ཐོ་ཞུགས། ཐོ་འགོད།
ཧ་ཨེར་པིན་གྲོང་ཁྱེར།སྔ་མའི་པར་གཞི་དེ སེང་ལྡེང་མཚོ།  ནས 2020-01-13 09:13ལ་འགྲུབ།

ཧ་ཨེར་པིན་གྲོང་ཁྱེར།

ཧ་ཨེར་པིན་གྲོང་ཁྱེར།
ཧ་ཨེར་པིན་གྱི་མིང་གཞན་ལ་འཁྱགས་རོམ་གྲོང་ཁྱེར་ཟེར་བ་དང་། ཧའེ་ལུང་ཅང་ཞིང་ཆེན་གྱི་ལྟེ་གནས་དང་། རིམ་པ་གཉིས་པའི་ཞིང་ཆེན་གྲོང་ཁྱེར། ཧ་ཨེར་པིན་གྲོང་ཁྱེར་གྱི་ལྟེ་བའི་གྲོང་ཁྱེར་བཅས་ཡིན་པ་དང་། རྒྱལ་སྲིད་སྤྱི་ཁྱབ་ཁང་གིས་གཏན་འཁེལ་བྱས་པའི་ཀྲུང་གོའི་བྱང་ཤར་ས་ཁུལ་གྱི་ལྟེ་བའི་གྲོང་ཁྱེར་གལ་ཆེན་དང་རྒྱལ་ཁབ་བཟོ་སྐྲུན་ལས་རིགས་ཀྱི་རྟེན་གཞི་གལ་ཆེན་ལ་མཆན་འགོད་བཀའ་ལན་གནང་། སྤྱི་ལོ2018ལོའི་བར་གྲོང་ཁྱེར་དེ་ཡོངས་ཀྱི་ཁོངས་གཏོགས་སུ་ཆུས9དང་། རྫོང7 རྫོང་རིམ་པའི་གྲོང་ཁྱེར2བཅས་ཡོད། སྤྱིའི་རྒྱ་ཁྱོན་སྟོང་སྨི་ངོས་གྲུ་བཞི་མ53100དང་། འཛུགས་སྐྲུན་ཁུལ་གྱི་རྒྱ་ཁྱོན་ལ་སྟོང་སྨི་ངོས་གྲུ་བཞི་མ435.28ཡོད། སྤྱི་ལོ2018ལོའི་ལོ་མཇུག་ཏུ་ཐེམ་ཐོའི་མི་འབོར་ཁྲི951.5ཟིན་པ་དེས་རྒྱལ་ཡོངས་ཀྱི་ས་ཆའི་རྒྱ་ཁྱོན་གྱི་བརྒྱ་ཆའི0.55ཟིན་པ། རྒྱལ་ཡོངས་ཀྱི་སྤྱིའི་མི་འབོར་གྱི་བརྒྱ་ཆའི0.7ཟིན་པ། ཧ་ཨེར་པིན་ནི་ཀྲུང་གོའི་བྱང་ཤར་ས་ཁུལ་དང་། ཨེ་ཤེ་ཡའི་བྱང་ཤར་གྱི་དབུས་ཁུལ་དང་། ཀྲུང་གོའི་བྱང་ཤར་བྱང་རྒྱུད་ཀྱི་ཆབ་སྲིད་དང་། དཔལ་འབྱོར། རིག་གནས་བཅས་ཀྱི་ལྟེ་གནས་ཤིག་ཡིན། ཡོ་རོབ་དང་ཨེ་ཤེ་ཡའི་སྐམ་ས་ཆེ་མོའི་ཟམ་ཆེན་གྱི་མུ་ཏིག་དང་། ཡོ་རོབ་དང་ཨེ་ཤེ་ཡའི་སྐམ་སའི་ཟམ་ཆེན་དང་པོ་དང་བར་སྣང་བར་ཁྱམས་ཀྱི་ལྟེ་གནས་གལ་ཆེན། ཧཱ་ཏཱ་ཆི་བཟོ་ལས་བར་ཁྱམས་ཀྱི་འགོ་འཛུགས་ས། རྒྱལ་ཁབ་ཀྱི་འཐབ་ཇུས་གཏན་འཁེལ་གནས་ཐིག་གི་མཐའ་རྒྱུད་གསར་སྤེལ་སྒོ་འབྱེད་ལྟེ་བའི་གྲོང་ཁྱེར། ཨེ་ཤེ་ཡ་བྱང་ཤར་ས་ཁོངས་ཀྱི་ལྟེ་བའི་གྲོང་ཁྱེར། དེ་བཞིན་ཨུ་རུ་སུར་མཉམ་ལས་བྱེད་པའི་ལྟེ་བའི་གྲོང་ཁྱེར་བཅས་ཡིན།
གཞི་རྩའི་གནས་ཚུལ།
རྒྱ་ཡིག་གི་མིང་།
哈尔滨
ཕྱི་ཡིག་གི་མིང་།
Harbin（英）、Харбин（俄）
སྲིད་འཛིན་ས་ཁོངས་ཀྱི་རིགས་དབྱེ།
རིམ་པ་གཉིས་པའི་ཞིང་ཆེན་གྲོང་ཁྱེར།
ཁོང་གཏོགས་ས་ཁུལ།
ཧའེ་ལུང་ཅང་ཞིང་ཆེན།
མངའ་ཁོངས།
ཆུས9དང་། རྫོང7 རྫོང་རིམ་པའི་གྲོང་ཁྱེར2བཅས་ཡོད།
སྲིད་གཞུང་གནས་ཡུལ།
སུང་པེ་ཆུས་དུས་རབས་ལམ་ཆེན་ཨང་དང་པོ།
ས་ཁོངས་ཁ་པར་ཨང་རྟགས།
0415
སྦྲག་སྲིད་ཨང་རྟགས།
150000
གནས་ཡུལ།
ཀྲུང་གོའི་བྱང་ཤར་བདེ་ཐང་། ཧའེ་ལུང་ཅང་ཞིང་ཆེན་གྱི་དབུས་ལྷོ།
རྒྱ་ཁྱོན།
སྟོང་སྨི་གྲུ་བཞི་མ་ཁྲི5.31ཡོད།
མི་གྲངས།
ཁྲི951.5(སྤྱི་ལོ2018ལོའི་ལོ་མཇུག་ཏུ་ཐེམ་ཐོའི་མི་གྲངས )
གནམ་གཤིས།
དྲོ་རྒྱུད་དུས་རླུང་ནམ་ཟླ།
མཛེས་ལྗོངས་གྲགས་ཅན།
ཉི་མའི་གླིང་ཕྲན། ཀྲུང་དབྱང་ཁྲོམ་གཞུང་། ཡ་པུའུ་ལི་གངས་ཤུད་ར་བ། གངས་འཁྱགས་འཛམ་གླིང་ཆེན་པོ། ཀྲུང་ཧྭ་པ་ལོ་ཁེ་སོགས་ཡོད།
གནམ་གྲུ་ཐང་།
ཧ་ཨེར་པིན་ཐའེ་ཕིང་རྒྱལ་སྤྱིའི་གནམ་ཐང་།
མེ་འཁོར་འབབ་ཚུགས།
ཧ་ཨེར་པིན་འབབ་ཚུགས། ཧ་ཨེར་པིན་ནུབ་ཚུགས། ཧ་ཨེར་པིན་བྱང་ཚིགས། ཧ་ཨེར་པིན་ཤར་ཚུགས་སོགས་ཡོད།
སྲིད་འཛིན་ཚབ་གྲངས།
230100
རླངས་འཁོར་ཚབ་ཨང་།
ཧའེA ཧའེL
དཀར་ཆག
1   ངོ་སྤྲོད།
2   ལོ་རྒྱུས་འཕེལ་རིམ།
3   སྲིད་འཛིན་ས་ཁུལ་གྱི་དབྱེ་མཚམས།
4   ས་ཁམས་ཁོར་ཡུག
4.1 གནས་སའི་ཡུལ་ཁོངས།
4.2 ས་དབྱིབས། 
4.3 གནམ་གཤིས།
4.4 རི་ཆུ་རིགས་གནས།
5   རང་བྱུང་ཐོན་ཁུངས།
5.1 གཏེར་རྫས་ཐོན་ཁུངས།
5.2 རྩི་ཤིང་ཐོན་ཁུངས།
5.3 རི་དྭགས་སྐྱེས་ཁུངས།
6   མི་གྲངས།
6.1 མི་གྲངས།
6.2 མི་རིགས།
6.3 དཔལ་འབྱོར།
7   འགྲིམ་འགྲུལ་སྐྱེལ་འདྲེན།
7.1 གཞུང་ལམ།
7.2 ལྕགས་ལམ།
7.3 མཁའ་སྐྱོད།
7.4 ཆུ་ཐོག་སྐྱེལ་འདྲེན།
8   གྲོང་ཁུལ་འགྲིམ་འགྲུལ།
8.1 ས་འོག་ལྕགས་ལམ།
8.2 སྤྱི་སྤྱོད་རླངས་འཁོར།
9   སྤྱི་ཚོགས་ལས་དོན།
9.1 སློབ་གསོའི་ལས་དོན།
9.2 ཚན་རིག་ལག་རྩལ།
9.3 ལུས་རྩལ་ལས་དོན།
9.4 རིག་གནས་ལས་དོན།
9.5 སྨན་བཅོས་འཕྲོད་བསྟེན།
9.6 སྤྱི་ཚོགས་འགན་སྲུང་།
9.7 སྦྲག་ཏར་འཕྲིན་གཏོང་།
9.8 ཐོན་ཁུངས་ཁོར་ཡུག
10   ལོ་རྒྱུས་རིག་གནས།
10.1 ཆོས་ལུགས།
10.2 གོམས་གཤིས།
10.3 དུས་སྟོན།
11   མཛེས་ལྗོངས་གྲགས་ཅན།
1 ངོ་སྤྲོད།

