གཞུང་གི་ཡོམ་འགོག་གནོད་སེལ་བཀོད་འདོམས་པུའུ་དང་རང་ལས་རིམ་པ་གཅིག་གིས་མཐོ་བའི་ས་ཡོམ་གྱི་གནོད་འཚེ་སྔོན་འགོག་དང་ཆུང་དུ་གཏོང་བའི་ལས་དོན་གཙོ་སྐྱོང་སྡེ་ཁག་ལ་དུས་ཐོག་ཏུ་སྙན་སེང་ཞུ་དགོས།
དོན་ཚན་ཉེར་ལྔ་པ། འགྲིམ་འགྲུལ་དང་། ལྕགས་ལམ། དམངས་སྤྱོད་མཁའ་འགྲུལ་སོགས་སྡེ་ཁག་གིས་གཏོར་བརླག་ཐེབས་པའི་གཞུང་ལམ་དང་། ལྕགས་ལམ། ཆུ་གྲུ་ཁ། མཁའ་འགྲུལ་གྲུ་ཁ། འབྲེལ་ཡོད་སྒྲིག་བཀོད་བཅས་གང་མགྱོགས་བསྐྱར་གསོ་བྱེད་དགོས་པ་མ་ཟད། སྔོན་ལ་ཉེན་འགོག་མྱུར་སྐྱོབ་མི་སྣ་དང་། དངོས་ཟོག་སྐྱེལ་འདྲེན། གནོད་སྐྱོན་ཕོག་མཁན་རྣམས་ཁ་འགྲེམ་པར་འགན་ལེན་བྱེད་དགོས། སྡེ་ཁག་གཞན་དག་ལ་འགྲིམ་འགྲུལ་སྐྱེལ་འདྲེན་ཡོ་བྱད་ཡོད་ན། ཡོམ་འགོག་གནོད་སེལ་བཀོད་འདོམས་པུའུ་བསྡུ་སྤྱོད་དམ་ཡང་ན་བཀོལ་སྤྱོད་བྱེད་པར་གླེང་མེད་དུ་བརྩི་སྲུང་ཞུ་དགོས།
དོན་ཚན་ཉེར་དྲུག་པ། འཕྲིན་སྐྱེལ་སྡེ་ཁག་གིས་གཏོར་བཤིག་ཐེབས་པའི་འཕྲིན་སྐྱེལ་སྒྲིག་བཀོད་གང་མགྱོགས་སླར་གསོ་བྱས་ནས་ཡོམ་འགོག་གནོད་སེལ་གྱི་འཕྲིན་སྐྱེལ་ཐོགས་མེད་ཡོང་བའི་འགན་ལེན་བྱེད་དགོས། སྡེ་ཁག་གཞན་དག་ལ་འཕྲིན་སྐྱེལ་སྒྲིག་བཀོད་ཡོད་ན། གཏོར་བཤིག་གཏོང་བའི་ས་ཡོམ་བྱུང་དུས་ཀྱི་འཕྲལ་བསྟུན་ལས་དོན་དམིགས་སུ་བཀར་ནས་ཞབས་འདེགས་ཞུ་དགོས།
དོན་ཚན་ཉེར་བདུན་པ། ཆུ་དང་གློག་འདོན་སྡེ་ཁག་གིས་གཏོར་བཤིག་ཐེབས་པའི་ཆུ་དང་གློག་འདོན་སྒྲིག་ཆས་བསྐྱར་གསོ་གང་མགྱོགས་བྱས་ནས་གནོད་སྐྱོན་བྱུང་ཁུལ་གྱི་ཆུ་དང་གློག་སྤྱོད་པར་འགན་ལེན་བྱེད་དགོས།
