མངའ་བདག་མར་པའི་བཀའ་བརྒྱུད་ཀྱི་རིང་ལུགས་འཆད་པ་ལ་གཉིས།སྔ་མའི་པར་གཞི་དེ གསེར་ཞང་འཇམ་བསོད། ནས 2020-11-27 11:50ལ་འགྲུབ།
བཀའ་བཞི་བརྒྱུད་འདུས་ནཱ་རོ་མེ་ཏྲི་ཡི༎ རྒྱལ་ཚབ་མངའ་བདག་ལོ་ཙཱའི་བཤད་སྒྲུབ་བཀའ༎ ཞེས་དེའང་གྲུབ་པའི་དབང་ཕྱུག་ཏེ་ལོ་པས་ནུབ་ཕྱོགས་སོ་མ་པུ་རིའི་གཙུག་ལག་ཁང་དུ་ཞབས་ལ་ལྕགས་སྒྲོག་གསོལ་ནས་ལོ་བཅུ་གཉིས་སུ་སྒྲུབ་པ་མཛད་པའི་མཐར་བླ་མ་ལྷའི་ལུང་བསྟན་ལྟར་སྨད་འཚོང་མའི་གཡོག་མཛད་ནས་ལམ་གྱི་རྟོགས་པ་སྦྱངས་པས་གྲུབ་པ་ཆེན་པོའི་ས་བརྙེས་ནས་དོ་ཧ་རྡོ་རྗེའི་གླུ་དབྱངས་གསུངས་པ་ཙམ་གྱིས་གྲོང་ཁྱེར་འབུམ་ཕྲག་བཅུ་གཉིས་ཀྱི་སྐྱེ་བོ་གྲོལ། སློབ་མ་གྲུབ་པ་ཐོབ་པ་བརྒྱད་ཀྱིས་ཀྱང་འགྲོ་བའི་དོན་དེ་བཞིན་མཛད་པར་གྲགས་ཤིང་། ཏེ་ལོ་པ་ལ་རིང་བརྒྱུད་དང་ཉེ་བརྒྱུད་ཀྱི་བཀའ་གཉིས་སུ་བབས་པ་ལས། སྔ་མ་ནི། དེ་ཉིད་ཀྱི་ཞལ་ནས། ཀླུ་སྒྲུབ་ཙཱརྱ་ལྭ་བ་པ༎ སྐལ་བ་བཟང་མོ་ང་ཡི་ནི༎ བཀའ་བབས་བཞི་ཡི་བླ་མ་ཡིན༎ ཞེས་གསུངས་པ་ལྟར། ཙཱརྱ་པ་ལས་གཏུམ་མོ། ཀླུ་སྒྲུབ་ལས་སྒྱུ་ལུས་དང་འོད་གསལ། ལྭ་བ་པ་ལས་རྨི་ལམ། སུ་ཁ་སིངྔྷི་ལས་བར་དོ་དང་འཕོ་བའི་བཀའ་བབས་པ་དང་། གཞན་ཡང་ཨིནྡྲ་བྷཱུ་ཏི་བར་པ་ལས་གཞན་ལུས་ཤེས་རབ་དང་། མཱ་ཏངྒི་ལས་གྲོང་འཇུག་གི་གདམས་པ་གསན་ཅིང་། དེ་ལྟ་བུའི་རིང་བརྒྱུད་ལ་བཞེད་ལུགས་མང་ཡང་། དཔལ་རང་བྱུང་རྡོ་རྗེས། ཡང་དག་པར་རྫོགས་པའི་སངས་རྒྱས་རྡོ་རྗེ་འཆང་ཆེན་པོས་གསང་བའི་བདག་པོ་ལ་སོགས་པའི་བྱང་ཆུབ་སེམས་དཔའ་རྣམས་ལ་གསུངས། དེ་རྣམས་བཀའ་བཞི་བརྒྱུད་པའི་བླ་མ་རྣམས་ལ་བརྒྱུད་དེ། ཀླུ་སྒྲུབ། ཨཱརྱ་དེ་བ། ཟླ་བ་གྲགས་པ། མཱ་ཏངྒི་རྣམས་ལྷོའི་བརྒྱུད་པའོ༎ ཌོམྦི་པ། བཱི་ན་པ། ལྭ་བ་པ། ཨིནྡྲ་བྷཱུ་ཏི་རྣམས་ནུབ་ཀྱི་བརྒྱུད་པའོ༎ ལཱུ་ཡི་པ། ཌེངྒི་པ། དཱ་རི་ཀ་པ། སུ་ཁ་ངྷ་རི་རྣམས་བྱང་གི་བརྒྱུད་པའོ༎ སུ་ཁ་མ་ཧཱ་སིངྔྷི། ཐང་ལོ་པ། ཤིང་ལོ་པ། ཀརྞ་རི་པ་རྣམས་ཤར་གྱི་བརྒྱུད་པ་སྟེ། ཞེས་གསུངས་པ་ལྟར་ལ། ཕྱོགས་བཞི་ནི་འཕགས་ཡུལ་གྱིས་ཕྱོགས་དེ་དག་ཏུ་བྱོན་པ་ཤས་ཆེ་བ་ལ་དགོངས་སོ༎ ཉེ་བརྒྱུད་ལྟར་ན། ཏེ་ལོ་པ་ལ་མི་ཡི་བླ་མ་མེད༎ ང་ཡི་བླ་མ་ཐམས་ཅད་མཁྱེན་པ་ཡིན༎ ཅེས་གསུངས་པ་ལྟར་སངས་རྒྱས་རྡོ་རྗེ་འཆང་དངོས་ལས་གསང་སྔགས་རྒྱུད་སྡེ་བཞིའི་གདམས་པ་གསན། རྡོ་རྗེ་རྣལ་འབྱོར་མས་སྙན་བརྒྱུད་ནོར་བུ་སྐོར་གསུམ་གྱི་མཛོད་གཏད་པས་གདམས་པའི་བཅུད་ཐམས་ཅད་འདུས་པ་ཡིན། རྗེ་བཙུན་དེ་ཡི་སྤྱན་སྔར་པཎ་ཆེན་ནཱ་རོ་པས་དཀའ་ཆེན་བཅུ་གཉིས་སྤྱད་པ་ལ་མཐར་ཚིག་དང་བརྡ་ལ་བརྟེན་ནས་གསང་སྔགས་ཀྱི་དོན་ཐམས་ཅད་ཁོང་དུ་ཆུད་ཅིང་གྲུབ་པ་བརྙེས། ཌོམྦི་ཧེ་རུ་ཀའི་རྣམ་འཕྲུལ་ལྷོ་བྲག་མར་པ་ཆོས་ཀྱི་བློ་གྲོས་འཕགས་ཡུལ་དུ་ལན་གསུམ་བྱོན། ནཱ་རོ་པ་ཉིད་སྔ་རྗེས་བསྡོམས་པ་ལོ་བཅུ་དྲུག་དང་ཟླ་བ་བདུན་དུ་བསྟེན་ནས་དགྱེས་གསང་གཙོས་རྒྱུད་སྡེ་དུ་མའི་དབང་བཤད་གདམས་ངག་གསན་ཚུལ་ཡང་རྡོ་རྗེའི་མགུར་ལས། རྒྱ་གར་གྱི་ནཱ་རོ་པཎ་ཆེན་དང་༎ བོད་ཡུལ་གྱི་མར་པ་ལོ་ཙཱ་གཉིས༎ སྔོན་སྦྱངས་སྨོན་ལམ་གཅིག་པས་མཇལ༎ ལོ་བཅུ་དྲུག་ཟླ་བ་བདུན་དུ་བསྟེན༎ ཞེས་དང། རྗེ་ནཱ་རོ་ཏཱ་པས་གཙོར་མཛད་པའི༎ གྲུབ་ཐོབ་ཀྱི་བླ་མ་རྣམས་དང་མཇལ༎ སྤྱིར་རྒྱུད་སྡེ་བཞི་ཡི་མན་ངག་ཞུས༎ ཞེས་འབྱུང་ཞིང་ཁྱད་པར་འབྱོན་ཐེབས་རྗེས་མའི་སྐབས་ནཱ་རོ་པ་མཁའ་སྤྱོད་དུ་གཤེགས་ཟིན་ཀྱང་གསོལ་བ་བཏབ་པས་བྱང་པུཥྤ་ཧ་རིའི་དགོན་པར་མངོན་སུམ་དུ་བྱོན། ཟླ་བ་དྲུག་ཏུ་བཞུགས་ནས་བདེ་མཆོག་ཡབ་ཡུམ་གྱི་སྙན་བརྒྱུད་རྫོགས་པར་གནང་༎ གཞན་ཡང་དཔལ་ལྡན་ཤ་བ་རིས་རྗེས་སུ་བཟུང་བ་རྒྱལ་བ་མེ་ཏྲི་པ་དང་། ནུབ་ཏུ་ལཀྵི་ཏྲའི་མཁས་པ་ཡེ་ཤེས་སྙིང་པོ། ལྷོ་དུག་མཚོའི་གླིང་ན་གྲུབ་ཐོབ་ཞི་བ་བཟང་པོ། ཌཱ་ཀི་མ་མི་རུས་རྒྱན་ཅན་སོགས་མཁས་གྲུབ་དུ་མ་བསྟེན་ནས་མདོ་རྒྱུད་མཐའ་ཡས་པ་གསན་ཅིང་། ཁྱད་པར་ནཱ་རོ་དང་མེ་ཏཱི་པ་གཉིས་ཀྱིས་བྱང་ཕྱོགས་ཁ་བ་ཅན་འདུལ་བའི་རྒྱལ་ཚབ་ཏུ་དབང་བསྐུར་བ་མངའ་བདག་ལོ་ཙཱ་ཆེན་པོ་དེ་ལ་བཤད་རྒྱུད་དང་སྒྲུབ་བརྒྱུད་ཀྱི་བཀའ་སྲོལ་ཆེན་པོ་གཉིས་སུ་མཆིས་སོ༎
1.ཀ་ཆེན་བཞི་ནི། ཀ་ཆེན་བཞིར་བབས་ཁྱད་པར་མི་ལ་རྗེའི༎ སྙན་བརྒྱུད་འཛིན་པ་ཉི་ཟླ་ལྟ་བུ་གཉིས༎ ཞེས་རྗེ་ལྷོ་བྲག་པས་གསང་བ་བསམ་གྱིས་མི་ཁྱབ་པའི་བཀོད་པ་ལ་བརྟེན་ནས་གངས་ཅན་གྱི་གདུལ་བྱ་མཐའ་ཡས་པ་འདུལ་བ་ལས་ཐུགས་ཀྱི་སྲས་བཞི། དབུ་ཆེའི་བཤེས་གཉེན་བཅུ་སོགས་གདམས་ངག་འཛིན་པ་མང་དུ་བྱོན་པའི་གཙོ་བོ་ཀ་བཞིར་གྲགས་པ་ལ་བཤད་སྒྲུབ་ཀྱི་བཀའ་བབས་ཏེ། དེའང་གཞུང་གི་རྔོག་སྟོན་ཆོས་རྡོར། དོལ་གྱི་མཚུར་སྟོན་དབང་ངེ། གཙང་རོང་གི་མེས་སྟོན་ཚོན་པོ་གསུམ་ལ་གཙོ་བོར་བཤད་པའི་བཀའ་བབས། རྔོག་སྟོན་སྐུ་ལུས་མ་སྤངས་པར་མཁའ་སྤྱོད་དུ་གཤེགས་ཤིང་རྔོག་བདུན་བརྒྱུད་རྡོར་དྲིལ་འཛིན་ཤེས་པས་ཆོག་པའི་མཁྱེན་བརྩེ་ནུས་མཐུ་ཅན་བྱོན་ཅིང་དེ་དག་གི་བུ་སློབ་ཏུའང་གངས་ཅན་ན་གྲགས་པ་ཆེ་བ་ཕལ་