ཧ་ཨེར་པིན་གྱི་མིང་གཞན་ལ་འཁྱགས་རོམ་གྲོང་ཁྱེར་ཟེར་བ་དང་། ཧའེ་ལུང་ཅང་ཞིང་ཆེན་གྱི་ལྟེ་གནས་དང་། རིམ་པ་གཉིས་པའི་ཞིང་ཆེན་གྲོང་ཁྱེར། ཧ་ཨེར་པིན་གྲོང་ཁྱེར་གྱི་ལྟེ་བའི་གྲོང་ཁྱེར་བཅས་ཡིན་པ་དང་། རྒྱལ་སྲིད་སྤྱི་ཁྱབ་ཁང་གིས་གཏན་འཁེལ་བྱས་པའི་ཀྲུང་གོའི་བྱང་ཤར་ས་ཁུལ་གྱི་ལྟེ་བའི་གྲོང་ཁྱེར་གལ་ཆེན་དང་རྒྱལ་ཁབ་བཟོ་སྐྲུན་ལས་རིགས་ཀྱི་རྟེན་གཞི་གལ་ཆེན་ལ་མཆན་འགོད་བཀའ་ལན་གནང་།   སྤྱི་ལོ2018ལོའི་བར་གྲོང་ཁྱེར་དེ་ཡོངས་ཀྱི་ཁོངས་གཏོགས་སུ་ཆུས9དང་། རྫོང7 རྫོང་རིམ་པའི་གྲོང་ཁྱེར2བཅས་ཡོད། སྤྱིའི་རྒྱ་ཁྱོན་སྟོང་སྨི་ངོས་གྲུ་བཞི་མ53100དང་། འཛུགས་སྐྲུན་ཁུལ་གྱི་རྒྱ་ཁྱོན་ལ་སྟོང་སྨི་ངོས་གྲུ་བཞི་མ435.28ཡོད། སྤྱི་ལོ2018ལོའི་ལོ་མཇུག་ཏུ་ཐེམ་ཐོའི་མི་འབོར་ཁྲི951.5ཟིན་པ་དེས་རྒྱལ་ཡོངས་ཀྱི་ས་ཆའི་རྒྱ་ཁྱོན་གྱི་བརྒྱ་ཆའི0.55ཟིན་པ། རྒྱལ་ཡོངས་ཀྱི་སྤྱིའི་མི་འབོར་གྱི་བརྒྱ་ཆའི0.7ཟིན་པ། 

ཧ་ཨེར་པིན་ནི་ཀྲུང་གོའི་བྱང་ཤར་ས་ཁུལ་དང་། ཨེ་ཤེ་ཡའི་བྱང་ཤར་གྱི་དབུས་ཁུལ་དང་། ཀྲུང་གོའི་བྱང་ཤར་བྱང་རྒྱུད་ཀྱི་ཆབ་སྲིད་དང་། དཔལ་འབྱོར། རིག་གནས་བཅས་ཀྱི་ལྟེ་གནས་ཤིག་ཡིན། ཡོ་རོབ་དང་ཨེ་ཤེ་ཡའི་སྐམ་ས་ཆེ་མོའི་ཟམ་ཆེན་གྱི་མུ་ཏིག་དང་། ཡོ་རོབ་དང་ཨེ་ཤེ་ཡའི་སྐམ་སའི་ཟམ་ཆེན་དང་པོ་དང་བར་སྣང་བར་ཁྱམས་ཀྱི་ལྟེ་གནས་གལ་ཆེན།  ཧཱ་ཏཱ་ཆི་བཟོ་ལས་བར་ཁྱམས་ཀྱི་འགོ་འཛུགས་ས། རྒྱལ་ཁབ་ཀྱི་འཐབ་ཇུས་གཏན་འཁེལ་གནས་ཐིག་གི་མཐའ་རྒྱུད་གསར་སྤེལ་སྒོ་འབྱེད་ལྟེ་བའི་གྲོང་ཁྱེར། ཨེ་ཤེ་ཡ་བྱང་ཤར་ས་ཁོངས་ཀྱི་ལྟེ་བའི་གྲོང་ཁྱེར། དེ་བཞིན་ཨུ་རུ་སུར་མཉམ་ལས་བྱེད་པའི་ལྟེ་བའི་གྲོང་ཁྱེར་བཅས་ཡིན།

ཧ་ཨེར་པིན་ནི་རྒྱལ་ཁབ་ཀྱི་ལོ་རྒྱུས་རིག་གནས་ཀྱི་གྲགས་ཅན་གྲོང་ཁྱེར་ཞིག་ཡིན་ཞིང་། རྒྱལ་ཁབ་གཅིག་དང་རྒྱལ་རབས་གཉིས་ཀྱི་འབྱུང་གནས་ཏེ་ཅིན་དང་ཆིང་རྒྱལ་རབས་ཀྱི་རྒྱལ་རབས་གཉིས་ཀྱི་འབྱུང་གནས་ཡིན་པ་དང་། ཅིན་རྒྱལ་རབས་ཀྱི་རྒྱལ་ས་དང་པོ་ཧ་ཨེར་པིན་གྱི་ཨ་ཁྲེང་དུ་ཆགས་ཡོད། ཆིང་རྒྱལ་རབས་ཀྱི་ཀྲའོ་ཙུའུ་མོང་མོང་ཀེ་ཐེ་མུའུ་ཨར་ཧ་ཨེར་པིན་གྱི་དབྱི་ལན་དུ་སྐྱེས་པ་དང་། ཅིན་ཡོན་རིག་གནས་དེ་ནས་བཟུང་བྱང་ཤར་དུ་ཁྱབ་ནས་རྒྱལ་ཡོངས་སུ་དར་སྤེལ་བཏང་ཡོད། དེ་ནི་གླེང་མང་བའི་ཡུལ་སྐོར་གྲོང་ཁྱེར་དང་རྒྱལ་སྤྱིའི་གངས་འཁྱག་རིག་གནས་ཀྱི་གྲགས་ཅན་གྲོང་ཁྱེར་ཞིག་ཡིན་པ་དང་། འཁྱགས་གྲོང་དང་ཤར་ཕྱོགས་མོ་སི་ཁོ། ཤར་ཕྱོགས་ཀྱི་ཕ་རི་སི་ཆུང་བ་ཞེས་བརྗོད་སྲོལ་ཡོད། 

སྤྱི་ལོ2017ལོའི་ཟླ11པར་བསྐྱར་ཞིབ་བྱས་ནས་རྒྱལ་ཡོངས་ཀྱི་ཤེས་དཔལ་གྲོང་ཁྱེར་གྱི་གཟི་བརྗིད་མཚན་སྙན་མུ་མཐུད་སོར་ཉར་བྱ་རྒྱུའི་གཏན་འཁེལ་བྱས་པ། ཀྲུང་གོའི་ཕུལ་བྱུང་གྲོང་ཁྱེར་བརྒྱའི་བང་རིམ་ཨང23པ་དང་། སྤྱི་ལོ2017ལོའི་ཟླ12པར་གསང་སྤྱོད་གསར་བརྗེའི་ཕུལ་བྱུང་གྲོང་ཁྱེར་བྱ་དགའ་ཐོབ་ནས་ཀྲུང་གོའི་གངས་འཁྱགས་ཡུལ་སྐོར་གྲོང་ཁྱེར་གྱི་རྩེ་གྲ་བཅུ་ལ་བདམས་པ། སྤྱི་ལོ2018ལོའི་ཟླ10པར་གོ་ལ་ཧྲིལ་པོའི་རྒྱལ་སྤྱིའི་འདམ་རའི་གྲོང་ཁྱེར་གྱི་ཁག་དང་པོའི་མཚན་སྙན་ཐོབ་པ་རེད། 

2 ལོ་རྒྱུས་འཕེལ་རིམ།

ཧ་ཨེར་པིན་ནི་ལོ་རྒྱུས་ཡུན་རིང་ལྡན་པ་དང་མཁར་གྱང་ཡོད་མ་མྱོང་བའི་གྲོང་ཁྱེར་ཞིག་ཡིན། ལོ་ངོ་ཉིས་ཁྲི་ཉིས་སྟོང་གི་སྔོན་དང་རྡོ་ཆས་རྙིང་པའི་དུས་མཇུག་ཏུ་འདི་ན་མིའི་རིགས་ཀྱི་བྱེད་སྒོ་ཡོད།  ཕལ་ཆེར་ལོ་ངོ5000གོང་རོལ་དུ་ཧ་ཨེར་པིན་ས་ཁུལ་རྡོ་ཆས་གསར་པའི་དུས་རབས་སུ་སླེབས་འདུག   ཧ་ལམ་ལོ་ངོ3000གོང་གི་དབྱིན་ཧྲང་དུས་མཇུག་ཏུ་ཧ་ཨེར་པིན་ལི་ཆས་སྤྱོད་པའི་དུས་རབས་སུ་སླེབས་ཤིང་། ཧའེ་ལུང་ཅང་ས་ཁུལ་གྱི་གནའ་རབས་དཔལ་ཡོན་དར་བའི་རྒྱལ་ཁབ་སྔ་ཤོས་ཏེ་པའེ་ཅིན་པའོ་རིག་གནས་ཁྱབ་ཁུལ་གྱི་ས་ཁོངས་སུ་གཏོགས། 

ཧ་ཨེར་པིན་ནི་ཅིན་དང་ཆིན་རྒྱལ་རབས་གཉིས་ཀྱི་འབྱུང་གནས་ཡིན་པ་དང་། ཅིན་ཧྲོའུ་ཀུའུ་སྲིད་ལོ་དང་པོར(སྤྱི་ལོ1115ལོར)ཅིན་རྒྱལ་རབས་ཀྱིས་པེ་ཅིན(ཧ་ཨེར་པིན་གྲོང་ཁྱེར་ཨ་ཁྲེང་ཆུས)དུ་རྒྱལ་ས་བཙུགས། 

སྤྱི་ལོ2013ལོའི་ཟླ9པར་ཧ་ཨེར་པིན་རྒྱལ་སྲིད་སྤྱི་ཁྱབ་ཁང་འཕེལ་སྒྱུར་ཨུ་ལྷན་གྱི《ཧའེ་ལུང་ཅང་དང་ནང་སོག་བྱང་ཤར་རྒྱུད་ས་ཁུལ་གྱི་མཐའ་མཚམས་གསར་སྤེལ་དང་སྒོ་དབྱེའི་འཆར་འགོད》རྒྱལ་ཁབ་ཀྱི་འཐབ་ཇུས་གནས་ཐིག་གི་མཐའ་རྒྱུད་གསར་སྤེལ་དང་སྒོ་དབྱེའི་ལྟེ་བའི་གྲོང་ཁྱེར་དང་ཨེ་ཤེ་ཡ་བྱང་ཤར་གྱི་ས་ཁོངས་རང་བཞིན་གྱི་ལྟེ་བའི་གྲོང་ཁྱེར་དུ་གྱུར་ཡོད། 