དོན་ཚན་ཉེར་བརྒྱད་པ། འཕྲོད་བསྟེན་སྡེ་ཁག་གིས་འཕྲལ་མར་མྱུར་སྐྱོབ་དཔུང་ཁག་རྩ་འཛུགས་བྱས་ནས་སྨན་བཅོས་སྒྲིག་བཀོད་སྣ་ཚོགས་བེད་སྤྱོད་བྱེད་པའམ་གནས་སྐབས་ཀྱི་སྨན་བཅོས་བྱེད་གནས་བཙུགས་ཏེ་རྨས་མ་མྱུར་སྐྱོབ་བྱེད་པ་དང་། གནོད་སྐྱོན་བྱུང་བའི་ས་ཁུལ་གྱི་འཐུང་ཆུའི་ཆུ་མགོ་དང་ཟས་རིགས་སོགས་ལ་དུས་ཐོག་ཏུ་ཞིབ་བཤེར་དང་ལྟ་ཞིབ་ཚད་ལེན་བྱེད་པ། རིམས་ནད་མཆེད་ཚུལ་སྔོན་འགོག་དང་ཚོད་འཛིན་ནུས་ལྡན་བྱེད་པ་མ་ཟད། གནོད་འཚེ་ཕོག་པའི་མི་སྣར་བསམ་པ་དང་། སེམས་ཁམས་འཕྲོད་བསྟེན་ཐད་ཀྱི་རོགས་རམ་ཡང་བྱེད་དགོས། སྨན་རྫས་སྡེ་ཁག་གིས་རྒུད་སྐྱོབ་བྱེད་པར་མཁོ་བའི་སྨན་རྫས་དུས་ཐོག་ཏུ་འདོན་སྤྲོད་བྱེད་དགོས། སྡེ་ཁག་གཞན་དག་གིས་འཕྲོད་བསྟེན་དང་སྨན་བཅོས་སྡེ་ཁག་ལ་གཞོགས་འདེགས་བྱས་ནས་རིམས་འགོག་འཕྲོད་བསྟེན་དང་ཤི་རྨས་བྱུང་བའི་མི་སྣ་མྱུར་སྐྱོབ་དང་། དེ་དག་གཙང་སེལ་བྱེད་པའི་ལས་ཀ་ལེགས་པར་བསྒྲུབ་དགོས།
དོན་ཚན་ཉེར་དགུ་པ། དམངས་སྲིད་སྡེ་ཁག་གིས་ཉེན་གཡོལ་བྱེད་ས་དང་རྒུད་སྐྱོབ་དངོས་རྫས་མཁོ་སྤྲོད་བྱེད་ས་གང་མགྱོགས་བཙུགས་ནས་རྒུད་སྐྱོབ་དངོས་རྫས་མཁོ་འདོན་བྱེད་པ་སོགས་ཀྱི་ཐོག་ནས་གནོད་སྐྱོན་ཕོག་མཁན་གྱི་གཞི་རྩའི་འཚོ་བར་འགན་སྲུང་དང་། གནོད་སྐྱོན་ཕོག་མཁན་རྣམས་གནས་སྤོ་དང་བཀོད་སྒྲིག་གི་ལས་ཀ་ལེགས་པར་བསྒྲུབ་དགོས། སྡེ་ཁག་གཞན་དག་གིས་དམངས་སྲིད་སྡེ་ཁག་ལ་རོགས་སྐྱོར་དང་གཞོགས་འདེགས་བྱས་ནས་གནོད་འཚེ་ཕོག་པའི་མི་དམངས་བཀོད་སྒྲིག་ལེགས་པར་བྱེད་དགོས།
དོན་ཚན་སུམ་ཅུ་པ། སྤྱི་བདེ་སྡེ་ཁག་གིས་གནོད་སྐྱོན་བྱུང་བའི་ས་ཁུལ་གྱི་བདེ་སྐྱོང་དོ་དམ་དང་བདེ་སྐྱོང་ལས་དོན་ལ་ཤུགས་སྣོན་བརྒྱབ་སྟེ་གཏོར་བཤིག་གི་སྤྱོད་ངན་སྣ་ཚོགས་སྔོན་འགོག་དང་བཀག་འགོག་བྱས་ནས་སྤྱི་ཚོགས་ཀྱི་བདེ་འཇགས་སྲུང་སྐྱོང་དང་། ཉེན་སྐྱོབ་གནོད་སེལ་གྱི་ལས་ཀ་བདེ་བླག་ངང་སྒྲུབ་པར་འགན་ལེན། སྤྱི་ཚོགས་ཀྱི་སྒྲིག་ལམ་གང་མགྱོགས་སླར་གསོ་བཅས་བྱེད་དགོས།
དོན་ཚན་སོ་གཅིག་པ། རྡོ་སྣུམ་དང་། རྫས་འགྱུར་བཟོ་ལས། ཆུ་བེད། གློག་ཤུགས། འཛུགས་སྐྲུན་སོགས་ཀྱི་སྡེ་ཁག་དང་ལས་ཁུངས། དེ་བཞིན་ཉེན་ཆེའི་དངོས་རྫས་ཐོན་སྐྱེད་དང་གསོག་འདྲེན་སོགས་བྱེད་མཁན་ལས་ཁུངས་བཅས་ཀྱིས་སོ་སོའི་འགན་འཁྲི་ལྟར་ཟུར་གནོད་འབྱུང་སྲིད་པའམ་ཐོན་ཟིན་པའི་ས་ཆ་དང་སྒྲིག་བཀོད་ལ་འཕྲལ་མར་ཐག་གཅོད་བྱེད་ཐབས་སྤྱོད་དགོས་པ་མ་ཟད། ལྟ་ཞིབ་དང་ཚོད་འཛིན་བྱེད་ཤུགས་ཆེ་རུ་བཏང་ནས་གནོད་སྐྱོན་རྒྱ་སྐྱེད་མི་ཡོང་བར་བྱེད་དགོས།
སྤྱི་བདེའི་མེ་གསོད་ལས་ཁུངས་ཀྱིས་གནོད་སྐྱོན་བྱུང་བའི་ས་ཁུལ་དུ་མེ་སྐྱོན་ཤོར་ཚུལ་ལ་ལྟ་ཞིབ་ནན་པོ་བྱེད་དགོས་པ་དང་། མེ་སྐྱོན་བྱུང་སྐབས་སྟོབས་ཤུགས་རྩ་འཛུགས་བྱས་ནས་མི་སྣ་དང་དངོས་ཟོག་མྱུར་སྐྱོབ་བྱེད་དགོས་པ་མ་ཟད། དོགས་ཟོན་ནུས་ལྡན་གྱི་བྱེད་ཐབས་སྤྱད་དེ་མེ་སྐྱོན་ཆེ་རུ་འགྲོ་བ་དང་མཆེད་རྒྱུ་སྔོན་འགོག་བྱེད་དགོས།
དོན་ཚན་སོ་གཉིས་པ། ཀུན་ཁྱབ་རླུང་འཕྲིན་ལས་ཁུངས་དང་བརྙན་འཕྲིན་ཁང་སོགས་གསར་འགྱུར་ལས་ཁུངས་གྱིས་ཡོམ་འགོག་གནོད་སེལ་བཀོད་འདོམས་པུའུ་ཡིས་མཁོ་འདོན་བྱས་པའི་གནས་ཚུལ་ལ་གཞིགས་ཏེ། གཏན་འབེབས་ལྟར་དུས་ཐོག་ཏུ་མང་ཚོགས་ལ་ས་ཡོམ་བྱུང་ཚུལ་དང་གནོད་འཚེ་ཕོག་ཚུལ་སོགས་ཀྱི་འབྲེལ་ཡོད་ཆ་འཕྲིན་ཁྱབ་བསྒྲགས་བྱེད་དགོས་པ་མ་ཟད། དྲིལ་བསྒྲགས་དང་གནས་འཕྲིན་སྤེལ་བའི་ལས་ཀ་ལེགས་པར་བསྒྲུབ་དགོས།
