དཔོན་ཚང་གི་བུ་རྒྱུད་ལ་སྐྱོ་སྣང་སྐྱེས་པ།སྔ་མའི་པར་གཞི་དེ ལ་ཁ་གནམ་ལྷ་ཚེ་རིང ནས 2020-01-02 10:35ལ་འགྲུབ།
དཔོན་ཚང་གི་བུ་རྒྱུད་ལ་སྐྱོ་སྣང་སྐྱེས་པ།
དཔོན་ཚང་གི་བུ་རྒྱུད་ལ་སྐྱོ་སྣང་སྐྱེས་པ།
སྙན་ངག་འདིའི་ཁྲོད་ཀྱི་ཡུལ་ལྗོངས་བྲིས་པ་ཡོད་པ་ནི་སྙན་ངག་པས་རང་ཉིད་ཀྱི་མྱོང་ཚོར་དངོས་བརྒྱུད་དེ་བྲིས་པ་ཡིན་པས། བརྩེ་དུང་ངོ་མ་དང་། དོན་བརྗོད་དོན་གསལ། ཁ་གསལ་གོ་བདེ། བྱམས་བརྩེ་ལྡན་པ་བཅས་ཀྱིས་བཅངས་ཡོད་དོ༎
གཞི་རྩའི་གནས་ཚུལ།
མ་ཡིག་གི་ཁ་བྱང་།
哀王孙
འགྱུར་ཡིག་གི་ཁ་བྱང་།
དཔོན་ཚང་གི་བུ་རྒྱུད་ལ་སྐྱོ་སྣང་སྐྱེས་པ།
རྩོམ་པ་པོ།
杜甫
ལོ་ཙཱ་བ།
མགོ་ལོག་རྣམ་རྒྱལ།
1
མ་ཡིག
长安城头头白鸟，夜飞延秋门上呼。
又向人家啄大屋，屋底达宫走避胡。
金鞭断折九马死，骨肉不得同驰驱。
腰下宝玦青珊瑚，可怜王孙泣路隅。
问之不肯道姓名，但道困苦乞为奴。
已经百日窜荆棘，身上无有完肌肤。
高帝子孙尽隆准，龙种自与常人殊。
豺狼在邑龙在野，王孙善保千金躯。
不敢长语临郊衢，且为王孙立斯须。
昨夜东风吹血腥，东来橐驼满旧都。
朔方健儿好身手，昔何勇锐今何愚。
窃闻天子已传位，圣德北服南单于。
花门嫠同请雪耻，慎勿出口他人狙。
哀哉王孙慎勿疏，五陵佳气无时无。
2
འགྱུར་ཡིག
ཁྲང་ཨན་མཁར་འགོར་བྱ་རོག་མགོ་དཀར་བབས༎ མཚན་མོ་འཕུར་ཏེ་ཡན་ཆིའུ་སྒོ་སྟེང་གྲགས༎
སླར་ནི་ཁྱིམ་ཆེན་ཁང་རྩེར་རྭ་མཆུས་བཏོགས༎ ནང་གི་དཔོན་པོ་སྐྲག་ནས་བྲོས་ཤིང་བྱོལ༎
གསེར་གྱི་ལྕག་ཆད་རྟ་དགུ་ངལ་བས་ཤི། ཤ་རུས་གཅིག་ཀྱང་མཉམ་དུ་བགྲོད་ཐབས་བྲལ༎
སྐེད་ཉར་དོ་ཤལ་བྱུ་རུ་སྔོན་པོ་ཡི༎ དཔོན་རིགས་ལམ་འགྲམ་ངུ་བ་སྙིང་རྗེའི་ཡུལ༎
དྲིས་པའི་མོད་ལ་རང་མིང་བརྗོད་མི་བྲ༎ འཚོ་བ་སྐྱོ་བས་བྲན་ཁོལ་འདོད་ཅེས་སྨྲ༎
ཚེར་མའི་གསེབ་ཏུ་ཉིན་བརྒྱར་བྲོས་གྱུར་བས༎ ལུས་ཀྱི་སྟེང་དུ་མཁྲང་ས་གཅིག་ཀྱང་མེད༎
ཀའོ་ཏིས་བུ་རྒྱུད་ཐམས་ཅད་ཤངས་མཐོ་བ༎ འབྲུག་གི་རིགས་རྒྱུད་གཞན་ལས་ཁྱད་པར་འཕགས༎
མཁར་དུ་འཕར་སྤྱང་འབྲུག་ནི་སྒོ་རུ་ཕུད༎ རྒྱལ་རིགས་རིན་ཆེན་ལུས་རྟེན་ཅ་ག་བྱོས༎
ལམ་འགྲམ་ལབ་རིང་བྱེད་པར་མ་ཕོད་ལ༎ གང་སླད་རེ་ཞིག་ལངས་ཏེ་སེམས་གསོ་བྱ༎
མདང་དགོང་ཤར་གྱི་རླུང་གིས་ཁྲག་དྲི་ཁུར༎ མཁར་སྙིང་ནང་དུ་ཤར་གྱི་རྔ་མོས་གང་༎
ཧྲུའོ་ཧྥེང་བུ་རྒོད་ནུས་རྩལ་ཁྱད་འཕགས་ཅན༎ སྔ་དུས་དཔའ་མཛངས་ད་ལྟ་ཅི་འདྲ་བླུན༎
