ཐོ་ཞུགས། ཐོ་འགོད།
ཡུས་ཞི་གྲོང་ཁྱེར།སྔ་མའི་པར་གཞི་དེ དཀོན་མཆོག་སྒྲོལ་མ།༡  ནས 2020-05-15 15:28ལ་འགྲུབ།

ཡུས་ཞི་གྲོང་ཁྱེར།

ཡུས་ཞི་གྲོང་ཁྱེར།
ཡུས་ཞི་གྲོང་ཁྱེར་ནི་ཡུན་ནན་ཞིང་ཆེན་མངའ་ཁོངས་ཀྱི་ས་གནས་རིམ་པའི་གྲོང་ཁྱེར་ཞིག་ཡིན་པ་དང་། ཡུན་ནན་ཞིང་ཆེན་གྱི་དབུས་རྒྱུད་དུ་གནས་ཡོད། བྱང་དུ་ཞིང་ཆེན་གྱི་ལྟེ་གནས་ཏེ་ཁུན་མིན་གྲོང་ཁྱེར་དང་སྦྲེལ་ཞིང་། ལྷོ་ནུབ་ཏུ་ཕུའུ་ཨེར་གྲོང་ཁྱེར་དང་འབྲེལ་ཡོད་ཅིང་། ཤར་ལྷོར་ཧུང་ཧུ་ཧ་ཉི་རིགས་དབྱིས་རིགས་རང་སྐྱོང་ཁུལ་ཡོད་ལ། ནུབ་བྱང་ཁྲུའུ་ཞུང་དབྱིས་རིགས་རང་སྐྱོང་ཁུལ་ཡོད། སྤྱིའི་རྒྱ་ཁྱོན་སྤྱི་ལེ་གྲུ་བཞི་མ15285ཟིན་ཡོད། ཡུས་ཞི་གྲོང་ཁྱེར་གྱི་ས་བབ་ནི་ནུབ་བྱང་མཐོ་ལ་ཤར་ལྷོ་དམའ། རི་ཁུལ་དང་། གྲོག་རོང་། ས་མཐོ། གཤོང་ས་བཅས་བསྣོལ་མར་ཆགས་ཤིང་། ཆེས་ཆེ་བའི་འཕྲེད་ཐག་སྤྱི་ལེ172ཡིན། ཆེས་ཆེ་བའི་གཞུང་ཐག་སྤྱི་ལེ163.5ཡིན། ས་ཁུལ་མང་ཆེ་བ་རྒྱ་མཚོའི་ངོས་ལས་མཐོ་ཚད་སྨི1500ནས1800བར་ཡོད། ལོ་རེའི་ཆ་སྙོམས་དྲོད་ཚད་ནི16.4-24.6℃ཡིན་པ་དང་། དགུན་ཁར་གྲང་ངར་མེད། དབྱར་ཁར་ཚ་གདུག་མེད། དུས་བཞི་དཔྱིད་དང་འདྲ། ཡུས་ཞི་ནི་ནེའར་གྱི་ཕ་ཡུལ་དང་། མེ་ཏོག་གི་ཕ་ཡུལ། ས་མཐོའི་ཆུའི་འབྱུར་ཡུལ་བཅས་ཡིན་ལ། ཡུན་ནན་དབུས་རྒྱུད་ཀྱི་དབུས་ཁུལ་དུ་གནས་ཡོད། ཞིང་ཆེན་ཕྱི་རོལ་དང་། ཨེ་ཤ་ཡ་ལྷོ་མ། ཨེ་ཤ་ཡ་ཤར་ལྷོ་བཅས་འབྲེལ་མཐུད་བྱེད་པའི་འགྲིམ་འགྲུལ་ལྟེ་གནས་གལ་ཆེན་ཞིག་ཡིན་ལ། ཡུན་ནན་གྱི་ཟངས་ཐོན་ཁུལ་གལ་ཆེན་ཞིག་ཀྱང་ཡིན། མངའ་ཁོངས་སུ་ཞྭ་ཐེན་ཧྲན་གྱི་གནའ་བོའི་སྐྱེ་དངོས་རིག་གནས་དང་། གནའ་བོའི་ཡུན་ནན་གྱི་རིག་གནས། ས་མཐོའི་ཆུ་ཁུལ་རིག་གནས། ཨའེ་ཀྲེན་རི་བོའི་ལུང་གཞུང་དམར་པོའི་མི་རིགས་ཀྱི་ཡུལ་སྲོལ་རིག་གནས་བཅས་ཡོད། ཡུལ་སྐོར་མཛེས་ལྗོངས་ཁུལ་གཙོ་བོརA4རིམ་པའི་ཡུལ་སྐོར་མཛེས་ལྗོངས་ཁུལ4ཡོད།3Aརིམ་པའི་ཡུལ་སྐོར་མཛེས་ལྗོངས་ཁུལ2དང2Aརིམ་པའི་ཡུལ་སྐོར་མཛེས་ལྗོངས་ཁུལ11བཅས་ཡོད་པ་རེད། སྤྱི་ལོ2016ལོའི་བར་ཡུས་ཞིའི་མངའ་ཁོངས་སུ་ཆུས2དང་རྫོང7ཡོད་པ་དང་། གྲོང་ཨུ་དང་གྲོང་ཁྱེར་སྲིད་གཞུང་ཧུང་ཐ་ཆུས་སུ་བཅའ་སྡོད་བྱས་ཡོད། སྤྱི་ལོ2017ལོར་གྲོང་ཁྱེར་ཡོངས་ཀྱི་རྒྱུན་སྡོད་མི་འབོར་ཁྲི238.1ཟིན་ཡོད། གྲོང་ཁྱེར་དང་གྲོང་རྡལ་ཅན་དུ་འགྱུར་བའི་ཆུ་ཚད50.8%ཡིན་ཞིང་། ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར1415.1ལེགས་གྲུབ་བྱུང་། གྲོང་ཁྱེར་དང་གྲོང་རྡལ་གྱི་རྒྱུན་སྡོད་ཡུལ་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར34880ཟིན་པ་དང་གྲོང་གསེབ་ཀྱི་རྒྱུན་སྡོད་ཡུལ་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར13057ཟིན་ཡོད། སྤྱི་ལོ2018ལོར་རྒྱལ་ཁབ་ཀྱི་འཕྲོད་བསྟེན་གྲོང་ཁྱེར་དུ་བསྐྱར་དུ་གཏན་འཁེལ་བྱས།
གཞི་རྩའི་གནས་ཚུལ།
རྒྱ་ཡིག་གི་མིང་།
玉溪市
ཕྱི་ཡིག་གི་མིང་།
Yuxi City
སྲིད་འཛིན་ས་ཁོངས་ཀྱི་རིགས་དབྱེ།
ས་གནས་རིམ་པའི་གྲོང་ཁྱེར།
ཁོངས་གཏོགས་ས་ཁུལ།
ཀྲུང་གོའི་ཡུན་ནན་ཞིང་ཆེན་གྱི་ལྷོ་ནུབ་རྒྱུད།
མངའ་ཁོངས། 
ཆུས2དང་རྫོང7ཡོད།
སྦྲག་སྲིད་ཨང་རྟགས།
653100
སྲིད་འཛིན་ཁོངས་བགོས་ཚབ་ཨང་།
530400
རླངས་འཁོར་ཚབ་ཨང་།
云F
མི་གྲངས།
སྤྱི་ལོ2017ལོར་མི་འབོར་ཁྲི238.1ཡོད།
རྒྱ་ཁྱོན།
སྤྱི་ལེ་གྲུ་བཞི་མ15285ཡོད།
ནམ་ཟླ།
ཚ་ཁུལ་ཕལ་བའི་དུས་རླུང་ནམ་ཟླ།
ས་ཁོངས་ཁ་པར་ཨང་རྟགས།
0877
ཡུལ་སྐད།
ལྷོ་ནུབ་སྐད།
མེ་འཁོར་འབབ་ཚུགས།
ཡུས་ཞི་འབབ་ཚུགས།
ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར།
སྒོར་དུང་ཕྱུར1415.1（སྤྱི་ལོ2017ལོར）ཡོད།
དཀར་ཆག
1   ལོ་རྒྱུས་འཕེལ་རིམ།
2   སྲིད་འཛིན་ཁོངས་བགོས།
3   ས་ཁམས་ཁོར་ཡུག
3.1 གནས་ཡུལ།
3.2 ས་བབ།
3.3 ནམ་ཟླ།    
4   མི་འབོར་དང་མི་རིགས།     
4.1 མི་འབོར།    
4.2 མི་རིགས།   
5   དཔལ་འབྱོར།
5.1 ཐོན་ལས་དང་པོ།     
5.2 ཐོན་ལས་གཉིས་པ།    
5.3 ཐོན་ལས་གསུམ་པ།   
1 ལོ་རྒྱུས་འཕེལ་རིམ།

