དཀར་མོ་ལུག་དུག སྲོ་མ་སེང་གེ། དབྱིད་དཀར་པོ། ཨ་བྲ་ཐང་ཕྲོམ་སོགས་ཀྱང་ཟེར།
འཁྲུངས་དཔེ་རུ། ད་བྱིད་དཀར་པོ་ཁ་ཤོག་པ།། སྤང་ལྗོངས་ཕྱུགས་ལྷས་རྙིང་པར་སྐྱེ།། རྩ་བ་ཕྲ་ལ་ལོ་མ་སྲབ།། ལོ་མས་ས་མནན་མཉེན་ལ་ཆུང་།། མེ་ཏོག་དཀར་སེར་སྲབ་ལ་སྙོམས། གང་བུ་དཀར་འཇམ་སྔོ་མདངས་ཅན།། འབྲས་བུ་དཀར་ཞིབ་རིང་བསྲེལ་འདྲ།། ཞེས་གསུངས་པ་ལྟར། འདི་ནི་ལོ་མང་སྐྱེ་བའི་ལྡུམ་བུ་ཐང་སྨན་རིགས་ཀྱི་སྐྱེ་དངོས་ཤིག་ཡིན་ཞིང་། རྩ་བ་དཀར་པོ་རྐང་གཅིག་མཛུབ་མོ་ཙམ་ལ་ལོ་མ་མཐུག་གཉེར་སྤུ་རྩུབ་ཐུང་ངུ་ཡོད་པ། ས་ངོས་སུ་སྐྱེ་བ་ཕལ་ཆེར་ལག་པའི་འཁོར་རྒྱ་ཙམ་པར་མེ་ཏོག་སེར་དཀར་འཆར། འབྲས་བུ་ལྗང་དཀར་རིལ་མོ་མཛུབ་མགོ་ཙམ་མངར་ཁུ་འབྱར་བག་ཅན་དང་ས་བོན་དཀར་སེར་མཁལ་དབྱིབས་ཡུངས་དཀར་གྱི་འབྲུ་ཙམ། ཆེ་ཤེལ་འོག་བལྟས་ན་འབྲུམ་རིས་ཅན་མང་པོ་འདྲེས་ནས་གང་བུ་བཞི་ལྔ་ཙམ་ཐོགས་པའོ།།
སྨན་དུ་འབྲས་བུ་དགོས་ཏེ་བོད་ཟླ་བརྒྱད་པ་ནས་དགུ་བའི་དུས་ལ་བཏུས་ཏེ་རས་སྐུད་ལ་ཕྲེང་བ་ལྟར་བརྒྱུས་ནས་ཉི་རླུང་ཕོག་སར་མ་རུལ་བར་སྐམ་ཚགས་བྱ་དགོས།
རོ་མངར་ལ་ཁ་བ་དང་། ཞུ་རྗེས་མངར། ནུས་པ་བསིལ།
གཉན་ནད་གག་ལྷོག་འཇོམས། རྒྱུ་ལོང་ལ་སོགས་སྣོད་ཀྱི་སྲིན་བུ་གསོད། འདོད་པ་འཕེལ་ཞིང་རོ་ཙ་མྱུར།