ཟླ་བ་བཅུ་གཉིས་ནི་འབྱུང་རྩིས་ཟླ་བའི་འོད་ཟེར་ལས། དཔྱིད་ཟླ་ར་བ་བཅུ་གཅིག་སྟག ། བཅུ་གཉིས་དཔྱིད་འབྲིང་ཡོས་སུ་བརྩི༎ ཟླ་བ་དང་པོ་དཔྱིད་ཐ་འབྲུག ། དེ་བཞིན་དབྱར་ར་གཉིས་པ་སྦྲུལ༎ དབྱར་འབྲིང་གསུམ་པ་རྟའི་ཟླ་བ༎ བཞི་པ་དབྱར་ཟླ་ཐ་ཆུང་ལུག ། ལྔ་པ་སྟོན་ཟླ་ར་བ་སྤྲེལ༎ དྲུག་པ་སྟོན་འབྲིང་བྱའི་ཟླ་བ༎ བདུན་པ་སྟོན་ཟླ་ཐ་ཆུང་ཁྱི༎ བརྒྱད་པ་དགུན་ཟླ་ར་བ་ཕག ། དགུན་འབྲིང་དགུ་པ་བྱི་བའོ༎ བཅུ་པ་དགུན་ཐ་གླང་དུ་འདོད༎ ཅེས་འབྱུང་བ་དང་༎ བཻ་དཀར་ཡང་འདི་དང་མཐུན་ནོ༎ བོད་དུ་དར་བའི་ནག་རྩིས་ཕལ་ཆེར་སྟག་ཟླ་དཔྱིད་ཟླ་ར་བར་བྱེད་པ་གཅིག་མཐུན་ཡིན་ཡང་། དེ་ཟླ་བ་གང་ལ་ངོས་འཛིན་བྱེད་སྟངས་ཐད་མི་འདྲ་བ་དུ་མ་འབྱུང་བ་གཙོ་བོ་ཁག་གསུམ་དུ་འདུ། སྟག་ཟླ་དེ་བཅུ་གཅིག་པ་མགོ་ཟླ་བར་བྱེད་པ་ནི་གོང་གསལ་སྡེ་སྲིད་སངས་རྒྱས་རྒྱ་མཚོ་དང་ལོ་ཆེན་དྷརྨ་ཤྲཱི་རྗེས་འབྲངས་དང་བཅས་པ་འདོད། རྩིས་ཀྱི་བསྟན་བཅོས་བཻ་དཀར་དང་འབྱུང་རྩིས་ཟླ་བའི་འོད་ཟེར་གྱི་ལུགས་ཡིན། སྟག་ཟླ་དེ་བཅུ་གཉིས་པ་རྒྱལ་ཟླ་བར་བྱེད་པ་ནི་འབྲི་གུང་ཆོས་ཀྱི་གྲགས་པ་དང་། མཁས་མཆོག་ཀརྨ་ཆགས་མེད། དགེ་རྩེ་འགྱུར་མེད་བསྟན་པ་རྒྱ་མཚོ་རྗེས་འབྲང་དང་བཅས་པ་འདོད། ནག་རྩིས་ཨུཏྤལ་སྔོན་པོའི་དོ་ཤལ་སོགས་ཀྱི་ལུགས་ཡིན། སྟག་ཟླ་དེ་ཟླ་བ་དང་པོ་མཆུ་ཟླར་བྱེད་པ་ནི་ཀརྨ་ངེས་ལེགས་བསྟན་འཛིན་རྗེས་འབྲང་དང་བཅས་པ་འདོད། ནག་རྩིས་ཉེར་མཁོ་བུམ་བཟང་སོགས་ཀྱི་ལུགས་སོ༎ ཟླ་བ་དེ་དག་གི་ཁམས་བརྩི་སྟངས་ནི། གནམ་ལོ་མ་ལ་ཟླ་བ་བུ་ཞེས་པ་ལྟར་སྦྲགས་མར་བརྩི་དགོས། དེ་ཡང་ནག་རྩིས་ཉེར་མཁོ་བུམ་བཟང་ལས། དཔྱིད་ཟླ་ར་འབྲིང་གནམ་ལོའི་བུ༎ དཔྱིད་ཐ་དབྱར་ར་གནམ་ལོའི་མ༎ སྟོན་ཐ་དགུན་ར་གནམ་ལོ་རང་༎ དགུན་འབྲིང་དགུན་ཐ་གནམ་ལོའི་བུ༎ ཞེས་པ་དང་དོན་གཅིག་གོ །