མིན་གོའི་སྲིད་ལོ་ལྔ་པར(སྤྱི་ལོ1916ལོ)“ཡུས་ཞི”ནི་ཡུས་ཞི་གྲོང་ཁུལ་གྱི་ཀྲུའུ་ཅང་གཙང་པོའི་ཆུ་འགོའི་གྲས་ཤིག་ཡིན་ཞིང་ཡུས་ཞི་གཙང་པོ་ཆེན་པོའི་ཆུ་བོར་བཞུར་བ་ཡིན།

སྤྱི་ལོ1949ལོའི་ཟླ12པའི་ཚེས9ལ། ལུའུ་ཧན་གྱིས་དམག་དཔུང་ཁྲིད་ནས་འོས་ལངས་བྱས་ཤིང་། ཡུན་ནན་ཞི་བས་བཅིངས་འགྲོལ་བྱས། ཟླ12པའི་ཚེས18ཉིན། ཡུས་ཞི་དམག་དོན་དོ་དམ་ཨུ་ཡོན་ལྷན་ཁང་བཙུགས་པ་དང་། ཡུས་ཞི་ཞི་བས་བཅིངས་འགྲོལ་བཏང་། 

སྤྱི་ལོ1950ལོའི་ཟླ1པོའི་ཚེས1ཉིན། ཡུན་ནན་དབུས་རྒྱུད་ས་ཁུལ་གྱི་མི་དམངས་སྲིད་འཛིན་ཀྲོན་ཡོན་ཀུང་ཧྲུའུ་དང་ཡུས་ཞི་རྫོང་མི་དམངས་སྲིད་གཞུང་བཙུགས།   

སྤྱི་ལོ1997ལོའི་ཟླ12པའི་ཚེས13ཉིན་ཡུས་ཞི་ས་ཁུལ་མེད་པར་བྱས་ནས་ས་གནས་རིམ་པའི་ཡུས་ཞི་གྲོང་ཁྱེར་བཙུགས། རྫོང་རིམ་པའི་ཡུས་ཞི་གྲོང་ཁྱེར་མེད་པར་བྱས་ནས་ཧུང་ཐ་ཆུས་བཙུགས།

2 སྲིད་འཛིན་ཁོངས་བགོས།

མིན་གོའི་སྲིད་ལོ་དང་པོར(སྤྱི་ལོ1912ལོ)ཞིན་ཞིང་རྫོང་བཙུགས་ཤིང་ཡུན་ནན་ཞིང་ཆེན་གྱི་མངའ་ཁོངས་སུ་གཏོགས་པར་བྱས།     མིན་གོའི་སྲིད་ལོ་གཉིས་པར(སྤྱི་ལོ1913ལོ)ཞུས་ན་རྫོང་བཙུགས་ནས་ཡུན་ནན་ཞིང་ཆེན་གྱི་མངའ་ཁོངས་སུ་གཏོགས་པར་བྱས།     མིན་གོའི་སྲིད་ལོ་ལྔ་པར(སྤྱི་ལོ1916ལོ)ཡུས་ཞི་རྫོང་བཙུགས་ནས་ཡུན་ནན་ཞིང་ཆེན་གྱི་མངའ་ཁོངས་སུ་གཏོགས་པར་བྱས།     སྤྱི་ལོ1958ལོའི་ཟླ10པར་ཡུས་ཞི་དང་ཅང་ཁྲོན་རྫོང་གཉིས་ཟླ་སྒྲིལ་བཏང་ནས་ཡུས་ཞི་རྫོང་དུ་འབོད།     སྤྱི་ལོ1961ལོའི་ཟླ10པར་ཡུས་ཞི་དང་ཅང་ཁྲོན་རྫོང་གཉིས་སྔར་བཞིན་སོ་སོར་གནས།     སྤྱི་ལོ1983ལོའི་ཟླ9པའི་ཚེས9ཉིན། ཡུས་ཞི་རྫོང་ནས་རྫོང་རིམ་པའི་ཡུས་ཞི་གྲོང་ཁྱེར་བཙུགས།     སྤྱི་ལོ1998ལོར་རྒྱལ་སྲིད་སྤྱི་ཁྱབ་ཁང་གི་ཆོག་མཆན་ཐོབ་པ་བརྒྱུད་ཡུས་ཞི་ས་ཁུལ་མེད་པར་བྱས་ནས་ས་གནས་རིམ་པའི་ཡུས་ཞི་གྲོང་ཁྱེར་བཙུགས་པ་དང་། ཡུས་ཞི་གྲོང་ཁྱེར་གྱི་མངའ་ཁོངས་སུ་ཧུང་ཐ་ཆུས་དང་། ཅང་ཁྲོན་རྫོང་། ཁྲེང་ཅང་རྫོང་། ཐུང་ཧའེ་རྫོང་། ཧྭ་ཉིང་རྫོང་། དབྱི་མོན་རྫོང་། ཨོ་ཧྲན་དབྱིས་རིགས་རང་སྐྱོང་རྫོང་། ཞིན་ཕིང་དབྱིས་རིགས་ཏའེ་རིགས་རང་སྐྱོང་རྫོང་། ཡོན་ཅང་ཧ་ཉི་རིགས་དབྱིས་རིགས་ཏའེ་རིགས་རང་སྐྱོང་རྫོང་བཅས་ཡོད།     སྤྱི་ལོ2015ལོའི་ཟླ12པའི་ཚེས3ཉིན་རྒྱལ་སྲིད་སྤྱི་ཁྱབ་ཁང་གིས་ཅང་ཁྲོན་རྫོང་མེད་པར་བཟོ་རྒྱུའི་མཆན་འགོད་བཀའ་ལན་གནང་བ་རེད། ཡུས་ཞི་གྲོང་ཁྱེར་ཅང་ཁྲོན་ཆུས་བཙུགས་ཏེ་དེ་སྔའི་ཅང་ཁྲོན་རྫོང་གི་སྲིད་འཛིན་མངའ་ཁོངས་ནི་ཅང་ཁྲོན་ཆུས་ཀྱི་སྲིད་འཛིན་མངའ་ཁོངས་ཡིན། ཅང་ཁྲོན་ཆུས་མི་དམངས་སྲིད་གཞུང་གི་སྲང་ལམ་ཁྲོམ་གཞུང་དུ་སྡོད་པའི་ལམ34ར་ཡོད།     སྤྱི་ལོ2019ལོའི་ཟླ12པའི་ཚེས13ཉིན་རྒྱལ་སྲིད་སྤྱི་ཁྱབ་ཁང་གི་ཆོག་མཆན་ཐོབ་པ་བརྒྱུད། དམངས་སྲིད་པུའུ་ཡིས་མཆན་འགོད་བཀའ་ལན་གནང་ནས་ཁྲེང་ཅང་རྫོང་དུ་རྫོང་རིམ་པའི་ཁྲེང་ཅང་གྲོང་ཁྱེར་བཙུགས་ཡོད། དེ་སྔའི་ཁྲེང་ཅང་རྫོང་གི་སྲིད་འཛིན་མངའ་ཁོངས་ནི་ཁྲེང་ཅང་གྲོང་ཁྱེར་གྱི་སྲིད་འཛིན་མངའ་ཁོངས་ཡིན་པ་དང་། ཁྲེང་ཅང་གྲོང་ཁྱེར་མི་དམངས་སྲིད་གཞུང་གི་ཧྥེང་ལུའུ་ཁྲོམ་གཞུང་གི་ཧྥེང་ཞང་ལམ་བྱང་རྒྱུད་ཨང26པར་ཡོད། ཁྲེང་ཅང་གྲོང་ཁྱེར་ནི་ཡུན་ནན་ཞིང་ཆེན་གྱི་ཐད་གཏོགས་མངའ་ཁོངས་དང་། ཡུས་ཞི་གྲོང་ཁྱེར་གྱིས་ཚབ་བྱས་ནས་དོ་དམ་བྱས།     སྤྱི་ལོ2020ལོའི་ཟླ2པའི་ཚེས19ཉིན་ཁྲེང་ཅང་རྫོང་གྲོང་ཁྱེར་དུ་བསྒྱུར་བའི་ཚོགས་འདུ་བརྙན་ལམ་གྱི་རྣམ་པའི་ཐོག་ནས་ཡུས་ཞི་གྲོང་ཁྱེར་དུ་འཚོགས་པ་རེད།

3 ས་ཁམས་ཁོར་ཡུག
3_1 གནས་ཡུལ།

ཡུས་ཞི་གྲོང་ཁྱེར་ནི་ཡུན་ནན་ཞིང་ཆེན་མངའ་ཁོངས་ཀྱི་ས་གནས་རིམ་པའི་གྲོང་ཁྱེར་ཞིག་ཡིན་པ་དང་། ཡུན་ནན་ཞིང་ཆེན་གྱི་དབུས་རྒྱུད་དུ་གནས་ཡོད། བྱང་དུ་ཞིང་ཆེན་གྱི་ལྟེ་གནས་ཏེ་ཁུན་མིན་གྲོང་ཁྱེར་དང་སྦྲེལ་ཞིང་། ལྷོ་ནུབ་ཏུ་ཕུའུ་ཨེར་གྲོང་ཁྱེར་དང་འབྲེལ་ཡོད་ཅིང་། ཤར་ལྷོར་ཧུང་ཧུ་ཧ་ཉི་རིགས་དབྱིས་རིགས་རང་སྐྱོང་ཁུལ་ཡོད་ལ། ནུབ་བྱང་ཁྲུའུ་ཞུང་དབྱིས་རིགས་རང་སྐྱོང་ཁུལ་ཡོད། སྤྱིའི་རྒྱ་ཁྱོན་སྤྱི་ལེ་གྲུ་བཞི་མ15285ཟིན་ཡོད།  