ཆེར་འདུས་པས་མཚོན་ཕྲིན་ལས་ཤིན་ཏུ་རྒྱ་ཆེ་བར་གྱུར་ཀྱང་། ཁྱད་པར་གངས་ཅན་གྱི་རྣ་བའི་རྒྱན་གཅིག་རྗེ་བཙུན་མི་ལ་རས་པ་ནི་འཕགས་ཡུལ་གྱི་གྲུབ་པའི་དབང་ཕྱུག་རྣམས་དང་དབྱེ་བ་མེད་པར་སྐུ་ཚེ་གཅིག་ལ་ཟུང་འཇུག་གི་གོ་འཕང་མཐར་ཐུག་པ་མངོན་ཏུ་མཛད་ནས་མི་དང་མི་མ་ཡིན་གྱི་འགྲོ་བ་ཚད་མེད་པ་བཏུལ་བ་ལས་མཚན་ཡོངས་སུ་གྲགས་པའི་སློབ་མ་འགྲོ་བ་འདུལ་བའི་མཆོག་གསུམ། མཁའ་སྤྱོད་དུ་གཤེགས་པ་ཕོ་གསུམ་མོ་བཞི། རས་པ་ཆེན་པོ་བརྒྱད་སོགས་བྱོན་པའི་གཙོ་བོ་སྙན་བརྒྱུད་འཛིན་པ་ཉི་ཟླ་ལྟ་བུ་གཉིས་ཁྱད་པར་དུ་འཕགས་པའོ༎
2.རས་ཆུང་བཀའ་བརྒྱུད་ནི། གྲུབ་རྒྱལ་ཏེ་པུའི་ཐུགས་སྲས་རས་ཆུང་པའི༎ གདམས་ཟབ་གངས་ཅན་གྲུབ་མཐའ་ཡོངས་ཀྱི་གསོས༎ ཞེས་དེ་ལ་ཐུགས་སྲས་ཟླ་བ་ལྟ་བུ་མ་ཅིག་གྲུབ་པའི་རྒྱལ་མོ་དང་། ཏེ་པུ་པ་དྲི་མེད་བཤེས་གཉེན་ཟུང་གིས་རྗེས་སུ་བཟུང་ནས་ཐུགས་མཛོད་གདམས་པའི་བཅུད་བསྩལ་བའི་སྲས་མཆོག་ལུས་མེད་མཁའ་འགྲོའི་ཆོས་སྐོར་ཕྱི་མ་རྣམས་སྤྱན་འདྲེན་པར་མཛད་པ་པོ་རས་ཆུང་རྡོ་རྗེ་གྲགས་པ་ནི་སྐུ་ལུས་མ་སྤངས་པར་ལྕང་ལོ་ཅན་ཏུ་བཞུད། ཕྱིས་སུའང་དཔལ་ལྡན་འབྲུག་པ་སོགས་སྐལ་ལྡན་མང་པོ་རྗེས་སུ་བཟུང་། དངོས་སུ་གདམས་པ་བསྩལ་བའི་ཐུགས་སྲས་བཅུ་གཉིས་སོགས་བྱུང་བ་ལས་གཙོ་བོར་རྒྱལ་བ་ཁྱུང་ཚང་པ་ལ་སྙན་བརྒྱུད་ཀྱི་མཛོད་གཏད། དེས་མ་ཅིག་ཨང་ཇོ་ལ་གནང་བ་སོགས་རིམ་པར་བརྒྱུད་དེ་འགྲོ་མགོན་གཙང་པ་རྒྱ་རས་ཀྱིས་བཀའ་སྲོལ་རྒྱ་ཆེར་བཏོད། བླ་མ་ཟངས་རི་རས་པ་ལ་འཇིག་རྟེན་དབང་ཕྱུག་རྒྱལ་བ་རྒྱ་མཚོའི་ཟབ་ཆོས་སོགས་གནང་། དེས་འགྲོ་མགོན་རས་ཆེན་ལ་གནང་ཞིང་ཀཾ་ཚང་བཀའ་བརྒྱུད་ལ་བཀའ་བབས་པས་གྲུབ་པའི་དབང་ཕྱུག་ཀརྨ་པཀྴིའང་གཙོ་བོར་ཆོས་དེ་ཉིད་ལས་གྲུབ་པ་བརྙེས་པ་དང་། གདམས་ངག་ཤམ་བུ་ཅན་བཅོ་བརྒྱད་ཀྱི་ནང་ཚན་ཚེ་དཔག་མེད་འགྲོ་དོན་གྱི་ཤམ་བུ་ཅན་ནི་ས་ཀར་དགེ་གསུམ་གཙོས་ཐམས་ཅད་ལ་ཁྱབ་པས་མཚོན་སྐྱེས་མཆོག་འདིའི་གདམས་ངག་ཟབ་ཆོས་རྣམས་ནི་གངས་ཅན་གྲུབ་མཐའ་ཡོངས་ཀྱི་གསོས་སུ་གྱུར་པ་ཡིན་ནོ༎
3.དྭགས་པོ་བཀའ་བརྒྱུད་ནི། རྒྱལ་བས་ལུང་བསྟན་དགེ་སློང་འཚོ་བྱེད་སྲས༎ འབའ་རོམ་ཕག་གྲུ་ཀཾ་ཚང་ཚལ་པ་སྟེ༎ ཆེ་བཞི་རྩ་བའི་བརྒྱུད་འཛིན་བཅས་ཏེ་ལྔ༎ ཞེས་མི་ལའི་ཐུགས་སྲས་ཉི་མ་ལྟ་བུ་རྒྱལ་བ་ཐུབ་པའི་དབང་པོས་ཏིང་འཛིན་རྒྱལ་པོ་དང་། སྙིང་རྗེ་པད་དཀར་སོགས་ནས་ཤིན་ཏུ་གསལ་བར་ལུང་བསྟན་པའི་དགེ་སློང་འཚོ་བྱེད་དམ་མཉམ་མེད་དྭགས་པོ་ལྷ་རྗེས་སློབ་མ་ཐུན་མོང་བ་རྣམས་ལ་བཀའ་གདམས་ལམ་རིམ་དང་མདོ་ལུགས་ཏིང་ངེ་འཛིན་ལ་ཕྱག་ཆེན་གྱི་མིང་གིས་བརྒྱན་པ། ཐུན་མིན་རྣམས་ལ་བླ་མ་མི་ལས་ཐབས་ལམ་དང་འབྲེལ་བའི་སྔགས་ཀྱི་ཕྱག་ཆེན་ཐུན་མོང་མ་ཡིན་པ་བསྟན་ནས་ཆོ་འཕྲུལ་ཆེན་པོས་ཆོས་ཀྱི་འཁོར་ལོ་བསྐོར་བས་ལས་ཅན་དགྲ་བཅོམ་པ་ལྟ་བུ་ལྔ་བརྒྱ་སོགས་གདུལ་བྱ་མཐའ་ཡས་པ་སྨིན་གྲོལ་དུ་མཛད། མདོར་ན་བདག་ཉིད་ཆེན་པོ་འདི་ནི་སངས་རྒྱས་འཇིག་རྟེན་དུ་བྱོན་པ་དང་ཆོས་མཚུངས་པར་མཐོང་ཐོས་དྲན་རེག་ཐམས་ཅད་ད་ལྟའི་བར་དུའང་རྒྱུད་སྨིན་གྲོལ་དུ་མཛད་པར་ནུས་པས་རྣམ་པར་ཐར་པ་བསམ་གྱིས་མི་ཁྱབ་སྟེ།
1.སློབ་མའི་གཙོ་བོ་འབའ་རོམ་པ་དར་མ་དབང་ཕྱུག་ལས་འབའ་རོམ་བཀའ་བརྒྱུད།
2.ཕག་གྲུ་རྡོ་རྗེ་རྒྱལ་པོ་ལས་ཕག་གྲུ་བཀའ་བརྒྱུད།