དོན་ཚན་སོ་གསུམ་པ། ས་ཡོམ་གྱི་གནོད་སྐྱོན་སེལ་བའི་བཀོད་འདོམས་པུའུ་ཡིས་གནོད་སྐྱོན་བྱུང་བའི་ས་ཁུལ་མིན་པའི་མི་དམངས་སྲིད་གཞུང་ལ་གནོད་འཚེ་ཕོག་པའི་མི་སེར་རྣམས་དང་ལེན་བྱེད་དགོས་མ་ཟད། བཀོད་སྒྲིག་འོས་འཚམ་བྱེད་དགོས་དང་རོགས་སྐྱོབ་གཞན་དག་འདོན་སྤྲོད་བྱེད་དགོསའི་རེ་འདུན་ཞུས་ཆོག
དོན་ཚན་སོ་བཞི་པ། གཏོར་བཤིག་རང་བཞིན་གྱི་ས་ཡོམ་བྱུང་བའི་རྗེས་སུ། རྒྱལ་ནང་གི་གནོད་སྐྱོན་བྱུང་བའི་ས་ཁུལ་མིན་པའི་འཕྲལ་མར་རོགས་སྐྱོབ་བྱས་རིགས་ཡོམ་འགོག་གནོད་སེལ་བཀོད་འདོམས་པུའུ་ཡིས་དང་ལེན་དང་བཀོད་སྒྲིག་བྱེད་འགན་འཁུར་པ་དང་། རྒྱལ་སྤྱིའི་སྤྱི་ཚོགས་ཀྱིས་མཁོ་འདོན་བྱས་པའི་འཕྲལ་མྱུར་རོགས་སྐྱོབ་དེ་རྒྱལ་སྲིད་སྤྱི་ཁྱབ་ཁང་གི་དམངས་སྲིད་སྡེ་ཁག་གིས་དང་ལེན་དང་བཀོད་སྒྲིག་བྱེད་འགན་འཁུར་དགོས། ཕྱི་རྒྱལ་གྱི་རྒྱ་གྲམ་དམར་པོའི་ཚོགས་པ་དང་རྒྱལ་སྤྱིའི་སྤྱི་ཚོགས་ཀྱིས་ཀྲུང་གོའི་རྒྱ་གྲམ་དམར་པོའི་ཚོགས་པས་འདོན་སྤྲོད་བྱས་པའི་འཕྲལ་མྱུར་རོགས་སྐྱོབ་ལ་བརྟེན་ནས་ཀྲུང་གོའི་རྒྱ་གྲམ་དམར་པོའི་ཚོགས་པས་དང་ལེན་དང་བཀོད་སྒྲིག་བྱེད་འགན་འཁུར་དགོས།
དོན་ཚན་སོ་ལྔ་པ། གཏོར་བཤིག་ཚབས་ཆེན་གཏོང་བའི་ས་ཡོམ་བྱུང་དུས་ཀྱི་དགོས་མཁོ་མྱུར་སྒྲུབ་བྱེད་པའི་དབང་གིས་གནོད་སྐྱོན་བྱུང་ཁུལ་དུ་རྩིས་སྤྲོད་དོ་དམ་བྱེད་ཐབས་དམིགས་བསལ་ཅན་ལག་ལེན་བསྟར་ཆོག