噫吁口戏,危乎高哉!
蜀道之难,难于上青天!
蚕丛及鱼凫,开国何茫然!
尔来四万八千岁,不与秦塞通人烟。
西当太白有鸟道,可以横绝峨嵋巅。
地崩山摧壮士死,然后天梯石栈方钩连。
上有六龙回日之高标,下有冲波逆折之回川。
黄鹤之飞尚不得过,猿猱欲度愁攀援。
青泥何盘盘,百步九折萦岩峦。
扪参历井仰胁息,以手抚膺坐长叹。
问君西游何时还?畏途巉岩不可攀。
但见悲鸟号古木,雄飞从雌绕林间。
又闻子规啼夜月,愁空山。
蜀道之难,难于上青天,使人听此凋朱颜。
连峰去天不盈尺,枯松倒挂倚绝壁。
飞湍瀑流争喧豗,砯崖转石万壑雷。
其险也若此,嗟尔远道之人,胡为乎来哉。
剑阁峥嵘而崔嵬,一夫当关,万夫莫开。
所守或匪亲,化为狼与豺。
朝避猛虎,夕避长蛇,磨牙吮血,杀人如麻。
锦城虽云乐,不如早还家。
蜀道之难,难于上青天,侧身西望长咨嗟。
ཨེ་མ་ཇི་འདྲའི་མཐོ་ཞིང་གཟར་བ་ལ༎ ཧྲུའུ་ལམ་བགྲོད་པ་གནམ་དུ་འགོས་ལས་དཀའ༎
ཚན་ཆུང་དང་ནི་ཡུས་ཧྥུ་རྒྱལ་པོ་ཡིས༎ རྒྱལ་ཁབ་བཙུགས་ཏེ་དུས་ཀྱིས་རབ་ཏུ་བསྐལ༎
དེའི་རྗེས་ལོ་ནི་བཞི་ཁྲི་བརྒྱད་སྟོང་ལ༎ ཆིན་སའེ་ཕྱོགས་དང་འགྲིམ་འགྲུལ་རྒྱུ་བས་དབེན༎
ནུབ་ཏུ་ཐའེ་པའེ་རི་བོ་ལམ་བུ་ཕྲ༎ འདབ་ཆགས་ཡིན་ཚེ་འགྱིང་རིར་འཕྲེད་དུ་སྒྲོལ༎
ས་བརྡིབས་རི་བསྙིལ་དཔའ་བོ་ཤི་བ་ནས༎ གནམ་སྐས་རྡོ་ཟམ་ལས་ནི་ཕན་ཚུན་སྦྲེལ༎
སྟེང་དུ་རྟ་བདུན་བསྐོར་བའི་ཡང་རྩེ་དང་༎ ཞོལ་དུ་རྦ་ཀློང་འཁོར་བའི་གཙང་པོ་ཡོད༎
ཁྲུང་སེར་འཕུར་ཡང་རི་བོར་བརྒལ་མི་ནུས༎ སྤྲ་ནི་འཛེགས་པར་འདོད་ལ་འགོས་པར་སུན༎
ཆིན་ཉི་རི་བོ་ཀྱག་ཀྱོག་རབ་ཏུ་ཆེ༎ གོམ་བརྒྱའི་ལམ་ལ་བྲག་རྡོར་སྐོར་ར་དགུ༎
རྒྱུ་སྐར་ལ་རེག་དབུགས་ཀྱི་གཏོང་རྔུབ་བཞག། བྲང་ཁར་བྱུགས་བཞིན་བསྡད་དེ་ཤུགས་རིང་འཐེན༎
སྐུ་ཉིད་ནུབ་ཕྱོགས་འགྲིམ་ན་ནམ་ཞིག་ལོག། ལམ་བཟང་འཇིགས་ལ་བྲག་རིར་འགོས་པར་དཀའ༎
སྡོང་རྒན་བྱ་ཡིས་གཅོང་སྐད་འདོན་པ་མཐོང་༎ ཕོ་བྱ་འཕུར་ལ་མོ་བྱ་ནགས་སུ་འཁོར༎
མཚན་ཟླའི་འོག་ཏུ་ཁུ་བྱུག་འཁུས་པ་ཐོས༎ སྐྱོ་བའི་བྱ་སྐད་རི་ལུང་སྟོང་བར་ཁྱབ༎