3.ཁམས་པ་དབུ་སེའམ་རྗེ་དུས་གསུམ་མཁྱེན་པ་ལས་ཀཾ་ཚང་བཀའ་བརྒྱུད།
4.དབོན་སྒོམ་ཚུལ་ཁྲིམས་སྙིང་པོའི་སློབ་མ་ཞང་ཚལ་པ་བརྩོན་འགྲུས་གྲགས་པ་ལས་ཚལ་པ་བཀའ་བརྒྱུད་དེ་ཆེ་བཞིར་གྲགས་པ་དང་། སྒམ་པོ་རྩ་བའི་གདན་སར་དྭགས་པོ་ཁུ་དབོན་གསུམ། དྭགས་པོ་འདུལ་འཛིན། ཕྱིས་མཁས་གྲུབ་ཆེན་པོ་བཀྲ་ཤིས་རྣམ་རྒྱལ་སོགས་ཟམ་མ་ཆད་པར་བྱོན་པས་དྭགས་པོ་བཀའ་བརྒྱུད་བཅས་ཏེ་ལྔའོ༎ ཕག་གྲུའི་སློབ་མ་འབྲི་སྟག་ཁྲོ་གླིང་གཉིས༎ སྨར་ཡེལ་གཡའ་ཤུག་ཟུང་བཞི་ཡ་བརྒྱད་ལས༎ གླིང་སྲས་འབྲུག་པར་སྟོད་སྨད་བར་དང་གསུམ༎ ཞེས་དཔལ་ལྡན་ཕག་མོ་གྲུ་པ་ནི་སངས་རྒྱས་འཁོར་བ་འཇིག་གམ་ཤཱཀྱའི་རྒྱལ་པོ་རང་ཉིད་དགེ་བའི་བཤེས་གཉེན་གྱི་སྐུར་སྟོན་པ་ཡིན་པས་རྣམ་ཐར་དང་ཕྲིན་ལས་ཚད་བཟུང་དུ་མ་མཆིས་ཀྱང་ཡོངས་གྲགས་སློབ་མ་གདུགས་ཐོགས་ལྔ་བརྒྱར་གྲགས་པའི་གཙོ་བོ་རྣམས་ལས་བཀའ་བརྒྱུད་ཆུང་བརྒྱད་དུ་གྲགས་པ་རྣམས་བྱུང་སྟེ།
སྐྱོབ་པ་འཇིག་རྟེན་གསུམ་གྱི་མགོན་པོ་ལས་འབྲི་གུང་བཀའ་བརྒྱུད།
ཐང་པ་བཀྲ་ཤིས་དཔལ་བ་ལས་སྟག་ལུང་བཀའ་བརྒྱུད།
འགྲོ་མགོན་རྒྱལ་ཚ་ཁུ་དབོན་ལས་ཁྲོ་ཕུ་བཀའ་བརྒྱུད།
གླིང་རས་པངྨ་རྡོ་རྗེ་ལས་གླིང་རས་བཀའ་བརྒྱུད།
ཆོས་རྗེ་སྨར་པ་གྲུབ་ཐོབ་ལས་སྨར་ཚང་བཀའ་བརྒྱུད།
ཡེལ་པ་ཡེ་ཤེས་བརྩེགས་པ་ལས་ཡེལ་པ་བཀའ་བརྒྱུད།
ཟ་ར་བ་ཡེ་ཤེས་སེང་གེ་ལས་གཡའ་བཟང་བཀའ་བརྒྱུད།
སྙེ་ཕུ་གྱེར་སྒོམ་ཆེན་པོ་ལས་ཤུག་གསེབ་བཀའ་བརྒྱུད་དེ་ཟུང་བཞི་ཡ་བརྒྱད་དུ་གྲགས་པ་རྣམས་བྱུང་ཞིང་། རེ་རེ་ལའང་ཆོས་བརྒྱུད་གདན་ས་ཕྲིན་ལས་མཐའ་ཡས་པའི་མཁས་གྲུབ་ཀྱི་ཚང་ཆེན་པོ་བརྡོལ་ཞིང་། ཁྱད་པར་གླིང