ཞིང་ཆེན་དང་། རང་སྐྱོང་ལྗོངས། ཐད་གཏོགས་གྲོང་ཁྱེར་བཅས་ཀྱི་སྲིད་འཛིན་ས་ཁོངས་ནང་གི་དམིགས་བསལ་གྱི་དོ་དམ་བྱེད་ཐབས་ནི་ཞིང་ཆེན་དང་། རང་སྐྱོང་ལྗོངས། ཐད་གཏོགས་གྲོང་ཁྱེར་བཅས་ཀྱི་མི་དམངས་སྲིད་གཞུང་གིས་ཐག་གཅོད་དགོས། ཞིང་ཆེན་དང་། རང་སྐྱོང་ལྗོངས། ཐད་གཏོགས་གྲོང་ཁྱེར་བཅས་ལས་བརྒལ་བའི་དམིགས་བསལ་གྱི་རྩིས་སྤྲོད་དོ་དམ་བྱེད་ཐབས་ནི་འབྲེལ་ཡོད་ཀྱི་ཞིང་ཆེན་དང་། རང་སྐྱོང་ལྗོངས། ཐད་གཏོགས་གྲོང་ཁྱེར་བཅས་ཀྱི་མི་དམངས་སྲིད་གཞུང་གིས་ཐུན་མོང་དུ་ཐག་གཅོད་བྱེད་པའམ་ཡང་ན་རྒྱལ་སྲིད་སྤྱི་ཁྱབ་ཁང་གིས་ཐག་གཅོད་རྒྱུ། མ་ལམ་གྱི་འགྲིམ་འགྲུལ་ཆད་པའམ་རྒྱལ་མཚམས་བཀག་སྡོམ་བྱེད་པའི་དམིགས་བསལ་དོ་དམ་བྱེད་ཐབས་རྒྱལ་སྲིད་སྤྱི་ཁྱབ་ཁང་ནས་གཏན་འཁེལ་བྱེད་དགོས།
དམིགས་བསལ་གྱི་རྩིས་སྤྲོད་དོ་དམ་བྱེད་ཐབས་མེད་པ་བཟོ་རྒྱུ་ནི་གྲོས་ཐག་གཅོད་མཁན་ལས་ཁུངས་ཀྱིས་ཁྱབ་བསྒྲགས་བྱེད་དགོས།
ལེའུ་དྲུག་པ། བྱ་དགའ་སྤྲོད་སྟངས་དང་ཆད་པ་གཅོད་ཕྱོགས་སྐོར།
དོན་ཚན་སོ་དྲུག་པ། གཏོར་བཤིག་རང་བཞིན་གྱི་ས་ཡོམ་བྱུང་བའི་འཕྲལ་བསྟུན་གྱི་བྱེད་སྒོའི་ནང་གཤམ་གསལ་གྱི་བྱས་རྗེས་ལས་གཅིག་བཞག་ཡོད་ན། དེ་གནས་སའི་ལས་ཁུངས་དང་གོང་རིམ་ལས་ཁུངས་སམ་ཡང་ན་ས་ཡོམ་གྱི་གནོད་འཚེ་སྔོན་འགོག་དང་ཆུང་དུ་གཏོང་བའི་ལས་དོན་གཙོ་སྐྱོང་སྡེ་ཁག་གིས་གཟེངས་བསྟོད་བྱེད་པའམ་བྱ་དགའ་སྤྲོད་པ་སྟེ།
（གཅིག）གཏོར་བཤིག་གཏོང་བའི་ས་ཡོམ་བྱུང་དུས་ཀྱི་འཕྲལ་བསྟུན་ལས་འགན་ལེགས་འགྲུབ་གཟེངས་སུ་ཐོན་པའི་རིགས་དང་།
（གཉིས）རྒྱལ་ཁབ་དང་། ཐུན་མོང་། སྤྱི་དམངས་བཅས་ཀྱི་རྒྱུ་ནོར་སྲུང་སྐྱོབ་བྱེད་པའམ་ཡང་མི་སྣ་མྱུར་སྐྱོབ་བྱེད་པར་བྱས་རྗེས་བཞག་ཡོད་པ།
（གསུམ）ཉེན་ཁའི་གནས་ཚུལ་དུས་ཐོག་ཏུ་བསལ་ནས་གནོད་འཚེ་ཆེ་རུ་མི་འགྲོ་བ་བྱས་ཏེ་གྲུབ་འབྲས་མངོན་གསལ་དོད་པོ་ཐོབ་པ།