3_2 ས་བབ།

ཡུས་ཞི་གྲོང་ཁྱེར་གྱི་ས་བབ་ནི་ནུབ་བྱང་མཐོ་ལ་ཤར་ལྷོ་དམའ། རི་ཁུལ་དང་། གྲོག་རོང་། ས་མཐོ། གཤོང་ས་བཅས་བསྣོལ་མར་ཆགས་ཤིང་། ཆེས་ཆེ་བའི་འཕྲེད་ཐག་སྤྱི་ལེ172ཡིན། ཆེས་ཆེ་བའི་གཞུང་ཐག་སྤྱི་ལེ163.5ཡིན། ས་ཁུལ་མང་ཆེ་བ་རྒྱ་མཚོའི་ངོས་ལས་མཐོ་ཚད་སྨི1500ནས1800བར་ཡོད། ལོ་རེའི་ཆ་སྙོམས་དྲོད་ཚད་ནི16.4-24.6℃ཡིན་པ་དང་། དགུན་ཁར་གྲང་ངར་མེད། དབྱར་ཁར་ཚ་གདུག་མེད། དུས་བཞི་དཔྱིད་དང་འདྲ།

3_3 ནམ་ཟླ།    

ཡུས་ཞི་གྲོང་ཁྱེར་ནི་འཕྲེད་ཐིག་དམའ་བའི་ཁུལ་དུ་གནས་ཡོད། ཚ་ཁུལ་ཕལ་བའི་དུས་རླུང་གི་ནམ་ཟླའི་ཁོངས་སུ་གཏོགས། གནམ་གཤིས་ནི་རྙོག་འཛིང་ཆེ་བའི་ས་དབྱིབས་དང་དེ་བཞིན་ཧིན་རྡུ་རྒྱ་མཚོ་ཆེན་མོ་དང་། བྱང་རྒྱུད་མཚོ་ཁུག་གི་དྲོད་རླན་དང་སྐམ་ཤས་ཆེ་བའི་རླུང་རྒྱུན་གྱིས་ཕྱོགས་བསྡུས་ཤུགས་རྐྱེན་དང་འགྱུར་ལྡོག་འབྱུང་བཞིན་ཡོད། དགུན་དཔྱིད་སྐམ་ཞིང་དང་དབྱར་སྟོན་ཆར་དུས་དང་དྲང་འཕྱང་གི་ཤུགས་རྐྱེན་ཐེབས་པ་བཅས་ཀྱིས་གནམ་གཤིས་འགྱུར་ལྡོག་སྣ་མང་བའི་ཁྱད་ཆོས་ལྡན་ཡོད། ལོ་རེའི་ཆ་སྙོམས་དྲོད་ཚད15.4-24.2℃ཡིན། མཐོ་ཤོས32.2℃དང་དམའ་ཤོས-3℃ཡིན། ལོ་རེའི་ཆ་སྙོམས་ཀྱི་ཆར་ཆུ་འབབ་ཚད787.8-1000mmmཡིན། མང་ཆེ་བ་ཟླ6-10བར་དང་། ལྷག་པར་དུ་ཆར་དུས་ཟླ5-10བར་ཡིན། དྲག་ཆར་འབབ་ཆེ་བ་དང་དྲག་ཆར་འབབ་མང་ཤོས་ཟླ6ནས8པའི་བར་ཡིན་པ་དང་ཁྱབ་ཁོངས་ཆུང་བ་དང་ཤུགས་ཚད་ཆེ་བའི་དྲག་ཆར་ཡང་ཡང་ཐོན། ལྟོས་བཅས་ཀྱི་རླན་ཚད75.3%ཡིན་པ་དང་། བལྟོས་མེད་རླན་ཚད་ཧའོ་པ13.6ཡིན། ལོ་རེའི་ཆ་སྙོམས་རླངས་འགྱུར་ཚད1801mmཡིན།