སྤྱི་ལོ2014ལོའི་ཟླ5པར་རྒྱལ་སྲིད་སྤྱི་ཁྱབ་ཁང་གིས་ཧ་ཨེར་པིན་གྲོང་ཁྱེར་གྱིས་སྲིད་འཛིན་ས་ཁོངས་ཁག་ཅིག་ལེགས་སྒྲིག་བྱ་རྒྱུའི་ཆོག་མཆན་སྤྲད་པ་སྟེ། རྫོང་རིམ་པའི་གྲོང་ཁྱེར་གཉིས་མེད་པར་བཟོས་ནས་ཧ་ཨེར་པིན་གྲོང་ཁྱེར་གྱི་གྲོང་ཁུལ་གཉིས་བཙུགས་ཡོད། 

སྤྱི་ལོ2017ལོའི་ཟླ8པའི་ཚེས7ཉིན་ཧ་ཨེར་པིན་གྲོང་ཁྱེར་སྤྱི་ལོ2018ལོའི་ཨེ་ཤེ་ཡ་ཤར་མའི་རིག་གནས་གྲོང་ཁྱེར་དུ་བདམས། 

3 སྲིད་འཛིན་ས་ཁུལ་གྱི་དབྱེ་མཚམས།

སྤྱི་ལོ2018ལོའི་བར་ཧ་ཨེར་པིན་གྲོང་ཁྱེར་གྱི་རྫོང་རིམ་པའི་སྲིད་འཛིན་ཁུལ18ཁོངས་སུ་གྲོང་ཁྱེར་ཁོངས་གཏོགས་ཀྱི་ཆུས9དང་། རྫོང་རིམ་པའི་གྲོང་ཁྱེར2 རྫོང7བཅས་ཚུད་ཡོད་པ་དེ་དག་ནི་ཏའོ་ལི་ཆུས་དང་། ནན་ཀང་ཆུས། ཏའོ་ཝའེ་ཆུས། ཕིང་ཧྥང་ཆུས། སུང་པེ་ཆུས། ཤང་ཧྥང་ཆུས། ཧུའུ་ལན་ཆུས། ཨ་ཁྲེང་ཆུས་དང་། ཧྲང་ཀྲི་གྲོང་ཁྱེར། ཝུའུ་ཁྲང་གྲོང་ཁྱེར། དབྱི་ལན་རྫོང་། ཧྥང་ཀྲེང་རྫོང་། པིན་རྫོང་། པ་ཡན་རྫོང་། ཐུང་ཧོ་རྫོང་། ཐུང་ཧོ་རྫོང་། ཡན་ཧྲོའུ་རྫོང་བཅས་ཡིན། ཧ་ཨེར་པིན་གྲོང་ཁྱེར་མི་དམངས་སྲིད་གཞུང་ནི་སུང་པེ་ཆུས་དུས་རབས་ལམ་ཆེན་ཨང1པོ་རུ་ཡོད། 

4 ས་ཁམས་ཁོར་ཡུག
4_1 གནས་སའི་ཡུལ་ཁོངས།

ཧ་ཨེར་པིན་གྲོང་ཁྱེར་ནི་ཀྲུང་གོའི་བྱང་ཤར་བདེ་ཐང་དང་བྱང་ཤར་རྒྱུད་ཀྱི་ས་ཁུལ། ཧའེ་ལུང་ཅང་ཞིང་ཆེན་གྱི་ལྷོ་རྒྱུད་དང་། ཨེ་ཤ་ཡ་བྱང་ཤར་གྱི་ལྟེ་བའི་ས་ཁོངས་སུ་གནས་ཡོད་པ་དང་། ཡོ་རོབ་དང་ཨེ་ཤེ་ཡའི་སྐམ་སའི་ཟམ་ཆེན་དང་པོ་དང་བར་སྣང་བར་ཁྱམས་ཀྱི་ལྟེ་གནས་གལ་ཆེན་ཞིག་ཡིན་ཞིང་། གཞུང་གཞུང་ཤར་མའི125-42-130℃དང་། འཕྲེད་ཐིག་བྱང་མའི44℃04-46℃བར་དུ་གནས་ཡོད།  ཧ་ཨེར་པིན་གྲོང་ཁྱེར་གྱི་སྤྱིའི་རྒྱ་ཁྱོན་ལ་སྟོང་སྨི་གྲུ་བཞི་མ་ཁྲི་ཚོ5.31ཡོད་པ་དང་། དེའི་ནང་གྲོང་ཁུལ་གྱི་རྒྱ་ཁྱོན་ལ་སྤྱི་ལེ་ངོས་གྲུ་བཞི་མ10198ཡོད།

4_2 ས་དབྱིབས། 

ཧ་ཨེར་པིན་དུ་ས་བབ་དང་། གནམ་གཤིས། རྩི་ཤིང་སོགས་རང་བྱུང་གི་རྒྱུ་རྐྱེན་དང་དེ་བཞིན་མིས་བཟོས་བྱ་འགུལ་གྱི་ཤུགས་རྐྱེན་ཐེབས་ནས་ཧ་ཨེར་པིན་གྲོང་ཁྱེར་གྱི་ས་རྒྱུའི་རིགས་ཅུང་མང་བ་དང་ཁྱོན་བསྡོམས་ཡུལ་རིགས9དང་། རིགས་ཕལ་བ21 ཡུལ་རྒྱུད25བཅས་ཡོད། ས་ནག་ནི་གྲོང་འདབས་དང་རྫོང(གྲོང་ཁྱེར)12ཀྱི་ས་རྒྱུ་གཙོ་བོ་ཡིན་ལ། ཁྱབ་རྒྱ་ཆེ་ཤོས་དང་གྲངས་འབོར་མང་ཤོས་ཀྱི་ས་རྒྱུའི་རིགས་ཤིག་ཀྱང་ཡིན། 

4_3 གནམ་གཤིས།

ཧ་ཨེར་པིན་ནི་ཀྲུང་གོའི་འཕྲེད་ཐིག་ཏུའུ་གྲངས་ཅུང་མཐོ་ཞིང་དྲོད་ཚད་ཅུང་དམའ་བའི་གྲོང་ཁྱེར་ཆེན་པོ་ཞིག་ཡིན། དུས་བཞི་གསལ་བ་དང་། དགུན་དུས་གྲང་ངར་ཆེ་བ་དང་། དབྱར་དུས་ནི་ཡུན་ཐུང་ཞིང་བསིལ་བ། དཔྱིད་ཀ་དང་སྟོན་ཁའི་དྲོད་ཚད་འཕར་ཆག་གི་འགྱུར་ལྡོག་མགྱོགས་ཤིང་། བར་བརྒལ་དུས་ཚིགས་སུ་གཏོགས་ལ། དུས་ཚོད་ཅུང་ཐུང་།

ཧ་ཨེར་པིན་གྱི་གནམ་གཤིས་ནི་དབུས་དྲོད་ཁུལ་སྐམ་སའི་རང་བཞིན་གྱི་དུས་རླུང་ནམ་ཟླའི་ཁོངས་སུ་གཏོགས། ལོ་ཧྲིལ་པོར་ཆ་སྙོམས་ཆར་ཆུ་འབབ་ཚད་ཧའོ་སྨི569.1ཟིན་པ་དང་། ཆར་པ་འབབ་རྒྱུ་གཙོ་བོ་ཟླ6པ་ནས9པའི་བར་ཡིན། དབྱར་དུས་སུ་ལོ་ཧྲིལ་པོའི་ཆར་ཆུ་འབབ་ཚད་ཀྱི་བརྒྱ་ཆའི60ཟིན་པ་དང་། གཅིག་སྡུད་ཀྱི་ཁ་བ་བབས་པའི་དུས་ཡུན་ནི་ལོ་རེའི་ཟླ11ནས་ཕྱི་ལོའི་ཟླ1པོའི་བར་ཡིན། དགུན་དུས་ཟླ་དང་པོར་ཆ་སྙོམས་དྲོད་ཚད་ཀླད་ཀོར་འོག་གི་ཏུའུ19ཙམ་ཟིན་པ་དང་། དབྱར་ཁའི་ཟླ7པའི་ཆ་སྙོམས་དྲོད་ཚད་ཏུའུ23ཙམ་ཟིན་གྱིན་ཡོད། 

4_4 རི་ཆུ་རིགས་གནས།

ཧ་ཨེར་པིན་གྲོང་ཁྱེར་མངའ་ཁོངས་ཀྱི་ཆུ་བོ་ཆེ་མ་ཆུང་གསུམ་དག་ནི་སུང་ཧྭ་གཙང་པོའི་ཆུ་རྒྱུད་དང་མུའུ་ཏན་གཙང་པོའི་ཆུ་རྒྱུད་ཀྱི་ཁོངས་སུ་གཏོགས་ཤིང་། གཙོ་བོ་སུང་ཧྭ་གཙང་པོ་དང་། ཧུའུ་ལན་གཙང་པོ། ཨ་ཧྲི་གཙང་པོ། ལ་ལིན་གཙང་པོ། པེན་ཉིའུ་གཙང་པོ། ཏུང་ལེང་ཀྲུའུ་ཧོ་གཙང་པོ། ཉི་ཧོ་གཙང་པོ། ཆན་ཁེ་ཐུའུ་གཙང་པོ། ཧྲའོ་ལིང་གཙང་པོ། ཝུའུ་ཡུའུ་གཙང་པོ། ཧྲན་ཁེན་གཙང་པོ་སོགས་ཡོད། 

5 རང་བྱུང་ཐོན་ཁུངས།
5_1 གཏེར་རྫས་ཐོན་ཁུངས།

སྤྱི་ལོ2015ལོའི་བར་ཧ་ཨེར་པིན་གྲོང་ཁྱེར་གྱིས་རིགས་སོ་སོའི་གཏེར་རྫས63རྙེད་པ་དང་བཟོ་ལས་བེད་སྤྱོད་གཏོང་ཆོག་པའི་རིགས25རྩད་ཆོད་པ་དང་།  དེའི་ནང་རྡོ་སོལ་དང་། རང་བྱུང་སོལ་རླངས། ཟངས། ཏི་ཚ། ཝུའུ། མུ་ཟི་ལྕགས་གཏེར། ཆུ་ཤེལ་བཙོ་སྦྱང་། སྦྲུལ་རིས་བྲག་རྡོ། སེན། ཨར་ལས་སུ་སྤྱོད་པའི་རྡོ། གཏེར་ཆུ་སོགས་གཏེར་རྫས་རིགས20ཡིས་ཧའེ་ལུང་ཅང་ཞིང་ཆེན་དུ་གོ་གནས་གལ་ཆེན་བཟུང་ཡོད། 

5_2 རྩི་ཤིང་ཐོན་ཁུངས།

ཧ་ཨེར་པིན་གྲོང་ཁྱེར་གྱི་རྩི་ཤིང་ཐོན་ཁུངས་ཕུན་སུམ་ཚོགས་པ་དང་སྣ་ཁ་མང་པོ་ཡོད་པ། དེའི་ནང་ཆུ་སྔོ་རྩི་ཤིང་དང་སྔོ་དྲེག་རྩི་ཤིང་གཉིས་ཀྱི་ཁྱབ་ཁོངས་གཅིག་སྡུད་དང་། དཔལ་འབྱོར་གྱི་རིན་ཐང་མཐོ་བ། སྨན་སྤྱོད་རྩི་ཤིང་གི་ཁྲོད་དུ།  སྨན་རྫས་རྩ་ཆེན་ནི་སྲད་དཀར་དང་། ཤུག་པ། ཏི་ལུང་། སྲད་ནག་དང་། སྲད་ནག་སོགས་ཡིན། 

5_3 རི་དྭགས་སྐྱེས་ཁུངས།

ཧ་ཨེར་པིན་གྲོང་ཁྱེར་གྱི་རི་སྐྱེས་སྲོག་ཆགས་ཀྱི་རིགས་དང་གྲངས་འབོར་ཅུང་མང་བ། རི་དྭགས་ཀྱི་རིགས་ལ་རྩ་ཆེན་གྱི་བྱང་ཤར་སྟག་དང་། ཤྭ་བ་མེ་ཏོག ཨོག་དཀར། ཆུ་སྲམ། དོམ་ནག་དང་། ཕག་རྒོད། གླ། སྲེ་མོང་། བྱི་བ་སྐྱ། ཝ་མོ། སྲེ་མོ། སྤྱང་ཀི་སོགས་ཡོད། 

6 མི་གྲངས།
6_1 མི་གྲངས།

སྤྱི་ལོ2018ལོའི་ལོ་མཇུག་བར་ཧ་ཨེར་པིན་གྲོང་ཁྱེར་གྱི་ཐེམ་ཐོའི་མི་འབོར་ཁྲི951.5ཟིན་པ་དེ་ལོ་གོང་མའི་ལོ་མཇུག་དང་བསྡུར་ན་མི་ཁྲི3.5ཉུང་དུ་ཕྱིན་ཡོད་པ་དང་། དེའི་ནང་གྲོང་ཁྱེར་དང་གྲོང་རྡལ་གྱི་མི་འབོར་ཁྲི467.5དང་ཐེམ་ཐོའི་མི་འབོར་གྲོང་ཁྱེར་དང་གྲོང་རྡལ་ཅན་དུ་གྱུར་ཚད་ཀྱི་བརྒྱ་ཆའི49.1ཟིན་པ་དེ་ལོ་གོང་མའི་ལོ་མཇུག་དང་བསྡུར་ན་བརྒྱ་ཆའི0.5མཐོ་རུ་ཕྱིན་ཡོད། གྲོང་ཁྱེར་ཡོངས་ཀྱི་མི་འབོར་ཁྲོད་གྲོང་ཁྱེར་ཁོངས་གཏོགས་ཀྱི་མི་འབོར་ཁྲི550.9ཟིན་ཡོད། ལོ60ཡན་གྱི་རྒན་རྒོན་ཁྲི206.4ཟིན་པ་དེས་སྤྱིའི་མི་འབོར་གྱི་བསྡུར་ཚད་ཀྱི་བརྒྱ་ཆའི21.7བཟུང་ཡོད། གྲོང་ཁྱེར་དེ་ཡོངས་ཀྱི་གསར་སྐྱེས་མི་འབོར་ཁྲི5.8ཟིན་པ་དང་། སྐྱེས་ཚད་བརྒྱ་ཆའི6.12ཟིན་པ་དང་། ཤི་ཚད་མི་གྲངས་ཁྲི5.4ཡིན་ལ། ཤི་ཚད་བརྒྱ་ཆའི5.72ཡིན། གྲོང་ཁྱེར་དེ་ཡོངས་ཀྱི་མི་འབོར་རང་བྱུང་འཕར་ཚད་ཀྱི་བརྒྱ་ཆའི0.42ཟིན་ཡོད། ལོ་མཇུག་ཏུ་གྲོང་ཁྱེར་ཡོངས་ཀྱི་རྒྱུན་སྡོད་མི་འབོར་ཁྲི1085.8ཟིན་པའི་ནང་གྲོང་ཁྱེར་དང་གྲོང་རྡལ་གྱི་མི་འབོར་ཁྲི709.0ཡོད་པ་དང་རྒྱུན་སྡོད་མི་འབོར་གྲོང་ཁྱེར་དང་གྲོང་རྡལ་ཅན་དུ་འགྱུར་ཚད་བརྒྱ་ཆའི65.3ཟིན་ཡོད། 

6_2 མི་རིགས།

ཧ་ཨེར་པིན་གྲོང་ཁྱེར་ནི་གྲངས་ཉུང་མི་རིགས་ཁ་ཐོར་དང་འདྲེས་སྡོད་གནས་པའི་ས་ཁུལ་ཞིག་ཡིན་ཞིང་། ཁ་ཐོར་ཆེ་བ་དང་། གཅིག་སྡུད་ཆུང་བའི་ཁྱད་ཆོས་ལྡན། སྤྱི་ལོ2010ལོའི་བར་ཧ་ཨེར་པིན་གྲོང་ཁྱེར་དུ་ཁྲའོ་ཞན་རིགས་དང་། མན་ཇུ་རིགས། སོག་རིགས། ཞི་པོ་རིགས། ཏ་ཝོར་རིགས། ཨོ་ཝུན་ཁེ་རིགས། ཨོ་ལུན་ཁྲུན་རིགས་བཅས་ཚུད་པའི་གྲངས་ཉུང་མི་རིགས47ཡོད་པ་དང་། གྲངས་ཉུང་མི་རིགས་ཀྱི་མི་འབོར་ཁྲི61.67ཡོད་པ་དེས་གྲོང་ཁྱེར་དེ་ཡོངས་ཀྱི་མི་འབོར་བསྡོམས་གྲངས་ཀྱི་བརྒྱ་ཆའི6.55བཟུང་བ་དང་། ཞིང་ཆེན་ཀྱི་གྲངས་ཉུང་མི་རིགས་བསྡོམས་འབོར་གྱི་བརྒྱ་ཆའི33བཟུང་ཡོད། 

6_3 དཔལ་འབྱོར།

སྤྱི་ལོ2018ལོར་ཧ་ཨེར་པིན་དུ་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར6300.5མངོན་འགྱུར་བྱས་པ་དེ་ལོ་གོང་མ་ལས་བརྒྱ་ཆའི5.1འཕར་ཡོད། དེའི་ནང་ཐོན་ལས་དང་པོའི་འཕར་ཐང་སྒོར་དུང་ཕྱུར525.5མངོན་འགྱུར་བྱུང་ནས་བརྒྱ་ཆའི0.1མར་འགྲིབ་པ། ཐོན་ལས་གཉིས་པའི་འཕར་ཐང་སྒོར་དུང་ཕྱུར1689.3མངོན་འགྱུར་བྱས་ནས་བརྒྱ་ཆའི2.7འཕར་བ། ཐོན་ལས་གསུམ་པའི་འཕར་ཐང་སྒོར་དུང་ཕྱུར4085.7མངོན་འགྱུར་བྱས་ནས་བརྒྱ་ཆའི7.5འཕར་ཡོད། ཐེངས་གསུམ་གྱི་ཐོན་ལས་གྲུབ་ཆ་དེ་ལོ་གོང་མའི9.5:29.1:61.4ནས8.3:26.8:64.9བར་ལེགས་སྒྲིག་བྱས་ཡོད། རྒྱུན་སྡོད་མི་འབོར་གྱི་མི་རེའི་ཆ་སྙོམས་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་སྒོར57837ཟིན་ནས་བརྒྱ་ཆའི5.6འཕར་ཡོད། 

7 འགྲིམ་འགྲུལ་སྐྱེལ་འདྲེན།
7_1 གཞུང་ལམ།

ཧ་ཨེར་པིན་གྱི་གཞུང་ལམ་གཙོ་བོ་ནི་སུའེ་མན་མྱུར་བགྲོད་གཞུང་ལམ་དང་། ཅིང་ཧ་མྱུར་བགྲོད་གཞུང་ལམ། ཧ་ཅཱ་མྱུར་བགྲོད་གཞུང་ལམ། ཝུའུ་ཡན་མྱུར་བགྲོད་གཞུང་ལམ། ཧ་ཐུང་གཞུང་ལམ། ཅི་ཧེ་གཞུང་ལམ། ཧུ་ཧ་མྱུར་བགྲོད་གཞུང་ལམ་སོགས་ཡོད།

7_2 ལྕགས་ལམ།

ཧ་ཨེར་པིན་ནི་བྱང་ཤར་ས་ཁུལ་གྱི་ལྕགས་ལམ་ལྟེ་གནས་ཤིག་ཡིན་པ་དང་། ཧ་ཨེར་པིན་ལྕགས་ལམ་ཅུས་ནི་རྒྱལ་ཡོངས་ཀྱི་ལྕགས་ལམ་ཅུས་བཅོ་ལྔའི་གྲས་ཤིག་ཡིན་ཞིང་། བྱང་དུ་ཀུའུ་ལན་དང་། ནན་ནས་ལན་ལིང་། ཤར་ནས་སུའེ་ཧྥེན་ཆུ་བོ། ནུབ་ཏུ་མན་ཀྲོའུ་ལི་བཅས་བར་ཡིན་པ་དང་། ཕྱི་རུ་ཨུ་རུ་སུ་དང་སྦྲེལ་མཐུད་བྱས་པ་དང་། ནང་ཁུལ་དུ་ཧྲེན་དབྱང་ལྕགས་ལམ་ཅུས་དང་འབྲེལ་མཐུད་བྱས་ཡོད།    ཧ་ཨེར་པིན་གྲོང་ཁྱེར་དུ་ཧ་ཨེར་པིན་ས་ཚིགས་དང་ཧ་ཨེར་པིན་ནུབ་ཚུགས། ཧ་ཨེར་པིན་བྱང་ཚུགས། ཧ་ཨེར་པིན་ཤར་ཚུགས་བཅས་མེ་འཁོར་འབབ་ཚུགས་གསུམ་ཡོད།