（བཞི）ས་ཡོམ་འཕྲལ་བསྟུན་ལས་དོན་ཐད་གྲོས་གཞི་གལ་ཆེན་བཏོན་པས་ལག་བསྟར་བྱས་པར་ཕན་འབྲས་མངོན་གསལ་དོད་པོ་ཐོན་པ།
（ལྔ）ས་ཡོམ་གྱི་གནས་ཚུལ་དང་གནོད་འཚེའི་གནས་ཚུལ་ཞིབ་དཔྱད་ཡང་དག་བྱས་པ་དང་ཆ་འཕྲིན་དུས་ཐོག་ཏུ་བརྒྱུད་སྤྲོད་བྱས་པའི་རྐྱེན་གྱིས་གནོད་འཚེའི་གྱོང་གུན་ཆུང་དུ་གཏོང་བ།
（དྲུག）དུས་ཐོག་ཏུ་འཕྲལ་བསྟུན་རྒུད་སྐྱོབ་བྱེད་དགོསའི་དངོས་ཟོག་དང་ཡོ་བྱད་མཁོ་འདོན་བྱེད་པའམ་ཡང་ན་འགྲོ་གྲོན་གྲོན་ཆུང་བྱས་ནས་གྲུབ་འབྲས་མངོན་གསལ་དོད་པོ་ཐོབ་པ།
(བདུན )དམིགས་བསལ་གྱི་བྱས་རྗེས་གཞན་དག་བཞག་ཡོད་པ་བཅས་ཡིན།
དོན་ཚན་སོ་བདུན་པ། གཤམ་གསལ་གྱི་བྱ་སྤྱོད་ལས་རིགས་གཅིག་ཡོད་ན། དེའི་འགན་དངོས་སུ་འཁུར་བའི་གཙོ་སྐྱོང་མི་སྣ་དང་ཁག་འགན་དངོས་སུ་འཁུར་དགོས་མི་གཞན་དག་ལ་ཁྲིམས་ལྟར་སྲིད་འཛིན་ཐོག་གི་ཆད་པ་གཅོད་པ་དང་། བདེ་འཇགས་དོ་དམ་དང་འགལ་བའི་བྱ་སྤྱོད་ཀྱི་ཁོངས་སུ་གཏོགས་རིགས་ལ་བདེ་འཇགས་དོ་དམ་གྱི་ཆད་པ་གཅོད་ཕྱོགས་སྐོར་གྱི་བཅའ་ཁྲིམས་ཀྱི་གཏན་འབེབས་ལྟར་ཆད་པ་གཅོད་དགོས། བྱས་ཉེས་སུ་གྲུབ་རིགས་ལ་ཁྲིམས་ལྟར་ཉེས་འགན་བདའ་འདེད་གཏོང་པ་སྟེ།
（གཅིག）སྲོལ་ཡིག་འདིའི་གཏན་འབེབས་ལྟར་གཏོར་བཤིག་རང་བཞིན་གྱི་ས་ཡོམ་བྱུང་དུས་ཀྱི་འཕྲལ་བསྟུན་གྲ་སྒྲིག་འཆར་གཞི་མི་བཟོ་བའི་རིགས་དང་།
（གཉིས）གཏོར་བཤིག་གཏོང་བའི་ས་ཡོམ་བྱུང་དུས་ཀྱི་འཕྲལ་བསྟུན་གྲ་སྒྲིག་འཆར་གཞིའི་གཏན་འབེབས་དང་ཡོམ་འགོག་གནོད་སེལ་བཀོད་འདོམས་པུའུ་ཡི་བླང་བྱ་ལྟར་གཏོར་བཤིག་གཏོང་བའི་ས་ཡོམ་བྱུང་དུས་ཀྱི་འཕྲལ་བསྟུན་གྲ་སྒྲིག་འཆར་གཞི་ལག་བསྟར་མ་བྱས་པའི་རིགས།