4 མི་འབོར་དང་མི་རིགས།     
4_1 མི་འབོར།    

སྤྱི་ལོ2017ལོར་གྲོང་ཁྱེར་ཡོངས་ཀྱི་རྒྱུན་སྡོད་མི་འབོར་ཁྲི238.1ཟིན་ཡོད། ལོ་གོང་མའི་ལོ་མཇུག་ལས་མི་ཁྲི0.6འཕར་བ་དང0.25%འཕར་ཡོད། དེའི་ནང་སྐྱེས་པའི་མི་འབོར་ཁྲི122.3ཟིན་པ་དེས་སྤྱིའི་མི་འབོར་གྱི51.4%བཟུང་བ་དང་། བུད་མེད་མི་འབོར་ཁྲི115.8ཟིན་པ་དེས་སྤྱིའི་མི་འབོར་གྱི48.6%བཟུང་ཡོད། རང་བྱུང་འཕར་ཚད5.99‰ཡིན་པ་དེ་སྔ་ལོ་ལས་བརྒྱ་ཆའི་གྲངས0.01འཕར་ཡོད། ལོ་མཇུག་ཏུ་གྲོང་ཁྱེར་ཡོངས་ཀྱི་གྲོང་ཁྱེར་དང་གྲོང་རྡལ་གྱི་མི་འབོར་ཁྲི121.5ཟིན་པ་དང་གྲོང་གསེབ་ཀྱི་མི་འབོར་ཁྲི116.6ཟིན་ཡོད། ལོ་མཇུག་ཏུ་གྲོང་ཁྱེར་ཡོངས་ཀྱི་གྲོང་ཁྱེར་དང་གྲོང་རྡལ་ཅན་གྱི་ཆུ་ཚད50.8%ཟིན་ནས་ལོ་གོང་མ་ལས་བརྒྱ་ཆའི་གྲངས1.9འཕར་ཡོད།

4_2 མི་རིགས།   

སྤྱི་ལོ2016ལོར་གྲངས་ཉུང་མི་རིགས་ཀྱིས་སྤྱིའི་མི་འབོར་གྱི34.4%བཟུང་བ་དང་། དབྱིས་རིགས་དང་། ཧ་ཉི་རིགས། ཏའེ་རིགས། ཧུའེ་རིགས། པའེ་རིགས། སོག་རིགས། མིའོ་རིགས། ལ་ཧུའུ་རིགས་བཅས་ནི་མི་རབས་ནས་མི་རབས་བར་གྲངས་ཉུང་མི་རིགས་གནས་ཡོད།

5 དཔལ་འབྱོར།
5_1 ཐོན་ལས་དང་པོ།     

སྤྱི་ལོ2017ལོར། ཡུས་ཞི་གྲོང་ཁྱེར་དུ་ཞིང་ནགས་འབྲོག་ཉ་ལས་བཅས་ཀྱི་རིན་ཐང་འཕར་མ་སྒོར་དུང་ཕྱུར143.7ཟིན་པ་དེ་བསྡུར་གཞི་ཡོད་པའི་རིན་གོང་ལྟར་བརྩིས་ན6.3%འཕར་ཡོད། དེའི་ནང་ཞིང་ལས(འདེབས་འཛུགས་ལས་རིགས)ཀྱི་རིན་ཐང་འཕར་མ་སྒོར་དུང་ཕྱུར93.4ཟིན་ནས5.9%འཕར་བ་དང་། ནགས་ལས་ཀྱི་རིན་ཐང་འཕར་མ་སྒོར་དུང་ཕྱུར4.2ཟིན་ནས7.3%འཕར། འབྲོག་ལས་ཀྱི་རིན་ཐང་འཕར་མ་སྒོར་དུང་ཕྱུར42.3ཟིན་ནས7.3%འཕར། ཉ་ལས་ཀྱི་འཕར་ཐང་སྒོར་དུང་ཕྱུར2.1ཟིན་ནས4.4%འཕར། ཞིང་ནགས་འབྲོག་ཉ་ལས་གསུམ་གྱི་ཞབས་ཞུའི་ལས་རིགས་ཀྱི་འཕར་ཐང་སྒོར་དུང་ཕྱུར1.7ཡིན་པས7.5%འཕར།      སྤྱི་ལོ2017ལོར་ཡུས་ཞི་གྲོང་ཁྱེར་གྱི་འབྲུ་རིགས་ཐོན་འབོར་སྤྱི་རྒྱ་ཁྲི62790ཟིན་ནས0.6%འཕར་བ་དང་། རྡོ་ཐ་སྤྱིའི་ཐོན་འབོར་སྤྱི་རྒྱ་ཁྲི7533ཟིན་ནས6.1%ཆག སྣུམ་རྒྱུ་ཐོན་ཚད་སྤྱི་རྒྱ་ཁྲི3867ཟིན་ནས1.0%ཆག སྐྱེད་ཚལ་ཤིང་འབྲས་ཐོན་ཚད་སྤྱི་རྒྱ་ཁྲི75961ཟིན་ནས13.6%འཕར། བུར་ཤིང་ཐོན་ཚད་སྤྱི་རྒྱ་ཁྲི74513ཟིན་ནས1.3%ཆག སྔོ་ཚལ་ཐོན་ཚད་སྤྱི་རྒྱ་ཁྲི240216ཟིན་ནས4.6%འཕར། སྟར་ཀའི་ཐོན་ཚད་སྤྱི་རྒྱ་ཁྲི1351ཟིན་ནས16.4%འཕར་ཡོད།      སྤྱི་ལོ2017ལོར། ཡུས་ཞི་གྲོང་ཁྱེར་གྱི་ཤ་སྒོང་འོ་མའི་སྤྱིའི་ཐོན་འབོར་ཏུན་ཁྲི52.6ཟིན་ནས9.7%འཕར་ཡོད། དེའི་ནང་ཤ་རིགས་ཐོན་ཚད་ཏུན་ཁྲི37.8ཟིན་ནས12.0%འཕར། བྱ་སྒོང་ཐོན་ཚད་ཏུན་ཁྲི13.9ཟིན་ནས4.2%འཕར། འོ་མའི་ཐོན་ཚད་ཏུན་ཁྲི0.8ཟིན་ནས5.0%འཕར་ཡོད། ཆུ་ཐོན་དངོས་རྫས་ཀྱི་ཐོན་ཚད་ཏུན་ཁྲི1.72ཡིན་ཞིང2.2％འཕར་སྣོན་བྱུང་།  