7_3 མཁའ་སྐྱོད།

ཧ་ཨེར་པིན་གྱི་དམངས་སྤྱོད་མཁའ་འགྲུལ་བྱ་གཞག་དེ་ནི་སྤྱི་ལོ1950ལོར་འགོ་ཚུགས་པ་དང་། སྤྱི་ལོ1979ལོར་ཞིང་ཆེན་ཡོངས་སུ་མཁའ་ལམ5ལས་མེད། གཟའ་འཁོར་རེར་དུས་གཏན་གནམ་གྲུ15ལས་མེད་པ་དང་ལོ་རེ་འགྲུལ་པ་སྐྱེལ་འདྲེན་བྱེད་ཚད་མི་ཐེངས་ཁྲི7ཙམ་ལས་ཟིན་གྱི་མེད། སྤྱི་ལོ1979ལོའི་ལོ་མཇུག་ཏུ་ཉིན་མཚན་མེད་པར་འགྲུལ་སྐྱེལ་གནམ་གྲུ་ཆེ་གྲས་སྣ་ཚོགས་འཕུར་འབེབས་བྱས་ཆོག་པའི་ཡན་ཅ་ཀང་གནམ་གྲུ་ཐང་སྟེ་ཧ་ཨེར་པིན་གྱི་ཐའེ་ཕིན་རྒྱལ་སྤྱིའི་གནམ་གྲུ་ཐང་བཙུགས་པ་དང་། ཐའེ་ཕིང་རྒྱལ་སྤྱིའི་གནམ་ཐང་ནི་རྒྱལ་སྤྱིའི་དུས་བཀག4Eརིམ་པའི་ཁོངས་སུ་གཏོགས་པའི་གནམ་ཐང་ཡིན་པ་དང་། མཁའ་འགྲུལ་འབབ་ཚུགས་ཀྱི་རྒྱ་ཁྱོན་སྨི་ངོས་གྲུ་བཞི་མ་ཁྲི6.7ཟིན་ཡོད། འགྲུལ་པ་སྐྱེལ་འདྲེན་བྱེད་ཚད་སྤྱི་ལོ2013ལོར་མི་ཐེངས་ཁྲི1000ལས་བརྒལ་ཡོད།

7_4 ཆུ་ཐོག་སྐྱེལ་འདྲེན།

ཧ་ཨེར་པིན་ནི་སུང་ཧྭ་ཅང་གཙང་པོའི་དབུས་རྒྱུད་དང་། ཧའེ་ལུང་ཅང་ཞིང་ཆེན་ཆུ་ཐོག་སྐྱེལ་འདྲེན་གྱི་བཀོད་འདོམས་སྐྱེལ་འདྲེན་ལྟེ་གནས་ཤིག་ཡིན་པ་དང་། ཧ་ཨེར་པིན་གྲུ་ཁས་ཨུ་རུ་སུར་སྒོ་མོ་ཕྱེ་བ་དང་བརྒྱུད་ཀྲུང་གོ་དང་ཨུ་རུ་སུའི་ཆུ་ཐོག་སྐྱེལ་འདྲེན་ཉོ་ཚོང་བྱེད་བཞིན་ཡོད། སྤྱི་ལོ1990ལོར་མ་དངུལ་སྒོར་ཁྲི་1200བཏང་ནས་བྱང་ཤར་ནང་ཁུལ་གྱི་གཙང་པོའི་ཆེས་ཆེ་བའི་ཧ་ཨེར་པིན་གྱི་མཚོ་ཐོག་སྐྱེལ་འདྲེན་ས་ཚིགས་ཆེ་ཤོས་བསྐྲུན་པ་དང་། ཆ་སྙོམས་ཆུ་ཚོད་རེའི་མྱུར་ཚད་སྟོང་སྨི65ཟིན་པའི་ཆུ་གཤོག་གྲུ་གཟིངས་ནང་འདྲེན་དང་བཟོ་སྐྲུན་བྱས་པ་དང་འབྲེལ་སུང་ཧྭ་ཅང་གཙང་པོའི་སྐྱེལ་འདྲེན་ལས་ལ་ཞུགས་པ་ཡིན། སྤྱི་ལོ1992ལོར་གཙང་པོ་དང་རྒྱ་མཚོའི་མཉམ་འབྲེལ་སྐྱེལ་འདྲེན་ཤར་གཏོང་བྱས་པ།  གྲུ་ཁག་ཐོག་མར་སུང་ཧྭ་ཅང་གཙང་པོ་ནས་ཧའེ་ལུང་ཅང་གཙང་པོའི་སྨད་རྒྱུད་བརྒྱུད་ཀྱི་མཚོ་འགྲུལ་བརྒྱུད་དེ་འཇར་པན་ལ་ཁ་ལོ་བསྒྱུར་བ་དང་། ནང་ལོགས་གཙང་པོ་བརྒལ་ཏེ་རྒྱ་མཚོའི་ཕྱོགས་སུ་སྐྱོད་པའི་དུས་རབས་གསར་པ་ཞིག་འགོ་ཚུགས་པ་ཡིན། མཁའ་ལམ་དེ་སུང་ཧྭ་ཅང་གཙང་པོ་དང་། ཧའེ་ལུང་ཅང་གཙང་པོ། ཝུའུ་སུའུ་ལི་ཅང་གཙང་པོ། ནེན་ཅང་གཙང་པོ་བཅས་སུ་ཁྱབ་པ་མ་ཟད། ཨུ་རུ་སུའི་རྒྱང་ཤར་ས་ཁུལ་གྱི་གྲུ་ཁ་ཁག་གཅིག་དང་འབྲེལ་མཐུད་བྱས་ཡོད། ཆུ་ལམ་གྱི་གཙང་པོ་དང་རྒྱ་མཚོའི་སྦྲེལ་མཐུད་ལམ་ཐིག་བརྒྱུད་ཤར་ཕྱོགས་ཏཱ་ཏཱ་མཚོ་འགག་ནས་ཐོན་ཏེ་གྲུ་གཟིངས་འཇར་པན་དང་། ཁྲའོ་ཞན། ཁོ་རེ་ཡ། ཨེ་ཤེ་ཡ་ཤར་ལྷོའི་ས་ཁུལ་བཅས་སུ་ཤར་བགྲོད་ཐུབ་ཀྱི་ཡོད།  སུང་ཧྭ་གཙང་པོའི་ཆུ་ངོས་ཀྱི་ཆུ་ཚད་ལོ་བསྟུད་མར་མར་ཆག་པས་སུང་ཧྭ་གཙང་པོའི་ཆུ་ཐོག་སྐྱེལ་འདྲེན་ལ་ཤུགས་རྐྱེན་ཚབས་ཆེན་ཐེབས། སྤྱི་ལོ2005ལོར་ཆུ་ཐོག་སྐྱེལ་འདྲེན་དངོས་ཟོག་སྣ་ཚོགས་ཏུན་ཁྲི309ཟིན་ཡོད། 

8 གྲོང་ཁུལ་འགྲིམ་འགྲུལ།
8_1 ས་འོག་ལྕགས་ལམ།

ཧ་ཨེར་པིན་ས་འོག་ལྕགས་ལམ་ནི་ཧ་ཨེར་པིན་གྲོང་ཁྱེར་གྱི་ལྕགས་ལམ་འགྲིམ་འགྲུལ་མ་ལག་ཅིག་ཡིན་པ་དང་ཀྲུང་གོའི་མཐོ་གྲང་གི་ས་འོག་ལྕགས་ལམ་མ་ལག་ཐོག་མ་དེའང་ཡིན། སྤྱི་ལོ2019ལོའི་ལོ་མཇུག་བར་ཧ་ཨེར་པིན་ས་འོག་ལྕགས་ལམ་ལམ་ཐིག་དང་པོའི་རིང་ཚད་ལ་སྤྱི་ལེ26.05ཡོད་པའི་ནང་དུས་ཐེངས་དང་པོ་དང་གཉིས་པའི་ལམ་ཐིག་གི་སྤྱིའི་རིང་ཚད་ལ་སྤྱི་ལེ17.47ཡོད་པ་དང་འབབ་ཚུགས18ཡོད་པ་དང་། དུས་ཐེངས་གསུམ་པའི་སྤྱི་ལེ8.58ལ་འབབ་ཚུགས5བཙུགས་ཡོད། ས་འོག་ལྕགས་ལམ་ལམ་ཐིག་གསུམ་པའི་དུས་ཐེངས་དང་པོའི་ལས་གྲྭའི་ལམ་ཐིག་གི་སྤྱིའི་རིང་ཚད་ལ་སྤྱི་ལེ5.45ཡོད་པ་དང་། རླངས་འཁོར་འབབ་ཚུགས་གསུམ་ཚོད་ལྟའི་གཉེར་སྐྱོང་བྱས་ཡོད། 

8_2 སྤྱི་སྤྱོད་རླངས་འཁོར།

སྤྱི་ལོ2018ལོ་བར་ཧ་ཨེར་པིན་དུ་ཨང་ལྡན་སྤྱི་སྤྱོད་རླངས་འཁོར་གྱི་ལམ་ཐིག292ཡོད་པའི་ནང་གསར་གཏོད་དང་། ལེགས་སྒྲིག ཕྱིར་སྣུར་བཅས་བྱས་པའི་སྤྱི་སྤྱོད་རླངས་འཁོར60ཡོད།  སྤྱི་སྤྱོད་རླངས་འཁོར་གཉེར་སྐྱོང་ལམ་ཐིག་གི་སྤྱིའི་རིང་ཚད་སྟོང་སྨི5664.9ཟིན་པའི་ནང་གཉེར་སྐྱོང་ལམ་ཚད་སྟོང་སྨི75.1མང་དུ་ཕྱིན་ཡོད་པ་དང་། སྤྱི་སྤྱོད་རླངས་འཁོར་ཁྱོན7031ཡོད་པའི་ནང་རླངས་འཁོར2022.8གསར་སྣོན་བྱས་པ་དང་། དེ་ནང་ནུས་ཁུངས་གསར་པའི་སྤྱི་སྤྱོད་རླངས་འཁོར1556ཡོད། ལོ་ཧྲིལ་པོར་སྤྱི་སྤྱོད་རླངས་འཁོར་གྱི་འགྲུལ་པ་སྐྱེལ་འདྲེན་བྱེད་ཚད་མི་ཐེངས་དུང་ཕྱུར12.7ཟིན་ཡོད། 