་རས་ཀྱི་ཐུགས་སྲས་འགྲོ་མགོན་གཙང་པ་རྒྱ་རས་ཀྱི་བུ་སློབ་ཀྱིས་བྱ་རྒོད་པོའི་ཉིན་ལམ་བཅོ་བརྒྱད་ཚུན་ཆད་ཁྱབ་པ་ལས། གཙོ་བོ་རྒོད་ཚང་པ་མགོན་པོ་རྡོ་རྗེ་ལས་སྟོད་འབྲུག་གནམ་གྱི་སྐར་མར་གྲགས་པ་སྟེ། འདིའི་སློབ་བརྒྱུད་ལ་རྒྱལ་བ་ཡང་དགོན་པ་དང་། དེའི་སློབ་བརྒྱུད་ལ་ལ་སྟོད་ཤེས་རབ་མགོན་པོ་དང་འབའ་ར་བ་རྒྱལ་མཚན་བཟང་པོ་སོགས་བྱོན། ལོ་རས་པ་དར་མ་དབང་ཕྱུག་ལས་སྨད་འབྲུག་སའི་དྲེགས་པ། གདན་ས་འཛིན་པའི་སེང་གེ་དགུ་ཚར་ལས་བར་འབྲུག་ཏུ་གྲགས་པ་སོགས་སྨོས་ཀྱི་མི་ལངས་ཤིང་། གཞན་ཡང་དཔལ་ལྡན་ཕག་མོ་གྲུ་བའི་ཞལ་སློབ་ཤེས་རབ་མཐར་ཐུག་སྤར་ཕུ་བ། མེ་ཉག་སྒོམ་རིང་། གྲུབ་ཐོབ་ཉག་རེ་སེའོ༎ འབྱོར་ཆོས་སྐུ་བ་སོགས་ཕྲིན་ལས་རྒྱ་ཆེར་སྐྱོང་བ་པོ་ནི་མཐའ་ཡས་པར་བྱོན་ནོ༎
4.དེ་ལས་ཁྱད་པར་ཀརྨ་ཀཾ་ཚང་བཀའ་བརྒྱུད་ནི། དྲུག་པ་སེང་གེ་དུས་མཁྱེན་རྩ་བའི་བརྒྱུད༎ ཟུར་མང་གནས་མདོ་གསུམ་སྟེ་ཕྱི་མ་ལས༎ ཀར་རྙིང་བརྒྱུད་འཛིན་མདོ་སྨད་ཕལ་ཆེར་ཁྱབ༎ ཞེས་མ་བྱོན་སངས་རྒྱས་དྲུག་པ་སེང་གེའི་ང་རོ་བྱང་ཆུབ་སེམས་དཔའི་ཚུལ་བསྟན་པ་དཔལ་ལྡན་དུས་གསུམ་མཁྱེན་པ། གྲུབ་ཆེན་ཀརྨ་པཀྴི། ཀུན་མཁྱེན་རང་བྱུང་རྡོ་རྗེ་སོགས་ཛམྦུའི་གླིང་དུ་གྲགས་པའི་མི་ཡི་སེང་གེ་སངས་རྒྱས་གཉིས་པའི་སྐྱེས་རབས་ཕྲེང་བ་ད་ལྟ་ཡན་བཅུ་བཞིར་བྱོན་པ་སྐུ་ཕྲེང་རེ་རེའི་རྣམ་ཐར་ཕྲིན་ལས་བུ་སློབ་ཀྱི་གྲངས་ཀྱང་ཚད་བཟུང་བར་མི་ནུས་ཤིང་། གཙོ་བོར་རྟོགས་ལྡན་གྲགས་པ་སེང་གེའི་སྐྱེས་པ་རབས་ཀྱི་ཕྲེང་བ་འོད་དཔག་མེད་དངོས་རྒྱལ་བ་གར་གྱི་དབང་ཕྱུག་ཞྭ་དམར་ཅོད་པན་འཛིན་པ་བཅུ། གོ་ཤྲཱི་