འཕགས་པ་བྱང་ཆུབ་སེམས་དཔའི་སྤྱོད་ཡུལ་གྱི་ཐབས་ཀྱི་ཡུལ་ལ་རྣམ་པར་འཕྲུལ་པ་བསྟན་པའི་མདོ་ལས་བྱུང་བ་གང་དུ་སངས་རྒྱས་བཅོམ་ལྡན་འདས་རྣམས་བྱང་ཆུབ་མངོན་པར་རྫོགས་པར་འཚང་རྒྱ་བའི་སངས་རྒྱས་ཀྱི་ཞིང་དེ་ལྟ་བུར་འགྱུར་བའི་ཡོན་ཏན་གྱི་སྙིང་པོ་སྟེ།
1.འདི་ལ་གང་དུ་སངས་རྒྱས་བཅོམ་ལྡན་འདས་རྣམས་བྱང་ཆུབ་མངོན་པར་རྫོགས་པར་འཚང་བའི་སངས་རྒྱས་ཀྱི་ཞིང་དེ་ནི། ཡོན་ཏན་གྱི་སྙིང་པོས་བསྒྲུབས་པའི་ཕྱིར་བསྐལ་པའི་སྙིང་པོ་དང་ལྡན་པ་ཡིན།
2.སངས་རྒྱས་ཀྱི་ཞིང་དེ་ནི། ཆོས་སྤྱད་པའི་དུས་ལས་མི་འདའ་བའི་ཕྱིར་དུས་ཀྱི་སྙིང་པོ་དང་ལྡན་པ་ཡིན།
3.སངས་རྒྱས་ཀྱི་ཞིང་དེ་ནི། ཆོས་ཤེས་པར་འགྱུར་བ་དང་ལྡན་པའི་ཕྱིར་སེམས་ཅན་གྱི་སྙིང་པོ་དང་ལྡན་པ་ཡིན།
4.སངས་རྒྱས་ཀྱི་ཞིང་དེ་ནི། ལེགས་པར་ཡོངས་སུ་དག་པའི་ཕྱིར་ཉོན་མོངས་པ་ཅན་མ་ཡིན་པའི་ཞིང་གི་སྙིང་པོ་དང་ལྡན་པ་ཡིན།
5.སངས་རྒྱས་ཀྱི་ཞིང་དེ་ནི། སེམས་ཅན་དམུ་རྒོད་མེད་པའི་ཕྱིར་སེམས་ཅན་ཅང་ཤེས་ཀྱི་སྙིང་པོ་དང་ལྡན་པ་ཡིན།
6.སངས་རྒྱས་ཀྱི་ཞིང་དེ་ནི། ཐིག་པ་གཅིག་གིས་ངེས་པར་འབྱུང་བའི་ཕྱིར་ཐེག་པའི་སྙིང་པོ་དང་ལྡན་པ་ཡིན།
7.སངས་རྒྱས་ཀྱི་ཞིང་དེ་ནི། རྫས་ཀྱི་ལྷག་མ་ཡོད་པའི་ཕྱིར་སའི་སྙིང་པོ་དང་ལྡན་པ་ཡིན།
8.སངས་རྒྱས་ཀྱི་ཞིང་དེ་ནི། གཞན་མུ་སྟེགས་ཅན་ཐམས་ཅད་ཀྱི་བསྟན་པ་མི་སྤྱོད་པའི་ཕྱིར་བསྟན་པའི་སྙིང་པོ་དང་ལྡན་པ་ཡིན།
9.སངས་རྒྱས་ཀྱི་ཞིང་དེ་ནི། གཡོ་མེད་པའི་ཕྱིར་ཡོན་ཏན་གྱི་སྙིང་པོ་དང་ལྡན་པ་ཡིན།
10.སངས་རྒྱས་ཀྱི་ཞིང་དེ་ནི། སེམས་ཅན་རང་བཞིན་གྱིས་དཀར་བའི་གནས་སུ་གྱུར་པའི་ཕྱིར་བསམ་པ་དང་། ལྷག་པའི་བསམ་པའི་སྙིང་པོ་དང་ལྡན་པ་ཡིན།
11.སངས་རྒྱས་ཀྱི་ཞིང་དེ་ནི། སྦྱིན་པའི་གནས་དང་མི་འབྲལ་བའི་ཕྱིར་འཕགས་པའི་སྙིང་པོ་དང་ལྡན་པ་ཡིན།
12.སངས་རྒྱས་ཀྱི་ཞིང་དེ་ནི། སྔོན་གྱི་དེ་བཞིན་གཤེགས་པ་རྣམས་བཞུད་ཅིང་རྗེས་སུ་བཞུད་པའི་ཕྱིར་བྱང་ཆུབ་ཀྱི་སྙིང་པོ་དང་ལྡན་པ་བཅས་སོ༎