5_2 ཐོན་ལས་གཉིས་པ།    

སྤྱི་ལོ2017ལོར་ཡུས་ཞི་གྲོང་ཁྱེར་གྱིས་བཟོ་ལས་ཀྱི་རིན་ཐང་འཕར་མ་སྒོར་དུང་ཕྱུར662.5ཟིན་པ་རེད། བསྡུར་གཞི་ཡོད་པའི་རིན་གོང་ལྟར་བརྩིས་ན7.1％འཕར་བ་དང་། GDPབརྒྱ་ཆའི་གཞི་གྲངས3.6འཕར་བར་སྐུལ་ཁྲིད་བྱས་ཡོད། དཔལ་འབྱོར་འཕར་སྣོན་ཡོང་བར་ལེགས་སྐྱེས་འབུལ་ཚད38.1％ཟིན་ཡོད།  སྤྱི་ལོ2017ལོར་གྲོང་ཁྱེར་ཡོངས་ཀྱི་གཞི་ཁྱོན་ཡན་གྱི་བཟོ་ལས་ཁེ་ལས433ཡོད། གཙོ་གཉེར་ལས་སྒོའི་ཡོང་འབབ་སྒོར་དུང་ཕྱུར1419ཟིན་ནས17.1%འཕར་ཡོད། རིན་ཐང་འཕར་མ་སྒོར་དུང་ཕྱུར623.7བྱུང་ནས7.2%འཕར་ཡོད། ཡང་བའི་བཟོ་ལས་དང་ལྕི་བའི་བཟོ་ལས་ལ་དབྱེ་ནས་བལྟས། ཡང་བའི་བཟོ་ལས་ཀྱི་འཕར་ཐང་སྒོར་དུང་ཕྱུར453.1མངོན་འགྱུར་བྱུང་། 2.8%འཕར་བའི་ནང་རྡོ་ཐའི་ཐོན་རྫས་ལས་རིགས་ལ་སྒོར་དུང་ཕྱུར393.6ལེགས་གྲུབ་བྱུང་ནས0.4％འཕར་ཡོད། ལྕི་བའི་བཟོ་ལས་ཀྱི་འཕར་ཐང་སྒོར་དུང་ཕྱུར170.6ཟིན་ནས21.9%འཕར་ཡོད། དེའི་ནང་ལྕགས་རིགས་ནག་པོའི་གཏེར་ཁ་སྔོག་འདོན་འདེམས་བསྐོའི་ལས་རིགས་ལ་སྒོར་དུང་ཕྱུར255.1བཏང་ནས13.2%འཕར་བ་དང་། ལྕགས་རིགས་ནག་པོ་བཙོ་སྦྱང་དང་གནོན་བཙིར་ལས་སྣོན་ལས་རིགས་ལ་སྒོར་དུང་ཕྱུར347.9བཏང་ནས8.5%འཕར། མདོག་ལྡན་ལྕགས་རིགས་གཏེར་ཁ་སྔོག་འདོན་འདེམས་བསྐོའི་ལས་རིགས་ལ་སྒོར་དུང་ཕྱུར106.3བཏང་ནས14.7%འཕར། མདོག་ལྡན་ལྕགས་རིགས་བཙོ་སྦྱང་དང་གནོན་བཙིར་ལས་སྣོན་ལས་རིགས་ལ་སྒོར་དུང་ཕྱུར་176.3བཏང་ནས་39.1%འཕར་ཡོད། བཟོ་ལས་ཐོན་རྫས་ཁག་ཅིག་གི་ཐོན་འབོར་འཕར་ཚད་ཅུང་མགྱོགས། དེའི་ནང་འཕར་ཚད་མཐོ་ཤོས་ནི་ལིན་གཏེར་རྡོ62.9%འཕར་ཡོད། དེ་རྗེས་མུ་ཟིའི་སྐྱུར33.3%འཕར་བ་དང་། དེ་བྱིངས་འགྱིག་གི་ཐོན་རྫས19.6%འཕར་བ་དང་། ལྕགས་རྡོའི་མ་བཅོས་གཏེར་འབོར12.8%འཕར། གློག་གནོན་སྒྱུར་ཆས11.7%འཕར་བ་བཅས་རེད།      སྤྱི་ལོ2017ལོར་ཡུས་ཞི་གྲོང་ཁྱེར་འཛུགས་སྐྲུན་ལས་རིགས་ཀྱི་རིན་ཐང་འཕར་མ་སྒོར་དུང་ཕྱུར67.4ཟིན་ནས་ད་ལྟའི་རིན་གོང་ལྟར་བརྩིས་ན་25.3%འཕར་ཡོད། གྲོང་ཁྱེར་དེ་ཡོངས་ཀྱི་བློ་རིག་ལྡན་པའི་ཨར་ལས་ཁེ་ལས191ཡོད་པ་རེད། བློ་རིག་བཟོ་སྐྲུན་ཁེ་ལས་ཀྱི་དུས་མཇུག་ཏུ་མི་གྲངས54913ཡོད་པའི་ནང་བཟོ་སྐྲུན་ལག་རྩལ་མི་སྣ10699ཡོད། བསྡུར་ཚད19.5％ཡིན།  སྤྱི་ལོ2017ལོར་འོས་ཐོབ་ཡན་གྱི་ཨར་སྐྲུན་ཁེ་ལས་ཀྱི་སྡོད་ཁང་རྒྱ་ཁྱོན་སྨི་གྲུ་བཞི་མ་ཁྲི771.7ཟིན་ནས8.2%འཕར། སྡོད་ཁང་ལས་མཇུག་འགྲིལ་བའི་རྒྱ་ཁྱོན་སྨི་གྲུ་བཞི་མ་ཁྲི631.3ཟིན་ནས 20.1% འཕར།