དཔལ་འབྱོར་དོན་གྲུབ་གྱི་སྐྱེ་འཕྲེང་གསང་བའི་བདག་པོ་རྒྱལ་ཚབ་ན་རིམ་ལྔ། འགྲོ་མགོན་རས་པ་ཆེན་པོའི་རྣམ་འཕྲུལ་རྒྱལ་ཚབ་བྱམས་མགོན་དངོས་སྣང་སི་ཏུ་རིམ་བཅུ་གསུམ། གཏེར་སྟོན་རིན་ཆེན་གླིང་བའི་སྐྱེ་སྤྲུལ་དཔའ་བོ་ན་རིམ་དགུ། ཏྲེ་ཆེན་ཆོས་ཀྱི་རྒྱ་མཚོའི་སྤྲུལ་སྐུ་ཏྲེ་ཧོ་ན་རིམ་རྣམས་ཀྱིས་འཛིན་སྐྱོང་སྤེལ་གསུམ་མཛད་པ་ཀཾ་ཚང་བཀའ་བརྒྱུད་རྩ་བ་དང་། གྲུབ་ཆེན་ཏེ་ལོ་པས་བརྒྱུད་པ་བཅུ་གསུམ་དུ་ཆིག་བརྒྱུད་རྡོ་རྗེའི་རྒྱས་བཏབ་ནས། བཅུ་གསུམ་ཚང་ནས་རང་ཉིད་ནོར་བདག་པོའི་ཚུལ་གྱིས་ལོངས་སྤྱད་པར་ལུང་བསྟན་པ་བཞིན། རྗེ་ལྔ་པ་དེ་བཞིན་གཤེགས་པའི་ཐུགས་སྲས་རྨ་སེ་རྟོགས་ལྡན་བློ་གྲོས་རིན་ཆེན་ལ་བདེ་མཆོག་མཁའ་འགྲོ་སྙན་བརྒྱུད་ཀྱི་བཀའ་བབས། སློབ་མ་རྟོགས་ལྡན་ཡ་བརྒྱད། འཇའ་མོ་མི་གསུམ་སོགས་བྱོན་ཅིང་། དེ་དག་གི་སྤྲུལ་བརྒྱུད་རྣམས་ཀྱིས་ཆོས་བརྒྱུད་གདན་ས་རིམ་པར་འཛིན་པ་ཟུར་མང་བཀའ་བརྒྱུད། རྗེ་བཅུ་པ་ཆོས་དབྱིངས་རྡོ་རྗེ་དང་གར་དབང་དྲུག་པ་ཆོས་ཀྱི་དབང་ཕྱུག་གི་ཞལ་སློབ་ཐུགས་རྗེ་ཆེན་པོའི་རྣམ་འཕྲུལ་གྲུབ་བརྙེས་ཀརྨ་ཆགས་མེད་ཞབས་ཀྱི་བཀའ་སྲོལ་འཛིན་པ་གནས་མདོ་བཀའ་བརྒྱུད་དེ་གསུམ་དུ་བྱུང་ཞིང་། ཕྱི་མ་གནས་མདོ་ཆགས་མེད་ཞབས་ཐུགས་བསྐྱེད་དེ་རྟེན་འབྲེལ་གྱི་ཁྱད་པར་ལས་ཀར་ལུགས་གཙོར་བྱེད་པ་གནས་མདོ་རྩ་བའི་ཆོས་བརྒྱུད་དང་། རྙིང་ལུགས་གཙོར་བྱེད་པ་དཔལ་ཡུལ་རིག་འཛིན་ཀུན་བཟང་ཤེས་རབ། བི་མའི་རྣམ་འཕྲུལ་ཁམས་པ་རྫོགས་ཆེན་པ་པངྨ་རིག་འཛིན་སོགས་ཀྱི་ཆོས་བརྒྱུད་འཛིན་པས་མདོ་ཁམས་སྨད་ཀྱི་ལྗོངས་ཕལ་ཆེར་ཁྱབ་པར་གྱུར་ཏོ༎