（གསུམ）ཡོམ་འགོག་གནོད་སེལ་བཀོད་འདོམས་པུའུ་ཡི་བཀའ་རྒྱར་འགོག་རྒོལ་བྱས་ཏེ་ས་ཡོམ་འབྱུང་སྐབས་ཀྱི་འཕྲལ་བསྟུན་ལས་འགན་གཏན་ནས་མི་འཁུར་བའི་རིགས།
（བཞི）ཡོམ་འགོག་གནོད་སེལ་བཀོད་འདོམས་པུའུ་ཡིས་དངོས་ཟོག་དང་མི་སྣ་འཕྲལ་མར་འཐེན་སྤྱོད་དམ་ཡང་ན་ས་ཆ་བཟུང་སྤྱོད་བྱེད་པར་འགོག་རྐྱེན་བཟོ་བ།
（ལྔ）ས་ཡོམ་བྱུང་བའི་འཕྲལ་བསྟུན་ལས་ཀའི་འགྲོ་གྲོན་ནམ་དངོས་ཟོག་ལྐོག་ཟ་དང་། གཞན་སྤྱོད། རྐུ་ཁྱེར་བཅས་བྱས་རིགས།
（དྲུག）དམིགས་བསལ་གྱི་འགན་འཁྲི་ཡོད་པའི་རྒྱལ་ཁབ་ཀྱི་ལས་དོན་མི་སྣས་ས་ཡོམ་བྱུང་ཁའི་འཕྲལ་བསྟུན་དུས་སམ་ཡང་ན་ས་ཡོམ་བྱུང་རྗེས་ཀྱི་འཕྲལ་བསྟུན་དུས་སུ་ལས་གནས་བརྟན་སྲུང་མི་བྱེད་པ་དང་། ས་ཡོམ་གྱི་གནས་ཚུལ་དང་གནོད་འཚེ་ཕོག་ཚུལ་དུས་ཐོག་ཏུ་ཁོང་དུ་ཆུད་མེད་པ། གཡུལ་ས་ནས་བྲོས་བྱོལ་དུ་སོང་བའམ་ཡང་ན་ལས་འགན་སྣང་མེད་ལྷོད་གཡེང་དུ་བཏང་རིགས།
（བདུན）ས་ཡོམ་བྱུང་ཁའི་འཕྲལ་བསྟུན་དུས་ཡུན་ནམ་ས་ཡོམ་བྱུང་རྗེས་ཀྱི་འཕྲལ་བསྟུན་མྱུར་སྒྲུབ་བྱེད་སྐབས་རྒྱལ་ཁབ་དང་། ཐུན་མོང་ངམ་སྤྱི་དམངས་ཀྱི་རྒྱུ་ནོར་ཧམ་འཕྲོག་བྱས་རིགས།
（བརྒྱད）ས་ཡོམ་གྱི་གནོད་སྐྱོན་སེལ་བའི་མི་སྣས་ལས་འགན་སྒྲུབ་པར་བཀག་འགོག་གམ་གཏོར་བཤིག་གི་བྱེད་སྒོ་སྤེལ་བ།
（དགུ）གཏན་འབེབས་དང་གནས་ཚུལ་དངོས་གཞིར་བཟུང་གནོད་འཚེའི་གནས་ཚུལ་སྙན་སེང་མ་ཞུས་པ།
（བཅུ）དཀྲོག་གཏམ་བཤད་པ་དང་། སྤྱི་ཚོགས་ཀྱི་སྒྲིག་ལམ་དཀྲུག་པ། གཏོར་བཤིག་གཏོང་བའི་ས་ཡོམ་གྱི་འཕྲལ་བསྟུན་ལས་ཀར་གནོད་པ་གཏོང་བ་བཅས་བྱས་རིགས།
(བཅུ་གཅིག)གཏོར་བཤིག་གཏོང་བའི་ས་ཡོམ་བྱུང་བའི་འཕྲལ་བསྟུན་གྱི་ལས་ཀར་གནོད་འཚེ་གཏོང་བའི་བྱ་སྤྱོད་གཞན་དག་ཡོད་པ་བཅས་སོ།