5_3 ཐོན་ལས་གསུམ་པ།   

སྤྱི་ལོ2017ལོར་ཡུས་ཞི་གྲོང་ཁྱེར་དུ་སྤྱི་ཚོགས་ཀྱི་འཛད་རྫས་སིལ་ཚོང་བསྡོམས་འབོར་སྒོར་དུང་ཕྱུར367.4ཟིན་ནས12.5%འཕར་ཡོད། བྲིན་ཚོང་ས་ཁུལ་ནས་བལྟས་ན། གྲོང་ཁྱེར་དང་གྲོང་རྡལ་དུ་འཛད་རྫས་སིལ་ཚོང་བྱེད་ཚད་སྒོར་དུང་ཕྱུར314.7ཟིན་ནས12.5%འཕར་བ་དང་། གྲོང་གསེབ་ལ་སྒོར་དུང་ཕྱུར52.7བྱུང་ནས12.5%འཕར་ཡོད། འཛད་སྤྱོད་རྣམ་པའི་ཐོག་ནས་བལྟས་ན། བཟའ་བཏུང་ཡོང་འབབ་སྒོར་དུང་ཕྱུར66.3ཟིན་ནས12.4%འཕར། ཚོང་ཟོག་སིལ་ཚོང་སྒོར་དུང་ཕྱུར301.1ཟིན་ནས12.5%འཕར་ཡོད།     སྤྱི་ལོ2017ལོར། ཡུས་ཞི་གྲོང་ཁྱེར་གྱིས་ཕྱི་ཕྱོགས་ཚོང་དོན་གྱི་རང་གཉེར་ཕྱིར་གཏོང་ནང་འདྲེན་བསྡོམས་འབོར་ཨ་སྒོར་ཁྲི210099ཟིན་ནས4.0%འཕར་ཡོད། དེའི་ནང་ཕྱིར་གཏོང་ཨ་སྒོར་ཁྲི206353ཟིན་ནས3.6%འཕར། ནང་འདྲེན་ཨ་སྒོར་ཁྲི3746ནང་འདྲེན་བྱས་ནས34.7%འཕར་ཡོད།

དཔྱད་གཞིའི་ཡིག་ཆ།

བརྡ་འགྲེལ་གདོང་འཛར།

ཡུན་ནན་ཞིང་ཆེན། ཡུས་ཞི་གྲོང་ཁྱེར། ས་གནས་རིམ་པའི་གྲོང་ཁྱེར།