གནམ་སྲས་རྒྱལ་སར་འཁོད་ཅེས་ལྐོག་ནས་ཐོས༎ འཕགས་པའི་སྤྱོད་པས་ལྷོ་ཡི་ཁྲན་དབྱི་བཏུལ༎
དེ་ཡིས་དགྲ་ཤ་ལེན་ཞེས་བཞིན་ཁྲག་བཏོན༎ ཁ་ནས་མ་གླེང་གཞན་གྱིས་གླེགས་འཚོལ་འགྱུར༎
ཀྱེ་མ་དཔོན་པོའི་བུ་རྒྱུད་སེམས་ཆུང་མཛོད༎ བང་སོ་ལྔ་ཡི་རླུང་རྟ་མེད་དུས་མེད༎
3
མཆན།
བྱ་རོག་མགོ་དཀར། དཀྲ་མི་ཤེས་པའི་བྱ་ཞིག
ཡན་ཆིའུ་སྒོ ཐང་རྒྱལ་གྱི་ནུབ་སྒོ
མཁྲང་། སུབ་དང་གས་མེད་པའི་དོན།
ཀའོ་ཏིས། ཧན་ཀའོ་ཏིས་ཏེ་ལིའུ་པང་གི་མིང་།
ཤངས། སྣའི་ཞེས་ས།
འབྲུག་གི་རིགས་རྒྱུད། རྒྱལ་པོ་རྣམས་འབྲུག་གི་རྒྱུད་པ་ཡིན་པར་སེམས།
འཕར་སྤྱང་། འདིར་ཨན་ལོའུ་ཧྲན་བསྟན།
ཅ་ག གཅེས་སྤྲས་ཞེས་པའི་དོན།
ཧྲུའོ་ཧྥེང་། ཀའོ་ཧྲོའུ་ཧན་ལ་གོ་དགོས།
གནམ་སྲས། ཐང་རྒྱལ་ཞོན་ཙུང་རྒྱལ་ས་སུའུ་ཙུང་ལ་སྤྲད་པའི་དོན།
ཁྲན་དབྱི། མི་རིགས་གྲངས་ཉུང་ཞིག་གི་མིང་།
བཞིན་ཁྲག་བཏོན། མི་རིགས་དེས་མནའ་བོར་བའི་ཚེ་གདོང་ལས་ཁྲག་བཏོན་པའོ༎
བང་སོ་ལྔ། ཐང་ཀའོ་ཙུའུ། ཐང་ཐའེ་ཙུང་། ཐང་ཀྲུང་ཙུང་། ཐང་རུའེ་ཙུང་བཙས་ཀྱི་བང་སོ༎
4
རྩོམ་པ་པོ་ངོ་སྤྲོད།
ཏུའུ་ཕུའུ། （712-770） ཕ་ཡུལ་ནི་ཧུའུ་པེ་ཞང་དབྱང་ནས་ཡིན་ཞིང་། ཕྱིས་སུ་ཧོ་ནན་ཀུང་རྫོང་དུ་གནས་སྤོས་པ་ཡིན། ཁོང་ནི་ཐང་རྒྱལ་རབས་དུས་ཀྱི་རླབས་ཆེ་བའི་དངོས་ཡོད་རིང་ལུགས་ཀྱི་སྙན་ངག་པ་ཞིག་ཡིན་པར་མ་ཟད། བརྩམས་ཆོས་ལ《མཐོ་སར་འཛེགས་པ》དང《ཤར་གྱི་ལྷུན་པོར་ལྟ་བ》སོགས་ཡོད་དོ༎
5
ལོ་ཙཱ་བ་ངོ་སྤྲོད།
ལོ་ཙཱ་བ་མགོ་ལོག་རྣམ་རྒྱལ་ལགས་ནི་མཚོ་སྔོན་གཅིག་སྒྲིལ་རྫོང་དུ་སྐྱེས་ཤིང་། ད་ལྟ་ཀྲུང་གུང་མགོ་ལོག་ཁུལ་ཨུའི་ཧྲུའུ་ཅུ་གཞོན་པ་དང་མགོ་ལོག་ཁུལ་མི་དམངས་སྲིད་གཞུང་གི་ཁུལ་གཙོའི་འགན་བཞེས་ཡོད་ལ། མིག་སྔར་ཁོང་གིས《ཐང་གི་སྙན་ངག་སུམ་བརྒྱ་བ》《བསླབ་ཆེན་གྱི་གཞུང》《སུན་ཙིའི་དམག་ཇུས་དང་ཇུས་བློའི་ཁུག་པ་སོ་དྲུག》《མེང་ཙི》《སློབ་གསོའི་ཟིན་ཏིག》《 སློབ་བུའི་བསླབ་བྱ།》《 བྱིས་པའི་གཙུག་ལག་འབྲུ་གསུམ་པ》《 ལིའོ་ཊིའི་གཏམ་རྒྱུད་བདམས་བསྒྱུར》《དབུས་འཛིན་གྱི་གཞུང》《ཁུང་ཙིའི་གསུང་སྒྲོས》སོགས་དེབ་ཕྲེང་བཅུ་གསུམ་རྒྱ་ཡིག་ནས་བོད་ཡིག་ཏུ་བསྒྱུར་ཏེ་མི་རིགས་དཔེ་སྐྲུན་ཁང་གིས་དཔེ་སྐྲུན་བྱས་ཡོད་དོ༎
དཔྱད་གཞིའི་ཡིག་ཆ།