ལེའུ་བདུན་པ། ཞར་བྱུང་དོན་ཚན།
དོན་ཚན་སོ་བརྒྱད་པ། སྲོལ་ཡིག་འདིར་འཁོད་གཤམ་གསལ་ཐ་སྙད་ཀྱི་གོ་དོན་ནི་འདི་ལྟ་སྟེ།
（གཅིག）ས་ཡོམ་འཕྲལ་བསྟུན་ཞེས་པ་ནི་ས་ཡོམ་གྱི་གནོད་འཚེ་ཆུང་དུ་གཏོང་ཆེད་སྤེལ་བའི་རྒྱུན་ལྡན་གྱི་ལས་ཀའི་གོ་རིམ་དང་མི་འདྲ་བའི་ཛ་དྲག་གི་གནོད་འཚེ་སྔོན་འགོག་དང་ཉེན་སེལ་བྱ་སྤྱོད་ལ་ཟེར།
（གཉིས）གཏོར་བཤིག་རང་བཞིན་གྱི་ས་ཡོམ་ཞེས་པ་ནི་མི་གྲངས་ངེས་ཅན་ཞིག་གི་མི་ཤི་རྨས་དང་དཔལ་འབྱོར་གྱི་གྱོང་གུན་བཟོས་པའི་ས་ཡོམ་གྱི་དོན་རྐྱེན་ལ་ཟེར།
（གསུམ）གཏོར་སྐྱོན་ཚབས་ཆེན་བཏང་བའི་ས་ཡོམ་ཞེས་པ་ནི་མི་སྣ་ཤི་རྨས་དང་དཔལ་འབྱོར་གྱོང་གུན་ཚབས་ཆེན་བཟོས་ནས་གནོད་འཚེ་ཕོག་ཁུལ་གྱི་རང་ཉིད་སླར་གསོའི་ནུས་པ་ཤོར་བའམ་ཡང་ན་ཆ་ཤས་ཤོར་ནས་རྒྱལ་ཁབ་ཀྱིས་འགྲན་རྒོལ་བྱ་སྤྱོད་སྤེལ་དགོས་པའི་ས་ཡོམ་དོན་རྐྱེན་ལ་ཟེར།
（བཞི）ཚེ་སྲོག་གི་ལས་གྲྭ་ཞེས་པ་ནི་སྤྱི་ཚོགས་ཀྱི་འཚོ་བ་དང་ཐོན་སྐྱེད་ལ་ཤུགས་རྐྱེན་ཆེན་པོ་ཡོད་པའི་འགྲིམ་འགྲུལ་དང་། འཕྲིན་གཏོང་། ཆུ་མཁོ་འདོན། ཆུ་ཕྱིར་འབུད། གློག་མཁོ་འདོན། སོལ་རླངས་མཁོ་འདོན། སྣུམ་འདྲེན་སོགས་ཀྱི་ལས་གྲྭའི་མ་ལག་ལ་ཟེར།
（ལྔ）ཟུར་གནོད་འབྱུང་གཞི་ཞེས་པ་ནི་ས་ཡོམ་བྱུང་བའི་དབང་གིས་ཆུ་སྐྱོན་དང་། མེ་སྐྱོན། འབར་གས་སོགས་ཀྱི་གནོད་འཚེ་འབྱུང་སྲིད་པའི་འབར་སླ་བ་དང་གས་སླ་བའི་དངོས་རྫས་དང་། དུག་ལྡན་དངོས་རྫས་གསོག་ཉར་སྒྲིག་བཀོད། ཆུ་རགས། ཆུ་རགས་སོགས་ལ་ཟེར།
དོན་ཚན་སོ་དགུ་པ། སྲོལ་ཡིག་འདི་སྤྱི་ལོ1995ལོའི་ཟླ4པའི་ཚེས1ཉིན་ནས་ལག་བསྟར་བྱས།
དཔྱད་གཞིའི་ཡིག་ཆ།