ཧྲུའུ་ལམ་བགྲོལ་པ་གནམ་དུ་འགོས་ལས་དཀའ༎ མི་ཡིས་ཐོས་ཚེ་བཞིན་གྱི་གསོན་མདངས་ཉམས༎
རི་རྩེ་མུ་འབྲེལ་གནམ་དུ་རེག་ལ་ཁད༎ ཐང་ཤིང་སྐམ་པོ་གཡང་གཟར་བྲག་རིར་འཕྱང་༎
རྦབ་ཆུ་དྲག་ཏུ་བཞུར་བས་འུར་སྒྲ་འགྲན༎ རྡོ་ཆུ་འཐབ་པས་ལུང་སྟོང་འབྲུག་སྒྲ་བཞིན༎
ཧྲུའུ་ལམ་འདི་དག་བགྲོད་པར་དཀའ་བ་ན༎ ཐག་རིང་མགྲོན་པོ་ཁྱོད་ནི་ཅི་ལྟར་འོང་༎
ཅན་ཀོ་རི་བོ་མཐོ་གཟར་ཀྱག་ཀྱོག་ལྡན༎ འགག་སྲུང་གཅིག་ལས་ཁྲི་ཕྲག་ཐར་པར་དཀའ༎
འགག་སྲུང་བ་དེ་བློ་ཡིས་ལྕོགས་མིན་ཚེ༎ ནམ་ཞིག་འཕར་སྤྱང་གྱུར་ནས་ཟིང་འཁྲུག་བསླང་༎
སྔ་མོའི་དུས་སུ་གཏུམ་དྲག་སྟག་ལ་གཡོལ༎ ཕྱི་དྲོ་ལའང་དུག་ཆེན་སྦྲུལ་ལ་འཛེམས༎
མཆེ་བ་བརྡར་ལ་མི་ཡི་ཁྲག་བརྔུབས་ཅིང་༎ བསད་པའི་མི་ནི་གཟེ་མ་རྭ་མགོ་བཞིན༎
ཁྲེང་ཏུའུ་མཁར་ནི་སྐྱིད་ཅེས་སྨྲ་ནའང་༎ དེ་ལས་སྔ་མོར་ཡུལ་བར་ལག་པར་བྱ༎
ཧྲུའུ་ལམ་བགྲོད་པ་གནམ་དུ་འགོས་ལས་དཀའ༎ བཟུར་ནས་ནུབ་ཏུ་བལྟ་ཞིང་ཤུགས་རིང་འཐེན།
ཧྲུའུ་ལམ། སི་ཁྲོན་དུ་བགྲོད་པའི་ལམ།
ཚན་ཚུང་དང་ཡུས་ཧྥུ། ཧྲུའུ་རྒྱལ་གྱི་རྒྱལ་པོ་ཐོག་མ་གཉིས།
ཆིན་སའེ། ཆིན་གྱི་ས་ཆ་སྟེ། ད་ལྟའི་ཧྲན་ཞི་ཞིང་ཆེན་གྱི་ས་ཕྱོགས།
ཐའེ་པའེ་རི་བོ། ཧྲའན་ཞི་མེ་ཞན་རྫོང་གི་ཤར་ལྷོའི་རི་བོ་ཞིག་གི་མིང་།
ས་བརྡིབས། གནའ་བོའི་ལྷ་སྒྲུང་དུ། ཆིན་རྒྱལ་བོས་ཧྲུའུ་ཡི་སྒོ་ཐེམ་ཕྱེ་སྐབས་ཆིན་རྒྱལ་གྱིས་མཛེས་མ་ལྔ་ཧུའུ་ཡི་རྒྱལ་པོར་བརྫངས། ཧྲུའུ་ཡིས་གྱད་པོ་ཆེ་ལྔ་མཛེས་མ་རྣམས་བསུ་བར་མངགས། ཙི་ཐུང་དུ་སླེབས་སྐབས། སྦྲུལ་ཆེན་པོ་ཞིག་ཁུང་བུར་འཛུལ་བ་དང་འཕྲད། གྱད་པོ་ཆེ་རྣམས་ཀྱིས་སྦྲུལ་གྱི་རྔ་མར་འཇུས་ཏེ་ཕྱིར་ལེན་པར་བསམ་ཡང་མཐར་རི་བོ་བསྙིལ་ནས་གྱད་པོ་ཆེ་དང་མཛེས་མ་རྣམས་མནན་ནས་ཤི། རི་ནི་དུམ་བུ་ལྔ་རུ་གྱེས་ཏེ་ཆིན་དང་ཧྲུའུ་ཡི་རྒྱུ་བརྩམས་སོ་ཞེས་སོ༎
