དཔལ་ཆེན་རི་བོ།སྔ་མའི་པར་གཞི་དེ མགོན11 ནས 2021-09-27 08:40ལ་འགྲུབ།
གུ་རུ་པདྨ་སིདྡྷི་ཧཱུྃ། སངས་རྒྱས་ཀུན་འདུས་པདྨ་འབྱུང་། །རང་རིག་བླ་མར་ཡོངས་ཤར་བ། །རྩ་གསུམ་ལྷ་ལ་གུས་པས་འདུད། །འཇིག་རྟེན་ཡོངས་སུ་གྲགས་པ་ཡི། །རི་བཙུན་ཞེས་སུ་མིང་ཆགས་པ། །དོན་དུ་དཔལ་ཆེན་རི་བོ་སྟེ། །རྩེ་མོར་བཀའ་བརྒྱུད་བླ་མའི་ཚོགས། །ཀུན་བཟང་ཡབ་ཡུམ་རྡོ་རྗེ་འཆང་། །བཀའ་བརྒྱུད་བླ་མ་སྤྲིན་ལྟར་གཏིབས། །བར་ན་འཁོར་ལོ་བདེ་མཆོག་ནི། །ལྷ་ལྔའི་དཀྱིལ་འཁོར་དགྱེས་རྡོར་དང་། །མཁའ་འགྲོའི་དཀྱིལ་འཁོར་ལ་སོགས་བཞུགས། །གཞན་ཡང་ཆོས་སྐྱོང་ཚོགས་དང་བཅས། །དད་པའི་མིག་གི་ཡུལ་དུ་གསལ། །ཁྱད་པར་དེ་ཡི་མདུན་ཉིད་དུ། །བྲག་རི་ལྷུན་ཅིང་ཆགས་པ་ན། །རྒྱལ་ཆེན་རྣམ་སྲས་རང་བྱོན་ནི། །ཤིན་ཏུ་གསལ་བའི་ཚུལ་དུ་བཞུགས། །དེ་དང་ཉེ་བར་ལྷ་མོ་ནི། །ནོར་རྒྱུན་མ་ཡི་སྐུ་རྣམས་བཞུགས། །དད་པས་ཀུན་ནས་བསླངས་པ་ཡི། །ཕྱག་འཚལ་མཆོད་པ་འབུལ་བ་དང་། །རྩེ་གཅིག་ཡིད་ཀྱི་གསོལ་འདེབས་དང་། །བཛྲ་གུ་རུ་མ་ཎི་ཡི། །གསོལ་འདེབས་གདུང་བའི་དབྱངས་བཅས་ཀྱིས། །བསྐོར་བ་བཅུ་གསུམ་བསྐོར་བྱས་ན། །བཛྲ་གུ་རུ་དུང་དང་མཉམ། །ད་ལྟའི་འགལ་རྐྱེན་བར་ཆད་ཞི། །ཕྱི་མ་ཟངས་མདོག་དཔལ་རི་དང་། །བདེ་ཆེན་གནས་སུ་སྐྱེ་བར་འགྱུར། །གཞན་ཡང་གནས་མཆོག་སྤྱི་འབྱམས་ཀྱི། །གནས་ཀྱི་ཡན་ལག་ཚུལ་ཉིད་དུ། །ལྷ་ཡི་ཕོ་བྲང་བཞུགས་པར་གྱུར། །དེ་ཡི་ཚུལ་རྣམས་རིམ་བཞིན་གསལ། །དེ་ལྟར་མ་ཧཱ་གུ་རུ་ཡི། །ཕྲིན་ལས་བྱེད་པོར་དབང་བསྐུར་བ། །རིག་འཛིན་གཙུག་ལག་ཆོས་ཀྱི་རྒྱལ། །པདྨ་བསྟན་འཛིན་ཞེས་བགྱི་བ། །དཔལ་ལྡན་དཔའ་བོའི་མཚན་འཆང་བས། །སྐལ་ལྡན་པདྨ་བསོད་ནམས་ཀྱིས། །གསོལ་བ་བཏབ་ངོར་སྨྲས་པ་དགེ། །སརྦ་མངྒ་ལཾ།