9 སྤྱི་ཚོགས་ལས་དོན།
9_1 སློབ་གསོའི་ལས་དོན།

སྤྱི་ལོ2018ལོ་བར་ཧ་ཨེར་པིན་གྲོང་ཁྱེར་དུ་ཧ་མཐོ་སློབ་གྲྭ་དཀྱུས་མ51དང་དར་མའི་མཐོ་རིམ་སློབ་གྲྭ11དང་། ཞིབ་འཇུག་སློབ་མའི་གསོ་སྐྱོང་ཐོབ་ཐང་ལྡན་པའི་ཚན་ཞིབ་སྒྲིག་གཞི་སུའོ8 འབྲིང་རིམ་ལས་རིགས་སློབ་གསོའི་སློབ་གྲྭ89 མཐོ་རིམ་སློབ་འབྲིང་དཀྱུས་མ102 དམའ་རིམ་སློབ་འབྲིང་དཀྱུས་མ342 སློབ་ཆུང་དཀྱུས་མ(གྲོང་གསེབ་སློབ་ཆུང་གི་དྲ་ཚིགས་ཚུད་པ)574 དམིགས་བསལ་སློབ་གསོའི་སློབ་གྲྭ18 བུ་བཅོལ་ཁང1334བཅས་ཡོད། 

9_2 ཚན་རིག་ལག་རྩལ།

ཧ་ཨེར་པིན་གྱི་ཚན་རྩལ་ཕྱོགས་བསྡུས་སྟོབས་ཤུགས་ཅུང་ཆེ་བ་དང་། རྒྱལ་ཡོངས་ཀྱི་གྲོང་ཁྱེར་ཆེ་འབྲིང་གི་མདུན་གྲལ་དུ་སླེབས་ཡོད། སློབ་གྲྭ་ཆེན་མོ་དང་། ཞིབ་འཇུག་ཁང་། བཟོ་གྲྭ་ཆེ་གྲས་བཅས་ཀྱི་ཚན་རྩལ་སྟོབས་ཤུགས་གཙོ་བོར་འཛིན་པ་དང་། ས་གནས་ཀྱི་ཚན་རྩལ་སྟོབས་ཤུགས་རམ་འདེགས་སུ་བྱེད་པའི་ཞིབ་འཇུག་དང་གསར་སྤེལ་མ་ལག་ཆགས་ཡོད། 

9_3 ལུས་རྩལ་ལས་དོན།

སྤྱི་ལོ2018ལོར་ཧ་ཨེར་པིན་གྱིས་གྲོང་ཁྱེར་ཡོངས་ཀྱི་ལུས་རྩལ་འགྲན་བསྡུར་རྣམ་གྲངས16གཉེར་བ་དང་། རྒྱལ་སྤྱིའི་འགྲན་བསྡུར་ནང་ཞུགས་ནས་གཟེངས་བསྟོད་རྟགས་མ13ཐོབ་པ་དང་དེའི་ནང་གསེར་གྱི་རྟགས་མ2དང་། དངུལ་གྱི་རྟགས་མ7ཟངས་ཀྱི་རྟགས་མ4བཅས་ཡོད། རྒྱལ་ནང་གི་འགྲན་བསྡུར་ནང་ཞུགས་ནས་གཟེངས་བསྟོད་རྟགས་མ་བྱ་དགའ380ཐོབ་པ་དེའི་ནང་གསེར་གྱི་རྟགས་མ129དང་། དངུལ་གྱི་རྟགས་མ170ཟངས་ཀྱི་རྟགས་མ81བཅས་ཐོབ་ཡོད་པ་ཡིན།

9_4 རིག་གནས་ལས་དོན།

སྤྱི་ལོ2018ལོར་ཧ་ཨེར་པིན་དུ་ཆེད་ལས་སྒྱུ་རྩལ་འཁྲབ་སྟོན་ཚོགས་པ4ཡོད་པ་དང་། རྟེན་རྫས་བཤམས་མཛོད་ཁང79ཡོད་པ། རིག་གནས་ཁང་(སྒྱུ་རྩལ་ཁང)18 སྤྱི་པའི་དཔེ་མཛོད་ཁང17 རིགས་ཁག་གི་གློག་བརྙན་སྟོན་པའི་ལས་ཁུངས66ཡོད་པ། ཕྱོགས་བསྡུས་ཡིག་ཚགས་ཁང19དང་ཆེད་ལས་ཡིག་ཚགས་ཁང1བཅས་ཡོད་པ་ཡིན། གྲོང་ཁྱེར་དེ་ཡོངས་ཀྱི་སྐུད་ཡོད་བརྙན་འཕྲིན་སྤྱོད་མཁན་དུད་ཚང་ཁྲི180ཟིན་པའི་ནང་གྲངས་འཛིན་བརྙན་འཕྲིན་སྤྱོད་མཁན་དུད་ཚང་ཁྲི140ཟིན་པ་དང་། ཧ་ཨེར་པིན་བརྙན་འཕྲིན་ལས་ཁུངས་ཀྱིས་ལོ་ཧྲིལ་པོར་སྤྱི་པའི་བརྙན་འཕྲིན་ལེ་ཚན་གཏོང་ཡུན་ཆུ་ཚོད95198ཟིན་པ། ཧ་ཨེར་པིན་རླུང་འཕྲིན་ལས་ཁུངས་ཀྱི་སྤྱི་པའི་རླུང་འཕྲིན་ལེ་ཚན་གཏོང་བའི་དུས་ཚོད་ཆུ་ཚོད81796ཡིན། བརྙན་འཕྲིན་ཕྱོགས་བསྡུས་ཁྱབ་ཚད99.98%ཟིན་པ་དང་རླུང་འཕྲིན་ཕྱོགས་བསྡུས་ཁྱབ་ཚད99.93%ཟིན་ཡོད།

9_5 སྨན་བཅོས་འཕྲོད་བསྟེན།

སྤྱི་ལོ2018ལོའི་བར་ཧ་ཨེར་པིན་གྲོང་ཁྱེར་དུ་འཕྲོད་བསྟེན་སྒྲིག་གཞི་སྣ་ཚོགས1982(དེའི་ནང་གྲོང་གསེབ་ཀྱི་འཕྲོད་བསྟེན་ཁང་ཚུད་མེད་པ)ཡོད་པའི་ནང་སྨན་ཁང326དང་། འཕྲོད་བསྟེན་ཁང187 སྡེ་ཁུལ་འཕྲོད་བསྟེན་ཞབས་ཞུའི་ལྟེ་གནས(ས་ཚིགས)140བཅས་ཡོད། འཕྲོད་བསྟེན་སྒྲིག་གཞིའི་ཉལ་ཁྲི་ཁྲི8.70ཟིན་ཡོད། འཕྲོད་བསྟེན་ལག་རྩལ་མི་སྣ་ཁྲི6.87ཡོད་པའི་ནང་ལས་གཉེར་སྨན་པ་དཀའ་བཅུ་པ་ཁྲི2.33ཡོད་པ་དང་། ནད་གཡོག་ཁྲི2.87ཐོ་འགོད་བྱས་ཡོད། འཕྲོད་བསྟེན་སྒྲིག་གཞིས་ལོ་ཧྲིལ་པོར་མི་ཐེངས་ཁྲི3429.6ལ་ནད་བརྟག་སྨན་བཅོས་བྱས་ཡོད། 

9_6 སྤྱི་ཚོགས་འགན་སྲུང་།

སྤྱི་ལོ2018ལོ་བར་ཧ་ཨེར་པིན་གྲོང་ཁྱེར་དང་གྲོང་རྡལ་གྱི་ཁེ་ལས་ལས་བཟོའི་གཞི་རྩའི་རྒན་གསོ་འགན་བཅོལ་ནང་ཞུགས་མཁན་མི་གྲངས་ཁྲི254.5ཟིན་པ་དེ་ལོ་གོང་མ་ལས4.3%འཕར་ཡོད། རྒན་གསོའི་འགན་བཅོལ་གྱི་ལས་བྲལ་ལས་འཁྱུར་མི་སྣ་ཁྲི100.6ལོངས་སྤྱོད་བྱས་པ་དེ3.1%འཕར་ཡོད། གྲོང་ཁྱེར་དང་གྲོང་གསེབ་ཀྱི་གྲོང་མིའི་གཞི་རྩའི་རྒན་གསོའི་འགན་བཅོལ་ནང་ཞུགས་མཁན་ཁྲི230ཟིན་པའི་ནང་རྒན་གསོའི་འགན་བཅོལ་གྱི་ཐོབ་ཐང་ལོངས་སྤྱོད་བྱེད་མཁན་ཁྲི96.3ཟིན་ཡོད་པ་དང་། ལས་ཤོར་འགན་བཅོལ་ནང་ཞུགས་མཁན་མི་ཁྲི98.2ཟིན་ནས0.9%འཕར་ཡོད། གྲོང་ཁྱེར་དང་གྲོང་རྡལ་གྱི་གཞི་རྩའི་སྨན་བཅོས་འགན་བཅོལ་ནང་ཞུགས་མཁན་མི་གྲངས་ཁྲི732.6ཟིན་ནས0.7%འཕར་ཡོད། བུ་བཙའི་འགན་བཅོལ་ནང་ཞུགས་མཁན་མི་གྲངས་ཁྲི91.8ཟིན་ནས་མི་ཁྲི2.3འཕར་ཡོད། ལས་རྨས་འགན་བཅོལ་ནང་ཞུགས་མཁན་མི་གྲངས་ཁྲི137.4ཟིན་ནས་མི་ཁྲི2.1འཕར་ཡོད། 

