གསེར་མཁར་སྒང་རི་རྒྱུད་དུ་འབོད་པ་འདི་ཡང་ཙོང་ལ་རིང་མོའི་རི་རྒྱུད་སྟོད་ནས་ཤར་ཕྱོགས་ལན་གྲུའི་ཞིང་ས་ལ་བསྲིངས་པའི་རྒྱུན་གྱི་རི་ལག་ཅིག་ཡིན་ཞིང་། མིན་ཧོ་རྫོང་ཁོངས་ཀྱི་རི་རྒྱུད་ཆེན་པོ་བརྒྱད་ཀྱི་གྲས་ཀྱང་ཡིན། དེ་ནི་ལྷོ་ཕྱོགས་ནས་ཤར་དུ་རྒྱུན་བསྲིངས་ཡོད་ལ། རི་རྒྱུད་འདི་ནི་གསེར་མཁར་སྒང་ནས་མགོ་བརྩམས་ཏེ་རིམ་པར་རི་ལག་མང་པོ་བྱུང་ཡོད་པ་ལ་བརྟེན་གཙོ་རིའི་ཆ་ནས་གསེར་མཁར་སྒང་རི་རྒྱུད་དུ་འབོད་དོ། ། རི་རྒྱུད་དེ་ནི་ཚེ་ཏན་ཡུལ་ཚོ་དང་བཀའ་མ་ལོག་ཡུལ་ཚོ་གཉིས་ཀྱི་ནུབ་རྒྱུད་ཀྱི་འདྲེས་མཚམས་སུ་རི་བོ་མཚོ་ཁ་གྲགས་པའི་ལྷོ་ཕྱོགས་ནས་བརྩམས་ཏེ། ཚེ་ཏན་ཡུལ་ཚོ་བརྒྱུད་ཕྱག་རྡོར་ཐང་གྲོང་རྡལ་གྱི་སའི་འདབས་རོལ་རྨ་ཆུའི་འགྲམ་དུ་མཆིས་པའི་བྲག་དམར་སྣ་ཁ་ཐུག་གི་བར་དུ་ཡོད། རི་རྒྱུད་སྤྱིའི་རིང་ཚད་ལ་སྤྱི་ལེ15དང་། མཚོ་ཁའི་རི་བོའི་ཤར་ནས་རི་ལག་གཉིས་བྱུང་ཡོད་པ་གཉིས་ཀའི་རི་རྒྱུན་ལྷོ་ནས་ཤར་དུ་བསྐྱངས་ཡོད་ལ། རི་ལག་གི་རིང་ཚད་ལ་སྤྱི་ལེ15དང་། མཚོ་འཕགས་ལ་སྨི2000ཡན་ཡོད་དོ། ། རི་འདི་དག་གི་ངོས་ཤིན་ཏུ་གཟར་ཞིང་། ལུང་ཞབས་ཟབ་མོ་ཡོད། རི་རྒྱུད་འདི་ལ་རི་ལག་འགའ་བྱུང་བའི་ནང་། རི་མོང་ཁུག་བྱང་རི་བོའི་མཚོ་འཕགས་སྨི2850ཡོད་ལ། ཚེ་ཏན་རི་བོར་སྨི2095དང་། ཀྲུའུ་ཀྱཱ་རི་བོར་སྨི2520དང་། དམར་པོ་རི་ལ་སྨི2307བཅས་ཡོད་དོ།།