གདེང་འཇོག་དཔྱད་བརྗོད་ཀྱི་རིགས་ནི་ལོ་རྒྱུས་རྩོམ་པ་པོས་དཔྱད་བརྗོད་ཚད་གཞི་གཏན་འཁེལ་བྱས་པའི་རྨང་གཞིའི་འོག ད་གཟོད་བརྗོད་བྱའི་དོན་དེར་ཡིན་མིན་གྱི་གདེང་འཇོག་བྱེད་པ་ཞིག་ཡིན་ལ། ལོ་རྒྱུས་ལ་ངོས་འཛིན་བྱེད་སྟངས་ཤིག་ཀྱང་ཡིན་ཏེ། ལོ་རྒྱུས་སྨྲ་བ་པོས་ལོ་རྒྱུས་སྟེང་གི་མི་སྣ་དང་དོན་རྐྱེན། སྣང་ཚུལ་སོགས་ལ་རང་ངོས་ནས་ངོས་འཛིན་ཤེས་རྟོགས་བྱེད་སྐབས། རྒྱུན་དུ་གདེང་འཇོག་རང་བཞིན་གྱི་ཚིག་བཀོལ་སྤྱོད་བྱེད་པས་ཡིན།
གདེང་འཇོག་དཔྱད་བརྗོད་ཀྱི་སྐོར་ལ་དཔེར་ན།“ཆོས་སྐྱོང་རྒྱལ་པོ་ཁྱེད་རྣམས་མ་འཁྲུངས་ན། ། མཐའ་འཁོབ་དུས་མཐར་སྐྱེས་པའི་བོད་འབངས་རྣམས། ། བལྟ་ལོག་སྡིག་ཚོགས་ཀྱིས་ནོན་རྨུ་རྒོད་ལས། །དམ་པ་ཆོས་ཀྱི་སྒྲ་ཡང་མི་གྲག་པས། ། དྲུག་གུ་སྟག་གཟིག་གར་ལོག་གོག་སོགས་ཀྱི།། མཐའ་ཁོབ་བླ་ཀློ་རྣམས་དང་ཁྱད་མེད་པ། ། མ་རིག་མུན་པའི་ཐིབས་ཚོགས་ཀྱིས་ནོན་ལ། ། དམ་ཆོས་སྒྲོན་མ་བྱིན་པས་གསལ་མཛད་ཅིང་། ། ཕན་བདེར་འགོད་པའི་རྗེ་རྒྱལ་ཁྱེད་རྣམས་ཀྱིས། ། བཀའ་དྲིན་འདི་ལ་ཅིས་ཀྱང་ལན་མི་ལོན། །” ཞེས་བྱུང་བ་ལྟ་བུ་དང་། “མཚལ་པ་སི་ཏུ་དགེ་བའི་བློ་གྲོས་དེ། ། འཇིག་རྟེན་གཞན་ན་དེ་འདྲ་སུ་ཞིག་གདུང་། ། རྒྱལ་རབས་དེབ་ཐེར་སྒྲིག་ལ་མཁས་པ་ཡི། ། བྱེད་པ་གཉིས་པ་ཡོད་དོ་ཤེས་པར་གྱིས། ། རིགས་གཟུགས་ནོར་གྱིས་བརྒྱན་པ་མང་ན་ཡང་། ། འདི་ལྟའི་ལེགས་བཤད་བྱེད་པོ་དཀོན་པ་ལས། ། ལོ་རྒྱུས་གཏམ་ལ་ཆགས་པ་མ་སེམས་པར། ། ནོར་བུས་ནམ་མཁའ་བཀང་ནས་མཆོད་ཀྱང་རུང་། །” ཞེས་པ་ལྟ་བུ་དང་། “ཇུར་ཆིད་ཀྱི་སྲིད་མིང་ནི་དའི་ཀིན། གསེར་གྱི་རྒྱལ་པོ་ཡང་ཟེར། མངའ་ཐང་ཁི་དན་དང་མཉམ་ལ་ཆོས་ལ་ཡང་དཀར་བར་འདུག་སྣང” ཞེས་པ་ལྟ་བུ་ཡིན་ཞིང་། དཔྱད་བརྗོད་དེ་རིགས་ཀྱིས་ལོ་རྒྱུས་རྩོམ་པ་པོའི་དཔྱད་བརྗོད་ཚད་གཞི་མཚོན་པར་བྱེད་ཀྱི་ཡོད།