9_7 སྦྲག་ཏར་འཕྲིན་གཏོང་།

ཧ་ཨེར་པིན་སྦྲག་སྲིད་ཅུས་ནི་ཀྲུང་གོའི་བྱང་ཤར་རྒྱུད་ཀྱི་སྦྲག་བསྐུར་བསྡུ་འགྲེམས་ལྟེ་གནས་དང་འཕྲིན་གཏོང་ལྟེ་གནས་གལ་ཆེན་ཞིག་ཡིན་པ་དང་། ཧ་ཨེར་པིན་གྲོང་ཁྱེར་དང་རྒྱལ་ཡོངས་ས་གནས་ཁག་གི་སྦྲག་སྲིད་འཕྲིན་གཏོང་དང་དེ་བཞིན་གོ་ལ་ཧྲིལ་པོའི་རྒྱལ་ཁབ་དང་ས་ཁུལ200ལྷག་ཙམ་གྱི་རྒྱལ་སྤྱིའི་འཕྲིན་ཡིག་དང་། འབོག་སྒྲིལ། དེ་བཞིན་དམིགས་བསལ་མྱུར་སྐྱེལ་བཅས་ཀྱི་ལས་སྒོ་གཉེར་ཆོག་པས་ཧ་ཨེར་པིན་ལྟེ་བར་བྱས་ཏེ་རྒྱལ་ཡོངས་དང་འཛམ་གླིང་ས་ཕྱོགས་ཁག་ཏུ་ཁྱབ་པའི་སྦྲག་སྲིད་འཕྲིན་གཏོང་དྲ་རྒྱ་ཞིག་ཆགས་ཡོད་པ་ཡིན།

9_8 ཐོན་ཁུངས་ཁོར་ཡུག

སྤྱི་ལོ2018ལོར་ཧ་ཨེར་པིན་གྱི་གཞུང་ཁོངས་འཛུགས་སྐྲུན་ལ་མཁོ་བའི་སའི་མཁོ་འདོན་བསྡོམས་འབོར་སྤྱི་ཆིང3568.3ཟིན་པ་དེ་ལོ་གོང་མ་ལས་93.5%འཕར་ཡོད། དེའི་ནང་བཟོ་གཏེར་མཛོད་ཁང་གི་སའི་སྤྱི་ཆིང་255.3ཟིན་ནས9.4%འཕར་བ་དང་། ཚོང་གཉེར་ས་ཁུལ་ལ་སྤྱི་ཆིང་80.9བཏང་ནས51.1%ཆག་ཡོད། སྡོད་ཁང་ཐད་སྤྱོད་པའི་སའི་སྤྱི་ཆིང293.5ཟིན་ནས་མར17.4%ཆག་པ། རྨང་གཞིའི་སྒྲིག་བཀོད་སོགས་ས་ཆ་གཞན་དག་གི་སྤྱི་ཆིང2938.7ཟིན་ནས169.7%འཕར་ཡོད། 

10 ལོ་རྒྱུས་རིག་གནས།
10_1 ཆོས་ལུགས།

ཧའ་ཨེར་པིན་གྱི་ཆོས་ལུགས་གཙོ་བོ་ནི་ཡེ་ཤུའི་ཆོས་ལུགས་དང་། ཏའོ་ཅའོ་ཆོས་ལུགས། སངས་རྒྱས་ཆོས་ལུགས། དབྱི་སི་ལམ་ཆོས་ལུགས། གནམ་བདག་ཆོས་ལུགས་བཅས་ཆོས་ལུགས་ཆེ་གྲས་ལྔ་དང་། མི་ཉུང་ཤས་ཀྱིས་ཏུང་ཀྲེང་ཆོས་ལུགས་དང་། ཡ་གུ་དཱ་པའི་ཆོས་ལུགས། ས་མན་ཆོས་ལུགས་བཅས་ལ་དད་མོས་བྱེད་བཞིན་ཡོད།

10_2 གོམས་གཤིས།
10_2_1 རི་ཁུལ་ཡུལ་སྐོར།

ལོ་རྒྱུས་ཐོག་བྱང་ཕྱོགས་རུ་སྤོ་མི་རིགས་ཀྱི་སྲོལ་རྒྱུན་ཤུགས་རྐྱེན་ཐེབས་པའི་དབང་གིས་དུས་རབས20པའི་ལོ་རབས90པར་ཧ་ཨེར་པིན་དུ་རི་ཁུལ་ཡུལ་སྐོར་གྱི་གོམས་སྲོལ་ཞིག་ཆགས་ཡོད་པ་དང་། བཅིངས་འགྲོལ་བཏང་རྗེས་སུ་དར་སྲོལ་ཉིན་རེ་བཞིན་དར་བཞིན་ཡོད་པར་མ་ཟད། ལས་ཁུངས་མང་པོ་ཞིག་གིས་དཔྱིད་དབྱར་སྟོན་གསུམ་གྱི་དུས་སུ་ལས་བཟོ་པའི་སྒྲིག་འཛུགས་བྱས་ནས་གྲོང་ཁྱེར་ཕྱི་རོལ་དུ་རི་ཁུལ་ཡུལ་སྐོར་ལ་འགྲོ་བཞིན་ཡོད། ལ་ལས་ཁྱིམ་ཚང་རེ་རྩིས་གཞི་རེར་བྱས་ནས་རི་ཁུལ་ཡུལ་སྐོར་ལ་འགྲོ་བཞིན་ཡོད་པ་དང་།  མི་རྣམས་ཀྱི་དངོས་པོ་དང་རིག་གནས་འཚོ་བའི་ཆུ་ཚད་མཐོ་རུ་ཕྱིན་པ་དང་བསྟུན་ནས་ཧ་ཨེར་པིན་གྱི་རི་ཁུལ་ཡུལ་སྐོར་དེ་གཞི་ཁྱོན་དེ་བས་ཆེ་བའི་ཡུལ་སྐོར་བྱེད་སྒོ་ཞིག་ཏུ་འཕེལ་རྒྱས་འགྲོ་བཞིན་ཡོད་པ་མ་ཟད། འཚོ་བའི་ཁྲོད་ཀྱི་རིག་གནས་རོལ་རྩེད་ཀྱི་ནང་དོན་གལ་ཆེན་ཞིག་ཏུ་གྱུར་ཡོད། 

10_2_2 རི་ཁུལ་ལྗོངས་ཟས།

ཧ་ཨེར་པིན་དུ་ཡུལ་སྐོར་གྱི་བྱེད་སྒོ་སྒྲིག་འཛུགས་སམ་ཡང་ན་རི་ཁུལ་ཡུལ་སྐོར་དུ་བྱེད་པའི་སྐབས་སུ་རི་ཁུལ་ལྗོངས་ཟས་དང་ཁ་འབྲལ་ཐབས་མེད་པ་ཡིན། ཧ་ཨེར་པིན་གྱི་རི་ཁུལ་ལྗོངས་ཟས་ལ་ལོ་རྒྱུས་ཀྱི་འབྱུང་རྩ་ཡོད་པ་དང་། བྱང་ཕྱོགས་གྲངས་ཉུང་མི་རིགས་ཀྱི་བཟའ་བཏུང་གོམས་གཤིས་དང་དེ་བཞིན་དུས་མཇུག་གི་ཡོ་རོབ་ཀྱི་རུ་སྤོས་ཡུལ་མིའི་འཚོ་བ་སྐྱེལ་སྟངས་ཀྱི་ཤུགས་རྐྱེན་ཐེབས་པའི་དབང་གིས་དུས་རབས20པའི་ལོ་རབས90པ་ནས་བཟུང་ཧ་ཨེར་པིན་དུ་རི་ཁུལ་ལྗོངས་ཟས་ཟ་བའི་གོམས་སྲོལ་རིམ་བཞིན་ཆགས་པ་ཡིན།

10_2_3 དགུན་དུས་ཆུ་རྐྱལ།

དགུན་དུས་ཆུ་རྐྱལ་ནི་ཧ་ཨེར་པིན་ས་གནས་ཀྱི་རིག་གནས་ཀྱི་ཁྱད་ཆོས་ལྡན་པའི་ལུས་རྩལ་བྱེད་སྒོ་ཞིག་ཡིན་པ་དང་། ཧ་ཨེར་པིན་གྱི་མིའི་གྲང་ངར་ལ་མི་འཛེམས་པའི་ལུས་སྟོབས་རྒྱས་པ་དང་བློ་སྟོབས་ཆེ་བ་མཚོན་ཡོད། དགུན་དུས་ཧ་ཨེར་པིན་གྱི་ཁང་པའི་ཕྱི་རོལ་གྱི་དྲོད་ཚད་ཀླད་ཀོར་འོག་གི་ཏུའུ་བཅུ་གྲངས་དང་ཉི་ཤུ་ལྷག་ཙམ་བར་ཆག་ཡོད། དགུན་དུས་ཆུ་རྐྱལ་བས་སུང་ཧྭ་གཙང་པོའི་དར་བླངས་ནས་དར་ཐོག་གི་ཆུ་རྐྱལ་རྫིང་བུ་ཞིག་བསྐྲུན་པ་དང་། དགུན་དུས་ཆུ་རྐྱལ་བའི་ཆུ་འཛུལ་དུས་ཚོད་མང་ཆེ་བ་ནི་ཉི་མ་མ་ཤར་བའི་ཆུ་ཚོད5ནས6བར་ཡིན་པ་དང་། དགུན་དུས་ཆུ་རྐྱལ་གྱི་འཁྲབ་སྟོན་དུས་ཚོད10ནས14བར་ཡིན། 

10_2_4 སྦི་རག་འཐུང་པ།

ཧ་ཨེར་པིན་གྱིས་དུས་རབས20པའི་དུས་འགོར་སྦི་རག་ཐོན་སྐྱེད་བྱས་པ་དང་། ཧ་ཨེར་པིན་སྦི་རག་བཟོ་གྲྭ་ནི་སྤྱི་ལོ1900ལོར་བཙུགས་པ་དང་ད་བར་ལོ་བརྒྱའི་ལོ་རྒྱུས་ཡོད། ཧ་ཨེར་པིན་སྦི་རག་གི་ལོ་རེར་འཛད་སྤྱོད་བྱེད་ཚད་ཏུན་ཁྲི30ལྷག་ཙམ་ཟིན་པ་དང་མི་རེའི་ཆ་སྙོམས་སྦི་རག་འཛད་སྤྱོད་བྱེད་ཚད་རྒྱལ་ཡོངས་ཀྱི་ཨང་དང་པོར་སླེབས་ཡོད་པ་དང་། ཚོང་རྟགས་གཙོ་བོ་ནི་ཧ་ཨེར་པིན་དང་ཞིན་སན་ཞིང་ཡིན།