བཻ་དཀར་དང་འབྱུང་རྩིས་ཟླ་ཟེར་ལུགས་ཀྱི་ཟླ་བ་བཅུ་གཉིས།
དུས་བཞི། | དཔྱིད་ཟླ་གསུམ། |
དབྱར་ཟླ་གསུམ། |
སྟོན་ཟླ་གསུམ། |
དགུན་ཟླ་གསུམ། |
||||||||
ཟླ་གྲངས། | 11 | 12 | 1 | 2 | 3 | 4 | 5 | 6 | 7 | 8 | 9 | 10 |
ཟླ་བའི་མིང་། | སྟག | ཡོས། | འབྲུག | སྦྲུལ། | རྟ། | ལུག | སྤྲེལ། | བྱ། | ཁྱི། | ཕག | བྱི་བ། | གླང་། |
ཉ་སྐར། | མགོ | རྒྱལ། | མཆུ། | དབོ། | ནག་པ། | ས་ག | སྣོན། | ཆུ་སྟོད། |
གྲོ་བཞིན། | ཁྲུམས་སྟོད། | དབྱུ་གུ། | སྨིན་དྲུག |
ནག་རྩིས་ཨུཏྤལ་སྔོན་པོའི་དོ་ཤལ་ལུགས་ཀྱི་ཟླ་བ་བཅུ་གཉིས།
དུས་བཞི། | དཔྱིད་ཟླ་གསུམ། |
དབྱར་ཟླ་གསུམ། |
སྟོན་ཟླ་གསུམ། |
དགུན་ཟླ་གསུམ། |
||||||||
ཟླ་གྲངས། | 12 | 1 | 2 | 3 | 4 | 5 | 6 | 7 | 8 | 9 | 10 | 11 |
ཟླ་བའི་མིང་། | སྟག | ཡོས། | འབྲུག | སྦྲུལ། | རྟ། | ལུག | སྤྲེལ། | བྱ། |
ཁྱི། | ཕག | བྱི་བ། | གླང་། |
ཉ་སྐར། | རྒྱལ། | མཆུ། | དབོ། | ནག་པ། | ས་ག | སྣྲོན། | ཆུ་སྟོད། | གྲོ་བཞིན། | ཁྲུམས་སྟོད། | དབྱུ་གུ། |
སྨིན་དྲུག | མགོ |
ནག་རྩིས་ཉེར་མཁོ་བུམ་བཟང་ལུགས་ཀྱི་ཟླ་བ་བཅུ་གཉིས།
དུས་བཞི། | དཔྱིད་ཟླ་གསུམ། |
དབྱར་ཟླ་གསུམ། |
སྟོན་ཟླ་གསུམ། |
དགུན་ཟླ་གསུམ། |
||||||||
ཟླ་གྲངས། | 1 | 2 | 3 | 4 | 5 | 6 | 7 | 8 | 9 | 10 | 11 | 12 |
ཟླ་བའི་མིང་། | སྟག | ཡོས། | འབྲུག | སྦྲུལ། | རྟ། | ལུག | སྤྲེལ། | བྱ། | ཁྱི། | ཕག | བྱི་བ། | གླང་། |
ཉ་སྐར། | མཆུ། | དབོ། | ནག་པ། | ས་ག | སྣོན | ཆུ་སྟོད། | གྲོ་བཞིན། | ཁྲུམས་སྟོད། | དབྱུ་གུ། | སྨིན་དྲུག | མགོ | རྒྱལ། |