ཆིན་ཉི་རི་བོ། ཧྲའན་ཞི་ལི་དབྱང་རྫོང་ནུབ་བྱང་གི་རི་བོ་ཞིག
གཅོང་སྐད། ཉམ་ཐག་པའི་སྐད་ཀྱི་མིང་།
ཅན་ཀོ སི་ཁྲོན་གྱི་ས་མིང་།
ལྕོགས། ཐུབ་པའམ་ནུས་པ།
གཟེམ་རཱ་མགོ གསོ་མའོ།
ཁྲེང་ཏུའུ། སི་ཁྲན་གྱི་ཞིང་ཆེན་ལྟེ་གནས།
ལི་པའེ། (701-762)མིང་གཞན་ལ་ཐའེ་པེ་ཟེར། ཐང་རྒྱལ་རབས་སྐབས་ཀྱི་རླབས་ཆེ་བའི་འཆར་ཡན་རིང་ལུགས་ཀྱི་སྙན་ངག་པ་ཞིག་ཡིན་ལ། རྗེས་རབས་པ་རྣམས་ཀྱིས་ཁོང་ལ“སྙན་ངག་གི་ལྷ”ཞེས་པའི་མཚན་སྙན་བཏགས་ཡོད། ཚབ་མཚོན་བརྩམས་ཆོས་ལ《ལུའུ་ཧྲན་རྦབ་ཆུ་ལ་ལྟ་བ》དང་། 《འགྲོ་ལམ་ཀྱག་ཀྱོག》《བགྲོད་པར་དཀའ་བའི་ཧྲུའུ་ལམ》《ཆང་འདྲེན》སོགས་ཡོད་པར་མ་ཟད། ཕྱི་རབས་པས《ལི་པའེ་ཡི་སྙན་ངག་ཕྱོགས་སྒྲིག》སོགས་བསྒྲིགས་ཡོད་དོ༎
ལོ་ཙཱ་བ་མགོ་ལོག་རྣམ་རྒྱལ་ལགས་ནི་མཚོ་སྔོན་གཅིག་སྒྲིལ་རྫོང་དུ་སྐྱེས་ཤིང་། ད་ལྟ་ཀྲུང་གུང་མགོ་ལོག་ཁུལ་ཨུའི་ཧྲུའུ་ཅུ་གཞོན་པ་དང་མགོ་ལོག་ཁུལ་མི་དམངས་སྲིད་གཞུང་གི་ཁུལ་གཙོའི་འགན་བཞེས་ཡོད་ལ། མིག་སྔར་ཁོང་གིས《ཐང་གི་སྙན་ངག་སུམ་བརྒྱ་བ》《བསླབ་ཆེན་གྱི་གཞུང》《སུན་ཙིའི་དམག་ཇུས་དང་ཇུས་བློའི་ཁུག་པ་སོ་དྲུག》《མེང་ཙི》《སློབ་གསོའི་ཟིན་ཏིག》《 སློབ་བུའི་བསླབ་བྱ།》《 བྱིས་པའི་གཙུག་ལག་འབྲུ་གསུམ་པ》《 ལིའོ་ཊིའི་གཏམ་རྒྱུད་བདམས་བསྒྱུར》《དབུས་འཛིན་གྱི་གཞུང》《ཁུང་ཙིའི་གསུང་སྒྲོས》སོགས་དེབ་ཕྲེང་བཅུ་གསུམ་རྒྱ་ཡིག་ནས་བོད་ཡིག་ཏུ་བསྒྱུར་ཏེ་མི་རིགས་དཔེ་སྐྲུན་ཁང་གིས་དཔེ་སྐྲུན་བྱས་ཡོད་དོ༎