10_2_5 འཁྱགས་སྒྲོན་ལ་བལྟ་བ།

ཧ་ཨེར་པིན་གྱི་འཁྱགས་སྒྲོན་ནི་ལོ་རབས60པའི་དུས་འགོར་འགོ་ཚུགས་པ་དང་དམངས་ཁྲོད་ཀྱི་སྲོལ་རྒྱུན་གྱི་སྒྱུ་རྩལ་རྣམ་པའི་ཐོག་ནས་འཕེལ་རྒྱས་བྱུང་བ་ཞིག་ཡིན་པ་དང་། དེ་ནི་སྐྱེད་ཚལ་སྒྱུ་རྩལ་ལ་བརྟེན་པ་དང་། ཨར་སྐྲུན་དང་འཇིམ་རྐོས་སྒྱུ་རྩལ་མཚོན་ཐབས་སུ་བྱེད་པ། གློག་སྒྲོན་འོད་ཁུངས་སུ་བྱེད་པ་བཅས་ཀྱི་ཐོག་ནས་འཁྱགས་པ་སྣ་ཚོགས་ཀྱི་བཟོས་པའི་ཡུལ་ལྗོངས་ཤིག་ཡིན་པ་དང་།  དུས་རབས20པའི་དུས་མཇུག་ཏུ་འཁྱགས་སྒྲོན་དེ་ཧ་ཨེར་པིན་གྱི་མཚོན་བྱེད་རང་བཞིན་ལྡན་པའི་གངས་འཁྱག་རིག་གནས་སྒྱུ་རྩལ་ཞིག་ཏུ་རིམ་བཞིན་འཕེལ་རྒྱས་བྱུང་ཡོད། ལོ་རེའི་གངས་འཁྱགས་དུས་ཆེན་དང་། འཁྱགས་སྒྲོན་དངོས་མང་སྟོན་ཚོགས་དེ་འཁྱགས་སྒྲོན་སྒྱུ་རྩལ་གྱི་མཛེས་ལྗོངས་ཁུལ་ཆེན་པོ་ཞིག་ཏུ་གྱུར་ཡོད་པ་དང་། རྒྱལ་ཁབ་ཕྱི་ནང་གི་ཡུལ་སྐོར་བ་མང་པོ་ཞིག་ལྟ་སྐོར་ལ་ཡོང་བར་བཀུག་ཡོད།

10_2_6 དར་ཐོག་གཉེན་སྟོན།

དར་ཐོག་གཉེན་སྟོན་ནི་ཧ་ཨེར་པིན་གྱི་ན་གཞོན་རྣམས་དགའ་བའི་གཉེན་སྟོན་གྱི་རྣམ་པ་ཞིག་ཡིན། དར་ཐོག་གཉེན་སྟོན་ནི་ཧ་ཨེར་པིན་གྱི་གཞོན་ནུའི་ཕོ་བྲང་གིས་གཙོ་གཉེར་བྱས་པ་དང་ཐུན་མོང་གི་མཉམ་དུ་སྤེལ་བ་ཞིག་ཡིན་ཞིང་། དེ་ནི་ཧ་ཨེར་པིན་གྱིས་ལོ་རེའི་གངས་འཁྱགས་དུས་ཆེན་གྱི་གྲུབ་ཆ་ཞིག་ཏུ་གྱུར་ཡོད། 

10_3 དུས་སྟོན།
10_3_1 ཧ་ཨེར་པིན་རྒྱལ་སྤྱིའི་གངས་འཁྱག་དུས་ཆེན། 

ཧ་ཨེར་པིན་རྒྱལ་སྤྱིའི་གངས་འཁྱག་དུས་ཆེན་ནི་ཀྲུང་གོའི་ལོ་རྒྱུས་ཐོག་གི་གངས་འཁྱགས་བྱེད་སྒོ་ནང་དོན་དུ་བྱས་པའི་རྒྱལ་སྤྱིའི་རང་བཞིན་གྱི་དུས་ཆེན་དང་པོ་དེ་ཡིན་པ་དང་ལོ་ལྟར་ཟླ1པོའི་ཚེས5ཉིན་འགོ་ཚུགས་ནས་ཟླ་བ་གཅིག་གི་རིང་རྒྱུན་མཐུད་བྱེད་ཀྱི་ཡོད། ཀྲུང་གོའི་ཧ་ཨེར་པིན་རྒྱལ་སྤྱིའི་གངས་འཁྱག་དུས་ཆེན་དང་འཇར་པན་གྱི་ཀྲ་ཧོང་གངས་དུས་ཆེན། ཁ་ན་ཏའི་ཁུའེ་པེ་ཁེ་དགུན་དུས་ཀྱི་རབ་དགའི་རོལ་རྩེད་དུས་ཆེན། ནོར་ཝེའི་ཨོ་སི་ལུའུ་གངས་ཤུད་དུས་ཆེན་བཅས་ལ་འཛམ་གླིང་གི་གངས་འཁྱག་དུས་ཆེན་ཆེ་གྲས་བཞི་ཞེས་བརྗོད་ཀྱི་ཡོད། སྤྱི་ལོ1985ལོའི་ཟླ་པོའི1ཚེས5ཉིན་བཙུགས་པ་ནས་བཟུང་རིག་གནས་དང་། ལུས་རྩལ། ཡུལ་སྐོར། དཔལ་འབྱོར་ཚོང་དོན། ཚན་རྩལ་སོགས་ཁྱབ་ཁོངས་མང་པོའི་བྱེད་སྒོ་གཞི་གཅིག་ཏུ་འདུས་པའི་དུས་ཚིགས་ཡག་ཤོས་ཤིག་བཏོད་ཡོད། ཡུལ་སྐོར་བས་འཁྱགས་སྒྲོན་དང་གངས་བརྐོས་ལྟ་ཆོག་པ་དང་། གངས་འཁྱག་རིག་རྩལ་མཚན་ཚོགས་ལ་ལྟ་ཆོག་པ་མ་ཟད། ད་དུང་གངས་འཁྱག་རོལ་རྩེད་རྣམ་གྲངས་ནང་ཞུགས་ཆོག 

10_3_2 ཧ་ཨེར་པིན་གྱི་དབྱར་ཁའི་རོལ་དབྱངས་སྤྲོ་ཚོགས། 

ཀྲུང་གོའི་ཧ་ཨེར་པིན་གྱི་དབྱར་ཁའི་རོལ་དབྱངས་སྤྲོ་ཚོགས་དེ་སྤྱི་ལོ1961ལོའི་ཟླ8པར་གཉེར་འགོ་ཚུགས་པ་དང་། ལོ་རེའི་ཟླ8པའི་ཚེས6ནས་ཚེས15བར་འཚོགས་པ་དང་དུས་ཡུན་ཉིན10ཡིན། དེ་ནི་ས་གནས་ཀྱི་སྲོལ་རྒྱུན་རོལ་དབྱངས་དུས་ཆེན་ཞིག་ཡིན་ལ། ཀྲུང་གོའི་སྲོལ་རྒྱུན་གྱི་རོལ་དབྱངས་སྤྲོ་ཚོགས་དང་། ཧྲང་ཧའེ་ཡི་དཔྱིད་ཀའི་རྒྱལ་སྤྱིའི་རོལ་དབྱངས་དུས་ཆེན་དང་ཀོང་ཀྲོའུ་དབྱང་ཁྲེང་རོལ་དབྱངས་འདུ་ཚོགས་བཅས་ལ་ཀྲུང་གོའི་རོལ་དབྱངས་སྤྲོ་ཚོགས་ཆེན་པོ་གསུམ་གྱི་གྲས་ཤིག་ཀྱང་རེད་ཅེས་བརྗོད་པ་མ་ཟད། ཧ་ཨེར་པིན་རོལ་དབྱངས་གྲགས་ཅན་གྲོང་ཁྱེར་གྱི་གོ་གནས་ཀྱང་བཏིང་ཡོད། སྤྱི་ལོ2010ལོར་ཧ་ཨེར་པིན་མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་རྩ་འཛུགས་ཀྱི་གོ་ལ་ཧྲིལ་པོའི་གསར་གཏོད་གྲོང་ཁྱེར་དྲ་རྒྱ་ཡིས་རོལ་དབྱངས་གྲོང་ཁྱེར་ལ་གཏན་འཁེལ་བྱས་པ་ཡིན།

11 མཛེས་ལྗོངས་གྲགས་ཅན།

ཧ་ཨེར་པིན་ལ་སྔར་ནས་ཤར་ཕྱོགས་ཀྱི་ཕ་རི་སི་ཆུང་ཆུང་དང་ཤར་ཕྱོགས་ཀྱི་མོ་སི་ཁོ་ཞེས་པའི་མཚན་སྙན་ལྡན་པ་དང་། གྲོང་ཁྱེར་ནང་གི་བཟོ་བཀོད་ཀྲུང་གོ་དང་ནུབ་ཕྱོགས་ཟུང་འབྲེལ་བྱས་ཡོད། སྤྱི་ལོ1998ལོར་རྒྱལ་ཁབ་ཡུལ་སྐོར་ཅུས་ཀྱིས་ཀྲུང་གོའི་ཕུལ་བྱུང་ཡུལ་སྐོར་གྲོང་ཁྱེར་ཁག་དང་པོར་བདམས་པ་དང་།  གྲོང་ཁྱེར་ནང་ཁུལ་དུ་དཀོན་མཆོག་སུའོ་ཧྥེ་ཡའི་ཆོས་ཁང་དང་། ཉི་ཀུའུ་ལ་ཆོས་ཁང་། ཨུ་རུ་སུའི་ཤིང་ཁང་། ཀེ་ཐེ་རྣམ་པའི་ཐོག་ཁང་། ཀྲུང་དབྱང་ཁྲོམ་གཞུང་། ཧ་ཨེར་པིན་གླིང་སྣེའི་འགྲེམས་ཁང་། ཞོད་འགོག་དྲན་གསོའི་མཆོད་རྟེན། རིག་གནས་ལྷ་ཁང་། ཅི་ལེ་དགོན་པ། ཤའོ་ཧུང་གི་བཞུགས་གནས་རྙིང་པ། སུའུ་ལེན་དམར་དམག་སྔོན་གཤེགས་དཔའ་བོའི་དྲན་གསོའི་རྡོ་རིང་སོགས་རིག་དངོས་གནའ་ཤུལ་དང་། བྱང་ཤར་ནགས་ར། ཡ་པུའུ་ལི་གངས་ཤུད་ཡུལ་སྐོར་སྤྲོ་གསེང་ཁུལ། གདོད་མའི་ནགས་ཚལ་སོགས་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་ཀྱི་རང་བྱུང་མཛེས་ལྗོངས500ལྷག་ཙམ་ཡོད།


དཔྱད་གཞིའི་ཡིག་ཆ།

བརྡ་འགྲེལ་གདོང་འཛར།

ཧ་ཨེར་པིན། ཧའེ་ལུང་ཅང་། མཛེས་ལྗོངས།